ଭୁବନେଶ୍ବର: ମାହାଙ୍ଗା ଡବଲ ମର୍ଡର ଘଟଣାରେ ଷଡ଼ଯନ୍ତ୍ର କରୁଛନ୍ତି ବିରୋଧୀ । ରାଜନୈତିକ ଉଦ୍ଦେଶ୍ୟ ରଖି ବଦନାମ କରାଯାଉଛି ବୋଲି କହିଛନ୍ତି ମାହାଙ୍ଗା ବିଧାୟକ ପ୍ରତାପ ଜେନା । ପ୍ରତାପ କହିଛନ୍ତି, ମାମଲାରେ ମୋ ବିରୋଧରେ ଆସିଥିବା ଅଭିଯୋଗର କୌଣସି ସତ୍ୟାସତ୍ୟ ନାହିଁ । ଯେଉଁମାନେ ମାମଲାରେ ସଂପୃକ୍ତ ଥିଲେ ସେମାନେ ନିଜେ ଦୋଷ ସ୍ବୀକାର କରି ସାରିଥିଲେ । ବିଜେପି ନେତା ତଥା ମାହାଙ୍ଗାରେ ପରାଜିତ ହୋଇଥିବା ଶାରଦା ପ୍ରଧାନ ମିଛ ଅଭିଯୋଗ ଆଣିବା ସହିତ ଚକ୍ରାନ୍ତ କରୁଛନ୍ତି । ବିରୋଧୀ ରାଜନୈତିକ ମଇଦାନରେ ଆମକୁ ସାମ୍ନା କରିପାରୁନାହାନ୍ତି । ମାହାଙ୍ଗାରେ ଯେଉଁ ବିକାଶ ଚାଲିଛି ସେଥିରେ ଅସହିଷ୍ଣୁ ହୋଇପଡ଼ିଛନ୍ତି । ଏଣୁ ମୋତେ ଫସାଇବାକୁ ଏଭଳି ହୀନ ଉଦ୍ୟମ କରାଯାଉଥିବା ପ୍ରତାପ କହିଛନ୍ତି । କୋର୍ଟରେ ମୋ ବିରୋଧରେ ତଥ୍ୟ ଦେଇଥିବା ଲୋକଙ୍କର ଏବଂ ତାଙ୍କ ନିଜର ନାର୍କୋ ଟେଷ୍ଟ କରିବାକୁ ସେ ଦାବି କରିଛନ୍ତି । ଏହାଦ୍ବାରା ସତ୍ୟାସତ୍ୟ ସାମ୍ନାକୁ ଆସିଯିବ ବୋଲି ପ୍ରତାପ କହିଛନ୍ତି ।
ଲୋକେ ଆସିବେନି, ପ୍ରଶାସନ ଲୋକଙ୍କ ପାଖକୁ ଯିବ
ଭୁବନେଶ୍ବର: ଲୋକଙ୍କ ପାଖରେ ପ୍ରଶାସନ । ଚୁଟକିରେ ହେଉଛି ସମସ୍ୟାର ସମାଧାନ। ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ସିଏମଓ ଲୋକଙ୍କ ପାଖରେ ପହଞ୍ଚିଛି। କୋଭିଡ୍ ପାଇଁ ଦୁଇ ବର୍ଷର ବ୍ରେକ୍ ପରେ ମୁ୍ଖ୍ୟମନ୍ତ୍ରୀ ଅଭିଯୋଗ ପ୍ରକୋଷ୍ଠ ଲୋକଙ୍କ ଦୁଆରେ ପହଞ୍ଚା ଯାଇଛି ବୋଲି ବିଧାନସଭାରେ ବିବୃତି ରଖିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ସିଏମ୍ ଅଭିଯୋଗ ସେଲ୍ CMO ଦ୍ୱାରା ପରିଚାଳିତ। ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ CMOର ଅଧିକାରୀମାନେ ସବୁ ଜିଲ୍ଲା ଗସ୍ତ କରି ଅଭିଯୋଗ ଶୁଣିଛନ୍ତି। ଯୁଦ୍ଧକାଳୀନ ଭିତ୍ତିରେ ଲୋକଙ୍କ ଅଭିଯୋଗର ସମାଧାନ କରାଯାଉଛି । ସିଏମଓଙ୍କ ଜିଲ୍ଲାଗସ୍ତ ନେଇ ଲୋକେ ଖୁସି ଥିବା ବେଳେ ବିରୋଧୀ ଏହାକୁ ନେଇ ରାଜନୀତି କରିବା ଜନବିରୋଧୀ ବୋଲି ମୁଖ୍ୟମନ୍ତ୍ରୀ କହିଛନ୍ତି। ସେପଟେ ମୁଖ୍ୟମନ୍ତ୍ରୀଙ୍କ ବିବୃତି ବିରୋଧୀଙ୍କ ହୀନ ରାଜନୀତିର ବାଟ ବନ୍ଦ କରିଦେଇଛି ବୋଲି ରାଜନୈତିକ ସମୀକ୍ଷକ କହିଛନ୍ତି।
ଲୋକଙ୍କ ପାଇଁ ସିଏମଓ। ସିଏମଙ୍କ ନିର୍ଦ୍ଦେଶରେ ସିଏମଓଙ୍କ ଜିଲ୍ଲାଗସ୍ତ। ଘର ପାଖରେ ପହଞ୍ଚିଛି ପ୍ରଶାସନ, ଶୁଣିଛି ସମସ୍ୟା। ୬ମାସରେ ୧୯୦ଟି ସ୍ଥାନରେ ଅଭିଯୋଗ ଶୁଣାଣି । ୫୭ହଜାର ୪୪୨ ଦରଖାସ୍ତରୁ ୪୩ହଜାର ୫୩୬ର ସମାଧାନ। ନବୀନଙ୍କ କହିଲେ ଲୋକେ ଖୁସି, ଜନ ପ୍ରତିନିଧି ବି ଖୁସ୍। ବିରୋଧୀଙ୍କ ବିରୋଧ ଜନବିରୋଧୀ। ଲୋକେ ଆସିବେନି, ପ୍ରଶାସନ ଲୋକଙ୍କ ପାଖକୁ ଯିବ। ୨ବର୍ଷର କୋଭିଡ୍ କଟକଣା ଯୋଗୁଁ ବ୍ୟାଘାତ ହୋଇଥିଲା ଲୋକଙ୍କ ଅଭିଯୋଗ ଶୁଣାଣି। ଲୋକଙ୍କ ଦୁଆରେ ମୁଖ୍ୟମନ୍ତ୍ରୀ ଅଭିଯୋଗ ପ୍ରକୋଷ୍ଠ ପହଞ୍ଚାଇବା ପାଇଁ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ସିଏମଓ ଲୋକଙ୍କ ପାଖକୁ ଯାଇଥିଲା।
ଅଭିଯୋଗ ଶୁଣିଲା ଓ ସମସ୍ୟାର ସାମାଧାନ ବି କଲା। ବିଧାନସଭାରେ ବିବୃତି ରଖି ବିରୋଧୀଙ୍କ ହୀନ ରାଜନୀତି ଓ ମିଛ ପ୍ରଚାରର କଡ଼ା ଜବାବ ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ବିଧାନସଭାରେ ସିଏମଓଙ୍କ ଜିଲ୍ଲାଗସ୍ତ, ମନ୍ତ୍ରୀ ବଡ଼ ନା ସଚିବ ବଡ଼, ଚପର ଖର୍ଚ୍ଚ ନେଇ ବିବୃତିରେ ସ୍ପଷ୍ଟବାର୍ତ୍ତା ଦେଇଛନ୍ତି ନବୀନ। ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ହିଁ CMOର ଅଧିକାରୀମାନେ ରାଜ୍ୟର ସମସ୍ତ ଜିଲ୍ଲା ଗସ୍ତ କରିଥିଲେ। ଗତ ୬ମାସ ମଧ୍ୟରେ ୧୯୦ରୁ ଅଧିକ ସ୍ଥାନରେ CMO ପହଞ୍ଚିଥିଲା। ପ୍ରତିଦିନ ତିନିରୁ ପାଞ୍ଚଟି ସ୍ଥାନରେ ଅଭିଯୋଗ ଶୁଣାଣି ହେଉଥିଲା। ଏହି ପ୍ରକ୍ରିୟାରେ ଲୋକଙ୍କ ଠାରୁ ୫୭ହଜାର ୪୪୨ଟି ଆବେଦନ ସଂଗ୍ରହ କରାଯାଇଥିଲା। ଏହା ମଧ୍ୟରୁ ଏବେ ସୁଦ୍ଧା ୪୩ହଜାର ୫୩୬ଟି ଆବେଦନର ସମାଧାନ ହୋଇସାରିଛି। ସାରା ଦେଶରେ ଲୋକଙ୍କ ଅଭିଯୋଗ ସମାଧାନର ଏହା ସବୁଠାରୁ ପ୍ରଭାବଶାଳୀ ବ୍ୟବସ୍ଥା ବୋଲି ମୁଖ୍ୟମନ୍ତ୍ରୀ କହିଛନ୍ତି। ବିରୋଧୀଙ୍କ ଜନବିରୋଧୀ ନୀତିକୁ କଡ଼ା ସମାଲୋଚନା କରିଛି ବିଜେଡି।
ମୁଖ୍ୟମନ୍ତ୍ରୀ ଅଭିଯୋଗ ସେଲ୍ ସବୁବେଳେ CMO ଦ୍ୱାରା ପରିଚାଳିତ ହୁଏ। ମନ୍ତ୍ରୀମାନେ ଏଥିରେ ସାମିଲ ହେବା ଆବଶ୍ୟକ ପଡିନାହିଁ। ଆବେଦନପତ୍ର ଗ୍ରହଣ ହେବା ପରେ ସେଗୁଡିକୁ ସଂପୃକ୍ତ ବିଭାଗକୁ ପଠାଯାଏ। ଏଥିରେ ମାନ୍ୟବର ମନ୍ତ୍ରୀ ବନାମ ଅଧିକାରୀଙ୍କ ପ୍ରସଙ୍ଗ କେଉଁଠି ବୋଲି ନବୀନ କହିଛନ୍ତି। ଆବେଦନର ସମାଧାନରେ ମନ୍ତ୍ରୀମାନେ ବିଭାଗର ମୁଖ୍ୟ ଭାବେ ପ୍ରମୁଖ ଭୂମିକା ନିଅନ୍ତି। ୫୭ହଜାର ଅଭିଯୋଗକାରୀ ଯଦି ମୁଖ୍ୟମନ୍ତ୍ରୀ ଅଭିଯୋଗ ପ୍ରକୋଷ୍ଠକୁ ଆସିଥାନ୍ତେ ସେମାନଙ୍କୁ ଖର୍ଚ୍ଚାନ୍ତ ହେବାକୁ ପଡିଥାନ୍ତା। ଦୈନିକ ମଜୁରୀ ବି ହାତଛଡା ହୋଇଥାନ୍ତା।
ଲୋକଙ୍କ ପାଖରେ ପହଞ୍ଚି ସେବା ଦେବାରେ CMO ର ତ୍ରୁଟି କେଉଁଠି? ହେଲିକପ୍ଟର ବ୍ୟବହାର ହୋଇ ନଥିଲେ ସାରା ରାଜ୍ୟ ବୁଲି ଅଭିଯୋଗ ଶୁଣାଣି କରିବାକୁ ଦେଢ ବର୍ଷ ଲାଗିଥାନ୍ତା। ଗତ ସାଢେ ତିନି ବର୍ଷରେ ହେଲିକପ୍ଟର ବାବଦକୁ ସରକାର ୪୦ କୋଟି ଖର୍ଚ୍ଚ କରିଛନ୍ତି। ମାସିକ କୋଟିଏରୁ ଦେଢ କୋଟି ଟଙ୍କା ଏ ବାବଦରେ ଖର୍ଚ୍ଚ ହେଉଥିଲା ବେଳେ CMOର ଅଭିଯୋଗ ଶୁଣାଣି ପାଇଁ ସମାନ ହାରରେ ହେଲିକପ୍ଟର ଖର୍ଚ୍ଚ ହୋଇଛି ବୋଲି ନବୀନ କହିଛନ୍ତି। ହେଲିକପ୍ଟର ବ୍ୟବହାର ମାତ୍ରାଧିକ ଖର୍ଚ୍ଚ ଅଭିଯୋଗ ସଂପୂର୍ଣ୍ଣ ମିଛ ବୋଲି ନବୀନ କହିଛନ୍ତି। ମୁଖ୍ୟମନ୍ତ୍ରୀଙ୍କ ବିବୃତି ସିଏମଓ ଜିଲ୍ଲା ଗସ୍ତର ସ୍ପଷ୍ଟତା ରାଜ୍ୟବାସୀଙ୍କ ପାଖରେ ପହଞ୍ଚିଛି ଓ ବିରୋଧୀଙ୍କ ଅଭିଯୋଗର ଜବାବ ମିଳିଛି ବୋଲି ରାଜନୈତିକ ସମୀକ୍ଷକ କହିଛନ୍ତି।
ରାଜନୈତିକ କାରଣରୁ ଅସନ୍ତୁଷ୍ଟ ନହୁଅନ୍ତୁ ବିରୋଧୀ। ମୋ ସରକାର ପାଇଁ ଲୋକେ ପ୍ରଥମ, ଲୋକଙ୍କ ସମସ୍ୟାର ସମାଧାନ ପ୍ରାଥମିକତା। ଏହାକୁ ସଂପାଦନ କରିବା ଜାରି ରଖିବେ ବୋଲି ଗୃହରେ କହିଛନ୍ତି ମୁଖ୍ୟମନ୍ତ୍ରୀ। ଲୋକଙ୍କ ସମସ୍ୟା ସମାଧାନକୁ କିଏ କିପରି ବିରୋଧ କରିପାରିବ। ଏଭଳି ବିରୋଧ ଜନ ବିରୋଧୀ। ବିରୋଧୀଙ୍କ ଏପରି ମନୋବୃତ୍ତିକୁ ଜନତା ଉଚିତ ଜବାବ ଦେବେ ବୋଲି ମୁଖ୍ୟମନ୍ତ୍ରୀ କହିଛନ୍ତି।
ବିଧାନସଭାରେ ଓଡ଼ିଶା ଆପାର୍ଟମେଣ୍ଟ ମାଲିକାନା ଓ ପରିଚାଳନା ବିଲ୍ ଆଗତ
ଭୁବନେଶ୍ବର: ରାଜ୍ୟରେ ସହଜ, ସରଳ ଓ ସ୍ବଚ୍ଛ ହେବ ଆପାର୍ଟମେଣ୍ଟ କିଣାବିକା କାରବାର । ଆପାର୍ଟମେଣ୍ଟ କ୍ରେତାମାନଙ୍କର ଏଣିକି ସାଧାରଣ କ୍ଷେତ୍ର ବା କମନ ଏରିଆରେ ସମାନ ଅଧିକାର ରହିବ । ଏନେଇ ବାଟ ଫିଟିଛି । ବିଧାନସଭାରେ ଓଡ଼ିଶା ଆପାର୍ଟମେଣ୍ଟ ମାଲିକାନା ଓ ପରିଚାଳନା ବିଲ ଆଗତ ହୋଇଛି । କିଛି ଦିନ ତଳେ ଅଧ୍ୟାଦେଶ ଆକାରରେ ଆଣିଥିବା ଓଡିଶା ଆପାର୍ଟମେଣ୍ଟ ମାଲିକାନା ଅଧିନିୟମ-1982 ଏବଂ ଓଡିଶା ଆପାର୍ଟମେଣ୍ଟ ମାଲିକାନା ନିୟମ-1992କୁ କାର୍ଯ୍ୟକାରୀ ହେବା ପରେ ଏହାକୁ ଆଇନରେ ପରିଣତ କରିବାକୁ ବିଲ୍ ଉପସ୍ଥାପିତ ହୋଇଛି ।
ଏହା ଫଳରେ ଆପାର୍ଟମେଣ୍ଟର ସ୍ଵତନ୍ତ୍ର ମାଲିକାନା ଏବଂ ଅଧିକାର କ୍ରେତାମାନେ ପାଇବେ। ଆପାର୍ଟମେଣ୍ଟ ମାଲିକ ତାଙ୍କ ଆପାର୍ଟମେଣ୍ଟ ଏବଂ ସାଧାରଣ କ୍ଷେତ୍ର ତଥା ଅବିଭକ୍ତ ଆଗ୍ରହକୁ ବିକ୍ରୟ, ବନ୍ଧକ, ଲିଜ୍, ଉପହାର, ବିନିମୟ କିମ୍ବା ଅନ୍ୟ କୌଣସି ଉପାୟରେ ଏହି ଆପାର୍ଟମେଣ୍ଟରେ ଥିବା ସୁବିଧାଗୁଡ଼ିକୁ ସ୍ଥାନାନ୍ତର କରିବାକୁ ବାଟ ଫିଟିବ । ପୂର୍ବରୁ ଥିବା ନିୟମାବଳୀରେ ଅସଙ୍ଗତି କାରଣରୁ ହାଇକୋର୍ଟରେ ଏକାଧିକ ମାମଲା ଦାୟର ହୋଇଥିଲା। ଏଥିଯୋଗୁଁ ଆପାର୍ଟମେଣ୍ଟଗୁଡିକର ପଞ୍ଜୀକରଣ ବନ୍ଦ ହୋଇଯାଇଛି । ଯେଉଁଥିପାଇଁ ଆପାର୍ଟମେଣ୍ଟ କ୍ରେତାମାନେ ଅନେକ ଅସୁବିଧାର ସମ୍ମୁଖୀନ ହେଉଛନ୍ତି ଏବଂ ସରକାରଙ୍କ ରାଜସ୍ବ ମଧ୍ୟ ହ୍ରାସ ପାଇଛି । ଏବେ ବିଧାନସଭାରେ ବିଧେୟକ ଆସିବା ଦ୍ବାରା ଏହା ଗୃହୀତ ହେଲେ ଆପାର୍ଟମେଣ୍ଟ କିଣାବକା କାରବାର ଆଇନ ସହଜ ଓ ସ୍ବଚ୍ଛ ହେବ ।
ଆଉ ମାତ୍ର ୫ ଦିନ, ରଦ୍ଦି ହୋଇଯିବ କି ୨୦୦୦ ଟଙ୍କିଆ ନୋଟ୍?
ନନ୍ଦିଘୋଷ ବ୍ୟୁରୋ: ଆସନ୍ତା ୩୦ ତାରିଖ ପରେ ଆଉ ଚାଲିବନି ୨ ହଜାର ଟଙ୍କିଆ ନୋଟ । ଦେଶର ସବୁଠାରୁ ବଡ ନୋଟ ୨ ହଜାର ଟଙ୍କିଆର ଆୟୁଷ ଆଉ ମାତ୍ର ୫ ଦିନ । ରିଜର୍ଭ ବ୍ୟାଙ୍କ ଅଫ ଇଣ୍ଡିଆର କ୍ଲିନ ନୋଟ ପଲିସି ଅନୁସାରେ ୩୦ ତାରିଖ ପରେ ନିଜର ଆଇନଗତ ବୈଧତା ହରାଇବ । ବଜାରରୁ ୨ ହଜାର ଟଙ୍କିଆ ନୋଟ ହଟାଇବା ଲାଗି ସରକାର ନିଷ୍ପତ୍ତି ନେବା ପରେ ଗତ ମେ ୨୩ ତାରିଖରୁ ୨ ହଜାର ଟଙ୍କିଆର ବଦଳି ବା ଜମା ପ୍ରକ୍ରିୟା ଆରମ୍ଭ ହୋଇଥିଲା । ରିଜର୍ଭ ବ୍ୟାଙ୍କ ପକ୍ଷରୁ ଗତ ମେ ୨୩ ତାରିଖରେ ଏହି ନିଷ୍ପତ୍ତି ଘୋଷଣା କରିବା ପରେ ବଦଳି ବା ଜମା ପ୍ରକ୍ରିୟା ବର୍ତ୍ତମାନ ସୁଦ୍ଧା ଜାରି ରହିଥିଲା ।
ବେସିକ ସେଭିଂସ ବ୍ୟାଙ୍କ ଡିପୋଜିଟ ବା ବିଏସବିଡି ଅନୁସାରେ କିମ୍ବା ଜନ ଧନ ଆକାଉଣ୍ଟ ଜରିଆରେ ନିୟମିତ ଜମା ଜାରି ରହିଛି । ଆୟକର ନିୟମାବଳୀ ୧୧୪-ବି ଅନୁସାରେ ଏକ ବ୍ୟାଙ୍କ ବା ଡାକଘରେ ଗୋଟିଏ ଦିନରେ ୫୦ ହଜାର ଟଙ୍କା ଜମା କରାଗଲେ ପାନ୍ ଆବଶ୍ୟକ ହୋଇଥାଏ । ଆସନ୍ତା ୩୦ ତାରିଖ ଯାଏ ଆରବିଆଇର ୧୯ଟି ଆଞ୍ଚଳିକ କାର୍ଯ୍ୟାଳୟ ତଥା ନିକଟସ୍ଥ ବ୍ୟାଙ୍କ ଶାଖାରେ ୨ ହଜାର ଟଙ୍କିଆ ବଦଳାଇପାରିବେ । ବିଭିନ୍ନ ଛୁଟିକୁ ବିଚାର କରାଗଲେ ଏହି ଜମା ପ୍ରକ୍ରିୟା ସେପ୍ଟେମ୍ବର ୨୫, ୨୬, ୨୭, ୨୯ ଓ ୩୦ରେ ହିଁ ଚାଲିପାରିବ ।
ଚାଷୀଙ୍କ ଖୁସିରେ ଖୁସି, ଦୁଃଖରେ ଭାଗିଦାର ନବୀନ ସରକାର
ଭୁବନେଶ୍ବର: ଖରିଫ୍ ଋଣ ପ୍ରଦାନରେ ରେକର୍ଡ । ଚଳିତବର୍ଷ ଖରିଫ ଋତୁରେ ଶତପ୍ରତିଶତ ଫସଲ ଋଣ ଆବଣ୍ଟନ କରି ରାଜ୍ୟ ସରକାର ରେକର୍ଡ କରିଛନ୍ତି । ବିନା ସୁଧରେ ୧ ଲକ୍ଷ ଟଙ୍କା ପର୍ଯ୍ୟନ୍ତ ଚାଷୀଙ୍କୁ ମିଳୁଛି ଋଣ । ଫସଲ ଋଣ ଆବଣ୍ଟନ ନେଇ ସରକାର ଧାର୍ଯ୍ୟ କରିଥିଲେ ୯ ହଜାର ୫୦୦ କୋଟି । ଚଳିତମାସ ୨୨ ତାରିଖ ସୁଦ୍ଧା ଆବଣ୍ଟିତ ହୋଇଛି ୯ ହଜାର ୩୬୫ କୋଟି ୭୨ ଲକ୍ଷ ଟଙ୍କା । ସେଥିରୁ ୩୧ ପ୍ରତିଶତ ଋଣ ମହିଳା ସ୍ବୟଂ ସହାୟକ ଗୋଷ୍ଠୀଙ୍କୁ ଆବଣ୍ଟିତ ହୋଇଛି । ଠିକ୍ ସମୟରେ ଫସଲ ଋଣ ପ୍ରଦାନ ହୋଇଥିବାରୁ ଚାଷୀ ବି ଖୁସ୍ ।
ଚାଷୀଙ୍କ ଖୁସିରେ ଖୁସି, ଦୁଃଖରେ ଭାଗିଦାର ନବୀନ ସରକାର । ବାତ୍ୟା ହେଉ କି ବନ୍ୟା । ଅର୍ଥ ଅଭାବରୁ ଚାଷୀ ଯେପରି ତାର ଫସଲ କରିବାରେ କୌଣସି ଅସୁବିଧା ଭୋଗିବନି । ସେଥିପାଇଁ ଅନ୍ନଦାତାଙ୍କ ହାତମୁଠାକୁ କରିଛନ୍ତି ଟାଣ । ବିନାସୁଧରେ ଚାଷୀଙ୍କୁ ମିଳିଛି ୧ ଲକ୍ଷ ଟଙ୍କା ପର୍ଯ୍ୟନ୍ତ ଫସଲ ଋଣ । ଚଳିତ ଖରିଫ୍ ସିଜିନ ସରିବା ପୂର୍ବରୁ ଠିକ୍ ସମୟରେ ଚାଷୀଙ୍କୁ ଫସଲ ଋଣ ପ୍ରଦାନ କରି ରେକର୍ଡ କରିଛନ୍ତି ରାଜ୍ୟ ସରକାର । ୨୦୨୩-୨୪ ବର୍ଷରେ ଚାଷୀଙ୍କୁ ଖରିଫ ଫସଲ ଋଣ ବାବଦରେ ୯ ହଜାର ୫୦୦ କୋଟି ଆବଣ୍ଟନ ନେଇ ଧାର୍ଯ୍ୟ କରାଯାଇଥିଲା ।
ଚଳିତମାସ ୨୨ ତାରିଖ ସୁଦ୍ଧା ଚାଷୀଙ୍କୁ ଆବଣ୍ଟିତ ହୋଇଛି ୯ ହଜାର ୩୬୫ କୋଟି ୭୨ ଲକ୍ଷ ୨୨ ହଜାର ଟଙ୍କା । ଯାହାକି ଗତବର୍ଷ ତୁଳନାରେ ଅଧିକ । ୩୦ ତାରିଖ ସୁଦ୍ଧା ଶତ ପ୍ରତିଶତ ଋଣ ଆବଣ୍ଟିତ ହୋଇଯିବ । ସମୟ ପୂର୍ବରୁ ଶତପ୍ରତିଶତ ଋଣ ପ୍ରଦାନ କରି ସରକାର ରେକର୍ଡ କରିଛନ୍ତି । ଗୁରୁତ୍ବପୂର୍ଣ୍ଣ କଥା ହେଉଛି, ଋଣ ସହାୟତା ପ୍ରଦାନରେ ଅଧିକ ମହିଳା ଚାଷୀ ଓ ସ୍ବୟଂ ସହାୟକ ଗୋଷ୍ଠୀ ବେଶୀ ଆଗ୍ରହ ଦେଖାଇଛନ୍ତି । ଗତ ଏପ୍ରିଲ ପହିଲାରୁ ଏବେସୁଦ୍ଧା ୨୧୯ କୋଟି ୫୧ ଲକ୍ଷ ୫୩ ହଜାର ଟଙ୍କା ମହିଳା ସ୍ବୟଂ ସହାୟକ ଗୋଷ୍ଠୀଙ୍କୁ ଫସଲ ଋଣ ଆବଣ୍ଟନ କରାଯାଇଛି ।
ଚାଷ ସମୟରେ ଫସଲ ଋଣ ପାଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଧନ୍ୟବାଦ ଦେଇଛନ୍ତି ଚାଷୀ । ପୂର୍ବରୁ ୫୦ ହଜାର ଟଙ୍କାର ଫସଲ ଋଣ ବିନା ସୁଧରେ ମିଳୁଥିଲା । ଏବେ ବିନା ସୁଧ ଋଣ ପରିମାଣକୁ ୧ ଲକ୍ଷ କରିବାରୁ ଚାଷୀଙ୍କୁ ଫସଲ ପାଇଁ ଆବଶ୍ୟକ ଖର୍ଚ୍ଚ ତୁଲାଇବା ସହଜ ହୋଇଛି । ଆଉ ହାତଉଦ୍ଧାରି କିମ୍ବା ସାହୁକାର ପାଖକୁ ଯିବାକୁ ପଡ଼ୁନାହିଁ । ବିନା ସୁଧରେ ଋଣ ପାଇବା ସହିତ ପ୍ରଧାନମନ୍ତ୍ରୀ ଫସଲ ବୀମା ପାଇଁ ବି ସରକାର ପ୍ରିମିୟମ୍ ଭରିଛନ୍ତି । ଯାହାକୁ ନେଇ ଚାଷୀ ମହଲ ଖୁସି ।
ସରୁନି ଜେଡ୍ ଇଷ୍ଟେଟର ଦାଦାଗିରି କାହାଣୀ
ଭୁବନେଶ୍ବର: କହୁଥିଲେ ସରିବନି ଜେଡ୍ ଇଷ୍ଟେଟର ଦାଦାଗିରି କାହାଣୀ। ଜେଡ୍ ଇଷ୍ଟେଟ ଦ୍ବାରା ନିର୍ମିତ ଜେଡ୍ ଓ୍ବାନ ହାଉସିଂ ପ୍ରକଳ୍ପରେ ବେଆଇନ କାରବାରର ଲମ୍ବା ତାଲିକା। ରିଏଲ ଇଷ୍ଟେଟ ଆଇନର ସବୁ ନିୟମକୁ ଉଲ୍ଲଂଘନ କରିଛି ଜେଡ୍ ଇଷ୍ଟେଟ। ନ୍ୟାୟ ପାଇଁ ଏନଜିଟିରୁ ହାଇକୋର୍ଟ ଦୌଡ଼ିଛନ୍ତି ଜେଡ୍ ଓ୍ବାନ ରେସିଡେଣ୍ଟ ଓ୍ବେଲଫେୟାର ଆସୋସିଏସନ। ହେଲେ ଏଯାଏଁ କୌଣସି କାର୍ଯ୍ୟାନୁଷ୍ଠାନ ନିଆଯାଇନାହିଁ। ପଲିଟିକାଲ ଓ ମିଡିଆ ପାଓ୍ବାର ଦେଖାଇ ଘର ମାଲିକଙ୍କୁ ଜେଡ୍ ଇଷ୍ଟେଟ୍ ଧମକାଉଥିବା ଅଭିଯୋଗ ହୋଇଛି। ଘରମାଲିକଙ୍କ ଅଭିଯୋଗର ସତ୍ୟାସତ୍ୟ ନେଇ ବିଭିନ୍ନ ଏଜେନ୍ସି ସ୍ଥିତି ଅନୁଧ୍ୟାନ କରିଛନ୍ତି, ଏବେ କାର୍ଯ୍ୟାନୁଷ୍ଠାନକୁ ଅପେକ୍ଷା।
ଜେଡ୍ ଇଷ୍ଟେଟ୍ ମନମାନି। ସରିଛି ସ୍ଥିତି ଅନୁଧ୍ୟାନ, ଖୁବ୍ ଶୀଘ୍ର ଆକ୍ସନ୍। ଜେଡ୍ ଓ୍ବାନ ହାଉସିଂ ପ୍ରକଳ୍ପରେ ଡେଭଲପର ଜେଡ୍ ଇଷ୍ଟେଟ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଆରମ୍ଭ ହୋଇଛି ପ୍ରକ୍ରିୟା। ବିକ୍ରି ଏଗ୍ରିମେଣ୍ଟରେ ବେଆଇନ ଭାବେ `ପ୍ରମୋଟର ଏରିଆ’ କହି କମନ ଏରିଆକୁ ନିଜ କବଜାରେ ରଖିଛି ଜେଟ୍ ଇଷ୍ଟେଟ୍। ହାଇକୋର୍ଟ ଓ ବିଡିଏ ଏଭଳି ଭୁଲ୍ ଏଗ୍ରିମେଣ୍ଟକୁ ନାକଚ କରିଥିବା ବେଳେ ଜେଡ୍ ଇଷ୍ଟେଟର ମୋହ ତୁଟିନାହିଁ। ନିଜ ସମ୍ପର୍କୀୟଙ୍କ ନାମରେ କମ୍ପାନୀ ଗଢି କ୍ଲବ ହାଉସ, ସ୍ବିମିଂ ପୁଲ୍, ଗାର୍ଡେନ ଏରିଆ, ରାସ୍ତାକୁ ନିଜ ଅକ୍ତିଆରରେ ରଖିବା ସହ ଏହାର ବ୍ୟବହାର ପାଇଁ ଘର ମାଲିକମାନଙ୍କ ଠାରୁ ଜୋର ଜବରଦସ୍ତ ଅର୍ଥ ଆଦାୟ କରୁଛି। ଏହାକୁ ଜୋରଦାର ବିରୋଧ କରିଛନ୍ତି ଘର ମାଲିକ। ନିଜ ହକ୍ ପାଇଁ ୪୪୦ପରିବାର ଏକାଠି ହୋଇ ଲଢୁଛନ୍ତି । ନ୍ୟାୟାଳୟ ଉପରେ ଭରସା ରଖିଛନ୍ତି। ଜେଡ୍ ଇଷ୍ଟେଟର ଅରାଜକତାର ଶୀଘ୍ର ଅନ୍ତ ହେବ ବୋଲି ଆଶା ରଖିଛନ୍ତି।
ତ୍ରୁଟିପୂର୍ଣ୍ଣ ଏଗ୍ରିମେଣ୍ଟ ଉପରେ ରୋକ୍ ଲାଗିଥିବା ବେଳେ ପରିବେଶ ଗାଇଡଲାଇନ ଉଲ୍ଲଂଘନ ମାମଲାରେ ଏନଜିଟିର ନିର୍ଦ୍ଦେଶ ବଳରେ ବିଭିନ୍ନ ଏଜେନ୍ସି ବାସ୍ତବ ସ୍ଥିତି ଅନୁଧ୍ୟାନ କରିଛନ୍ତି। ସୌରଶକ୍ତି ପ୍ଲାଣ୍ଟରୁ ଉତ୍ପାଦନ, ପ୍ରକଳ୍ପର ୨୦ପ୍ରତିଶତ ଗ୍ରୀନ ବେଲ୍ଟ, ସ୍ବିରେଜ ଟ୍ରିଟମେଣ୍ଟ ପ୍ଲାଣ୍ଟର ସଠିକ୍ ପରିଚାଳନା, ଡିଜି ସେଟର ସ୍ଥିତି ସଂପର୍କରେ ରାଜ୍ୟ ପରିବେଶ ପ୍ରଭାବ ଆକଳନ କର୍ତ୍ତୃପକ୍ଷ ସ୍ଥିତି ଅନୁଧ୍ୟାନ କରିଥିବା ବେଳେ ରିପୋର୍ଟକୁ ଅପେକ୍ଷା ରହିଛି । ଭୂତଳ ଜଳ ରିଚାର୍ଜ ଏବଂ ବୋରଓ୍ବେଲ ଜରିଆରେ ଭୂତଳ ଜଳ ବ୍ୟବହାରର ବାସ୍ତବ ସ୍ଥିତି ଅନୁଧ୍ୟାନ କରିଛି କେନ୍ଦ୍ରୀୟ ଭୂତଳ ଜଳ ବୋର୍ଡ। ସ୍ଥିତି ଅନୁଧ୍ୟାନ ବେଳେ ଜେଡ୍ ଇଷ୍ଟେଟ ସବୁ ଆଇନଗତ ବ୍ୟବସ୍ଥାର ଉଲ୍ଲଂଘନ କରିଥିବା ତଦନ୍ତକାରୀ ଏଜେନ୍ସି ସୁତ୍ରରୁ ଜଣାପଡ଼ିଛି। ରିପୋର୍ଟ ଆସିଲେ ଆରମ୍ଭ ହେବ କାର୍ଯ୍ୟାନୁଷ୍ଠାନ।
ବିଦେଶରେ ଶୁଭିଲା ’ଫୁଲ ବଉଳବେଣୀ’
ନନ୍ଦିଘୋଷ ବ୍ୟୁରୋ: ଅଷ୍ଟ୍ରେଲିଆରେ ରହୁଥିବା ଓଡ଼ିଶାର କଳାକାରମାନେ ନିଜ ରାଜ୍ୟର ସଂସ୍କୃତି, ପରମ୍ପରା ଓଡିଆ ଗୀତ ଓ ନୃତ୍ୟକୁ ଭୁଲି ନାହାନ୍ତି । ସେଠାକାର ଓଡିଆ କମ୍ୟୁନିଟିର ଶହେରୁ ଅଧିକ ଓଡିଆ କଳାକାର ଫୁଲ ଵଉଳବେଣୀ କାର୍ଯ୍ୟକ୍ରମରେ ଵିଭିନ୍ନ ଓଡ଼ିଆ ଓ ସମ୍ବଲପୁରୀ ଗୀତରେ ନୃତ୍ୟ ପରିବେଶଣ କରିଥିଲେ । ଏହି କାର୍ଯ୍ୟକ୍ରମରେ ଓଡିଆ କଳାକାରଙ୍କ ସହ ଅଷ୍ଟ୍ରେଲିଆରେ ରହୁଥିବା ୪ ଶହରୁ ଅଧିକ ଓଡିଆ କାର୍ଯ୍ୟକ୍ରମର ଉପଭୋଗ କରିଥିଲେ ।
ବିଦେଶରେ ଓଡ଼ିଆ ମାଟିର ବାସ୍ନା । ସଂସ୍କୃତି, ପରମ୍ପରା ଓ ନୃତ୍ୟକୁ ନେଇ ପ୍ରବାସୀ ଗର୍ବିତ । ଅଷ୍ଟ୍ରେଲିଆରେ ବି ଜମିଲା ଫୁଲ ବଉଳବେଣୀ ନୃତ୍ୟ । ବିଦେଶରେ ରହୁଥିଲେ ବି ଓଡ଼ିଶାର ପାଣିପବନ ଓ ସଂସ୍କୃତିକୁ ଭୁଲି ନାହାନ୍ତି ପ୍ରବାସୀ ଓଡ଼ିଆ । ଅଷ୍ଟ୍ରେଲିଆରେ ରହୁଥିବା ଓଡ଼ିଶାର କଳାକାରମାନେ ସିଡନୀରେ ଫୁଲ ଵଉଳବେଣୀ କାର୍ଯ୍ୟକ୍ରମ ଆୟୋଜକ କରି ଏହାକୁ ପ୍ରମାଣିତ କରିଛନ୍ତି । ଓଡ଼ିଶାର ଆରାଧ୍ୟ ଦେବତା ପ୍ରଭୁ ଶ୍ରୀଜଗନ୍ନାଥଙ୍କ ଉପରେ ନୃତ୍ୟ ଆମ ଜଗନ୍ନାଥ ପରିବେଶଣ ସହ ନୃତ୍ୟୁରେ ଦୁଲୁକିଥିଲା ସିଡନୀ । ମିଷ୍ଟର ଗ୍ଲାମ କଲଚରାଲ ଗ୍ଲୋବାଲ ପ୍ରତିଯୋଗିତାରେ ଵିଜେତା ହୋଇଥିବା ଅରୁଣ ଇନ୍ଦ୍ର ନାୟକଙ୍କ କୋରିଓଗ୍ରାଫରେ ଓଡ଼ିଆ କଳାକାରମାନେ ସମ୍ବଲପୁରୀ ଓ ଓଡିଆ ଗୀତରେ ନୃତ୍ୟ ପରିବେଷଣ କରିଥିଲେ ।
ଅଷ୍ଟ୍ରେଲିଆରେ ରହୁଥିବା ଓଡିଆ କମ୍ୟୁନିଟିର ଶତାଧିକ କଳାକାର ଫୁଲ ଵଉଳବେଣୀ କାର୍ଯ୍ୟକ୍ରମରେ ନୃତ୍ୟ ପରିବେଷଣ କରିଥିଲେ । ଏହି କାର୍ଯ୍ୟକ୍ରମରେ ଆମ ଜଗନ୍ନାଥ, ତୋ ଗାଲର କଳାଜାଇ, ଅଳତାମାଖି, ମନରମଇନା, ହରିଣ ନଦିଏ ଧରା ସହିତ ଵିଭିନ୍ନ ସମ୍ବଲପୁରୀ ଓ ଓଡ଼ିଆ ଗୀତରେ ନୃତ୍ୟ ପରିବେଷଣ କରିଥିଲେ । କାର୍ଯ୍ୟକ୍ରମରେ ଓଡ଼ିଶାର ସଂସ୍କୃତି ପରମ୍ପରା ଉପରେ ମଧ୍ୟ କଳାକାରମାନେ ଡ୍ରାମା ଓ ନୃତ୍ୟ ପରିବେଷଣ କରିଥିଲେ ।
ସାରା ଦେଶ ପାଇଁ ଓଡିଶା ସାଜିଛି ରୋଲ ମଡେଲ
ଭୁବନେଶ୍ବର: ରାଜନୀତି ସର୍ବଦା ପଙ୍କିଳ, କଳୁଷିତ, ଆବର୍ଜନାପୂର୍ଣ୍ଣ ହୋଇ ନଥାଏ । ଲୋକଙ୍କ ସେବା କରିବା ଲାଗି ଏହା ଏକ ଶ୍ରେଷ୍ଠ ମଞ୍ଚ । ଭୁବନେଶ୍ବରରେ ଆୟୋଜିତ ଦି ନ୍ୟୁ ଇଣ୍ଡିଆନ ଏକ୍ସପ୍ରେସର ଦୁଇଦିନିଆ ସାରସ୍ବତ ଉତ୍ସବ ‘ଅ’ ର ଉଦଯାପନୀ ଦିବସରେ ଯୋଗଦେଇ ଏହା କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଦୁଇଦିନିଆ କାର୍ଯ୍ୟକ୍ରମରେ ପର୍ଯ୍ୟଟନ, ସାହିତ୍ୟ, ସଂସ୍କୃତି, ଚଳଚ୍ଚିତ୍ର, ଐତିହ୍ୟ, ପରମ୍ପରା, ଭାଷା, କ୍ରାଇମ, ମହିଳା ସଶକ୍ତିକରଣ, ସାମାଜିକ ଗଣମାଧ୍ୟମ, ଓଡିଶା ବିକାଶ ଉପରେ ହୋଇଥିଲା ବିଶଦ ଆଲୋଚନା ।
ବିକାଶ ପଥରେ ଓଡିଶା । ସାରା ଦେଶ ପାଇଁ ସାଜିଛି ରୋଲ ମଡେଲ । ଭାଷା, ସାହିତ୍ୟ, ସଂସ୍କୃତି, ରାଜନୀତି ଓ ଆର୍ଥିକ ବିକାଶ କ୍ଷେତ୍ରରେ ଓଡିଶା, ସାରା ଦେଶରେ ସାଜିଛି ଉଦାହରଣ । ପର୍ଯ୍ୟଟନଠାରୁ ଆରମ୍ଭ କରି ପ୍ରାକୃତିୟ ବିପର୍ଯ୍ୟୟ ପରିଚାଳନା, ମହିଳା ସଶକ୍ତିକରଣ, କୃଷି, ଶିକ୍ଷା, ସ୍ବାସ୍ଥ୍ୟ ଓ ଗମନାଗମନ କ୍ଷେତ୍ରରେ ବିକାଶର ଆଗ ଧାଡ଼ିରେ ପହଞ୍ଚିଛି ଓଡ଼ିଶା । ଭୁବନେଶ୍ବରରେ ଆୟୋଜିତ ଦି ନ୍ୟୁ ଇଣ୍ଡିଆନ ଏକ୍ସପ୍ରେସର ଦୁଇଦିନିଆ ସାରସ୍ବତ ଉତ୍ସବ ‘ଅ’ ର ଉଦଯାପନୀ ଦିବସରେ ଯୋଗଦେଇ ଏହା କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ଏହି ଅବସରରେ ବରିଷ୍ଠ ସାମ୍ବାଦିକ ପ୍ରଭୁ ଚାଓ୍ବଲାଙ୍କ ସହ ଓ୍ବାନ ଟୁ ଓ୍ବାନ ଆଲୋଚନାରେ ବିଭିନ୍ନ ପ୍ରସଙ୍ଗର ରୋକଠୋକ ଉତ୍ତର ରଖିଛନ୍ତି ନବୀନ । ମହିଳା ସଶକ୍ତିକରଣ କ୍ଷେତ୍ରରେ ଆମପାଇଁ ସବୁଠାରୁ ବଡ଼ ଆୟୂଧ ହେଉଛି ମିଶନ ଶକ୍ତି । ଯାହା ରାଜ୍ୟର ୭୦ ଲକ୍ଷରୁ ଉର୍ଦ୍ଧ୍ବ ମହିଳାଙ୍କ ହାତମୁଠାକୁ ଟାଣ କରିଛି ବୋଲି କହିଛନ୍ତି ନବୀନ । ଓଡ଼ିଶା ଆଜି ଦାରିଦ୍ରର ଅନ୍ଧକାରରୁ ମୁକୁଳି ବିକାଶର ସକାଳ ଦେଖୁଛି । ରାଜନୀତି ସର୍ବଦା ପଙ୍କିଳ, କଳୁଷିତ, ଆବର୍ଜନାପୂର୍ଣ୍ଣ ହୋଇ ନଥାଏ । ଲୋକଙ୍କ ସେବା କରିବା ଲାଗି ଏହା ଏକ ଶ୍ରେଷ୍ଠ ମଞ୍ଚ ବୋଲି କହିଛନ୍ତି ମୁଖ୍ୟମନ୍ତ୍ରୀ ।
କାର୍ଯ୍ୟକ୍ରମର ଉଦଯାପନୀ ଦିବସରେ ବିଶିଷ୍ଟ ଲେଖିକା ଗୀତା ମେହେଟ୍ଟାଙ୍କ ଉଦ୍ଦେଶ୍ୟରେ ଶ୍ରଦ୍ଧାଞ୍ଜଳି ପୂର୍ବକ ଏକ ଡକୁମେଣ୍ଟରୀ ପ୍ରଦର୍ଶିତ କରାଯାଇଥିଲା । ଦିବଂଗତ ଗୀତା ମେହେଟ୍ଟାଙ୍କ ଜୀବନୀ ଓ କୃତିତ୍ବ କାହାଣୀକୁ ନେଇ ପ୍ରଦର୍ଶିତ ହୋଇଥିଲା ଡକ୍ୟୁମେଣ୍ଟାରୀ । ନିଜ ବଡ଼ ଭଉଣୀକୁ ମନେ ପକାଇ ଭାବବିହ୍ବଳ ହୋଇଥିଲେ ମୁଖ୍ୟମନ୍ତ୍ରୀ । ଏହି ଅବସରରେ ବିଶିଷ୍ଟ ସାହିତ୍ୟିକ ପେରୁମାଲ ମୁରୁଗାନଙ୍କୁ ରାମନାଥ ଗୋଏଙ୍କା ସାହିତ୍ୟ ସମ୍ମାନ ପ୍ରଦାନ କରାଇଥିବା ବେଳେ ଅନ୍ୟାନ୍ୟ ବର୍ଗରେ ଅନିରୁଦ୍ଧ କାନିସେଟ୍ଟି, ଦେବୀକା ରରଗେଙ୍କୁ ସମ୍ମାନିତ କରାଯାଇଥିଲା ।
କାର୍ଯ୍ୟକ୍ରମରେ ଦି ନ୍ୟୁ ଇଣ୍ଡିଆନ ଏକ୍ସପ୍ରେସର ଅଧ୍ୟକ୍ଷ ମନୋଜ କୁମାର ନିନ୍ଥାଲିଆ, ପ୍ରଧାନମନ୍ତ୍ରୀଙ୍କ ଅର୍ଥନୈତିକ ଉପଦେଷ୍ଟା ପରିଷଦ ଅଧ୍ୟକ୍ଷ ବିବେକ ଦେବରାୟ, କାର୍ଯ୍ୟନିର୍ବାହୀ ଅଧିକାରୀ ଲକ୍ଷ୍ମୀ ମେନନ, ରେସିଡେଣ୍ଟାଲ ଏଡିଟର ଶିବ ପ୍ରସାଦ ମହାନ୍ତି ସାମିଲ ହୋଇଥିଲେ । ଦି ନିଉ ଇଣ୍ଡିଆନ ଏକ୍ସପ୍ରେସର ସମ୍ପାଦକ ଶାନ୍ତ୍ୱନା ଭଟ୍ଟାଚାର୍ଯ୍ୟ ଫେଷ୍ଟିଭାଲ ଉପରେ ଆଲୋକପାତ କରିଥିଲେ ।
ଦୁଇଦିନ ଧରି ଚାଲିଥିବା ଏହି କାର୍ଯ୍ୟକ୍ରମର ଉଦଘାଟନୀ ଉତ୍ସବରେ ପୂର୍ବତନ କେନ୍ଦ୍ରମନ୍ତ୍ରୀ ତଥା ବିଶିଷ୍ଟ ଅନୁବାଦକ ମଣିଶଙ୍କର ଆୟାର, ପ୍ରଖ୍ୟାତ ଫିଲ୍ମ ପ୍ରଯୋଜକ ତଥା ନିର୍ଦ୍ଦେଶକ ନୀଳ ମାଧବ ପଣ୍ଡା, ବରିଷ୍ଠ ସାମ୍ବାଦିକ ସମ୍ପଦ ପଟ୍ଟନାୟକ, ବିଶିଷ୍ଟ ଲେଖକ ସୁରେନ୍ଦ୍ର ମୋହନ ପାଠକ, ଅର୍ଥନୀତି ବିଶେଷଜ୍ଞ ପାରକଳା ପ୍ରଭାକର, ବିଶିଷ୍ଟ ବୈଜ୍ଞାନିକ ଆନନ୍ଦ ରଙ୍ଗନାଥନ ଯୋଗଦେଇଥିଲେ । ପର୍ଯ୍ୟଟନ, ସାହିତ୍ୟ, ସଂସ୍କୁତି, ଚଳଚିତ୍ର, ଐତିହ୍ୟ, ପରମ୍ପରା, ଭାଷା, କ୍ରାଇମ, ମହିଳା ସଶକ୍ତିକରଣ, ସାମାଜିକ ଗଣମାଧ୍ୟମ, ଓଡିଶା ବିକାଶ ଉପରେ ଆଲୋଚନା କରିଥିଲେ ।
ବିଦ୍ୟୁତ ଆଘାତରେ ଆହତ ବ୍ୟକ୍ତିଙ୍କୁ ମୃତ ଭାବି ରାସ୍ତା କଡ଼ରେ ଫିଙ୍ଗିଦେଲେ
ଝାରସୁଗୁଡ଼: ହଜିଗଲା ମାନବିକତା । ମରିଗଲା ମଣିଷ ପଣିଆଁ । ବିଦ୍ୟୁତ ଆଘାତରେ ଆହତ ବ୍ୟକ୍ତିଙ୍କୁ ମୃତ ବୋଲି ରାସ୍ତା କଡରେ ଫିଙ୍ଗିଦେଲେ ସାଙ୍ଗମାନେ । ଝାରସୁଗୁଡା ଜିଲ୍ଲା ରେଙ୍ଗାଲି ଥାନା ଅନ୍ତର୍ଗତ ବାଦିମାଲର ଶଙ୍ଖଲିଆ ରାଇସ ମିଲରେ,ବିଦ୍ୟୁତ ଆଘାତରେ ଜଣେ କର୍ମଚାରୀ ବେହୋସ ହୋଇଯାଇଥିଲେ । ଆହତ କର୍ମଚାରୀ ଜଣକ ହେଲେ ଉତ୍ତରପ୍ରଦେଶ ବରେଲିର ମର୍ଟିନ ଅହମ୍ମଦ । ନେବା ବଦଳରେ ଜଙ୍ଗଲରେ ଫିଙ୍ଗି ଦେବା କହିଲେ ରାଇସ ମିଲ ମାଲିକ । ହୋସ ଆସିବା ପରେ ଚିତ୍କାର କରିବାରୁ ସଂପୃକ୍ତ ଯୁବକଙ୍କୁ ଉଦ୍ଧାର କଲେ ସ୍ଥାନୀୟ ଲୋକେ।
ଝାରସୁଗୁଡା ଜିଲ୍ଲା ମୁଖ୍ୟଚିକିତ୍ସାଳୟରେ ଗୁରୁତର ଅବସ୍ଥାରେ ଚିକିତ୍ସିତ ହେଉଛି ସଂପୃକ୍ତ କର୍ମଚାରୀ । ଘଟଣାଟି ଝାରସୁଗୁଡା ଜିଲ୍ଲା ରେଙ୍ଗାଲି ଥାନା ଅନ୍ତର୍ଗତ ବାଦିମାଲ ସ୍ଥିତ ସଙ୍ଖଲିଆ ରାଇସମିଲରେ । ସ୍ଥାନୀୟ ଲୋକଙ୍କ ଅଭିଯୋଗ ମିଳିବା ପରେ ବ୍ରଜରାଜନଗର SDPO ଜିଲ୍ଲାମୁଖ୍ୟ ଚିକିତ୍ସାଳୟକୁ ଆସି ତଦନ୍ତ ଆରମ୍ଭ କରିଛନ୍ତି l ଯେହେତୁ ମର୍ଟିନ ଏବେ ସୁସ୍ଥ ନାହାନ୍ତି ତେଣୁ ଲିଖିତ ଅଭିଯୋଗ କରି ପାରିନାହାନ୍ତି l ଘଟଣା ସମ୍ପର୍କରେ ମର୍ଟିନଙ୍କୁ ପଚାରି ତଦନ୍ତ ଆରମ୍ଭ କରିଛି ପୋଲିସ ଏବଂ ଲିଖିତ ଅଭିଯୋଗ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି ଝାରସୁଗୁଡା ଅତିରିକ୍ତ ଏସପି l
ଯୋଗାଯୋଗର ମାଧ୍ୟମ ବାଉଁଶ ପୋଲ
ଆନନ୍ଦପୁର: ବାଉଁଶ ପୋଲ ଦେଇ ଚାଲିଛି ଯାତାୟତ । ସ୍କୁଲ କଲେଜ ଛାତ୍ରଛାତ୍ରୀଙ୍କ ଠାରୁ ଆରମ୍ଭ କରି ମୋଟର ସାଇକେଲ ଚାଳକ ଏହି ନାଳ ଉପର ଦେଇ ଯାଉଛନ୍ତି । ଅନ୍ୟଦିନ କଥା ଭିନ୍ନ, ହେଲେ ବର୍ଷାଦିନେ ନାଳ ଉପର ଦେଇ ଯିବା କାଠିକର ପାଠ । ୨ଟି ପଞ୍ଚାୟତର ୨ହଜାରରୁ ଅଧିକ ଲୋକ ନିର୍ଭର କରୁଛନ୍ତି । ସ୍ଥାୟୀ ପୋଲ ହୋନଥିବାରୁ ବାଉଁଶ ପୋଲ ଉପରେ ଯିବା ଆସିବା କରୁଛନ୍ତି ସ୍ଥାନୀୟ ଲୋକ ।
ବାଉଁଶ ପୋଲରେ ବିପଦପୂର୍ଣ୍ଣ ଯାତ୍ରା। ସ୍କୁଲ କଲେଜ ଛାତ୍ରଛାତ୍ରୀଙ୍କ ଠାରୁ ଆରମ୍ଭ କରି ମୋଟର ସାଇକେଲ ଚାଳକ ସମସ୍ତେ ଏହି ରାସ୍ତାଦେଇ ଯିବା ଆସିବା କରୁଛନ୍ତି। ଆନନ୍ଦପୁର ବାଉଁଶଗଡରେ ଥିବା ଘାଗରାନାଳ ବାଉଁଶ ପୋଲ ସାଜିଛି ଲୋକଙ୍କ ମୁଖ୍ୟ ରାସ୍ତା । ନାଳ ଗୋଟିଏ ପାଖରେ ୨ଟି ପଞ୍ଚାୟତର ୨ହଜାରରୁ ଅଧିକ ଲୋକ ବାସ କରୁଛନ୍ତି । ଅନ୍ୟପଟରେ ରହିଛି ସ୍କୁଲ୍, ବଜାର,ମେଡିକାଲ ଭଳି ଆବଶ୍ୟକୀୟ ସଂସ୍ଥା । ନାଳ ଉପର ଦେଇ ଗଲେ,୫ କିଲୋମିଟର କମ୍ ରାସ୍ତା ପଡୁଥିବାରୁ ଲୋକମାନେ ଏହି ପୋଲ ଉପରେ ନିର୍ଭର କରୁଛନ୍ତି । ଟିକେ ଅସାବଧାନତା ସାଜିଲେ ଘଟିପାରେ ନିଶ୍ଚିତ ଦୂର୍ଘଟଣା । ବର୍ଷା ଦିନ ଆସିଲେ ପ୍ରତ୍ୟେକ ବର୍ଷ ଏଭଳି ପରିସ୍ଥିତି ଦେଖିବାକୁ ମିଳେ। ସ୍ଥାୟୀ ପୋଲ ନଥିବାରୁ ଯିବା ଆସିବାରେ ହନ୍ତସନ୍ତ ହେଉଛନ୍ତି ଲୋକେ। ଦୀର୍ଘ ଦିନ ତଳେ ସ୍ଥାୟୀ ପୋଲ ପାଇଁ ସର୍ଭେ ସରିଛି, ଅର୍ଥ ମଧ୍ୟ ବରାଦ ହୋଇଥିଲା, ହେଲେ ନିର୍ମାଣ ହୋଇପାରିନି ପୋଲ ।
ଶାଳବଶି ଓ ବାଉଁଶଗଡ ମଧ୍ୟରେ ରହିଛି ଘାଗରା ନାଳ। ଉଭୟ ପଞ୍ଚାୟତ ମଧ୍ଯରେ ଗମନା ଗମନ ପାଇଁ ପଞ୍ଚାୟତ ସ୍ତରରେ ଘାଗରା ନାଳ ପର୍ଯ୍ଯନ୍ତ ରାସ୍ତା ହୋଇଥିଲେ ମଧ୍ଯ ନାଳ ଉପର ପୋଲ ନଥିବାରୁ ବର୍ଷାଦିନେ ସମସ୍ୟା ଭୋଗୁଛନ୍ତି ଲୋକେ। ଏନେଇ ଆନନ୍ଦପୁର ଉପଜିଲ୍ଲାପାଳଙ୍କୁ ଜଣାଇବା ପରେ, ସେ କହିଛନ୍ତି ଯେ ପଞ୍ଚାୟତର ଅନ୍ୟପଟେ ଭଲ ରାସ୍ତା ରହିଛି । ହେଲେ ଲୋକଙ୍କ ଯିବା ଆସିବାରେ କମ୍ ରାସ୍ତା ପଡୁଥିବାରୁ ଏହି ପୋଲ ଉପରେ ନିର୍ଭର କରୁଛନ୍ତି । ସ୍ଥାୟୀ ପୋଲ ପାଇଁ ସର୍ଭେ ସରିଛି । ଖୁବ୍ ଶୀଘ୍ର ଏକ ଯୋଜନାରେ ଏଠାରେ ସ୍ଥାୟୀ ପୋଲ ନିର୍ମାଣ କରାଯିବ ବୋଲି ଉପଜିଲ୍ଲାପାଳ ପ୍ରତିଶୃତି ଦେଇଛନ୍ତି ।