ଭୁବନେଶ୍ୱର: ନବୀନ ନିବାସରେ ମୁଖ୍ୟମନ୍ତ୍ରୀଙ୍କୁ ଭେଟିଲେ FIH ସଭାପତି ତୟାବ ଇକ୍ରାମ । ଓଡ଼ିଶାରେ ହକି ବିଶ୍ବକପ୍ ଚାଲିଥିବା ବେଳେ ଏଫଆଇଏଚର ସଭାପତି ତୟାବ ଇକ୍ରାମ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସୌଜନ୍ୟମୂଳକ ସାକ୍ଷାତ କରିଛନ୍ତି । ନବୀନ ନିବାସରେ ଏହି ସାକ୍ଷାତକାର ଅନୁଷ୍ଠିତ ହୋଇଥିଲା । ମୁଖ୍ୟମନ୍ତ୍ରୀ ଓ ଏଫଆଇଏଚର ସଭାପତି ହକିକୁ ନେଇ ଉଭୟଙ୍କ ମଧ୍ୟରେ କିଛିସମୟ ଧରି ଆଲୋଚନା ଚାଲିଥିଲା ।ଏହି ସମୟରେ ଫାଇବ-ଟି ସଚିବ ଭି.କେ ପାଣ୍ଡିୟାନ୍ ଓ କ୍ରିଡା ସଚିବ ଭିନିଲ କ୍ରିଷ୍ଣା ଉପସ୍ଥିତ ରହିଥିଲେ ।
ବୟଫ୍ରେଣ୍ଡ ନଥିଲେ ଛାତ୍ରୀଙ୍କୁ କଲେଜ ମନା, ଉମରକୋଟରେ ଭାଇରାଲ ହେଉଛି ଏଭଳି ନୋଟିସ୍
ନବରଙ୍ଗପୁର: ବୟଫ୍ରେଣ୍ଡ ନଥିଲେ ଛାତ୍ରୀଙ୍କୁ କଲେଜ ମନା । ଜଗତସିଂହପୁର ପରେ ନବରଙ୍ଗପୁର ଜିଲ୍ଲା ଉମରକୋଟରେ ଭାଇରାଲ ହେଉଛି ଏଭଳି ଏକ ନୋଟିସ୍ । ଉମରକୋଟ ପେଣ୍ଡ୍ରାଣୀ କଲେଜ ଅଧ୍ୟକ୍ଷାଙ୍କ ସ୍ୱାକ୍ଷର ଥାଇ ଏକ ନୋଟିସ୍ ଭାଇରାଲ ହେଉଛି । ଫେବ୍ରୁଆରୀ ୧୪ ତାରିଖ ପୂର୍ବରୁ ସମସ୍ତ ଛାତ୍ରୀ ନିଜ ବୟଫ୍ରେଣ୍ଡ ବାଛିବାକୁ ନୋଟିସରେ ଉଲ୍ଲେଖ ରହିଛି । ବୟଫ୍ରେଣ୍ଡ ନଥିଲେ ଛାତ୍ରୀଙ୍କୁ କଲେଜ ମଧ୍ୟକୁ ପ୍ରବେଶ ବାରଣ କରାଯାଇଛି । ବୟଫ୍ରେଣ୍ଡଙ୍କ ସହ ଫଟୋ ଉଠାଇ ଛାତ୍ରୀମାନେ କଲେଜ ଗେଟରେ ଦେଖାଇ ପ୍ରବେଶ କରିପାରିବେ ।
ଏହି ନୋଟିସ ଏବେ ମୋବାଇଲରୁ ମୋବାଇଲକୁ ଘୂରି ବୁଲୁଥିବାବେଳେ ଛାତ୍ରଛାତ୍ରୀ ଓ ଅଭିଭାବକଙ୍କ ମଧ୍ୟ ଅସନ୍ତୋଷ ପ୍ରକାଶ ପାଇଛି । ସାଧାରଣତନ୍ତ୍ର ଦିବସ ଓ ସରସ୍ବତୀ ପୂଜା ପାଇଁ ଲାଗିଥିବା ନୋଟିସକୁ କେହି ବିକୃତ କରି ଏଭଳି କରିଥିବା କଲେଜ ଅଧ୍ୟକ୍ଷା କହିଛନ୍ତି । ଏନେଇ ପୋଲିସ ନିକଟରେ ଅଭିଯୋଗ କରାଯିବ । କିଛିଦିନ ପୂର୍ବରୁ ଜଗତସିଂହପୁର ଏସଭିଏମ କଲେଜରେ ଠିକ୍ ଏମିତି ଏକ ନୋଟିସ ଭାଇରାଲ ହୋଇଥିଲା ।
ସିନ୍ଧୁ ଜଳ ଚୁକ୍ତିରେ ବ୍ୟାପକ ଉଲ୍ଲଂଘନ, ୧୯୬୦ର ବୁଝାମଣାକୁ ମାନୁନି ପାକିସ୍ତାନ
ନୂଆଦିଲ୍ଲୀ: ୧୯୬୦ ସିନ୍ଧୁ ଜଳ ଚୁକ୍ତି ଉଲ୍ଲଂଘନକୁ ନେଇ ପାକକୁ ନୋଟିସ । ପାକିସ୍ତାନକୁ ନୋଟିସ ଜାରି କରିଛି ଭାରତ । ପାକିସ୍ତାନର ବହୁ କାର୍ଯ୍ୟ ସିନ୍ଧୁ ଜଳ ଚୁକ୍ତି ଉଲ୍ଲଂଘନ କରୁଥିବାରୁ ନୋଟିସ ଜାରି କରାଯାଇଥିବା ଜଣାପଡ଼ିଛି । ଭାରତର କିଶେଙ୍ଗାଙ୍ଗା ଓ ରାଟଲେ ହାଇଡ୍ରୋ ଇଲେକଟ୍ରିକ ପ୍ରକଳ୍ପକୁ ନେଇ ଆଲୋଚନା ଓ ବିବାଦର ସମାଧାନ ଲାଗି ଭାରତ ବାରମ୍ବାର ଉଦ୍ୟମ କରିଥିଲେ ବି ପାକିସ୍ତାନ ଆଲୋଚନା ପାଇଁ ରାଜି ହୋଇ ନଥିଲା । ତେବେ ନିକଟରେ ବିଶେଷଜ୍ଞ ଓ ମଧ୍ୟସ୍ଥତା ନ୍ୟାୟାଳୟ ପ୍ରକ୍ରିୟା ଉପରେ ବିଶ୍ବବ୍ୟାଙ୍କ କାର୍ଯ୍ୟନୁଷ୍ଠାନ ନେବା ଆରମ୍ଭ କରିଛି ।
ସିନ୍ଧୁ ଜଳ ସନ୍ଧିର ଉଲ୍ଲଂଘନର ସାମ୍ନା କରୁଥିବାରୁ ଭାରତ ପାକିସ୍ତାନକୁ ନୋଟିସ ଜାରି କରିଛି ବୋଲି ସରକାରୀ ସୂତ୍ରରୁ ସୂଚନା ମିଳିଛି । ଭାରତର କିଶେଙ୍ଗାଙ୍ଗା ଓ ରାଟଲେ ହାଇଡ୍ରୋ ଇଲେକଟ୍ରିକ ପ୍ରକଳ୍ପକୁ ନେଇ ଆପତ୍ତି ଉଠାଇଥିଲା ପାକିସ୍ତାନ । ପ୍ରକଳ୍ପର ତଦନ୍ତ ପାଇଁ ତଟସ୍ଥ ବିଶେଷଜ୍ଞଙ୍କ ନିଯୁକ୍ତି ପାଇଁ ଅନୁରୋଧ କରିଥିଲା । ମାତ୍ର ୨୦୧୬ରେ ପାକିସ୍ତାନ ଏଥିରୁ ଓହରି ଯାଇଥିଲା । ପାକିସ୍ତାନର ଏହି କାର୍ଯ୍ୟକଳାପ ସିନ୍ଧୁ ଜଳ ସନ୍ଧି ପ୍ରବଧାନକୁ ଉଲ୍ଲଂଘନ କରୁଛି । ଆସନ୍ତା ୯୦ ଦିନ ମଧ୍ୟରେ ଏହାର ଉତ୍ତର ରଖିବାକୁ ଭାରତ ନୋଟିସରେ ଉଲ୍ଲେଖ କରିଛି ।
ଟେନିସକୁ ଅଲବିଦା କହିଲେ ସାନିଆ ମିର୍ଜା, ଅଷ୍ଟ୍ରେଲିଆ ଓପନରେ ରନର୍ସ ଅପ ସହ ବିଦାୟ
ମେଲବର୍ଣ୍ଣ: ସାନିଆ ମିର୍ଜାଙ୍କ ଶେଷ ଗ୍ରାଣ୍ଡ ସ୍ଲାମ । ଶେଷ ମ୍ୟାଚରେ ହାରି ବିଦାୟ ନେଲେ ଷ୍ଟାର ଟେନିସ୍ ଖେଳାଳି ସାନିଆ ମିର୍ଜା । ଅଷ୍ଟ୍ରେଲିଆ ଓପନ ଟେନିସ୍ ଟୁର୍ଣ୍ଣାମେଣ୍ଟର ମିକ୍ସଡ ଡବଲ୍ସ ଫାଇନାଲରେ ସାନିଆ ଓ ତାଙ୍କ ଯୋଡ଼ିଦାର ବୋପାନ୍ନାଙ୍କୁ ହାରର ସାମ୍ନା କରିବାକୁ ପଡ଼ିଛି । ଅଷ୍ଟ୍ରେଲିଆ ଓପନରେ ରନର୍ସଅପ୍ ସହ ନିଜ ଟେନିସ କ୍ୟାରିୟରକୁ ଅଲବିଦା କହିଛନ୍ତି ସାନିଆ ମିର୍ଜା । ୬ଟି ଗ୍ରାଣ୍ଡସ୍ଲାମ ଟାଇଟଲ ଜିତିଥିବା ସାନିଆ ଅଷ୍ଟ୍ରେଲିଆ ଓପନର ମିକ୍ସଡ ଡବଲ୍ସ ଫାଇନାଲରେ ପ୍ରବେଶ କରିଥିଲେ । ଶେଷ ମ୍ୟାଚ ହାରିବା ପରେ କାନ୍ଦି ପକାଇଥିଲେ ସାନିଆ । ବ୍ରାଜିଲର ଲୁଇସା ଷ୍ଟେଫାନି ଓ ରାଫେଲ ମାଟାଓସ ଫାଇନାଲ ମ୍ୟାଚରେ ସାନିଆ-ବୋପାନ୍ନା ଯୋଡ଼ିଙ୍କୁ ପରାସ୍ତ କରିଛନ୍ତି । ଏହି ପରାଜୟ ସହ ସାନିଆ ଓ ବୋପାନ୍ନାଙ୍କୁ ରନର୍ସଅପରେ ସନ୍ତୁଷ୍ଟ ହେବାକୁ ପଡ଼ିଛି ।
ସାନିଆ ଅଷ୍ଟ୍ରେଲିଆ ଓପନ ପରେ ଅବସର ନେବେ ବୋଲି ଘୋଷଣା କରିଥିଲେ । ସେହି ଅନୁସାରେ ସେ ମ୍ୟାଚ୍ ସରିବା ପରେ ସମସ୍ତଙ୍କୁ କୃତଜ୍ଞତା ଜଣାଇ ଟେନିସକୁ ଅଲବିଦା କହିଛନ୍ତି । ସାନିଆ ତାଙ୍କ ଦୀର୍ଘ ବର୍ଷର ଟେନିସ କ୍ୟାରିୟର ମଧ୍ୟରେ ୬ ଥର ଗ୍ରାଣ୍ଡସ୍ଲାମ ଟାଇଟଲ ଜିତିଛନ୍ତି । ଏଥିରେ ୩ଟି ମହିଳା ଡବଲ୍ସ ଓ ୩ଟି ମିକ୍ସଡ ଡବଲ୍ସ ରହିଛି ।
କୃଷି ମେଳାରେ ମୁଖ୍ୟମନ୍ତ୍ରୀଙ୍କ ଟିପ୍ସ୍, ଚାଷ କାର୍ଯ୍ୟରେ ନୂଆ ନୂଆ ମେସିନ ବ୍ୟବହାର କରନ୍ତୁ
ଭୁବନେଶ୍ୱର: ଚାଷୀଙ୍କୁ ଋଣ ସହାୟତା ଛୋଟ ଚାଷୀଙ୍କ ପାଇଁ ଆଶୀର୍ବାଦ ସାବ୍ୟସ୍ତ ହୋଇଛି । ଏହା ଚାଷୀଙ୍କ ଆତ୍ମବିଶ୍ବାସ ବୃଦ୍ଧି କରିଛି । ରାଜ୍ୟର ଚାଷୀଙ୍କ ଦକ୍ଷତା ସକାଶେ ଓଡ଼ିଶା ବିଭିନ୍ନ ସମୟରେ ଜାତୀୟସ୍ତରରେ ପୁରସ୍କୃତ ହୋଇଛି । ଚାଷୀଙ୍କ ସମସ୍ୟାର ସମାଧାନ ପାଇଁ ରାଜ୍ୟ ସରକାର ସବୁବେଳେ ଉଦ୍ୟମ କରିଆସୁଛନ୍ତି । ଆଗକୁ କୃଷିରେ ସଫଳତା ପାଇଁ କୃଷି ମେକାନାଇଜେସନ ଆବଶ୍ୟକ । ଏହି ପ୍ରଦର୍ଶନୀ କୃଷିରେ ଜ୍ଞାନ ଆହରଣ ପାଇଁ ଭଲ ସୁଯୋଗ ଆଣିଥାଏ । ଏଠାରୁ ନୂଆ ନୂଆ ଚାଷ ପଦ୍ଧତି ଜାଣିବାରେ ସୁଯୋଗ ମିଳିଥାଏ । ନୂଆ ନୂଆ ମେସିନ ବିଷୟରେ ଚାଷୀ ଜାଣିବାକୁ ସୁଯୋଗ ପାଇଥାଏ । ତେଣୁ ଚାଷୀମାନେ ବୈଜ୍ଞାନିକ ପଦ୍ଧତିରେ ଚାଷ କରନ୍ତୁ। ସମ୍ବଲପୁରରେ ଆୟୋଜିତ ପଶ୍ଚିମ ଓଡ଼ିଶା କୃଷି ଓ କୃଷି ଯନ୍ତ୍ରପାତି ମେଳା ୨୦୨୩ରେ ଯୋଗଦେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଚାଷୀଙ୍କୁ ଏହି ଟିପସ ଦେଇଛନ୍ତି ।
ଏପରି ପ୍ରୟୋଗ ଦ୍ୱାରା କୃଷିରେ ରୂପାନ୍ତରଣ ଆସିବ ବୋଲି ନବୀନ ଆଶା ବ୍ୟକ୍ତ କରିଛନ୍ତି । ଆଜିଠୁ ୩୧ ତାରିଖ ପଯ୍ୟନ୍ତ ଏହି ମେଳା ଅନୁଷ୍ଠିତ ହେବ । ଏଥିରେ ପଶ୍ଚିମ ଓଡ଼ିଶାର ଶହ ଶହ ଚାଷୀ, କୃଷି ବିଜ୍ଞାନୀ ଓ ଉଦ୍ୟୋଗୀ ଯୋଗଦେଇଛନ୍ତି । ମେଳାରେ ୫୦୦ ଚାଷୀ ଯୋଗଦେଇଥିବା ସୂଚନା ମିଳିଛି । ନୂଆ କୃଷିନୀତି ତଥା ନୂତନ ଜ୍ଞାନ କୌଶଳର ଉପଯୋଗରେ କିଭଳି ଚାଷ କରାଯିବ ସେନେଇ ତାଲିମ ଦିଆଯାଉଛି । କୃଷି ଯନ୍ତ୍ରପାତିର ବ୍ୟବହାର ସମ୍ପର୍କରେ ଟ୍ରେନିଂ ଦେଉଛନ୍ତି ବିଶେଷଜ୍ଞ । ପଶ୍ଚିମ ଓଡ଼ିଶାରେ ପ୍ରଥମ ଥର ପାଇଁ ଏପରି କାର୍ଯ୍ୟକ୍ରମ ଆୟୋଜନ କରାଯାଇଥିବାରୁ ରାଜ୍ୟ ସରକାରଙ୍କୁ ପ୍ରଶଂସା କରିଛନ୍ତି ଚାଷୀ ।
ପ୍ରଧାନମନ୍ତ୍ରୀ ମୋଦିଙ୍କ ‘ପରୀକ୍ଷା ପେ ଚର୍ଚ୍ଚା‘; ଚିନ୍ତାମୁକ୍ତ ହୋଇ ପରୀକ୍ଷା ଦେବାକୁ ପରାମର୍ଶ
ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପରୀକ୍ଷା ପେ ଚର୍ଚ୍ଚା। ଫାଇନାଲ ଏଗଜାମ ପୂର୍ବରୁ ଛାତ୍ରଛାତ୍ରୀଙ୍କୁ ସଫଳତାର ମନ୍ତ୍ର ଦେଇଛନ୍ତି ମୋଦି। ଚିନ୍ତାମୁକ୍ତ ହୋଇ ପରୀକ୍ଷା ଦେବାକୁ ପ୍ରଧାନମନ୍ତ୍ରୀ ପରାମର୍ଶ ଦେଇଛନ୍ତି। ପରୀକ୍ଷା ପ୍ରସ୍ତୁତି ପାଇଁ ସମୟ ପରିଚାଳନାକୁ ଗୁରତ୍ବ ଦେବା ନିହାତି ଆବଶ୍ୟକ । ପରୀକ୍ଷାରେ ଯୋଦ୍ଧା ଭାବେ ମୁକାବିଲା କରିବାକୁ କହିଛନ୍ତି ମୋଦି।
ଏହି ସମୟରେ ପ୍ରଧାନମନ୍ତ୍ରୀ ପିଲାମାନଙ୍କ ସହ ହସଖୁସିରେ କଥା ହେଉଥିବା ନଜର ଆସିଛି। ଏହି କ୍ରମରେ ଡିପିଏସ୍ ବେଙ୍ଗାଲୁରୁର ଛାତ୍ର ମନନ ମିତ୍ତଲଙ୍କ ସହ ମୋଦିଙ୍କ ବାର୍ତ୍ତାଳାପରେ ହସିବାରେ ଲାଗିଥିଲେ ଉପସ୍ଥିତ ଛାତ୍ରଛାତ୍ରୀ । ମନନ ପ୍ରଶ୍ନ କରିଥିଲେ, ଅନଲାଇନ୍ କ୍ଲାସ୍ ସମୟରେ ଅନେକ ଧ୍ୟାନଭ୍ରଷ୍ଟ କରିବା ଭଳି ସଜେସନ୍ ଆସିଥାନ୍ତି । ଯେମିତିକି ଗେମିଂ… । ଏହି ସମୟରେ ମୋଦି କହିଥିଲେ, ତୁମେ କ’ଣ ଜଣେ ଛାତ୍ର? ଏହାପରେ ସମସ୍ତେ ହସିବାରେ ଲାଗିଥିଲେ ।
କାରଣ ମନନଙ୍କ ମୁଣ୍ଡରେ ଚୁଟି ନଥିବା ବେଳେ ସେ ବୟସରେ ବହୁତ ବଡ଼ ଦେଖାଯାଉଥିଲେ । ଫଳରେ ପ୍ରଧାନମନ୍ତ୍ରୀ ଏଭଳି ଅଜବ ପ୍ରଶ୍ନ ପଚାରିଥିଲେ ।
ପରୀକ୍ଷା ସମୟରେ ଚାପମୁକ୍ତ ଓ ପ୍ରସ୍ତୁତି ନେଇ ଟିପ୍ସ ଦେଇଛନ୍ତି। ନିଜ ଲକ୍ଷ୍ୟ ପ୍ରତି ସର୍ବଦା ଧ୍ୟାନ ଦେଦାକୁ କହିଛନ୍ତି। ଚାପର ବଶବର୍ତ୍ତୀ ହୋଇ ଲକ୍ଷ୍ୟରୁ ବିଚ୍ୟୁତ ନହେବାକୁ ପରାମର୍ଶ ଦେଇଛନ୍ତି। ଏହାସହ (ସମୟର ସଦୁପଯୋଗ) ଟାଇମ୍ ମ୍ୟାନେଜମେଣ୍ଟ ପ୍ରତି ଯତ୍ନଶୀଳ ହେବା ଗୁରୁତ୍ୱପୂର୍ଣ୍ଣ। ଏହିପରି ଭାବେ ପରୀକ୍ଷା ପେ ଚର୍ଚ୍ଚା କାର୍ଯ୍ୟକ୍ରମରେ ଦେଶର ବିଭିନ୍ନ ଭାଗରୁ ଆସିଥିବା ଛାତ୍ରଛାତ୍ରୀଙ୍କୁ ପରୀକ୍ଷା ଲାଗି ଟିପ୍ସ ଦେଇଥିଲେ ପ୍ରଧାନମନ୍ତ୍ରୀ ।
ଲଗାତାର ଦ୍ୱିତୀୟ ଥର ହକି ବିଶ୍ୱକପ୍ ଆୟୋଜନ ଦେଶ ଓ ପ୍ରତ୍ୟେକ ଓଡ଼ିଆଙ୍କ ପାଇଁ ଗର୍ବର କଥା: ମୁଖ୍ୟମନ୍ତ୍ରୀ
ଭୁବନେଶ୍ୱର: ଲଗାତାର ଦ୍ୱିତୀୟ ଥର ପାଇଁ ଓଡ଼ିଶା ଆୟୋଜନ କରିଛି ହକି ବିଶ୍ବକପ । ଏହା ଦେଶ ଓ ପ୍ରତ୍ୟେକ ଓଡ଼ିଆଙ୍କ ପାଇଁ ଗର୍ବର କଥା । ହକି ବିଶ୍ବକପ ସବୁ ବର୍ଗ ମଧ୍ୟରେ ଉତ୍ସାହ ଭରିଛି ବୋଲି କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । କେବଳ କ୍ରୀଡା ନୁହେଁ ଓଡ଼ିଶା ଶିଳ୍ପ ବିକାଶର ଯାତ୍ରା କରୁଛି ଓଡ଼ିଶା । ରାଜ୍ୟରେ ୧୦ ଲକ୍ଷ କୋଟି ଟଙ୍କାର ପୁଞ୍ଜି ଓ ୧୦ ଲକ୍ଷ ନିଯୁକ୍ତି ସୁଯୋଗ ସୃଷ୍ଟି ହୋଇଛି । ଶିକ୍ଷା ଓ ସ୍ୱାସ୍ଥ୍ୟ କ୍ଷେତ୍ରରେ 5T ସ୍କୁଲ ରୂପାନ୍ତରଣ ଓ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା ଇତିହାସ ରଚିଛି । ଚାଷୀଙ୍କ କଲ୍ୟାଣ ଓ ସଶକ୍ତିକରଣ କ୍ଷେତ୍ରରେ କାଳିଆ, ବଳରାମ ଯୋଜନା ଓ ମିଲେଟ୍ ମିଶନ ଓଡ଼ିଶା ପାଇଁ ନୂଆ ପରିଚୟ ସୃଷ୍ଟି କରିଛି ।
ଓଡ଼ିଶାର ବିକାଶ ଧାରା ଦ୍ରୁତ ବେଗରେ ଆଗକୁ ବଢୁଛି । ରାଜନୀତି ନୁହେଁ, ବିକାଶର ବିଭିନ୍ନ ଦିଗ ଉପରେ ଲୋକମାନେ ଗୁରୁତ୍ବ ଦେଉଛନ୍ତି ବୋଲି ନବୀନ କହିଛନ୍ତି । ସବୁ କ୍ଷେତ୍ରରେ ଶ୍ରେଷ୍ଠ ହେବା ପାଇଁ ଓଡ଼ିଶା ଉଦ୍ୟମ ଜାରି ରଖିଛି, ଏହା ହିଁ ରୂପାନ୍ତର । ସାଢେ ଚାରି କୋଟି ଓଡ଼ିଶାବାସୀ, ସମସ୍ତେ ଜଣେ ଜଣେ ରୂପାନ୍ତରଣର ସାରଥୀ । ଏହି ଉତ୍ସାହ ନେଇ ଆମେ ଆଗକୁ ବଢିଲେ ୨୦୩୬ରେ ସ୍ୱତନ୍ତ୍ର ଓଡ଼ିଶା ପ୍ରଦେଶର ଶହେ ବର୍ଷ ପୂର୍ତ୍ତି ବେଳକୁ ଏକ ସଶକ୍ତ ଓଡିଶାର ସ୍ବପ୍ନ ନିଶ୍ଚୟ ସାକାର ହେବ ବୋଲି ମୁଖ୍ୟମନ୍ତ୍ରୀ କହିଛନ୍ତି ।
ଆଦିବାସୀଙ୍କୁ ମାନ୍ୟତା କେବେ? ବିଜେପିର ଆଦିବାସୀ ବିରୋଧି ମନୋଭାବକୁ ବିଜେଡିର ସମାଲୋଚନା
ଭୁବନେଶ୍ୱର: ଆଦିବାସୀଙ୍କ ଜୀବନ ଜୀବିକାକୁ ସବୁବେଳେ ଗୁରୁତ୍ୱ ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ସେମାନଙ୍କ ପାଖରେ ଶିକ୍ଷା ଓ ସ୍ୱାସ୍ଥ୍ୟ ପହଞ୍ଚାଇ ଜ୍ୱଳନ୍ତ ଉଦାହରଣ ସୃଷ୍ଟି କରିଛନ୍ତି । ତେବେ ବିଜେପିର ଆଦିବାସୀ ବିରୋଧୀ ମନୋଭାବ ଆଦିବାସୀଙ୍କୁ ଆଘାତ ଦେଇଛି । ମୁଖ୍ୟମନ୍ତ୍ରୀ ୧୬୯ ଆଦିବାସୀ ଜାତିଙ୍କୁ ମାନ୍ୟତା ଦେବା ପାଇଁ କେନ୍ଦ୍ରକୁ ପଠାଇଛନ୍ତି । ଆଦିମ ଜନଜାତିଙ୍କ ପାଖରେ ସାର୍ଟିଫିକେଟ ନଥିବାରୁ ପିଲାଙ୍କ ନାମଲେଖା ହୋଇପାରୁନି । ମାନ୍ୟତା ନଥିବାରୁ ଫରେଷ୍ଟ ରାଇଟ୍ ଆକ୍ଟରେ ଜମି ଅଧିକାର ମିଳୁନି । ଏନେଇ ୨୦୨୨ ସେପ୍ଟେମ୍ବରରେ କେନ୍ଦ୍ରକୁ ଚିଠି ଲେଖିଥିଲେ ମୁଖ୍ୟମନ୍ତ୍ରୀ।
ବିଜେଡି ସାଂସଦମାନେ ବାରମ୍ବାର ବିଭାଗୀୟ ମନ୍ତ୍ରୀଙ୍କୁ ଭେଟି ଦାବି ଜଣାଇଛନ୍ତି । ହେଲେ ଆଦିବାସୀଙ୍କୁ କେନ୍ଦ୍ର ଅଣଦେଖା କରୁଛି । ଆଦିବାସୀଙ୍କ ବିକାଶ ପାଇଁ ପ୍ରଥମ ରାଜ୍ୟ ଭାବେ ସ୍ୱତନ୍ତ୍ର ଉନ୍ନୟନ ପରିଷଦ ଗଠନ କରି ଆଦିବାସୀଙ୍କୁ ସମ୍ମାନ ଦେଇଛନ୍ତି ମୁଖ୍ୟମନ୍ତ୍ରୀ । ପ୍ରାଥମିକ ପର୍ଯ୍ୟାୟରେ ୨୦ଟି ଆଦିବାସୀ ଜାତିକୁ ମାନ୍ୟତା ପାଇଁ ମୁଖ୍ୟମନ୍ତ୍ରୀ ବାରମ୍ବାର ଦାବି କରୁଛନ୍ତି । ହେଲେ କେନ୍ଦ୍ର ଶୁଣୁନି । ଆଗାମୀ ଦିନରେ ଆଦିବାସୀ ସମାଜ ରାଜରାସ୍ତାରେ ଆନ୍ଦୋଳନ କରିବ ବୋଲି ବିଜେଡି ଚେତାବନୀ ଦେଇଛି ।
ସମ୍ବଲପୁରରେ ଆୟୋଜିତ ହୋଇଛି ପଶ୍ଚିମ ଓଡ଼ିଶା କୃଷି ଓ କୃଷି ଯନ୍ତ୍ରପାତି ମେଳା-୨୦୨୩
ସମ୍ବଲପୁର: ପଶ୍ଚିମ ଓଡ଼ିଶାରେ ବିରାଟ କୃଷିମେଳା । ସମ୍ବଲପୁରରେ ଆୟୋଜିତ ହୋଇଛି ପଶ୍ଚିମ ଓଡ଼ିଶା କୃଷି ଓ କୃଷି ଯନ୍ତ୍ରପାତି ମେଳା ୨୦୨୩ । ଆଜିଠୁ ୩୧ ତାରିଖ ପର୍ଯ୍ୟନ୍ତ ଏହି ମେଳା ଅନୁଷ୍ଠିତ ହେବ । ଏଥିରେ ପଶ୍ଚିମ ଓଡ଼ିଶାର ଶହଶହ ଚାଷୀ, କୃଷି ବିଜ୍ଞାନୀ ଓ ଉଦ୍ୟୋଗୀ ଯୋଗଦେଇଛନ୍ତି । ମେଳାରେ ୫୦୦ ଚାଷୀ ଯୋଗଦେଇଥିବା ସୂଚନା ମିଳିଛି । ନୂଆ କୃଷିନୀତି ତଥା ନୂତନ ଜ୍ଞାନ କୌଶଳର ଉପଯୋଗରେ କିଭଳି ଚାଷ କରାଯିବ ସେନେଇ ତାଲିମ ଦିଆଯାଉଛି । କୃଷି ଯନ୍ତ୍ରପାତିର ବ୍ୟବହାର ସମ୍ପର୍କରେ ଟ୍ରେନିଂ ଦେଉଛନ୍ତି ବିଶେଷଜ୍ଞ । ପଶ୍ଚିମ ଓଡ଼ିଶାରେ ପ୍ରଥମ ଥର ପାଇଁ ଏପରି କାର୍ଯ୍ୟକ୍ରମ ଆୟୋଜନ କରାଯାଇଥିବାରୁ ରାଜ୍ୟ ସରକାରଙ୍କୁ ପ୍ରଶଂସା କରିଛନ୍ତି ଚାଷୀ ।
ବିହାରରେ ଆତଙ୍କ ଖେଳାଇଲା ବୁଲା କୁକୁର, ୮୦ ଲୋକଙ୍କୁ କଲା ଆହତ
ପାଟନା: ବିହାର ଆରା ସହରରେ ଆତଙ୍କ ଖେଳାଇଲା ଏକ ବୁଲା କୁକୁର । ପ୍ରାୟ ୮୦ ଲୋକଙ୍କୁ କରିଛି ଆହତ । ଶିବଗଞ୍ଜ, ଶୀତଳା ତୋଳା, ମହାଦେବ ରୋଡ, ସଦର ହସ୍ପିଟାଲ ରୋଡରେ କୁକୁର କାମୁଡିବାରୁ ୮୦ ଲୋକ ଆହତ ହୋଇଛନ୍ତି । ଆହତମାନଙ୍କୁ ଜିଲ୍ଲା ହସ୍ପିଟାଲ ସମେତ ଅନ୍ୟାନ୍ୟ ହସ୍ପିଟାଲରେ ଭର୍ତ୍ତି କରାଯାଇଛି । କୁକୁରକୁ ଧରିବା ସମ୍ଭବ ହୋଇ ନଥିବାବେଳେ ତାକୁ ସନ୍ଧାନ କରିବା ଲାଗି ଖୋଜାଖୋଜି ଜାରି ରହିଛି । ବିଭିନ୍ନ ସ୍ଥାନରେ ପୋଲିସ ଓ ନିରାପତ୍ତାରକ୍ଷୀଙ୍କୁ ମୁତୟନ କରାଯାଇଛି ବୋଲି କହିଛନ୍ତି ଭୋଜପୁର ପୋଲିସ ଏସପି ପ୍ରମୋଦ କୁମାର ।