ଭୁବନେଶ୍ୱର: ରାଜ୍ୟରେ ୫ଶହ ତଳକୁ ଖସିଲା କରୋନା ସଂକ୍ରମଣ। ଗତ ୨୪ ଘଣ୍ଟା ଚିହ୍ନଟ ହୋଇଛନ୍ତି ୪୭୧ ଜଣ ନୂଆ କରୋନା ସଂକ୍ରମିତ।  ତେବେ ୬ଜଣଙ୍କର ଜୀବନ ନେଇଛି କିଲର କରୋନା। ସେହିପରି ଶୂନରୁ ୧୮ ବର୍ଷ ବୟସର ୫୭ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି। କ୍ୱାରେଣ୍ଟାଇନ ସେଣ୍ଟରରୁ ୨୭୪ ଜଣ ଚିହ୍ନଟ ହୋଇଥିବା ବେଳେ ଲୋକାଲ କଣ୍ଟାକ୍ଟ କେସ୍ ରହିଛି ୧୯୭। ଖୋର୍ଦ୍ଧାରୁ ୧୯୬, କଟକରୁ ୮୧, ଷ୍ଟେଟପୁଲରୁ ୪୪, ବାଲେଶ୍ୱରରୁ ୨୬, ଯାଜପୁର ଓ ମୟବରଭଞ୍ଜରୁ ୨୨ଜଣ ଲେଖାଏଁ, ପୁରୀରୁ ୧୯, ଜଗତସିଂହପୁରରୁ ୧୬ ଜଣ ସଂକ୍ରମିତ ଚିହ୍ନଟ ହୋଇଛନ୍ତି। କେନ୍ଦ୍ରାପଡାରୁ ୯, ଢେଙ୍କାନାଳରୁ ୫, ଅନୁଗୁଳ ଓ ଭଦ୍ରକରୁ ୪ଜଣ ଲେଖାଏଁ କରୋନା ସଂକ୍ରମିତ ଚିହ୍ନଟ ହୋଇଛନ୍ତି। ସେହିପରି ଝାରସୁଗୁଡା, କେନ୍ଦୁଝରରରୁ ୩ଜଣ ଲେଖାଏଁ, ବରଗଡ଼, ଦେବଗଡ଼, ଓ ମାଲକାନଗିରିରୁ ୨ଜଣ ଲେଖାଏଁ, ବଲାଙ୍ଗୀର, କନ୍ଧମାଳ, ସମ୍ବଲପୁର ଓ ସୁନ୍ଦରଗଡ଼ରୁ ଜଣେ ଲେଖାଏଁ ସଂକ୍ରମିତ ଚିହ୍ନଟ ହୋଇଛନ୍ତି କରୋନା ସଂକ୍ରମିତ। ୨୪ଘଣ୍ଟାରେ ସୁସ୍ଥ ହୋଇଛନ୍ତି ୮୭୪ ଆକ୍ରାନ୍ତ।

ଭୁବନେଶ୍ୱର: ଲଗାଣ ବର୍ଷା ଯୋଗୁଁ ଜନଜୀବନ ବିପର୍ଯ୍ୟସ୍ତ। ପୁରା ରାଜ୍ୟରେ ଲାଗି ରହିଛି ଲଗାଣ ବର୍ଷା। ଖୋର୍ଦ୍ଧା ଜିଲ୍ଲାରେ ଗତ ଦୁଇଦିନ ଧରି ଲଘୁଚାପ ପ୍ରଭାବରେ ଲଗାଣ ବର୍ଷା ଜାରି ରହିଛି। ବିଭିନ୍ନ ଅଞ୍ଚଳରେ ରାସ୍ତାର ଦୁଇ ଫୁଟ ଉପରେ ପାଣି ଚାଲୁଛି। ଆଗକୁ ଅଧିକ ବର୍ଷା ସମ୍ଭାବନା ଥିବାରୁ ଅବସ୍ଥା ସଙ୍ଗିନ ହେବାର ଆଶଙ୍କା ରହିଛି। ମରୁଡ଼ି ଯୋଗୁଁ ଯେଉଁ ବିଲ ଶୁଖିଲା ପଡ଼ିଥିଲା, ବର୍ତ୍ତମାନ ସମସ୍ତ ଚାଷ ଜମି ବୁଡ଼ି ଯାଇଛି। ଖୋର୍ଦ୍ଧା ବ୍ଲକ ଉଇଲ କିଶନ ନଗର ପଞ୍ଚୟତର ଟାଙ୍ଗିଆ ପଡ଼ା ଗ୍ରାମରେ ପ୍ରବଳ ବର୍ଷା ଯୋଗୁଁ ଘରଦ୍ୱାର ଭାଙ୍ଗିଥିବା ଖବର ମିଳିଛି। ସହରର ବିଭିନ୍ନ ସ୍ଥାନରେ ମଧ୍ୟ ବର୍ଷା ପାଣି ଲହଡା ମାରୁଛି।

ସେହିପରି ବର୍ଷା କାରଣରୁ କଟକର ଅନେକ ଅଞ୍ଚଳର ଦେଖିବାକୁ ମିଳିଛି କୁତ୍ରିମ ବନ୍ୟା ପରିସ୍ଥିତି। ଅନେକ ସ୍ଥାନରେ ଜଳ ନିଷ୍କାସନ ହୋଇ ନପାରିବାରୁ ରାସ୍ତା ଉପରେ ଚାଲିଛି ପାଣି। ସେହିପରି ଯାତାୟାତରେ ମଧ୍ୟ ସମସ୍ୟା ଉପୁଜିଛି। ବାଦାମବଡି, ମହାନଦୀ ବିହାର, ଚାଉଳିଆଗଞ୍ଜ, ନୂଆପଡ଼ା ସହ ଅନେକ ଅଞ୍ଚଳରେ ଜଳମଗ୍ନ ସ୍ଥିତି ଦେଖିବାକୁ ମିଳିଛି। ଜଳ ନିଷ୍କାସନ ପାଇଁ ମହାନଗର ନିଗମ ପକ୍ଷରୁ ବିଭିନ୍ନ ସ୍ଥାନରେ ପମ୍ପ ଲଗାଯାଇ ଜଳ ନିଷ୍କାସନ କରାଯାଉଛି।

ଚାନ୍ଦବାଲି ମୁଖ୍ୟରାସ୍ତାର ପେଟ୍ରୋଲ ଟାଙ୍କି ଠାରୁ ବିକେ ଟକିଜ ସାଲେପୁର କୁଆପାଳ ରୋଡ ଛକରୁ ବୋଦାମୁଣ୍ଡେଇ ବଜାର ପଯ୍ୟନ୍ତ ରାସ୍ତା ଉପରେ ଜମି ରହିଛି। ଫଳରେ ଯାତାୟତରେ ନାନା ସମସ୍ୟା ଦେଖା ଦେଇଛି। ସେପଟେ ଲୁଣାହାର ଚନ୍ଦ୍ରଦେଇପୁର ଗ୍ରାମରେ ଅନେକ ଘରେ ବର୍ଷା ଜଳ ପଶି ଯାଇଛି।

ସେପଟେ ବର୍ଷାରେ ବେହାଲ ହୋଇଛି ବନ୍ଦର ନଗରୀ। ସବୁ ଓ୍ୱାର୍ଡରେ ଘରେ ପଶିଛି ବର୍ଷା ଜଳ। ମାଉସୀ ମାଆ ଛକରେ ଲହଡି ମାରୁଛି ଆଣ୍ଠୁଏ ଉଚ୍ଚର ପାଣି।  ଗତକାଲି ରାତିରୁ ବର୍ଷା ସାଙ୍ଗକୁ ପବନ ମଧ୍ୟ ଜୋରରେ ହେଉଛି। ଫଳରେ କେତେକ ସ୍ଥାନରେ ଗଛ ଭାଙ୍ଗି ପଡିଥିବା ବେଳେ ବିଦ୍ୟୁତ୍ ଖୁଣ୍ଟି ମଧ୍ୟ ଉପୁଡି ପଡିଛି।

ପାରାଦୀପର ୧୦, ୧୧, ୧୨ ନମ୍ବର ଓ୍ୱାର୍ଡ ସମେତ ନିୟୁ ଜଗନ୍ନାଥ କଲୋନୀ, ବାଉରିଆପାଳନ୍ଦା, ନୂଆବଜାର କଲୋନୀରେ ଲୋକଙ୍କ ଘରେ ପାଣି ପଶିଯାଇଛି। ଅଧିକ ବର୍ଷା ହେଉଥିବାରୁ ସମସ୍ତ ଡ୍ରେନ ଗୁଡିକ ଅବରୋଧ ହୋଇପଡ଼ିଛି। ବର୍ଷା ଜଳ ନିଷ୍କାସନ ହେବାରେ ବାଧା ସୃଷ୍ଟି ହୋଇଛି। ପାରାଦୀପ ମ୍ୟୁନିସିପାଲଟି ତରଫରୁ ପାଣି ନିଷ୍କାସନର ବ୍ୟବସ୍ଥା କରାଯାଉଥିବା କାର୍ଯ୍ୟନିର୍ବାହୀ ଅଧିକାରୀ ସୂଚନା ଦେଇଛନ୍ତି।

ଭଦ୍ରକ ମଧ୍ୟ ବର୍ଷାରେ ବେହାଲ ହୋଇଛି। ବର୍ଷା ପାଣି ଜମିବା ସହ ପବନରେ ୯ ନମ୍ବର ୱାର୍ଡରେ ବିରାଟ ଗଛ ଉପୁଡି ପଡି ରାସ୍ତା ଅବରୋଧ ହେବା ସହ ବିଦ୍ୟୁତ ତାର ଛିଡ଼ି ଖୁଣ୍ଟ ବଙ୍କା ହୋଇଯାଇଥିବା ଦେଖିବାକୁ ମିଳିଛି। ଭଦ୍ରକ ପୌରପାଳିକାରେ ପଥରଆଡି ନିକଟରେ ରାସ୍ତା ଉପରେ ବର୍ଷା ଜଳ ଲହଡି ମାରୁଛି। କଣ୍ଟାପାଳ ସମେତ ବିଭିନ୍ନ କଲୋନୀରେ ପାଣି ପଶିଯାଇଛି। ସାଧାରଣରେ ଲୋକମାନେ ଯାତାୟାତରେ ସମସ୍ୟା ଭୋଗୁଛନ୍ତି। ଡ୍ରେନ୍‌ ସମସ୍ୟା ଥିବାରୁ, ବର୍ଷା ଜଳ ନିଷ୍କାସନ ହୋଇ ପାରୁନାହିଁ। ଅପରିଷ୍କାର ପାଣି ଘରେ ପଶି ଅସ୍ୱାସ୍ଥ୍ୟକର ପରିବେଶ ସୃଷ୍ଟି ହେଉଛି।

ଭୁବନେଶ୍ୱର: ୮୭ ବର୍ଷର ରେକର୍ଡ ଭାଙ୍ଗିଲା ବର୍ଷା। ଏହି ବର୍ଷା ହେଉଛି ଚଳିତ ମୌସୁମୀ ସିଜିନ୍‌ର ସବୁଠୁ ବଡ଼ ଲଘୁଚାପ। ଗତ ୫ ବର୍ଷ ମଧ୍ୟରେ ଏମିତି ବର୍ଷା ହୋଇନଥିଲା। ଖୋର୍ଦ୍ଧା, ଜଗତସିଂହପୁର, ପୁରୀରେ ପ୍ରବଳ ବର୍ଷା ରେକର୍ଡ ହୋଇଥିବା ବେଳେ ପୁରୀ ଜିଲ୍ଲା କାକଟପୁରରେ ରେକର୍ଡ ୫୨୫ ମିମି ବର୍ଷା ହୋଇଛି। ୧୯୩୪ ସେପ୍ଟେମ୍ବର ୨୦ରେ ୨୩୪ମିମି ବର୍ଷା ହୋଇଥିଲା। ୮୭ ବର୍ଷ ପରେ ପୁଣି ସେପ୍ଟେମ୍ବର ମାସରେ ରେକର୍ଡ ଭାଙ୍ଗି ଅଧିକ ବର୍ଷା ହୋଇଛି ବୋଲି ସୂଚନା ଦେଇଛନ୍ତି ପାଣିପାଗ ବିଶେଷଜ୍ଞ ଉମାଶଙ୍କ ଦାସ।

ତେବେ ଲଘୁଚାପ କାରଣରୁ ୫୭ ଟି ସ୍ଥାନରେ ପ୍ରବଳରୁ ଅତି ପ୍ରବଳ ବର୍ଷା ହୋଇଛି। ଯଦି ଦେଖିବା ଆଞ୍ଚଳିକ ପାଣିପାଗ କେନ୍ଦ୍ରର ସୂଚନା ଅନୁଯାୟୀ ଆଗାମୀ ୨୪ ଘଣ୍ଟା ପର୍ଯ୍ୟନ୍ତ ରାଜ୍ୟରେ ଏଭଳି ସ୍ଥିତି ଲାଗି ରହିବ। ମୌସୁମୀ ଅତ୍ୟନ୍ତ ସକ୍ରିୟ ରହିଛି। ସେପଟେ ଟ୍ୱିନସିଟିରେ ୬ ଘଣ୍ଟା ପାଇଁ ରେଡ଼ ଆଲର୍ଟ ଜାରି ହୋଇଛି। ଅକସ୍ମାତ ବନ୍ୟା ପରିସ୍ଥିତି ସୃଷ୍ଟି ହେବାର ସମ୍ଭାବନା ଦେଖାଦେଇଛି।

ପୁରୀ: ଆଜିଠୁ ନୂଆ ଏସଓପିରେ ଆରମ୍ଭ ହେଲଶ ଜଗା ଦର୍ଶନ। କରୋନା କଟକଣାରେ ଶ୍ରୀମନ୍ଦିର ପ୍ରଶାସନ ପକ୍ଷରୁ ଜଗା ଦର୍ଶନ ନେଇ ଏସଓପିରେ କୋହଳ କରାଯାଇଥିଲା। ତେବେ ଆଜିଠାରୁ ଆହୁରି ଅଧିକା କୋହଳ ହୋଇଛି ଜଗା ଦର୍ଶନରେ ନିୟମ। ସକାଳ ୭ ଟାରୁ ରାତି ୯ ଟା ପର୍ଯ୍ୟନ୍ତ ଭକ୍ତଙ୍କୁ ମିଳିବ ଜଗା ଦର୍ଶନ।

ପୂର୍ବଭଳି ଦୁଇ ଡୋଜ୍‌ ଟିକା ନେଇଥିବା ବ୍ୟକ୍ତି ଭ୍ୟାକ୍ସିନେସନ ସାର୍ଟିଫିକେଟ୍ କିମ୍ବା ୯୬ ଘଣ୍ଟା ଭିତରର RTPCR ନେଗେଟିଭି ରିପୋର୍ଟ ଦେଖାଇବାକୁ ପଡ଼ିବ। ସେହିପରି ଚଳିତ ସପ୍ତାହରୁ ଶନିବାର ମନ୍ଦିର ଖୋଲା ରହିବ। ଏଣିକି ଭକ୍ତମାନେ ମନ୍ଦିର ଭିତରେ ଦୀପ ଲଗାଇ ପାରିବେ। ଆନନ୍ଦ ବଜାରରେ ମହାପ୍ରସାଦ ସେବନ କରିପାରିବେ ଶ୍ରଦ୍ଧାଳୁ। ତେବେ ଗତ ୩ ଦିନ ଧରି ଶ୍ରୀମନ୍ଦିରରେ ଦର୍ଶନ ବନ୍ଦ ଥିବା ବେଳେ, ଆଜି ମନ୍ଦିରରେ ଶ୍ରଦ୍ଧାଳୁଙ୍କ ଗହଳି ଦେଖିବାକୁ ମିଳିଛି।

କେନ୍ଦ୍ରାପଡ଼ା/ବରଗଡ଼: ଗଭୀର ଅବପାତର ରୂପ ନେବା ପରେ ବଢ଼ି ଚାଲିଛି ବର୍ଷାର ପରିମାଣ। ରାଜ୍ୟରେ ଲାଗି ରହିଛି ପ୍ରବଳ ବର୍ଷା। ତେବେ ବର୍ଷା କାରଣରୁ କେନ୍ଦ୍ରାପଡ଼ା ପାଟକୁରାର ଗରଦପୁରରେ ଅଘଟଣ ଘଟିଛି। ପ୍ରବଳ ବର୍ଷା କାରଣରୁ ବଡ଼ବେତରା ଗାଁରେ ଘର କାନ୍ଥ ଭୁଷୁଡ଼ି ପଡ଼ିଛି। ଘର କାନ୍ଥ ଭୁଷୁଡ଼ିବା ଫଳରେ କାନ୍ଥ ତଳେ ଚାପି ହୋଇ ଜଣଙ୍କର ମୃତ ହୋଇଥିବା ବେଳେ ଜଣେ ଆହତ ହୋଇଛନ୍ତି। ମୃତକ ହେଉଛନ୍ତି ୭୦ ବର୍ଷୀୟ ଅଭୟ କୁମାର ମହାପାତ୍ର ଓ ଆହତ ଜଣକ ହେଉଛନ୍ତି ବୋହୁ କଳ୍ପନା ମହାପାତ୍ର।

ସେପଟେ ନଦୀ ପାଣି ସୁଅରେ ଭାସି ଯାଉଥିଲେ ବାଇକ ଆରୋହୀ। ଉଦ୍ଧାର କଲେ ସ୍ଥାନୀୟ ଲୋକେ। ଘଟଣା ଘଟିଛି ଅମ୍ବାପାଲି ଓ ବରଗଡ଼ ସହରକୁ ସଂଯୋଗ ଜିରା ନଦୀ ଉପରେ ନିର୍ମିତ ଅସ୍ଥାୟୀ ରାସ୍ତାରେ ପାଣି ସୁଅରେ ଅସ୍ଥାୟୀ ରାସ୍ତା ଦିନକୁ ଦିନ ଧୋଇ ହୋଇ ଯାଉଛି। ବାଇକରେ ଆସୁଥିବା ଜଣେ ବ୍ୟକ୍ତି ଏହି ରାସ୍ତା ଦେଇ ଆସୁଥିବା ସମୟରେ ବାଇକ ସହ ବାଇକ ଆରୋହୀ ଜଣକ ଭାସିଯାଉଥିବା ବେଳେ ସ୍ଥାନୀୟ ଲୋକ ବ୍ୟକ୍ତି ଓ ବାଇକକୁ ଉଦ୍ଧାର କରିଛନ୍ତି।

ଲଗାଣ ବର୍ଷାରେ ଭୁଷୁଡ଼ିଲା ୧୦୦ ବର୍ଷର ପୁରାତନ କୋଠା। ବ୍ରହ୍ମପୁର କାମ୍ପ ସାହିରେ ଥିବା ଅତି ପୁରାତନ ଆନ୍ଧ୍ରା ମହିଳା ସମାଜମ୍ ପାଠାଗାର କୋଠା ଲଗାଣ ବର୍ଷାରେ ଭୁଷୁଡ଼ି ପଡିଛି। ଫଳରେ ପାଠାଗାରରେ ଥିବା ସମସ୍ତ ପୁସ୍ତକ ସମ୍ପୂର୍ଣ୍ଣ ନଷ୍ଟ ହୋଇଯାଇଛି। ତା ସହ ଅନେକ ସାମଗ୍ରି ନଷ୍ଟ ହୋଇଥିବା ଦେଖିବାକୁ ମିଳିଛି।

ଭୁବନେଶ୍ୱର: ଲଘୁଚାପ ଜନିତ ପ୍ରବଳ ବର୍ଷା ପାଇଁ ବନ୍ଦ ହେଲା ସ୍କୁଲ। ୧୨ ଜିଲ୍ଲାରେ ୨ଦିନ ପାଇଁ ସ୍କୁଲକୁ ବନ୍ଦ କରାଯାଇଛି। ରେଡ୍ ଆର୍ଲଟ ଥିବା ଜିଲ୍ଲାରେ ସମସ୍ତ ସ୍କୁଲକୁ ବନ୍ଦ କରାଯାଇଛି। ଏନେଇ ସୂଚନା ଦେଲେ ସ୍କୁଲ ଓ ଗଣଶିକ୍ଷା ମନ୍ତ୍ରୀ ସମୀର ଦାଶ। ଆଗକୁ ବର୍ଷା ବଢ଼ିବାର ସମ୍ଭବାନା ଥିବାରୁ ଆଜି ଓ ଆସନ୍ତାକାଲି ସ୍କୁଲ ବନ୍ଦ ରହିବ। ପୁରୀ, ଖୋର୍ଦ୍ଧା କଟକ, ଜଗତସିଂହପୁର, କେନ୍ଦ୍ରାପଡା, ଢେଙ୍କାନାଳ ଓ ନୟାଗଡ଼ରେ ପ୍ରବଳରୁ ଅତି ପ୍ରବଳ ବର୍ଷା ପାଇଁ ରେଡ୍ ଆଲର୍ଟ ଜାରି ହୋଇଥିବା ବେଳେ ସମ୍ବଲପୁର, ଦେବଗଡ଼, ଅନୁଗୁଳ, ସୋନପୁର ଓ ବରଗଡ଼କୁ ମଧ୍ୟ ରେଡ୍ ଆଲର୍ଟ ଜାରି କରିଥିଲେ ଏସଆରସି।

ଗତ ୨୪ ଘଣ୍ଟା ମଧ୍ୟରେ ପୁରୀରେ ସର୍ବାଧିକ ୩୪୧ ମିମି ବର୍ଷା ରେକର୍ଡ ହୋଇଛି। ପାରାଦୀପରେ ୧୨୯ ମିମି, ଭୁବନେଶ୍ୱରରେ ୧୯୫ ମିମି ଗୋପାଳପୁରରେ ୬୬ ମିମି, ଚାନ୍ଦବାଲିରେ ୪୬ମିମି ଓ ବାଲେଶ୍ଵରରେ ୨୪ ମିମି ବର୍ଷା ରେକର୍ଡ ହୋଇଛି। ଆସନ୍ତା ୨୪ ଘଣ୍ଟା ମଧ୍ୟରେ ସମ୍ବଲପୁର, ଦେଓଗଡ଼, ଅନୁଗୁଳ, ସୋନପୁର ଏବଂ ବରଗଡ଼ରେ ପ୍ରବଳରୁ ଅତି ପ୍ରବଳ ବର୍ଷା ପାଇଁ ରେଡ଼ ଆଲର୍ଟ ଜାରି କରାଯାଇଛି। ଏହି ୨୪ ଘଣ୍ଟା ମଧ୍ୟରେ ୧୨୦ ରୁ ୨୦୦ ମିମି ପର୍ଯ୍ୟନ୍ତ ବର୍ଷା ହେବାର ସମ୍ଭାବନା ରହିଛି। ସେହିପରି ବଲାଙ୍ଗୀର ଝାରସୁଗୁଡା ସୁନ୍ଦରଗଡ଼ ବୌଦ୍ଧ, କେନ୍ଦୁଝର, ଢେଙ୍କାନାଳ ଏବଂ କଟକ ରେ ପ୍ରବଳ ବର୍ଷା ପାଇଁ ଇଲୋ ଆଜି ଏବଂ ଆସନ୍ତାକାଲି ପର୍ଯ୍ୟନ୍ତ ମତ୍ସ୍ୟଜୀବୀଙ୍କୁ ସମୁଦ୍ରକୁ ମନା କରାଯାଇଛି।

ଗତ ୬ ଘଣ୍ଟାରେ ଘଣ୍ଟା ପ୍ରତି ୫ କିମି ବେଗରେ ସ୍ଥଳ ଭାଗ ଆଡ଼କୁ ଗତି କରୁଛି ଲଘୁଚାପ। ଧିରେ ଧିରେ ଏହା ପୂର୍ବ  ପଶ୍ଚିମ ଓ ଉତ୍ତର ପଶ୍ଚିମକୁ ଗତି କରି ଉତ୍ତର ଓଡ଼ିଶା ଉତ୍ତର ଛତିଶଗଡ଼ ଦେଇ ଯିବ। ଆସନ୍ତା ୪୮ ଘଣ୍ଟା ମଧ୍ୟରେ ଏହା ମଧ୍ୟ ପ୍ରଦେଶ ଆଡ଼କୁ ଗତି କରିବ। ପରବର୍ତ୍ତୀ ୨୪ ଘଣ୍ଟା ମଧ୍ୟରେ ଏହା ଦୁର୍ବଳ ହୋଇ ଅବପାତରେ ପରିଣତ ହେବ ଵୋଲି ସୂଚନା ଦେଇଛି ପାଣି ପାଗ ବିଭାଗ ସୂଚନା ଦେଇଛି। ଏହାର ପ୍ରଭାବରେ ସାରା ରାଜ୍ୟରେ ଉପକୂଳରୁ ଉପାନ୍ତ ସବୁଠି ଲାଗି ରହିଛି ବର୍ଷା।