spot_img
Home Blog Page 2906

ଆଖଣ୍ଡଳମଣୀ ପୀଠ ରୂପାନ୍ତରଣ ପାଇଁ ଚାଲିଥିବା ଭୂମିପୂଜା ଓ ଯଜ୍ଞର ଆଜି ପୂର୍ଣ୍ଣାହୁତି

ଭଦ୍ରକ: ବାବା ଆଖଣ୍ଡଳମଣି ପୀଠର ହେବ ରୂପାନ୍ତରଣ । ନୂଆ ପ୍ରକଳ୍ପ ପାଇଁ ସୋମବାର ଠାରୁ ୩ଦିନ ଯାଏଁ ଅନୁଷ୍ଠିତ ହେଉଛି ଭୂମିପୂଜା ଓ ଯଜ୍ଞ ଉତ୍ସବ । ଆଜି ପୂର୍ଣ୍ଣାହୁତି, ଯୋଗଦେବେ କନିକାର ରାଜା ସାହେବଙ୍କ ସହ ବହୁ ଅତିଥି ।

ମନ୍ଦିର ରୂପାନ୍ତରଣ ପାଇଁ ରାଜ୍ଯ ସରକାର ପ୍ରଥମ ପର୍ଯ୍ୟାୟରେ ୬ କୋଟି ଯୋଗାଇ ଦେଇଥିବା ବେଳେ ପୀଠର ବିଭିନ୍ନ ପ୍ରକଳ୍ପ ଓ ମନ୍ଦିରର ଚତୁଃପାର୍ଶ୍ବର ସମ୍ପ୍ରସାରଣ ନିମନ୍ତେ ୨ୟ ପର୍ଯ୍ଯାୟରେ ଯୋଗାଇ ଦେଇଛନ୍ତି ୪୨ କୋଟି ଟଙ୍କା । କାମ ଆରମ୍ଭରୁ ଭୂମି ପୂଜନ ଓ ଯଜ୍ଞ ଆରମ୍ଭ ହୋଇଛି । ଏଥିପାଇଁ ଉତ୍ସବ ମୁଖର ହୋଇଉଠିଛି ସମଗ୍ର ଆରଡି ପୀଠ । ମନ୍ଦିର ସିଂହଦ୍ବାର ସମ୍ମୁଖରେ ଯଜ୍ଞଶାଳା ନିର୍ମାଣ କରାଯାଇଥିବା ବେଳେ ଶ୍ରୀକ୍ଷେତ୍ର ପୁରୀ, ଲିଙ୍ଗରାଜ, ବଳଦେବଜିଉ, ମାଆ ବିରଜା ଓ ମାଆ ଭଦ୍ରକାଳୀଙ୍କ ପୀଠରୁ ଆସୁଥିବା ବ୍ରାହ୍ମଣଙ୍କ ବେଦପାଠ ଓ ମନ୍ତ୍ରଧ୍ବନୀରେ ପ୍ରକମ୍ପିତ ହେଉଛି ସମଗ୍ର ପୀଠ । ଯଜ୍ଞ ନିମନ୍ତେ ପ୍ରତିଦିନ ଭୋରୁ ମଣିବାବାଙ୍କର ମଙ୍ଗଳ ଆଳତୀ ସମ୍ପନ୍ନ ହେବା ପରେ ଭୂମିପୂଜନ ପାଇଁ ଘଟ ଶୋଭାଯାତ୍ରା, ଘଟ ସ୍ଥାପନ, ରୁଦ୍ରାଭିଷେକ, ଦ୍ବାରପାଳ ପୂଜା, ସୂର୍ଯ୍ଯ ପୂଜା, ଶିଳା ପ୍ରସ୍ତର ସ୍ଥାପନ, ଯଜ୍ଞକୁଣ୍ଡରେ ଅଗ୍ନି ସଂଯୋଗ ଆଦି ରୀତିନୀତି ଅନୁଯାୟୀ ଅନୁଷ୍ଠିତ ହୋଇଛି । ଏହାସହ ପ୍ରତି ସଂଧ୍ଯାରେ ସାଂସ୍କୃତିକ କାର୍ଯ୍ଯକ୍ରମରେ ପାଲା, ଭଜନ ପରିବେଷଣ କରାଯାଉଛି ।

ଯଜ୍ଞ ଆରମ୍ଭରୁ ଭଦ୍ରକ ଉପଜିଲ୍ଲାପାଳ ତଥା ମନ୍ଦିର ଟ୍ରଷ୍ଟି ମନୋଜ ପାତ୍ର, ବିଧାୟକ ବ୍ଯୋମକେଶ ରାୟ ସଂକଳ୍ପ କରିବା ପରେ ସମସ୍ତ ପୂଜାନୀତି ଚାଲିଛି । ଭୂମି ପୂଜନ ଉତ୍ସବକୁ ଦେଖିବା ପାଇଁ ବହୁ ଭକ୍ତଙ୍କ ସମାଗମ ହେଉଛି ପୀଠରେ। ଶିଳାପସ୍ତର ଉନ୍ମଚୋନ ସହ ପୂର୍ଣ୍ଣାହୁତି କରାଯିବ ।

ଜମିଜମା ବିବାଦକୁ କେନ୍ଦ୍ର କରି ଛୁରାମାଡ଼: ପୋଲିସକୁ ବି ଆକ୍ରମଣ, ଦୁଇ ଅଟକ

ଭଦ୍ରକ: ଜମିଜମା ବିବାଦକୁ କେନ୍ଦ୍ର କରି ଭଦ୍ରକରେ ତୁମୁଳକାଣ୍ଡ । ହୋଟେଲ ମାଲିକଙ୍କୁ ମରଣାନ୍ତକ ଆକ୍ରମଣ ଉଦ୍ୟମ ଓ ପରେ ଉଭୟ ଗୋଷ୍ଠୀ ମଧ୍ୟରେ ଛୁରାମାଡ଼, ଦୁଇ ଆହତ । ଘଟଣାକୁ ନେଇ ଭଦ୍ରକ ସହରରେ ଉତ୍ତେଜନାମୂଳକ ପରିସ୍ଥିତି ।

ସୂଚନା ଅନୁସାରେ, ଜମିଜମାକୁ କେନ୍ଦ୍ର କରି ଭଦ୍ରକ ସହରର ଶୁଭ୍ରକାନ୍ତ ପତି ନାମକ ଜଣେ ହୋଟେଲ ବ୍ୟବସାୟୀଙ୍କ ସହିତ ଅନ୍ୟ ଜଣେ ବ୍ୟକ୍ତିଙ୍କର ବିବାଦ ଲାଗି ରହିଥିଲା । ଗତକାଲି ରାତିରେ ଶୁଭ୍ରକାନ୍ତଙ୍କୁ ଆକ୍ରମଣ ପାଇଁ କିଛି ଅସାମାଜିକ ଯୁବକ ମରଣାସ୍ତ୍ର ନେଇ ତାଙ୍କ ହୋଟେଲ ପାଖରେ ପହଞ୍ଚିଥିଲେ । ଏଥିରେ ଭୟଭୀତ ହୋଇ ଶୁଭ୍ରକାନ୍ତ ତାଙ୍କ ସହଯୋଗୀ ସମ୍ପର୍କୀୟଙ୍କୁ ଫୋନ କରି ଡାକିଥିଲେ । ଯାହାକୁ ନେଇ ବିବାଦ ବଢିବା ସହିତ ସଂଘର୍ଷ ଘଟିଥିଲା । ଫଳରେ ଛୁରା ମାଡ଼ରେ ୨ ଜଣ ଆହତ ହୋଇଥିଲେ ।

କଥା ଏତିକିରେ ସରି ନଥିଲା । ଆହତଙ୍କୁ ଭଦ୍ରକ ମେଡିକାଲରେ ଭର୍ତ୍ତି କରାଯାଇଥିଲା । ହେଲେ ସେଠାରେ ଉଭୟ ଗୋଷ୍ଠୀର ଶତାଧିକ ଯୁବକ ପହଞ୍ଚି ଗଣ୍ଡଗୋଳ ଆରମ୍ଭ କରି ଦେଇଥିଲେ । ଏହି ସମୟରେ ନିଶାଶକ୍ତ ଥିବା ଜଣେ ଯୁବକ ଅନ୍ୟ ଜଣେ ଯୁବକଙ୍କୁ ଛୁରା ମାଡ଼ କରିଥିଲେ । ଏହାକୁ ନେଇ ଜିଲ୍ଲା ହସ୍ପିଟାଲରେ ତୀବ୍ର ଉତ୍ତେଜନା ପ୍ରକାଶ ପାଇଥିଲା । ଖବର ପାଇ ଭଦ୍ରକ ସିଟି ଡିଏସପିଙ୍କ ନେତୃତ୍ୱରେ ୩ ଜଣ ଇନ୍ସପେକ୍ଟର ଓ ୫ ପ୍ଲାଟୁନ ପୋଲିସ ଫୋର୍ସ ଗଣ୍ଡଗୋଳକାରୀଙ୍କୁ ଘଉଡାଇ ଥିଲେ । ହେଲେ ଗଣ୍ଡଗୋଳକାରୀ ପୋଲିସକୁ ଆକ୍ରମଣ କରିଥିଲେ । ଶେଷରେ ସ୍ଥିତିକୁ ନିୟନ୍ତ୍ରଣ କରିବା ପାଇଁ ପୋଲସ ଲାଠିଚାର୍ଜ କରିଥିଲା । ଘଟଣାରେ ୨ ଜଣଙ୍କୁ ଥାନାରେ ଅଟକ ରଖିଛି ପୋଲିସ । ପାଟ୍ରୋଲିଂକୁ କଡାକଡି କରାଯିବା ସହ ସହରରେ ବ୍ୟାପକ ଫୋର୍ସ ମୁତୟନ କରାଯାଇଛି ।

ପ୍ରତି ସୋମବାର କଲେଜ ଛାତ୍ରଛାତ୍ରୀଙ୍କୁ ଦିଆଯିବ ହକି ସଫଳତାର ବାର୍ତ୍ତା

ଭୁବନେଶ୍ବର: ହକି ପାଇଁ କେମିତି ବରଦାନ ସାଜିଛି ଓଡ଼ିଶା ? ଭାରତୀୟ ହକିକୁ କେମିତି ନୂଆ ଜୀବନ ଦେଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ? ମାଟି କାମୁଡ଼ି ପଡ଼ିଥିବା ଭାରତୀୟ ହକି କେମିତି ନିଜ ସ୍ବର୍ଣ୍ଣିମ ଯୁଗକୁ ଫେରୁଛି ? ହକିର ଏହି ସଫଳତା ଗାଥା ଶୁଣିବେ କଲେଜ ପିଲା । ଏଣିକି ପ୍ରତି ସୋମବାର କଲେଜରେ ସବୁ ପିଲାଙ୍କୁ ଏକାଠି କରି ଦିଆଯିବ ହକି ସଫଳତାର ବାର୍ତ୍ତା ।

ଏନେଇ ସବୁ ଡିଗ୍ରୀ କଲେଜ ଅଧ୍ୟକ୍ଷଙ୍କୁ ଚିଠି ଲେଖିଲା ଉଚ୍ଚ ଶିକ୍ଷା ବିଭାଗ । ଭାରତୀୟ ଜାତୀୟ ଖେଳ ହକିର ପୁନରୁଦ୍ଧାର, ହକିକୁ ଓଡ଼ିଶାର ପ୍ରୋତ୍ସାହନ ସମ୍ପର୍କରେ ପିଲାଙ୍କୁ ଅବଗତ କରାଯିବ । ଓଡ଼ିଶା ଜାତୀୟ ହକି ଦଳର ପ୍ରାୟୋଜକ ହେବା ପରେ କିଭଳି ଦଳର ପ୍ରଦର୍ଶନରେ ଉନ୍ନତି ଆସିଛି ସେ ନେଇ କଲେଜ ପିଲାଙ୍କୁ କୁହାଯିବ ।

ଦୁଇପୃଷ୍ଠା ସମ୍ବଳିତ ଏକ ସଫଳ ବାର୍ତ୍ତା ପାଠ କରାଯିବ । ଏହାସହ କ୍ୟାମ୍ପସରେ ହକି ସଫଳତା ସମ୍ବଳିତ ବ୍ୟାନର ମାରିବାକୁ ନିର୍ଦ୍ଦେଶ ଦିଆଯାଇଛି । ସେତିକି ନୁହେଁ, ପିଲାଙ୍କୁ ଏହି ଅବସରରେ ଚକୋଲେଟ୍ କିମ୍ବା ମିଠା ବଣ୍ଟନ କରାଯିବ । ଛାତ୍ରଛାତ୍ରୀଙ୍କ ଭିତରେ ହକି ପାଇଁ ସଚେତନତା ସୃଷ୍ଟି କରିବା ଏହାର ଉଦ୍ଦେଶ୍ୟ ।

ଗତ ସୋମବାର ରାଜ୍ୟର ସମସ୍ତ ସ୍କୁଲରେ ପ୍ରାର୍ଥନା କ୍ଲାସରେ ହକିର ସଫଳ ବାର୍ତ୍ତା ଶୁଣିଥିଲେ ଛାତ୍ରଛାତ୍ରୀ । ଭାରତୀୟ ହକି ଦଳ ପାଇଁ ଓଡ଼ିଶାର ଅବଦାନ ଗୁରୁତ୍ଵପୂର୍ଣ୍ଣ । ୨୦୧୮ ମସିହାରୁ ଓଡ଼ିଶା ଭାରତୀୟ ହକି ଦଳର ପ୍ରାୟୋଜକ ରହିଛି । ସୁନ୍ଦରଗଡ଼ ଦେଶର ହକି ଏନ୍ତୁଡିଶାଳ । ଏଠାରେ ବିଶ୍ବର ସର୍ବବୃହତ ବିର୍ସାମୁଣ୍ଡା ହକି ଷ୍ଟାଡିୟମ ନିର୍ମାଣ କରିଛନ୍ତି ଓଡ଼ିଶା ସରକାର । ଓଡ଼ିଶା ସୃଷ୍ଟି କରିଛି ଦିଲ୍ଲୀପ ତିର୍କୀ, ବିରେନ୍ଦ୍ର ଲାକ୍ରା, ଅମିତ୍ ରୋହିଦାସ, ଦୀପଗ୍ରସ ଏକ୍କା କରି ପରି ଅନେକ ହକି କ୍ରୀଡ଼ାବିତ୍ । ଯେଉଁମାନେ ଭାରତ ପାଇଁ ପ୍ରତିନିଧିତ୍ବ କରିଛନ୍ତି । ଉନ୍ନତ ଭିତ୍ତିଭୂମି ଓ ତାଲିମ ପାଇଁ ଭାରତର ପ୍ରଦର୍ଶନ ଦିନକୁ ଦିନ ଆହୁରି ଉନ୍ନତ ହେଉଛି ।

ରାଜସ୍ଥାନ: ବିଧାନସଭା ନିର୍ବାଚନ ପାଇଁ ପ୍ରାର୍ଥୀ ଘୋଷଣା ପରେ ଉଗ୍ର ହେଲା ବିଜେପି ଗୋଷ୍ଠୀ କନ୍ଦଳ

ଜୟପୁର: ଗୋଟିଏ ପରେ ଗୋଟିଏ ରାଜ୍ୟରେ ଦେଖିବାକୁ ମିଳୁଛି ବିଜେପିର ଗୋଷ୍ଠୀ କନ୍ଦଳ । ଓଡ଼ିଶାର ବଲାଙ୍ଗୀରରେ ରାଜ୍ୟ ବିଜେପି ସଭାପତିଙ୍କ ଉପସ୍ଥିତିରେ ବିଜେପି ନେତା ମାଡପିଟ ହେବା ଘଟଣା ଥାନାକୁ ଯାଇଛି । ବିଧାନସଭା ଟିକେଟ ଘୋଷଣା ପରେ ମଧ୍ୟପ୍ରଦେଶରେ ବିଜେପି ଅଡୁଆରେ ପଡ଼ିଯାଇଥିବାବେଳେ ଏବେ ରାଜସ୍ଥାନରେ ମଧ୍ୟ ସମାନ ପରିସ୍ଥିତିର ସାମ୍ନା କରୁଛି । ଟିକେଟ ଘୋଷଣା ପରେ ରାଜ୍ୟ ବିଜେପିରେ ଦେଖା ଦେଇଛି ବିଦ୍ରୋହ ।

ଜଣାପଡୁଛି ରାଜସ୍ଥାନ ବିଜେପିରେ ଅଲ ଇଜ ନଟ୍ ଓ୍ବେଲ୍ । ପ୍ରାର୍ଥୀ ଘୋଷଣା ପରେ ଦଳରେ ଉଗ୍ର ହେଉଛି ଗୋଷ୍ଠୀ କନ୍ଦଳ । ବିଜେପି ଘୋଷଣା କରିଥିବା ୪୧ ପ୍ରାର୍ଥୀଙ୍କ ମଧ୍ୟରେ ରହିଛନ୍ତି ୭ ଜଣ ସାଂସଦ । ହେଲେ ଏଥିରେ ପୂର୍ବତନ ମୁଖ୍ୟମନ୍ତ୍ରୀ ତଥା ବରିଷ୍ଠ ନେତ୍ରୀ ବସୁନ୍ଧରା ରାଜେ ସିନ୍ଧିଆଙ୍କର କୌଣସି ସମର୍ଥକ ନାହାଁନ୍ତି । ଯାହାକୁ ନେଇ ବିବାଦ ଦେଖାଦେଇଛି ।

ବସୁନ୍ଧରାଙ୍କ ଅତି ନିକଟତର କୁହାଯାଉଥିବା ବିଧାୟକ ନରପାଟ ସିଂ ରାଜଭି, ରାଜପାଲ ସିଂ ଶେଖାଓ୍ବତଙ୍କୁ ଟିକେଟ ମିଳିନି । କେନ୍ଦ୍ରୀୟ ନେତୃତ୍ବ ବସୁନ୍ଧରାଙ୍କୁ ଅଣଦେଖା କରୁଥିବା ଚର୍ଚ୍ଚା ହେଉଛି । ଟିକେଟ କଟିଥିବା ନେତା ଏବେ ଦଳରେ ବିଦ୍ରୋହ କରିବା ଆରମ୍ଭ କରି ଦେଇଛନ୍ତି । ସାଂସଦ ଦିୟା କୁମାରୀଙ୍କୁ ଦଳ ବିଦ୍ୟାଧର ନଗର ବିଧାନସଭା କ୍ଷେତ୍ରରୁ ପ୍ରାର୍ଥୀ କରିଛି । ସେପଟେ ଭରତପୁର ନଗର ବିଧାନସଭା କ୍ଷେତ୍ରରୁ ଅନିତା ସିଂ ଗୁରଜର ଟିକେଟ ନପାଇବା ପରେ ଦଳ ବିରୋଧରେ ବିଦ୍ରୋହ ଆରମ୍ଭ କରିଦେଇଛନ୍ତି । ଯାହା କେନ୍ଦ୍ରୀୟ ନେତାଙ୍କ ମୁଣ୍ଡବଥା ବଢ଼ାଇ ଦେଇଛି ।

ବାହାନଗା ଟ୍ରେନ ଟ୍ରାଜେଡି: ସମସ୍ତ ୨୮ଟି ଅଚିହ୍ନା ଶବ ସତ୍କାର ଶେଷ

ଭୁବନେଶ୍ବର: ସରିଲା ବାହାନଗା ଟ୍ରେଟ୍ ଦୁର୍ଘଟଣାରେ ମୃତବ୍ୟକ୍ତିଙ୍କ ଶବ ସତ୍କାର । ଗତକାଲିଠାରୁ ଆରମ୍ଭ ହୋଇଥିବା ଏହି ପ୍ରକ୍ରିୟା ଆଜି ଭୋରୁ ସରିଛି । ବିଏମ୍ସି ଓ ଏମ୍ସ ଅଧିକାରୀଙ୍କ ଉପସ୍ଥିତିରେ ସମସ୍ତ ୨୮ଟି ଅଚିହ୍ନା ମୃତଦେହ ଭରତପୁର ଶ୍ମଶାନରେ ସତ୍କାର କରାଯାଇଛି ।

CBIର ଦିଲ୍ଲୀ ଅଧିକାରୀଙ୍କ ଉପସ୍ଥିତିରେ ଏମ୍ସ ପକ୍ଷରୁ ବିଏମସିକୁ ୨୮ଟି ଶବ ହସ୍ତାନ୍ତର କରାଯାଇଥିଲା । ଦୀର୍ଘ ୪ ମାସ ହେଲା କଣ୍ଟେନରେ ଥିଲା ଏହି ଅପରିଚିତ ଶବଗୁଡିକ । ଏନେଇ ବିଏମସି ପକ୍ଷରୁ ସୂଚନା ଦିଆଯାଇଛି । ମୃତଦେହ ହସ୍ତାନ୍ତର ଠାରୁ ଶବ ସତ୍କାର ଯାଏଁ ସମସ୍ତ ପ୍ରକ୍ରିୟାର ଭିଡିଓ ଗ୍ରାଫି କରାଯାଇଛି ।

ବାହାନଗା ଟ୍ରେନ୍ ଦୁର୍ଘଟଣା ପରେ ଭୁବନେଶ୍ଵରକୁ ୧୯୩ ମୃତଦେହ ଆସିଥିଲା । ଯେଉଁଥିରୁ ୩୧ଟି ମୃତଦେହକୁ ସେମାନଙ୍କ ସମ୍ପର୍କୀୟ ଚିହ୍ନଟ କରିଥିଲେ । ଏହା ପରେ ଏମସକୁ ଆସିଥିଲା ୧୬୨ ମୃତଦେହ । ଏଥିରୁ ୮୧ଟି ଚିହ୍ନଟ ହୋଇ ପାରିନଥିଲା । ମୃତଦେହ ଚିହ୍ନଟ ପାଇଁ ୧୧୦ ଜଣ ଡିଏନଏ ନମୁନା ଦେଇଥିଲେ । ସେମାନଙ୍କ ମଧ୍ୟରୁ ୫୩ ଜଣଙ୍କ ଡିଏନଏ ମ୍ୟାଚ୍ ହେବା ପରେ ମୃତଦେହ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିଲା । ଅବଶିଷ୍ଟ ୨୮ ମୃତଦେହର ଡିଏନଏ କାହା ସହ ମ୍ୟାଚ୍ ହୋଇ ନଥିବାରୁ ଏମସରେ ସୁରକ୍ଷିତ ଭାବେ ରଖାଯାଇଥିଲା ।

ଦିନିକିଆ ବିଶ୍ବକପ୍: ଆଜି ଭାରତ-ଆଫଗାନିସ୍ତାନ ଟକ୍କର

ନୂଆଦିଲ୍ଲୀ: ବିଶ୍ବକପ କ୍ରିକେଟରେ ଆଜି ଭାରତ ଖେଳିବ ଦ୍ବିତୀୟ ମୁକାବିଲା । ଆଫଗାନିସ୍ତାନକୁ ଭେଟିବ ଟିମ୍ ଇଣ୍ଡିଆ । ଦିନ ୨ଟାରେ ଦିଲ୍ଲୀର ଅରୁଣ ଜେଟଲି ଷ୍ଟାଡିୟମରେ ଖେଳାଯିବ ମ୍ୟାଚ । ପ୍ରଥମ ଥର ପାଇଁ ଘରୋଇ ପରିବେଶରେ ଆଫଗାନିସ୍ତାନକୁ ଭାରତ ଭେଟବାକୁ ଯାଉଛି ।

ପ୍ରଥମ ମ୍ୟାଚରେ ଶକ୍ତିଶାଳୀ ଅଷ୍ଟ୍ରେଲିଆକୁ ପରାସ୍ତ କରିଥିବା ଭାରତୀୟ ଦଳର ମନୋବଳ ଦୃଢ ରହିଛି । ଆଜିର ମ୍ୟାଚ ଜିତି ବିଶ୍ବକପ ଅଭିଯାନରେ ବିଜୟ ଅଭିଯାନ ଜାରି ରଖିବାକୁ ଉଦ୍ୟମ କରିବ ଭାରତ । ଏପଟେ ପ୍ରଥମ ମ୍ୟାଚରେ ବାଂଲାଦେଶଠାରୁ ପରାଜିତ ଆଫଗାନିସ୍ତାନ ଟିମ୍ ଚାପରେ ରହିଛି । ବିଶ୍ବକପରେ ଭାରତ ଓ ଆଫଗାନିସ୍ତାନ ମଧ୍ୟରେ ମୋଟ ୩ଟି ମ୍ୟାଚ ଖେଳାଯାଇଛି । ୨ଟି ମ୍ୟାଚରେ ଭାରତ ବିଜୟୀ ହୋଇଥିବା ବେଳେ ଗୋଟିଏ ମ୍ୟାଚ ଟାଇ ରହିଛି । ଏଣୁ ଭାରତର ପଲ୍ଲା ଭାରି ରହିଛି ।

ଭାରତ ସମସ୍ତ ବିଭାଗରେ ଆଫଗାନିସ୍ତାନଠାରୁ ଆଗରେ ରହିଛି । ସେପଟେ ଅରୁଣ ଜେଟଲୀ ଷ୍ଟାଡିୟମରେ ସଚିନ ତେନ୍ଦୁଲକରଙ୍କ ରେକର୍ଡ ଭାଙ୍ଗିବା ଲକ୍ଷ୍ୟରେ ରହିଛନ୍ତି ବିରାଟ କୋହଲି । ସଚିନ ଏଠାରେ ୮ଟି ମ୍ୟାଚରୁ ୩୦୦ ରନ ସଂଗ୍ରହ କରିଥିବା ବେଳେ କୋହଲି ୭ଟି ମୁକାବିଲାରେ ୨୨୨ ରନ କରିଛନ୍ତି । ସେ ଯଦି ଆଉ ୭୯ ରନ କରିବେ ତା’ହେଲେ ସଚିନଙ୍କୁ ଅତିକ୍ରମ କରିବେ ।

ରୋଗ ହେବାରୁ ପୁଅକୁ ଘରୁ ତଡ଼ି ଦେଲେ ବାପାମାଆ

ସମ୍ବଲପୁର: ପୁଅର ରୋଗ ଭଲ କରିବାକୁ ବାପାମାଆ କେତେ ଚିକିତ୍ସା, କେତେ ଓଷା  ଆଉ କେତେ ବ୍ରତ କରିବା କଥା ଆପଣ ଶୁଣିଥିବେ । ହେଲେ ଏ ଯୁବକ ଜଣଙ୍କୁ ଦେଖିଲେ ଆପଣ ବି କହିବେ, ଦୁନିଆଁରେ କ’ଣ ଏମିତି ବି ବାପାମାଆ ଅଛନ୍ତି ? ହଁ ଆଜ୍ଞା, ପୁଅକୁ ଫାଇଲେରିଆ ହେଲା ବୋଲି ଘରୁ ବାହାର କରିଦେଲେ ବାପାମାଆ । ଶେଷରେ ନିରାଶ ଓ ଅସହାୟ ଅବସ୍ଥାରେ ବୁର୍ଲା ଭିମସାରରେ ବୁଲୁଛି ୧୮ ବର୍ଷୀୟ ତ୍ରିଲୋଚନ ମାଝୀ ।

୫ ବର୍ଷ ତଳେ ତାଙ୍କୁ ଫାଇଲେରିଆ ରୋଗ ହୋଇଥିଲା । ପରେ ଏହା ବୃଦ୍ଧି ହେବା ସହିତ ଗୁପ୍ତାଙ୍ଗକୁ ଅଧିକ ଭାବରେ ସଂକ୍ରମିତ ହୋଇଥିଲା । ବାପାମାଆ ପୁଅର ଚିକିତ୍ସା କ’ଣ କରାଇବେ, ପୁଅକୁ ଘୃଣା କରି ଘରୁ ବାହାର କରିଦେଲେ । ତେବେ ତ୍ରିଲୋଚନଙ୍କର ଘର କେଉଁଠି ସେ ନେଇ ସ୍ପଷ୍ଟ ସୂଚନା ମିଳିପାରିନି । ଏବେ ବୁର୍ଲା ଭିମସାରରେ ତ୍ରିଲୋଚନଙ୍କୁ ଚିକିତ୍ସା ପାଇଁ ଭର୍ତ୍ତି କରାଯାଇଛି । ହେଲେ ତାଙ୍କ ପାଖରେ ନା ବାପାମାଆ ଅଛନ୍ତି ନା ସମ୍ପର୍କୀୟ । ଡାକ୍ତରଙ୍କ କହିବା ଅନୁସାରେ ପ୍ଲାଷ୍ଟିକ ସର୍ଜରୀ କରାଯିବା ପରେ ତ୍ରିଲୋଚନଙ୍କର ସ୍ବାସ୍ଥ୍ୟବସ୍ଥା ସୁଧୁରିପାରିବ ।

‘ନବୀନ ପଟ୍ଟନାୟକ ଏକ ଅନନ୍ୟ ବ୍ୟକ୍ତିତ୍ବ’ ପୁସ୍ତକ ଉନ୍ମୋଚିତ

ପୁରୀ: ଉନ୍ମୋଚିତ ହେଲା ପୁସ୍ତକ ନବୀନ ପଟ୍ଟନାୟକ ଏକ ଅନନ୍ୟ ବ୍ୟକ୍ତିତ୍ବ । ଡ. ପୀତବାସ ମିଶ୍ରଙ୍କ ଦ୍ବାରା ଲିଖିତ ଏହି ପୁସ୍ତକକୁ ଆଜି ପୁରୀ ୟୁଥ ହଷ୍ଟେଲରେ ଏକ ସ୍ବତନ୍ତ୍ର କାର୍ଯ୍ୟକ୍ରମରେ ଉନ୍ମୋଚନ କରାଯାଇଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଜୀବନୀ ସମ୍ପର୍କରେ ଏହି ପୁସ୍ତକ ରଚନା କରାଯାଇଛି । ଗତ ଦୁଇ ଦଶନ୍ଧି ଧରି ଓଡ଼ିଶାର ଭାଗ୍ୟ ଡୋରି ସମ୍ଭାଳିଥିବା ନବୀନ ରାଜ୍ୟ ଶାସନର ସର୍ବମୟ କର୍ତ୍ତା ଭାବେ ସାଢେ ୪ କୋଟି ଓଡ଼ିଆଙ୍କ ମନ ଜିଣିଛନ୍ତି । ଓଡିଶାକୁ ବିକାଶ ମାର୍ଗରେ ଆଗକୁ ନେବାରେ ତାଙ୍କର ଅବଦାନ ଅତୁଳନୀୟ । ତାଙ୍କର ବ୍ୟକ୍ତିତ୍ବ ସମସ୍ତଙ୍କୁ ପ୍ରଭାବିତ କରିଛି । ଏହାକୁ ପାଥେୟ କରି ରଚନା କରିଛନ୍ତି ବରିଷ୍ଠ ସାମ୍ବାଦିକ ପୀତବାସ ମିଶ୍ର ।

୨୫ ପୌରସଂସ୍ଥାରେ ଶୀଘ୍ର କାର୍ଯ୍ୟକାରୀ ହେବ ମୁକ୍ତା ସଫ୍ଟ ଆପ୍

ଭୁବନେଶ୍ବର: ରାଜ୍ୟର ୨୫ଟି ପୌରସଂସ୍ଥାରେ ଶୀଘ୍ର କାର୍ଯ୍ୟକାରୀ ହେବ ମୁକ୍ତା ସଫ୍ଟ ଆପ୍ । ଓ୍ବେବ୍ ଆଧାରିତ ଆପ୍ କାର୍ଯ୍ୟକ୍ରମ ରୂପାୟନରେ ନିର୍ଣ୍ଣାୟକ ସାବ୍ୟସ୍ତ ହେବ । ସହରାଞ୍ଚଳର ଗରିବ ଅଧିବାସୀଙ୍କ ଜୀବିକା ସୁରକ୍ଷା ନିମନ୍ତେ ମୁଖ୍ୟମନ୍ତ୍ରୀ କର୍ମତତ୍ପର ଅଭିଯାନ ବା ‘ମୁକ୍ତା’ ରାଜ୍ୟ ସରକାରଙ୍କ ଅଭିନବ ପଦକ୍ଷେପ । ୧୧୫ଟି ପୌର ସଂସ୍ଥାରେ ସହରାଞ୍ଚଳ ଶ୍ରମିକ ଓ ପ୍ରବାସୀ ଶ୍ରମିକଙ୍କୁ ଜୀବିକା ସୁଯୋଗ ପ୍ରଦାନ କରିବା ଏହି କାର୍ଯ୍ୟକ୍ରମର ଲକ୍ଷ୍ୟ । ଶ୍ରମିକଙ୍କୁ ସଠିକ ସମୟରେ ମଜୁରୀ ପ୍ରଦାନ ନିମନ୍ତେ ରାଜ୍ୟ ସରକାର ଓ୍ବେବ୍ ଆଧାରିତ ଆପ୍ ‘ମୁକ୍ତା ସଫ୍ଟ‘ କାର୍ଯ୍ୟକାରୀ କରୁଛନ୍ତି ।

ଢେଙ୍କାନାଳ ଓ ଜଟଣୀରେ ଏହାକୁ ପାଇଲଟ ପ୍ରୋଜେକ୍ଟ ଭାବେ କାର୍ଯ୍ୟକାରୀ କରାଯାଇ ସଫଳତା ମିଳିଛି । ଏବେ ମୁକ୍ତା ସଫ୍ଟ ରାଜ୍ୟର ୨୫ଟି ପୌର ସଂସ୍ଥାରେ ଶୀଘ୍ର କାର୍ଯ୍ୟକାରୀ ହେବ । ଯାହା ମଧ୍ୟରେ ୫ଟି ମହାନଗର ନିଗମ, ୧୪ଟି ପ୍ରମୁଖ ପୌରପାଳିକା ଓ ୬ଟି ବିଜ୍ଞାପିତ ଅଞ୍ଚଳ ପରିଷଦ ରହିଛି । ଏହାର ସଫଳତା ପାଇଁ ୨୫ଟି ପୌରସଂସ୍ଥାର ମାଷ୍ଟର୍ ଟ୍ରେନରଙ୍କ ପ୍ରଶିକ୍ଷଣ କାର୍ଯ୍ୟକ୍ରମ ଆରମ୍ଭ କରାଯାଇଛି।

ମୁକ୍ତା ସଫ୍ଟ ଓ୍ବାନ ପଏଣ୍ଟ ଜିରୋର ବିଭିନ୍ନ ଦିଗକୁ ପରବର୍ତ୍ତୀ ସ୍ତରରେ ପୌର ସଂସ୍ଥାର କର୍ମଚାରୀଙ୍କୁ ପରିଚିତ କରାଇବାରେ ଏହି ମାଷ୍ଟର୍ ଟ୍ରେନରମାନେ ପ୍ରମୁଖ ଭୂମିକା ଗ୍ରହଣ କରିବେ । ଗୃହ ନିର୍ମାଣ ଓ ନଗର ଉନ୍ନୟନ ବିଭାଗର ପ୍ରମୁଖ ଶାସନ ସଚିବ ଜି ମାଥିଭାଥାନନ୍ ମାଷ୍ଟର ଟ୍ରେନରଙ୍କୁ ଅଭିଭାଷଣ ପ୍ରଦାନ କରିଥିଲେ । ମଜୁରୀ ଭିତ୍ତିକ ସହରାଞ୍ଚଳ ଜୀବିକା ସୁରକ୍ଷା କାର୍ଯ୍ୟକ୍ରମ ପ୍ରବର୍ତ୍ତନ କରିବାରେ ଓଡ଼ିଶା ସମଗ୍ର ଦେଶରେ ପ୍ରଥମ ରାଜ୍ୟ । ଶ୍ରମିକଙ୍କୁ ତୁରନ୍ତ ପ୍ରାପ୍ୟ ପ୍ରଦାନ ଦିଗରେ ଏହି ଓ୍ବେବ୍ ଆଧାରିତ ଆପ୍ ଅତ୍ୟନ୍ତ ଉପଯୋଗୀ ସାବ୍ୟସ୍ତ ହେବ । ୯ ତାରିଖରୁ ଆରମ୍ଭ ହୋଇଥିବା ପ୍ରଶିକ୍ଷଣ ୧୩ ତାରିଖ ପର୍ଯ୍ୟନ୍ତ ଚାଲିବ । ୩୦୦ ବ୍ୟକ୍ତିଙ୍କୁ ୫ଟି ପର୍ଯ୍ୟାୟରେ ପ୍ରଶିକ୍ଷଣ ଦିଆଯିବ ବୋଲି ଗୃହ ନିର୍ମାଣ ଓ ନଗର ଉନ୍ନୟନ ବିଭାଗର ଯୁଗ୍ମ ଶାସନ ସଚିବ ତଥା ରାଜ୍ୟ ସହରାଞ୍ଚଳ ଉନ୍ନୟନ ସଂସ୍ଥାର ନିର୍ଦ୍ଦେଶକ ଶାରଦା ପ୍ରସାଦ ପଣ୍ଡା ସୂଚନା ଦେଇଛନ୍ତି ।

ଓଡ଼ିଶାର ଗର୍ବ ଓଡ଼ିଶା ପରିବାର: ଅସହାୟ ପ୍ରବାସୀ ଓଡ଼ିଆଙ୍କ ପାଇଁ ଦେବଦୂତ

ଭୁବନେଶ୍ବର: ପ୍ରବାସୀ ଓଡ଼ିଆଙ୍କ ଖୁସି ପାଇଁ ରାଜ୍ୟ ସରକାରଙ୍କ ଓଡ଼ିଶା ପରିବାର । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଏପରି ପରିକଳ୍ପନା ଏବେ ରାଜ୍ୟ ବାହାରେ ଓ ବିଦେଶ ମାଟିରେ ଥିବା ଓଡ଼ିଆଙ୍କୁ ନିଜ ମାଟି ସହ ଯୋଡୁଛି । ଯାହା କେବେ ହୋଇ ନଥିଲା ତାହା ଏବେ ସତ ହୋଇଛି । ଦଙ୍ଗା ପ୍ରପୀଡ଼ିତ ରାଜ୍ୟରୁ ଓଡ଼ିଆଙ୍କୁ ସୁରକ୍ଷିତ ଉଦ୍ଧାର କରିବା ହେଉ କି ଓଡ଼ିଶାର କଳା ସଂସ୍କୃତି ପାଇଁ ଆମେରିକା ଓ ଇଉରୋପରେ ଆର୍ଥିକ ସହାୟତା ପ୍ରଦାନ । ସବୁଥିରେ ପ୍ରବାସୀ ଓଡ଼ିଆଙ୍କୁ ଖୁସିରେ ରଖିବା ଓଡ଼ିଶା ପରିବାରର ଆଭିମୁଖ୍ୟ ।

ମଣିପୁରରେ ଦଙ୍ଗାରେ ଓଡ଼ିଆ ପିଲା ସଙ୍କଟରେ । ତ୍ରିପୁରାରେ ବାହୁଡ଼ା ଯାତ୍ରାରେ ବିଦ୍ୟୁତ ତାର ସଂସ୍ପର୍ଶରେ ଆସି ୬ରୁ ୭ ଜଣଙ୍କ ମୃତ୍ୟୁ । ହାଇଦ୍ରାବାଦରେ ନିର୍ମାଣଧୀନ କୋଠା ଭୁଶୁଡ଼ି ଯିବାରୁ ମାଲକାନଗିରିର ଶ୍ରମିକଙ୍କ ମୃତ୍ୟୁ । ରାଜ୍ୟ ବାହାରେ ହେଉ କି ବିଦେଶ ମାଟି, ସବୁଠି ପହଞ୍ଚି ପ୍ରବାସୀ ଓଡ଼ିଆଙ୍କୁ ସୁରକ୍ଷିତ ଉଦ୍ଧାର କରୁଛି ଓଡ଼ିଶା ପରିବାର ।

ବିଦେଶରେ ଥିବା ଲକ୍ଷ ଲକ୍ଷ ଓଡ଼ିଆ କିପରି ନିଜ ମାଟି ସହ ଯୋଡ଼ି ହେବେ ? ଅସୁବିଧାରେ କିମ୍ବା ଉତ୍ପୀଡନର ଶିକାର ହେଲେ କେମିତି ହେବେ ସୁରକ୍ଷିତ ଉଦ୍ଧାର ? ବିଦେଶ ମାଟିରେ ଥିବା ସବୁ ଓଡ଼ିଆ ମୋ ପରିବାରର ସଦସ୍ୟ । ସମସ୍ତେ କିପରି ଖୁସିରେ ରହିବେ ? ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଏପରି ପରିକଳ୍ପନାରେ ଗଠନ ହୋଇ କାର୍ଯ୍ୟକ୍ଷମ ହୋଇଛି ଓଡ଼ିଶା ପରିବାର ନିର୍ଦ୍ଦେଶାଳୟ । ବର୍ଷେ ହୋଇନି ଓଡ଼ିଶା ପରିବାରର ଜୟ ଗାଥା ଏବେ ପ୍ରବାସୀ ଓଡ଼ିଆଙ୍କ ମୁହଁରେ ଫୁଟାଇଛି ହସ ।

ମୁଖ୍ୟମନ୍ତ୍ରୀଙ୍କ ପାଇଁ ପ୍ରତ୍ୟେକ ଜୀବନ ମୂଲ୍ୟବାନ୍ । ସେ ଓଡ଼ିଆ ହେଉ କି ତେଲୁଗୁ କିମ୍ବା ଅନ୍ୟ ଭାଷାଭାଷୀ ଅଞ୍ଚଳର । ସେଥିରେ କିଛି ଫରକ ପଡିନି । ସମସ୍ତେ ମଣିଷ,

ଧନ ଜୀବନ ସୁରକ୍ଷା ଦେବା ଆମର ଦାୟିତ୍ବ । ତ୍ରିପୁରା ବାହୁଡ଼ା ରଥଯାତ୍ରା ବେଳେ ବିଦ୍ୟୁତ ତାର ସଂସ୍ପର୍ଶରେ ଆସି ଆଘାତପ୍ରାପ୍ତ ଲୋକ କେହି ଓଡ଼ିଆ ନ ହୋଇ ସେମାନଙ୍କ ଚିକିତ୍ସା ପାଇଁ ଅର୍ଥ ଦେବାକୁ ଉଦ୍ୟମ କରିଥିଲେ ମୁଖ୍ୟମନ୍ତ୍ରୀ । ସେହିପରି ସୋନପୁରରୁ ପିଣ୍ଡଦାନ ପାଇଁ ବିହାର ଗୟା ଯାଇଥିବା ୧୭ ଜଣ ଓଡ଼ିଆଙ୍କ ଗାଡ଼ି ସେଠାରେ ଦୁର୍ଘଟଣାଗ୍ରସ୍ତ ହେଲା । ସମସ୍ତେ ଗୁରୁତର ଆହତ ହେଲେ । ବିହାରରେ ଏକ ଘରୋଇ ହସ୍ପିଟାଲରେ ସେମାନଙ୍କର ଅସ୍ତ୍ରୋପଚାର କରାଯାଇ ହାଜିପୁର ରେଳ ଷ୍ଟେଷନରୁ ସେମାନଙ୍କୁ ସୁରକ୍ଷିତ ଅଣାଯାଇଛି ।

ଖାଲି ଅସୁବିଧାରେ ଥିବା ଓଡ଼ିଆଙ୍କୁ ଉଦ୍ଧାର କରିବା ଓଡ଼ିଶା ପରିବାରର ଲକ୍ଷ୍ୟ ନୁହେଁ । ଓଡ଼ିଶାର କଳା, ସଂସ୍କୃତି ଓ ପରମ୍ପରା, ଖାଦ୍ୟ କିପରି ବିଦେଶରେ ଆଦୃତି ପାଇବ, ନେଇ ବି ଉଦ୍ୟମ କରୁଛି । ଆମେରିକା ଓ ଇଉରୋପରେ ମନ୍ଦିର ନିର୍ମାଣ ପାଇଁ ବି ଆର୍ଥିକ ସହାୟତା ପ୍ରଦାନ କରିବାକୁ ମୁଖ୍ୟମନ୍ତ୍ରୀ ନିଷ୍ପତ୍ତି ନେଇଛନ୍ତି । ନିକଟରେ ଆବୁଧାବିରେ ୧୦ ଜଣ କଳାକାରଙ୍କୁ ନେଇ ଓଡ଼ିଶାର କଳା ସଂସ୍କୃତି ପରିବେଷଣ କରିଛନ୍ତି ।

ପୂର୍ବରୁ ଓଡ଼ିଆମାନଙ୍କୁ ଭିସା ପ୍ରଦାନ ପାଇଁ ସ୍ବାସ୍ଥ୍ୟ ପରୀକ୍ଷା ସୁବିଧା ଭୁବନେଶ୍ବରରେ ଥିଲା । କିନ୍ତୁ ଏହାକୁ କେନ୍ଦ୍ର ସରକାର କୋଲକାତା ସ୍ଥାନାନ୍ତର କରି ଦେଇଛନ୍ତି । ଓଡ଼ିଶା ପୂର୍ବଭାରତର ଗେଟ୍ ଓ୍ବେ ହେଲାଣି । ଶିଳ୍ପ ହବ୍, କ୍ରୀଡ଼ା ହବ୍ ଓ ଶିକ୍ଷା ହବ୍ ମାନ୍ୟତା ପାଇଲାଣି । ଭିସା ପାଇଁ ସ୍ବାସ୍ଥ୍ୟ ପରୀକ୍ଷା କେନ୍ଦ୍ରକୁ ପୁଣି ଥରେ ଓଡ଼ିଶାରେ ପ୍ରତିଷ୍ଠା କରିବାକୁ ରାଜ୍ୟ ସରକାର ଦାବି ରଖିଛନ୍ତି । ବୁଦ୍ଧିଜୀବୀଙ୍କ ମତରେ ଓଡ଼ିଶା ପରିବାରକୁ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ଅଧୀନରେ ଗୋଟିଏ ନିର୍ଦ୍ଦେଶାଳୟରେ ସୀମିତ ନ ରଖି ସ୍ବତନ୍ତ୍ର ବିଭାଗ କରାଗଲେ ବେଶୀ ଲାଭ ହୁଅନ୍ତା ।