ସମ୍ବଲପୁର: ବାପା ତୁମେ ଥକିବନି, ବାପା ତୁମେ ଅସହାୟ ହୋଇ ରହିବନି । ତୁମେ ଚାଲିପାରୁନଥିଲେ କଣ ହେଲା  । ମୁଁ ତୁମ ପାଦ ସାଜିବି, ହାତ ଧରି ବାଟ ଚାଲିବି । ଯେଉଁଠିକୁ ଚାହିଁବ ସେଇଠିକୁ ନେଇଯିବି । ନା ବାଧାଦେବ ଏ ୪୫ ଡିଗ୍ରୀର ଡହଡହ ଖରା ନା ମୋର କୁନି ବୟସ । ପିତୃଦିବସ ଅବସରରେ ସମ୍ବଲପୁର ସାକ୍ଷୀପଡା ଅଞ୍ଚଳରୁ ସାମ୍ନାକୁ ଆସିଛି ବାପା-ଝିଅଙ୍କ ଭଲପାଇବାର ଏମିତି ଏକ ନିଚ୍ଛକ ଦୃଶ୍ୟ।

୪୫ ଡିଗ୍ରୀର ଡହଡହ ଖରାକୁ ଖାତିର ନକରି ବାପାଙ୍କୁ ଟ୍ରାଇସାଇକେଲରେ ଆଗେଇନେଉଛି କୁନି ଝିଅ। ଦିବ୍ୟାଙ୍ଗ ବାପାଙ୍କ ସାହାରା ସାଜି ଏ ସ୍ଥାନରୁ ସେ ସ୍ଥାନକୁ ନେଇଯାଉଛି । ଦର୍ଶକବନ୍ଧୁ ସମ୍ବଲପୁର ଏବେ ରାଜ୍ୟର ସବୁଠୁ ଉତ୍ତପ୍ତ ସହର । ଲଗାତାର ୪୫ଡିଗ୍ରୀ ଉପରେ ରହୁଛି ତାତି  । ଘରୁ ବାହାରିବାକୁ ବି ଡର ଲାଗୁଛି । ରାସ୍ତାଘାଟ ଖାଁ ଖାଁ ଥିବାବେଳେ ଅସହ୍ୟ ଖରାରେ ଝିଅଟି ବାପାଙ୍କୁ ଠେଲିଠେଲି ଆଗକୁ ନେଇଯାଉଛି । କାରଣ ସେ ଜାଣିଛି ଖରାର ଜ୍ବାଳାକୁ ଡରିଗଲେ ସଞ୍ଜକୁ ପେଟର ଜ୍ବାଳା ଡରାଇବ। ଖାସ ସେଇଥିପାଇଁ ମୁହଁରେ ଓଢଣାଟିଏ ଘୋଡ଼େଇ ହୋଇ ବାପାଙ୍କୁ ଆଗକୁ ନେଇଚାଲିଛି।

ଭୁବନେଶ୍ୱର: ନିଆଁ ବର୍ଷାରୁ ନିସ୍ତାର ନାହିଁ। ରାଜ୍ୟରେ ଆଜି ବି ଜାରି ରହିଛି ପ୍ରବଳ ଗ୍ରୀଷ୍ମ ପ୍ରବାହ। ଦିନ ସାଢେ ଦୁଇଟା ସୁଦ୍ଧା ରାଜ୍ୟର ସବୁଠୁ ଉତ୍ତପ୍ତ ସହର ହୋଇଛି ସମ୍ବଲପୁର। ସମ୍ବଲପୁରରରେ ୪୫.୪ ଡ଼ିଗ୍ରୀ ତାପମାତ୍ରା ରେକର୍ଡ ହୋଇଥିବାବେଳେ ହୀରାକୁଦରେ ୪୪.୨, ଭୁବନେଶ୍ବରରେ ୪୦, କେନ୍ଦୁଝରରେ ୩୯ , ଚାନ୍ଦବାଲିରେ ୩୬.୮ ଓ ବାଲେଶ୍ବରରେ ୩୪ ଡ଼ିଗ୍ରୀ ତାତି ରେକର୍ଡ ହୋଇଛି  ।

ଖରା ସହିତ ଆର୍ଦ୍ରତା ଅଧିକ କଲବଲ କରୁଛି  । ପୁରୀରେ ସର୍ବାଧିକ ୭୮ ପ୍ରତିଶତ ଆର୍ଦ୍ରତା ରେକର୍ଡ ହୋଇଥିବାବେଳେ ପାରାଦୀପରେ ୭୭ ପ୍ରତିଶତ, ଗୋପାଳପୁରରେ ୭୫ ପ୍ରତିଶତ ଆର୍ଦ୍ରତା ରେକର୍ଡ ହୋଇଛି  । ସେହିପରି ରାଜଧାନୀ ଭୁବନେଶ୍ବରରେ ୫୧ ପ୍ରତିଶତ ଆର୍ଦ୍ରତା ରେକର୍ଡ ହୋଇଛି । ଗତକାଲି ତୁଳନାରେ ଆଜି ଭୁବନେଶ୍ବରରେ ୧୮ ପ୍ରତିଶତ ଅଧିକ ଆର୍ଦ୍ରତା ରେକର୍ଡ ହୋଇଛି ।