ବଲାଙ୍ଗିର: ସ୍ତ୍ରୀ ସରପଞ୍ଚ ହେଲେ ସ୍ୱାମୀ ହାତରେ ପଞ୍ଚାୟତର ଅସଲ କ୍ଷମତା । ଲାଞ୍ଚ ନେଇ କାମ କରିବାର ଡିଲ୍ କରନ୍ତି ପାୱାରଫୁଲ ସ୍ୱାମୀ । ଏମିତି ଏକ ଭିଡିଓ ଭାଇରାଲ୍ ହେବାରେ ଲାଗିଛି । ବଲାଙ୍ଗିର ବଙ୍ଗୋମୁଣ୍ଡାରେ ମନରେଗା କାମ ପାଇଁ ଠିକାଦାର ଠାରୁ ୩୦ ହଜାର ଟଙ୍କା ଲାଞ୍ଚ ନେଉଥିଲେ ସରପଞ୍ଚଙ୍କ ସ୍ୱାମୀ । ଯାହାର ଭିଡିଓ ଏବେ ଭାଇରାଲ ହୋଇଛି । ଲାଞ୍ଚ ଟଙ୍କା ନେଉଥିବା ବ୍ୟକ୍ତି ଜଣକ ହେଉଛନ୍ତି ବଲାଙ୍ଗିର ଜିଲ୍ଲା ବଙ୍ଗୋମୁଣ୍ଡା ବ୍ଲକ କଂଗ୍ରେସ ନେତା ଲକ୍ଷ୍ମୀକାନ୍ତ ବାଗ । ତାଙ୍କ ସ୍ତ୍ରୀ ଲୀଳାବତୀ ବାଗ ଠେମେରା ପଞ୍ଚାୟତର ସରପଞ୍ଚ ।
ଲକ୍ଷ୍ମୀକାନ୍ତ ମନରେଗା କାମ ପାଇଁ ଠିକାଦାର ଠାରୁ ୩୦ ହଜାର ଟଙ୍କା ଲାଞ୍ଚ ନେଉଛନ୍ତି । ୨୦ହଜାର ଟଙ୍କା କନିଷ୍ଠ ଯନ୍ତ୍ରୀଙ୍କୁ ଦେବାକୁ କହୁଛନ୍ତି । ହେଲେ ଠିକାଦାର କନିଷ୍ଠ ଯନ୍ତ୍ରୀଙ୍କୁ ୧୦ ହଜାର ଟଙ୍କା ଦେଇଥିବା କହୁଛନ୍ତି । ଯାହା ଭାଇରାଲ ଭିଡିଓରେ ସ୍ପଷ୍ଟ ଶୁଣାଯାଉଛି । ଏହାକୁ ନେଇ ବ୍ଲକ ପ୍ରଶାସନ ମଧ୍ୟ ଅଡୁଆରେ ପଡ଼ିଛି । ଜିଲ୍ଲା ପ୍ରଶାସନ ଠେମେରା ପଞ୍ଚାୟତରେ ହୋଇଥିବା ମନରେଗା କାମର ନିରପେକ୍ଷ ତଦନ୍ତ କଲେ ଲକ୍ଷ୍ମୀକାନ୍ତ କରିଥିବା ବଡ଼ ଧରଣର ଦୁର୍ନୀତି ଧରା ପଡ଼ିବ ବୋଲି ଲୋକେ ଦାବି କରୁଛନ୍ତି ।
