ଭୁବନେଶ୍ୱର: ବିଜେଡିର କେନ୍ଦ୍ର ବିରୋଧୀ ପ୍ରତିବାଦକୁ କାଉଣ୍ଟର କରିବାକୁ ବିଜେପି କରିଛି ଗେମ୍ ପ୍ଲାନ୍ । ଆଜି ବିଜେପି ଯୁବ ମୋର୍ଚ୍ଚା ପକ୍ଷରୁ ବିଧାନସଭା ଘେରାଉ ଡାକରା ଦିଆଯାଇଛି । ଏହି ଘେରାଉ ସମୟରେ ବିଜେପି କର୍ମୀ ଜାଣିଶୁଣି ପୋଲିସ ଉପରେ ଆକ୍ରମଣ କରିବାକୁ ଚକ୍ରାନ୍ତ କରୁଥିବା ଅଭିଯୋଗ ହୋଇଛି । ପୋଲିସ ଉପରେ ଆକ୍ରମଣ କରିବା ସହ ପୋଲିସକୁ କାର୍ଯ୍ୟାନୁଷ୍ଠାନ ନେବାକୁ ବାଧ୍ୟ କରିବେ ବିଜେପିର କିଛି ବିଶୃଙ୍ଖଳିତ କର୍ମୀ । ପୋଲିସ କାର୍ଯାନୁଷ୍ଠାନ ନେଲେ ପୋଲିସ ବିରୋଧରେ ନାରାବାଜି କରିବାକୁ ତୟାର ହେଉଛନ୍ତି ବିଜେପି ଯୁବମୋର୍ଚ୍ଚା କର୍ମୀ ।
ପଥରରେ ଛେଚି ଯୁବକଙ୍କୁ ହତ୍ୟା ସନ୍ଦେହ
କେନ୍ଦୁଝର: ପଥରରେ ଛେଚି ଯୁବକଙ୍କୁ ହତ୍ୟା ସନ୍ଦେହ । କେନ୍ଦୁଝର ଜିଲ୍ଲା ସଦର ଥାନା ବାଂଶପାଳ ଆମୁଣି ଗାଁ ନିକଟରେ ଯୁବକଙ୍କୁ କେହି ଦୁର୍ବୃତ୍ତ ପଥରରେ ଛେଚି ହତ୍ୟା କରିଥିବା ସନ୍ଦେହ କରାଯାଉଛି । ମୃତକ ହେଲେ ଫୁଲଝର ଗାଁର ତରଣୀସେନ ମଣ୍ଡଳ । ଆଜି ସକାଳେ ରାସ୍ତାକଡ଼ରେ ମୃତଦେହ ପଡ଼ିଥିବା ଦେଖି ଲୋକେ ପୋଲିସକୁ ଖବର ଦେଇଥିଲେ । ମୃତ ତରଣୀସେନଙ୍କ ମୁଣ୍ଡରେ ଗଭୀର ଆଘାତ ଲାଗିଥିବା ଦେଖିବାକୁ ମିଳିଛି । ନିକଟରେ ଏକ ପଥର ମଧ୍ୟ ପଡ଼ିଛି । ଯୁବକଙ୍କୁ କେହି ପଥରରେ ଛେଚି ହତ୍ୟା କରିଥିବା ସନ୍ଦେହ କରାଯାଉଛି । ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
ପ୍ରତିଶୋଧ ନେଲେ ସୁରକ୍ଷା କର୍ମୀ, ପୁଲୱାମାରେ ଜଣେ ଆତଙ୍କବାଦୀକୁ କଲେ ନିପାତ
ଶ୍ରୀନଗର: ପ୍ରତିଶୋଧ ନେଲେ ଜମ୍ମୁ ସୁରକ୍ଷା କର୍ମୀ । ପୁଲୱାମାରେ ଜଣେ ଆତଙ୍କବାଦୀକୁ ନିପାତ କରିଛନ୍ତି ଯବାନ । ରବିବାର ଆତଙ୍କବାଦୀ ଜଣେ କାଶ୍ମୀର ପଣ୍ଡିତଙ୍କୁ ମାରି ଦେଇଥିଲେ । ଦିନକ ପରେ ସୁରକ୍ଷା କର୍ମୀ ଜଣେ ଆତଙ୍କବାଦୀକୁ ଏନକାଉଣ୍ଟର କରିଛନ୍ତି । ଆଜି ପୁଲୱାମା ଅବନ୍ତିପୁରା ଅଞ୍ଚଳରେ ମୁହାଁମୁହିଁ ହୋଇଥିଲେ ଯବାନ ଓ ଆତଙ୍କବାଦୀ । ଏବେବି ପୁରା ଅଞ୍ଚଳରେ କୁମ୍ବିଂ ଅପରେସନ ଜାରି ରହିଛି ।
ରବିବାର ସଞ୍ଜୟ ଶର୍ମା ନାମକ ଜଣେ କାଶ୍ମୀର ପଣ୍ଡିତ ଡେଲି ମାର୍କେଟ ଯାଉଥିବା ବେଳେ ଟାର୍ଗେଟ୍ କରିଥିଲେ ଆତଙ୍କୀ । ଗୁଳିମାଡ଼ରେ ଗୁରୁତର ସଞ୍ଜୟଙ୍କୁ ମେଡିକାଲରେ ଭର୍ତ୍ତି କରାଯାଇଥିଲା । କିନ୍ତୁ ସେଠାରେ ତାଙ୍କ ମୃତ୍ୟୁ ହୋଇଥିଲା ।
ଆଫଗାନିସ୍ତାନ ଓ ତାଜିକିସ୍ତାନରେ ଭୂମିକମ୍ପ ଝଟକା
ନୂଆଦିଲ୍ଲୀ: ପୁଣି ଭୂକମ୍ପ ଝଟକା । ଆଫଗାନିସ୍ତାନ ଓ ତାଜିକିସ୍ତାନରେ ଭୂମିକମ୍ପ ଅନୁଭୂତ ହୋଇଛି । ଆଫଗାନିସ୍ତାନରେ ହୋଇଥିବା ଭୂକମ୍ପର ରିକ୍ଟର ସ୍କେଲରେ ତୀବ୍ରତା ରହିଛି ୪.୧ । ସେହିପରି ତାଜିକିସ୍ତାନରେ ଭୂକମ୍ପ ରିକ୍ଟର ସ୍କେଲରେ ତୀବ୍ରତା ୪.୩ ଥିବା ରେକର୍ଡ ହୋଇଛି । ଏନେଇ ଜାତୀୟ ଭୂକମ୍ପ ବିଜ୍ଞାନ କେନ୍ଦ୍ର ପକ୍ଷରୁ ମିଳିଛି ସୂଚନା । ଭୂକମ୍ପ ଅନୁଭୂତ ହେବା ପରେ ତୁରନ୍ତ ଘରୁ ବାହାରି ଆସିଥିଲେ ଲୋକ । ଏବେସୁଦ୍ଧା କୌଣସି କ୍ଷୟକ୍ଷତି ନେଇ ସ୍ପଷ୍ଟ ସୂଚନା ମିଳିନି ।
ରାଜ୍ୟରେ ଉପରମୁହାଁ ପାରଦ, ଆଗାମୀ ଦିନରେ ଆହୁରି ବଢ଼ିବ ତାପମାତ୍ରା
ଭୁବନେଶ୍ୱର: ରାଜ୍ୟରେ ଉପରମୁହାଁ ପାରଦ । ଆସନ୍ତା ୪ ରୁ ୫ ଦିନ ମଧ୍ୟରେ ଆହୁରି ବଢିବ ତାପମାତ୍ରା । ସ୍ବାଭାବିକ ଠାରୁ ୨ ରୁ ୩ ଡିଗ୍ରୀ ପର୍ଯ୍ୟନ୍ତ ତାପମାତ୍ରା ବୃଦ୍ଧି ହେବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ଉପକୂଳ ସମେତ ଆଭ୍ୟନ୍ତରୀଣ ଓଡ଼ିଶାରେ ତାପମାତ୍ରା ବଢିବ । ମେଘ ମୁକ୍ତ ଆକାଶ ସହ ସାମୁଦ୍ରିକ ବାୟୁ ପ୍ରବାହ କମିବ । ଫଳରେ କିଛି ସ୍ଥାନରେ ୩୮ ରୁ ୪୦ ଡିଗ୍ରୀ ତାପମାତ୍ରା ଛୁଇଁପାରେ ବୋଲି ଆକଳନ କରାଯାଇଛି । ରାଜଧାନୀ ଭୁବନେଶ୍ବର ସମେତ ମାଲକାନଗିରି, ଅନୁଗୁଳ, ତାଳଚେର, ଢେଙ୍କାନାଳ, ସୋନପୁର, ବୌଦ୍ଧ, ଟିଟିଲାଗଡ଼, ବଲାଙ୍ଗିର, କେନ୍ଦୁଝର, ଝାରସୁଗୁଡ଼ା, ସମ୍ବଲପୁରରେ ସ୍ବାଭାବିକ ଠାରୁ ଯଥେଷ୍ଟ ଅଧିକ ପାରଦ ରହିବ ।
ମାର୍ଚ୍ଚ ମାସ ଦ୍ବିତୀୟ ସପ୍ତାହ ବେଳକୁ ରାଜ୍ୟରେ ସ୍ଥିତି ସଂଗୀନ ହୋଇପାରେ । ଚଳିତ ମାସରେ ଭୁବନେଶ୍ବର ଦେଶର ପଞ୍ଚମ ସର୍ବାଧିକ ତାପମାତ୍ରାରେ ରେକର୍ଡ କରିଥିବା ବେଳେ ସୋନପୁର ଦ୍ବିତୀୟ ସର୍ବାଧିକ ତାପମାତ୍ରା ରେକର୍ଡ ହୋଇଛି । ଆଇଏମଡିର ସୂଚନା ଅନୁସାରେ ଚଳିତ ବର୍ଷ ରାଜ୍ୟରେ ସ୍ବାଭାବିକ ଠାରୁ ଯଥେଷ୍ଟ ଅଧିକ ତାପମାତ୍ରା ରେକର୍ଡ ହେବ । ଏଥିପାଇଁ ରାଜ୍ୟର ଅଧିକାଂଶ ଅଞ୍ଚଳକୁ ଅରେଞ୍ଜ ଏବଂ କିଛି ଅଞ୍ଚଳକୁ ରେଡ୍ ମାର୍କ ଜାରି କରାଯାଇଛି ।
ଆଜି ସରିବ ମୁଖ୍ୟ ଶାସନ ସଚିବ ସୁରେଶ ମହାପାତ୍ରଙ୍କ କାର୍ଯ୍ୟକାଳ
ଭୁବନେଶ୍ୱର: ଆଜି ସରିବ ମୁଖ୍ୟ ଶାସନ ସଚିବ ସୁରେଶ ମହାପାତ୍ରଙ୍କ କାର୍ଯ୍ୟକାଳ । ଆସନ୍ତା କାଲିଠାରୁ ପରବର୍ତ୍ତୀ ମୁଖ୍ୟ ଶାସନ ସଚିବ ହେବେ ଉନ୍ନୟନ କମିଶନର ପ୍ରଦୀପ ଜେନା । ୧୯୮୯ ବ୍ୟାଚ IAS ଅଫିସର ପ୍ରଦୀପ କୁମାର ଜେନା ମୁଖ୍ୟ ଶାସନ ସଚିବ ଭାବେ ପଦଭାର ଗ୍ରହଣ କରିବେ । ସୁରେଶ ମହାପାତ୍ରଙ୍କ କାର୍ଯ୍ୟକାଳ ଦୁଇଥର ବଢ଼ିଥିଲା । ୧୯୯୧ରେ କଳାହାଣ୍ଡି ଜିଲ୍ଲା ଧର୍ମଗଡ଼ର ସବ-କଲେକ୍ଟର ଭାବେ କ୍ୟାରିଅର ଆରମ୍ଭ କରିଥିଲେ ପ୍ରଦୀପ । ପରେ କେନ୍ଦ୍ରାପଡ଼ା ଓ କଟକ ଜିଲ୍ଲାପାଳ ମଧ୍ୟ ହୋଇଥିଲେ । ବିଭିନ୍ନ କ୍ଷେତ୍ରରେ ତାଙ୍କର ସଫଳତା ପାଇଁ ତୃଣମୂଳ ସ୍ତରରୁ ପ୍ରଶଂସା ପାଇଛନ୍ତି ପ୍ରଦୀପ ଜେନା ।
କଟକ ଜିଲ୍ଲାପାଳ ଥିବା ବେଳେ ୧୯୯୯ ମସିହାରେ ବାତ୍ୟା ପରିଚାଳନାରେ ଦକ୍ଷତା ପ୍ରତିପାଦନ କରିଥିବା ବେଳେ ରାଜ୍ୟ ଓ ଜାତୀୟ ସ୍ତରରୁ ପ୍ରଶଂସା ପାଇଥିଲେ । ଶକ୍ତି ବିଭାଗର ସଚିବ ଥିବା ବେଳେ ଫାଇଲିନ ବାତ୍ୟାରେ ଗଞ୍ଜାମରେ ବିଦ୍ୟୁତ ଭିତ୍ତିଭୂମି ସମ୍ପୂର୍ଣ୍ଣ ବିଗିଡିଯାଇଥିଲା । ସେପଟେ ଅବସର ପରେ ସୁରେଶ ମହାପାତ୍ରଙ୍କୁ ମିଳିବ ନୂଆ ନିଯୁକ୍ତି । ଓଇଆରସି ଅଧ୍ୟକ୍ଷ ହେବେ ସୁରେଶ ମହାପାତ୍ର । ଦାୟିତ୍ୱ ଗ୍ରହଣ ଦିନଠାରୁ ତାଙ୍କର କାର୍ଯ୍ୟକାଳ ଅବଧି ଆରମ୍ଭ ହେବ ।
ବିଧାନସଭାରେ ବଜେଟ ଅଧିବେଶନ, ଆଜି ରହିଛି ଗୁରୁତ୍ବପୂର୍ଣ୍ଣ ବିଭାଗର ପ୍ରଶ୍ନକାଳ
ଭୁବନେଶ୍ୱର: ୨୦୨୩-୨୪ ଆର୍ଥିକ ବର୍ଷ ପାଇଁ ଆଗତ ବଜେଟ ଉପରେ ବିଧାନସଭାରେ ଜାରି ରହିଛି ଆଲୋଚନା । ଆଜି ଅପରାହ୍ନରେ ଦ୍ବିତୀୟ ଦିନରେ ଆଲୋଚନା ହେବ । ଆସନ୍ତାକାଲି ଆଲୋଚନାର ଶେଷ ଦିନରେ ଅର୍ଥମନ୍ତ୍ରୀ ନିରଞ୍ଜନ ପୂଜାରୀ ଗୃହରେ ଉତ୍ତର ରଖିବେ । ସୋମବାର ବିଧାନସଭାରେ ବାଚସ୍ପତି ଘୋଷଣା କରିଥିବା ନୂଆ କାର୍ଯ୍ୟ ପରାମର୍ଶଦାତା କମିଟିର ପ୍ରଥମ ବୈଠକ ଅନୁଷ୍ଠିତ ହୋଇଛି । ଏଥିରେ ବିଧାନସଭାର ଦ୍ବିତୀୟ ପର୍ଯ୍ୟାୟ ବୈଠକରେ ୨୨ଟି ବିଭାଗର ଖର୍ଚ୍ଚ ଦାବି ଆଲୋଚନା କରାଯିବ । ୧୪ଦିନ ଧରି ଚାଲିବାକୁ ଥିବା ବିଭାଗୀୟ ଖର୍ଚ୍ଚ ଦାବି ଆଲୋଚନାରେ କେଉଁଦିନ କେଉଁ ବିଭାଗ ଆଲୋଚନା କରାଯିବ ସେନେଇ କାର୍ଯ୍ୟ ପରାମର୍ଶଦାତା ବୈଠକରେ ସ୍ଥିର କରାଯାଇଛି ।
ସେହିପରି ଆଜି ପ୍ରଶ୍ନକାଳରେ ପଞ୍ଚାୟତିରାଜ, ପାନୀୟଜଳ, ଗ୍ରାମ୍ୟ ଉନ୍ନୟନ, ଗୃହ ଓ ନଗର ଉନ୍ନୟନ ବିଭାଗ, ଜଙ୍ଗଲ ଓ ପରିବେଶ, ଦକ୍ଷତା ବିକାଶ ଓ ବୈଷୟିକ ଶିକ୍ଷା ଏବଂ ସୂଚନା ଓ ଲୋକସମ୍ପର୍କ ବିଭାଗର ପ୍ରଶ୍ନୋତ୍ତର କାର୍ଯ୍ୟକ୍ରମ ରହିଛି । କଂଗ୍ରେସ ପକ୍ଷରୁ ମମିତା ମେହେର ମାମଲାରେ ମୁଖ୍ୟ ଅଭିଯୁକ୍ତ ଗୋବିନ୍ଦ ସାହୁର ମୃତ୍ୟୁକୁ ନେଇ ମୁଲତବୀ ପ୍ରସ୍ତାବ ଦିଆଯାଇଛି ।
ଆଜି ତଦନ୍ତକାରୀ କମିଟି ନିକଟରେ ହାଜର ହେବେ କୁସ୍ତି ଯୋଦ୍ଧା ସଂଘ ସଭାପତି ବ୍ରିଜ ଭୂଷଣ
ନୂଆଦିଲ୍ଲୀ: ଆଜି ତଦନ୍ତକାରୀ କମିଟି ନିକଟରେ ହାଜର ହେବେ ଭାରତୀୟ କୁସ୍ତି ଯୋଦ୍ଧା ମହାସଙ୍ଘ ସଭାପତି ବ୍ରିଜ ଭୂଷଣ ଶରଣ ସିଂ । ଯୌନ କେଳେଙ୍କାରୀ ବିବାଦରେ ଫସିଥିବା ବ୍ରିଜଭୂଷଣଙ୍କ ଇସ୍ତଫା ଦାବିରେ ଦିଲ୍ଲୀରେ ଜୋରଦାର ବିକ୍ଷୋଭ ହେବା ପରେ ଗଠିତ ହୋଇଥିଲା କମିଟି । ସ୍ପୋର୍ଟସ୍ ଅଥରିଟି ଅଫ ଇଣ୍ଡିଆ କାର୍ଯ୍ୟାଳୟରେ ଉପସ୍ଥିତ ରହି ସେ ନିଜର ବୟାନ ରଖିବେ ବୋଲି ସୂଚନା ମିଳିଛି । ଜେରାବେଳେ ପୂର୍ବତନ ରେସଲର ବବିତା ଫୋଗାଟ ମଧ୍ୟ ଉପସ୍ଥିତ ରହିପାରନ୍ତି । ଗତମାସରେ ଦିଲ୍ଲୀ ଯନ୍ତରମନ୍ତରରେ ଯୌନ କେଳେଙ୍କାରୀ ଓ ଅର୍ଥ ତୋଷରପାତ ଅଭିଯୋଗ କ୍ରମେ ବଜରଙ୍ଗ ପୁନିଆ ଓ ବିନେଶ ଫୋଗାଟଙ୍କ ନେତୃତ୍ବରେ ହୋଇଥିଲା ବିକ୍ଷୋଭ ।
ବବିତା ହେଉଛନ୍ତି ଉଭୟ ବିନେଶ ଓ ବଜରଙ୍ଗଙ୍କ ସମ୍ପର୍କୀୟ । ଅଭିଯୋଗର ତଦନ୍ତ ଲାଗି କ୍ରୀଡ଼ା ମନ୍ତ୍ରାଳୟ ନିର୍ଦ୍ଦେଶ କ୍ରମେ ମେରିକମଙ୍କ ନେତୃତ୍ୱରେ ଗତ ଜାନୁଆରୀ ୨୩ରେ ଗଠିତ ହୋଇଥିଲା କମିଟି । ମନ୍ତ୍ରାଳୟ ନିକଟରେ ରିପୋର୍ଟ ଦାଖଲ ନହେବା ଯାଏ ସମସ୍ତ ପ୍ରକାର କାର୍ଯ୍ୟକଳାପରୁ ଦୂରେଇ ରହିବା ଲାଗି ତାଙ୍କୁ ନିର୍ଦ୍ଦେଶ ଦିଆଯାଇଥିଲା । ତଦନ୍ତକାରୀ ପ୍ୟାନେଲରେ ଥିବା ସଦସ୍ୟମାନେ ହେଲେ ଯୋଗେଶ୍ବର ଦତ୍ତ, ତୃପ୍ତି ମୁରୁଗୁନ୍ଦେ, ରାଧିକା ଶ୍ରୀମାନ, ରାଜେଶ ରାଜାଗୋପାଳନ, ବବିତା ଫୋଗାଟ । ରିପୋର୍ଟ ଦାଖଲ ଲାଗି ୬ ସପ୍ତାହ ସମୟ ନିଆଯାଇଥିଲା ।
ଦିଲ୍ଲୀ ମଦ ନୀତି ମାମଲା, ଆଜିଠୁ ମନୀଷ ସିସୋଦିଆଙ୍କୁ ଜେରା କରିବ ସିବିଆଇ
ନୂଆଦିଲ୍ଲୀ: ଦିଲ୍ଲୀ ମଦ ନୀତି ମାମଲା । ଉପମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କୁ ଆଜିଠାରୁ ଜେରା କରିବ ସିବିଆଇ । ଆସନ୍ତା ୪ ତାରିଖ ଯାଏ ସିବିଆଇ ହେପାଜତରେ ରହିବେ ସିସୋଦିଆ । ଗତକାଲି ସିସୋଦିଆଙ୍କୁ ୫ ଦିନିଆ ରିମାଣ୍ଡରେ ନେଇଥିଲା ସିବିଆଇ । ସିସୋଦିଆଙ୍କ ଲାଗି ମାମଲା ଲଢୁଥିବା ଆଇନଜୀବୀ ଦାୟନ କ୍ରିଷ୍ଣାନନ ସିବିଆଇର ଯୁକ୍ତିକୁ ଖଣ୍ଡନ କରିଛନ୍ତି । ସିବିଆଇ ମନଗଢା କଥାମାନ କହୁଛି ବୋଲି ସେ ଅଭିଯୋଗ କରିଛନ୍ତି । ମେ ୨୦୨୧ରେ ତତକାଳୀନ ଏଲଜି ମଦ ନୀତିରେ ସ୍ବାକ୍ଷର କରିଥିବା ବେଳେ ଏହାକୁ କାହିଁକି ଲୁଚାଯାଉଛି ବୋଲି ସେ ପ୍ରଶ୍ନ କରିଛନ୍ତି ।
ସେପଟେ ସିସୋଦିଆଙ୍କୁ ଗିରଫ ପ୍ରତିବାଦରେ ଗତକାଲି ଦେଶର ଅଧିକାଂଶ ସ୍ଥାନରେ ଆପ୍ କର୍ମୀ ବିକ୍ଷୋଭ କରିଥିଲେ । ଗଣତନ୍ତ୍ରକୁ ହତ୍ୟା କରି କେନ୍ଦ୍ର ସରକାର ସିବିଆଇ ଓ ପ୍ରବର୍ତ୍ତନ ନିର୍ଦ୍ଦେଶାଳୟକୁ ବ୍ୟବହାର କରୁଛି ବୋଲି ଆପ୍ ଅଭିଯୋଗ କରିଥିଲା । ସିସୋଦିଆଙ୍କୁ ଗିରଫ ପରଠାରୁ ଭାରତୀୟ ଜନତା ପାର୍ଟିର ଅନ୍ତ ଘଟିବା ଆରମ୍ଭ ହୋଇଛି ବୋଲି କହିଛି ଆପ୍ । ଗତବର୍ଷ ମେ ମାସରେ ବେଆଇନ ଅର୍ଥ କାରବାର ମାମଲାରେ ମନ୍ତ୍ରୀ ସତ୍ୟେନ୍ଦ୍ର ଜୈନଙ୍କୁ ଗିରଫ କରାଯାଇଥିବା ସତ୍ତ୍ବେ ତାଙ୍କୁ ଜାମିନ ମିଳିପାରୁନାହିଁ । ସେପଟେ ଦିଲ୍ଲୀ ସରକାରଙ୍କ ୩୩ଟି ବିଭାଗ ମଧ୍ଯରୁ ଶିକ୍ଷା ସମେତ ପ୍ରାୟ ୧୮ଟି ବିଭାଗ ଦାୟିତ୍ବରେ ସିସୋଦିଆ ଥିବାରୁ ସରକାର ପରିଚାଳନାରେ ସମସ୍ୟା ଦେଖାଦେଇପାରେ ।
ମୁମ୍ବାଇରେ ନବୀନ, ଭେଟିଲେ ଦେଶର ପ୍ରମୁଖ ଶିଳ୍ପପତି
ମୁମ୍ବାଇ: ଓଡିଶାରେ ହେବ ବ୍ୟାପକ ପୁଞ୍ଜିନିବେଶ । ମୁମ୍ବାଇ ଗସ୍ତରେ ଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଏନେଇ ସାକ୍ଷାତ କରିଛନ୍ତି ଦେଶର ବହୁ ପ୍ରମୁଖ ଶିଳ୍ପପତି । ଗସ୍ତ ଅବସରରେ ମୁଖ୍ୟମନ୍ତ୍ରୀଙ୍କୁ ଭେଟିଛନ୍ତି ରିଲାଏନ୍ସ ଅଧ୍ୟକ୍ଷ ମୁକେଶ ଅମ୍ବାନୀ । ଏହି ସୌଜନ୍ୟମୂଳକ ସାକ୍ଷାତକାର ବେଳେ ଭବିଷ୍ୟତରେ ରିଲାଏନ୍ସ ଇଣ୍ଡଷ୍ଟ୍ରିଜ ଓଡ଼ିଶାରେ ପୁଞ୍ଜି ନିବେଶ ନେଇ ମୁକେଶଙ୍କ ସହ ଆଲୋଚନା କରିଛନ୍ତି ନବୀନ ।
ଏହି ସମୟରେ ମୁକେଶଙ୍କୁ ହକିର ଜର୍ସି ଉପହାର ଦେଇଛନ୍ତି ନବୀନ । ସେହିଭଳି ସିଏଟ୍ ଗ୍ରୁପର ଅନନ୍ତ ଗୋଏଙ୍କା ମଧ୍ୟ ମୁଖ୍ୟମନ୍ତ୍ରୀଙ୍କୁ ଭେଟିଛନ୍ତି । ଅନନ୍ତଙ୍କ ସହ ମଧ୍ୟ ରାଜ୍ୟରେ ପୁଞ୍ଜି ନିବେଶ ନେଇ ଆଲୋଚନା କରିବା ପରେ ହକିର ଜର୍ସି ଉପହାର ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏହାସହ ପ୍ରକ୍ଟର ଆଣ୍ଡ ଗାମ୍ବଲ ଏମଡି ଏଲ. ବୈଦ୍ୟନାଥନ ।
ଆୟନ ଏକ୍ସଚେଞ୍ଜ ଇଣ୍ଡିଆ ସିଏମଡି ରାଜେଶ ଶର୍ମା, କେମକୋ ଗ୍ରୁପ ସିଏମଡି ରାମଅବତାର ସାରାଓଗି, କଲ୍ୟାଣୀ ଷ୍ଟିଲସର ଏମଡି ଆରକେ ଗୋୟଲ, ଆଇଜି ଫାର୍ମାସ୍ୟୁଟିକାଲସର ଏମଡି ନିକୁଢ୍ଜ ଧାନୁକା, ଇଣ୍ଡୋ ରାମା ସିନ୍ଥେଟିକ୍ସର ଏମଡି ଏମଏନଏସ ରାଓ, ଗଦରେଜ ଗ୍ରୁପ ଅଧ୍ୟକ୍ଷ ପିରୋଜେଶା ଗଦରେଜ, ଏନସିଙ୍ଗର ଇଣ୍ଡିଆର ମୁଖ୍ୟ ନିଖିଳ ତିଓ୍ବାରି, ଡାଲମିଆ ପଲିପ୍ରୋର ସିଏମଡି ଆଦିତ୍ୟା ଡାଲମିଆ, ହିଣ୍ଡାଲକୋ ଏମଡି ସତୀଶ ପାଇ, ଗୋପାଳପୁର ପୋର୍ଟ ସିଇଓ ସନ୍ଦୀପ ଅଗ୍ରଓ୍ବାଲ, ଓରିକନ ଏଣ୍ଟରପ୍ରାଇଜେସର ଇଡି ବି.କେ. ତୋସିନିଓ୍ବାଲ ପ୍ରମୁଖ ମୁଖ୍ୟମନ୍ତ୍ରୀଙ୍କୁ କରିଥିଲେ ସାକ୍ଷାତ ।