ବାଲେଶ୍ୱର: ବାହାନଗା ଟ୍ରେନ ଦୁର୍ଘଟଣାରେ ଆଉ ଜଣଙ୍କ ମୃତ୍ୟୁ । ଚିକିତ୍ସାଧିନ ଅବସ୍ଥାରେ ଏସସିବିରେ ଆଉ ଜଣଙ୍କର ମୃତ୍ୟୁ ହୋଇଛି । ମୃତକ ହେଲେ ପଶ୍ଚିମବଙ୍ଗର ପଲଟୁ ନସ୍କାର । ସେ ସେଣ୍ଟ୍ରାଲ ଆଇସିୟୁରେ ଚିକିତ୍ସାଧୀନ ଥିଲେ । ଏହା ପୂର୍ବରୁ ଗତକାଲି ଟ୍ରମା ଆଇସିୟୁରେ ଚିକିତ୍ସାଧୀନ ଅବସ୍ଥାରେ ବିହାରର ସୋହେଲ ମନସୁରଙ୍କ ମୃତ୍ୟୁ ହୋଇଥିଲା । ବର୍ତ୍ତମାନ ଏସସିବିରେ ଆଉ ୪୫ ଆହତ ଚିକିତ୍ସାଧୀନ ଅଛନ୍ତି ।
ମାଛଧରି କୂଳକୁ ଫେରିବାବେଳେ ବୁଡିଗଲା ଭୁଟୁଭୁଟି, ଜଣେ ମତ୍ସ୍ୟଜୀବୀ ମୃତ
ବାଲେଶ୍ୱର: ବାଲେଶ୍ବର କଷାଫଳ ସମୁଦ୍ର ମୁହାଣରେ ଅଘଟଣ । ମାଛଧରି କୂଳକୁ ଫେରିବାବେଳେ ବୁଡିଗଲା ଭୁଟୁଭୁଟି । ଜଣେ ମତ୍ସ୍ୟଜୀବୀ ମୃତ । ମୃତକ ହେଲେ କାଳୀପଦ ମାନ୍ନା । ୬ ଜଣ ମତ୍ସ୍ୟଜୀବୀଙ୍କୁ ଉଦ୍ଧାର କରାଯାଇଛି । ଗତକାଲି ସମୁଦ୍ରକୁ ମାଛ ମାରିବାକୁ ଭୁଟୁଭୁଟିରେ ଯାଇଥିଲେ ୭ ଜଣ ମତ୍ସ୍ୟଜୀବୀ ।
ଆମେରିକା ବୈଦେଶିକ ମନ୍ତ୍ରୀ ଆଣ୍ଟୋନି ବ୍ଲିଙ୍କେନଙ୍କ ସରପ୍ରାଇଜ ବେଜିଂ ଭିଜିଟ୍
ନୂଆଦିଲ୍ଲୀ: ବହୁ ବାଦବିବାଦ ମଧ୍ୟରେ ଆମେରିକା ବୈଦେଶିକ ମନ୍ତ୍ରୀ ଆଣ୍ଟୋନି ବ୍ଲିଙ୍କେନଙ୍କ ଅଚାନକ ବେଜିଂ ଗସ୍ତ । ପ୍ରାୟ ୫ ବର୍ଷ ମଧ୍ୟରେ ଏହି ଗସ୍ତ ହେଉଛି ଆମେରିକାର କୌଣସି ତୁଙ୍ଗ ନେତାଙ୍କ କ୍ଷେତ୍ରରେ ପ୍ରଥମ । ତାଇଓ୍ବାନ ପ୍ରସଙ୍ଗରେ ଦୁଇ ଦେଶ ମଧ୍ୟରେ କୂଟନୈତିକ ଉତ୍ତେଜନା ଜାରି ରହିଥିବାବେଳେ ଉତ୍ତେଜନା ପ୍ରଶମନ ଲାଗି ଏହି ଗସ୍ତ ଉଦ୍ଦିଷ୍ଟ ଥିବା କୁହାଯାଇଛି । ଚୀନ ବୈଦେଶିକ ମନ୍ତ୍ରୀ କ୍ବିନ ଗାଙ୍ଗଙ୍କ ସହ ବ୍ଲିଙ୍କେନ ଆଲୋଚନା କରିବେ । ବିଶ୍ବର ଦୁଇ ସୁପରପାଓ୍ବାର ମଧ୍ୟରେ ଏହି ଆଲୋଚନା ପ୍ରତି ସାରା ବିଶ୍ବର ନଜର ରହିଛି । ତେବେ ବ୍ଲିଙ୍କେନଙ୍କ ଏହି ଦୁଇ ଦିନିଆ ଗସ୍ତ ପରିପ୍ରେକ୍ଷୀରେ ବାଣିଜ୍ୟ, ପ୍ରଯୁକ୍ତି, ଆଞ୍ଚଳିକ ନିରାପତ୍ତା ଆଦି ପ୍ରସଙ୍ଗରେ ଆଲୋଚନା ହେବା ଆଶା ରହିଛି ।
ଆସନ୍ତା ବର୍ଷ ଆମେରିକା ଓ ତାଇଓ୍ବାନରେ ନିର୍ବାଚନ ହେବାକୁ ଯାଉଥିବାବେଳେ ବ୍ଲିଙ୍କେନଙ୍କ ବେଜିଂ ଗସ୍ତ ଅନେକ ସମ୍ଭାବନା ସୃଷ୍ଟି କରୁଛି । ବାଲିରେ ଗତବର୍ଷ ନଭେମ୍ବରରେ ଜୋ ବାଇଡେନ ଓ ସି ଜିନପିଙ୍ଗଙ୍କ ମଧ୍ୟରେ ସକାରାତ୍ମକ ଆଲୋଚନା ହେବା ପରେ ଗତ ୪ ମାସ ତଳେ ବ୍ଲିଙ୍କେନ ବେଜିଂ ଗସ୍ତରେ ଯିବାର କାର୍ଯ୍ୟକ୍ରମ ଥିଲା । ମାତ୍ରା ତାହା ଅଚାନକ ବାତିଲ ହୋଇଥିଲା । ଆମେରିକା ମାଟିରେ ଚୀନର ସ୍ପାଏ ବେଲୁନ ଉଡିବାକୁ କେନ୍ଦ୍ର କରି ଏହି ଗସ୍ତ ବାତିଲ କରାଯାଇଥିଲା । ସେପଟେ ତାଇଓ୍ବାନ ନିକଟସ୍ଥ ଫିଲିପାଇନ୍ସ ଓ ଜାପାନରେ ସୈନ୍ୟ ମୁତୟନ ନେଇ ଆମେରିକା ଚୁକ୍ତି ସ୍ବାକ୍ଷର କରିଥିବାରୁ ଏହା ଚୀନ ଲାଗି କ୍ରୋଧର କାରଣ ହୋଇଛି ।
ରିଲିଜ ପରଠୁ ବିବାଦରେ ‘ଆଦିପୁରୁଷ’, ବଦଳିବ ଫିଲ୍ମର ଡାଇଲଗସ୍…
ନୂଆଦିଲ୍ଲୀ: ବଦଳିବ କି ଆଦିପୁରୁଷର ବିବାଦୀୟ ଡାଇଲଗସ୍ । ପ୍ରଭାସ ଓ କ୍ରିତି ସାନନ୍ ଙ୍କ ଅଭିନୀତ ଆଦିପୁରୁଷ ଜୁନ୍ ୧୬ରେ ରିଲିଜ୍ ହୋଇଥିଲା । ପ୍ରଥମ ଦିନରେ ୧୪୦ କୋଟି ଟଙ୍କା ଇନକମ୍ କରିଥିଲେ ବି ବିବାଦ ପିଛା ଛାଡୁନି । ଏହା ମଧ୍ୟରେ ଫିଲ୍ମର ଡାଇଲଗରେ ପରିବର୍ତ୍ତନ କରାଯିବା ନେଇ ସୂଚନା ଦେଇଛନ୍ତି ଫିଲ୍ମର ଲେଖକ ମନୋଜ ମୁନ୍ତଶିର ।
ଟ୍ୱିଟ୍ କରି ସେ କହିଛନ୍ତି, ୩ ଘଣ୍ଟାର ଫିଲ୍ମରେ ୩ ମିନିଟ୍ ର କିଛି ଲୋକଙ୍କ କଳ୍ପନା ବାହାରେ ଡାଇଲଗ୍ ଲେଖିଦେଇଥିବି । କିନ୍ତୁ ସେଥିପାଇଁ ମୋତେ ସନାତନ ବିରୋଧୀ କାହିଁକି କୁହାଯାଉଛି । ମୁଁ ପ୍ରଭୁ ଶ୍ରୀରାମଙ୍କ ପାଇଁ ‘ଜୟ ଶ୍ରୀରାମ’, ’ଶିବୋହମ’, ‘ରାମ ସିୟା ରାମ’ ମଧ୍ୟ ଲେଖିଛି କିନ୍ତୁ ସେଥିପ୍ରତି କାହାର ଧ୍ୟାନ ନାହିଁ ।
ତେବେ ଫିଲ୍ମକୁ ବ୍ୟାନ୍ କରିବା ପାଇଁ ଦିଲ୍ଲୀ ହାଇକୋର୍ଟରେ ଆବେଦନ କରାଯାଇଛି । ଯେଉଁଥିରେ ଫିଲ୍ମର ଅନେକ ସିନ୍, ଡାଇଲଗ୍ ଓ ଚରିତ୍ରକୁ ହଟାଇବା ଲାଗି ଦାବି କରାଯାଇଛି । ହିନ୍ଦୁ ସେନାର ରାଷ୍ଟ୍ରୀୟ ଅଧ୍ୟକ୍ଷ ବିଷ୍ଣୁ ଗୁପ୍ତାଙ୍କ ଆବେଦନ ପରେ ଦେଶର ବିଭିନ୍ନ ସ୍ଥାନରୁ ଲୋକେ ଏହାକୁ ବ୍ୟାନ୍ କରିବା ପାଇଁ ଦାବି କରାଯାଉଛି ।
ଖାଲି ଏତିକି ନୁହେଁ ଓମ୍ ରାଉତଙ୍କ ଏହି ଫିଲ୍ମକୁ ନେଇ ସୋସିଆଲ୍ ମିଡିଆରେ ମିମ୍ ଭାଇରାଲ୍ ହେଉଛି । କିଛି ଡାଇଲଗ୍, ମାତା ସୀତାଙ୍କୁ ଭାରତର ଝିଅ ଭାବେ ବର୍ଣ୍ଣନା କରିବା, ନେଗେଟିଭ୍ ରିଭ୍ୟୁ ଡିଲିଟ୍ ପାଇଁ ଟଙ୍କା ଅଫର୍ କରାଯାଉଥିବା ଭଳି କିଛି ଘଟଣାକୁ ନେଇ ବିବାଦ ଥମିବାର ନାଁ ନେଉନି ।
ତେବେ ପ୍ରଥମ ଦିନରେ ସାରା ଦେଶରେ ହିନ୍ଦୀ, ତେଲୁଗୁ, ତାମିଲ ସମେତ ୫ଟି ଭାଷାରେ ରିଲିଜ୍ ହୋଇଛି ବାହୁବଳୀ ଫେମ୍ ପ୍ରଭାସଙ୍କ ‘ଆଦିପୁରୁଷ’। ରିଲିଜ୍ ପୂର୍ବରୁ ହିଁ ରେକର୍ଡ ପରେ ରେକର୍ଡ କରି ଚାଲିଛି ସିନେମା। ପ୍ରଥମ ଦିନ ପାଇଁ ପାଖାପାଖି ୭ ଲକ୍ଷରୁ ଅଧିକ ମଲ୍ଟି ଫ୍ଲେକ୍ସ ଓ ଅଢ଼େଇ ଲକ୍ଷରୁ ଅଧିକ ସିଙ୍ଗେଲ ସ୍କ୍ରିନ୍ର ଟିକେଟ୍ ଆଡଭାନ୍ସ ବୁକିଂ ହୋଇଥିଲା। ଫିଲ୍ମଟି ଦେଶବ୍ୟାପୀ ୬୫୦୦ ସ୍କ୍ରିନ୍ସରେ ରିଲିଜ ହୋଇଛି ।
କଟକରେ ବଡ଼ ଧରଣର ସାଇବର ଠକେଇ, ୨୦ ଲକ୍ଷରୁ ଅଧିକ ଠକିନେଲେ ବିଦେଶୀ ଯୁବତୀ
କଟକ: କଟକରେ ବଡ଼ ଧରଣର ସାଇବର ଠକେଇ । ଜଣେ ସରକାରୀ ଅବସରପ୍ରାପ୍ତ ଅଧିକାରୀଙ୍କଠାରୁ ଠକିନେଲେ ୨୦ ଲକ୍ଷରୁ ଅଧିକ ଟଙ୍କା । ଜଣେ ବିଦେଶୀ ଯୁବତୀ ସରକାରୀ ଅବସରପ୍ରାପ୍ତ ଅଧିକାରୀଙ୍କଠାରୁ ୨୦ ଲକ୍ଷ ୬୧ ହଜାର ଠକିଛନ୍ତି । ଠକାମିର ଶିକାର ହେବା ପରେ ସରକାରୀ ଅଧିକାରୀ ଜଣକ ସାଇବର ଥାନାରେ ଅଭିଯୋଗ କରିଛନ୍ତି । ଅଭିଯୋଗ ପରେ ଅଧିକ ତଦନ୍ତ ଜାରି ରଖିଛି ସାଇବର ପୋଲିସ ।
ସାଉଥ-ଓ୍ବେଷ୍ଟ ଦିଲ୍ଲୀ ଆର.କେ ପୁରମରେ ଡବଲ ମର୍ଡର, ଘରେ ପଶି ଦୁଇ ଭଉଣୀଙ୍କୁ ଗୁଳିମାଡ଼
ନୂଆଦିଲ୍ଲୀ: ଅସୁରକ୍ଷିତ ରାଷ୍ଟ୍ରୀୟ ରାଜଧାନୀ । ଏକାଧିକ ଲୋମହର୍ଷକ ହତ୍ୟାକାଣ୍ଡ ପୂରା ଦେଶକୁ ସ୍ତବ୍ଧ କରିଦେଇଥିବା ବେଳେ ଏବେ ରାଜଧାନୀ ଛାତି ଉପରେ ଦୁଇ ମହିଳାଙ୍କୁ ଗୁଳି କରି ହତ୍ୟା ଘଟଣା ସୁରକ୍ଷା ବ୍ୟବସ୍ଥାକୁ ନେଇ ପ୍ରଶ୍ନବାଚୀ ସୃଷ୍ଟଇ କରିଛି । ସାଉଥ-ଓ୍ବେଷ୍ଟ ଦିଲ୍ଲୀରେ ଘରେ ପଶି ଦୁଇ ଭଉଣୀଙ୍କୁ ଗୁଳି କରି ହତ୍ୟା କରିଛନ୍ତି ଦୁର୍ବୃତ୍ତ । ଟଙ୍କା ନେଣଦେଣ ବିବାଦରୁ ହତ୍ୟା କରାଯାଇଥିବା ଜଣାପଡ଼ିଛି । ପୋଲିସ ଘଟଣାସ୍ଥଳରେ ପହଞ୍ଚି ଯାଞ୍ଚ ଚଳାଇଛି । ମୃତ ଦୁଇ ମହିଳାଙ୍କ ଭାଇଙ୍କ କହିବା ମୁତାବକ, କିଛି ଯୁବକ ତାଙ୍କୁ ଟଙ୍କା ମାଗିବାକୁ ଆସିଥିଲେ । ଯୁକ୍ତିତର୍କ ପରେ ସେମାନେ ଚାଲିଯାଇଥିଲେ । ହେଲେ କିଛି ସମୟ ପରେ ସେମାନେ ପୁଣି ଆସି ଗୁଳିମାଡ଼ କରିଥିଲେ । ଜଣଙ୍କ ଛାତିରେ ଗୁଳି ବାଜିଥିବା ବେଳେ ଅନ୍ୟଜଣଙ୍କ ପେଟରେ ଗୁଳି ବାଜିଛି । ଘଟଣାରେ ପୋଲିସ ଦୁଇ ଜଣଙ୍କୁ ଗିରଫ କରିଛି ।
ସେପଟେ ରାଜଧାନୀର ସୁରକ୍ଷା ବ୍ୟବସ୍ଥାକୁ ନେଇ ଉପ-ରାଜ୍ୟପାଳଙ୍କୁ ଘେରିଛନ୍ତି ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ । କେନ୍ଦ୍ର ସରକାରଙ୍କ ଅଧୀନରେ ଦିଲ୍ଲୀର ଆଇନଶୃଙ୍ଖଳା ଦାୟିତ୍ବ ରହିଥିବା ବେଳେ ସେମାନେ ସରକାର କବଜା କରିବାକୁ ଷଡ଼ଯନ୍ତ୍ର କରୁଛନ୍ତି । LGଙ୍କ ବଦଳରେ ଦିଲ୍ଲୀ ସରକାରଙ୍କ ଅଧୀନରେ ଦିଲ୍ଲୀର ସୁରକ୍ଷା ବ୍ୟବସ୍ଥା ଥିଲେ ଦିଲ୍ଲୀ ସବୁଠୁ ସୁରକ୍ଷିତ ସ୍ଥାନ ହୋଇଥାନ୍ତା ବୋଲି ଟୁଇଟ କରିଛନ୍ତି କେଜ୍ରିଓ୍ବାଲ ।
NDRF ତୃତୀୟ ବାଟାଲିୟନରେ ମାଙ୍କଡ଼ର ଉତ୍ପାତ, ୫ ଯବାନ ଆହତ
କଟକ: କଟକ ମୁଣ୍ଡଳୀ ଏନଡିଆରଏଫ୍ ତୃତୀୟ ବାଟାଲିଅନରେ ପାଗଳ ହନୁ ମାଙ୍କଡ଼ର ଉତ୍ପାତ । ୨ ଦିନ ହେବ ପାଗଳ ମାଙ୍କଡ଼ ଉତ୍ପାତ ମଚାଇଛି । ପାଗଳ ମାଙ୍କଡ ଆକ୍ରମଣରେ ୫ରୁ ଅଧିକ ଏନଡିଆରଏଫ୍ ଯବାନ ଆହତ । ସେମାନଙ୍କ ଚିକିତ୍ସା ଜାରି ରହିଛି । ଖବର ପାଇ ଡମପଡ଼ା ବନାଞ୍ଚଳ ଅଧିକାରୀ ପହଞ୍ଚି ମାଙ୍କଡକୁ ଧରିବା ପାଇଁ ଯନ୍ତା ବସାଇଥିଲେ ବି ମାଙ୍କଡଟିକୁ ଧରିବାରେ ସଫଳ ହୋଇନାହିଁନ୍ତି । ଯଦି ମାଙ୍କଡଟି ଜନ୍ତାରେ ନପଡ଼େ ତେବେ ମାଙ୍କଡ଼କୁ ଟ୍ରାଙ୍କୁଲାଇଜ କରାଯିବ ବୋଲି ଡମପଡା ବନାଞ୍ଚଳ ଅଧିକାରୀ ସୂଚନା ଦେଇଛନ୍ତି । ସେପଟେ ମାଙ୍କଡଟିକୁ ତୁରନ୍ତ ଧରାନଗଲେ ଆହୁରି ଯବାନ ଆହତ ହୋଇପାରନ୍ତି ବୋଲି ଆଶଙ୍କା କରାଯାଉଛି ।
ଗୁଜରାଟ ପରେ ରାଜସ୍ଥାନରେ ତାଣ୍ଡବ ରଚୁଛି ବାତ୍ୟା
ଜୟପୁର: ଗୁଜରାଟ ପରେ ରାଜସ୍ଥାନରେ ତାଣ୍ଡବ ରଚୁଛି ବାତ୍ୟା । ବିପର୍ଯ୍ୟୟ ପ୍ରଭାବରେ ଭୀଷଣ ବର୍ଷା ଜାରି ରହିଥିବା ବେଳେ ବାଡମେର ଜିଲ୍ଲାରେ ସର୍ବାଧିକ ବର୍ଷା ରେକର୍ଡ ହୋଇଛି । ରାଜସ୍ଥାନର ମରୁଭୂମିରେ ବନ୍ୟା ଭଳି ସ୍ଥିତି ଉପୁଜିଛି । ଆରବ ସାଗରରେ ସୃଷ୍ଟ ବାତ୍ୟା ବିପର୍ଯ୍ୟୟ ପ୍ରଭାବରେ ଆଜି ବି ବର୍ଷା ଜାରି ରହିଛି । ପାଣିପାଗ ବିଭାଗ ପକ୍ଷରୁ ବାଡମେର, ଜାଲୋର, ସିରୋହି ଜିଲ୍ଲା ପାଇଁ ରେଡ୍ ଅଲର୍ଟ ଜାରି କରାଯାଇଛି । ସେହିପରି ଉଦୟପୁର,ଜୟପୁର, ଦୋଶା, ଅଲଓ୍ବର, କୋଟା ଆଦି ଜିଲ୍ଲା ପାଇଁ ୟେଲୋ ଅଲର୍ଟ ଜାରି କରାଯାଇଛି । ଭୀଷଣ ବର୍ଷା ଓ ପବନ ଯୋଗୁଁ ବଡ ବଡ ଗଛ ଭାଙ୍ଗି ରାସ୍ତାରେ ପଡିଥିବାରୁ ଯାତାୟତ ବାଧାପ୍ରାପ୍ତ ହୋଇଛି । ବିଜୁଳି ଖୁଣ୍ଟ ଉପୁଡି ପଡିଥିବାରୁ ୫ ଶହରୁ ଅଧିକ ଗାଁ ଅନ୍ଧାରରେ ରହିଛି । ତଳିଆ ଅଞ୍ଚଳଗୁଡ଼ିରେ ବନ୍ୟା ପରିସ୍ଥିତି ସୃଷ୍ଟି ହୋଇଥିବା ବେଳେ ଏନଡିଆରଏଫ ଓ ସେନା ଯବାନମାନେ ଉଦ୍ଧାର କାର୍ଯ୍ୟରେ ନିୟୋଜିତ ହୋଇଛନ୍ତି । ଲୋକମାନଙ୍କ ଘରଭିତରେ ପାଣି ପଶିଯାଇଥିବା ବେଳେ ଅନେକ ଲୋକ ଛାତ ଉପରେ ଆଶ୍ରୟ ନେଇଛନ୍ତି । ସୋମବାର ଯାଏଁ ବର୍ଷା ଜାରି ରହିବ ବୋଲି ପୂର୍ବାନୁମାନ କରିଛି ପାଣିପାଗ ବିଭାଗ ।
ସେପଟେ ପାକିସ୍ତାନ ସୀମାବର୍ତ୍ତି ଅଂଚଳର ଗାଁ ଗୁଡିକରେ ଥିବା କଚ୍ଚା ଘର ଭାଙ୍ଗି ମାଟିରେ ମିଶିଯାଇଛି । ଯୁଦ୍ଧ କାଳୀନ ଭିତିରେ ଏନଡିଆରଏଫ, ଏସଡିଆରଏଫ ଟିମ୍ ଉଦ୍ଧାର କାମରେ ଲାଗିଥିଲେ ମଧ୍ୟ ମୁଶଳ ଧାରାରେ ବର୍ଷା ଓ ପବନର ବେଗ ଉଦ୍ଧାର କାର୍ଯ୍ୟରେ ବାଧକ ସାଜିଛି । ଅନ୍ୟପଟେ ଝଡତୋଫାନକୁ ଆଖିରେ ରଖି ୧୩ଟି ଟ୍ରେନକୁ ବାତିଲ କରି ଦିଆଯାଇଛି ।
ସାରା ରାଜ୍ୟରେ ନିଆଁ ବର୍ଷା, ଦିନ ୧୧.୩୦ ସୁଦ୍ଧା ୩ ସହରର ତାପମାତ୍ରା ୪୦ ପାର୍
ଭୁବନେଶ୍ୱର: ସାରା ରାଜ୍ୟରେ ନିଆଁ ବର୍ଷା । ୧୧.୩୦ ସୁଦ୍ଧା ୩ ସହରର ତାପମାତ୍ରା ୪୦ ପାର୍ । ୪୨.୬ ଡିଗ୍ରୀ ସହ ସମ୍ବଲପୁର ଓ ଝାରସୁଗୁଡ଼ା ସବୁଠୁ ଉତ୍ତପ୍ତ ସହର ପାଲଟିଛି । ହୀରାକୁଦରେ ୪୧.୮ ଡିଗ୍ରୀ ତାପମାତ୍ରା ରେକର୍ଡ ହୋଇଛି । ଭୁବନେଶ୍ୱରରେ ୩୯.୮ ଡିଗ୍ରୀ, କେନ୍ଦୁଝରରେ ୩୯ ଡିଗ୍ରୀ, ଚାନ୍ଦବାଲିରେ ୩୭.୬ ଡିଗ୍ରୀ, ବାଲେଶ୍ୱରରେ ୩୫ ଡିଗ୍ରୀ, ପୁରୀରେ ୩୪.୪ ଡିଗ୍ରୀ, ପାରାଦୀପରେ ୩୩.୮ ଡିଗ୍ରୀ ଓ ଗୋପାଳପୁରରେ ୩୩ ଡିଗ୍ରୀ ତାପମାତ୍ରା ରେକର୍ଡ ହୋଇଛି ।
ସେହିପରି ଗୋପାଳପୁରରେ ୭୯ ପ୍ରତିଶତ ଆର୍ଦ୍ରତା ରେକର୍ଡ ହୋଇଛି । ପୁରୀରେ ୭୬%, ଭୁବନେଶ୍ବରରେ କମିଛି ଗୁଳୁଗୁଳି । ଝାରସୁଗୁଡ଼଼ାରେ ସବୁଠୁ ଅଧିକ ତାତି ଥିବା ବେଳେ ୨୬ ପ୍ରତିଶତ ରହିଛି ଆର୍ଦ୍ରତା । ଆସନ୍ତା ୨୦ ତାରିଖ ପର୍ଯ୍ୟନ୍ତ ସିଭିୟର ହିଟଓ୍ବେଭ୍ ପାଇଁ ପଶ୍ଚିମ ଓଡ଼ିଶାକୁ ସତର୍କତା ଜାରି ହୋଇଥିବା ବେଳେ ୧୯ ତାରିଖ ପର୍ଯ୍ୟନ୍ତ ଉପକୂଳ ଓଡ଼ିଶାକୁ ଅରେଞ୍ଜ ଆଲର୍ଟ ଜାରି ହୋଇଛି । ଆଜି ୧୨ ଜିଲ୍ଲାରେ ସ୍ବାଭାବିକଠାରୁ ୬.୫ ଡିଗ୍ରୀରୁ ୧୦ ଡିଗ୍ରୀ ପର୍ଯ୍ୟନ୍ତ ତାପମାତ୍ରା ଅଧିକ ରହିବ ।
ପ୍ରକାଶ ପାଇଲା JEE ଆଡଭାନ୍ସ ୨୦୨୩ ପରୀକ୍ଷାଫଳ
ନୂଆଦିଲ୍ଲୀ: ପ୍ରକାଶ ପାଇଲା JEE ଆଡଭାନ୍ସ ୨୦୨୩ ଫଳ । ଉଭୟ ପ୍ରଥମ ଓ ଦ୍ବିତୀୟ ପେପରରେ ୧ ଲକ୍ଷ ୮୦ ହଜାର ୩୭୨ ଜଣ ପରୀକ୍ଷାର୍ଥୀ ପରୀକ୍ଷା ଦେଇଥିବାବେଳେ ଉତ୍ତୀର୍ଣ୍ଣ ହୋଇଛନ୍ତି ୪୩ ହଜାର ୩୭୩ ଜଣ । ଉତ୍ତୀର୍ଣ୍ଣ ଛାତ୍ରଛାତ୍ରୀଙ୍କ ମଧ୍ୟରେ ଛାତ୍ରୀଙ୍କ ସଂଖ୍ୟା ରହିଛି ୭ ହଜାର ୫୦୯ । କମନ ରାଙ୍କ ଲିଷ୍ଟରେ ଛାତ୍ର ବର୍ଗରେ IIT ହାଇଦ୍ରାବାଦ ଜୋନର ବବିଲାଲା ଚିଦବିଳାସ ରେଡ୍ଡୀ ଟପ୍ପର ହୋଇଛନ୍ତି । ସେ ୩୬୦ ମାର୍କରୁ ରଖିଛନ୍ତି ୩୪୧ ମାର୍କ । ଛାତ୍ରୀ ବର୍ଗରେ ଟପ୍ପର ହୋଇଛନ୍ତି IIT ହାଇଦ୍ରାବାଦ ଜୋନର ନ୍ୟାୟକାନ୍ତି ନାଗା ଭାଗ୍ୟ ଶ୍ରୀ । ସାଧାରଣ ବର୍ଗରେ ୩୯ ହଜାର ୧୭୬ ଜଣ ପରୀକ୍ଷା ଦେଇଥିବାବେଳେ ପାସ୍ କରିଛନ୍ତି ୧୩ ହଜାର ୮୨୮ । ଓବିସି ଏନସିଏଲ ବର୍ଗରେ ୬୬ ହଜାର ୬୧୨ ପରୀକ୍ଷାର୍ଥୀଙ୍କ ମଧ୍ୟରୁ ପାସ୍ କରିଛନ୍ତି ୯ ହଜାର ୨୯ । ସାଧାରଣ ଇଡବ୍ଲୁଏସ ବର୍ଗରେ ୩୦ ହଜାର ୩୪୮ ଜଣ ପରୀକ୍ଷାର୍ଥୀ ଥିବାବେଳେ ୫ ହଜାର ୩୬୩ ପାସ୍ କରିଛନ୍ତି ।