ଯାଜପୁର: ମଝି ନଈରେ ଡଙ୍ଗା ବୁଡ଼ି ଯିବାରୁ ୨ ଜଣ ନିଖୋଜ। ଏହି ଅଘଟଣ ଘଟିଛି ଯାଜପୁର ଜିଲ୍ଲା ଡଅଁରକୁଳ ଗାଁ ତନ୍ତୀଘାଇ ନଦୀରେ । ଖରସ୍ରୋତାର ଏହି ଶାଖା ନଦୀରେ ଏହି ଅଘଟଣ ଘଟିଛି। ଜଣେ ବ୍ୟକ୍ତି ଡଙ୍ଗାରେ ଦୁଇ ସଂପର୍କୀୟ ମହିଳା ଓ ଜଣେ ଶିଶୁଙ୍କୁ ନେଇ ନଦୀ ପାର ହେବା ବେଳେ ମଝି ନଈରେ ଡଙ୍ଗାଟି ବୁଡ଼ି ଯାଇଥିଲା। ସ୍ଥାନୀୟ ଲୋକେ ଦୁଇ ମହିଳାଙ୍କୁ ଉଦ୍ଧାର କରିଥିବା ବେଳେ ଶିଶୁ ପୁତ୍ର ସହିତ ଆଉ ଜଣେ ପୁରୁଷ ନିଖୋଜ ଅଛନ୍ତି। ଅଗ୍ନିଶମ ବାହିନୀ ସେମାନଙ୍କୁ ଖୋଜାଖୋଜି କରୁଛି।
ଆଜି ମହାପ୍ରଭୁଙ୍କ ରାଧାଦାମୋଦର ବେଶ
ନନ୍ଦିଘୋଷ ବ୍ୟୁରୋ: ଆଜି ଆଶ୍ଵିନ ଶୁକ୍ଳପକ୍ଷ ଏକାଦଶୀ ତିଥି ଅବସରରେ ପରମ୍ପରା ଅନୁସାରେ ଶ୍ରୀମନ୍ଦିରରେ ମହାକାର୍ତ୍ତିକ ନୀତିର ଶୁଭାରମ୍ଭ ହେବ । ଏହି ଅବସରରେ ଶ୍ରୀଜୀଉ ମାଙ୍କର ରାଧାଦାମୋଦର ବେଶ ସହ ବାଳଭୋଗ ନୀତି ଅନୁଷ୍ଠିତ ହେବ । ଦୀର୍ଘ ଏକମାସ କାଳ ପ୍ରତିଦିନ ରାଧାଦାମୋଦର ବେଶରେ ମହାପ୍ରଭୁ ଭକ୍ତଙ୍କୁ ଦର୍ଶନ ଦେବେ । ଶ୍ରୀବଳଭଦ୍ର ଓ ଶ୍ରୀଜଗନ୍ନାଥଙ୍କୁ ତ୍ରିକଚ୍ଛ ପରିଧାନ କରାଯାଇ ଶ୍ରୀଭୂଜରେ ସୁବର୍ଣ୍ଣ ନଳୀ ଲାଗି କରାଯିବ । ବାଉଁଶପାତିଆ ଓ କନାରେ ପ୍ରସ୍ତୁତ ଚୂଳ ଓ ଚନ୍ଦ୍ରିକା ମହାପ୍ରଭୁଙ୍କ ତ୍ରିମୁଣ୍ଡିରେ ଶୋଭା ପାଇବ ।
ମସ୍ତକରେ ତଡ଼ଗୀ ,ଚନ୍ଦ୍ର, ସୂର୍ଯ୍ୟ, ଚିତା,କର୍ଣ୍ଣରେ କୁଣ୍ଡଳ ଓ କଟିରେ ଓଡ଼ିଆଣୀ ଧାରଣ କରିବେ । ବାରଲାଗି ପାଟ, ବିଭିନ୍ନ ପୁଷ୍ପ ଅଳଙ୍କାର, ଶିରି କପଡା,କଳା ଉତରୀୟ ବସ୍ତ୍ର ପରିଧାନ କରି ମହାପ୍ରଭୁ ଅପୂର୍ବ ଦିଶିବେ । ଆଜିଠାରୁ ଆରମ୍ଭ ହେବାକୁ ଥିବା ଠାକୁରଙ୍କ ଏହି ଅପୂର୍ବ ରାଧାଦାମୋଦର ବେଶ ଆସନ୍ତା କାର୍ତ୍ତିକ ମାସ ଶୁକ୍ଳପକ୍ଷ ଦଶମୀ ପର୍ଯ୍ୟନ୍ତ ଚାଲୁରହିବ । ଏହି ବେଶରେ ଥାଇ ଠାକୁରଙ୍କ ଗୋପାଳବଲ୍ଲଭ ଓ ସକାଳଧୂପ ନୀତି ସମ୍ପୂର୍ଣ୍ଣ କରାଯିବ । ଏହି ନୀତି ପରେ ଶ୍ରୀବିଗ୍ରହମାନଙ୍କୁ ସ୍ଵତନ୍ତ୍ର ବନ୍ଦାପନା କରାଯାଇଥାଏ । ତେବେ ଆଜିଠାରୁ ପ୍ରତ୍ୟହ ଭୋର ୪ଟା ରେ ଶ୍ରୀମନ୍ଦିର ଦ୍ୱାର ପିଟା ନୀତି ସମ୍ପର୍ଣ୍ଣ କରାଯିବ ବୋଲି ଶ୍ରୀମନ୍ଦିର ପ୍ରଶାସନ ପକ୍ଷରୁ ନୀତି ନିର୍ଘଣ୍ଟ କରାଯାଇଛି ।
ଆଜିଠୁ ଭାରତ-ନ୍ୟୁଜିଲାଣ୍ଡ T20 ଟକ୍କର
ନନ୍ଦିଘୋଷ ବ୍ୟୁରୋ: କିୱି ମାଟିରେ ଭାରତୀୟ ଦଳର ଅସଲ ପରୀକ୍ଷା । ଆଜିଠାରୁ ଆରମ୍ଭ ହେବାକୁ ଯାଉଛି ଭାରତ-ନ୍ୟୁଜିଲାଣ୍ଡ ଟି-ଟ୍ଵେଣ୍ଟି ଟକ୍କର । ଭାରତ ଏବଂ ନ୍ୟୁଜିଲାଣ୍ଡ ମଧ୍ୟରେ ଖେଳାଯିବାକୁ ଥିବା ୫ ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ର ପ୍ରଥମ ମ୍ୟାଚ୍ ଆଜି କ୍ରାଇଷ୍ଟଚର୍ଚ୍ଚର ହାଗ୍ଲେ ଓଭାଲ୍ ଗ୍ରାଉଣ୍ଡରେ ଖେଳାଯିବ । ଭାରତୀୟ ସମୟ ମଧ୍ୟାହ୍ନ ୧୨ଟା ୩୦ ମିନିଟ୍ରେ ଆରମ୍ଭ ହେବ ଏହି ହାଇ-ଭୋଲଟେଜ୍ ମ୍ୟାଚ୍ । ଷ୍ଟାର୍ ବ୍ୟାଟର ଶ୍ରେୟସ ଆୟରଙ୍କୁ ଭାରତୀୟ ଦଳର ଅଧିନାୟକ ଦାୟିତ୍ୱ ଦିଆଯାଇଛି । ଅନ୍ୟପଟେ ଘରୋଇ ନ୍ୟୁଜିଲାଣ୍ଡ ଦଳର କମାଣ୍ଡ ମିଚେଲ ସାଣ୍ଟନରଙ୍କ ହାତରେ ରହିଛି । ଭାରତୀୟ ଦଳରେ ସଞ୍ଜୁ ସାମସନ, ଅଭିଷେକ ଶର୍ମା ଏବଂ ତିଲକ ବର୍ମାଙ୍କ ଭଳି ବିସ୍ଫୋରକ ବ୍ୟାଟର ଥିବା ବେଳେ ବୋଲିଂ ଭାର ଅର୍ଶଦୀପ ସିଂହ ଏବଂ ଅଭିଜ୍ଞ ଭୁବନେଶ୍ୱର କୁମାରଙ୍କ ଉପରେ ରହିବ । କ୍ରାଇଷ୍ଟଚର୍ଚ୍ଚର ପିଚ୍ ସାଧାରଣତଃ ପେସ୍ ବୋଲରଙ୍କୁ ସହାୟତା କରିଥାଏ, ତେଣୁ ଟସ୍ ଜିତିବା ଦଳ ପ୍ରଥମେ ବୋଲିଂ କରିବାକୁ ପସନ୍ଦ କରିପାରେ । କିୱି ଦଳର ଘରୋଇ ପରିବେଶକୁ ଟକ୍କର ଦେବା ପାଇଁ ଶ୍ରେୟସ ବାହିନୀ ସମ୍ପୂର୍ଣ୍ଣ ପ୍ରସ୍ତୁତ ଥିବା ପ୍ରେସ୍ କନଫରେନ୍ସରେ କହିଛନ୍ତି । ଏଥିପାଇଁ ପଡ଼ିଆରେ ବୁଧବାର ଝାଳ ବୁହା ଅଭ୍ୟାସ କରିଛନ୍ତି ଟିମ୍ ଇଣ୍ଡିଆ ଖେଳାଳି ।.
SIR ବିରୋଧୀ ଆନ୍ଦୋଳନକୁ ସୀତାରମଣଙ୍କ ସ୍ବାମୀ ପାରକାଲ ପ୍ରଭାକରଙ୍କ ସମର୍ଥନ
ନନ୍ଦିଘୋଷ ବ୍ୟୁରୋ: କକ୍ରୋଚ ପାର୍ଟିକୁ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ସ୍ବାମୀ ପାରକାଲ ପ୍ରଭାକରଙ୍କ ସମର୍ଥନ । ସ୍ବତନ୍ତ୍ର ସଘନ ସଂଶୋଧନ ବିରୋଧରେ ଆୟୋଜିତ ଦେଶବ୍ୟାପୀ ପ୍ରତିବାଦ କାର୍ଯ୍ୟକ୍ରମରେ ଯୋଗଦେବେ ପାରକାଲ ପ୍ରଭାକର । ସିଜେପି ପ୍ରତିଷ୍ଠାତା ଅଭିଜିତ ଦୀପସେ ଓ ସାମାଜିକ କର୍ମୀ ପ୍ରକାଶ ରାଜଙ୍କ ସହ ମଞ୍ଚରେ ତାଙ୍କୁ ଦେଖିବାକୁ ମିଳିବ । ପିପୁଲ୍ସ ଏଗନେଷ୍ଟ SIR ମେଣ୍ଟ ଦ୍ବାରା ଆୟୋଜିତ ଏହି ପ୍ରତିବାଦ କାର୍ଯ୍ୟକ୍ରମ ଆସନ୍ତାକାଲି ଅନୁଷ୍ଠିତ ହେବାକୁ ଯାଉଛି । ଏଥିରେ ବିଭିନ୍ନ ସାମାଜିକ କର୍ମୀ, ରାଜନୈତିକ ନେତା ଓ ଜନସାଧାରଣ ଏକାଠି ହେବେ । SIR ପ୍ରକ୍ରିୟାକୁ ରଦ୍ଦ କରିବା ଓ ମୁଖ୍ୟ ନିର୍ମାଚନ କମିଶନ ଜ୍ଞାନେଶ କୁମାରଙ୍କୁ ବହିଷ୍କାର ଦାବିରେ ଆନ୍ଦୋଳନ କରୁଛି ପିପୁଲ୍ସ ଏଗନେଷ୍ଟ SIR ମେଣ୍ଟ । ସରକାରଙ୍କ ଅର୍ଥନୈତିକ ନୀତିର ଜଣେ ପ୍ରବଳ ସମାଲୋଚକ ଭାବେ ପରିଚିତ ପ୍ରଭାକର ଟ୍ୱିଟ୍ କରି କହିଛନ୍ତି, ହର ଗଲି ମେଁ ଜନ୍ତର ମନ୍ତର । ଗଣତନ୍ତ୍ର ପୁନଃସ୍ଥାପନ ପାଇଁ ଜନତାଙ୍କ ପଦଯାତ୍ରା । ଆସନ୍ତୁ, ଏହି ଆହ୍ୱାନର ମୁକାବିଲା କରିବା । ଏହି କାର୍ଯ୍ୟକ୍ରମରେ ବରିଷ୍ଠ ଆଇନଜୀବୀ ପ୍ରଶାନ୍ତ ଭୂଷଣ, କୃଷକ ନେତା ରାକେଶ ଟିକାୟତ, ଆଇସା ସଭାପତି ନେହା ବୋରା ଏବଂ ମହାତ୍ମା ଗାନ୍ଧୀଙ୍କ ଅଣନାତି ତୁଷାର ଗାନ୍ଧୀ ମଞ୍ଚରେ ଉପସ୍ଥିତ ରହିବେ ବୋଲି ଆଶା କରାଯାଉଛି ।
ଜେନ୍ ଜି ସପକ୍ଷରେ ନବୀନ ପଟ୍ଟନାୟକ
କଟକ, ଭୁବନେଶ୍ଵର: କକ୍ରୋଚ ଜନତା ପାର୍ଟିର ସୌରଭ ଦାସ ଓ ଆଶୁତୋଷ ରାଙ୍କାଙ୍କୁ ତୁରନ୍ତ ଛଡ଼ାଯାଉ ବୋଲି ବିଜେଡି ସଭାପତି ନବୀନ ପଟ୍ଟନାୟକ ଦାବି କରିବା ପରେ ଉଷ୍ଣ ହୋଇଛି ରାଜ୍ୟ ରାଜନୀତି। ଦେଶର ଆଇନ କାନୁନ ଓ ସାମ୍ବିଧାନିକ ଅଧିକାର ଉପରୁ ଯୁବ ବର୍ଗଙ୍କ ଭରସା ଯେମିତି ତୁଟି ନ ଯାଏ, ସେଥିପାଇଁ ବିଚାର ବିଭାଗ ଓ ପ୍ରଶାସନ ପଦକ୍ଷେପ ନେବା ଉଚିତ ବୋଲି ନିଜ ସୋସିଆଲ ମିଡିଆ ପୋଷ୍ଟରେ ଉଲ୍ଲେଖ କରିଛନ୍ତି ନବୀନ ପଟ୍ଟନାୟକ। ତାଙ୍କର ଏହି ମନ୍ତବ୍ୟ ପରେ ମୁହାଁମୁହିଁ ବିଜେପି ଓ ବିଜେଡି । ବରିଷ୍ଠ ବିଜେଡି ଉପସଭାପତି ଦେବୀ ପ୍ରସାଦ ମିଶ୍ର କହିଛନ୍ତି ଜେନ୍ ଜି ଏବେ ବିଜେପି ବିରୋଧୀ । ସେଥିପାଇଁ ବିଜେପି ନେତାମାନେ ବିତଣ୍ଡା ଓ ଅବାସ୍ତବ ବୟାନବାଜି କରୁଛନ୍ତି। ବିଜେପି ସଭାପତି ମନମୋହନ ସାମଲ କହିଛନ୍ତି ବିଜେଡି ନେତାଙ୍କ ବିଚାର ବିଭ୍ରାଟ ହୋଇଛି । …
କଂଗ୍ରେସ ମଧ୍ୟ ବିଜେପି ସାଂସଦ ମନମୋହନ ସାମଲଙ୍କୁ କଡ଼ା ସମାଲୋଚନା କରିଛି। ପୂର୍ବତନ ପିସିସି ସଭାପତି ଜୟଦେବ ଜେନା କହିଛନ୍ତି, ବିଜେପିର ଏକଛତ୍ରବାଦ ଶାସନକୁ ହଟାଇବା ପାଇଁ ପଣ କରିଛନ୍ତି ଜେନ୍ ଜି । ବିଜେପି ତାନାସାହି ଶାସନ ଚଳାଇଛନ୍ତି ପୁରା ଦେଶରେ। ଜେନ୍ ଜି ଙ୍କୁ ଦମନ କରିବାକୁ ଚେଷ୍ଟା କରାଯାଉଛି। ଏଥିରେ ବିଜେପି କେବେ ବି ସଫଳ ହେବନି। ସମ୍ବିଧାନକୁ ସୁରକ୍ଷା ଦେବା ପାଇଁ ଜେନ ଜି ଅଣ୍ଟା ଭିଡିଛନ୍ତି। ଜେନ ଜି କୁ ଇଣ୍ଡିମେଣ୍ଟ ସହ ବହୁ ଦଳ ସମର୍ଥନ କରୁଛି। ରାଜ୍ୟର ବିରୋଧୀ ଦଳ ନେତା ନବୀନ ପଟ୍ଟନାୟକ ମଧ୍ୟ ସମର୍ଥନ କରିଛନ୍ତି। ବିଜେପି ସଭାପତି ମନମୋହନ ସାମଲ ଜେନ ଜିର ଶକ୍ତି ଜାଣି ନାହାନ୍ତି। କଲେଜ ନିର୍ବାଚନରେ ଜେନ ଜି ନିଜର ଶକ୍ତି ଦେଖାଇଛନ୍ତି। ଆଜି ଯେଉଁମାନେ ଗଣତନ୍ତ୍ରକୁ ହତ୍ୟା କରୁଛନ୍ତି ସେମାନେ ଅନ୍ୟକୁ କହୁଛନ୍ତି ବୋଲି ବିଜେପିକୁ କଟାକ୍ଷ କରିଛନ୍ତି ଜୟଦେବ ଜେନା। …
ସିଜେପି ସପକ୍ଷରେ ବାହାରି ଜାତୀୟସ୍ତରରେ ପୁଣି ଚର୍ଚ୍ଚାକୁ ଆସିଛନ୍ତି ନବୀନ ପଟ୍ଟନାୟକ। ରାଜନୀତିରୁ ଉର୍ଦ୍ଧରେ ରହି ନବୀନ ଅତୀତରେ ଅନେକ ନିଷ୍ପତ୍ତି ନେଇଛନ୍ତି। …
ଜରାସିଂହାରେ ମାଆ ପାଟଖଣ୍ଡାଙ୍କ ଯାତ୍ରା
ବଲାଙ୍ଗୀର : ବଲାଙ୍ଗୀର ଦେଓଗାଁ ବ୍ଲକର ଜରାସିଂହା I ଦୁର୍ଗମ ଅଞ୍ଚଳରେ ପ୍ରବାହିତ ସୋନଗଡ଼ ନଦୀ I ଗୋଟିଏ ପାର୍ଶ୍ୱରେ ଜନବସତି ଅପର ପାର୍ଶ୍ଵରେ ଦେଝାର ଜଙ୍ଗଲ I ଜଙ୍ଗଲ ଭିତରେ ଏକ ପୁରାତନ ମହୁଲ ଗଛରେ ଅବସ୍ଥାପିତ ମାଆ ପାଟଖଣ୍ଡା ଦେବୀ I ଦେବୀଙ୍କ କୌଣସି ମୂର୍ତ୍ତି ନଥିବା ବେଳେ ପ୍ରତୀକ ସ୍ଵରୂପ ପୂଜା ପାଉଛନ୍ତି ଲୁହାରେ ତିଆରି ଖଣ୍ଡା I ପାଟଣାଗଡ଼ ରାଜା ବସ୍ତ୍ରରାଜ ଦେଓ ୧୨୧୭ ମସିହାରୁ ୧୨୪୬ ରାଜତ୍ବ କାଳରେ ଛତ୍ତିଶଗଡ଼ ବସ୍ତର ରାଜାଙ୍କ ସହ ଯୁଦ୍ଧ ହୋଇଥିଲା I ମାଆ ପାଟଣେଶ୍ୱରୀଙ୍କ ଆଦେଶ କ୍ରମେ ମାଆ ପାଟଖଣ୍ଡା ରାଜାଙ୍କୁ ଯୁଦ୍ଧରେ ବିଜୟୀ ହେବାକୁ ସହଯୋଗ କରିଥିଲେ I କିମ୍ବଦନ୍ତି କହେଲ ସେହିଦିନ ଠାରୁ ମାଆ ପାଟଖଣ୍ଡା ଜରାସିଂହା ଗାଁରେ ପୂଜା ପାଉଛନ୍ତି I ଜରାସିଂହା ଜମିଦାର ମାଆଙ୍କ ପୂଜା ଉପଚାର କରିଆସୁଛନ୍ତି I ପ୍ରତିବର୍ଷ ନବମୀ ତିଥିରେ ପାଟଣାଗଡ ପାଟଣେଶ୍ୱରୀ ମନ୍ଦିରରୁ ପାଟ ସିନ୍ଦୁର ଆସିବା ପରେ ଯାତ୍ରା ଅନୁଷ୍ଠିତ ହୋଇଥାଏ I
ଚାଲିଛି ମାଆ ପାଟଖଣ୍ଡାଙ୍କ ଯାତ୍ରା । ମୂଳାଷ୍ଟମୀ ଠାରୁ ଆରମ୍ଭ ହୋଇଥିବା ପୂଜାରେ ନବମୀ ବିଳମ୍ବିତ ରାତିରେ ପାଟସିନ୍ଦୂର ପହଞ୍ଚିବା ପରେ ଚାଲିଛି ଯାତ୍ରା। ମାଆଙ୍କ ଠାରେ ଲିଆ ଭୋଗ ସହ ଖଣ୍ଡାବସା ଷୋଡ଼ଷ ଉପଚାର ପୂଜା ହୋଇଥାଏ I ମହାସପ୍ତମୀରୁ ପାଟଣାଗଡ଼ ମାଆ ପାଟଣେଶ୍ୱରୀଙ୍କ ମନ୍ଦିରରୁ ପାଟସିନ୍ଦୁର ବାହାରି ଜଙ୍ଗଳ ଭିତର ଦେଇ ଜରାସିଂହା ଦେଝାର ଜଙ୍ଗଲରେ ପହଞ୍ଚିଥାଏ I ଜଣେ ଦେହୁରୀ ଓ ସହାୟକ ପାଟସିନ୍ଦୁର ଧରି ଖାଲି ପାଦରେ ଚାଲିଚାଲି ଆସିଥାନ୍ତି I ଗାଁ ଜମିଦାରଙ୍କ ସହ ଦେହୁରୀ, ସେବାୟତ ଓ ଗ୍ରାମବାସୀ ସିନ୍ଦୂରଙ୍କୁ ସ୍ୱାଗତ କରି ମାଆଙ୍କ ମନ୍ଦିରକୁ ଆଣିବା ପରେ ଆରମ୍ଭ ହୁଏ ଯାତ୍ରା । ପାଟଖଣ୍ଡାଙ୍କୁ ସାକ୍ଷାତ ଦେବୀ ବୋଲି ଲୋକଙ୍କ ବିଶ୍ବାସ ରହିଛି I ମାଙ୍କୁ ଦର୍ଶନ କରି ମାନସିକ କଲେ ଅପୃତିକ ପୁତ୍ର ଲାଭ କରିଥାଏ, ମାନସିକ ସନ୍ତୁଳନ ହରାଇଥିବା ଲୋକ ସୁସ୍ଥ ହୋଇଥାଏ ବୋଲି ବିଶ୍ୱାସ ରହିଛି I ତେଣୁ କରି ହଜାର ହଜାର ଭକ୍ତ ମାଆଙ୍କ ଶରଣରେ ଅଧିଆ ପଡିଥାନ୍ତି I
ମାଡ଼ି ଆସୁଛି ମହାବିପଦ
ଭୁବନେଶ୍ବର : ମାଡ଼ି ଆସୁଛି ମହାବିପଦ । ନଭେମ୍ବର, ଡିସେମ୍ବର ଓ ଜାନୁଆରୀରେ ପିକରେ ରହିବ ପ୍ରଦୂଷଣ। ସ୍କାନରରେ ଭୁବନେଶ୍ବର, କଟକ, କଳିଙ୍ଗନଗର, ରାଉରକେଲା, ଝାରସୁଗୁଡ଼ା, ତାଳଚେର ଓ ଅନୁଗୁଳ । ଏହି ତିନି ମାସ ତାପମାତ୍ରା ପ୍ରତିଲୋମନ ପାଇଁ ଧୂଳି ତଳେ ରହି ପ୍ରଦୂଷଣ ବଢ଼ାଇ ଥାଏ । ଯେଉଁଥିପାଇଁ ଏହି ସାତ ସହରକୁ ଓଡ଼ିଶା ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ଜାରି କରିଛି ମାର୍ଗଦର୍ଶିକା । ପ୍ରଦୂଷଣ ଯୋଗୁଁ ବୟସ୍କ ଓ ଛୁଆଙ୍କୁ ନିଃଶ୍ବାସ ନେବାରେ ଅସୁବିଧା ହେବ । ତେଣୁ ମାସ୍କ ପିନ୍ଧିବାକୁ ଦିଆଯାଇଛି ପରାମର୍ଶ । ସହର ଭିତରକୁ ଡିଜେଲ ଗାଡିର ପ୍ରବେଶ ଉପରେ ରହିବ କଟକଣା । ଗାଡ଼ି ଗୁଡ଼ିକର PUC ଯାଞ୍ଚ ହେବ କଡ଼ାକଡ଼ି । ମେକାନିକାଲ ସୁଇପିଙ୍ଗ ମେସିନ ଜରିଆରେ ସଫେଇ କାର୍ଯ୍ୟକ୍ରମ କରାଯିବ । ହୋଟେଲରେ କୋଇଲା ବ୍ୟବହାର ହେବ ବାରଣ । ପ୍ରତି ତିନି ଘଣ୍ଟାରେ ସମ୍ବେଦନଶୀଳ ଅଞ୍ଚଳରେ ହେବ ଜଳ ସିଞ୍ଚନ । ଗତ ବର୍ଷ ଏହି ସବୁ ସହର ପ୍ରଦୂଷଣ ମାତ୍ରାରେ ଦିଲ୍ଲୀକୁ ଟପି ଯାଇଥିବାରୁ ପ୍ରାକ ପ୍ରସ୍ତୁତି ଭାବେ ଏହି ସବୁ ପଦକ୍ଷେପ ନିଆଯାଇଛି । ଶୂନ୍ୟରୁ ୫୦ ମଧ୍ୟରେ ଏକ୍ୟୁଆଇ ଭଲ, ୫୧ରୁ ୧୦୦ ମଧ୍ୟରେ ସନ୍ତୋଷଜନକ, ୧୦୧ରୁ ୨୦୦ ମଧ୍ୟରେ ମଧ୍ୟମ, ୨୦୧ରୁ ୩୦୦ ମଧ୍ୟରେ ଖରାପ, ୩୦୧ରୁ ୪୦୦ ମଧ୍ୟରେ ଅତ୍ୟନ୍ତ ଖରାପ ଓ ୪୦୧ରୁ ୫୦୦ ମଧ୍ୟରେ ଗୁରୁତର ବୋଲି ପ୍ରଦୂଷଣ ନିୟନ୍ତ୍ରଣ ବୋର୍ଡ ବିବେଚନା କରିଥାଏ । ଗତ ଦୀପାବଳି ସମୟରୁ ଲଗାତାର ଭାବେ ଭୁବନେଶ୍ବର ଓ କଟକର ପ୍ରଦୂଷଣ ମାତ୍ରା ଦିଲ୍ଲୀ ସହ ସମାନ ଚାଲିବାରୁ ଚିନ୍ତା ବଢିଥିଲା । ଆଗକୁ ବି ଦୀପାବଳି ଆସୁଛି । ଯେତେ କଟକଣା ଲଗାଇଲେ ବି ଗ୍ରୀନ କ୍ରାକର ବଦଳରେ ପ୍ରଦୂଷଣ କରୁଥିବା ବାଣ ଫୁଟାଇବେ ଲୋକ । ଯାହା ବିପଦ ଆହୁରି ବଢାଇ ପାରେ ।
ଶିଳ୍ପ ସଂସ୍ଥାରୁ ନିର୍ଗତ ବିଷାକ୍ତ ଗ୍ୟାସ ସହ ସହରର ପରିମଳ ବ୍ୟବସ୍ଥା ମଧ୍ୟ ପ୍ରଦୂଷଣ ବଢ଼ାଇବାରେ ସହାୟକ ହେଉଛି । ହେଲେ ନିର୍ମାଣ କାର୍ଯ୍ୟ ଓ ଖଣି ଖନନ କାର୍ଯ୍ୟ ବି ପ୍ରଦୂଷଣ ବୃଦ୍ଧିର କାରଣ ପାଲଟିଛି । କମ୍ପାନୀମାନଙ୍କ ଖାମଖିଆଲ ମନୋଭାବ ଯୋଗୁଁ ପ୍ରଦୂଷଣ କମିବା ବଦଳରେ ବଢି ଚାଲିଛି । ଗତ ବର୍ଷ ପ୍ରାକୃତିକ ସୌନ୍ଦର୍ଯ୍ୟ ଭରା ବାରିପଦା ଯେବେ ଦିଲ୍ଲୀକୁ ପ୍ରଦୂଷଣରେ ଟପିଲା, ତାହା ଚିନ୍ତା ବଢାଇ ଦେଇଥିଲା । ସେ ସମୟରେ ବାରପଦା ସହରରେ ବସ୍ ଷ୍ଟାଣ୍ଡ ନିର୍ମାଣ ପାଇଁ ୫ ଏକରର ଜମିର ୧୭୮୯ ଗଛ କଟା ଯାଇଥିଲା । ପରିବେଶକୁ ଦୃଷ୍ଟିରେ ରଖି ଏହାକୁ ସ୍ଥାନୀୟ ଲୋକ ବିରୋଧ ବି କରିଥିଲେ । ହେଲେ ଗଛ କଟା ହେଲା । ସେପଟେ ଏହାର ଏକ ସପ୍ତାହ ଭିତରେ ବାରିପଦା ସବୁଠାରୁ ପ୍ରଦୂଷିତ ସହର ତାଲିକାରେ ଉଠିଥିଲା ।
ନ୍ୟୁଜିଲାଣ୍ଡ ବିପକ୍ଷ ଟି-୨୦ରେ ନଜର ଆସିବେନି ବୈଭବ ସୂର୍ଯ୍ୟବଂଶୀ
ନନ୍ଦିଘୋଷ ବ୍ୟୁରୋ: ବୈଭବ ସୂର୍ଯ୍ୟବଂଶୀଙ୍କୁ ନେଇ କ୍ରିକେଟ୍ ପ୍ରେମୀଙ୍କ ମଧ୍ୟରେ କ୍ରେଜ୍ ବଢିବାରେ ଲାଗିଛି । ଲାଇମଲାଇଟରେ ଥିବା ଏହି ଯୁବ କ୍ରିକେଟର କିନ୍ତୁ ନ୍ୟୁଜିଲାଣ୍ଡ ବିପକ୍ଷ ଟି-୨୦ରେ ନଜର ଆସିବେ ନାହିଁ।
ନିକଟରେ ଏକ ସାକ୍ଷାତକାରରେ ଏନେଇ ଅଧିନାୟକ ଶ୍ରେୟସ ଆୟର ସ୍ପଷ୍ଟ କରିଛନ୍ତି । ଶ୍ରେୟସ କହିଛନ୍ତି, ‘ସମୟ ଆସିଲେ ବୈଭବଙ୍କୁ ନିଶ୍ଚିୟ ସୁଯୋଗ ମିଳିବ। ଟିମ୍ ର ଓପନର ସଞ୍ଜୁ ସାମସନ୍ ଓ ଅଭିଷେକ ଶର୍ମା ଭଲ ଫର୍ମରେ ଅଛନ୍ତି । ବିଶ୍ୱକପ ଜିତିବାରେ ଉଭୟଙ୍କ ଭୂମିକା ବେଶ ଗୁରୁତ୍ବପୂର୍ଣ୍ଣ ଥିଲା । ବୈଭବଙ୍କୁ ଟି-୨୦ ଅନ୍ତର୍ଜାତୀୟ ମ୍ୟାଚ୍ ରେ ୮ ନମ୍ବର ସ୍ଥାନରେ ଖେଳିବାକୁ ସୁଯୋଗ ମିଳିଛି । ଅଭିଷେକ ଓ ସଞ୍ଜୁ ଦଳ ପାଇଁ ନିରନ୍ତର ଭଲ ପ୍ରଦର୍ଶନ କରୁଛନ୍ତି। ବୈଭବଙ୍କୁ ସୁଯୋଗ ପାଇବା ପାଇଁ ଆହୁରି ଅନେକ ବର୍ଷ ବାକି ଅଛି’। ସେ ଆଉ ମଧ୍ୟ କହିଛନ୍ତି, ‘ବୈଭବଙ୍କ ପରି ଜଣେ ପ୍ରତିଭା ସର୍ବଦା ଡ୍ରେସିଂ ରୁମରେ ଖୁସି ରହିବା ଜରୁରୀ’ ।
ପ୍ରକାଶ ଥାଉ କି, ଆସନ୍ତା୨୨ ଅକ୍ଟୋବରରୁ ଭାରତ-ନ୍ୟୁଜିଲ୍ୟାଣ୍ଡ ବିପକ୍ଷ ପାଞ୍ଚ ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ ଆରମ୍ଭ ହେବ। ଦ୍ୱିତୀୟ ମ୍ୟାଚ୍ ୨୪ ତାରିଖରେ, ତୃତୀୟ ୨୭ ତାରିଖରେ, ଚତୁର୍ଥ ୩୦ ତାରିଖରେ ଓ ଶେଷ ମ୍ୟାଚ୍ ନଭେମ୍ବର ୧ରେ ଖେଳାଯିବ।
ଏବେ ଗ୍ରୀଷ୍ମ ଋତୁର ଆରମ୍ଭ ହେଉଥିବାରୁ ଦିନ ବେଳେ ପାଗ ଭଲ ରହିଛି । ହେଲେ ମ୍ୟାଚ୍ ସ୍ଥାନୀୟ ସମୟ ରାତି ୮ଟାରେ ଖେଳାଯିବ । ରାତି ଯୋଗୁଁ ପାଗ ଥଣ୍ଡା ହେବ। ରାତି ବଢ଼ିଲେ କାକର ପଡ଼ିବା ନେଇ ମଧ୍ୟ ସମ୍ଭାବନା ରହିଛି। ତେଣୁ ପ୍ରଥମେ ଟସ୍ ଜିତିଥିବା ଦଳ ବୋଲିଂ କରିବାକୁ ପସନ୍ଦ କରିପାରନ୍ତି।
ଭାରତ (ସମ୍ଭାବ୍ୟ ଏକାଦଶ): ଅଭିଷେକ ଶର୍ମା, ସଞ୍ଜୁ ସାମ୍ସନ୍ , ଈଶାନ କିଶନ, ଶ୍ରେୟସ ଆୟର, ତିଳକ ବର୍ମା, ଶିବମ ଦୁବେ, ନୀତୀଶ କୁମାର ରେଡ୍ଡୀ, ଅକ୍ଷର ପଟେଲ, ଭୁବନେଶ୍ବର କୁମାର, ନମନ ଧୀର, ଅର୍ଶଦୀପ ସିଂହ।
ନ୍ୟୁଜିଲାଣ୍ଡ (ସମ୍ଭାବ୍ୟ ଏକାଦଶ): ଫିନ୍ ଆଲେନ, ଟିମ୍ ସେଫର୍ଟ, ଡେଭନ କନୱେ, ଗ୍ଲେନ୍ ଫିଲିପ୍ସ, ଡାରିଲ ମେଚେଲ, ମାଇକେଲ ବ୍ରେସ୍ୱେଲ, ମିଚେଲ ସାଣ୍ଟନର, ନାଥନ ସ୍ମିଥ୍, କାଇଲ ଜାମିସନ, ମ୍ୟାଟ୍ ହେନରି, ଲୋକି ଫର୍ଗୁସନ।
କୋଟିଆରେ ଆନ୍ଧ୍ରର ନିର୍ବାଚନ ପ୍ରସଙ୍ଗ, ପୁଣି ସୁପ୍ରିମକୋର୍ଟରେ ଫେରାଦ ହେବେ ସରକାର
ନନ୍ଦିଘୋଷ ବ୍ୟୁରୋ: କୋଟିଆରେ ଆନ୍ଧ୍ର ନିର୍ବାଚନ ବିବାଦ ପ୍ରସଙ୍ଗରେ ପୁଣି ଥରେ ସୁପ୍ରିମକୋର୍ଟରେ ଫେରାଦ ହେବେ ରାଜ୍ୟ ସରକାର। କୋରାପୁଟ ଜିଲ୍ଲାର ଅନ୍ତର୍ଗତ ବିବାଦୀୟ କୋଟିଆ ପଞ୍ଚାୟତରେ ଆନ୍ଧ୍ରପ୍ରଦେଶ ସରକାରଙ୍କ ଦ୍ବାରା ନିର୍ବାଚନ କରାଯିବା ଯୋଜନାକୁ ନେଇ ପୁଣି ଥରେ ରାଜ୍ୟ ସରକାରଙ୍କ ପକ୍ଷରୁ ତତ୍ପରତା ପ୍ରକାଶ ପାଇଛି।
ସୁପ୍ରିମକୋର୍ଟଙ୍କ ନିର୍ଦ୍ଦେଶ ଓ କୋର୍ଟର ଅବମାନନା କରି ଆନ୍ଧ୍ର ସରକାର ଏଭଳି ପଦକ୍ଷେପ ନେଇଥିବାରୁ ଏହା ବିରୋଧରେ ସରକାର ସୁପ୍ରିମକୋର୍ଟଙ୍କ ଦ୍ୱାରସ୍ଥ ହେବେ ବୋଲି କୋରାପୁଟ ଉପଜିଲ୍ଲାପାଳ ତଥା ଆଇଏଏସ ଅଧିକାରୀ ଫବି ରସିଦ ସୂଚନା ଦେଇଛନ୍ତି । ଆଜିଠାରୁ ସେ ୩ ଦିନିଆ କୋଟିଆ ଗସ୍ତ କରିବେ। ସେଠାରେ ପହଞ୍ଚି କୋଟିଆ ପଞ୍ଚାୟତର ସ୍ଥାନୀୟ ଲୋକଙ୍କ ସହିତ ଆଲୋଚନା କରିବା ସହ ସେମାନଙ୍କର ବିଭିନ୍ନ ସମସ୍ୟା ଓ ସ୍ଥିତି ଅନୁଧ୍ୟାନ କରିବେ। ଓଡ଼ିଶାର ଅଞ୍ଚଳିକ ଅଖଣ୍ଡତା ଓ ସାର୍ବଭୌମତ୍ୱ ରକ୍ଷା ପାଇଁ ପ୍ରଶାସନ ପକ୍ଷରୁ ସମସ୍ତ ଜରୁରୀ ପଦକ୍ଷେପ ଗ୍ରହଣ କରାଯାଉଛି । ସୁପ୍ରିମକୋର୍ଟଙ୍କ ସ୍ଥିତାବସ୍ଥା ନିର୍ଦ୍ଦେଶକୁ ଲଙ୍ଘି ଆନ୍ଧ୍ରର ଏପରି ବେଆଇନ କାର୍ଯ୍ୟକଳାପ ବିରୋଧରେ ଆଇନଗତ ଲଢ଼େଇକୁ ଆହୁରି ଜୋରଦାର କରାଯିବ ବୋଲି ପ୍ରଶାସନ ପକ୍ଷରୁ ସ୍ପଷ୍ଟ କରାଯାଇଛି। କୋଟିଆ ସୀମାନ୍ତ ବିବାଦ ଓ ଆନ୍ଧ୍ରର ଏଭଳି ଅନଧିକାର ପ୍ରବେଶକୁ ପ୍ରତିହତ କରିବା ପାଇଁ ରାଜ୍ୟ ସରକାରଙ୍କ ପକ୍ଷରୁ ଆଗାମୀ ଆଇନଗତ ପଦକ୍ଷେପ ଜାରି ରହିଛି ।
ବିଜୟା ଦଶମୀରେ ନିଆରା ବଳଦ ଯାତ୍ରା
ଆନନ୍ଦପୁର: ବିଜୟା ଦଶମୀରେ ନିଆରା ବଳଦ ଯାତ୍ରା। କେନ୍ଦୁଝର ଜିଲ୍ଲା ଘସିପୁରା ବ୍ଲକ କେଶଦୁରାପାଳ ଗାଁରେ ବେଶ ଧୂମଧାମରେ ପାଳିତ ହୋଇଛି। ବଳଦଙ୍କୁ ସଜାଯାଇ ଶୋଭାଯାତ୍ରାରେ ବିଭିନ୍ନ ଗାଁ ପରିକ୍ରମା କରି କେଶଦୁରାପାଳ ବାଲିଯାତ୍ରା ପଡ଼ିଆକୁ ନିଆଯାଇଥାଏ । ସେଠାରେ ବିଭିନ୍ନ ଗାଁରୁ ଆସିଥିବା ବଳଦ ମାନଙ୍କ ମଧ୍ୟରେ ସୁନ୍ଦର ପ୍ରତିଯୋଗିତା ହୋଇଥାଏ। ଏହି ପ୍ରତିଯୋଗିତାରେ ଭାଗ ନେବା ପାଇଁ ବଳଦଙ୍କୁ ସକାଳୁ ଗାଧୋଇ ସୁନ୍ଦର ଭାବରେ ସଜାଯାଇ ବାହାର କରାଯାଏ ।ପିଠିରେ କୁଟା ଏବଂ ଝୋଟ ଅଖାରେ ତିଆରି ଗାଣ୍ଡୁଆ ତା ଉପରେ ସୁସଜିତ ପଲ୍ହାଣ ପକାଯାଏ। ଦେହରେ ଘଣ୍ଟ ଏବଂ ଘୁଙ୍ଗୁର ବାନ୍ଧି ଶିଙ୍ଗରେ ମୟୂର ପୁଛ, ମୁହଁରେ ମୁହଁଖାର ଆଦି ଲଗା ଯାଏ। ଗାଁ ମଝିରେ ପୂଜା କରାଯାଇ ବାଜା ବଜାଇ ବିଭିନ୍ନ ଗ୍ରାମ ପରିକ୍ରମା କରାଯାଏ।
କାହିଁ କେଉଁ ଆଦିମ କାଳରୁ ଏଠାରେ ବଳଦ ଶୋଭାଯାତ୍ରା ହୋଇଆସୁଛି । ସାଧାରଣତଃ ବଳଦ ମାନେ ଚାଷ କାର୍ଯ୍ୟ ଓ ବେପାର ବଣିଜରେ ସାହାଯ୍ୟ କରିଥାନ୍ତି । ତେଣୁ ବିଜୟା ଦଶମୀ ଦିନରୁ ଗ୍ରାମବାସୀ ବେପାରର ଶୁଭ ଆରମ୍ଭ କରିଥାନ୍ତି ।ଏହା ପୂର୍ବରୁ ବଳଦ ମାନଙ୍କୁ ସଜାଇ ଶୋଭାଯାତ୍ରାରେ ଗ୍ରାମ ପରିକ୍ରମା ସହ ରାବଣ ପୋଡି ଉତ୍ସବ ଅନୁଷ୍ଠିତ ହୋଇଥିଲା। ଏହି ବଳଦ ଶୋଭାଯାତ୍ରାରେ କେଶଦୁରାପାଳର ବିଭିନ୍ନ ସାହି ସମେତ ମଙ୍ଗଳପୁର ଗାଁରୁ ବଳଦ ଯୋଗଦେଇଥିଲେ। ଯାହାକୁ ଦେଖିବାକୁ ଲୋକଙ୍କ ଭିଡ଼ ଜମିଥିଲା।
ବିଶ୍ବାସ ରହିଛି, ଏହି ବଳଦ ଶୋଭାଯାତ୍ରା ଦ୍ଵାରା ମା ମଙ୍ଗଳା ଖୁସି ହୁଅନ୍ତି । ବେପାର ବଣିଜ ଭଲ ହେବା ସହ ଚାଷବାଷ ଭଲ ହୋଇଥାଏ ।….