ଭୁବନେଶ୍ୱର: ରାଜ୍ୟ କ୍ୟାବିନେଟ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ବସିଥିବା କ୍ୟାବିନେଟରେ କ୍ରୀଡା ଉପରେ ଅଧିକ ଗୁରୁତ୍ୱ ଦେଇଛନ୍ତି । ରାଜ୍ୟରେ ୮୯ ଇନ୍ଡୋର ଷ୍ଟାଡ଼ିୟମ ନିର୍ମାଣ ପ୍ରସ୍ତାବକୁ ଅନୁମୋଦନ କରିଛି କ୍ୟାବିନେଟ । ଏଥି ପାଇଁ ୬୯୩.୩୫ କୋଟି ବ୍ୟୟ ବରାଦ କରାଯାଇଛି । ଯାହା ୧୮ ମାସ ମଧ୍ୟରେ ସଂପୂର୍ଣ୍ଣ କରାଯିବ । ସେହିପରି ଭୁବନେଶ୍ୱର ଉତ୍ତର ନିର୍ବାଚନ ମଣ୍ଡଳୀରେ ମଧ୍ୟ ୯ କୋଟି ୫୫ ଲକ୍ଷ ବ୍ୟୟରେ ଏକ ଇନଡୋର ଷ୍ଟାଡିଅମ ନିର୍ମାଣ କରାଯିବ । ତେବେ ଏହି ଷ୍ଟାଡିଅମ ନିର୍ମାଣ ହେବା ଦ୍ୱାରା ରାଜ୍ୟରୁ ବହୁ ପ୍ରତିଭାବାନ କ୍ରୀଡ଼ାବିତ ବାହାରିବେ ବୋଲି ଭୁବନେଶ୍ୱର ଉତ୍ତର ବିଧାୟକ ସୁଶାନ୍ତ ରାଉତ ଏକ ସାମ୍ବାଦିକ ସମିଳନୀରେ କହିଛନ୍ତି । ସେହିପରି ଏଭଳି ଇନ୍ଡୋର ଷ୍ଟାଡିୟମ୍ ଉତ୍ତର ଭୁବନେଶ୍ୱରରେ ନିର୍ମାଣ ହେବାକୁ ଯାଉଥିବାରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଧନ୍ୟବାଦ ଜଣାଇଛନ୍ତି ଯୁବ କ୍ରୀଡାବିତ୍ ।
ଆଇଏଏସ୍ ଏବଂ ଓଏଏସ୍ ସ୍ତରରେ ଛୋଟ ଧରଣର ଅଦଳବଦଳ
ଭୁବନେଶ୍ୱର: ଆଇଏଏସ୍ ଓ ଓଏଏସ୍ ସ୍ତରରେ ଛୋଟ ଧରଣର ଅଦଳବଦଳ କରିଛନ୍ତି ରାଜ୍ୟ ସରକାର । ଭଦ୍ରକ ଜିଲ୍ଲାପାଳ ଜ୍ଞାନରଞ୍ଜନ ଦାସଙ୍କୁ ପଞ୍ଚାୟତିରାଜ ବିଭାଗ ନିର୍ଦ୍ଦେଶକ ଭାବେ ନୂଆ ନିଯୁକ୍ତି ଦେଇଛନ୍ତି ରାଜ୍ୟ ସରକାର । ସେହିଭଳି ପଞ୍ଚାୟତିରାଜ ନିର୍ଦ୍ଦେଶକ ଥିବା ଉମାକାନ୍ତ ତ୍ରିପାଠୀଙ୍କୁ ଜଙ୍ଗଲ ଓ ପରିବେଶ ବିଭାଗ ଅତିରିକ୍ତ ସଚିବ ଭାବେ ନିଯୁକ୍ତି ମିଳିଛି । ଢେଙ୍କାନାଳ ଜିଲ୍ଲାପାଳ ଥିବା ଭୂମେଶ ଚନ୍ଦ୍ର ବେହେରାଙ୍କୁ ଆୟୁଷ ବିଭାଗ ନିର୍ଦ୍ଦେଶକ ଭାବେ ନିଯୁକ୍ତି ମିଳିଛି ଅନ୍ୟପକ୍ଷରେ ସରୋଜ କୁମାର ସେଠୀଙ୍କୁ ଢେଙ୍କାନାଳ ଜିଲ୍ଲାପାଳ ଭାବେ ନିଯୁକ୍ତି ଦିଆଯାଇଛି । ଆୟୁଷ ବିଭାଗ ନିର୍ଦ୍ଦେଶକ ଭାବେ ବର୍ତ୍ତମାନ କାର୍ଯ୍ୟ କରୁଥିବା ତ୍ରିଲୋଚନ ମାଝିଙ୍କୁ ଭଦ୍ରକ ଜିଲ୍ଲପାଳ ଭାବେ ନୂଆ ନିଯୁକ୍ତି ମିଳିଛି ।
କଣ୍ଟ୍ରୋଲରେ ଥିଲି ବୋଲି ୨୨ ଚାପୁଡ଼ା ମାରିଲି, ନହେଲେ ଆହୁରି ଅଧିକ ପଡ଼ିଥାନ୍ତା
ଲକ୍ଷ୍ନୌ: କିଛିଦିନ ତଳେ ଲକ୍ଷ୍ନୌର ଟ୍ରାଫିକରେ ଜଣେ କ୍ୟାବ ଡ୍ରାଇଭରଙ୍କୁ ଜଣେ ଯୁବତୀ ଚାପୁଡ଼ା ପରେ ଚାପୁଡ଼ା ମାରି ଚାଲିଥିଲେ । ତାହା ପୁଣି କ୍ୟାବ ଡ୍ରାଇଭରଙ୍କ ଭୁଲ୍ ନଥାଇ । ଉକ୍ତ ଘଟଣାରେ ଏବେ ପୁଣି ଆହୁରି ବିବାଦୀୟ ମନ୍ତବ୍ୟ ଦେଇଛନ୍ତି ମାଡ଼ ମାରିଥିବା ଯୁବତୀ ପ୍ରିୟଦର୍ଶିନୀ । କହିଛନ୍ତି- ପୂର୍ବରୁ ମୁଁ ଜଣେ ବାଇକ୍ ଆରୋହୀଙ୍କୁ ବହୁତ ମାରିଥିଲି । ଜଣେ ମଦ ପିଇ ମୋତେ ଛୁଇଁବାକୁ ଚାହୁଁଥିଲେ, ମୁଁ ତାଙ୍କୁ ଚାପୁଡ଼ା ସହ ଧକ୍କା ମାରିଥିଲି ।

କ୍ୟାବ ଚାଳକଙ୍କୁ ମୁଁ ତ ହାତକୁ କଣ୍ଟ୍ରୋଲରେ ରଖି ମାରିଥିଲି । ନିଜକୁ ବଞ୍ଚାଇବା ଲାଗି କିଛି ବି କଲେ ତା ଠିକ୍ । ଯିଏ କେହି ବି ନିକଟ ହୁଏ ମୁଁ ତାକୁ ପ୍ରଥମେ ଧକ୍କା ପରେ ଚାପୁଡ଼ା ମାରେ ବୋଲି ମନ୍ତବ୍ୟ ଦେଇଛନ୍ତି ପ୍ରିୟଦର୍ଶିନୀ । ଘଟଣା ଦିନ ଆର୍ମି ଯବାନ ମୋତେ ଅଟକାଇ ଦେଇଥିଲେ । ନହେଲେ ସ୍ଥିତି ଆହୁରି ସାଂଘାତିକ ହୋଇଥାନ୍ତା । ୨୨ରୁ ୨୫ ଚାପୁଡ଼ା ମାରିଥାନ୍ତି ।
ରାଜ୍ୟରେ ଏବେ ବି ଦୁର୍ବଳ ରହିଛି ଦକ୍ଷିଣ ପଶ୍ଚିମ ମୌସୁମୀ ବାୟୁ, ନିଅଣ୍ଟିଆ ବର୍ଷା ରେକର୍ଡ
ଭୁବନେଶ୍ୱର: ରାଜ୍ୟରେ ଏବେ ବି ଦୁର୍ବଳ ରହିଛି ଦକ୍ଷିଣ ପଶ୍ଚିମ ମୌସୁମୀ ବାୟୁ । ମୌସୁମୀ ବାୟୁ ଦୁର୍ବଳ ହେବା ଫଳରେ ରାଜ୍ୟରେ ନିଅଣ୍ଟିଆ ବର୍ଷା ହୋଇଛି । କେବଳ ଅଗଷ୍ଟ ମାସରେ ସ୍ୱାଭାବିକ ଠାରୁ ୭୫ ପ୍ରତିଶତ କମ୍ ବର୍ଷା ହୋଇଛି । ଅଗଷ୍ଟ ୧ ତାରିଖରୁ ୯ ତାରିଖ ମଧ୍ୟରେ ରାଜ୍ୟରେ ୨୮.୫ ମିଲିମିଟର ବର୍ଷା ରେକର୍ଡ ହୋଇଛି । ଏହି ସମୟ ମଧ୍ୟରେ ରାଜ୍ୟରେ ୧୧୫.୪ ମିଲିମିଟର ବର୍ଷା ହେବା କଥା । ସେହିପରି ଜୁନ୍ ମାସରୁ ଆଜି ପର୍ଯ୍ୟନ୍ତ ରାଜ୍ୟରେ ସ୍ୱାଭାବିକ ଠାରୁ ୨୮ ପ୍ରତିଶତ କମ୍ ବର୍ଷା ହୋଇଛି । ୨୦ଟି ଜିଲ୍ଲାରେ ନିଅଣ୍ଟିଆ ବର୍ଷା ହୋଇଥିବା ବେଳେ ୧୦ ଜିଲ୍ଲାରେ ସ୍ୱାଭାବିକ ବର୍ଷା ହୋଇଛି । ବର୍ତ୍ତମାନ ସୁଦ୍ଧା ରାଜ୍ୟରେ ୬ ଶହ ୭୭.୭ ମିଲିମିଟର ବର୍ଷା ରେକର୍ଡ ହେବା କଥା କିନ୍ତୁ ୪ ଶହ ୮୪.୮ ମିଲିମିଟର ବର୍ଷା ରେକର୍ଡ ହୋଇଛି । ଯାହା ସ୍ୱାଭାବିକ ଠାରୁ ୨୮ ପ୍ରତିଶତ କମ୍ । ୪ଟି ଜିଲ୍ଲା ଭଦ୍ରକ, ବଲାଙ୍ଗିର, ଗଜପତି ଏବଂ ଯାଜପୁରରେ ସ୍ୱାଭାବିକ ଠାରୁ ୪୦ ପ୍ରତିଶତ କମ୍ ବର୍ଷା ରେକର୍ଡ ହୋଇଛି । ନିଅଣ୍ଟିଆ ବର୍ଷା ସମୟରେ ରାଜ୍ୟରେ ଆସନ୍ତା ୨ ରୁ ୩ ଦିନ ମଧ୍ୟରେ ରାଜ୍ୟରେ କେବଳ କାଳବେିଶାଖୀ ଜନିତ ବର୍ଷା ହେବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର ।
ଭାରତ ମହାସାଗରରେ ଭାରତ ନିର୍ମାଣ କରୁଛି କି ଗୁପ୍ତ ସାମରିକ ଘାଟି ?
ନୂଆଦିଲ୍ଲୀ: ଭାରତ ମହାସାଗରରେ ଭାରତ କରୁଛି ଗୁପ୍ତ ସାମରିକ ଘାଟି ! ଏହି ସୈନ୍ୟ ଆଡ୍ଡାର ବ୍ୟବହାର କରି ସମୁଦ୍ରରେ ନିଜ ସ୍ଥିତି ସହ ଶକ୍ତି ବଢ଼ାଇବ ଭାରତ । କିଛିଦିନ ତଳେ ଅନ୍ତରାଷ୍ଟ୍ରୀୟ ନ୍ୟୁଜ୍ ଚ୍ୟାନେଲ୍ ଅଲ ଜଜିରା ନିଜ ରିସର୍ଚ୍ଚ ଆଧାରରେ ଏଭଳି ଦାବି କରି ସମୁଦ୍ରରେ ଭାରତର ଦମଦାର ସୈନ୍ୟ ଉପସ୍ଥିତିକୁ ଇସାରା କରିଛି ।
ଅଲ ଜଜିରା ଦାବି ଅନୁସାରେ, ମରିସସଠାରୁ ୧୧୦୦ କିଲୋମିଟର ଦୂର ଅଗାଲେଗା ଦ୍ୱୀପରେ ଭାରତ ନିଜର ନୌସେନା ଆଡ୍ଡା ପ୍ରସ୍ତୁତ କରୁଛି । ସାଟେଲାଇଟ୍ ଇମେଜ ଅନୁସାରେ ସେଠାରେ ନିର୍ମାଣ ଗତିବିଧି ଆଦି ଦ୍ରୁତଗତିରେ ଚାଲିଛି । ସେଠାରେ ଭାରତ ଅନ୍ତରାଷ୍ଟ୍ରୀୟ ସ୍ତରର ଏୟାରଷ୍ଟ୍ରିପର ନିର୍ମାଣ କରୁଛି ।

କେଉଁଠି ରହିଛି ଅଗାଲେଗା ଦ୍ୱୀପ ?
ଭାରତ ମହାସାଗରର ମରିସସରେ ରହିଛି ଏକ ଛୋଟ ଦ୍ୱୀପ ଅଗାଲେଗା । ଏହା ମୁଖ୍ୟ ମରିସସ ଦ୍ୱୀପ ଠାରୁ ଉତ୍ତରରେ ପ୍ରାୟ ୧୦୦୦ କିଲୋମିଟର ଦୂରରେ ରହିଛି । ଏହି ଦ୍ୱୀପର ଲମ୍ବା ୧୨ କିଲୋମିଟର ହୋଇଥିବା ବେଳେ ଚଉଡ଼ା ୧.୫ କିଲୋମିଟର । ଏଠାକାର ଜନସଂଖ୍ୟା ବହୁତ କମ୍ । ଆକଳନ ଅନୁସାରେ ଅଗାଲେଗା ଦ୍ୱୀପରେ ପ୍ରାୟ ୩୦୦ ଲୋକ ବସବାସ କରୁଛନ୍ତି ।

ଅଗାଲେଗା ଦ୍ୱୀପ ଅଞ୍ଚଳରେ ଆମେରିକାର ସୈନ୍ୟ ଠିକଣା ଡିଏଗୋ ଗାର୍ସିୟା, ଚୀନର ସୈନ୍ୟ ଆଡ୍ଡା ଜିବୁତି, ଫାନ୍ସର ମିଲିଟ୍ରି ବେସ୍ ରିୟୁନିୟୋଁରେ ରହିଛି । ଏହି ସମସ୍ତ ସାମରିକ ଘାଟି ସମୁଦ୍ରରେ ରହିଛି । କ୍ଷେତ୍ରଫଳ ଅନୁସାରେ ମାତ୍ର କିଛି କିଲୋମିଟର ପରିବ୍ୟାପ୍ତ ଏହି ସାମରିକ ଘାଟି ବେଶ୍ ଶକ୍ତିଶାଳୀ । ତାର ପ୍ରକୃତ ଶକ୍ତି ସେଠାରେ ଥିବା ସେନା ଓ ରାଷ୍ଟ୍ର ମୁଖ୍ୟଙ୍କୁ ଜଣା । ଦୁନିଆର ଅନ୍ୟ ସଂସ୍ଥା ସେଠାକାର ସାମରିକ ଘାଟିକୁ ନେଇ କେବଳ ଆକଳନ କରିଥାନ୍ତି । ସ୍ପଷ୍ଟତଃ ଭାରତର ଅଗଣା ଭାବେ ପରିଚିତ ଭାରତ ମହାସାଗରର ଏବେ ବ୍ୟାପକ ଭାବେ ସାମରିକିକରଣ ହୋଇ ସାରିଛି । ଏହି ସମୁଦ୍ର କ୍ଷେତ୍ର ଦେଇ ବିଶ୍ୱକୁ ଦୁଇ ଦୃତୀୟାଂଶ ତୈଳ କାରବାର କରାଯାଏ ।

ଭାରତ ମହାସାଗରରେ ଚୀନ ନିଜ ପ୍ରଭୃତ୍ୱ ବିସ୍ତାର କରିବାକୁ ଚାହୁଁଛି । ଏଥିପାଇଁ ଋଣକୁ ମୁଖ୍ୟ ଅସ୍ତ୍ର କରିଛି ଚୀନ । ଭାରତ ମହାସାଗରରେ ଥିବା ଋଣ ଦେଇ ଚୀନ ସେମାନଙ୍କୁ ନିଜ ଜାଲରେ ପକାଉଛି । ଋଣ ସୁଝି ନପାରୁଥିବା ଦେଶଙ୍କ ଠାରୁ ବନ୍ଦର ଓ ବିମାନ ଘାଟିର ନିୟନ୍ତ୍ରଣ ହାସଲ କରୁଛି । ସେହି ସବୁ ବନ୍ଦରରୁ ଚୀନ ନୌସେନା ଭାରତ ମହାସାଗର ଉପରେ ନଜର ରଖୁଛି । ଭାରତକୁ ଭାରତ ମହାସାଗରରେ ଘେରିବା ପାଇଁ ଚୀନର ଏହି ରଣନୀତିକୁ ବିଶେଷଜ୍ଞ ମୁକ୍ତା ଫାସ ବୋଲି କହିଥାନ୍ତି । ଚୀନର ଏଭଳି ରଣନୀତିକୁ ମାତ୍ ଦେବା ପାଇଁ ଭାରତ, ଆମେରିକା, ଅଷ୍ଟ୍ରେଲିଆ ଓ ଜାପାନ ଏକାଠି ହୋଇଛନ୍ତି । ଅତୀତରେ ଶ୍ରୀଲଙ୍କାକୁ ଚୀନ ଋଣ ଦେଇଥିଲା । ଋଣ ସୁଝି ନ ପାରିବା ପରେ ଚୀନ, ଶ୍ରୀଲଙ୍କାର ଏକ ବନ୍ଦରକୁ ନିଜ ଅଧିନକୁ ନେବାକୁ ଚାହୁଁଥିଲା । ତେବେ ଭାରତ, ଶ୍ରୀଲଙ୍କାକୁ ଋଣ ସୁଝିବାରେ ସାହାଯ୍ୟ କରିବା ପରେ ଚୀନର ଉଦ୍ୟମ ପଣ୍ଡ ହୋଇଥିଲା ।
ଭୂ-ରଣନୈତିକ ଦୃଷ୍ଟିରୁ ଭାରତ ମହାସାଗରର ଅଗାଲେଗାରେ ଭାରତର ସାମରିକ ଘାଟିକୁ ନେଇ ଅଲ ଜଜିରାର ଦାବି ସତ ହେଲେ ସାମରିକ କ୍ଷେତ୍ରରେ ଭାରତ ମହାସାଗରରେ ଏହା ଶକ୍ତି ସନ୍ତୁଳନ ସହ ଭାରତର ଶକ୍ତି ବଢ଼ାଇବ ।
ଅଗାଲେଗାକୁ ନେଇ ଦାବି କ’ଣ ?
କତର ମିଡିଆ ହାଉସ୍ ଅଲ ଜଜିରା ଅନୁସାରେ, ଅଗାଲେଗା ଦ୍ୱୀପରେ ଭାରତ ଗୁପ୍ତ ସାମରିକ ଘାଟି ନିର୍ମାଣ କରୁଛି । ସେଠାରେ ଭାରତ ୩ କିଲୋମିଟର ଲମ୍ବର ଏୟାରପୋର୍ଟ ନିର୍ମାଣ କରୁଛି । ଏହାଦ୍ୱାରା ଭାରତ ନିଜ ଜାହାଜ ଷ୍ଟେସନ ରୂପେ ବ୍ୟବହାର କରିପାରିବ । ଏଥିସହ ରନୱେର ବ୍ୟବହାର P-8I ଏୟାରକ୍ରାଫ୍ଟ କରିପାରିବ । P-8I ଭାରତର ସାମୁଦ୍ରିକ ପାଟ୍ରୋଲିଂ ହେଲିକପ୍ଟର । ଏହାର ବ୍ୟବହାର ସର୍ଭିଲାନ୍ସ, ଆଣ୍ଟି ସରଫେସ୍, ଆଣ୍ଟି ସବମରିନ ଗତିବିଧି ପାଇଁ କରାଯାଇ ପାରିବ । ଦ୍ୱୀପର କୂଳରେ ଜାହାଜ ଓ ବୋଟ୍ ଲାଗିବା ପାଇଁ ଆବଶ୍ୟକୀୟ ଭିତ୍ତିଭୂମି ମଧ୍ୟ ନିର୍ମାଣ ଚାଲିଛି ।

ଅଲ ଜଜିରା ଅନୁସାରେ, ଅଗାଲେଗାରରୁ ମିଳିଥିବା ଫଟୋ ଓ ତଥ୍ୟ ଅନୁସାରେ ଏହି ଦ୍ୱୀପରେ ଗତ ୨ ବର୍ଷ ହେଲା ନିର୍ମାଣ ସମ୍ବନ୍ଧୀୟ କାର୍ଯ୍ୟ ଚାଲିଛି । ସେଠାରେ ନିର୍ମାଣ କାର୍ଯ୍ୟରେ ନିୟୋଜିତ ସଂଖ୍ୟାଧିକ ଶ୍ରମିକ ଅସ୍ଥାୟୀ କ୍ୟାମ୍ପରେ ରହୁଛନ୍ତି ।
ଅଲ ଜଜିରାର ଦାବି ଯାହା ବି ହେଉ… ୨୦୧୫ରେ ଭାରତ ମହାସାଗରର ଅବହେଳିତା ହୋଇ ରହିଥିବା ଏହି ଦ୍ୱୀପରେ ଏଣ୍ଟ୍ରି ମାରିଥିଲା । ସେତେବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମରିସସ ଗସ୍ତରେ ଯାଇଥିଲେ । ସେଠାରେ ଦୁଇ ଦେଶ ମଧ୍ୟରେ କେତେକ ବୁଝାମଣାପତ୍ର ସ୍ୱାକ୍ଷର କରାଯାଇଥିଲା । ସେହି ଚୁକ୍ତି ମଧ୍ୟରୁ ଗୋଟିଏ ଥିଲା ଏହି ଅଗାଲେଗା ଦ୍ୱୀପକୁ ବିକଶିତ କରିବା । ଏହି ବୁଝାମଣା ଅନୁସାରେ, ଭାରତ ଅଗାଲେଗା ଦ୍ୱୀପରେ ସମୁଦ୍ର ଓ ବିମାନ ପରିବହନ ସୁବିଧାକୁ ଉନ୍ନତ ସହ ଭିତ୍ତିଭୂମି ବିକଶିତ କରିବା ।

ଚୁକ୍ତି ଅନୁସାରେ, ଭାରତ ଏହି ଦ୍ୱୀପକୁ ବିକଶିତ କରିବା ପାଇଁ ୬୩୦ କୋଟି ଟଙ୍କାରୁ ଅଧିକ ଖର୍ଚ୍ଚ କରୁଛି । ଦ୍ୱୀପରେ ମାତ୍ର ୩୦୦ ଲୋକ ରହୁଥିବା ବେଳେ ୩ କିଲୋମିଟର ଲମ୍ବା ବିମାନବନ୍ଦର ନିର୍ମାଣ ହେଉଛି । ଦ୍ୱୀପକୁ ବିକଶିତ କରିବାର ଅର୍ଥ ସୈନ୍ୟ ଆଡ୍ଡା ନଜରରେ ଦେଖାଯାଉଛି ।
ତେବେ ମିଡିଆରେ କରାଯାଉଥିବା ଦାବିକୁ ମରିସସ କେବେ ସ୍ୱୀକାର କରିନାହିଁ । ମରିସସ ସରକାରଙ୍କ ପକ୍ଷରୁ କୁହାଯାଇଛି- ଅଗାଲେଗା ଦ୍ୱୀପରେ ସାମରିକ ଆଡ୍ଡା ପାଇଁ ଭାରତକୁ ଅନୁମତି ଦିଆଯାଇ ନାହିଁ କି ସେଭଳି କିଛି ଚୁକ୍ତି ହୋଇନାହିଁ ।







Predict Above 2 Degree

