spot_img
Home Blog Page 5149

୨୧ ବର୍ଷରେ କିଣିଲେ ୮୭ ଲକ୍ଷର ଘର; ଦେଲେ ସଞ୍ଚୟ ଟିପ୍ସ…

ନୂଆଦିଲ୍ଳୀ: ବ୍ରିଟେନ୍ ବାସିନ୍ଦା ବେକା ଥମ୍ପସନ୍ ମାତ୍ର ୨୧ ବର୍ଷ ବୟସରେ ୮୭ ଲକ୍ଷ ଟଙ୍କାରେ ନିଜର ଏକ ଘର କିଣିଛନ୍ତି ।  ଆଉ ଘର କିଣିବା ପାଇଁ ସେ କୌଣସି ଲୋନ୍ କିମ୍ବା କରଜ କରିନାହାଁନ୍ତି ବରଂ ନିଜ ସଞ୍ଚୟ ଅର୍ଥରେ କିଣିଛନ୍ତି। ସିକ୍ରେଟ୍ ମଧ୍ୟ ସାେସିଆଲ୍ ମିଡିଆରେ ଶେୟାର କରିଛନ୍ତି।

ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁଯାୟୀ ବେକା ଥମ୍ପସନ୍ ନିଜ ଟିକଟକ୍ ଆକାଉଣ୍ଟରେ ଏକ ଭିଡ଼ିଓ ଶେୟାର କରିଛନ୍ତି । ଯେଉଁଥିରେ ସେ ୧୬ ବର୍ଷ ବୟସରୁ କିଭଳି ସଞ୍ଚୟ କରିବା ଆରମ୍ଭ କରିଥିଲେ ଏବଂ ଏଥିପାଇଁ ତାଙ୍କୁ କେମିତି ପ୍ଲାନିଂ କରିବାକୁ ପଡିଥିଲା ସେନେଇ କହିଛନ୍ତି । ପ୍ରଥମେ ପ୍ରଥମେ ଆୟ କମ୍ ଥିଲା, ଏମିତିକି ଘଣ୍ଟା ପ୍ରତି ୩୦୪ ଟଙ୍କା ମିଳୁଥିଲା । କିନ୍ତୁ ୫ ବର୍ଷ ମଧ୍ୟରେ ହୋଇଥିବା ସଞ୍ଚୟରେ ସେ ଘର କିଣିବାରେ ସଫଳ ହୋଇଥିଲେ ।

କିଭଳି କରିବେ ସଞ୍ଚୟ, ଦେଲେ ଟିପ୍ସ-

କରୋନା ସଙ୍କଟ ମଧ୍ୟରେ ୮୭ ଲକ୍ଷ ଟଙ୍କାରେ ୨ ବେଡରୁମ୍ ବିଶିଷ୍ଟ ଏକ ଫ୍ଲାଟ୍ ମିଳିଛି ବୋଲି କହିଛନ୍ତି ବେକା। ଏଥିସହ ସେ ସଞ୍ଚୟର ଟିପ୍ସ ମଧ୍ୟ କହିଛନ୍ତି। ବେକାଙ୍କ କହିବାନୁଯାୟୀ, ଯେବେବି କିଛି ଖର୍ଚ୍ଚ କରୁଥିଲି ସେତିକି ଟଙ୍କା ସଞ୍ଚୟ ଆକାଉଣ୍ଟରେ ରଖିଦିଏ । ଘର କିଣିବା ପାଇଁ ଚିନ୍ତା କରିବା ପରେ ପ୍ରତି ମାସରେ ପାଖାପାଖି ୮୦ ହଜାର ଟଙ୍କା ସଞ୍ଚୟ କରିବା ଆରମ୍ଭ କରିଥିଲି ।

ସଞ୍ଚୟ ମୂଳ ମନ୍ତ୍ର ହେଉଛି- ଯେତିକି ଟଙ୍କା ଖର୍ଚ୍ଚ କରିବ, ଠିକ୍ ସେତିକି ଟଙ୍କାକୁ ସଞ୍ଚୟ କରିବ। ଜଣେ ୟୁଜର୍ସଙ୍କୁ ଉତ୍ତର ଦେବାକୁ ଯାଇ ବେକା କହିଛନ୍ତି ଯେ, ମୋ ପିତା-ମାତା ଖର୍ଚ୍ଚ ପାଇଁ ମୋ ଠୁ ଟଙ୍କା ନିଅନ୍ତି ନାହିଁ । ଫଳରେ ମୋର ସବୁ ଟଙ୍କା ବଞ୍ଚିଯାଏ । ଆଉ ମୋ ଖର୍ଚ୍ଚ ମଧ୍ୟ ବେଶୀ ନୁହେଁ । ଧିରେ ଧିରେ ଆୟ ବଢିବା ସହ ସଞ୍ଚୟ ମଧ୍ୟ ବଢିଥିଲା । ପରିଶେଷରେ ମୁଁ ନିଜ ପାଇଁ ଘର କିଣିପାରିଛି ।

ଅବହେଳିତ ସୁଲେଇପାଟ ଡ୍ୟାମର ଭାଗ୍ୟ ବଦଳିବ କେବେ ?

ବାରିପଦା:  ଖୋଲିଲାଣି ଶିମିଳିପାଳ ଜାତୀୟ ଉଦ୍ୟାନ ପଦଦେଶରେ ଥିବା ସୁଲେଇପାଟ ଡ୍ୟାମ । ନିକଟରୁ ଡ୍ୟାମର ମନୋରମ ଦୃଶ୍ୟ ଦେଖିବାକୁ ଲାଗୁଛି ପର୍ଯ୍ୟଟକଙ୍କ ଭିଡ଼ । ଦୁଇଟି ପାହାଡ଼ର ସବୁଜ ବଳୟ ଭିତରେ ନିର୍ମାଣ ହୋଇଛି ବନ୍ଧ । କାଚକେନ୍ଦୁ ପାଣି ସାଙ୍ଗକୁ ଡ୍ୟାମ ଚର୍ତୁପାର୍ଶ୍ବର ପ୍ରାକୃତିକ ପରିବେଶ ପ୍ରକୃତି ପ୍ରେମୀଙ୍କୁ କରୁଛି ବିଭୋର । ହେଲେ ପର୍ଯ୍ୟଟନ ଏଠି ଅବହେଳିତ । ଡ୍ୟାମ ନିକଟରେ ଆନୁଷଙ୍ଗିକ ସୁବିଧା ନଥିବାରୁ ନାନା ସମସ୍ୟା ଭୋଗୁଛନ୍ତି ପର୍ଯ୍ୟଟକ । ନିକଟରେ ଖଣିଜ ଉତ୍ତୋଳନ ଡ୍ୟାମ ଉପରେ ସୃଷ୍ଟି କରିଛି ବିପଦ ।

ସ୍ଥାନୀୟ ଅଞ୍ଚଳରେ କୃଷିର ବିକାଶ ପାଇଁ ୧୯୭୯ ମସିହାରେ ଏହି ଡ୍ୟାମ ନିର୍ମାଣ ହୋଇଥିଲା । ପରେ ପ୍ରକୃତିର ବରଦାନ ପାଇଁ ଏହି ସ୍ଥାନ ପର୍ଯ୍ୟସ୍ଥଳରେ ପରିଣତ ହୋଇଛି । ମାତ୍ର ଡ୍ୟାମ ନିକଟରେ ଖଣିଜ ସମ୍ପଦ ଉତ୍ତୋଳନ ହେଉଥିବାରୁ ଡ୍ୟାମର ସୁରକ୍ଷା ନେଇ ପ୍ରଶ୍ନ ଉଠିଛି । ସେପଟେ ପର୍ଯ୍ୟଟକଙ୍କ ସୁବିଧା ପାଇଁ ବିଭିନ୍ନ ବ୍ୟବସ୍ଥା ମଧ୍ୟ କରାଯାଉଛି ବୋଲି କହିଛନ୍ତି ଜଳସେଚନ ବିଭାଗର ଅଧିକ୍ଷଣ ଯନ୍ତ୍ରୀ ପ୍ରମୋଦ କୁମାର କୁଦୁମାସିଂ ।

ଦୁର୍ଗମ ଟାଙ୍ଗିଲିପଦର: ଅଭିଶପ୍ତ ଜୀବନ ଜୀଉଁଛନ୍ତି କୁଇ କନ୍ଧ ସମ୍ପ୍ରଦାୟ ଲୋକେ

ମୋହନା: ସତେକି ଜୀବନ ଅଭିଶପ୍ତ । ଗାଁକୁ ନାହିଁ ଘଣ୍ଡେ ରାସ୍ତା । ସାମାନ୍ୟ ରାସନ ସାମଗ୍ରୀ ପାଇଁ ଦୁଇଟି ନାଳ ଓ ୫ କିମି ପାଡାଡ଼ିଆ ରାସ୍ତା କରିବାକୁ ପଡ଼ିଥାଏ ଅତିକ୍ରମ । ଆମେ କହୁଛୁ ଗଜପତି ଜିଲ୍ଲା ମୋହନା ବ୍ଲକ୍ ଟାଙ୍ଗିଲିପଦର କଥା । ବିକାଶ ଆଜି ବି ଏଠି ସାତସପନ ପାଲଟିଛି । ଅଭିଶପ୍ତ ଜୀବନ କାଟୁଛନ୍ତି କୁଇ କନ୍ଧ ସମ୍ପ୍ରଦାୟର ଗରିବ ଆଦିବାସୀ । ରାସ୍ତାଟିଏ ନଥିବାରୁ ପ୍ରତିଦିନ ପଥୁରିଆ ରାସ୍ତାରେ ଜୀବନକୁ ବାଜି ଲଗାଇ ଏମାନଙ୍କୁ ଯାତାୟତ କରିବାକୁ ପଡ଼ିଥାଏ ।

ଦୁର୍ଗମ ଟାଙ୍ଗିଲିପଦର ଗାଁରେ ଦୁଇ ଶହରୁ ଅଧିକ ଲୋକ ରହନ୍ତି । ଜଙ୍ଗଲ ଜାତ ଦ୍ରବ୍ୟ ଓ ଚାଷ ଏମାନଙ୍କ ଗୁଜୁରାଣର ଏକମାତ୍ର ମାଧ୍ୟମ । ଯାତାୟତର ସୁବିଧା ନଥିବାରୁ ବିକାଶ ଏମାନଙ୍କ ପାଖରେ ପହଞ୍ଚି ପାରୁନାହିଁ । ଶିକ୍ଷା, ସ୍ବାସ୍ଥ୍ୟ ସବୁ ଅପହଞ୍ଚ ହୋଇଛି । ପିଇବା ପାଣି ପାଇଁ ହନ୍ତସନ୍ତ ହେଉଛନ୍ତି ଏଠିକାର ଲୋକେ । ସାଧାରଣ ମୌଳିକ ସୁବିଧା ଯୋଗାଇ ଦେବାକୁ ବାରମ୍ବାର ଦାବି ହେଉଥିଲେ ବି ପ୍ରଶାସନିକ ଅଧିକାରୀଙ୍କ ଦୃଷ୍ଟି ଗାଁ ଉପରେ ପଡୁ ନଥିବା ଅଭିଯୋଗ ହେଉଛି ।

ଟାଙ୍ଗିଲିପଦର ସମସ୍ୟାକୁ ନେଇ ମୋହନା ବିଡ଼ିଓ ସାର୍ଥକ ସୌରଭ ମହାପାତ୍ରଙ୍କୁ ଯୋଗଯୋଗ କରାଯିବାରେ ଗମନାଗମନର ସୁବିଧା କରାଇ ଶୀଘ୍ର ବିକାଶମୂଳକ କାମ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି ।

ଅଭିନନ୍ଦନଙ୍କୁ ମିଳିଲା ଦୀପାବଳି ଗିପ୍ଟ; ବାୟୁ ସେନାରେ ହେଲେ ଗ୍ରୁପ କ୍ୟାପଟେନ

ନୂଆଦିଲ୍ଲୀ: ଅଭିନନ୍ଦନଙ୍କୁ ମିଳିଲା ପଦୋନ୍ନତି । ବାଲାକୋଟ ଏୟାର ଷ୍ଟ୍ରାଇକ ହିରୋ ଅଭିନନ୍ଦନ ବର୍ଦ୍ଧମାନଙ୍କ ହୋଇଛି ପ୍ରମୋସନ । ଭାରତୀୟ ବାୟୁ ସେନାର ଏହି ଦୁର୍ଦ୍ଦଶ ପାଇଲଟଙ୍କୁ ଗ୍ରୁପ କ୍ୟାପଟେନ ପଦରେ ନିଯୁକ୍ତି ଦିଆଯାଇଛି । ପୁଲଓ୍ବାମାରେ ପାକିସ୍ତାନ ଆକ୍ରମଣ ପରେ ପାକିସ୍ତାନର ବାଲାକୋଟରେ ଆତଙ୍କୀ ଶିବିର ଉପରେ ଭାରତ କରିଥିଲା ଏୟାର ଷ୍ଟ୍ରାଇକ । ଏହା ପରେ ପାକିସ୍ତାନର ଯୁଦ୍ଧ ବିମାନ ଏଫ-୧୬ ଭାରତୀୟ ସୀମାରେ ପ୍ରବେଶ କରିବା ପାଇଁ ଚେଷ୍ଟା କରିଥିଲା । ଏହି ସମୟରେ ଓ୍ବିଙ୍ଗ କମାଣ୍ଡର ଅଭିନନ୍ଦନ ପାକିସ୍ତାନର ଏଫ-୧୬ ଯୁଦ୍ଧ ବିମାନକୁ ମାରି ଖସାଇ ଦେଇଥିଲେ । ତେବେ ପାକିସ୍ତାନ ବିମାନ ଏଫ-୧୬ ସହ ଯୁଦ୍ଧ ସମୟରେ ଅଭିନନ୍ଦନ ମଧ୍ୟ ପିଓକେରେ ପଡ଼ିଯାଇଥିଲେ । ଏହାପରେ ପାକିସ୍ତାନୀ ସୈନିକ ତାଙ୍କ ବନ୍ଦୀ କରିଥିଲେ । କିନ୍ତୁ ଭାରତର କୂଟନୈତିକ ଚାପ ଆଗରେ ମୁଣ୍ଡ ନୁଆଁଇଲା ପାକିସ୍ତାନ । ଯାହା ଫଳରେ ଓ୍ବିଙ୍ଗ କମାଣ୍ଡର ଅଭିନନ୍ଦନଙ୍କୁ ଛାଡିଥିଲା ପାକିସ୍ତାନ ।

ପାକିସ୍ତାନ ଫାଇଟର ଜେଟ ଏଫ-୧୬କୁ ମାରି ଖସାଇ ଦେବା ଫଳରେ ତାଙ୍କୁ ସୂର୍ଯ୍ୟ ଚକ୍ରରେ ସମ୍ମାନିତ କରାଯାଇଥିଲା । ଆଉ ଏବେ ତାଙ୍କୁ ଓ୍ବିଙ୍ଗ କମାଣ୍ଡରରୁ  ଗ୍ରୁପ କ୍ୟାପଟେନ ପଦରେ ନିଯୁକ୍ତି ଦିଆଯାଇଛି । ତାଙ୍କୁ ଖୁବଶୀଘ୍ର ନୂତନ ରାଙ୍କ ପ୍ରଦାନ କରାଯିବ ।  ବାୟୁ ସେନାରେ ଗ୍ରପ କ୍ୟାପଟେନ ରାଙ୍କ ଆର୍ମିରେ କର୍ଣ୍ଣେଲ ରାଙ୍କର ବରାବର ଅଟେ ।

 

 

ଶିକାରୀଙ୍କ ଫାସରେ ଗଜରାଜ: ୬ ବର୍ଷରେ ଗଲାଣି ୨୫ ହାତୀଙ୍କ ଜୀବନ

ଢେଙ୍କାନାଳ: ମୃତ୍ୟୁର ଫାସରେ ନିରୀହ ଗଜରାଜ । ବିଦ୍ୟୁତ୍ ଫାସରେ ଯାଉଛି ହାତୀଙ୍କ ଜୀବନ । ଢେଙ୍କାନାଳରେ ୬ ବର୍ଷରେ ଗଲାଣି ୨୫ ହାତୀଙ୍କ ଜୀବନ । ଶିକାରୀ ଓ ବନ ବିଭାଗର ଛକ୍କାପଞ୍ଝା ଭିତରେ ବଳି ପଡୁଛନ୍ତି ନିରୀହ ହାତୀ । ବାରହା ଶିକାର ପାଇଁ ବସା ଯାଉଥିବା ବିଦ୍ୟୁତ୍ ଫାସରେ ପଡି ଢେଙ୍କାନାଳ ବନଖଣ୍ଡରେ ଗୋଟିଏ ପରେ ଗୋଟିଏ ହାତୀଙ୍କ ଜୀବନ ଚାଲିଯାଉଛି । ଯାହା ବନ ବିଭାଗର ଚିନ୍ତାର କାରଣ ପାଲଟିଛି । ଖୁଲମଖୁଲା ଶିକାର ବନ ବିଭାଗର କାର୍ଯ୍ୟଦକ୍ଷତା ଉପରେ ଉଠାଉଛି ପ୍ରଶ୍ନ ।

ହାତୀ ମୃତ୍ୟୁ ରିପୋର୍ଟକୁ ନଜର ପକାଇଲେ, ୨୦୧୫ ରୁ ୨୦୨୧ ଗତ ୬ ବର୍ଷ ମଧ୍ୟରେ ୨୫ଟି ହାତୀ ବିଦ୍ୟୁତ ଆଘାତରେ ପ୍ରାଣ ହରାଇଛନ୍ତି । ଏଥିମଧ୍ୟରୁ ଢେଙ୍କାନାଳ ସଦର ରେଞ୍ଜରେ ସର୍ବାଧିକ ୧୪ଟି ହାତୀଙ୍କ ମୃତ୍ୟୁ ଘଟିଛି । ହିନ୍ଦୋଳ ରେଞ୍ଜରେ ୭ଟି, କାମାକ୍ଷାନଗର ପଶ୍ଚିମାଞ୍ଚଳ ରେଞ୍ଜରେ ୩ଟି ଓ ମହାବୀର ରୋଡ ରେଞ୍ଜରେ ଗୋଟିଏ ହାତୀର ଜୀବନ ଯାଇଛି । ତେବେ ହାତୀ ମୃତ୍ୟୁ ରୋକିବା ପାଇଁ ହାତୀ କରିଡର ସୃଷ୍ଟି କରିବା ସହ ପାଟ୍ରୋଲିଂ କଡାକଡି କରାଯାଇଛି ବୋଲି ଢେଙ୍କାନାଳ ଡିଏଫଓ ପ୍ରକାଶ ଚାନ୍ଦ ଗୁଗୋ ନାନୀ କହିଛନ୍ତି ।

ଉତ୍କଳମଣୀଙ୍କ ‘ଜନ୍ମପୀଠ ବିକାଶ’ କାର୍ଯ୍ୟର ସମୀକ୍ଷା କଲେ ମୁଖ୍ୟ ଶାସନ ସଚିବ

ଭୁବନେଶ୍ୱର: ଉତ୍କଳମଣୀ ଗୋପବନ୍ଧୁ ଦାସଙ୍କ ‘ଜନ୍ମପୀଠ ବିକାଶ’ ପ୍ରକଳ୍ପ ତ୍ୱରାନ୍ୱିତ ହୋଇଛି। ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏକ ଉଚ୍ଚସ୍ତରୀୟ ସମୀକ୍ଷା ବୈଠକରେ ସୁଆଣ୍ଡୋ ଗ୍ରାମ ଏବଂ ଗୋପବନ୍ଧୁଙ୍କ ଜନ୍ମପୀଠର ସାମଗ୍ରିକ ବିକାଶ ପ୍ରକଳ୍ପ ସମ୍ୱନ୍ଧୀୟ ତଥ୍ୟ ଉପସ୍ଥାପନ କରାଯାଇଥିଲା।

ପ୍ରକଳ୍ପ ଅନ୍ତର୍ଗତ ବିଭିନ୍ନ କାର୍ଯ୍ୟର ଅଗ୍ରଗତି ସମୀକ୍ଷା ସହ ଏହାର ନିର୍ମାଣ କାର୍ଯ୍ୟ ୨୦୨୨ ମାର୍ଚ୍ଚ ମାସ ମଧ୍ୟରେ ଶେଷ କରିବା ପାଇଁ ଲକ୍ଷ୍ୟ ଧାର୍ଯ୍ୟ କରାଯାଇଥିଲା। ଏହି ପ୍ରକଳ୍ପ ପାଇଁ ପ୍ରାୟ ୧୫.୧୬ କୋଟି ଟଙ୍କାର ବ୍ୟୟ ଅଟକଳ ମଞ୍ଜୁର କରାଯାଇଛି। ଏହାବ୍ୟତୀତ ଗୋପବନ୍ଧୁଙ୍କ ଜନ୍ମପୀଠରେ ଥିବା ଶିବ ମନ୍ଦିର, ଦୁଇଟି ପୋଖରୀ, ପୈତୃକ ବାସଗୃହ, ଗ୍ରାମକୁ ରାସ୍ତା, ଜନ୍ମପୀଠ ପରିକ୍ରମା ରାସ୍ତା, ପାର୍କିଂ ଆଦିର ବିକାଶ ପାଇଁ କ୍ଷେତ୍ରସ୍ତରୀୟ କାର୍ଯ୍ୟ ଇତି ମଧ୍ୟରେ ତ୍ୱରାନ୍ୱିତ ହୋଇଛି। ଏସବୁ ସହ ସେଠାରେ ଗୋପବନ୍ଧୁ ସ୍ମୃତି ସଂଗ୍ରାହଳୟ, ସୂଚନା କେନ୍ଦ୍ର ଏବଂ ଆତିଥ୍ୟ କେନ୍ଦ୍ର ମଧ୍ୟ ନିର୍ମାଣ କରାଯାଉଛି ।

ସେହିପରି ଶିବ ମନ୍ଦିରର ମୂଳଦୁଆ ସଂରକ୍ଷଣ ପିଷ୍ଟର ବିକାଶ, ଦଧି ନଉତି, ମନ୍ଦିର ପରିକ୍ରମା ରାସ୍ତା ଆଦି କାର୍ଯ୍ୟ ବିଶେଷ ଭାବେ ଅଗ୍ରଗତି କରିଛି। ପ୍ରଥମ ପୋଖରୀର ପୁନଃ ଖନନ, ଉଦ୍ଧାର ଓ ସୌନ୍ଦର୍ଯ୍ୟକରଣ କାର୍ଯ୍ୟ ପ୍ରାୟ ଚୁଡାନ୍ତ ପର୍ଯ୍ୟାୟରେ ପହଞ୍ଚିଛି । ସଂଗ୍ରହାଳୟର ଘର ନିର୍ମାଣ ସରିଛି । ବିଦ୍ୟୁତକରଣ ଏବଂ ଶେଷ ପର୍ଯ୍ୟାୟ କାର୍ଯ୍ୟ ଚାଲୁରହିଛି।

ଦ୍ୱିତୀୟ ପୋଖରୀର ପୁନରୁଦ୍ଧାର କାର୍ଯ୍ୟ ଚଳିତ ମାସ ମଧ୍ୟରେ ଆରମ୍ଭ କରିବାକୁ ମୁଖ୍ୟ ଶାସନ ସଚିବ ଶ୍ରୀ ମହାପାତ୍ର ନିର୍ଦ୍ଦେଶ ଦେଇଛନ୍ତି। ଗୋପବନ୍ଧୁ ଦାସଙ୍କର ପ୍ରାୟ ୧୫ ଫୁଟ ଉଚ୍ଚତା ବିଶିଷ୍ଟ ପ୍ରତିମୁର୍ତ୍ତି, ପୈତୃକ ଗୃହର ପୁନଃ- ବିକାଶ ଆଦି କାର୍ଯ୍ୟ ତ୍ୱରାନ୍ୱିତ କରିବାକୁ ମଧ୍ୟ ମୁଖ୍ୟ ଶାସନ ସଚିବ ପୁରୀ ଜିଲ୍ଲା ପ୍ରଶାସନ ଏବଂ ଓଡ଼ିଆ ଭାଷା, ସଂସ୍କୃତି ଓ ସାହିତ୍ୟ ବିଭାଗକୁ ନିର୍ଦ୍ଦେଶ ଏବଂ ପୁନଃରୁଦ୍ଧାର କାର୍ଯ୍ୟ ପାଇଁ ଆବଶ୍ୟକୀୟ ପଥର ଯୋଗାଣ ଅବ୍ୟାହତ ରଖିବା ନିମନ୍ତେ ଓଡ଼ିଶା ଖଣି ନିଗମଙ୍କୁ ନିର୍ଦ୍ଦେଶ ଦିଆଯାଇଥିଲା ।

ବୈଠକରେ ଓଡ଼ିଆ ବିଶ୍ୱବିଦ୍ୟାଳୟ ନିମନ୍ତେ ଭିତ୍ତିଭୂମି ବିକାଶ କାର୍ଯ୍ୟର ସମୀକ୍ଷା କରାଯାଇଥିବା ବେଳେ ବିଶ୍ୱବିଦ୍ୟାଳୟ ନିର୍ମାଣ ପାଇଁ ଟେଣ୍ଡର ପ୍ରକ୍ରିୟା ଶେଷ ହୋଇଛି ବୋଲି ବିଭାଗୀୟ ସଚିବ କହିଥିଲେ । ବିଶ୍ୱବିଦ୍ୟାଳୟ ନିର୍ମାଣ ନିମନ୍ତେ ସମୁଦାୟ ୬୧.୬୩ କୋଟି ଟଙ୍କାର ବ୍ୟୟ ଅଟକଳକୁ ପ୍ରଶାସନିକ ଅନୁମୋଦନ ଦିଆଯାଇଛି । ସେହିପରି ସାକ୍ଷୀଗୋପାଳ ମନ୍ଦିରର ଆବଶ୍ୟକୀୟ ମରାମତି ଏବଂ ସୌନ୍ଦର୍ଯ୍ୟକରଣ କାମ ତ୍ୱରାନ୍ୱିତ କରିବାକୁ ମୁଖ୍ୟ ଶାସନ ସଚିବ ଭାଷା ସଂସ୍କୃତି ଓ ସାହିତ୍ୟ ବିଭାଗଙ୍କୁ ନିର୍ଦ୍ଦେଶ ଦେଇଥିଲେ। ସୁଆଣ୍ଡୋ, ସତ୍ୟବାଦୀ, ଓଡ଼ିଆ ବିଶ୍ୱବିଦ୍ୟାଳୟ ଏବଂ ସାକ୍ଷୀଗୋପାଳକୁ ଓଡ଼ିଆ ଭାଷା-ସଂସ୍କୃତିର ଏକ ଆକର୍ଷଣୀୟ ପର୍ଯ୍ୟଟନ କେନ୍ଦ୍ର ଭାବେ ବିକଶିତ କରିବା ନିମନ୍ତେ ସବୁ ପ୍ରକାର ପଦକ୍ଷେପ ନେବାକୁ ମୁଖ୍ୟ ଶାସନ ସଚିବ ଶ୍ରୀ ମହାପାତ୍ର ସଂପୃକ୍ତ ବିଭାଗମାନଙ୍କୁ ନିର୍ଦ୍ଦେଶ ଦେଇଛନ୍ତି।

ଗୃହ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ସଂଜୀବ ଚୋପ୍ରା, ଅର୍ଥ ବିଭାଗ ପ୍ରମୁଖ ଶାସନ ସଚିବ ବିଶାଲ କୁମାର ଦେବ, ଉଚ୍ଚ ଶିକ୍ଷା ବିଭାଗ ପ୍ରମୁଖ ଶାସନ ସଚିବ ଶାସ୍ୱତ ମିଶ୍ର, ପୁର୍ତ୍ତ ବିଭାଗ ସଚିବ କ୍ରିଷନ୍ କୁମାର, ଓଡ଼ିଆ ବିଶ୍ୱ ବିଦ୍ୟାଳୟ ସ୍ୱତନ୍ତ୍ର ଅଧିକାରୀ ବିଜୟ କୁମାର ନାୟକଙ୍କ ସମେତ ସଂପୃକ୍ତ ବିଭାଗର ବରିଷ୍ଠ ଅଧିକାରୀମାନେ ବୈଠକର ଆଲୋଚନାରେ ଅଂଶଗ୍ରହଣ କରିଥିଲେ ।

5T ଅନ୍ତର୍ଗତ ମାର୍କଫେଡ ସାର ଯୋଗାଣ ଓ ଆର୍ଥିକ ବ୍ୟବସ୍ଥାର କମ୍ପ୍ୟୁଟରୀକରଣ

ଭୁବନେଶ୍ୱର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପ୍ରବର୍ତ୍ତିତ 5T ଅନ୍ତର୍ଗତ କାର୍ଯ୍ୟକ୍ରମରେ ମାର୍କଫେଡ୍‌ ସାର ଯୋଗାଣ ଓ ଆର୍ଥିକ ବ୍ୟବସ୍ଥାର କମ୍ପ୍ୟୁଟରୀକରଣ । ଏହାଦ୍ବାରା ସାର ଯୋଗାଣ ପ୍ରକ୍ରିୟାକୁ ଅଧିକ ସ୍ୱଚ୍ଛ ଓ ପାରଦର୍ଶୀ କରାଯିବା ସହିତ ଠିକ୍ ସମୟରେ ଚାଷୀଙ୍କୁ ଆବଶ୍ୟକ ସାର ଯୋଗାଇ ଦିଆଯାଇପାରିବ । ଚାଷୀ ଉପକୃତ ହେବା ସହିତ କୃଷି ଉତ୍ପାଦନ ବୃଦ୍ଧି ପାଇବ ବୋଲି ଖାଦ୍ୟଯୋଗାଣ ଓ ଖାଉଟି କଲ୍ୟାଣ, ସମବାୟ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ ପ୍ରକାଶ କରିଛନ୍ତି ।

ଆଜି ମନ୍ତ୍ରୀ ଓଡ଼ିଶା ରାଜ୍ୟ ସମବାୟ ବାଣିଜ୍ୟ ମହାସଂଘ ଲି (ମାର୍କଫେଡ୍‌– ଓଡ଼ିଶା)ର ମୁଖ୍ୟ କାର୍ଯ୍ୟାଳୟରେ ସାର ଆବଣ୍ଟନ ଓ ଆର୍ଥିକ ପରିଚାଳନାର କମ୍ପ୍ୟୁଟରୀକରଣ ବ୍ୟବସ୍ଥା ‘ସମନ୍ବିତ’ର ଉଦ୍‌ଘାଟନ କରିଛନ୍ତି । ସେ କହିଛନ୍ତି, କୋଭିଡ୍ ମହାମାରୀର କଟକଣା ସତ୍ତ୍ଵେ ସମବାୟ ବିଭାଗ ଦ୍ଵାରା ରାଜ୍ୟର ଚାଷୀଙ୍କୁ ଠିକ୍ ସମୟରେ ଋଣ ସମେତ ଆବଶ୍ୟକ କୃଷି ସାମଗ୍ରୀ ଯୋଗାଇ ଦିଆଯାଇ ପାରିଥିବାରୁ ଫସଲ ଉତ୍ପାଦନ ବୃଦ୍ଧି ପାଇଛି । ନୂତନ ବ୍ୟବସ୍ଥା ପ୍ରଚଳନ ଦ୍ଵାରା ସାର ଯୋଗାଣର ନିରୀକ୍ଷଣ ଓ ନିୟନ୍ତ୍ରଣ ବ୍ୟବସ୍ଥା ଅଧିକ ସୁଦୃଢ଼ ହୋଇପାରିବ । ସାର ଉତ୍ପାଦନକାରୀ କମ୍ପାନୀ ଓ ଆମଦାନୀକାରୀଙ୍କଠାରୁ ଆରମ୍ଭ କରି ପାଇକାରୀ ଏବଂ ଖୁଚୁରା ସାର ବ୍ୟବସାୟୀଙ୍କୁ ସାର ଯୋଗାଣ ଓ ପରିବହନ ପର୍ଯ୍ୟନ୍ତ ପ୍ରତ୍ୟେକ ବ୍ୟବସ୍ଥାକୁ ସୁନିୟନ୍ତ୍ରିତ କରାଯାଇପାରିବ । ଏଥିରେ ସାରଯୋଗାଣ ପ୍ରକ୍ରିୟାକୁ ତ୍ୱରାନ୍ଵିତ ଓ ସ୍ଵଚ୍ଛ କରାଯିବା ସହିତ କର୍ମଚାରୀଙ୍କ ଦକ୍ଷତା ବୃଦ୍ଧି ହୋଇପାରିବ ।’

ସେ ଆହୁରି କହିଛନ୍ତି, ‘ସମନ୍ବିତ’ ବ୍ୟବସ୍ଥା ଦ୍ୱାରା କ୍ଷେତ୍ର ସ୍ତରରୁ ପରିଚାଳିତ ବ୍ୟବସାୟିକ କାର୍ଯ୍ୟକଳାପ ମୁଖ୍ୟ କାର୍ଯ୍ୟାଳୟ ସହିତ ସହଜରେ ସଂଯୋଗ ହୋଇପାରିବ । ସାରଯୋଗାଣ କ୍ଷେତ୍ରରେ ନିରୀକ୍ଷଣ ଓ ବିଶ୍ଳେଷଣ ବ୍ୟବସ୍ଥାକୁ ଅଧିକ କ୍ରିୟାଶୀଳ କରାଯାଇ ଆବଶ୍ୟକ ଅନୁଯାୟୀ ତୁରନ୍ତ ପଦକ୍ଷେପ ଗ୍ରହଣ କରାଯାଇପାରିବ । ଏହି ଅବସରରେ ମନ୍ତ୍ରୀ ‘ସମନ୍ବିତ’ କାର୍ଯ୍ୟକ୍ରମର ବ୍ୟବହାର ପୁସ୍ତିକାର ଶୁଭ ଉନ୍ମୋଚନ କରିଥିଲେ।

ସୂଚନାଯୋଗ୍ୟ ଯେ, ମାର୍କଫେଡ ରାଜ୍ୟର ଏକ ଶୀର୍ଷ ସମବାୟ ସଂସ୍ଥା ଯାହା ରାଜ୍ୟରେ ଥିବା ୨୭୦୦ରୁ ଅଧିକ ପ୍ରାଥମିକ କୃଷି ସମବାୟ ସମିତି ଓ ୧୭୦୦ରୁ ଅଧିକ ବେସରକାରୀ ଲାଇସେନ୍ସପ୍ରାପ୍ତ ବ୍ୟବସାୟୀଙ୍କ ଜରିଆରେ ଚାଷୀଙ୍କୁ ରାସାୟନିକ ସାର ଯୋଗାଇଥାଏ । ଏଥିସହିତ ମାର୍କଫେଡ୍ ରାଜ୍ୟର ଚାଷୀଙ୍କଠାରୁ କେନ୍ଦ୍ର ସରକାରଙ୍କ ଦ୍ଵାରା ସ୍ଥିରିକୃତ ମୂଲ୍ୟରେ ଡାଲି ଜାତୀୟ ଶସ୍ୟ ଓ ତୈଳବୀଜ ସଂଗ୍ରହ ଦିଗରେ ମୁଖ୍ୟ ଭୂମିକା ଗ୍ରହଣ କରିଥାଏ ।

କାର୍ଯ୍ୟକ୍ରମରେ ନିବନ୍ଧକ, ସମବାୟ ସମିତି ସମୂହ ସୁଶାନ୍ତ କୁମାର ବାରିକ, ମାର୍କଫେଡ୍‌ର ପ୍ରଶାସକ ଭରତ ଚନ୍ଦ୍ର ବେହେରା, ମାର୍କଫେଡ୍‌ର ପରିଚାଳନା ନିର୍ଦ୍ଦେଶକ ସନ୍ତୋଷ କୁମାର ଦାସ ପ୍ରମୁଖ ଯୋଗଦେଇ ମାର୍କଫେଡ୍‌ର ବିଭିନ୍ନ କାର୍ଯ୍ୟକ୍ରମ ସଂପର୍କରେ ଆଲୋଚନା କରିଥିଲେ । ମାର୍କଫେଡ୍‌ର ସମସ୍ତ କ୍ଷେତ୍ର ଅଧିକାରୀ ଭିଡ଼ିଓ କନ୍‌ଫରେନିଂ ଜରିଆରେ ଏହି କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ ।

ଜନ୍ମଦିନରେ ମନ୍ନତ ବାହାରକୁ ଆସିଲେନି କିଙ୍ଗ୍ ଖାନ; ନିରାଶ ହେଲେ ପ୍ରଶଂସକ

ମୁମ୍ବାଇ: ୨ ନଭେମ୍ବର ବଲିଉଡ ବାଦଶାହା କିଙ୍ଗ୍ ଖାନଙ୍କ ଜନ୍ମଦିନ ଥିଲା । ଏହି ବର୍ଷ ଶାହାରୁଖ ୫୬ ବର୍ଷରେ ପଦାର୍ପଣ କରିଛନ୍ତି । ଜନ୍ମଦିନରେ ବଲିଉଡ ବାଦଶାହାଙ୍କ ଗୋଟିଏ ଝଲକ ପାଇଁ ଗୋଟିଏ ରାତି ପୂର୍ବରୁ ତାଙ୍କ ଘର ଆଗରେ ଫ୍ୟାନମାନଙ୍କ ଭିଡ଼ ଲାଗେ । ପ୍ରତିବର୍ଷ ଶାହାରୁଖ ତାଙ୍କ ଜନ୍ମଦିନରେ ତାଙ୍କ ଫ୍ୟାନମାନଙ୍କୁ ତାଙ୍କ ବାଲକୋନୀରୁ ସେ ତାଙ୍କ ସିଗ୍ନେଚର ପୋଜ ଦେଇଥାନ୍ତି । କିନ୍ତୁ ଚଳିତ ବର୍ଷ ଏମିତି କିଛି ଦେଖିବାକୁ ମିଳିନଥିଲା । ଚଳିତ ବର୍ଷ ୨ ତାରିଖ ବିତିଗଲା କିନ୍ତୁ କିଙ୍ଗ୍ ଖାନ ତାଙ୍କ ଫ୍ୟାନମାନଙ୍କୁ ଦେଖା କରିବାକୁ ଆସିନଥିଲେ। ଯାହା ଫଳରେ ଗୋଟିଏ ଦିନ ପୂର୍ବରୁ ମନ୍ନତରେ ଥିବା ତାଙ୍କ ଫ୍ୟାନମାନଙ୍କୁ ନିରାଶ ହେବାକୁ ପଡ଼ିଥିଲା । ନା ଶାହାରୁଖ ମନ୍ନତରୁ ବାହାରିଥିଲେ ନା ହିଁ ସୋସିଆଲ ମିଡିଆରେ କିଛି ଲେଖିଥିଲେ। ଯାହା ଫଳରେ ଶାହାରୁଖ ତାଙ୍କ ୨୦ ବର୍ଷର ପରମ୍ପରା ଭାଙ୍ଗିଥିଲେ ।

ପ୍ରତିବର୍ଷ କିଙ୍ଗ୍ ଖାନ ମନ୍ନତର ବାଲକୋନୀ ଉପରକୁ ଆସି ଶାହାରୁଖ ତାଙ୍କ ଫ୍ୟାନମାନଙ୍କୁ ଅଭିବାଦନ ଦିଅନ୍ତି । ହାତ ଯୋଡି ତାଙ୍କ ପ୍ରଶଂସକଙ୍କୁ ଅଭିବାଦନ ଦିଅନ୍ତି ଏବଂ ସେ ତାଙ୍କ ସିଗ୍ନେଚର ପୋଜ୍ ମଧ୍ୟ କରନ୍ତି । କିନ୍ତୁ ଚଳିତ ଥର ଏସବୁ କିଛି କରିନାହାନ୍ତି ବଲିଉଡ ବାଦଶାହା । ତେବେ ଶାହାରୁଖ ତାଙ୍କ ୫୬ତମ ଜନ୍ମଦିନରେ କୌଣସି ବଡ଼ ପାର୍ଟି ମଧ୍ୟ କରିନାହାନ୍ତି । ମୁମ୍ବାଇ ଡ୍ରଗ୍ସ କେସ ମାମଲାରେ ଶାହାରୁଖ ଖାନଙ୍କ ପୁଅ ଆର୍ଯ୍ୟନ ଖାନ ୨୧ ଦିନ ପର୍ଯ୍ୟନ୍ତ ଜେଲରେ ଥିଲେ । ବହୁ କଷ୍ଟରେ ଶେଷରେ ଆର୍ଯ୍ୟନଙ୍କୁ ବେଲ୍ ମିଳିଥିଲା । ବେଲ୍ ମିଳିଥିଲେ ବି ନିଜ ଜନ୍ମଦିନକୁ ଧୁମଧାମରେ ପାଳନ କରିନଥିଲେ ଶାହାରୁଖ ।

ଘରସଫା ବେଳେ ମହିଳାଙ୍କୁ ମିଳିଲା ୧୭ କୋଟିର ହୀରା

ଇଂଲଣ୍ଡର ଜଣେ ବୟସ୍କ ମହିଳାଙ୍କୁ ଘରସଫେଇ କରୁଥିବା ବେଳେ ମିଳିଲା କୋଟିଏ ଟଙ୍କାର ହୀରା  । ଏହା ଶୁଣି ଆପଣମାନଙ୍କୁ ଆଶ୍ଚର୍ଯ୍ୟ ଲାଗୁଥାଇପାରେ ମାତ୍ର ଏ ଘଟଣାଟି ପୁରାପୁରି ସତ  । ଘରେ ଅଧିକ ମଇଳା ଜମିଯାଇଥିବାରୁ ମହିଳା ଜଣକ ନିଜ ଘର ସଫା କରିବାକୁ ଚିନ୍ତା କଲେ  । ଘର ସଫା କରିବା ସମୟରେ ତାଙ୍କ ଘରୁ ଏକ ହୀରା ଖଣ୍ଡକ ମିଳିଥିଲା  ।  ଏହା ଦେଖି ସେ ଆଶ୍ଚର୍ଯ୍ୟ ହୋଇଯାଇଥିଲେ  । ଏହି ହୀରାଟିର ବଜାର ମୂଲ୍ୟ ୧୭ କୋଟି ଟଙ୍କା ହେବ ବୋଲି କୁହାଯାଉଛି  । ହୀରାଟିର ବଜାର ମୂଲ୍ୟ ଏତେ ହୋଇପାରେ ବୋଲି ମହିଳା ଜଣକ ଶୁଣିବା ପରେ ବିଶ୍ୱାସ କରିପାରିନଥିଲେ  ।

ବିବସି ରିପୋର୍ଟ ଅନୁଯାୟୀ ମହିଳା ଜଣକ ନରଥମବରଲ୍ୟାଣ୍ଡର ହୋଇଥିବାବେଳେ ସେ ନିଜ ନାମ ଗୋପନୀୟ ରଖିବାକୁ କହିଛନ୍ତି  । ଲଣ୍ଡନର ମାର୍କ ଲେନ ନାମକ ଜଣେ ବ୍ୟକ୍ତି ଦାମୀ ଜିନିଷର ବିକ୍ରୟ କରାଇଥାନ୍ତି  । ମହିଳା ଜଣକ ଏହି ହୀରାକୁ ନେଇ ତାଙ୍କ ନିକଟକୁ ଯାଇଥିଲେ  । ମାର୍କ ହୀରାଟିକୁ ୨-୩ ଦିନ ଧରି ଏକ୍ସପର୍ଟ ଦ୍ୱାରା ଯାଞ୍ଚ କରାଇଥିଲେ  । ପୁରାପୁରି ଯାଞ୍ଚ କରିବା ପରେ ହୀରାଟିର ପ୍ରକୃତ ମୂଲ୍ୟ ୩୪ କୋଟି ବୋଲି ଜଣାପଡ଼ିଥିଲା  । ବର୍ତ୍ତମାନ ଏହି ହୀରାଟିର ମୂଲ୍ୟ ୨ ମିଲିୟନ ଯୁରୋ ଯାହାର ଭାରତୀୟ ମୂଲ୍ୟ ପାଖାପାଖି ୧୭ କୋଟି  ।

ବୟସ୍କ ମହିଳାଙ୍କ କହିବାନୁଯାୟୀ ଏହି ହୀରା ବିଷୟରେ ତାଙ୍କର ସ୍ପଷ୍ଟ ଭାବେ ମନେନଥିବା ବେଳେ ବୋଧହୁଏ ସେ ଏହାକୁ କାର ବୁଥ୍ ସେଲ୍ ଜୁଏଲାରୀରୁ କିଣିଥିଲେ ବୋଲି କହିଛନ୍ତି ।  ମାତ୍ର ଏହି ହୀରାଟିର ମୂଲ୍ୟ ଏତେ ଟଙ୍କା ହୋଇଥାଇପାରେ ବୋଲି ସେ ସ୍ୱପ୍ନରେ ସୁଦ୍ଧା ଭାବିନଥିଲେ ।

 

୬ ନୁହେଁ ୧୨ ମାସ ମଧ୍ୟରେ ବ୍ୟବହାର ହୋଇପାରିବ କୋଭାକ୍ସିନ

ନୂଆଦିଲ୍ଲୀ: ଏଣିକି ୬ ମାସ ନୁହେଁ ବର୍ଷେ ପର୍ଯ୍ୟନ୍ତ ବ୍ୟବହାର ହୋଇପାରିବ କରୋନା ସଞ୍ଜିବନୀ କୋଭାକ୍ସିନ । ଭାରତ ବାୟୋଟେକ ପକ୍ଷରୁ କୁହାଯାଇଛି ପ୍ରସ୍ତୁତି ତାରିଖଠାରୁ ୧୨ ମାସ ମଧ୍ୟରେ ଏହାର ବ୍ୟବହୃତ ହୋଇପାରିବ ।

କୋଭାକ୍ସିନର ବୈଧତା ଅବଧି ବଢାଇବା ଲାଗି କେନ୍ଦ୍ରୀୟ ଔଷଧ ମାନକ ନିୟନ୍ତ୍ରଣ ସଂଗଠନ (CDSCO) ମଞ୍ଜୁର ଦେଇଛନ୍ତି । ଅତିରିକ୍ତ ସ୍ଥିରତା ତଥ୍ୟ ଆଦିକୁ କମ୍ପାନୀ ପକ୍ଷରୁ ସିଡିଏସିଓଙ୍କ ନିକଟରେ ଦାଖଲ କରାଯାଇଥିଲା । ବିଭିନ୍ନ ତଥ୍ୟକୁ ବିଚାର କରି ସିଡିଏସସିଓ ଏହି ଅନୁମତି ଦେଇଛନ୍ତି ।

ଆହୁରି ପଢ଼ନ୍ତୁ: କୋଭାକ୍ସିନକୁ ମିଳିଲା WHOର ଅନୁମତି

ଚଳିତବର୍ଷ ପ୍ରାରମ୍ଭରେ ଭାରତ ବାୟୋଟେକ କୋଭାକ୍ସିନର ଲାଇଫ ପିରିୟଡ ବ୍ୟବହାର ଅବଧି ୬ ମାସରୁ ୨୪ ମାସକୁ ବଢାଇବା ଲାଗି ସିଡିଏସସିଓଙ୍କ ନିକଟରେ ଆବେଦନ କରିଥିଲା । ପୂର୍ବରୁ ନିର୍ଦ୍ଦେଶ ବା ଗାଇଡଲାଇନ ଅନୁସାରେ ୮ ଡିଗ୍ରୀ ସେଲସିୟସ ତାପମାତ୍ରାରେ ଏହି ଟିକାକୁ ସର୍ବାଧିକ ୬ ମାସ ପର୍ଯ୍ୟନ୍ତ ରଖାଯାଇ ବ୍ୟବହାର କରାଯାଇପାରିବ ବୋଲି ବ୍ୟବସ୍ଥା ଥିଲା ।

କମ୍ପାନୀ ପକ୍ଷରୁ କୁହାଯାଇଛି, ସିଡିଏସସିଓ ୧୨ ମାସ ଲାଗି ଅନୁମତି ପ୍ରଦାନ ପରେ ଏହି ଅବଧି ୨୪ ମାସ ଯାଏଁ ବଢାଇବା ଲାଗି ପୁଣି ଅନୁମତି ନିଆଯିବ ।