spot_img
Home Blog Page 3009

ବର୍ଷକର ପିଲା ବାରମ୍ବାର କାନ୍ଦିବାରୁ ଗଳା ଚିପି ମାରି ଦେଲା ଦାଦା

ସୋନିପତ: ହରିୟାଣା ସୋନିପତ ଜିଲ୍ଲା ବାରୋତ ଗାଁରୁ ଆସିଛି ଏକ ଦୁଃଖଦ ଖବର । ବର୍ଷର ଶିଶୁ ବାରମ୍ବାର କାନ୍ଦିବାରୁ ତା’ର ଗଳା ଚିପି ହତ୍ୟା କରିଛି ନିଜ ଦାଦା । ହତ୍ୟା କରିବା ପରେ ଶବକୁ ପାଖରେ ଥିବା ଏକ କ୍ଷେତରେ ପକାଇ ଦେଇଥିଲା । ପିଲାକୁ ଘରେ ନପାଇ ତା’ ମାଆ ସପନାଙ୍କ ସନ୍ଦେହ ହୋଇଥିଲା । ଏହାପରେ ସେ ପୋଲିସକୁ ସୂଚନା ଦେଇଥିଲେ । ପୋଲିସ ଅଭିଯୁକ୍ତ ଦାଦା ପବନକୁ ଗିରଫ କରିବା ସହ ଶବ ଜବତ କରି ବ୍ୟବଚ୍ଛେଦ ପାଇଁ ପଠାଇଛି ।

ପୋଲିସ ସୂଚନା ଅନୁସାରେ ବିହାର ମୋତିହାରୀ ବାସିନ୍ଦା ସପନା ପିଲା ଦିନରୁ ଅନାଥ ଥିଲେ ଓ ମାମୁଙ୍କ ପାଖରେ ରହୁଥିଲେ । ମାମୁ ଉତ୍ତର ପ୍ରଦେଶର ରାହୁଲଙ୍କ ସହ ତାଙ୍କ ବିବାହ କରାଇ ଦେଇଥିଲେ । ସେମାନଙ୍କର ୪ଟି ପିଲା ଥିଲେ । ରାହୁଲ ସବୁବେଳେ ତାଙ୍କୁ ମାଡ଼ ମାରୁଥିଲେ । ରାହୁଲ ଦିନ ମଜୁରିଆ କାମ କରୁଥିବା ବେଳେ ଲୁଧିଆନାରେ ରହୁଥିଲେ । ୬ ମାସ ପୂର୍ବରୁ ସପନା ପିଲାଙ୍କୁ ଧରି ତାଙ୍କ ପାଖକୁ ରହିବାକୁ ଆସିଥିଲେ । ହେଲେ ରାହୁଲ ତାଙ୍କୁ ଓ ପିଲାଙ୍କୁ ଛାଡ଼ି ନିଜ ଭାଉଜଙ୍କ ପାଖରେ ରହିବାକୁ ଲାଗିଥିଲା । କିଛିଦିନ ପିଲାଙ୍କୁ ଧରି ଭଡ଼ା ଘରେ ରହୁଥିଲେ । ଏହାପରେ ଲୁଧିଆନା ରେଲଓ୍ବେ ଷ୍ଟେସନରେ ଭିକ୍ଷାବୃତ୍ତି କରି ପିଲାଙ୍କୁ ପାଳୁଥିଲେ ।

ପ୍ରାୟ ଦୁଇ ମାସ ପୂର୍ବରୁ ଭିକ ମାଗିବା ବେଳେ ଜଣେ ମହିଳାଙ୍କ ସହ ତାଙ୍କ ଭେଟ ହୋଇଥିଲା । ସେ ତାଙ୍କ ଭଣଜା ବିକି ସହ ବାହାଘର କରାଇ ଦେବାକୁ କହିଥିଲେ । ଏହାପରେ ସପନା ୪ ପିଲାଙ୍କୁ ଧରି ବାରୋତ ଚାଲି ଯାଇଥିଲେ ଓ ବିକିଙ୍କୁ ବିବାହ କରିଥିଲେ । କିଛିଦିନ ମଧ୍ୟରେ ବିକିଙ୍କ ଅବିବାହିତ ଭାଇ ପବନ ସହ ତାଙ୍କର ଶାରୀରିକ ସମ୍ପର୍କ ଗଢ଼ି ଉଠିଥିଲା ।

ସପନା ପୋଲିସକୁ କହିଛନ୍ତି, ତାଙ୍କ ବର୍ଷକର ପୁଅ ଯେତେବେଳେ କାନ୍ଦୁଥିଲା ପବନ ରାଗି ଯାଉଥିଲା ଓ ମାରି ଦେବାକୁ ଧମକ ଦେଉଥିଲା । ସେପ୍ଟେମ୍ବର ୯ରେ ପୁଅକୁ ଶାଶୁଙ୍କ ରୁମରେ ଶୁଆଇ ଦେଇଥିଲି । କିଛି ସମୟ ପରେ ଦେଖିଲି ପୁଅ ସେଠାରେ ନଥିଲା । ମୋର ସନ୍ଦେହ ହେବାରୁ ପୋଲିସକୁ ସୂଚନା ଦେଇଥିଲି ।

ଜି-୨୦ ସମ୍ମିଳନୀ: ଦୁନିଆ ଜାଣିଲା କୋଣାର୍କ ଚକ୍ରର କାହାଣୀ

ନୂଆନିଲ୍ଲୀ: ଜି-୨୦ ଶିଖର ସମ୍ମିଳନୀ ପାଇଁ ଭାରତରେ ଏକାଠି ହୋଇଛନ୍ତି ବିଭିନ୍ନ ରାଷ୍ଟ୍ରର ରାଷ୍ଟ୍ରନେତା । ଦିଲ୍ଲୀରେ ହେଉଥିବା ଏହି ସମ୍ମିଳନୀ ଉପରେ ରହିଛି ସାରା ବିଶ୍ବର ନଜର । ଜି-୨୦ ମାଧ୍ୟମରେ ସାରା ଦୁନିଆ ଜାଣୁଛି ଶତାବ୍ଦୀ ଶତାବ୍ଦୀ ପୁରୁଣା ଭାରତୀୟ ସଂସ୍କୃତି, ଜ୍ଞାନ, ବୁଦ୍ଧିମତା ଓ ପ୍ରାଚୀନ ଭାରତର ଯୋଗଦାନ ସମ୍ପର୍କରେ । ରାଷ୍ଟ୍ରପତି ଦ୍ରୌପଦୀ ମୁର୍ମୁ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବିଶ୍ବ ନେତାଙ୍କୁ ଆଧୁନିକ ଓ ପ୍ରାଚୀନ ଭାରତ ସମ୍ପର୍କରେ କରିଛନ୍ତି ଅବଗତ । ଏହି କ୍ରମରେ ଓଡ଼ିଶାର କୋଣାର୍କରେ ଥିବା ସୂର୍ଯ୍ୟ ମନ୍ଦିର ଓ କୋଣାର୍କ ଚକ୍ର ସମ୍ପର୍କରେ ଜାଣିବାକୁ ବିଶ୍ବ ନେତାଙ୍କ ଆଗ୍ରହ ଦେଖିବାକୁ ମିଳିଥିଲା । ଏହାସହ ପ୍ରାଚୀନ ନାଳନ୍ଦା ବିଶ୍ବ ବିଦ୍ୟାଳୟ ଏବଂ ସାବରମତୀ ଆଶ୍ରମ ସମ୍ପର୍କରେ ମଧ୍ୟ ଅବଗତ ହୋଇଛନ୍ତି ।

କୋଣାର୍କ ଚକ୍ରର ମହତ୍ବ ଜାଣି ଆଶ୍ଚର୍ଯ୍ୟ ହେଲେ ବିଶ୍ବନେତା

ବିଶ୍ବ ନେତା ଜାଣିଥିଲେ କୋଣାର୍କ ଚକ୍ରର ମହତ୍ବ । ଏହା କେମିତି ସମୟକୁ ଦର୍ଶାଇଥାଏ ଜାଣି ଆଶ୍ଚର୍ଯ୍ୟ ହୋଇଥିଲେ ବାଇଡେନଙ୍କଠାରୁ ଆରମ୍ଭ କରି ଋଷି ସୁନକ ଓ ଅନ୍ୟ ନେତା । କୋଣାର୍କ ଚକ୍ରକୁ ଜୀବନର ଗାଡ଼ି ବୋଲି କୁହାଯାଇଥାଏ । ଏହାର ସମୟର ଗତି ସହ କାଳଚକ୍ର ଓ ପ୍ରଗତୀ ଏବଂ ନିରନ୍ତର ପରିବର୍ତ୍ତନର ପ୍ରତୀକ ବୋଲି ଜାଣିବାକୁ ପାଇଥିଲେ ବିଶ୍ବନେତା ।

ବୁଲିଲା କଟୁରୀ ଓ ଭୁଜାଲି: ଯୁବକଙ୍କୁ ଗୋଡ଼ାଇ ଗୋଡ଼ାଇ ହାଣିଲେ ଦୁଇ ଦୁର୍ବୃତ୍ତ

ସୋର: ଦିନ ଦ୍ବିପ୍ରହରରେ ସୋର ବରଫ ଛକରେ ବୁଲିଲା କଟୁରୀ ଓ ଭୁଜାଲି । ଲହୁ ଲୁହାଣ ହେଲେ ଯୁବକ । ଦୁଇ ଯୁବକ ଅନ୍ୟ ଜଣେ ଯୁବକଙ୍କୁ ବିଚ୍ ରାସ୍ତାରେ ଗୋଡ଼ାଇ ଗୋଡ଼ାଇ ହାଣିଛନ୍ତି । ଗୁରୁତର ଅବସ୍ଥାରେ ଯୁବକଙ୍କୁ ସୋର ମେଡିକାଲରେ ଭର୍ତ୍ତି କରାଯାଇଛି ।

ଅଭିଯୋଗ ଅନୁସାରେ, ସୋର ବରଫ ଛକରେ ଖଣ୍ଡାସାହିର ଗଣେଶ ସିଂଙ୍କୁ ପୁରୁଣା ବାଲେଶ୍ବରର ଦୁଇ ଜଣ ଯୁବକ କଟୁରୀ ଓ ଭୁଜାଲିରେ ଆକ୍ରମଣ କରିଥିଲେ । ଜୀବନ ବଞ୍ଚାଇବାକୁ ଗଣେଶ ଚିତ୍କାର କରିବା ସହ ଦୌଡୁ ଥିବା ବେଳେ ଯୁବକ ଦ୍ବୟ ତାଙ୍କୁ ଗୋଡ଼ାଇ ଗୋଡ଼ାଇ ଆକ୍ରମଣ କରିଥିଲେ । ଦେଶୀମଦ କିଣା ବିକାକୁ ନେଇ ଝଗଡ଼ା ହୋଇଥିବା ଜଣାପଡ଼ିଛି । ଆକ୍ରମଣ ପରେ ଅଭିଯୁକ୍ତ ଦ୍ବୟ ଫେରାର ହୋଇଯାଇଛି । ଖବର ପାଇଁ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।

ବିଜେଡିରେ ରହି ସୌମ୍ୟ ବିଜେଡିକୁ ବଦନାମ କରିବା ଗ୍ରହଣୀୟ ନୁହେଁ: ଅମର

ଭୁବନେଶ୍ବର: ଖଣ୍ଡପଡ଼ା ବିଧାୟକ ସୌମ୍ୟରଞ୍ଜନ ପଟ୍ଟନାୟକଙ୍କୁ ବିଜେଡି ସାଂସଦ ଅମର ପଟ୍ଟନାୟକଙ୍କ ସମାଲୋଚନା । ସୌମ୍ୟରଞ୍ଜନ ପଟ୍ଟନାୟକ କ’ଣ, ତାହା ସମସ୍ତେ ଜାଣିଛନ୍ତି ବୋଲି କହି ଆକ୍ଷେପ କରିଛନ୍ତି ଅମର । ସେ କହିଛନ୍ତି, ‘ସୌମ୍ୟଙ୍କ ଆଭିମୁଖ୍ୟ କ’ଣ ସମସ୍ତେ ଜାଣନ୍ତି ? ଦଳ ବିରୋଧରେ ସୌମ୍ୟ ବାରମ୍ବାର କ’ଣ ପାଇଁ ମନ୍ତବ୍ୟ ଦେଉଛନ୍ତି ?  ବିଜେଡିରେ ରହି ବିଜେଡିକୁ ବଦନାମ କରିବା ପାଇଁ ସୌମ୍ୟ ଅପଚେଷ୍ଟା କରୁଛନ୍ତି । ଏହା ଗ୍ରହଣୀୟ ନୁହେଁ, ଓଡ଼ିଶାବାସୀ କେବେ ବି ସୌମ୍ୟଙ୍କୁ ବରଦାସ୍ତ କରିବେ ନାହିଁ ।’

ଆଜି ବିଶ୍ୱ ଆତ୍ମହତ୍ୟା ନିବାରଣ ଦିବସ, ଚଳିତ ବର୍ଷର ଥିମ `କ୍ରିଏଟିଂ ହୋପ୍, ଥ୍ରୋ ଆକ୍ସନ’

ଭୁବନେଶ୍ୱର : ଆଜି ହେଉଛି ବିଶ୍ୱ ଆତ୍ମହତ୍ୟା ନିବାରଣ ଦିବସ। ଚଳିତ ବର୍ଷ ଥିମ ରହିଛି `କ୍ରିଏଟିଂ ହୋପ୍, ଥ୍ରୋ ଆକ୍ସନ’ । ଏ ନେଇ ରେସର୍ସ ଓ ରନର୍ସ କ୍ଲବ୍‌ ଓ ଭାରତୀୟ ମାନସିକ ସଂଘ ଓଡିଶା ଶାଖାର ମିଳିତ ଆନୁଲୁଲ୍ୟରେ ଭୁବନେଶ୍ୱରରେ ଏକ ସାଇକେଲ ରାଲି ଅନୁଷ୍ଠିତ ହୋଇଛି । ପୃଥିବୀରେ ଯେଉଁ ପରିମାଣରେ ଆତ୍ମହତ୍ୟାର ସଂଖ୍ୟା ବଢ଼ି ଚାଲିଛି ତାକୁ ନେଇ ଜନସାଧାରଣଙ୍କ ମଧ୍ୟରେ ସଚେତନତା ସୃଷ୍ଟି କରି ସଂଖ୍ୟା କମ୍‌ କରିବା ବା ସମ୍ପୂର୍ଣ୍ଣ ଭାବେ ନିବାରଣ କରିବା ଏହି କାର୍ଯ୍ୟକ୍ରମର ଉଦ୍ଦେଶ୍ୟ । ଆତ୍ମହତ୍ୟା ନିବାରଣ କରିବାକୁ ହେଲେ ପ୍ରତ୍ୟେକ ଦିନ ଫିଜିକାଲ ଏକ୍ସରସାଇଜ୍‌ କରିବା ଆବଶ୍ୟକ । ଏହାଦ୍ବାରା ଜଣେ ବ୍ୟକ୍ତି ତାର ମାନସିକ ସ୍ଥିତି ଠିକ ରଖିପାରିବ ଓ ଖୁସିରେ ରହିପାରିବ । ଏହି ବାର୍ତ୍ତା ନେଇ ସାଇକେଲ୍ ଶୋଭାୟାତ୍ରା କରାୟାଇଛି ।

ସାବଧାନ ! ରାଜଧାନୀରେ ଅଟୋ ଚାଳକ ବେଶରେ ମାତିଛନ୍ତି ଲୁଟେରା, ଚା’ରେ ନିଶା ଦେଇ ଯାତ୍ରୀଙ୍କୁ ଲୁଟିଲେ

ଭୁବନେଶ୍ବର: ଦିନକୁ ଦିନ ରାଜଧାନୀ ଭୁବନେଶ୍ବରରେ ବଢ଼ିବାରେ ଲାଗିଛି ଅପରାଧ । କମିଶନରେଟ ପୋଲିସ ରାଜଧାନୀକୁ କ୍ରାଇମ୍ ଫ୍ରି ଜୋନ୍ କରିବାକୁ ପଦକ୍ଷେପ ନେଉଥିଲେ ବି ଅପରାଧୀଙ୍କ ଉପରେ କିଛି ପ୍ରଭାବ ପଡ଼ିବା ଭଳି ଲାଗୁନି । କେତେବେଳେ ରାଜଧାନୀ ରକ୍ତ ରଞ୍ଜିତ ହେଉଛି ତ ଆଉ କେତେ ବେଳେ ବିଚ୍ ରାସ୍ତାରେ ଲୁଟର ଶିକାର ହେଉଛନ୍ତି ଲୋକେ । ଲୁଟେରା ଗ୍ୟାଙ୍ଗ କଥା ଛାଡନ୍ତୁ, ଅଟୋ ଚାଳକ ବେଶରେ କି ଲୁଟୁଛନ୍ତି ନିଶା ଦେଇ । ଏମିତି ଖବର ଭିତରେ ରାଜଧାନୀରେ ଏବେ ମାତିଛନ୍ତି ନିଶାଦିଆ ଲୁଟେରା । ନିଶା ଖୁଆଇ ଲୋକଙ୍କୁ କରୁଛନ୍ତି ଲୁଟ୍ ।

ଚା’ରେ ନିଶା ଦେଇ ଲୁଟି ନେଲେ ସୁନା ଚେନ, ସୁନା ମୁଦି ମୋବାଇଲ୍ ଓ ଟଙ୍କା । ଭୋରୁ ଭୋରୁ ରାଜଧାନୀରେ ଘଟିଛି ଘଟଣା । ଲୁଟର ଶିକାର ହୋଇଛନ୍ତି ବାଙ୍କୀ ବଇଦେଶ୍ବରର ରବି ନାରାୟଣ ମହାପାତ୍ର । ଗତକାଲି ଦିଲ୍ଲୀରୁ ପୁରୁଷୋତ୍ତମ ଏକ୍ସପ୍ରେସରେ ଆସି ଭୁବନେଶ୍ୱର ଷ୍ଟେସନରେ ସାଢ଼େ ୪ଟା ବେଳେ ଓହ୍ଲେଇ ଅଟୋରେ କଳିଙ୍ଗବିହାର ବାହାରି ଥିଲେ । ରାସ୍ତାରେ ଅଟୋରେ ଯିବା ବେଳେ ଲୁଟର ଶିକାର ହୋଇଥିବା କରିଛନ୍ତି । ଅଟୋ ଚାଳକ ଚା’ରେ ନିଶା ଦେଇ ସୁନା ମୁଦି, ୧୭ ହଜାର ଟଙ୍କା, ସୁନା ଚେନ, ମୋବାଇଲ୍ ଲୁଟି ନେଇଛନ୍ତି ।

ଲୁଟ ପରେ ତାଙ୍କୁ ମଧୁସୁଦନ ପାର୍କ ନିକଟରେ ଫିଙ୍ଗିଦେଇ ଚାଲି ଯାଇଥିଲା ଲୁଟେରା ଅଟୋ ଚାଳକ । ସକାଳୁ ପାର୍କକୁ ଆସୁଥିବା ଲୋକେ ଦେଖି ପିସିଆରକୁ ଖବର ଦେଇଥିଲେ । ରବି ବୁଲିବା ପାଇଁ ଦିଲ୍ଲୀ ଏକୁଟିଆ ଯାଇଥିଲେ । ଏବେ ତାଙ୍କୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇ ଚିକିତ୍ସା କରାଯାଉଛି । ଏୟାର ଫିଲ୍ଡ ଥାନା ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ କରୁଛି ।

ଅକ୍ଷରଧାମ ମନ୍ଦିରରେ ପତ୍ନୀ ଅକ୍ଷତାଙ୍କ ସହ ବ୍ରିଟେନ ପ୍ରଧାନମନ୍ତ୍ରୀ ଋଷି ସୁନକ

ନୂଆଦିଲ୍ଲୀ: ଜି-୨୦ ଶିଖର ସମ୍ମିଳନୀରେ ଭାରତ ଆସିଥିବା ବ୍ରିଟେନ ପ୍ରଧାନମନ୍ତ୍ରୀ ଋଷି ସୁନକ ପତ୍ନୀ ଅକ୍ଷତା ମୂର୍ତ୍ତିଙ୍କ ସହ ଅକ୍ଷରଧାମ ମନ୍ଦିର ଯାଇ ପ୍ରଭୁ ସ୍ବାମୀନାରାୟଣଙ୍କ ଦର୍ଶନ କରିଛନ୍ତି । ଠାକୁରଙ୍କ ଦର୍ଶନ ପରେ ପର୍ଯ୍ୟଟକ ଡାଏରୀରେ ଲେଖିଲେ ବିଶେଷ ବାର୍ତ୍ତା । ସେ ତାଙ୍କ ବାର୍ତ୍ତାରେ ଉଲ୍ଲେଖ କରିଛନ୍ତି, ‘ସବୁଧୈବ କୁଟୁମ୍ବକମ୍ ଭାବନାରେ ମନ୍ଦିର ସମିତି ଓ ଉପସ୍ଥିତ ଲୋକଙ୍କ ପାଇଁ ପ୍ରାର୍ଥନା କରୁଛି । ଜି-୨୦ ଶିଖର ସମ୍ମିଳନୀ ଦୁନିଆକୁ ଶାନ୍ତି, ଧାର୍ମିକ ସମୃଦ୍ଧି ଓ ସମନ୍ବୟ କ୍ଷେତ୍ରରେ କାମ କରିବାର ମାର୍ଗଦର୍ଶନ କରିବା ଏକ ଭଲ ପଦକ୍ଷେପ ।

ଏହି ଅବସରରେ ଅକ୍ଷତା ଏବଂ ସୁନକ ମନ୍ଦିରର ବାସ୍ତୁକଳାକୁ ପ୍ରଶଂସା କରିଥିଲେ । ଉଭୟ ନୀଳକଣ୍ଠ ବର୍ଣ୍ଣି ମହାରାଜଙ୍କ ମୂର୍ତ୍ତିରେ ଅଭିଷେକ କରି ବିଶ୍ବ ଶାନ୍ତି, ପ୍ରଗତୀ ଓ ସମୃଦ୍ଧି ପାଇଁ ପ୍ରାର୍ଥନା କରିଥିଲେ ।

ଦର୍ଶନ ପରେ ସ୍ବାମୀନାରାୟଣ ମନ୍ଦିରର ମୁଖ୍ୟ ସ୍ବାମୀ ଋଷି ସୁନକ ଏବଂ ଅକ୍ଷତାଙ୍କୁ ସ୍ବାଗତ କରିଥିଲେ । ପରେ ପୁରୋହିତମାନେ ମନ୍ତ୍ରାଚରଣ କରି ସୁନକ ଏବଂ ଅକ୍ଷତାଙ୍କ ହାତରେ ବ୍ରତ ବାନ୍ଧିଥିଲେ ।

୧୬ ନମ୍ବର ଜାତୀୟ ରାଜପଥରେ ମାତିଲେ ଲୁଟେରା

ଟାଙ୍ଗୀ : ୧୬ ନମ୍ବର ଜାତୀୟ ରାଜପଥରେ ମାତିଲେ ଲୁଟେରା । ରାସ୍ତା କଡ଼ରେ ପାର୍କିଂ ହୋଇଥିବା ଟ୍ୟାଙ୍କରରୁ ଲୁଟି ନେଲେ ଡିଜେଲ । ବିଳମ୍ବିତ ରାତିରେ ହୋଇଛି ଡିଜେଲ ତେଲ ଲୁଟ । ଖବର ପାଇ ଟାଙ୍ଗୀ ଥାନା ପୋଲିସ ଘଟଣା ସ୍ଥଳରେ ପହଁଚି ତଦନ୍ତ ଆରମ୍ଭ କରିଛି । ଗତ କାଲି ରାତିରେ କୋଲକତାରୁ ବିଶାଖାପାଟଣା ଯାଉଥିବା ଏକ ତେଲ ଟ୍ୟାଙ୍କର ଚାଳକ ଚଣ୍ଡେଶ୍ୱର ନିକଟରେ ଗାଡିକୁ ରାସ୍ତା କଡ଼ରେ ପାର୍କିଂ କରି ଶୋଇ ପଡ଼ିଥିଲେ। ସକାଳୁ ଉଠି ଗାଡି ଷ୍ଟାର୍ଟ ମାରିବା ବେଳକୁ ଗାଡି ଷ୍ଟାର୍ଟ ହୋଇନଥିଲା । ଗାଡ଼ିରୁ ଓହ୍ଲାଇ ଦେଖିବା ବେଳକୁ ଗାଡିରୁ ତେଲ ଚୋରୀ ହୋଇଥିବା ଦେଖିଥିଲେ ।  ଏନେଇ ଚାଳକ ଜଣଙ୍କ ଟାଙ୍ଗୀ ପୋଲିସରେ ଅଭିଯୋଗ ପରେ ପୋଲିସ ଘଟଣା ସ୍ଥଳରେ ପହଁଚି ତଦନ୍ତ ଆରମ୍ଭ କରୁଛି । ଜାତୀୟ ରାଜପଥରେ ପେଟ୍ରୋଲିଙ୍ଗ କଡାକଡି କରିବାକୁ ଚାଳକ ମାନେ ଦାବି କରିଛନ୍ତି ।

ପ୍ରକୃତିର ତାଣ୍ଡବ ପରେ ମୋରକ୍କୋରେ ବଢୁଛି ମୃତ୍ୟୁ ସଂଖ୍ୟା

ନନ୍ଦିଘୋଷ ବ୍ୟୁରୋ : ପ୍ରକୃତିର ତାଣ୍ଡବ ପରେ ମୋରକ୍କୋରେ ବଢୁଛି ମୃତ୍ୟୁ ସଂଖ୍ୟା  । ଦୁଇ ହଜାରେ ଟପିଲାଣି ମୃତ୍ୟୁ ସଂଖ୍ୟା  । ଏବେବି ଧ୍ବଂଶବିଧ୍ବଂସ ଘର ତଳୁ ମୃତଦେହ ଉଦ୍ଧାର ହେଉଛି  । ଶକ୍ତିଶାଳୀ ଭୂକମ୍ପରେ ମୋରକ୍କୋ ବିଧ୍ବସ୍ତ । ଆଗକୁ ଆହୁରି ମୃତ୍ୟୁସଂଖ୍ୟା ବଢ଼ିପାରେ ବୋଲି ଆଶଂକା କରାଯାଉଛି । ଶୁକ୍ରବାର ବିଳମ୍ବିତ ରାତ୍ରିରେ ହୋଇଥିବା ଭୂମିକମ୍ପର ରିକ୍ଟର ସ୍କେଲରେ ତୀବ୍ରତା 7.2 ଥିଲା । ଭୂମିକମ୍ପ ଯୋଗୁଁ ବଡ଼ ବଡ଼ କୋଠା ଭୁଶୁଡିପଡିଛି  । ଶହ ଶହ ଲୋକ ଆହତ ହୋଇଥିବା ସୂଚନା ମିଳିଛି ।  ଆଫ୍ରିକୀୟ ଦେଶ ମରକ୍କୋରେ ଭୂକମ୍ପ ଅନୁଭୂତ ହୋଇଥିବା ବେଳେ ଏହାର ଉତ୍ପତ୍ତି ସ୍ଥଳ ମରକ୍କୋରୁ ୭୦ କିଲୋମିଟର ଦୂରରେ ଥିଲା । ଭୂକମ୍ପ ଏତେ ତୀବ୍ର ଥିଲା ଯେ ପ୍ରାୟ ୩୫୦ କିଲୋମିଟର ଦୂର ମରକ୍କୋର ରାଜଧାନୀ ରବାତ୍ରେ ଏହା ଅନୁଭୂତ ହୋଇଛି ।Turkey-Syria earthquake: More than 4,300 dead after powerful quake hits  region | CNN

ଭାରତୀୟ ସମୟ ଅନୁସାରେ ଭୋର ୩ଟା ୪୧ରେ ଭୂମିକମ୍ପ ହୋଇଥିଲା । ୬୦ ବର୍ଷରେ ଉତ୍ତର ଆଫ୍ରିକାରେ ଏହା ସବୁଠାରୁ ବଡ଼ ଭୂକମ୍ପ । ଭୂକମ୍ପ ପରେ ଲୋକ ଆଉ ଘରେ ନାହାନ୍ତି, ରାସ୍ତା ଉପରେ ବସିଥିବା ଫଟୋ ସୋସିଆଲ ମିଡ଼ିଆରେ ଭାଇରାଲ ହେଉଛି । ଏପରି ଏକ ବିନାଶକାରୀ ଭୂକମ୍ପ ଚଳିତ ବର୍ଷ ଫେବ୍ରୁଆରୀ ୬ରେ ତୁର୍କୀରେ ହୋଇଥିଲା । ଯେଉଁଥିରେ ୪୫ହଜାରରୁ ଅଧିକ ଲୋକଙ୍କ ମୃତ୍ୟୁ ହୋଇଥିଲା ।

ଆଜି ଶ୍ରୀମନ୍ଦିରରେ ଶ୍ରୀଜିଉଙ୍କ କାଳୀୟଦଳନ ବେଶ ଓ ଧେନୁକାସୁର ବଧ

ପୁରୀ : ଆଜି ଭାଦ୍ରବ କୃଷ୍ଣ ପକ୍ଷ ଏକାଦଶୀ ତିଥିରେ ଶ୍ରୀମନ୍ଦିରରେ ଶ୍ରୀଜିଉଙ୍କ କାଳୀୟଦଳନ ବେଶ ଓ ଧେନୁକାସୁର ବଧ ପ୍ରସ୍ତାବ ଅନୁଷ୍ଠିତ ହେବ । ଗତକାଲି ମହାପ୍ରଭୁଙ୍କ ବଣଭୋଜି ବେଶ, କୋଳିବିକା, ବକାସୁର ଓ ଅର୍ଘାଶୁର ବଧ ନିତି ଅନୁଷ୍ଠିତ ହୋଇଥିଲା  । ମହାପ୍ରଭୁ ବାଳଗୋପାଳ ଓ ବଡ଼ଠାକୁର ବଳରାମ  ବେଶ ହୋଇଥିଲେ । ଆଜି  ଶ୍ରୀମନ୍ଦିରରେ ମଧ୍ୟାହ୍ନ ଧୂପ ବଢିବା ପରେ ମଦନମୋହନ ଓ ରାମକୃଷ୍ଣଙ୍କୁ ପୂଜାପଣ୍ଡା ସାମନ୍ତ ଆଜ୍ଞାମାଳ ବିଜେ କରାଇବା ପରେ ପୁଷ୍ପାଳକ ସେବକ ମାନେ ମହାପ୍ରଭୁଙ୍କୁ ଝୁଲଣ ମଣ୍ଡପ ନିକଟରେ ଥିବା ପାଲିଙ୍କିରେ ବିଜେ କରାଇବେ । ପରେ ଶ୍ରୀଜିଉମାନେ ଶ୍ରୀମନ୍ଦିର ବେଢା ପରିକ୍ରମା କରି ଲୋକନାଥ ରୋଡ଼ ସ୍ଥିତ ଲବଣୀଖିଆ ମଣ୍ଡପକୁ ବିଜେ କରିବେ । ସେଠାରେ  ବନ୍ଦାପନା, ଶୀତଳ ଭୋଗ ଇତ୍ୟାଦି ନୀତି ସମାପନ ପରେ ମାର୍କଣ୍ଡ ପୁଷ୍କରିଣୀରେ ମହାପ୍ରଭୁଙ୍କ କାଳୀୟଦଳନ ଲୀଳା ସମାପନ ହେବ । ପରେ ଶୀତଳ ଭୋଗ ଓ ବନ୍ଦାପନା ହୋଇ ମହାପ୍ରଭୁ ବାହୁଡା ବିଜେ କରିବା ପରେ ଜୟବିଜୟ ଦ୍ୱାରରେ ଏକାଦଶୀ ଭୋଗ ଓ ବନ୍ଦାପନା ନୀତି ବଢି ମହାପ୍ରଭୁ ଦକ୍ଷିଣୀ ଘରକୁ ବିଜେ କରାଯିବ । ସେହିପରି ଅନ୍ୟାନ୍ୟ ନୀତି ବଢିବା ପରେ ରତ୍ନ ସିଂହାସନ ଉପରେ ବିରାଜିତ ଶ୍ରୀଜଗନ୍ନାଥ ମହାପ୍ରଭୁଙ୍କୁ କାଳୀୟଦଳନ ବେଶରେ ସଜ୍ଜିତ କରାଯିବ |