ଭୁବନେଶ୍ବର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଘୋଷଣା କଲେ ପ୍ରାର୍ଥୀଙ୍କ ନାଁ । ବିଜେଡିର ପ୍ରାର୍ଥୀ ଘୋଷଣା ପରେ ଏବେ ନେତା, କର୍ମୀ ଓ ସମର୍ଥକଙ୍କ ଗହଣରେ ଉତ୍ସାହ । ବାଣ ଫୁଟାଇ, ମିଠା ବାଣ୍ଟି ନିଜ ନିଜର ଲୋକପ୍ରିୟ ନେତାଙ୍କ ନାଁ ଘୋଷଣାକୁ ନେଇ ଖୁସି ପାଳନ କରୁଛନ୍ତି ଦଳୀୟ କର୍ମୀ । ପୁରୀରେ ଶ୍ରୀଜିଉଙ୍କୁ ଦର୍ଶନ କରି ନିର୍ବାଚନ ଯାତ୍ରା ଆରମ୍ଭ କରିଛନ୍ତି ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ । ସେପଟେ ମା’ ମାଣିକେଶ୍ଵରୀଙ୍କୁ ଦର୍ଶନ କରି ଆଶୀର୍ବାଦ ନେଇଛନ୍ତି କ୍ଯାପଟେନ ଦିବ୍ୟଶଙ୍କର ମିଶ୍ର । ଚାରିଆଡ଼େ ଏବେ ଖୁସି, ଉତ୍ସାହ ଆଉ ଚର୍ଚ୍ଚା । ନିଜ ନିଜ ଲୋକପ୍ରିୟ ପ୍ରତିନିଧିଙ୍କୁ ଜିତାଇବାକୁ ଆରମ୍ଭ ହୋଇଯାଇଛି ପ୍ରସ୍ତୁତି ।
ସକାଳୁ ପୁରୀରେ ପହଞ୍ଚିଥିଲେ ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ । ଶ୍ରୀମନ୍ଦିରରେ କୋଟି ଓଡି଼ଆଙ୍କ ଆରାଧ୍ୟ ଦେବତା ମହାପ୍ରଭୁ ଶ୍ରୀଜଗନ୍ନାଥଙ୍କ ଆଶୀର୍ବାଦ ସହ ଯାଜପୁରରେ ମା’ ବିରଜାଙ୍କୁ ଦର୍ଶନ କରିଥିଲେ । ସେହିପରି ଜୁନାଗଡ ପ୍ରାର୍ଥୀ କ୍ୟାପଟେନ ଦିବ୍ୟଶଙ୍କର ମିଶ୍ର, ଲାଞ୍ଜିଗଡ ପ୍ରାର୍ଥୀ ପ୍ରଦୀପ ଦିଶାରୀ, ଭବାନୀପାଟଣା ପ୍ରାର୍ଥୀ ଲଳିତା ନାଏକ ସମେତ କଳାହାଣ୍ଡି ଜିଲ୍ଲା ବିଜେଡି ପର୍ଯ୍ୟବେକ୍ଷକ ପ୍ରଣବ ବଳବନ୍ତରାୟ କଳାହାଣ୍ଡି ଜିଲ୍ଲାର ଅଧିଷ୍ଠାତ୍ରୀ ଦେବୀ ମା’ ମାଣିକେଶ୍ୱରୀଙ୍କୁ ଦର୍ଶନ କରି ଆଶିଷ ଲୋଡିଛନ୍ତି । ବରଗଡ଼ରୁ ବିଜେଡି ବିଧାୟକ ପ୍ରାର୍ଥୀ ହେବା ପରେ ଦେବେଶ ଆଚାର୍ଯ୍ୟ ସମର୍ଥକଙ୍କ ଗହଣରେ ମା’ ସମଲେଇଙ୍କୁ ଦର୍ଶନ କରି ଆଶିଷ ଭିକ୍ଷା କରିଛନ୍ତି ।
ମୟୂରଭଞ୍ଜ ଲୋକସଭା ପ୍ରାର୍ଥୀ ଭାବେ ସୁଦାମ ମାର୍ଣ୍ଡିଂଙ୍କ ନାଁ ଘୋଷଣା ପରେ ଲୋକଙ୍କ ମଧ୍ୟରେ ଉତ୍ସାହ ଖେଳିଯାଇଛି । ଉଚ୍ଚ ଶିକ୍ଷିତା ରଞ୍ଜିତା ସାହୁଙ୍କୁ ଆସିକା ଲୋକସଭା ପ୍ରାର୍ଥୀ ଭାବେ ଘୋଷଣା ପରେ ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜଣାଇଛନ୍ତି ବିଜେଡି ନେତା ଓ କର୍ମୀ । ଚାନ୍ଦବାଲିରୁ ବ୍ଯୋମକେଶ ରାୟ ଟିକେଟ ପାଇବା ପରେ ବାଣ ଫୁଟାଇ, ମିଠା ବାଣ୍ଟି ଖୁସି ପାଳନ କରିଥିଲେ ।
ନୟାଗଡ଼଼ରେ ୪ ଶହରୁ ଅଧିକ ବିଜେପି ନେତା ଓ କର୍ମୀ ବିଜେଡିରେ ସାମିଲ ହୋଇଛନ୍ତି । ପୁରୀ ଲୋକସଭା ପ୍ରାର୍ଥୀ ଅରୂପ ପଟ୍ଟନାୟକ ଓ ବିଧାୟକ ଅରୁଣ ସାହୁଙ୍କ ଉପସ୍ଥିତିରେ ଦଳରେ ଯୋଗ ଦେଇଛନ୍ତି । କଟକ ବାଙ୍କୀରେ କଂଗ୍ରେସରୁ ଆସି ବିଜେଡିରେ ସାମିଲ ହୋଇଛନ୍ତି ଅନେକ ନେତା ଓ କର୍ମୀ । କନ୍ଧମାଳ ବାଲିଗୁଡ଼ା ନିର୍ବାଚନମଣ୍ଡଳୀର କେ.ନୂଆଗାଁରେ ବିଜେଡିର ସାଂଗଠନିକ ବୈଠକ ଅନୁଷ୍ଠିତ ହୋଇଥିଲା । ରାୟଗଡା ବିଧାନସଭା ଆସନରୁ ଅନସୂୟା ମାଝିଙ୍କୁ ପ୍ରାର୍ଥୀ କରାଯାଇଥିବା ନେଇ ବିଜେଡି ମହଲରେ ଉତ୍ସାହ ଦେଖିବାକୁ ମିଳିଛି ।
