ନନ୍ଦିଘୋଷ ବ୍ୟୁରୋ : କେନ୍ଦୁଝରରେ ଗୋଟିଏ ପରିବାରର ୩ ଜଣଙ୍କୁ ହତ୍ୟା ଘଟଣା । ଏହି ହତ୍ୟା ଘଟଣାରେ ୩ ଜଣ ସାମିଲ ଥିବା ବେଳେ ସୋମାନଙ୍କ ମଧ୍ୟରେ ଜଣେ ନାବାଳକ ରହିଛନ୍ତି । ତେଣୁ ମୁଖ୍ୟ ଅଭିଯୁକ୍ତ ଲକ୍ଷ୍ମଣ ଓ ତା ବଡ ଭାଇ ବୈଦ୍ୟନାଥକୁ ନେଇ ପୋଲିସ ସିନ ରିକ୍ରିଏସନ କରିଛି । ଉଭୟ ଅଭିଯୁକ୍ତ ଆଜି ହତ୍ୟା ଘଟଣାର କଳା କାହାଣୀ ବର୍ଣ୍ଣନା କରିଛନ୍ତି । କେନ୍ଦୁଝର ଜିଲ୍ଲା ଘଷିପୁରା ଥାନା ଖାଳିଆମେଣ୍ଟା ପଂଚାୟତ ନିଆଳିଝରଣ ଗାଁରେ ଜଘନ୍ୟ ହତ୍ୟାକାଣ୍ଡ ଘଟିଥିଲା । ଏହି ଗାଁର ବୈଦ୍ୟନାଥଙ୍କ ଝିଅ ରୁପାର ଅନେକ ସମୟରେ ଦେହ ଅସୁସ୍ଥ ରହୁଥିଲା । ବଡ଼ ଭାଇ ଜିତେନ୍ଦ୍ରଙ୍କ ପରିବାର କିଛି ଗୁଣି ଗାରେଡି କରୁଥିବା ସନ୍ଦେହ କରୁଥିଲେ ସାନ ଭାଇ ଲକ୍ଷ୍ମଣ ସୋରେନ ଓ ବୈଦ୍ୟନାଥ ସୋରେନ । ତେଣୁ ଲକ୍ଷ୍ମଣ ସୋରେନ ତାଙ୍କ ଭାଇ ବୈଦ୍ୟନାଥ ସୋରେନ ଓ ପୁତୁରା ସୁଦାମ ଅଚାନକ ବଡଭାଇ ଜିତେନ୍ଦ୍ର ସୋରେନଙ୍କ ଘରେ ପହଁଞ୍ଚି ପ୍ରଥମେ ବଚସା କରିଥିଲେ । ପରେ ଉତକ୍ଷିପ୍ତ ହୋଇ ଜିତେନ୍ଦ୍ରଙ୍କ ପରିବାର ଉପରେ ଆକ୍ରମଣ କରିଥିଲେ । ଲକ୍ଷ୍ମଣ ପାଖରେ ପଡ଼ିଥିବା ଏକ ଟାଙ୍ଗିଆରେ ପ୍ରଥମେ ଜିତେନ୍ଦ୍ରଙ୍କ ସ୍ତ୍ରୀ ମାଳତୀକୁ ହାଣିଥିଲା । ସେଠାରୁ ଜିତେନ୍ଦ୍ର ଦୌଡ଼ି ପଳାଉଥିବା ବେଳେ ଦୌଡ଼ି ଯାଇ ତାଙ୍କୁ ମଧ୍ୟ ହାଣି ଦେଇଥିଲା । ସେଠାରୁ ଫେରିବା ପରେ ଜିତେନ୍ଦ୍ରର ନାବାଳିକା ଝିଅକୁ ହାଣି ଦେଇଥିଲା । ପୋଲିସ ଆଗରେ ଲକ୍ଷ୍ମଣ ସବୁ ସତ ମାନିଯିବା ପରେ ବୈଦନାଥ କିଭଳି ଠେଙ୍ଗାରେ ସେମାନଙ୍କ ମୁଣ୍ଡକୁ ବାଡେଇଥିଲା ସେକଥା ମଧ୍ୟ କହିଛି । ତାପରେ ଲକ୍ଷ୍ମଣ ରାସ୍ତାରେ ଫିଙ୍ଗି ଦେଇଥିବା ଟାଙ୍ଗିଆକୁ ନେଇ ବୈଦ୍ୟନାଥ କିଛି ଦୂରରେ ଗୋଟିଏ ନାଳରେ ଫିଙ୍ଗି ଦେଇଥିଲା । ହତ୍ୟାରେ ବ୍ୟବହୃତ ଟାଙ୍ଗିଆକୁ ପୋଲିସ ଜବତ କରିଛି । ସିନ ରିକ୍ରିଏସନ ପରେ ଏବେ ସେମାନଙ୍କୁ କୋର୍ଟ ଫରୱାର୍ଡ଼ ପାଇଁ ପ୍ରସ୍ତୁତି ଆରମ୍ଭ କରିଛି ପୋଲିସ।
ବଦଳିଲା ସରକାର ଅଟକିଗଲା ବିକାଶ ; ଅଧାରେ ରହିଗଲା ପୋଖରୀର ପୁନରୁଦ୍ଧାର କାମ
ନନ୍ଦିଘୋଷ ବ୍ୟୁରୋ : ରାଜନୀତିର ପଶାପାଲିରେ ଜଳାଶୟ । ସରକାର ବଦଳିବା ପରେ ଅଧାରେ ରହିଗଲା ପୋଖରୀର ପୁନରୁଦ୍ଧାର କାମ । ପୋତିହୋଇଗଲାଣି ୬୦ ବର୍ଷର ପୋଖରୀ । ଯୋଡ଼ା ମ୍ୟୁନିସିପାଲିଟିର କମାରଯୋଡ଼ା ଠାରେ ଥିବା ପୋଖୀରର ପୁନରୁଦ୍ଧାର ହେଉନଥିବାରୁ ହୀନସ୍ତା ଭୋଗୁଛନ୍ତି ପାଞ୍ଚ ଶହରୁ ଉର୍ଦ୍ଧ୍ଵ ପରିବାର ।
ବଦଳିଲା ସରକାର । ଅଟକିଗଲା ବିକାଶ । ଅଧାରେ ରହିଗଲା ପୋଖରୀର ପୁନରୁଦ୍ଧାର କାମ । ପୋତିହୋଇଗଲାଣି ୬୦ ବର୍ଷର ପୋଖରୀ । କେନ୍ଦୁଝର ଜିଲ୍ଲା ଯୋଡ଼ା ମ୍ୟୁନିସିପାଲିଟିର ୧୧ ନମ୍ବର ଓ୍ବାର୍ଡ କମାରଯୋଡ଼ା ଠାରେ ସ୍ଥାନୀୟ ଲୋକଙ୍କ ଆବଶ୍ୟକତା ଦୃଷ୍ଟିରୁ ୧୯୬୨ ମସିହାରେ ଏକ ପୋଖରୀ ଖୋଳାଯାଇଥିଲା । ପ୍ରାୟ ୧୪ ଏକର ଜମିରେ ଖୋଳାଯାଇଥିବା ପୋଖରୀ ଉପରେ ୩ଟି ୱାର୍ଡର ଲୋକେ ନିର୍ଭର କରୁଥିଲେ । ନବୀନ ସରକାର ପୋଖରୀର ପୁନରୁଦ୍ଧାର ପାଇଁ ଛଅ କୋଟିରୁ ଉର୍ଦ୍ଧ୍ଵ ଟଙ୍କା ଯୋଗାଇ ଦେଇଥିଲେ । ପୋଖରୀରୁ ପଙ୍କ ଉଦ୍ଧାର ସହ ପୋଖରୀ କଡରେ ପାର୍କ ନିର୍ମାଣ, ବିଦ୍ୟୁତକରଣ, ବୃକ୍ଷରୋପଣ ଓ ବୋଟିଙ୍ଗ ସୁବିଧା ପାଇଁ ଯୋଜନା ହୋଇଥିଲା । ଅନୁଦାନ ମିଳିବା ପରେ କାମ ଆରମ୍ଭ ବି ହୋଇଥିଲା । ମାତ୍ର ସରକାର ବଦଳିବା ପରେ ପୋଖରୀର ପୁନରୁଦ୍ଧାର କାମ ବନ୍ଦ କରିଦିଆଯାଇଛି ।
ପୁନରୁଦ୍ଧାର କାମ ଅଧପନ୍ତରିଆ ଭାବେ ପଡିରହିଥିବାରୁ ପୋଖରୀର ଜଳଧାରଣ କ୍ଷମତା ନଷ୍ଟ ହୋଇଗଲାଣି । ଅନାବନା ଗଛ ଲତାରେ ଭର୍ତ୍ତି ହୋଇଗଲାଣି ପୋଖରୀ । ଫଳରେ ଦୁର୍ଦ୍ଦଶା ଭୋଗୁଛନ୍ତି ପାଞ୍ଚ ଶହରୁ ଉର୍ଦ୍ଧ୍ଵ ପରିବାର । ଆଗକୁ ଗ୍ରୀଷ୍ମ ଦିନ ଥିବାରୁ ଲୋକେ କିପରି ନିଜର ଆବଶ୍ୟକତା ମେଣ୍ଟାଇବେ ତାକୁ ନେଇ ଚିନ୍ତାରେ ପଡିଯାଇଛନ୍ତି । ଏନେଇ ସ୍ଥାନୀୟ ଲୋକେ ବାରମ୍ବାର ବିଭାଗୀୟ ଅଧିକାରୀଙ୍କୁ ଜଣାଇଲେ ହେଲେ କେହି ଗୁରୁତ୍ଵ ଦେଉନଥିବାରୁ ଅସନ୍ତୋଷ ତେଜିଲାଣି । ଅନ୍ୟପଟେ ଅନୁଦାନ ଫେରିଯିବାରୁ କାମ ହୋଇପାରିନାହିଁ ବୋଲି କହିଛନ୍ତି ମ୍ୟୁନିସିପାଲିଟି ଅଧିକାରୀ ।
ବାଡ଼ ଖାଉଛି କ୍ଷେତ ; କେନ୍ଦୁପତ୍ର ତୋଳାଳିଙ୍କ ଟଙ୍କା ଲୁଟୁଛନ୍ତି ବନ ଅଧିକାରୀ
ନନ୍ଦିଘୋଷ ବ୍ୟୁରୋ : ରକ୍ଷକ ସାଜୁଛି ଭକ୍ଷକ । ତୁଷୁରା ରେଞ୍ଜରଙ୍କ ନାଁରେ ଆସିଛି ଅଭିଯୋଗର ଲମ୍ବା ଫର୍ଦ୍ଦ । ବାବୁ ଜଣଙ୍କ କେନ୍ଦୁପତ୍ର କର୍ମଚାରୀ ଓ ତୋଳାଳିଙ୍କ ଟଙ୍କା ହଡ଼ପ କରୁଥିବା ଅଭିଯୋଗ ହୋଇଛି । ଖାଲି ସେତିକି ନୁହେଁ ସରକାରୀ ଯୋଜନାକୁ ବାଟମାରଣା ବି କରୁଛନ୍ତି । ବିରୋଧ କଲେ ରେଞ୍ଜର ନାଲି ଆଖି ଦେଖାଉଥିବା ଅଭିଯୋଗ ହୋଇଛି । ଘଟଣାର ତଦନ୍ତ କରିବା ସହ ସଂପୃକ୍ତ ରେଞ୍ଜରଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛି ପଶ୍ଚିମ ଓଡ଼ିଶା କେନ୍ଦୁପତ୍ର କର୍ମଚାରୀ ଓ ତୋଳାଳି ସଂଘ ।
ବାଡ଼ ଖାଉଛି କ୍ଷେତ । କେନ୍ଦୁ ପତ୍ର ତୋଳାଳିଙ୍କ ଟଙ୍କା ଲୁଟୁଛନ୍ତି ବନ ଅଧିକାରୀ । ଖୋଦ ତୁଷୁରା ରେଞ୍ଜର କେନ୍ଦୁପତ୍ର କର୍ମଚାରୀଙ୍କ କରୁଛନ୍ତି ଟଙ୍କା ହଡ଼ପ । ସରକାରୀ ଯୋଜନାକୁ କରୁଛନ୍ତି ବାଟବଣା । ବିରୋଧ କଲେ ବାବୁ ଜଣଙ୍କ ନାଲିଆଖି ଦେଖାଇବା ସହ ଗାଳିଗୁଲଜ କରୁଥିବା ଅଭିଯୋଗ । ଏପରି କିଛି ସଙ୍ଗୀନ ଅଭିଯୋଗ ଆଣିଛି ପଶ୍ଚିମ ଓଡ଼ିଶା କେନ୍ଦୁପତ୍ର କର୍ମଚାରୀ ଓ ତୋଳାଳି ସଂଘ । ଟିଟିଲାଗଡ କେନ୍ଦୁପତ୍ର ଡିଭିଜନ ଅନ୍ତର୍ଗତ ତୁଷୁରା କେନ୍ଦୁପତ୍ର ବିଭାଗରେ ପାଖାପାଖି ୩ ବର୍ଷ ହେବ ଭାରପ୍ରାପ୍ତ ରେଞ୍ଜର ଭାବେ କାର୍ଯ୍ୟ କରୁଛନ୍ତି ମାନସ ରଞ୍ଜନ ବାରିକ I ବାବୁ ଜଣଙ୍କ ଦୀର୍ଘ ସମୟ ଧରି ରେଞ୍ଜର ଦାୟିତ୍ଵରେ ଥିବାରୁ ମନମାନି ଦେଖାଉଛନ୍ତି । କିଛି ଦିନ ତଳେ ଶହ ଶହ କେନ୍ଦୁପତ୍ର କର୍ମଚାରୀ ରେଞ୍ଜରଙ୍କ ବଦଳି ସହ ଦୁର୍ନୀତିର ତଦନ୍ତ କରିବାକୁ ରେଞ୍ଜରଙ୍କ କାର୍ଯ୍ୟାଳୟ ଘେରାଉ କରିଥିଲେ ।
ନୂଆ ସରକାର ଆସିବା ପରେ ବଲାଙ୍ଗୀର ଜିଲ୍ଲାର କେନ୍ଦୁପତ୍ର କର୍ମଚାରୀ ଓ ତୋଳାଳିଙ୍କ ଆର୍ଥିକ ଅବସ୍ଥା ଶୋଚନୀୟ ହୋଇପଡିଥିବା ସଂଘ ଅଭିଯୋଗ କରିଛି । କେନ୍ଦୁପତ୍ର କର୍ମଚାରୀ ଓ ତୋଳାଳି ମାନେ କିଛି ମାସ କାମ ପାଉଥିବା ବେଳେ ଅନ୍ୟ ଦିନ ମାନଙ୍କରେ ଘରେ ହାତବାନ୍ଧି ବସିରହୁଛନ୍ତି । ତେଣୁ ସରକାର ନିର୍ବାଚନ ପ୍ରତିଶ୍ରୁତି ପାଳନ କରିବା ସହ ୧୨ ମାସ କାମ ଯୋଗାଇ ଦେବାକୁ ସଂଘ ଦାବି କରିଛି I ଏନେଇ ପୂର୍ବରୁ ସଂଘ ପକ୍ଷରୁ ଜିଲ୍ଲାପାଳ ଓ କେନ୍ଦୁପତ୍ର ବିଭାଗ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ କରାଯାଇଥିଲା । ମୁଖ୍ୟମନ୍ତ୍ରୀଙ୍କୁ ମଧ୍ୟ ଦାବିପତ୍ର ପ୍ରଦାନ କରାଯାଇଥିଲା I ହେଲେ ଏଯାଏଁ ସରକାର କୌଣସି ପଦକ୍ଷେପ ନେଉନାହାନ୍ତି ।
PUCC ନଥିଲେ ପେଟ୍ରୋଲ ମନା ନିର୍ଦ୍ଦେଶ ପ୍ରତ୍ୟାହୃତ ; ହାଇକୋର୍ଟରେ ସତ୍ୟପାଠ ଦାଖଲ କରିଛନ୍ତି ସରକାର
ନନ୍ଦିଘୋଷ ବ୍ୟୁରୋ : ହାଇକୋର୍ଟରେ ବୈଧ ପ୍ରଦୂଷଣ ପ୍ରମାଣପତ୍ର ବା PUCC ସମ୍ପର୍କିତ ଜନସ୍ୱାର୍ଥ ମାମଲା। ଚାଲାଣ କଟିଥିଲେ ମଧ୍ୟ PUCC ସାର୍ଟିଫିକେଟ ମିଳିବ। ରାଜ୍ୟ ସରକାରଙ୍କ ଆବେଦନକୁ ଖାରଜ କରିଛନ୍ତି ହାଇକୋର୍ଟ । ବାହାନ ପୋର୍ଟାଲରେ କୌଣସି ଚାଳକ ଯେପରି ଅସୁବିଧାରେ ସମ୍ମୁଖୀନ ନ ହୁଅନ୍ତି, ତାହା ଉପରେ ପଦକ୍ଷେପ ନେବାକୁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି । ଏନେଇ ସ୍ୱତନ୍ତ୍ର ବିଜ୍ଞପ୍ତି ଜାରି କରିବାକୁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି । ସେହିପରି ପ୍ରଦୂଷଣ ସାର୍ଟିଫିକେଟ ନଥିଲେ ପେଟ୍ରୋଲ ପମ୍ପରେ ମିଳି ପାରିବ ପେଟ୍ରୋଲ। ଏନେଇ କୋର୍ଟଙ୍କୁ ଅବଗତ କରିଛନ୍ତି ରାଜ୍ୟ ସରକାର । ରାଜ୍ୟ ପରିବହନ କମିଶନରଙ୍କ ପକ୍ଷରୁ ୨୦୨୫ ଡିସେମ୍ବର ୨୦ ତାରିଖରେ ଜାରି ହୋଇଥିବା ନିର୍ଦ୍ଦେଶନାମାରେ ଉଲ୍ଲେଖଥିଲା ଯେ, ଗାଡି ମାଲିକଙ୍କ PUCC ନଥିଲେ ତାଙ୍କୁ ପେଟ୍ରୋଲ କି ଡିଜେଲ ମନା । ଏନେଇ ବିଭିନ୍ନ ତୈଳ ବିକ୍ରୟକାରୀ କମ୍ପାନୀକୁ ଲେଖାଯାଇଥିବା ଚିଠିକୁ ବିରୋଧ କରି ହାଇକୋର୍ଟରେ ଏହି ନିର୍ଦ୍ଧେଶକୁ ଚ୍ୟାଲେଞ୍ଜ କରି ରୁଜୁ ହୋଇଥିଲା ଜନସ୍ୱାର୍ଥ ମମାଲା । ମୋଟର ଯାନ ଆଇନ, ୧୯୮୮ ଓ କେନ୍ଦ୍ରୀୟ ମୋଟର ଯାନ ନିୟମାବଳୀ, ୧୯୮୯ ଉଲଂଘନ କରି ଏହି ନିର୍ଦେଶନାମା ଜାରି କରାଯାଇଛି ବୋଲି ଜନସ୍ୱାର୍ଥ ମାମଲାରେ ଉଲେଖ କରାଯାଇଥିଲା। ଗାଡିର PUCC ପ୍ରମାଣପତ୍ର ନଥିବା ଯାନ ମାଲିକଙ୍କୁ ପେଟ୍ରୋଲ କିମ୍ବା ଡିଜେଲ ବିକ୍ରୟ ନକରିବା ନିୟମ ସମ୍ପୂର୍ଣ୍ଣ ରୂପେ ଓଡ଼ିଶାର ପ୍ରତ୍ୟେକ ଗାଡି ମାଲିକଙ୍କର ମୌଳିକ ଅଧିକାରକୁ ଉଲ୍ଲଂଘନ କରୁଥିବା କୋର୍ଟ କୁ ଦର୍ଶାଇଥିଲେ ଆବଦେନକାରୀଙ୍କ ଓକିଲ। ଏଥିସହିତ ଗାଡିର ପ୍ରଦୂଷଣ ପରୀକ୍ଷା ପୂର୍ବରୁ କୌଣସି ଚାଲାଣ ନଥିବା ନେଇ ଯେଉଁ ସର୍ତ୍ତ ଧାର୍ଯ୍ୟ କରାଯାଇଥିଲା ତାହା ବେଆଇନ ବୋଲି ଆବେଦନକାରୀ ଦର୍ଶାଇଥିଲେ । ଗୋଟିଏ ସପ୍ତାହ ପାରେ ମାମଲାର ପରବର୍ତ୍ତୀ ଶୁଣାଣି ପାଇଁ ଦିନ ଧର୍ଯ୍ୟ କରିଛନ୍ତି ହାଇକୋର୍ଟ ।
ଭାରତ ଓ ୟୁରୋପୀୟ ସଂଘ ମଧ୍ୟରେ ବଡ଼ ଧରଣର ମୁକ୍ତ ବାଣିଜ୍ୟ ରାଜିନାମା
ନନ୍ଦିଘୋଷ ବ୍ୟୁରୋ : ଭାରତ ଓ ୟୁରୋପୀୟ ସଂଘ ମଧ୍ୟରେ ବଡ଼ ଧରଣର ମୁକ୍ତ ବାଣିଜ୍ୟ ରାଜିନାମା। ଏଣିକି ଭାରତରେ ଶସ୍ତା ହେବ ୟୁରୋପର ଦାମୀ କାର୍। ପ୍ରତିରକ୍ଷାଠାରୁ ଆରମ୍ଭ କରି ଜଳବାୟୁ କ୍ଷେତ୍ରରେ ବି ସହଯୋଗ ଲାଗି ବୁଝାମଣା ହୋଇଛି। ଏହି ଚୁକ୍ତି ମଦର ଅଫ ଅଲ ଡିଲସ ବୋଲି କହିଛନ୍ତି ୟୁରୋପୀୟ ୟୁନିଅନ ମୁଖ୍ୟ ଉର୍ସୁଲା ଭନ ଡେର ଲେନ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ୟୁରୋପୀୟ କାଉନସିଲ ସଭାପତି ଆଣ୍ଟୋନିଓ କୋଷ୍ଟାଙ୍କ ପକ୍ଷରୁ ମିଳିତ ଘୋଷଣାନାମା ଅବସରରେ ଏହି ଚୁକ୍ତିକୁ ସ୍ବାଗତ କରିଛନ୍ତି ଉର୍ସୁଲା। ଦୁଇ ପକ୍ଷ ମଧ୍ୟରେ ଏହି ଚୁକ୍ତି ଯୋଗୁ ଭାରତ ବାବଦରେ ଲାଗୁ ହେଉଥିବା ପ୍ରାୟ ୪ ବିଲିୟନ ୟୁରୋ ଛାଡ଼ ହେବ।
ଆଗାମୀ ବଜେଟ ଅଧିବେଶନରେ ସଂସଦରେ ରାଜ୍ୟସ୍ବାର୍ଥ ସମ୍ବଳିତ ବିଭିନ୍ନ ପ୍ରସଙ୍ଗ ଉଠାଇବ ବିଜେଡି
ନନ୍ଦିଘୋଷ ବ୍ୟୁରୋ : ଆଗାମୀ ବଜେଟ ଅଧିବେଶନରେ ସଂସଦରେ ରାଜ୍ୟସ୍ବାର୍ଥ ସମ୍ବଳିତ ବିଭିନ୍ନ ପ୍ରସଙ୍ଗ ଉଠାଇବ । ଏଥିରେ ଚାଷୀ ସମସ୍ୟା ଓ ଆଇନଶୃଙ୍ଖଳା ମୁଖ୍ୟ ପ୍ରସଙ୍ଗ ରହିବ ବୋଲି କହିଛନ୍ତି ବିଜେଡି ସାଂସଦ ଡ. ସସ୍ମିତ ପାତ୍ର । ଓଡ଼ିଶାର ଚାଷୀ ଏବେ ଚିନ୍ତାରେ ଅଛି । ମଣ୍ଡି ବନ୍ଦ ପଡିଛି । ଧାନ କିଣା ହୋଇପାରୁନି । କଟନୀ ଛଟନୀ ଯୋଗୁଁ ଚାଷୀ କ୍ବିଣ୍ଟାଲ ପିଛା ୮ରୁ ୧୦ କେଜି କ୍ଷତି ସହୁଛି । ଚାଷୀ ତାର ଉଚିତ ମୂଲ୍ୟ ପାଉନି । ସାର କୃଷକଙ୍କ ପାଖରେ ପହଞ୍ଚିପାରୁନି । ୩ହଜାର ଟଙ୍କା ଏମଏସପି ଦିଆଯାଉଛି ବୋଲି କୁହାଯାଉଛି ହେଲେ ତାହା ଚାଷୀ ପାଉନି ବୋଲି ଭିଯୋଗ କରିଛନ୍ତି ସସ୍ମିତ । ସେହିପରି ଅନ୍ୟ ଏକ ପ୍ରମୁଖ ପ୍ରସଙ୍ଗ ହେଲା ରାଜ୍ୟର ଆଇନଶୃଙ୍ଖଳା ପରିସ୍ଥିତି । ନାରୀ ନିର୍ଯାତନା ବୃଦ୍ଧି ପାଇଛି । ଶିଶୁ ଏଠି ଅସୁରକ୍ଷିତ । ସଂଖ୍ୟାଲଘୁଙ୍କ ଉପରେ ଆକ୍ରମଣ ହେଉଛି । କହିବାକୁ ଗଲେ ରାଜ୍ୟ ସରକାର ଆଇନଶୃଙ୍ଖଳା ପରିସ୍ଥିତି ସଂପୂର୍ଣ୍ଣ ଫେଲ ମାରିଛି । ମହାନଦୀ, ପୋଲାଭରମ ପ୍ରସଙ୍ଗର ସମାଧାନ ବାହାରିପାରୁନି । କୋଇଲା ରୟଲିଟି ନେଇ ୧୦ ବର୍ଷ ହେଲା ରିଭିଜନ ହୋଇନି, ସ୍ବତନ୍ତ୍ର ରାଜ୍ଯ ମାନ୍ୟତା ଦାବି କେନ୍ଦ୍ର ପାଖରେ ପଡିରହିଛି । ଜାତୀୟ ରାଜପଥ, ରେଳବାଇ, ଡିଜିଟାଲ ଓ ମୋବାଇଲ ସଂଯୋଗୀକରଣରେ ଓଡ଼ିଶା ପଛୁଆ ଅଛି । ବେକାରୀ ସମସ୍ୟା ଉତ୍କଟ ହେଲାଣି । ଏସବୁ ପ୍ରସଙ୍ଗ ଉପରେ ବିଜେଡି ସଂସଦରେ ଉତ୍ଥାପନ କରିବ । ମନରେଗା ନୂଆ ଆଇନରେ ସମସ୍ତଙ୍କୁ କାମ ମିଳିବନି ବୋଲି ବିଜେଡି ସନ୍ଦେହ କରିଛି । କ୍ୟାପିଂ ସିଷ୍ଟମ ଯୋଗୁଁ ଏହା ବାସ୍ତବ କ୍ଷେତ୍ରରେ ଲାଗୁ କରିବାରେ କଠିନ ହେବ । ଖର୍ଚ୍ଚ ଭାର ମଧ୍ୟ ରାଜ୍ୟ ଉପରେ ଲଦି ଦିଆଯାଇଛି । ଏହା ଉପରେ ଅଧିକ ବିଚାରବିମର୍ଶ କରିବାର ଅଛି । ତେଣୁ ଆଗାମୀ ଦିନରେ ବିଜେଡି ଏହା ଉପରେ ଅଧିକ କାମ କରିବ ବୋଲି କହିଛନ୍ତି ସସ୍ମିତ ।
ଆସନ୍ତାକାଲିଠାରୁ ସଂସଦର ବଜେଟ ଅଧିବେଶନ; ଆଜି ବସିଛି ସର୍ବଦଳୀୟ ବୈଠକ
ନନ୍ଦିଘୋଷ ବ୍ୟୁରୋ : ଆସନ୍ତାକାଲିଠାରୁ ସଂସଦର ବଜେଟ ଅଧିବେଶନ। ତା ପୂର୍ବରୁ ଆଜି ବସିଛି ସର୍ବଦଳୀୟ ବୈଠକ। ସଂସଦ ଅଧିବେଶନକୁ ସୁରୁଖୁରୁରେ ଚଳାଇବା ଲାଗି ସମସ୍ତ ଦଳଙ୍କ ସହଯୋଗ ଲୋଡ଼ିଛନ୍ତି କେନ୍ଦ୍ର ସରକାର। ଏହି ଅଧିବେଶନରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଅଧ୍ୟକ୍ଷତା କରିଥିଲେ। ଆସନ୍ତା ଫେବ୍ରୁଆରୀ ୧ରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ବଜେଟ ଆଗତ କରିବେ। ସେପଟେ ବିଭିନ୍ନ ପ୍ରସଙ୍ଗରେ ସରକାରଙ୍କୁ ଘେରିବାକୁ କଂଗ୍ରେସ ଓ ବିରୋଧୀ ଦଳ ଯୋଜନା କରିଥିବା ସୂଚନା ମିଳିଛି। ବଜେଟ ଅଧିବେଶନରେ ଯେପରି ଉଭୟ ଲୋକସଭା ଓ ରାଜ୍ୟସଭାରେ ଗୃହକାର୍ଯ୍ୟ ସୁରୁଖୁରୁରେ ଚାଲିବ ସେଥିଲାଗି ବିରୋଧୀଙ୍କ ସହଯୋଗ କାମନା କରିଛନ୍ତି ସରକାର। ଚଳିତ ଅଧିବେଶନରେ କିଛି ବିଲ୍ ଆଗତ ହେବା ସମ୍ଭାବନା ରହିଛି।
କନ୍ୟାଶ୍ରମରେ ୯ ଅନ୍ତେବାସୀ ଛାତ୍ରୀ ଅସୁସ୍ଥ ; ଅସ୍ବାଭିକ ଆଚରଣ ସହ କାନ୍ଦିଲେ ଛାତ୍ରୀ
ନନ୍ଦିଘୋଷ ବ୍ୟୁରୋ : କନ୍ୟାଶ୍ରମରେ ୯ ଅନ୍ତେବାସୀ ଛାତ୍ରୀ ଅସୁସ୍ଥ । ଅସ୍ବାଭିକ ଆଚରଣ ସହ ଛାତ୍ରୀମାନେ କାନ୍ଦିବା ଆରମ୍ଭ କରିଛନ୍ତି । ଏଭଳି ଘଟଣା ଦେଖିବାକୁ ମିଳିଛି କେନ୍ଦୁଝର ଜିଲ୍ଲା ତେଲକୋଇ ବ୍ଲକ କରଦାଙ୍ଗି ଉଚ୍ଚ ବିଦ୍ୟାଳୟରେ । ସମସ୍ତ ଅସୁସ୍ଥ ଛାତ୍ରୀଙ୍କୁ ତେଲକୋଇ ମେଡ଼ିକାଲରେ ଚିକିତ୍ସା ପାଇଁ ଭର୍ତ୍ତି କରାଯାଇଛି । ଭୂତ ଲାଗିଥିବା ଅଭିଭାବକ ମାନେ ସନ୍ଦେହ କରୁଛନ୍ତି । ଆଜି ଦିନ ୧୧ଟାରେ ପ୍ରଥମେ ଜଣେ ଛାତ୍ରୀ ଅସ୍ବାଭିକ ଆଚରଣ କରିଥିଲେ । ପରେ ଅନ୍ୟ ପିଲାଙ୍କୁ ଧିରେ ଧିରେ ବ୍ୟାପିଥିଲା। ପିଲାମାନେ ଅସ୍ବାଭାବିକ ଆଚରଣ କରିବା ସହ ଝୁଲିବା ଆରମ୍ଭ କରିଥିଲେ। ସମସ୍ତ ଛାତ୍ରୀଙ୍କୁ ମେଡ଼ିକାଲରେ ଭର୍ତ୍ତି କରାଯାଇଛି । ଡାକ୍ତରଙ୍କ କହିବା କଥା ଏହା ସାଇକୋଲିଜ ପ୍ରୋବ୍ଲେମ । କିଛି ସମୟ ପରେ ଆପେ ଆପେ ଠିକ୍ ହୋଇଯିବ ।
ଟି-୨୦ ବିଶ୍ବକପ୍: ବାହାର ହେବ ପାକିସ୍ତାନ, ବାଂଲାଦେଶକୁ ମିଳିବ ସୁଯୋଗ
ଟି-୨୦ ବିଶ୍ବକପ୍: ବାହାର ହେବ ପାକିସ୍ତାନ, ବାଂଲାଦେଶକୁ ମିଳିବ ସୁଯୋଗ
ନନ୍ଦିଘୋଷ ବ୍ୟୁରୋ: ୨୦୨୬ ଟି-୨୦ ବିଶ୍ବକପକୁ ନେଇ ଘଡି କେ ଘୋଡ଼ା ଛୁଟୁଛି । ଘଣ୍ଟା କେଇଟା ବିତୁନି ଆସୁଛି ନୂଆ ନୂଆ ଅପଡେଟ୍ । ବାଂଲାଦେଶ ବିଶ୍ବକପରୁ ବାହାର ହେବା ଓ ପାକିସ୍ତାନର ନଖରାମୀ ଖବରର ସିରୋନାମା ପାଲଟିଥିବା ବେଳେ ଆସିଛି ଏକ ବଡ଼ ଖବର । ଯଦି ଖବର ସତ ହୁଏ, ତେବେ ବାଂଲାଦେଶ କ୍ରିକେଟ୍ କଣ୍ଟ୍ରୋଲ ବୋର୍ଡ ବରର୍ବାଦ ହେବାରୁ ଅଳ୍ପକେ ବଞ୍ଚିଯିବ । ଆଉ ତା’ଠାରୁ ବଡ଼ ଖବର ହେଲା ବାଂଲାଦେଶକୁ ଉସକାଇ ବିଶ୍ବକପକୁ ବିବାଦ ମଧ୍ୟକୁ ଟାଣି ନେଇଥିବା ପାକିସ୍ତାନ କ୍ରିକେଟ କଣ୍ଟ୍ରୋଲ ବୋର୍ଡର ଭବିଷ୍ୟତ ଅନିଶ୍ଚିତତା ଭିତରକୁ ଚାଲିଯିବ । ଆଉ ଏଥର ଆଇସିସି ପିସିବିକୁ ଏମିତି ଚୋଟ ଦେବ, ଯାହା ପାକିସ୍ତାନକୁ ଦୁଃସ୍ବପ୍ନ ହୋଇ ପିଛା କରିବ ।
ମିଳିଥିବା ସୂଚନା ଅନୁସାରେ ବାଂଲାଦେଶ ବିବାଦକୁ ନେଇ ପାକିସ୍ତାନ ଶୁକ୍ରବାର ବଡ଼ ପଦକ୍ଷେପ ନେଇପାରେ । ପିସିବି ମୁଖ୍ୟ ମୋହସିନ ନକଓ୍ବି ପ୍ରଧାନମନ୍ତ୍ରୀ ଶେହେବାଜ ଶରିଫଙ୍କ ସହ ଏହାକୁ ନେଇ ଆଲୋଚନା କରିଛନ୍ତି । ଆଉ ଏଥିରେ ଭାରତ ବିପକ୍ଷରେ ମ୍ୟାଚ୍ ପାକିସ୍ତାନ ବୟକଟ କରିବାକୁ ଘୋଷଣା କରିପାରେ । ଯାହା ଶୁକ୍ରବାର ସ୍ପଷ୍ଟ ହୋଇଯିବ । ହେଲେ ଏବେ ଏମିତି ଶୁଣିବାକୁ ମିଳୁଛି ଯଦି ପାକିସ୍ତାନ ଟିମ୍ ଭାରତ ବିପକ୍ଷ ମ୍ୟାଚ୍ ବୟକଟ କରେ ତେବେ ଆଇସିସି ବଡ଼ ପଦକ୍ଷେପ ନେବାକୁ ଯୋଜନା କରୁଛି । ଟି-୨୦ ବିଶ୍ବକପରୁ ପାକିସ୍ତାନକୁ ବାହାର କରିବା ସହ ଆଇସିସି ପୁଣି ଥରେ ବାଂଲାଦେଶକୁ ସୁଯୋଗ ଦେବାକୁ ଯୋଜନା କରିଛି ।
ପାକିସ୍ତାନ ସ୍ଥାନରେ ଖେଳିବ ବାଂଲାଦେଶ
ମିଡିଆ ରିପୋର୍ଟ ଅନୁସାରେ, ପାକିସ୍ତାନର କୁଚକ୍ରି ନୀତିକୁ କାଟ ଦେବାକୁ ଆଇସିସି ପାକିସ୍ତାନକୁ ହଟାଇ ତା’ ସ୍ଥାନରେ ଗ୍ରୁପ-ଏ ରେ ବାଂଲାଦେଶକୁ ସ୍ଥାନ ଦେଇପାରେ । ରିପୋର୍ଟ ଅନୁସାରେ, ଯଦି ପାକିସ୍ତାନ ମ୍ୟାଚ୍ ବୟକଟ କଲା ତେବେ ଗ୍ରୁପ-ଏ ରେ ତା’ ସ୍ଥାନରେ ବାଂଲାଦେଶକୁ ସୁଯୋଗ ଦିଆଯିବ । ଏହାସହ ବାଂଲାଦେଶର ସମସ୍ତ ମ୍ୟାଚ୍ ଶ୍ରୀଲଙ୍କାରେ ଖେଳାଯିବ ।
ଭାରତ ସହ ମ୍ୟାଚ୍ ବୟକଟ କଲେ ପାକିସ୍ତାନର କ’ଣ ହେବ ?
ରିପୋର୍ଟ ଅନୁସାରେ, ପାକିସ୍ତାନ ପୂରା ଟୁର୍ଣ୍ଣାମେଣ୍ଟ ନୁହେଁ, ୧୫ ଫେବ୍ରୁଆରୀକୁ ଖେଳାଯିବାକୁ ଥିବା ଭାରତ ବିପକ୍ଷ ମ୍ୟାଚ୍ ବୟକଟ କରିବାକୁ ଯୋଜନା କରୁଛି । ହେଲେ ଏମିତି ହେବା ସହଜ ନୁହେଁ । କାରଣ, ପାକିସ୍ତାନକୁ ଏହାର ଗମ୍ଭୀର ପରିଣାମ ଭୋଗିବାକୁ ପଡ଼ିପାରେ । ପାକିସ୍ତାନ ଟିମ ଉପରେ ଏକାଧିକ ପ୍ରତିବନ୍ଧକ ଲାଗିପାରେ । ଆଇସିସି ସହ ପାକିସ୍ତାନ କରିଥିବା ବୁଝାମଣାକୁ ଉଲ୍ଲଂଘନ ବୋଲି ବିବେଚନା କରାଯିବ । ଏପରି କି ଆଇସିସି ପାକିସ୍ତାନକୁ ବିଶ୍ବକପ୍ ଓ ଏସିଆ କପ ପରି ଟୁର୍ଣ୍ଣାମେଶ୍ଟରୁ ବାହାରର ରାସ୍ତା ଦେଖାଇ ପାରେ ।
ଚତୁର୍ଥୀ ରାତିରେ ଶିଶୁକନ୍ୟାକୁ ଜନ୍ମ ଦେଲେ ମହିଳା
ଚତୁର୍ଥୀ ରାତିରେ ଶିଶୁକନ୍ୟାକୁ ଜନ୍ମ ଦେଲେ ମହିଳା
ନନ୍ଦିଘୋଷ ବ୍ୟୁରୋ: ଚତୁର୍ଥୀ ରାତିରେ ମହିଳାଙ୍କ କାଟିଲା ପେଟ । ଯନ୍ତ୍ରଣାରେ ସ୍ତ୍ରୀ ଛଟପଟ ହେଉଥିବା ଦେଖି ଡରିଗଲେ ସ୍ବାମୀ । ଘରକୁ ମହିଳା ଡକ୍ତରଙ୍କ ଡକାଯାଇଥିଲା । କିଛି ସମୟ ପରେ ମହିଳା ଜଣଙ୍କ ଏକ ଶିଶୁଙ୍କୁ ଜନ୍ମ ଦେଇଥିଲେ । ଖବର ଶୁଣି ଆପଣ ବି ଚକିତ ହୋଇଯାଇଥିବେ । ଏବେ ଜାଣନ୍ତୁ ପୂରା ଘଟଣା କ’ଣ ଥିଲା । ଉତ୍ତର ପ୍ରଦେଶର ରାମପୁରରେ ଘଟଣା ଘଟିଛି । ଅଜିମନଗର ଥାନା ଅନ୍ତର୍ଗତ ଏକ ଗାଁରେ ଜଣେ ଯୁବକଙ୍କୁ ଜଣେ ଯୁବତୀଙ୍କୁ ପ୍ରେମ ହୋଇଯାଇଥିଲା । ଏହାପରେ ଉଭୟଙ୍କ ମଧ୍ୟରେ ଶାରିରୀକ ସମ୍ପର୍କ ହୋଇଥିଲା । ପରେ ଦୁଇ ପରିବାର ଉଭୟଙ୍କ ବିବାହ କରାଇବାକୁ ରାଜି ହୋଇଯାଇଥିଲେ ।
ସତ ଜାଣି ସମସ୍ତେ ଆଶ୍ଚର୍ଯ୍ୟ
ଯୁବତୀଙ୍କ ବିବାହ ସ୍ଥିର ହୋଇଥିଲେ ବି ଦୁଇ ପରିବାର ସେ ଗର୍ଭବତୀ ଥିବା ଜାଣି ନଥିଲେ । ବିବାହ ପରେ ଚତୁର୍ଥି ରାତିରେ ମହିଳାଙ୍କ ପେଟ ଜୋରେ ଜୋରେ କାଟିଥିଲା । ଏନେଇ ସେ ତାଙ୍କ ସ୍ବାମୀଙ୍କୁ କହିଥିଲେ । ସ୍ବାମୀ ରୁମରୁ ବାହାରକୁ ଯାଇ ପରିବାର ଲୋକଙ୍କୁ ଖବର ଦେଇଥିଲେ । ଏହାପରେ ଜଣେ ମହିଳା ଡାକ୍ତର ଘରକୁ ଆସି ଚେକଅପ କରିବା ପରେ ମହିଳା ଗର୍ଭବତୀ ଥିବା କହିଥିଲେ । ଏହାସହ ପିଲା ହେବା ସମୟ ହୋଇଯାଇଛି ତୁରନ୍ତ ପ୍ରସବ କରିବାକୁ ପଡ଼ିବ ପୋଲି ଡାକ୍ତର କହିଥିଲେ । ପ୍ରଥମେ ଘର ଲୋକ ଭାବିଥିଲେ ବିବାହ ଉତ୍ସବକୁ ନେଇ ଯୁବତୀ ଥକ୍କା ହୋଇଯାଇଥିବା ଭାବୁଥିଲେ । ହେଲେ ଡାକ୍ତରଙ୍କ ପାଖରୁ ସତ ଶୁଣି ସମସ୍ତେ ଆଶ୍ଚର୍ଯ୍ୟ ହୋଇଯାଇଥିଲେ ।
ପିଲା ଜନ୍ମ ପରେ ସ୍ବାମୀ ଖୁସିରେ ନାଚିଲେ
ମହିଳା ଜଣଙ୍କ ଏକ ଝିଅକୁ ଜନ୍ମ ଦେଇଥିଲେ । ଝିଅକୁ ଦେଖି ମହିଳାଙ୍କ ସ୍ବାମୀ ଖୁସିରେ ନାଚିବାକୁ ଲାଗିଥିଲେ । ଘଟଣାକୁ ନେଇ ଥାନାରେ କୌଣସି ଅଭିଯୋଗ ହୋଇ ନଥିବା ସ୍ଥାନୀୟ ପୋଲିସ ଅଧିକାରୀ କହିଛନ୍ତି । ଘଟଣାକୁ ନେଇ ପୂରା ଅଞ୍ଚଳରେ ଚର୍ଚ୍ଚା ଲାଗି ରହିଛି । ଘଟଣା ଉପରେ ନଜର ରଖାଯାଇଥିବା ପୋଲିସ କହିଛି ।