ପୁରୀ: ସ୍ନାନଯାତ୍ରା ପରେ ଅଣସର ପିଣ୍ଡିରେ ମହାପ୍ରଭୁ । ଗୁପ୍ତ ଉପଚାର କରୁଛନ୍ତି ଦଇତାପତି ସେବାୟତ। ଅଲାରନାଥରେ ଅଣସରର ଚତୁର୍ଥ ଦିନରେ ଖିରିଭୋଗ ପାଇ ଶ୍ରଦ୍ଧାଳୁଙ୍କ ଭିଡ଼ ଲାଗିଛି। ୪ଟାରୁ ଦ୍ଵାର ଫିଟା , ମଙ୍ଗଳ ଆଳତି, ତଡ଼ପ ଲାଗି ହେବାପରେ ସକାଳ ୫ଟାରେ ଗୋପାଳ ବଲ୍ଲଭ ପରେ, ସର୍ବସାଧାରଣ ଦର୍ଶନ ଆରମ୍ଭ ହୋଇଛି।
ଭକ୍ତମାନେ ଶୃଙ୍ଖଳିତ ଭାବେ ମହାପ୍ରଭୁଙ୍କ ଅଣସର ବେଶକୁ ଦର୍ଶନ କରୁଛନ୍ତି। ଓଡ଼ିଶାର ବିଭିନ୍ନ ସ୍ଥାନରୁ ଭକ୍ତମାନେ ଆନନ୍ଦ ବଜାରରେ ଖିରି ଭୋଗ ପାଇ ଭିଡ ଲଗାଇଛନ୍ତି । ଅପରପକ୍ଷରେ ଶ୍ରୀମନ୍ଦିରର ଅଣସର ଗୃହରେ ଦଇତାପତି ସେବକଙ୍କ ଦ୍ଵାରା ଗୁପ୍ତ ନୀତି ଚାଲୁରହିଛି।
ରାୟଗଡା: କାଶୀପୁରରେ ହେବ ଡିଗ୍ରୀ କଲେଜ । ଖୁବଶୀଘ୍ର ଖୁସିଖବର ଦେବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ରାୟଗଡ଼ା ଗସ୍ତର ଦ୍ବିତୀୟ ଦିନରେ କାଶୀପୁରର ନବ ନିର୍ମିତ ସିଏଚସି ବୁଲି ଦେଖିବା ସହ ଏହି ବଡ଼ ଘୋଷଣା କରିଛନ୍ତି 5Tସଚିବ ଭି.କେ ପାଣ୍ଡିଆନ । ସିଏଚସି ନୂଆ ବିଲଡ଼ିଂରେ ଖର୍ଚ୍ଚ ହେଉଛି ୧୦କୋଟିରୁ ଅଧିକ ଟଙ୍କା । ବାକି ଥିବା ହାଇସ୍କୁଲ ରୂପାନ୍ତରଣ ଶୀଘ୍ର ହେବା ସହ ଯୁକ୍ତ ୨ କଲେଜ ବି ରୂପାନ୍ତରଣ ହେବ । ଜଳସେଚନ ଓ ପାନୀୟଜଳ ନେଇ ଥିବା ଦାବି ଖୁବଶୀଘ୍ର ପୂରଣ ହେବ । କାଶୀପୁରର ଘରେ ଘରେ ପହଞ୍ଚିବ ପାଣି, ଜଳସେଚିତ ହେବ ସବୁ କ୍ଷେତ ।
କେବଳ ସେତିକି ନୁହେଁ ବ୍ରହ୍ମପୁର-ଜୟପୁର ବିଜୁ ଏକ୍ସପ୍ରେସ ୱେ -୨ ନିର୍ମାଣ ଚାଲିଛି । ଉପକୃତ ହେବେ ରାୟଗଡ଼ା ଜିଲ୍ଲାବାସୀ । ରାୟଗଡ଼ାର ୧୨୦ କିଲୋମିଟରରୁ ଅଧିକ ରାସ୍ତା ତିଆରି ହେବ । କେବଳ ରାୟଗଡ଼ାରେ ରାସ୍ତା ପାଇଁ ୧୨ଶହ କୋଟି ଖର୍ଚ୍ଚ ହେବ ।
ମିଶନ ଶକ୍ତି ମା ମାନଙ୍କ ସହ କଥା ହେବା ସହ ବିଭିନ୍ନ ଦାବି ପତ୍ର ନେଇଛନ୍ତି ଭି.କେ ପାଣ୍ଡିଆନ । ଏମବିକେ, ସିଆରପି ଓ ବ୍ୟାଙ୍କ ମିତ୍ରଙ୍କ ଦରମା ବଢ଼ିବ ବୋଲି ଦେଇଛନ୍ତି ପ୍ରତିଶ୍ରୁତି । ସେହିପରି ଧାର୍ମିକ ଅନୁଷ୍ଠାନର ବିକାଶ ନେଇ ଥିବା ଦାବି ଉପରେ ଖୁବଶୀଘ୍ର ତର୍ଜମା କରି ଏକ ସପ୍ତାହରେ ମୁଖ୍ୟମନ୍ତ୍ରୀ ଖୁସିଖବର ଦେବେ ବୋଲି କହିଛନ୍ତି ଫାଇବ-ଟି ସଚିବ ଭି.କେ ପାଣ୍ଡିଆନ ।
ପାଟନା: ଆସନ୍ତା ୨୩ରେ ବିରୋଧୀଙ୍କ ମେଗା ସୋ । ପାଟନାରେ ହେବାକୁ ଥିବା ମହାମେଳିରେ ସାମିଲ ହେବେ କଂଗ୍ରେସ ନେତା ରାହୁଲ ଗାନ୍ଧୀ, ଏଆଇସିସି ସଭାପତି ମଲ୍ଲିକାର୍ଜୁନ ଖଡଗେଙ୍କ ସମେତ ବିଭିନ୍ନ ରାଜ୍ୟର ମୁଖ୍ୟମନ୍ତ୍ରୀ ଓ ଦଳୀୟ ମୁଖ୍ୟ । ମହାସମାବେଶରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ, ବିହାର ମୁଖ୍ୟମନ୍ତ୍ରୀ ନୀତୀଶ କୁମାର, ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ, ଉତ୍ତରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଅଖିଳେଶ ଯାଦବ ପ୍ରମୁଖ ସାମିଲ ହେବା ସମ୍ଭାବନା ରହିଛି ।
ସେହିପରି ଝାଡଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନ, ତାମିଲନାଡୁ ମୁଖ୍ୟମନ୍ତ୍ରୀ ଏମକେ ଷ୍ଟାଲିନ, ଜେଡିୟୁ ସଭାପତି ରାଜୀବ ରଞ୍ଜନ, ଶିବସେନା ନେତା ଉଦ୍ଧବ ଠାକରେ, ଏନସିପି ନେତା ଶରଦ ପାଓ୍ବାର ପ୍ରମୁଖ ଯୋଗଦେବା ଆଶା ରହିଛି । ଏହି ସମାବେଶରେ ଆସନ୍ତା ଲୋକସଭା ନିର୍ବାଚନରେ ଏକତ୍ର ଲଢେଇ କରିବା ଲାଗି ବ୍ଲୁପ୍ରିଣ୍ଟ ପ୍ରସ୍ତୁତ କରିବା ସମ୍ଭାବନା ରହିଛି । ଗତ କିଛି ଦିନ ଧରି ବିଜେପି ବିରୋଧରେ ମେଣ୍ଟକୁ ଶକ୍ତିଶାଳୀ କରିବା ଲାଗି ବିଭିନ୍ନ ନେତା ଘନ ଘନ ଉଦ୍ୟମ କରୁଥିବା ଦେଖାଯାଇଛି ।
ରାୟଗଡ଼ା: ଦୁଇ ଦିନିଆ ରାୟଗଡା ଗସ୍ତରେ 5T ସଚିବ ଭିକେ ପାଣ୍ଡିଆନ । ସକାଳୁ ସକାଳୁ ବିକାଶ କାମର ସମୀକ୍ଷା ପାଇଁ ବାହାରିଛନ୍ତି 5T ସଚିବ । ଆଉ କିଛି ସମୟ ପରେ କାଶିପୁର ନିୟୁ ସିଏଚସିରେ ପହଞ୍ଚି ବିକାଶ କାମର ଅନୁଧ୍ୟାନ କରିବେ । ନୂଆ ବିଲଡିଂ ନିର୍ମାଣ କାମର ଅନୁଧ୍ୟାନ କରିବେ 5T ସଚିବ । ପରେ ଖୁରିଗାମ ଗ୍ରାମପଞ୍ଚାୟତରେ ମିଶନ ଶକ୍ତି ମାଆମାନଙ୍କ ସହିତ ଆଲୋଚନା କରିବେ । ଏହାପରେ ବିଷମକଟକ ମିଶନ ଶକ୍ତି କାଫେ ପରିଦର୍ଶନ କରିବା ପରେ ଖଜୁରୀରେ ଗଡ଼ଗଡ଼ା ଜଳପ୍ରପାତ ନିକଟରେ ଇକୋ ଟୁରିଜିମର ଉନ୍ନତିକରଣ ସମ୍ପର୍କରେ ଆଲୋଚନା କରିବେ ।
ଚାଟିକୋଣା ଶିବ ମନ୍ଦିରର ଉନ୍ନତିକରଣ ନେଇ ଆଲୋଚନା କରିବେ । ଏହା ସହିତ ଡଙ୍ଗରିଆ କନ୍ଧ ଗ୍ରୁପ ସହିତ ଆଲୋଚନା କରିବା କାର୍ଯ୍ୟକ୍ରମ ରହିଛି । ପରେ ବିଷମକଟକ ବ୍ଲକ ଶିକ୍ଷା କାର୍ଯ୍ୟାଳୟରେ ଜନସାଧାରଣ ଓ ମିଶନ ଶକ୍ତି ସଦସ୍ୟାଙ୍କ ସହିତ ଆଲୋଚନା କରିବେ । ଏହାପରେ ପଦ୍ମପୁର ବ୍ଲକର ମାତାର୍ବମ ମନ୍ଦିରର ବିକାଶ ନେଇ ଆଲୋଚନା କରିବେ । ଖିଲାମୁଣ୍ଡାରେ କୃଷକଙ୍କ ସହିତ ଆଲୋଚନା କରିବେ ଫାଇଭ-ଟି ସଚିବ ।
ସେଠାରୁ ଗୁଣପୁରର ସେଫାଳି ହିଲରେ ପହଞ୍ଚି ରାମେଶ୍ବର ଶିବମନ୍ଦିରର ବିକାଶ ଓ ପର୍ଯ୍ୟଟନସ୍ଥଳୀର ବିକାଶ ନେଇ ଆଲୋଚନା କରିବେ । ଗୁଣପୁର ଇନଡୋର ଷ୍ଟାଡିୟମରେ ମିଶନ ଶକ୍ତି ସଦସ୍ୟ ଏବଂ ସାଧାରଣ ଲୋକଙ୍କ ସହିତ ଆଲୋଚନା କରି ସମସ୍ୟା ସମ୍ପର୍କରେ ଅବଗତ ହେବେ ଫାଇଭ-ଟି ସଚିବ ।
ବାଲେଶ୍ବର: ବାହାନଗା ଟ୍ରେନ୍ ଟ୍ରାଜେଡ଼ି ପରେ ଜାରି ରହିଛି ଶବ ଚିହ୍ନା । ବିଭିନ୍ନ ରାଜ୍ୟରୁ ସେମାନଙ୍କ ସମ୍ପର୍କୀୟ ଆସି ମୃତଦେହ ଚିହ୍ନଟ କରି ନେଉଛନ୍ତି । ଏବେସୁଦ୍ଧା ଭୁବନେଶ୍ବର ଏମ୍ସରେ ଥିବା ୧୯୩ ମୃତଦେହରୁ ୧୧୧ମୃତଦେହ ଚିହ୍ନଟ ସରିଛି । ସରକାର ନିଜ ଖର୍ଚ୍ଚରେ ପରିବାର ସହ ମୃତଦେହ ସେମାନଙ୍କ ଘରେ ପହଞ୍ଚାଉଛନ୍ତି । ଆଉ ୮୨ ମୃତଦେହ ରହିଛି ।
ଯାହାର ଚିହ୍ନଟ ପ୍ରକ୍ରିୟା ଜାରି ରହିଛି । ସେପଟେ କଟକ ଏସସିବିରେ ଏବେ ୧୧୯ଗୁରୁତରଙ୍କ ଚିକିତ୍ସା ଚାଲିଛି । ୮୨ ଜଣ ସୁସ୍ଥ ହୋଇ ଘରକୁ ଫେରିଥିବା ବେଳେ ୨୧ଜଣ ଆଇସିୟୁରେ ଅଛନ୍ତି । ମୋଟ୍ ୨୦୧ଆହତ ଏସସିବିରେ ଭର୍ତ୍ତି ହୋଇଥିଲେ ।
ଭୁବନେଶ୍ବର: ଆଜି ପ୍ରକାଶ ପାଇବ ଯୁକ୍ତ ଦୁଇ କଳା ପରୀକ୍ଷା ଫଳ । ଏହା ସହିତ ଧନ୍ଦାମୂଳକ ପରୀକ୍ଷା ଫଳ ମଧ୍ୟ ପ୍ରକାଶ ପାଇବ । ଅପରାହ୍ନ ୪ଟାରେ ରେଜଲ୍ଟ ବାହାରିବା ନେଇ ଉଚ୍ଚ ମାଧ୍ୟମିକ ଶିକ୍ଷା ପରିଷଦ ପକ୍ଷରୁ ସୂଚନା ମିଳିଛି । ଚଳିତବର୍ଷ କଳାରେ ୨ ଲକ୍ଷ ୨୯ ହଜାର ୧୧୦ ଛାତ୍ରଛାତ୍ରୀ ପରୀକ୍ଷା ଦେଇଛନ୍ତି । ସେହିପରି ଧନ୍ଦାମୂଳକରେ ୫ ହଜାର ଛାତ୍ରଛାତ୍ରୀ ପରୀକ୍ଷା ଦେଇଛନ୍ତି ।
ପୂର୍ବରୁ ଗତ ମେ ମାସ ୩୧ ତାରିଖ ଦିନ ପ୍ରକାଶ ପାଇଥିଲା ଯୁକ୍ତ ୨ ବିଜ୍ଞାନ ଓ ବାଣିଜ୍ୟର ଫଳାଫଳ । ଭୁବନେଶ୍ୱର ସିଏଚଏସଇ କାର୍ଯ୍ୟାଳୟ ପରିସରରେ ଗଣଶିକ୍ଷା ମନ୍ତ୍ରୀ ସୁଦାମ ମାର୍ଣ୍ଡି ଫଳାଫଳ ଘୋଷଣା କରିଥିଲେ । ବିଜ୍ଞାନ ଓ ବାଣିଜ୍ୟ ପରୀକ୍ଷାରେ ଆଗରେ ଛାତ୍ରୀ ଥିଲେ । ଆସନ୍ତା ବର୍ଷ ଠାରୁ ଯୁକ୍ତ ଦୁଇ ପରୀକ୍ଷାରେ ବ୍ୟାପକ ସଂସ୍କାର ଅଣାଯିବ ନେଇ ଲକ୍ଷ୍ୟ ରହିଛି । ଆସନ୍ତାବର୍ଷ ଏକସଙ୍ଗରେ କଳା, ବାଣିଜ୍ୟ, ବିଜ୍ଞାନ ଓ ଧନ୍ଦାମୂଳକ ରେଜଲ୍ଟ ପ୍ରକାଶ ନେଇ ସିଏଚ୍ଏସ୍ଇ ପ୍ରତିଶ୍ରୁତି ଦେଇଛି ।
ରାୟଗଡ଼ା: ୨ଦିନିଆ ରାୟଗଡ଼ା ଗସ୍ତରେ 5T ସଚିବ ଭିକେ ପାଣ୍ଡିଆନ । ପ୍ରଥମ ଦିନରେ ବିଭିନ୍ନ ଉନ୍ନୟନମୂଳକ ପ୍ରକଳ୍ପର କଲେ ସମୀକ୍ଷା । ସ୍କୁଲ, ମେଡିକାଲ, ମନ୍ଦିର, ଖେଳ ପଡ଼ିଆ ଭଳି ସ୍ଥାନ ପରିଦର୍ଶନ କରି ସମସ୍ୟା ବୁଝିଥିଲେ । ସାଧାରଣ ଲୋକଙ୍କୁ ଭେଟି ସେମାନଙ୍କ ସମସ୍ୟା ନେଇ ଅବଗତ ହୋଇଥିଲେ । ଶ୍ରେଣୀଗୃହ ଶିକ୍ଷା, ଶିକ୍ଷାର ମାନ ନେଇ ପିଲାଙ୍କ ସହ ଆଲୋଚନା । ଆଜିର ଗସ୍ତ ସମୟରେ 5T ସଚିବ ଭିକେ ପାଣ୍ଡିଆନ ୪ଟି ବଡ଼ ଘୋଷଣା କରିଛନ୍ତି । ସବୁ ସ୍କୁଲ ଓ କଲେଜର ଭିତ୍ତିଭୂମି ନେଇ ରିପୋର୍ଟ ଦେବାକୁ ନିର୍ଦ୍ଦେଶ ଦେଇଛନ୍ତି ।
5T ଉପକ୍ରମରେ ୬ ମାସ ମଧ୍ୟରେ ଜିଲ୍ଲାର ସବୁ ସ୍କୁଲ ଓ କଲେଜର ଉନ୍ନତୀକରଣ ହେବ । ସ୍କୁଲ ଓ କଲେଜ ଉନ୍ନତିକରଣ ପାଇଁ ୧୪.୫୦ କୋଟି ଟଙ୍କା ମଞ୍ଜୁର ହୋଇଛି ବୋଲି କହିଛନ୍ତି । ମା ମଝିଘରିଆଣୀ ମନ୍ଦିର ପାଇଁ ରେଳବାଇ ସହିତ ଜମି ପ୍ରିମିୟମ ଛାଡ଼କୁ ଖୁବଶୀଘ୍ର ଅନୁମୋଦନ କରାଯିବ ବୋଲି ସେ କହିଛନ୍ତି । ରାୟଗଡ଼ାଠାରେ ମା ମଝିଘରିଆଣୀ ମନ୍ଦିରର ସୌନ୍ଦର୍ଯକରଣ ପାଇଁ ଡିପିଆର୍ ଏକ ମାସ ମଧ୍ୟରେ ଦାଖଲ ଏବଂ ୬ ମାସ ମଧ୍ୟରେ ମନ୍ଦିର କାମ ନିର୍ମାଣ ହେବ ବୋଲି 5T ସଚିବ ଘୋଷଣା କରିଛନ୍ତି । ଏହା ବ୍ୟତୀତ ମୁଖ୍ୟ ଚିକିତ୍ସାଳୟ ପରିଦର୍ଶନ କରି ରୋଗୀ ଓ ଡାକ୍ତରଙ୍କ ସହ ଆଲୋଚନା କରିଛନ୍ତି ।
ଆମ ହସ୍ପିଟାଲ ଯୋଜନାରେ ବିକଶିତ ହେବ ଜିଲ୍ଲା ମୁଖ୍ୟ ଚିକିତ୍ସାଳୟ । ୨୦୧୯ରୁ ଜିଲ୍ଲା ଚିକିତ୍ସାଳୟ କାୟାକଳ୍ପ ପୁରସ୍କାର ପାଇ ଆସୁଛି । ଡାକ୍ତରଖାନାର ଶିଶୁରୋଗ ବିଭାଗ ମୁସ୍କାନ ପ୍ରମାଣପତ୍ର ପାଉଛି । ଏହି ସଫଳତା ପାଇଁ ମେଡିକାଲ ଟିମକୁ ଅଭିନନ୍ଦନ ଜଣାଇଛନ୍ତି ସଚିବ । ହସ୍ପିଟାଲରେ ନିୟୋଜିତ ମା ମଙ୍ଗଳା ମିଶନ ଶକ୍ତି ଗୋଷ୍ଠୀ ସହ କଥାହେଲେ । ପ୍ରସିଦ୍ଧ ମା ମଝିଘରିଆଣୀ ମନ୍ଦିରର ହେବ ରୂପାନ୍ତରଣ । ମନ୍ଦିର କମିଟି ସଦସ୍ୟ ଓ ସେବାୟତଙ୍କ ସହ ଆଲୋଚନା କଲେ । ନବ ନିର୍ମିତ ବିଜୁ ପଟ୍ଟନାୟକ ଅଡିଟୋରିୟମ ପରିଦର୍ଶନ କରିଥିଲେ । ଜିଲ୍ଲାରେ କ୍ରୀଡ଼ାର ବିକାଶ ପାଇଁ କ୍ରୀଡ଼ାବିତଙ୍କ ସହ କଲେ ଆଲୋଚନା । ଇନଡୋର ଷ୍ଟାଡିୟମ କାମ ସମ୍ପୂର୍ଣ୍ଣ, ଖୁବଶୀଘ୍ର ଏହାର ଲୋକାର୍ପଣ ହେବ ବୋଲି ସୂଚନା ଦେଇଛନ୍ତି 5T ସଚିବ ।
ଭୁବନେଶ୍ୱର: ରାଜ୍ୟସରକାରଙ୍କ ଫ୍ଲାଗସିପ ଯୋଜନା ମୁକ୍ତା ଯୋଜନାରେ ୨୦୨୩-୨୪ପାଇଁ ଅର୍ଥ ମଞ୍ଜୁର କଲେ ମୁଖ୍ୟମନ୍ତ୍ରୀ । ୪୨୩.୮୭କୋଟି ମଞ୍ଜୁର କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ୧୦ଜିଲ୍ଲାର ୩୭ସ୍ଥାନୀୟ ସଂସ୍ଥାକୁ ୪୨୩.୮୭କୋଟି ଟଙ୍କା ମଞ୍ଜୁର କରାଯାଇଛି । ଦୁଇଟି ପର୍ଯ୍ୟାୟରେ ୩୦ଟି ଜିଲ୍ଲା ପରିସରଭୁକ୍ତ କରାଯିବ । ପ୍ରଥମ ପର୍ଯ୍ୟାୟରେ ୧୦ଟି ଜିଲ୍ଲାକୁ ଅନ୍ତର୍ଭୁକ୍ତ କରାଯାଇଛି । ମୟୂରଭଞ୍ଜ, ବାଲେଶ୍ୱର, ଯାଜପୁର, ଜଗତସିଂହପୁର, ପୁରୀ, ଭଦ୍ରକ, କେନ୍ଦ୍ରାପଡା, କଟକ, ଖୋର୍ଦ୍ଧାର ୩୭ ULBକୁ ଅର୍ଥ ମଞ୍ଜୁର କରାଯାଇଛି । ଗତ ଦୁଇ ତାରିଖରେ ୧୦ଜିଲ୍ଲାର ୩୭ ULBଙ୍କ ସହ କଥା ହୋଇଥିଲେ 5T ସଚିବ ଭିକେ ପାଣ୍ଡିଆନ । ମୁକ୍ତା ଯୋଜନାରେ ସହରାଞ୍ଚଳର ବିକାଶ ପାଇଁ କରିଥିଲେ ଆଲୋଚନା । ସହରରେ ମିନି ପାର୍କ, ଜଳବାୟୁ, ଖେଳ ପଡିଆ, ପିଲାଙ୍କ ପାର୍କ, ଓ୍ୱାକିଂ ଟ୍ରାକ୍, ଭେଣ୍ଡିଂଜୋନ ଆଦି ସାର୍ବଜନୀନ ଉପଯୋଗୀ କାର୍ଯ୍ୟ ହେବ । ଯୋଜନାର ସମସ୍ତ ପ୍ରକଳ୍ପ ମିଶନ ଶକ୍ତି ଦ୍ୱାରା କାର୍ଯ୍ୟକାରୀ ହେବ ।
ବାଲେଶ୍ୱର: ଦୁର୍ଘଟଣା ପରେ ଟ୍ରାକରେ ପ୍ରଥମ ଥର ପାଇଁ ଅପ୍ ଲାଇନରେ ଗଡିଲା କରମଣ୍ଡଳ ଏକ୍ସପ୍ରେସ । ବାଲେଶ୍ବର ରେଳ ଷ୍ଟେସନ ଅତିକ୍ରମ କରିଛି କରମଣ୍ଡଳ ଏକ୍ସପ୍ରେସ । ଭୟ ମିଶା ମନରେ ଟ୍ରେନରେ ବସିଛନ୍ତି ଯାତ୍ରୀ । ବାହାନଗା ଦୁର୍ଘଟଣାର ବିକଳ ଚିତ୍ର ମନରୁ ଲିଭିନି । ବାହାନଗା ବଜାର ଷ୍ଟେସନ ନିକଟରେ ଗତ ଜୁନ୍ ୨ରେ ମର୍ମନ୍ତୁଦ ରେଳ ଦୁର୍ଘଟଣା ଘଟିଥିଲା । ସମାନ ଟ୍ରାକରେ ଗଡ଼ିଛି କରମଣ୍ଡଳ ଏକ୍ସପ୍ରେସ୍ । ଟ୍ରାକରେ ଟ୍ରେନ୍ ଚାଲିଥିବା ବେଳେ କାମ ମଧ୍ୟ ଜୋରସୋରରେ ଜାରି ରହିଛି । ଉଭୟ ଅପ୍ ଓ ଡାଉନରେ ଅନେକ ଟ୍ରେନ୍ ବାହାନଗା ଦେଇ ଯାଇଛି । ସେହିପରି ଟ୍ରାକରେ କାମ ଚାଲିଥିବାରୁ ସ୍ପିଡ୍ ଲିମିଟ୍ କମ୍ ରଖାଯାଇଛି ।
ଭୁବନେଶ୍ୱର: ବାପାମାଆ ଛେଉଣ୍ଡ ୩ ଶିଶୁଙ୍କ ଦୁଃଖ ବୁଝିଲେ 5T ସଚିବ । ଟୁଇଟ୍ ଦେଖି ଅନାଥଙ୍କ ପାଇଁ ସୁବିଧାସୁଯୋଗ ଯୋଗାଇଦେବାକୁ ଦେଲେ ନିର୍ଦ୍ଦେଶ । ଯାଜପୁର ଜିଲ୍ଲା ଦାନଗଦି ବ୍ଲକ ଓସ୍ତପାଳ ଗାଁର ତିନି ଭାଇଭଉଣୀଙ୍କ ଦୁଃଖ ବୁଝିଛନ୍ତି 5T ସଚିବ ଭିକେ ପାଣ୍ଡିଆନ । ଗତବର୍ଷ ମେ ମାସରେ ସଡ଼କ ଦୁର୍ଘଟଣାରେ ପ୍ରମୋଦ ନାଥଙ୍କର ମୃତ୍ୟୁ ହୋଇଥିଲା । ବର୍ଷେ ପରେ ସ୍ତ୍ରୀ ସୁଜତା ନାଥଙ୍କର ମଧ୍ୟ ଦେହାନ୍ତ ହୋଇଥିଲା । ଏହାପରେ ଅନାଥ ହୋଇପଡ଼ିଥିଲେ ୩ ସନ୍ତାନ । ଏନେଇ ଜଣେ ବ୍ୟକ୍ତିଙ୍କ ଟୁଇଟ ଦେଖି ତୁରନ୍ତ ସହାୟତା ଯୋଗାଇଦେବାକୁ ଜିଲ୍ଲା ପ୍ରଶାସନକୁ ନିର୍ଦ୍ଦେଶ ଦେଇଥିଲେ 5T ସଚିବ ।
5T ସଚିବଙ୍କ ନିର୍ଦ୍ଦେଶରେ ଜିଲ୍ଲା ପ୍ରଶାସନର ଏକ ଟିମ୍ ପିଲାମାନଙ୍କ ନିକଟରେ ପହଞ୍ଚି ମାଆଙ୍କ ଶୁଦ୍ଧିକ୍ରିୟା ପାଇଁ ହରିଶ୍ଚନ୍ଦ୍ର ଯୋଜନାରେ ୩ ହଜାର ଟଙ୍କାର ଆର୍ଥିକ ସହାୟତା ପ୍ରଦାନ କରିବା ସହ ରେଡକ୍ରସ ପାଣ୍ଠିରୁ ୨୦ ହଜାର ଟଙ୍କା ପ୍ରଦାନ କରାଯାଇଛି । ୩ ଶିଶୁଙ୍କୁ ମାଗଣାରେ ମାଗଣାରେ ଶିକ୍ଷା ସହିତ ରାସନ କାର୍ଡ ଏବଂ ବିଜୁ ଶିଶୁ କଲ୍ୟାଣ ଯୋଜନାରେ ଅନ୍ତର୍ଭୁକ୍ତ କରାଯାଇଛି । ବିଏସକେଓ୍ବାରେ ଓ ମିଶନ ବାତ୍ସଲ୍ୟରେ ସେମାନଙ୍କୁ ଅନ୍ତର୍ଭୁକ୍ତ କରାଯାଇଛି । ପିଲାମାନଙ୍କ ଭବିଷ୍ୟତକୁ ଦୃଷ୍ଟିରେ ରଖି ଏଭଳି ପଦକ୍ଷେପ ନେଇଥିବାରୁ 5T ସଚିବଙ୍କୁ ସମସ୍ତେ କୃତଜ୍ଞତା ଜଣାଇଛନ୍ତି ।
