spot_img
Home Blog Page 5148

ଚୁକ୍ତିଭିତ୍ତିକ କର୍ମଚାରୀଙ୍କୁ ନବୀନଙ୍କ ଦୀପାବଳି ଭେଟି

ଭୁବନେଶ୍ୱର: ରାଜ୍ୟ ସରକାରଙ୍କ ବିଭିନ୍ନ ବିଭାଗରେ ଆଉଟସୋରସିଂ ସଂସ୍ଥା ଜରିଆରେ ତଥା ଚୁକ୍ତିଭିତ୍ତିରେ ନିୟୋଜିତ କର୍ମଚାରୀଙ୍କ ପାରିଶ୍ରମିକରେ ୨୫ ପ୍ରତିଶତ ବୃଦ୍ଧି । ଘୋଷଣା କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏହାଦ୍ୱାରା ଓଡିଶା ସରକାରଙ୍କ ବିଭିନ୍ନ ବିଭାଗରେ ନିୟୋଜିତ ପ୍ରାୟ ୩୩ ହଜାର ବ୍ୟକ୍ତି ଉପକୃତ ହେବେ । ଏଥିପାଇଁ ରାଜ୍ୟ ସରକାରଙ୍କୁ ବାର୍ଷିକ ଅଧିକ ୧୦୦ କୋଟି ଟଙ୍କା ଖର୍ଚ୍ଚ କରିବାକୁ ପଡିବ ।

ଆଉଟସୋରସିଂ ଓ ଚୁକ୍ତିଭିତ୍ତିରେ ନିୟୋଜିତ ଏହି ବ୍ୟକ୍ତି ମାନଙ୍କର ଇପିଏଫ ଓ ଇଏସ୍ଆଇ ପରି ବୈଧାନିକ ଦେୟ ସଂପୃକ୍ତ ସଂସ୍ଥା ପୈଠ କରିବେ । ସେମାନେ କାମ କରୁଥିବା ବିଭାଗର କର୍ତ୍ତୃପକ୍ଷ ଏହା ସୁନିଶ୍ଚିତ କରିବେ । ଉପରୋକ୍ତ ବୈଧାନିକ ଦେୟ ପୈଠ କରିବାରେ ହେଳା କରୁଥିବା ସଂସ୍ଥାଗୁଡିକ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି । ଏହାସହ ସେମାନଙ୍କୁ ବର୍ଷକୁ ସର୍ବାଧିକ ୧୨ ଦିନ ଛୁଟି ମଞ୍ଜୁର କରିବା ପାଇଁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି ।

ସେହିପରି ଗର୍ଭବତୀ ମହିଳାଙ୍କ କ୍ଷେତ୍ରରେ ମାତୃତ୍ୱ ଛୁଟି ପ୍ରଦାନ ବିଷୟ ବିଚାର କରି ନିଷ୍ପତ୍ତି ନେବା ପାଇଁ ମୁଖ୍ୟମନ୍ତ୍ରୀ ସଂପୃକ୍ତ କର୍ତ୍ତୃପକ୍ଷଙ୍କୁ ପରାମର୍ଶ ଦେଇଛନ୍ତି ।

ଟି-୨୦ ପରେ ଟିମ୍ ଇଣ୍ଡିଆ ମୁଖ୍ୟ କୋଚ୍ ପଦ ସମ୍ଭାଳିବେ ଦ୍ରାବିଡ଼

ମୁମ୍ବାଇ: ସବୁ କଳ୍ପନାଜଳ୍ପନାର ଅନ୍ତ । ଭାରତୀୟ କ୍ରିକେଟ୍ ଟିମର ମୁଖ୍ୟ କୋଚ୍ ହେବେ ଦି ଓ୍ବାଲ ରାହୁଲ ଦ୍ରାବିଡ଼ । ଅନୁମୋଦନ ଦେଲା ବିସିସିଆଇ ଅନୁମୋଦନ କମିଟି । ଟି-୨୦ ବିଶ୍ବକପ ପରେ ଦାୟିତ୍ବ ସମ୍ଭାଳିବେ ଦ୍ରାବିଡ଼ ।

କ୍ରିକେଟ ପଡ଼ିଆରୁ ସନ୍ୟାସ ନେଇଥିଲେ ବି କ୍ରିକେଟରୁ ଦୂରେଇ ନାହାନ୍ତି ଦ୍ରାବିଡ଼ । ଆଜି ବି ଭାରତୀୟ କ୍ରିକେଟକୁ ପରଦା ପଛରେ ରହି ଯୋଗାଇ ଆସିଛନ୍ତି ବୁଷ୍ଟର ଡୋଜ୍ । ତାଙ୍କ ପ୍ରଶିକ୍ଷଣରେ ଇଣ୍ଡିଆନ କ୍ରିକେଟ୍ ଟିମ୍ ପାଇଛି ଏକାଧିକ ଯୁବ କ୍ରିକେଟର୍ ।

ବର୍ତ୍ତମାନ ମୁଖ୍ୟ କୋଚ ରବି ଶାସ୍ତ୍ରୀଙ୍କ କାର୍ଯ୍ୟକାଳ ଟି-୨୦ ବିଶ୍ବକପ୍ ପରେ ଶେଷ ହେଉଛି । ଏହାସହ ତାଙ୍କ ସହଯୋଗୀ ଷ୍ଟାଫଙ୍କର ମଧ୍ୟ କାର୍ଯ୍ୟକାଳ ସରୁଛି । ଟି-୨୦ ବିଶ୍ବକପ ପରେ ନ୍ୟୁଜିଲାଣ୍ଡ ବିପକ୍ଷରେ ଖଳାଯିବ ଘରୋଇ ସିରିଜ । ଏଥିରେ ଦ୍ରାବିଡ଼ ମୁଖ୍ୟ କୋଚ୍ ରହିବେ ।

ଦୀଘ୍ର ଦିନରୁ ଦ୍ରାବିଡ଼ଙ୍କୁ ମୁଖ୍ୟ କୋଚ୍ କରିବାକୁ ବିସିସିଆଇ କଥା ହେଉଥିଲେ । ପ୍ରଥମେ ଦ୍ରାବିଡ଼ ମନା କରି ଦେଇଥିଲେ । ହେଲେ UAEରେ ଏବ ବୈଠକ ପରେ ଦ୍ରାବିଡ଼ ମୁଖ୍ୟ କୋଚ୍ ପଦ ପାଇଁ ଆବେଦନ କରିଥିଲେ ।

ଦ୍ରାବିଡ଼ କହିଛନ୍ତି, ‘ଟିମ୍ ଇଣ୍ଡିଆର କୋଚ୍ ହେବା ଗର୍ବର କଥା । ରବି ଶାସ୍ତ୍ରୀଙ୍କ ନେତୃତ୍ବରେ ଦଳ ବହୁତ ଭଲ ଖେଳିଛି । ଏହାକୁ ମୁଁ ଆଗକୁ ନେବାକୁ ପୂରା ଚେଷ୍ଟା କରିବି ।’

ସେ ଆହୁରି କହିଛନ୍ତି, ‘ମୁଁ ବହୁ ଖେଳାଳିଙ୍କ ସହ ଇଣ୍ଡିଆ-ଏ, ଅଣ୍ଡର-୧୯ ଓ ଏନସିଏରେ କାମ କରିଛି । ଏମିତି ସ୍ଥିତିରେ ସେମାନଙ୍କ ସହ କାମ କରିବାରେ ମଜା ଆସିବ । ଆଗାମୀ ଦୁଇ ବର୍ଷରେ ବଡ଼ ଟୁର୍ଣ୍ଣାମେଣ୍ଟ ଅଛି । ସମସ୍ତିଙ୍କ ସହ ମିଶି ଟିମ୍ ଇଣ୍ଡିଆକୁ ଆଗକୁ ନେବୁ ।’

ମହାଲିଙ୍ଗ କଲେଜ ମିଛ ଗୁଜବରୁ ହଟୁଛି ପରଦା

ଧର୍ମଗଡ଼: ମହାଲିଙ୍ଗ କଲେଜକୁ ନେଇ ମିଛ ଗୁଜବ ଉପରୁ ହଟୁଛି ପରଦା । ମମିତା ମେହେର ହତ୍ୟା ମାମଲାରେ ବିନା କାରଣରେ କାଠଗଡ଼ାକୁ ଟଣା ହୋଇଥିଲା ମହାଲିଙ୍ଗ କଲେଜ୍‌। ସୁରକ୍ଷିତ ବାତାବରଣରେ ଶିକ୍ଷାଦାନ ଚାଲୁଥିବା ବେଳେ ମିଛ ଅପବାଦ ଆଣିଥିଲା ସତ ଆତଙ୍କ । ହେଲେ ଏବେ ବଦନାମୀର ମିଛ କାଳିମା ହଟିଛି, ପାଠପଢା ସହ ଫେରୁଛି ସ୍ୱାଭାବିକ ସ୍ଥିତି । ସେପଟେ କଲେଜର ସମସ୍ତ ଦସ୍ତାବିଜକୁ ପ୍ରଶାସନ ଯାଞ୍ଚ କରିବା ସହ ଗଭର୍ଣ୍ଣିଂ ବଡି ପାଇଁ ଅନୁମତି ଦେବେ ନା ନାହିଁ ସେନେଇ ବିଚାର ଚାଲିଛି ।

ମମିତା ହତ୍ୟା ମାମଲାରେ ମହାଲିଙ୍ଗ କଲେଜ ଉପରେ ବୋଳା ହୋଇଥିଲା ମିଛ କାଳିମା। ନା ତଥ୍ୟ ନା ପ୍ରମାଣ, ଅଭିଯୁକ୍ତକୁ ଯୋଡ଼ି କଲେଜକୁ କାଠଗଡ଼ାକୁ ଟଣାଗଲା । ଦୋଷ କଲା ଜଣେ, ବିନା ଦୋଷରେ ବଦନାମ୍‌ ହେଲା କଲେଜ । ବାଜିରେ ଲାଗିଲା ୨ହଜାର ପିଲାଙ୍କ ଭବିଷ୍ୟତ । ଏବେ ଗୁଜବ ଉପରୁ ପରଦା ଉଠିଛି । ଫସର ଫାଟିଛି ଅପପ୍ରଚାରକାରୀଙ୍କ ଯୋଜନା। ମିଛର କଳାବାଦଲ ହଟିଛି, ଏବେ ଜଳଜଳ ଦିଶୁଛି ମହାଲିଙ୍ଗ କଲେଜର ସତ । ଭବିଷ୍ୟତ ଗଢିବାକୁ କ୍ୟାମ୍ପସରେ କୋଳାହଳ । ଗତକାଲିଠାରୁ ଯୁକ୍ତଦୁଇ ପ୍ରଥମ ବର୍ଷ କଲେଜ ସହ ହଷ୍ଟେଲ ବି ଖୋଲିଛି । କ୍ଲାସରୁମ୍‌ ଓ ବିଜ୍ଞାନ ଲ୍ୟାବରେ ପଢୁଛନ୍ତି ପିଲା ।

ସେପଟେ ଧର୍ମଗଡ ଉପଜିଲ୍ଲାପାଳଙ୍କ ନେତୃତ୍ୱରେ ଜିଲ୍ଲା ଶିକ୍ଷା ଅଧିକାରୀ, ବ୍ଲକ ଶିକ୍ଷା ଅଧିକାରୀ ଓ ମାଜିଷ୍ଟ୍ରେଟ ଦାୟିତ୍ଵରେ ଥିବା ଗୋଲାମୁଣ୍ଡା ତହସିଲଦାର କଲେଜକୁ ଯାଇ ତଦନ୍ତ କରିଛନ୍ତି l ପୂର୍ବଭଳି କଲେଜରେ ପାଠପଢ଼ା ଚାଲିଛି । କୌଣସି ଗୁଜବରେ ଭୟ ନକରି ନିୟମିତ ଭାବେ କଲେଜ ଆସିବାକୁ କହିଛନ୍ତି ଅଧ୍ୟାପକ ସୁଶାନ୍ତ ନାଏକ ।

ମମିତା ହତ୍ୟା ମାମଲାରେ ଆଇନ ଫାଶରେ ଅଭିଯୁକ୍ତ । ତଦନ୍ତ ଚାଲିଛି, ତଥ୍ୟ, ପ୍ରମାଣ ଯୋଗାଡ଼ କରାଯାଉଛି । ହେଲେ ବିନା କାରଣରେ ମହାଲିଙ୍ଗ କଲେଜକୁ ବଦନାମ୍‌ କରିବାକୁ ଉଦ୍ୟମ ହୋଇଥିଲା । ଅପରାଧ ପାଇଁ ମିଛରେ ଆତଙ୍କ ସୃଷ୍ଟି କରାଯାଇଥିଲା । ଏବେ ସତ ସାମନାକୁ ଆସିବା ପରେ କଲେଜରେ ସ୍ୱାଭାବିକ ହେଉଛି ପାଠପଢ଼ା।

ମୋଦିଙ୍କ ଦୀପାବଳି ଗିପ୍ଟ ; କମିଲା ପେଟ୍ରୋଲ-ଡିଜେଲ ଦର

ନୂଆଦିଲ୍ଲୀ: ଦୀପାବଳିରେ ସାଧାରଣ ଲୋକଙ୍କୁ ଗିପ୍ଟ ଦେଇଛି କେନ୍ଦ୍ର ସରକାର । ପେଟ୍ରୋଲ-ଡିଜେଲ ଦିନକୁ ଦିନ ଆକାଶ ଛୁଆଁ ହେବାରେ ଲାଗିଛି । ତେବେ ଏ ଭିତରେ କେନ୍ଦ୍ର ସରକାର ଏହାକୁ ନେଇ ଏକ ବଡ଼ ଘୋଷଣା କରିଛନ୍ତି । ଦୀପାବଳିର ପୂର୍ବ ସନ୍ଧ୍ୟାରୁ କେନ୍ଦ୍ର ସରକାର ପେଟ୍ରୋଲ-ଡିଜେଲ ଉପରୁ ଏକ୍ସାଇଜ ଡ୍ୟୁଟି ହ୍ରାସ କରିଛନ୍ତି । ଆସନ୍ତା କାଲିଠାରୁ ପେଟ୍ରୋଲରେ ପ୍ରତି ଲିଟର ପିଛା ୫ ଟଙ୍କା କମିଥିବା ବେଳେ ଡିଜେଲରେ ପ୍ରତି ଲିଟର ପିଛା ୧୦ ଟଙ୍କା ହ୍ରାସ ପାଇଛି । ତେବେ କେନ୍ଦ୍ର ସରକାର ଏକ୍ସସାଇଜ ଡ୍ୟୁଟି କମ୍ କରିଥିବାବେଳେ ରାଜ୍ୟ ସରକାର ବି ଏକ୍ସସାଇଜ ଡ୍ୟୁଟି କମ୍ କରିବେ ବୋଲି ଆଗ୍ରହ୍ୟ ଦର୍ଶାଇଛନ୍ତି ।

୧୨ ଲକ୍ଷ ଦୀପ ଜଳାଇ ବିଶ୍ୱ ରେକର୍ଡ; ଆଲୋକ ମାଳାରେ ଝଲସୁଛି ଅଯୋଧ୍ୟା ନଗରୀ

ନୂଆଦିଲ୍ଲୀ: ଦୀପାବଳି ପୂର୍ବରୁ ଉଲ୍ଲସିତ ପୁରା ଦେଶ । ଅଯୋଧ୍ୟାରେ ଚାଲିଛି ଦୀପୋତ୍ସଭ କାର୍ଯ୍ୟକ୍ରମ । ପ୍ରଭୁ ରାମଚନ୍ଦ୍ର ଓ ଦେବୀ ସୀତାଙ୍କୁ ବନ୍ଦାପନା ସହିତ ଉତ୍ସବମୁଖର ହୋଇଛି ଅଯୋଧ୍ୟା ନଗରୀ। ପ୍ରତୀକାତ୍ମକ ଶୋଭାଯାତ୍ରାରେ ଭଗବାନ ରାମ ଏବଂ ମାତା ସୀତାଙ୍କ ଭୂମିକାରେ ଅଭିନୟ କରୁଥିବା କଳାକାରଙ୍କୁ ପୂଜାର୍ଚ୍ଚନା କରାଯାଇଛି ।

୧୨ଲକ୍ଷ ଦୀପ ଜାଳି ଚଳିତବର୍ଷ ଗିନିଜ ବୁକ ଅଫ୍ ରେକର୍ଡରେ ସ୍ଥାନ ପାଇବ ଅଯୋଧ୍ୟା । ୧୨ ଲକ୍ଷ ଦୀପ ମଧ୍ୟରୁ କେବଳ ପ୍ରଭୁ ଶ୍ରୀରାମଙ୍କ ପାଦରେ ୯ ଲକ୍ଷ ଦୀପ ଜଳାଯାଇଛି। ବାକି ସ୍ଥାନରେ ୩ ଲକ୍ଷର ଦୀପ ପ୍ରଜ୍ୱଳିତ କରାଯାଇଥିଲା । ସେପଟେ ଛୋଟ ଛୋଟ ମଞ୍ଚ ପ୍ରସ୍ତୁତ କରାଯାଇ ଦୀପୋତ୍ସବ ହୋଇଛି। ଏଥିପାଇଁ ୩୬ ହଜାର ଲିଟରର ସୋରିଷ ତେଲକୁ ବ୍ୟବହାର କରାଯାଇଛି ।

ମଞ୍ଚରେ ଲଙ୍କା ଦହନ ଭଳି କାର୍ଯ୍ୟକ୍ରମ ଅନୁଷ୍ଠିତ ହେଉଛି । ଭଗବାନ ରାମଙ୍କ ଲୀଳା ସମ୍ବଦ୍ଧିୟ ନାନା ନାଟକ ଅନୁଷ୍ଠିତ ହେଉଛି । ସେପଟେ ଉତ୍ତରାଖଣ୍ଡର କେଦାରନାଥ ମଧ୍ୟ ଦୀପାବଳି ପାଇଁ ଉତ୍ସବମୁଖର ହୋଇଛି ।

ପଶିଲା ଚେତା, ଏବେ ଭଙ୍ଗାଘର ସଜାଡ଼ିବ କଂଗ୍ରେସ

ଭୁବନେଶ୍ୱର: ରାଜ୍ୟ କଂଗ୍ରେସର ଚେତା ପଶିଲା । ଏବେ ବାଦବିବାଦ ନୁହେଁ କି ଚୌକି ପାଇଁ ଲଢେଇ ନୁହେଁ, ଦଳକୁ ଶୃଙ୍ଖଳିତ ଓ ସଂଗଠିତ କରିବାକୁ ଏକଜୁଟ ହୋଇ ମାନସ ମନ୍ଥନ ଆରମ୍ଭ କରିଛନ୍ତି ନେତାଏ । ସ୍ୱତନ୍ତ୍ର କମିଟି ଗଠନ କରାଯାଇ ଦଳର ଗୋଷ୍ଠୀ ବିବାଦ ମୂଳପୋଛ କରାଯିବ ବୋଲି ପରିବର୍ଦ୍ଧିତ କାର୍ଯ୍ୟକାରିଣୀରେ ଦିଆଯାଇଛି ପ୍ରସ୍ତାବ । ହେଲେ, ପ୍ରସ୍ତାବକୁ ନେଇ ଆସିଛି ଦ୍ଵିମତ । ନେତାଙ୍କ ମଧ୍ୟରେ ଆରମ୍ଭ ହୋଇଛି ବାକଯୁଦ୍ଧ । ଯାହାକୁ ନେଇ ହାତ ଶିବିର ସରଗରମ ।

ଏକା ଲଢିଲେ, ବାରମ୍ବାର ହାରିଲେ । ଏପରିକି ରାଜ୍ୟରେ ଦଳ ଦ୍ଵିତୀୟ ପୋଜିସନରୁ ତୃତୀୟକୁ ଚାଲିଆସିଲା । ସାଧାରଣ ନିର୍ବାଚନ ଓ ଉପନିର୍ବାଚନରେ ବି ବିଫଳତାର ସ୍ୱାଦ ଚାଖିଲା ଦଳ । ଏବେ ମନ ଘର ଧରିଛି । ଅସଜଡ଼ା ଘରକୁ ସଜାଡ଼ିବ କଂଗ୍ରେସ । ଗୋଷ୍ଠୀ ବିବାଦ ଦୂର କରିବାକୁ ଗଠନ ହେବ ସ୍ୱତନ୍ତ୍ର କମିଟି । ଦଳର ପରିବର୍ଦ୍ଧିତ କାଯ୍ୟକାରିଣୀ ବୈଠକରେ ବରିଷ୍ଠ ନେତା ଓ ବିଧାୟକମାନେ ଏହି ପ୍ରସ୍ତାବ ଦେଇଛନ୍ତି । କମିଟି ଗଠନ ପୂର୍ବରୁ ଦଳରେ ଥିବା ଗୋଷ୍ଠୀ କନ୍ଦଳ ଦୂର କରିବା ପାଇଁ ପ୍ରଥମେ ବରିଷ୍ଠ ନେତାଙ୍କ ସହ ପିସିସି ସଭାପତିଙ୍କ ସହ ୱାନ ଟୁ ୱାନ କରିବେ ବୋଲି ପ୍ରସ୍ତାବ ଦେଇଛନ୍ତି ବିଧାୟକ ତାରା ପ୍ରସାଦ ବାହିନୀପତି । ଅନ୍ୟପଟେ ଦଳରେ ଯେଉଁମାନେ ବିଶୃଙ୍ଖଳା କରୁଛନ୍ତି ସେମାନଙ୍କୁ ତୁରନ୍ତ ବହିଷ୍କାର କରାଯିବା ଦରକାର ବୋଲି ତାରାଙ୍କୁ ସମଥର୍ନ କରି କହିଛନ୍ତି ପୂର୍ବତନ ବିଧାୟକ ଦେବାଶିଷ ପଟ୍ଟନାୟକ ।

କିନ୍ତୁ ତାରା ଓ ଦେବାଶିଷଙ୍କ ମନ୍ତବ୍ୟରେ ସହମତ ନୁହଁନ୍ତି ଜଟଣୀ ବିଧାୟକ ତଥା ବରିଷ୍ଠ ନେତା ସୁରେଶ ରାଉତରାୟ । ସେ କହିଛନ୍ତି, ଦଳର ଶୃଙ୍ଖଳା ପ୍ରସ୍ତାବ ନେଇ ତାରା ଓ ଦେବାଶିଷଙ୍କ ମନ୍ତବ୍ୟକୁ ନେଇ ବର୍ଷିଛନ୍ତି ସୁରେଶ । ଦଳର ଶୃଙ୍ଖଳା କଥା କେବଳ ହାଇକମାଣ୍ଡ କହିବେ ଓ ସ୍ଥିର କରିବେ । ବିଧାୟକ ତାରା ବାହିନୀପତି ଓ ସପ୍ତଗିରି ଉଲାକା ମଧ୍ୟରେ ହୋଇଥିବା ବିବାଦରେ ଉଲାକାକୁ ସମର୍ଥନ କରି ଏହି  ନିଆଁରେ ଘିଅ ଢାଳିଛନ୍ତି ସୁର । ଏହାସହ କଂଗ୍ରେସର ଥିବା ଗୋଷ୍ଠୀ କନ୍ଦଳର ପ୍ୟାଚ୍‌ ପଡ଼ିଯାଇଥିବା ସେ କହିଛନ୍ତି ।

୨୧ ବର୍ଷ ଧରି କ୍ଷମତା ବାହାରେ ରହିବା ଓ ଗୋଷ୍ଠୀର ପୁରୁଣା ବିବାଦ ଯୋଗୁଁ ରାଜ୍ୟରେ କଂଗ୍ରେସର ଭୋଟହାର କମିବା ସହ ତୃଣମୂଳସ୍ତରରୁ ରାଜ୍ୟ ମଙ୍ଗୁଆଳ ସାଜିଥିବା ନେତାଏ ଦଳ ଛାଡ଼ୁଛନ୍ତି । ଯାହା ହାତ ଶିବିରକୁ ଚିନ୍ତାରେ ପକାଇଛି । ଏଥିରୁ ମୁକୁଳିବା ପାଇଁ ଦଳର ସ୍ୱତନ୍ତ୍ର କମିଟି କେତେ ସଫଳତା ହାସଲ କରୁଛି ତାହା ଉପରେ ରହିବ ସମସ୍ତଙ୍କ ନଜର ।

ଉପନିର୍ବାଚନରେ ଭୋଟର ଦେଲେ ବିଜେପିକୁ ଦରଦାମ ବୃଦ୍ଧିର ଜବାବ

ଭୁବନେଶ୍ୱର: ବିଜେପିକୁ ‘ମହଙ୍ଗା’ ମାଡ଼ । ଉପନିର୍ବାଚନ ଫଳ କଲା ଫେଷ୍ଟିଭ ମୁଡ୍‌କୁ ଫିକା । ହିନ୍ଦୀ ହାର୍ଟଲ୍ୟାଣ୍ଡରେ ମଉଳିଲା ପଦ୍ମ ପାଖୁଡା । ବିରୋଧୀ କଂଗ୍ରେସ ପାଇଁ ଅଚ୍ଛେ ଦିନ । କର୍ଣ୍ଣାଟକ, ହିମାଚଳ ପ୍ରଦେଶ ଓ ହରିୟାଣା ଉପନିର୍ବାଚନରେ ବିଜେପି କ୍ଲିନ ବୋଲ୍ଡ । ଏହି ତିନି ରାଜ୍ୟରେ ବିଜେପି କ୍ଷମତାରେ ଥିଲେ ବି କଂଗ୍ରେସ ଚାଖିଛି ବିଜୟ ସ୍ୱାଦ । ପଶ୍ଚିମବଙ୍ଗରେ ତ ଦିଦିଙ୍କୁ ହାତ ମାରିବା ବିଜେପି ପାଇଁ ମୁସକିଲ ହୋଇ ପଡ଼ିଲାଣି । ଗତକିଛି ମାସ ମଧ୍ୟରେ ଉପନିର୍ବାଚନ ଫଳାଫଳ ବିଜେପିକୁ ଆଇନା ଦେଖାଇଛି ।

ଆଞ୍ଚଳିକ ଦଳର ଦବ୍‌ଦବା ବଢୁଥିବା ବେଳେ କଂଗ୍ରେସ ପାଇଁ ଆଣିଛି ଶୁଭ ସଙ୍କେତ । ଦର ବୃଦ୍ଧି ନେଇ ଜନ ଅସନ୍ତୋଷ ଉପନିର୍ବାଚନରେ ବଡ଼ କାରଣ ଭାବେ ଉଭା ହୋଇଛି । ସବକା ସାଥ୍ ସବକା ବିକାଶର ଗାଥା ଗାଉଥିବା ବିଜେପି ଉପରୁ ଆସ୍ଥା ହରାଇଛନ୍ତି ଲୋକେ । ନୂଆ କୃଷି ଆଇନ ସାଙ୍ଗକୁ ଦରଦାମ ବୃଦ୍ଧି ପାଇଁ ବିଜେପିଠୁ ମୁହଁ ମୋଡିଛନ୍ତି ଭୋଟର । ବିଜେପି ସରକାରଙ୍କ କର୍ପୋରେଟ ପ୍ରୀତି, ଚାଷୀ ମାରଣ ନୀତି ସାବ୍ୟସ୍ତ ହେଲାଣି । ସେଥିପାଇଁ ଭୋଟର ବିରୋଧୀଙ୍କୁ ଆଗକୁ ଆଣିଛନ୍ତି । ଦରଦାମ ବଢୁଥିବା ବେଳେ ବିଜେପିର ଦମ ଖସୁଥିବା ବିଜେଡି ଓ କଂଗ୍ରେସ ନେତା କହିଛନ୍ତି ।

ଦେଶର ଉପନିର୍ବାଚନ ଫଳ ବିଜେପି ବିରୋଧରେ ଯାଉଛି । ବିଜେପି ବିରୋଧୀ ହାଓ୍ବା ବହୁ ପୂର୍ବରୁ ଓଡ଼ିଶାରେ ଦେଖିବାକୁ ମିଳିଥିଲା । ୨୦୧୯ ନିର୍ବାଚନରେ ବିଜେପି ଜିତିଥିବା ବାଲେଶ୍ୱର ବିଧାନସଭାକୁ ଉପନିର୍ବାଚନରେ ହରାଇଥିଲା । ତିର୍ତ୍ତୋଲ ଓ ପିପିଲିରେ ସମଦଶା ଭୋଗିଛି ଗେରୁଆ ଦଳ । ସେପଟେ ପରାଜୟର ସମୀକ୍ଷା କଥା କହି ଦରଦାମ ବୃଦ୍ଧିର କାରଣକୁ ଏଡ଼ାଇ ଯାଇଛି ବିଜେପି ।

ଦର ବୃଦ୍ଧି ପାଇଁ ଭୁଶୁଡିଥିଲା କଂଗ୍ରେସ ସରକାର । ତାକୁ ହିଁ ମୁଖ୍ୟ ପ୍ରସଙ୍ଗ କରି କ୍ଷମତାକୁ ଦୁଇ ଦୁଇ ଥର ଆସିଲାଣି ଏନଡିଏ । ହେଲେ ଏଥର ଲୋକେ ବିଜେପିର ପ୍ରକୃତ ଚେହେରା ଦେଖିସାରିଲେଣି । ଯାହା ଦଳ ପାଇଁ ଦୁର୍ଗତି ଡାକି ଆଣିଛି । ତ୍ରୁଟିପୂର୍ଣ୍ଣ ନୀତିର ଓକିଲାତି ଛାଡ଼ି ଦେଶ ନସଜାଡ଼ିଲେ ଆଗକୁ ବିଜେପି ବ୍ୟାକଫୁଟକୁ ଆସିବା ନେଇ ବିଶେଷଜ୍ଞ ଅନୁମାନ କଲେଣି ।

ଦୀପାବଳିରେ ଏହି ଜିନିଷ ଖାଇଲେ ଭାଗ୍ୟରେ କରିପାରିବେ ଉନ୍ନତି

ଧନତେରସ ପରେ ଆଜିର ଦିନକୁ ଛୋଟ ଦୀପାବଳି ଭାବେ ପାଳନ କରାଯାଏ  । ୪ ନଭେମ୍ବର ଦୀପାବଳି ଉତ୍ସବ ପାଳନ କରାଯାଉଥିବା ବେଳେ ୫କୁ ଗୋବର୍ଦ୍ଧନ ପୂଜା ଓ ୬ରେ ଭାଇ ଟିକା ପାଳନ ହୁଏ  । ଏସବୁକୁ ଓଡ଼ିଶାରେ ପାଳନ କରାଯାଉ ନଥିବା ବେଳେ ଭାରତର ଅନ୍ୟ ରାଜ୍ୟମାନଙ୍କରେ ବହୁ ଜାକଜମକରେ ପାଳନ କରାଯାଏ  । ଆପଣ ଜାଣିଛନ୍ତି କି ଏହି ସବୁ ପୂଜାରେ କିଛି ଏମିତି ଜିନିଷ ଅଛି ଯାହାକୁ ଖାଇଲେ ଶୁଭ ଫଳପ୍ରଦ ହୋଇଥାଏ । ଏହା କୁହାଯାଏ କି ଏହା ଖାଇବା ଦ୍ୱାରା ସବୁ କାମ ଭଲରେ ସମ୍ପୂର୍ଣ୍ଣ ହୁଏ  ।

ଓଡ଼ିଶାରେ ପର୍ବପର୍ବାଣୀର ଋତୁ ଆରମ୍ଭ ହୋଇଯାଇଥିବା ବେଳେ ଚଳିତ ସପ୍ତାହଟି ଉତ୍ସବର ସପ୍ତାହ  । ଧନତେରସ ପରେ ଆଜିର ଦିନକୁ ଛୋଟ ଦୀପାବଳି, ୪ ନଭେମ୍ବରକୁ ଦୀପାବଳି ଉତ୍ସବ ପାଳନ କରାଯାଉଥିବା ବେଳେ ୫କୁ ଗୋବର୍ଦ୍ଧନ ପୂଜା ଓ ୬ରେ ଭାଇ ଟିକା ପାଳନ କରାଯିବ  ।

ତେବେ ଆସନ୍ତୁ ଜାଣିବା କେଉଁ ପର୍ବରେ କ,ଣ ଖାଇଲେ ଶୁଭ ହୁଏ ?

ଧନତେରସ :

ଧନତେରସରେ ଉତ୍ତର ଭାରତରେ ଛୋଟ ଝିଅମାନଙ୍କୁ ‘ଦହି ବତାଶା’ (ଏକ ପ୍ରକାର ମିଠା ଖାଦ୍ୟ) ଖୁଆ ଯାଉଥିବା ବେଳେ ଏହାକୁ ବତାଶା ଗୁପଚୁପ୍ ମଧ୍ୟ କୁହାଯାଏ  । ମାତ୍ର ଏଥିରେ ତେନ୍ତୁଳି ପାଣି ଜାଗାରେ ଦହିର ବ୍ୟବହାର କରାଯାଏ  । ଏହା ବ୍ୟତୀତ ଧନତେରସରେ ଗୁଡ଼ କ୍ଷୀରି ଓ ପଞ୍ଚାମୃତ ଭୋଗକୁ ଶୁଭ ମାନିଥାନ୍ତି  ।

ଛୋଟ ଦୀପାବଳି :

ହିନ୍ଦୁ ଧର୍ମ ଅନୁଯାୟୀ କାର୍ତ୍ତିକ ମାସ କୃଷ୍ନ ଚତୁର୍ଦ୍ଦଶୀରେ ପବନ ପୁତ୍ର ହନୁମାନଙ୍କ ଜନ୍ମ ହୋଇଥିଲା  । ହନୁମାନଙ୍କ ପ୍ରିୟ ଖାଦ୍ୟ ବୁନ୍ଦି ଲଡ଼ୁ  । ଏଥିପାଇଁ ଏହିଦିନ ବୁନ୍ଦିଲଡ଼ୁ ଖାଇବା ଶୁଭ ହୋଇଥାଏ  । ଭଗବାନଙ୍କ ନିକଟରେ ବୁନ୍ଦିଲଡ଼ୁର ଭୋଗ ଲଗାଇ ଏହି ପ୍ରସାଦ ବିତରଣ ମଧ୍ୟ କରାଯାଏ  ।

ଦୀପାବଳି :

ଦୀପାବଳିରେ ମା’ ଲକ୍ଷ୍ମୀଙ୍କୁ ଭୋଗ ଲଗାଇ ଏହାର ପ୍ରସାଦ ପାଇଲେ ଅତ୍ୟନ୍ତ ଶୁଭ ହୋଇଥାଏ  ।

ଗୋବର୍ଦ୍ଧନ ପୂଜା :

ଦୀପାବଳି ପରଦିନ ଗୋବର୍ଦ୍ଧନ ପୂଜା ପାଳନ କରାଯାଏ  । ଏହି ଦିନ ମାଲପୁଆ ଖାଇବାର ପରମ୍ପରା ରହିଛି  । ଏହି ପୂଜାରେ ଘରେ ବିଭିନ୍ନ ପ୍ରକାର ସ୍ୱାଦିଷ୍ଟ ଖାଦ୍ୟ ତିଆରି କରାଯାଇଥାଏ  । ଏହା ଭିତରୁ ମାଲପୁଆ ସ୍ୱତନ୍ତ୍ର  । ଗୋବର୍ଦ୍ଧନ ପୂଜାରେ ଏହାର ଭୋଜନ ଅତ୍ୟନ୍ତ ଶୁଭ  ।

ଭାଇ ଟିକା/ଭାଇ ପୂଜା :

ଭାଇ ପୂଜା ଓ ଭାଇ ଟିକା ଓଡ଼ିଶାର ପର୍ବ ହୋଇନଥିଲେ ମଧ୍ୟ ଗୁଜୁରାଟ, ହରିୟାଣା, ମହାରାଷ୍ଟ୍ର ଆଦି ରାଜ୍ୟମାନଙ୍କରେ ପାଳନ ଧୁମଧାମରେ ପାଳନ ହୁଏ । ଠିକ୍ ରାକ୍ଷୀ ପୂର୍ଣ୍ଣିମା ଭଳି ଏହି ପର୍ବ ମଧ୍ୟ ଭାଇଭଉଣୀଙ୍କ ପର୍ବ  । ଏହି ଦିନ ଭାତ ଖାଇବା ଶୁଭ ମାନିଥାନ୍ତି  । ଭଉଣୀଟିଏ ଭାଇକୁ ସିନ୍ଦୁର ଓ ଚନ୍ଦନ ଟିକା ଲଗାଇବା ଦ୍ୱାରା ଭାଇର ଭାଗ୍ୟଦୋୟ ହୋଇଥାଏ ବୋଲି ବିଶ୍ୱାସ କରାଯାଏ  ।

ଟସ୍ ଜିତିଲା ଆଫଗାନିସ୍ତାନ, ବ୍ୟାଟିଂ କରିବ ଇଣ୍ଡିଆ

ଦୁବାଇ: ପୁଣି ଟସ୍ ହାରିଲେ ବିରାଟ କୋହଲି । ଚଳିତ ଟି-୨୦ ବିଶ୍ବକପରେ ଭାରତ ଆଜି ତା’ର ତୃତୀୟ ମ୍ୟାଚ ଆଫଗାନିସ୍ତାନ ବିପକ୍ଷରେ ଖେଳିବ ।  ଆଜିର ମ୍ୟାଚ ଆବୁଧାବିର ଶେଖ ଜାୟଦ ଷ୍ଟାଡିୟମରେ ଖେଳାଯିବ । ତେବେ ଆଜିର ମ୍ୟାଚରେ ମଧ୍ୟ ଟସ୍ ହାରିଛନ୍ତି ଅଧିନାୟକ ବିରାଟ କୋହଲି । ଟସ୍ ଜିତି ଆଫଗାନିସ୍ତାନ ପ୍ରଥମେ ବୋଲିଂର ନିଷ୍ପତି ନେଇଛି । ଏଥିସହ ଚଳିତ ଟି-୨୦ ବିଶ୍ବକପରେ ଲଗାତର ଭାବରେ ତିନୋଟି ମ୍ୟାଚରେ ଟସ୍ ହାରିଛନ୍ତି ବିରାଟ । ପ୍ରଥମ ଦୁଇଟି ମ୍ୟାଚରେ ଟସ୍ ହାରି ବ୍ୟାଟିଂ କରିଥିଲା ଟିମ୍ ଇଣ୍ଡିଆ ଏବଂ ଦୁଇଟି ମ୍ୟାଚକୁ ଶୋଚନୀୟ ଭାବରେ ପରାଜୟ ମଧ୍ୟ ବରଣ କରିଥିଲା । ତେବେ ଆଜିର ମ୍ୟାଚରେ ଭାରତ ପକ୍ଷରୁ ଦୁଇଟି ପରିବର୍ତ୍ତନ କରିଛି ଟିମ୍ ଇଣ୍ଡିଆ । ଏହି ମ୍ୟାଚରେ ଇଶାନ କିଶାନଙ୍କ ସ୍ଥାନରେ ସୂର୍ଯ୍ୟ କୁମାର ଯାଦବ ଓ ବରୁଣ ଚକ୍ରବର୍ତ୍ତୀଙ୍କ ସ୍ଥାନରେ ରବିଚନ୍ଦ୍ରନ ଅଶ୍ବିନଙ୍କୁ ଦଳର ଚୁଡାନ୍ତ ଏକାଦଶରେ ସ୍ଥାନ ମିଳିଛି ।

ଯଦି ଭାରତ ଚଳିତ ବିଶ୍ବକପର  ସେମିଫାଇନାଲକୁ ଯିବାକୁ ଚାହେଁ ତାହାଲେ ଏହି ମ୍ୟାଚରେ ଭାରତକୁ ଜିତିବା ଅତ୍ୟନ୍ତ ଜରୁରୀ । ଖାଲି ବିଜୟ ଲାଭ କଲେ ହେବ ନାହିଁ ବରଂ ଏକ ବଡ଼ ବ୍ୟବଧାନରେ ଆଜିର ମ୍ୟାଚକୁ ଜିତିବାକୁ ପଡ଼ିବ ଟିମ୍ ଇଣ୍ଡିଆକୁ । ତେବେ ଏହି ମ୍ୟାଚରେ ଭାରତ ବିଜୟଲାଭ କରିବା ପରେ ଆସନ୍ତା ନଭେମ୍ବର ୭ରେ ହେବାକୁ ଥିବା ନ୍ୟୁଜିଲାଣ୍ଡ ଓ ଆଫଗାନିସ୍ତାନ ମଧ୍ୟରେ ହେବାକୁ ଥିବା ମ୍ୟାଚ ଉପରେ ସମସ୍ତଙ୍କ ନଜର ରହିବ । ତେବେ ଟି-୨୦ ବିଶ୍ବକପରେ ଭାରତ ଆଫଗାନିସ୍ତାନ ମଧ୍ୟରେ ଦୁଇଥରେ ମୁହାଁମୁହିଁ ହୋଇଥିଲେ । ତେବେ ଏହି ଦୁଇଟି ମ୍ୟାଚରେ ଭାରତ ବିଜୟଲାଭ କରିଥିଲା ।

ଲୁଟିଲେ ଅଧିକାରୀ: ଚାଷୀଙ୍କୁ ଜଣାନାହିଁ ତାଙ୍କ ମୁଣ୍ଡ ଉପରେ ଲକ୍ଷାଧିକ ଟଙ୍କାର ଋଣ ବୋଝ

ବଲାଙ୍ଗିର: କାହାକୁ ମିଳିଛି ୩ ହଜାର ତ ଆଉ କାହାକୁ ମିଳିଛି ୫ ହଜାର ଟଙ୍କା । କିନ୍ତୁ ବ୍ୟାଙ୍କ ଖାତାରେ ଗଡୁଛି ଲକ୍ଷାଧିକ ଟଙ୍କାର ଋଣ । ଖାତା ଦେଖି ତାଜୁବ ଚାଷୀ । ଚାଷୀଙ୍କୁ ଜଣାନାହିଁ ସେମାନେ କେବେ କଲେ ଋଣ । ଏବେ ଋଣ ସୁଝିବା ଚିନ୍ତା । ଚାଷୀଙ୍କ ଦସ୍ତଖତ ଜାଲିଆତି କରି ଲକ୍ଷ ଲକ୍ଷ ଟଙ୍କା ହରିଲୁଟ କରିଛନ୍ତି ପେକ୍ସ ସମ୍ପାଦକ ଓ କର୍ମାଚାରୀ । ଏମିତି ଅଭିଯୋଗ ଆସିଛି ବଲାଙ୍ଗିର ଜିଲ୍ଲା ପୁଇଁତଳା ବ୍ଲକର ୩ଟି କୃଷି ସମବାୟ ସମିତିରୁ । ଘଟଣା ଜଣାପଡ଼ିବା ପରେ ଉତ୍ତ୍ୟକ୍ତ ଚାଷୀ ବ୍ୟାଙ୍କ ଘେରାଉ କରି ଓ ରାସ୍ତା ଅବରୋଧ କରିବା ସହ ୭ ଦିନ ଭିତରେ ଘଟଣା ତଦନ୍ତ କରି କାର୍ଯ୍ୟାନୁଷ୍ଠାନ ନେବାକୁ ଦାବି କରିଛନ୍ତି ।

ଚାଷୀଙ୍କୁ ଢାଲ କରି ଲୁଟିଛନ୍ତି ପେକ୍ସ କର୍ମଚାରୀ । ଚାଷୀଙ୍କ ବ୍ୟାଙ୍କ ଆକାଉଣ୍ଟରୁ ସେମାନଙ୍କ ଅଜାଣତରେ ଉଠିଛି ଲକ୍ଷ ଲକ୍ଷ ଟଙ୍କାର କୃଷି ଋଣ । ଜଣେ ନୁହେଁ କି ଦୁଇଜଣ ନୁହେଁ, ୩୭୦ ଚାଷୀଙ୍କ ଆକାଉଣ୍ଟରୁ ଉଠିଛି ଟଙ୍କା । ଚାଷୀଙ୍କ ଅଜାଣତରେ ଦସ୍ତଖତ ଜାଲିଆତି କରି ୨ କୋଟି ୫୦ଲକ୍ଷ ଉଠିଯାଇଥିବା ହୋଇଛି ଅଭିଯୋଗ ।

ବୁବେଳ ପେକ୍ସ ଅନ୍ତର୍ଗତ ବାହାଲବୁକା ଗାଁର ଚାଷୀ ଉମାକାନ୍ତ ବକୁଳ ଏବଂ ତାଙ୍କ ସ୍ତ୍ରୀ ସୌଦାମିନୀ କୃଷି ଋଣ ବାଦଦକୁ ୨୦ରୁ ୩୦ ହଜାର ଟଙ୍କା ପାଇଥିବାବେଳେ ଉମାକାନ୍ତଙ୍କ ନାଁରେ ୧ ଲକ୍ଷ ୩୦ହଜାର ଏବଂ ତାଙ୍କ ସ୍ତ୍ରୀ  ନାଁରେ ୧ ଲକ୍ଷ ୩୭ ହଜାର ଟଙ୍କା ଉଠିଛି । ବିମଳା ରାଣା ମାତ୍ର ୩ ହଜାର ଟଙ୍କା ପାଇଛନ୍ତି ହେଲେ ତାଙ୍କ ନାଁରେ ଉଠିଛି ୧ ଲକ୍ଷ ୪୭ ହଜାର ଟଙ୍କା । ଚାଷୀ ବାଗଦଳ ଗୁରୁ ମାତ୍ର ୮ ହଜାର ଟଙ୍କା ପାଇଛନ୍ତି । ହେଲେ ତାଙ୍କ ନାଁରେ ଗଡୁଛି ଦେଢ଼ ଲକ୍ଷ ଟଙ୍କାର ଋଣ । ସେହିପରି ବଟକୃଷ୍ଣ ଡ଼ାଙ୍ଗ ୧୨ ହଜାର ଟଙ୍କା କୃଷି ଋଣ ପାଇଥିଲା ବେଳେ ତାଙ୍କ ନାଁରେ ଉଠିଛି ୧ ଲକ୍ଷ ୩୦ହଜାର ଟଙ୍କା । ଜମାଖାତା ଅପଡେଟ୍ କରିବାକୁ ଯାଇ ଜାଲିଆତି ବିଷୟରେ ଜାଣିବାକୁ ପାଇଥିଲେ ସେମାନଙ୍କ ମୁଣ୍ଡ ଉପରେ ରହିଛି ଏତେ ବଡ଼ ଋଣ ବୋଝ । ଏନେଇ ବୁବେଲ ପେକ୍ସର ସମ୍ପାଦକ ଟିକେଶ୍ବର ସାଏ, ବୈରାସରର ଉପେନ୍ଦ୍ର ମେହେର ଓ ଜାମଗାଁର ସମ୍ପାଦକଙ୍କ ବିରୋଧରେ ଲିଖିତ ଅଭିଯୋଗ କରିଛନ୍ତି ଚାଷୀ । ଅଭିଯୋଗର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ବଲାଙ୍ଗିର କେନ୍ଦ୍ର ସମବାୟ ବ୍ୟାଙ୍କ ଶାଖା ପରିଚାଳକ ।