ଭୁବନେଶ୍ୱର: ଓ୍ୱେଲମାର୍କ ଲୋ ପ୍ରେସରରେ ପରିଣତ ହେଲା ଉତ୍ତର ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ । ବର୍ତ୍ତମାନ ଏହା ବାଂଲାଦେଶ ଓ ପଶ୍ଚିମବଙ୍ଗ ଉପକୂଳରେ ରହିଛି । ଆସନ୍ତା ୨୪ ଘଣ୍ଟା ମଧ୍ୟରେ ପଶ୍ଚିମବଙ୍ଗ ଓ ଝାଡଖଣ୍ଡ ଆଡକୁ ଗତି କରିବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ଏହାର ପ୍ରଭାବରେ ଓଡ଼ିଶାର ଅଧିକାଂଶ ଜିଲ୍ଲାରେ ପ୍ରବଳ ବର୍ଷା ହେବାର ସମ୍ଭାବନା ରହିଛି । ତେବେ ୨୪ ଘଣ୍ଟା ମଧ୍ୟରେ ୩ଟି ଜିଲ୍ଲା ତଥା କେନ୍ଦୁଝର, ମୟୂରଭଞ୍ଜ ଓ ବାଲେଶ୍ୱରରେ ପ୍ରବଳରୁ ଅତି ପ୍ରବଳ ବର୍ଷା ହେବ ବୋଲି ସୂଚନା ଦେଇଛି ପାଣିପାଗ କେନ୍ଦ୍ର । ସେହିପରି ସୁନ୍ଦରଗଡ, ଦେବଗଡ, ଅନୁଗୁଳ, ସମ୍ବଲପୁର, ଯାଜପୁର, ଭଦ୍ରକ, କେନ୍ଦ୍ରାପଡା, ଢେଙ୍କାନାଳ ଏବଂ କଟକରେ ପ୍ରବଳ ବର୍ଷା ସମ୍ଭାବନା ରହିଥିବାରୁ ଏହି ସବୁ ଜିଲ୍ଲାକୁ ୟେଲୋ ଆଲର୍ଟ ଜାରିକରାଯାଇଛି ।
ଶ୍ରୀଜିଉଙ୍କ ପାଇଁ ସୁନାର ଜିଭଛେଲା, ଶ୍ରୀମନ୍ଦିର ପଠାଇଲେ ଶ୍ରଦ୍ଧାଳୁ
ପୁରୀ: ଶ୍ରୀଜିଉଙ୍କ ପାଇଁ ସୁନାର ଜିଭଛେଲା ଦାନ କଲେ ଭୁବନେଶ୍ବରର ଶ୍ରଦ୍ଧାଳୁ । ଭୁବନେଶ୍ବରର ପଦ୍ମଚରଣ ପାତ୍ର ଶ୍ରୀଜିଉଙ୍କ ପାଇଁ ତିନୋଟି ସୁବର୍ଣ୍ଣ ନିର୍ମିତ ଜିଭି ବା ଜିଭ ଛେଲା ଦାନ କରିଛନ୍ତି । ଶ୍ରୀମନ୍ଦିର ମୁଖ୍ୟ ପ୍ରଶାସକ ଓ ବରିଷ୍ଠ ସେବାୟତଙ୍କ ଉପସ୍ଥିତିରେ ସେ ସୁବର୍ଣ୍ଣ ଜିଭି ଶ୍ରମନ୍ଦିର ପ୍ରଶାସନକୁ ଏହା ଦାନ କରିଛନ୍ତି । ୩ଟି ସୁବର୍ଣ୍ଣ ଜିଭିରେ ୯୦ଗ୍ରାମ ୩୩୦ମିଲିଗ୍ରାମ ସୁନା ବ୍ୟବହାର ହୋଇଛି ।
ପ୍ରତିଦିନ ମହାପ୍ରଭୁଙ୍କ ଅବକାଶ ନୀତି ସମୟରେ ସୁବର୍ଣ୍ଣ ଜିଭଛେଲାର ବ୍ୟବହାର ହୋଇଥାଏ । ଏହା ପୂର୍ବରୁ ୩ହଳ ସୁବର୍ଣ୍ଣ ସୂର୍ଯ୍ୟ-ଚନ୍ଦ୍ର ଦାନ କରିଥିଲେ ପଦ୍ମଚରଣ ପାତ୍ର । ମହାପ୍ରଭୁଙ୍କୁ ମନ ଭରି ଭଲ ପାଉଥିବା କହିଛନ୍ତି ସେ । ପିଲାଟି ବେଳୁ ଜଗନ୍ନାଥଙ୍କ ପ୍ରତି ଏକ ସ୍ୱତନ୍ତ୍ର ଭାବ ତାଙ୍କ ମନରେ । ସେଥିପାଇଁ ପ୍ରଭୁୁଙ୍କ ପାଖରେ କିଛି ଅର୍ପଣ କରିବା ନେଇ ମନେରେ ରଖିଥିବାବେଳେ, ଆଜି ସେ ସ୍ୱଭାଗ୍ୟ ତାଙ୍କୁ ମିଳିଥିବା କୁହନ୍ତି ପଦ୍ମଚରଣ ।
ପୁରୀ ପ୍ରଶାସନ ନଜରରେ ବକୁଳ ବନ, ଉନ୍ନତିକରଣ ନେଇ ପର୍ଯ୍ୟଟନ ବିଭାଗର ପଦକ୍ଷେପ
ଭୁବନେଶ୍ୱର: ନୂଆ ରୂପ ପାଇବ ପୁରୀ ସାକ୍ଷୀଗୋପାଳ ସ୍ଥିତ ବକୁଳ ବନ ବିଦ୍ୟାଳୟ । ପୁରୀ ଜିଲ୍ଲା ପ୍ରଶାସନ ଓ ପର୍ଯ୍ୟଟନ ବିଭାଗ ପକ୍ଷରୁ ଏହାର ଉନ୍ନତିକରଣ କାର୍ଯ୍ୟ ହାତକୁ ନିଆଯାଇଛି । ଏହାସହ ସାକ୍ଷୀଗୋପାଳ ମନ୍ଦିର ଓ ଚତୁର୍ପାଶ୍ୱ, ତୀର୍ଥ ପୁଷ୍କରିଣୀ ରାଧା କୁଣ୍ଡ, ଶ୍ୟାମ କୁଣ୍ଡ ଓ ଚନ୍ଦନ ପୁଷ୍କରିଣୀର ମଧ୍ୟ ଉନ୍ନତିକରଣ କରାଯିବ । ଏନେଇ ବକୁଳବନ ପହଞ୍ଚି ସ୍ଥିତି ସମୀକ୍ଷା କରିଛନ୍ତ୍ ସତ୍ୟବାଦୀ ବିଧାୟକ ଉମାକାନ୍ତ ସାମନ୍ତରାୟ ଓ ଜିଲ୍ଲାପାଳ ସମର୍ଥ ବର୍ମା ।
ସେହିପରି ବକୁଳ ବନକୁ ଇକୋ ପାର୍କ ଭାବେ ନିର୍ମାଣ ନେଇ ମଧ୍ୟ ଆଲୋଚନା କରାଯାଇଛି । ପଞ୍ଚସଖା ଦ୍ବାରା ପ୍ରତିଷ୍ଠା ହୋଇଥିବା ବକୁଳ ବନକୁ ଓଡ଼ିଆ ଭାଷାର ଏନ୍ତୁଡିଶାଳ କୁହାଯାଏ । ଉତ୍କଳମଣି ଗୋପବନ୍ଧୁ ଦାସ, ପଣ୍ଡିତ ନୀଳକଣ୍ଠ ଦାସ, ଆଚାର୍ୟ୍ୟ ହରିହର ଦାସ, ପଣ୍ଡିତ କୃପାସିନ୍ଧୁ ମିଶ୍ର ଓ ପଣ୍ଡିତ ଗୋଦାବରୀଶ ମିଶ୍ର ଏଠାରୁ ହିଁ ଓଡ଼ିଆ ଭାଷା ସମୃଦ୍ଧିର ପରିକଳ୍ପନା କରିଥିଲେ ।
ଅଦରକାରୀ ବାପା: ଗୋଡରେ ପୋକ ହେବାରୁ ପର କରିଦେଲା ପୁଅ..
ଭୁବନେଶ୍ୱର: ଆଖିର ଲୁହ ଓଠ ପିଉଛି । ଯନ୍ତ୍ରଣା ତ ଜୀବନ ନେଉଛି । ସାମାନ୍ୟ କ୍ଷତ ଆଜି ମରଣ ମୁହଁକୁ ଠେଲି ଦେଇଛି । କୁନି ପିଲା ପରି କଉଁ କଇଁ କାନ୍ଦୁଛନ୍ତି । ଆଉ କାହାର ଆହା ପଦରେ ବ୍ୟାକୁଳ ହୋଇ ଉଠୁଛନ୍ତି । ଗୋଡର କ୍ଷତ ଶରୀରକୁ କ୍ଷତାକ୍ତ କରିସାରିଲାଣି । ଅର୍ଥର ଅଭାବ ପାଇଁ ବ୍ରିଜ ତଳେ ଜୀବନ କାଟୁଛନ୍ତି । ପରିତ୍ୟକ୍ତ ସ୍ଥାନରେ ପଡି ରହିଛନ୍ତି । ସେପଟେ ଗୋଡରେ ପୋକ ସାଲୁ ବାଲୁ ହେଲାଣି । କିନ୍ତୁ ଛିଣ୍ଡା ପଲିଥିନ ଟିଏ କେବଳ ବାନ୍ଧି ଅସହ୍ୟ ଯନ୍ତ୍ରଣାରେ ଜୁଛି ହେଉଛନ୍ତି ଏହି ବୃଦ୍ଧ ବ୍ୟକ୍ତି ଜଣଙ୍କ ।
ଘର ଅଛି । ପରିବାର ବି ଅଛି । ତଥାବି ସେ ରାସ୍ତା କଡର ବେସାହାରା ମଣିଷ । ଭଲ ଥିଲା ବେଳେ ସମସ୍ତେ ଭଲ ପାଉଥିଲେ । କିନ୍ତୁ କ୍ଷତ ସୃଷ୍ଟି ହୋଇ ଦୁର୍ଗଧ ବାହାରିବାରୁ ତାଙ୍କୁ ରାସ୍ତା କଡ଼ରେ ପିଙ୍ଗିଦେଲେ । ଘରେ ପୁଅ ବୋହ ଥାଇ ବି ସେ ପରିତ୍ୟକ୍ତ ସ୍ଥାନର ପର ମଣିଷ । ଆଉ ଅନ୍ତରର କୋହ ଆଜି ଅସମ୍ଭାଳ କରୁଛି । କଟକ ଫୁଲ ନଖରା ଓଭରବ୍ରିଜ ତଳେ ପଡି ରହିଥିବା ଏହି ବୃଦ୍ଧ ଜଣଙ୍କ ହେଉଛନ୍ତି ବଲ୍ଲଭ ଦାସ ।
ଘର ଖଲ୍ଲିକୋଟ ଅଞ୍ଚଳରେ ହୋଇଥିବାବେଳେ ଦିନ ମଜୁରିଆ ଭାବରେ କାମ କରନ୍ତି । ସମୟ ସମୟରେ ଟ୍ରାକ୍ଟରରେ ଲେବର ଭାବେ ମଧ୍ୟ କାମ କରନ୍ତି । କିନ୍ତୁ ଦିନେ ଟ୍ରାକ୍ଟର ଦୁର୍ଘଟଣାରେ ତାଙ୍କ ଗୋଡରେ ସୃଷ୍ଟି ହୁଏ ସାମାନ୍ୟ କ୍ଷତ । ଅର୍ଥ ଅଭାବରୁ ଚିକିତ୍ସା ବି ସମ୍ଭବ ହୁଏ ନାହିଁ । ଆଉ ଏହି ସାମାନ୍ୟ କ୍ଷତ ସାଙ୍ଘିତକ ହୁଏ । ଦୁର୍ଗନ୍ଧ ବାହାରିବାରୁ ପୁଅ ବୋହୂ ମଧ୍ୟ ପରଣତ ବୟସରେ ଘରୁ ତଡି ଦେଇଥିବା ନେଇ କହିନ୍ତି ଏହି ବୃଦ୍ଧ ଜଣଙ୍କ । ସେପଟେ ମୁର୍ମୁଷ ଅବସ୍ଥାରେ ପଡିରହିଥିବା ଏହି ବୃଦ୍ଧଙ୍କ ଅବସ୍ଥା ଦେଖି ସେବା ହିଁ ସଂକଳ୍ପର ସଦସ୍ୟ ମାନେ ସହାୟତାର ହାତ ବଢାଇଛନ୍ତି । ଘଟଣା ସ୍ଥଳରେ ପହଁଛି ବୃଦ୍ଧଙ୍କ ଚିକିତ୍ସା କରିଛନ୍ତି ।
ଭୁବନେଶ୍ୱର ସ୍ମାର୍ଟସିଟିକୁ ସଫଳତା, ସାଇକେଲ ଫର ଚେଞ୍ଜ ପ୍ରତିଯୋଗିତାରେ ଦ୍ୱିତୀୟ ସ୍ଥାନ
ଭୁବନେଶ୍ୱର: ଭୁବନେଶ୍ବର ସ୍ମାର୍ଟସିଟିକୁ ଆଉ ଏକ ସଫଳତା । କେନ୍ଦ୍ର ନଗର ଉନ୍ନୟନ ବିଭାଗ ପକ୍ଷରୁ ଆୟୋଜିତ ସାଇକେଲ ଫର ଚେଞ୍ଜ ପ୍ରତିଯୋଗିତାରେ ଦ୍ବିତୀୟ ସ୍ଥାନ ଅଧିଗ୍ରହଣ କରିଛି ଭୁବନେଶ୍ବର । ପ୍ରତିଯୋଗିତାରେ ଦେଶର 100ଟି ସ୍ମାର୍ଟସିଟି ଓ ସବୁ ରାଜ୍ୟର ରାଜଧାନୀ ଅଂଶଗ୍ରହଣ କରିଥିଲେ। ସେମଧ୍ୟରୁ ଦେଶର ପ୍ରଥମ 11ଟି ସ୍ମାର୍ଟସିଟି ମଧ୍ୟରେ ଭୁବନେଶ୍ୱର ଦ୍ୱିତୀୟ ସ୍ଥାନରେ ରହିଛି ।
ଏଥିପାଇଁ ଭୁବନେଶ୍ୱର ସ୍ମାର୍ଟସିଟିକୁ 1କୋଟି ଟଙ୍କାର ଆର୍ଥିକ ରାଶି ପୁରସ୍କାର ସ୍ୱରୂପ ମିଳିବ । ଏହି ସଫଳତା ପାଇଁ ଭୁବନେଶ୍ବରବାସୀଙ୍କୁ କୃତଜ୍ଞତା ଜଣାଇଛି ଭୁବନେଶ୍ବର ସ୍ମାର୍ଟସିଟି । ଏହାପୂର୍ବରୁ ଜାତୀୟ ସ୍ତରରେ ସ୍ମାର୍ଟସିଟି ଗୁଡିକ ମଧ୍ୟରେ ଆୟୋଜିତ ପ୍ରତିଯୋଗିତାରେ ଭୁବନେଶ୍ୱର ଦୁଇଟି ପୁରସ୍କାର ଜିଣିଥିଲା ।
ଖୋଲିବ ସମସ୍ତ ମେଡିକାଲ କଲେଜ , ୫୦% ପିଲାଙ୍କୁ ନେଇ ହେବ ପ୍ରାକ୍ଟିକାଲ ଓ କ୍ଲିନିକାଲ କ୍ଲାସ
ଭୁବନେଶ୍ୱର: ଖୋଲିବ ରାଜ୍ୟର ସମସ୍ତ ମେଡିକାଲ କଲେଜ । ଅନ୍ୟାନ୍ୟ ଚିକିତ୍ସା ବିଜ୍ଞାନ ଅନୁଷ୍ଠାନ ବି ଖୋଲିବ । ନର୍ସିଂ ହୋମ୍, ଫାର୍ମାସୀ, ଫିଜିଓଥେରାପୀ କଲେଜ ଖୋଲିବା ନେଇ ରାଜ୍ୟ ସରକାରଙ୍କ ଅତିରିକ୍ତ ସଚିବ ପିକେ ମହାପାତ୍ର ଡିଏମଇଟିକୁ ଚିଠି ଲେଖିଛନ୍ତି । କୋଭିଡ୍ ଗାଇଡଲାଇନ ଅନୁସାରେ ସମସ୍ତ କଲେଜ ଖୋଲାଯିବ । ୫୦% ପିଲାଙ୍କୁ ନେଇ ହେବ ପ୍ରାକ୍ଟିକାଲ ଓ କ୍ଲିନିକାଲ କ୍ଲାସ । କିନ୍ତୁ ଅନଲାଇନ ମାଧ୍ୟମରେ ଥିଓରୀ କ୍ଲାସ ଚାଲିବ ।
ଛାତ୍ରଛାତ୍ରୀମାନେ ଅଭିଭାବକଙ୍କ ଲିଖିତ ଅନୁମତିପତ୍ର ଦେଖାଇ କ୍ଲାସରେ ଯୋଗ ଦେଇପାରିବେ । ଏହି ସମୟରେ କ୍ୟାମ୍ପସରେ କୌଣସି କାର୍ଯ୍ୟକ୍ରମ ଆୟୋଜନ ହୋଇପାରିବ ନାହିଁ । ସଂକ୍ରମିତ ଛାତ୍ରଛାତ୍ରୀଙ୍କ କ୍ୟାମ୍ପସରେ ପ୍ରବେଶ ପାଇଁ ଅନୁମତି ମିଳିବ ନାହିଁ । କଟକଣାରେ ପରୀକ୍ଷା ମଧ୍ୟ ଆୟୋଜନ ହେବ । ଯେଉଁମାନେ କୋଭିଡ଼ ପାଇଁ ପରୀକ୍ଷାରେ ଯୋଗ ଦେଇପାରିବେ ନାହିଁ, ସେମାନଙ୍କୁ କୋଭିଡ ଟେଷ୍ଟ ରିପୋର୍ଟ ଦାଖଲ କରିବାକୁ ପଡିବ ।
ଓଡ଼ିଶା ଜଳଯୋଗାଣ ଓ ପରିମଳ ପରିଷଦ କର୍ମଚାରୀ ସଂଘର କାର୍ଯ୍ୟକାରିଣୀ ବୈଠକ ଅନୁଷ୍ଠିତ
ଭୁବନେଶ୍ୱର: ଓଡ଼ିଶା ଜଳଯୋଗାଣ ଓ ପରିମଳ ପରିଷଦ କର୍ମଚାରୀ ସଂଘର ଏକ ଜରୁରୀ ପରିବର୍ଦ୍ଧିତ କାର୍ଯ୍ୟକାରିଣୀ ବୈଠକ ହୋଇଯାଇଛି । ସତ୍ୟନଗର ସ୍ଥିତ ଯାନ୍ତ୍ରିକ ଭବନଠାରେ କୋଭିଡ୍ ନିୟମ ପାଳନ କରି ବୁଧବାର ସଂଘର ସଭାପତି ତପନ ବିହାରୀ ଭଞ୍ଜଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି । ପ୍ରଥମେ ସଂଘର ବରିଷ୍ଠ ସଭ୍ୟ ଅଜିତ ପ୍ରଧାନଙ୍କ କରୋନାଜନିତ ବିୟୋଗ ଓ ଜି.ଭି.ରାମକ୍ରିଷ୍ଣଙ୍କ ଅମର ଆତ୍ମାର ସଦଗତି ନିମନ୍ତେ ଦୁଇ ମିନିଟ୍ ନୀରବ ପ୍ରାର୍ଥନା କରାଯାଇଥିଲା । ଦୀର୍ଘ ୨୬ବର୍ଷରୁ ଊର୍ଦ୍ଧ୍ୱ କାର୍ଯ୍ୟକରି ଆସୁଥିବା ଡିଏଲ୍ଆର କର୍ମଚାରୀମାନଙ୍କ ସ୍ଥାୟୀ ନିଯୁକ୍ତି ସଂପର୍କରେ ଆଲୋଚନା କରାଯାଇଥିଲା ।
ମୁଖ୍ୟତଃ ସ୍ୱେରେଜ ବୋର୍ଡର ଅନେକ କାର୍ଯ୍ୟଉପରେ ଆଲୋଚନା ହୋଇଛି । ସୁପ୍ରିମକୋର୍ଟଙ୍କ ନିର୍ଦ୍ଦେଶାନୁଯାୟୀ କିଛି କନିଷ୍ଠ ଡିଏଲ୍ଆରମାନଙ୍କୁ ନିଯୁକ୍ତି ପ୍ରଦାନ କରାଯାଇଥିବା
ବେଳେ ଅନ୍ୟ ଡିଏଲଆର କର୍ମଚାରୀମାନେ ମାନ୍ୟବର ଉଚ୍ଚ ନ୍ୟାୟାଳୟଙ୍କ ଦ୍ୱାରସ୍ଥ ହେବାରୁ ନ୍ୟାୟାଳୟ ତୁରନ୍ତ ନିର୍ଦ୍ଦିଷ୍ଟ ସମୟସୀମା ନିର୍ଦ୍ଦେଶନାମା ପ୍ରଦାନ କରିଥିଲେ । ଏଥିରେ ବିଭିନ୍ନ ଅଧିକାରୀମାନେ ଅଦାଲତଙ୍କ ନିର୍ଦ୍ଦେଶକୁ ଭୃକ୍ଷେପ କରିନଥିବା ବେଳେ କର୍ମଚାରୀମାନଙ୍କ ତରଫରୁ ଉଚ୍ଚ ନ୍ୟାୟାଳୟ ଦୁଇ ଦୁଇ ଥର ଅଦାଲତ ଅବମାନନା ମାମଲାର ସମ୍ମୁଖୀନ ହୋଇଥିଲେ । କିନ୍ତୁ କେତେଜଣ ସ୍ୱେରେଜ ବୋର୍ଡର ଅଧିକାରୀମାନଙ୍କ ଜିଦ୍ଖୋର ମନୋବୃତି ଯୋଗୁ ସେମାନେ ମାନ୍ୟବର ଉଚ୍ଚନ୍ୟାୟାଳୟରେ ସ୍ୱେରେଜ ବୋର୍ଡ ପକ୍ଷରୁ ଏକ ରିଟ୍ ଅପିଲ୍ କରାଯାଇଥିଲା ।
ଏହି ଅପିଲକୁ ମାନ୍ୟବର ଉଚ୍ଚନ୍ୟାୟାଳୟ ବିଚାର କରି ବିଚାରଧାରାକୁ ବିଳମ୍ବିତ ପାଇଁ ପ୍ରତି କର୍ମଚାରୀମାନଙ୍କୁ ଏକ ହଜାର ଟଙ୍କା ଦେବା ପାଇଁ ସ୍ୱେରେଜ ବୋର୍ଡକୁ ନିର୍ଦ୍ଦେଶନାମା ପ୍ରଦାନ କରିଛନ୍ତି । ଏଠାରେ ଉଲ୍ଲେଖଯୋଗ୍ୟ ଯେ ବୋର୍ଡ ଦୁଇବର୍ଷ ତଳେ ମାନ୍ୟବର ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ ମଧ୍ୟ ନିଯୁକ୍ତି ନିର୍ଦ୍ଦେଶାନାମା କମର୍ଚ ।ରୀମାନଙ୍କ ସପକ୍ଷରେ ଯାଇଥିଲା । ବାରମ୍ବାର କର୍ମଚାରୀମାନଙ୍କୁ କୋର୍ଟର ଆଳ ଦେଖାଇ ସମୟ ଗଡ଼ାଇ ଚାଲିଥିବାରୁ ରାଜ୍ୟ ସରକାର ଏଥିରେ ତୁରନ୍ତ ହସ୍ତକ୍ଷେପ କରି ବୋର୍ଡର ସମସ୍ତ ଡିଏଲ୍ଆର କର୍ମଚାରୀମାନଙ୍କୁ ସ୍ଥାୟୀ ନିଯୁକ୍ତି ପ୍ରଦାନ ପାଇଁ ସଂଘର ସଭାପତି ତଥା ବିଶିଷ୍ଟ କର୍ମଚାରୀ ନେତା ତପନ ବିହାରୀ ଭଞ୍ଜ ଦାବି କରିଛନ୍ତି । ମୃତ୍ୟୁବରଣ କରିଥିବା ଦୁଇଜଣ ଡିଏଲ୍ଆର କର୍ମଚାରୀମାନଙ୍କ ପରିବାର ମଧ୍ୟରୁ ଜଣଙ୍କୁ ଚାକିରୀରେ ଅବସ୍ଥାପିତ କରିବା ପାଇଁ ସ୍ୱେରେଜ ବୋର୍ଡ କର୍ତୃପକ୍ଷଙ୍କ ଠାରେ ସଂଘ ପକ୍ଷରୁ ଦାବି କରାଯାଇଅଛି ।
ପର୍ଯ୍ୟଟନ ଋତୁରେ ହୀରାକୁଦରେ ହେବ ବୋଟିଂ କ୍ଲବ ଓ ୱାଟର ସଫାରୀ ପ୍ରତିଷ୍ଠା
ସମ୍ବଲପୁର: ହୀରାକୁଦ ହେବ ପଶ୍ଚିମ ଓଡ଼ିଶାର ଗେଟଓ୍ବେ । ସମଲେଇ ଯୋଜନାରେ ଖୁବ ଶିଘ୍ର ଆରମ୍ଭ ହେବ ବିକାଶ କାମ । ପଯ୍ୟଟନ ଋତୁରେ ହୀରାକୁଦରେ ବୋଟିଂ କ୍ଲବ ଓ ୱାଟର ସଫାରୀ ପ୍ରତିଷ୍ଠା କରାଯିବ । ପଯ୍ୟଟକଙ୍କ ପାଇଁ ରହିବ ସମସ୍ତ ବ୍ୟବସ୍ଥା । ଇକୋଟୁରିଜମ ପଦ୍ଧତିରେ ୫ ବର୍ଷ ପାଇଁ କଟେଜ ତିଆରି ହବ ।
130 କୋଟି ଟଙ୍କାରେ ଡେବ୍ରିଗଡର ବିକାଶ କରାଯିଵ । ଗୋଟିଏ ମାସ ଭିତରେ ଶେଷହେବ ସହରର ଫ୍ଲାଏଓଭର କାମ ବୋଲି ପଶ୍ଚିମ ଓଡିଶା ବିକାଶ ପରିଷଦ ଅଧ୍ୟକ୍ଷ ଅସିତ ତ୍ରିପାଠୀ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ।
ଗୁରୁବାର ଦୌଡ଼ିବେ ଦୂତୀ, ଅଲମ୍ପିକ ଆଶାରେ ଓଡ଼ିଶା
ଭୁବନେଶ୍ୱର: ଦିନକ ପରେ ଟ୍ରାକରେ ଦୌଡ଼ିବେ ଓଡ଼ିଶାର ଦୂତୀ । ସେପଟେ ଜୋରଦାର ଅଭ୍ୟାସ ଆରମ୍ଭ କରିଛନ୍ତି ଧାବିକା ଦୂତୀ ଚାନ୍ଦ । ନିଜକୁ ଫିଟ୍ ରଖିବା ସହ ଭଲ ପ୍ରଦର୍ଶନ ପାଇଁ କସରତ ଆରମ୍ଭ କରିଦେଇଛନ୍ତି । ହାତରେ ମାତ୍ର ଆଉ କେଇ ଘଣ୍ଟା ଥିବାବେଳେ ଦୂତୀ ମଧ୍ୟ ଟୋକିଅରେ ଝଚକିବା ନେଇ ଆଶାବାଦୀ ।
ସକାଳ ୮ଟା ୧୦ରେ ଆରମ୍ଭ ହେବ ପ୍ରତିଯୋଗିତା । ୧୦୦ ମିଟର ରାଉଣ୍ଡ ୧ ହିଟ୍ ପ୍ରତିଯୋଗିତାରେ ଭାଗ ନେବେ ଧାବିକା ଦୂତୀ । ଗୋଟେପଟେ ଦୂତୀ ଟ୍ରାକରେ ଦୈଡିବା ପାଇଁ ତୟାର ଆରମ୍ଭ କରିଦେଇଥିବାବେଳେ ଅନ୍ୟପଟେ ସୁନା ଝିଅର ମେଡାଲ ନେଇ ଆଶାବାଦୀ ଓଡିଶା ବାସୀ । ଏବେ ଦୂତାଙ୍କର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ସେଥିରେ ଦୂତୀ ଜୋରଦାର ପ୍ରଚେଷ୍ଟା କସରତ କରୁଥିବା ଦେଖିବାକୁ ମିଳିଛି
ଜଗନ୍ନାଥଙ୍କ ଶ୍ଲୋକରୁ ପ୍ରେସମିଟ ଆରମ୍ଭ କଲେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ
ନଆଦିଲ୍ଲୀ: ପ୍ରେସମିଟ ଆରମ୍ଭରୁ ଜଗନ୍ନାଥଙ୍କ ଶ୍ଲୋକ କହିଲେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ । ପ୍ରଥମ ଥର ପାଇଁ ମମତାଙ୍କ ତୁଣ୍ଡରେ ଜଗନ୍ନାଥ ଶ୍ଲୋକ ପୁଣି ସାମ୍ବାଦିକ ସମ୍ମଳନୀରେ । ଏଭଳି ଏକ ଚିତ୍ର ଦେଖିବାକୁ ମିଳିଛି ଦିଲ୍ଲୀରେ । କେନ୍ଦ୍ର ଉପରେ ଖୁବ ବର୍ଷିଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ । କହିଛନ୍ତି, ଦେଶରେ ଏବେ ନୂଆ ପ୍ରକାରର ଏମର୍ଜେନ୍ସି ଚାଲିଛି । କେନ୍ଦ୍ର ସରକାର ମନଇଛା କାରବାର କରୁଛନ୍ତି । କେନ୍ଦ୍ର ଏବେ ନିଜକୁ ସୁହାଇଲା ପରି କାମ କରୁଛି । ତିନି କୃଷି ଆଇନ ହେଉ କି ପେଗାସସ ମାମଲା ସବୁଥିରେ ମନମୁଖୀ କାରବାର କରୁଛନ୍ତି ।
ଯାହାଦ୍ବାରା ସାମ୍ବାଧାନିକ, ଆଇନଗତ ଅଧିକାର ସହ ବ୍ୟକ୍ତିର ମୌଳିକ ଅଧିକାର ମଧ୍ୟ ହନନ ହେଉଛି । ଗଣମାଧ୍ୟମ ମଧ୍ୟ ଏଥିରୁ ବାଦ ପଡିନି । ଏପରି ଅଭିଯୋଗ ଆଣି କେନ୍ଦ୍ର ଉପରେ ବର୍ଷିଲାବେଳେ ପ୍ରଥମେ ଶ୍ରୀଜଗନ୍ନାଥଙ୍କ ଶ୍ଲୋକରୁ ନିଜର ବକ୍ତବ୍ୟ ଆରମ୍ଭ କରିଥିଲେ । ଏହାସହ ଓଡିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ମଧ୍ୟ ଭୂୟସୀ ପ୍ରଶଂସା କରିଥିଲେ । ଏହି ଅବସରରେ ନନ୍ଦିଘୋଷ ଟିଭିକୁ କିଛି ପ୍ରଶ୍ନର ଜବାବ ଦେଇଥିଲେ ମମତା । ତାଙ୍କୁ ସାକ୍ଷାତ କରିଥିଲେ ଦିଲ୍ଲୀ ବ୍ୟୁରୋ ଚିଫ ବିଭୂତି ପତି । ଦେଖିବା ସୁପର ଏକ୍ସକ୍ଲୁସିଭ ୱାନ ଟୁ ୱାନ ।

