spot_img
Home Blog Page 5548

ପର୍ଣ୍ଣ କେସ୍: ଗିରଫଦାରୀ ଭୟରେ ରାଜ କୁନ୍ଦ୍ରା ଯାଚିଥିଲେ ୨୫ ଲକ୍ଷ ଟଙ୍କା !

ମୁମ୍ବାଇ: ଅଶ୍ଳୀଳ ଫିଲ୍ମ ସୁଟିଂ ଅଭିଯୋଗରେ ଗିରଫ ହୋଇଥିବା ବଲିଉଡ ଅଭିନେତ୍ରୀ ଶିଳ୍ପା ଶେଟ୍ଟୀଙ୍କ ସ୍ୱାମୀ ରାଜ କୁନ୍ଦ୍ରାଙ୍କ ସମ୍ପର୍କରେ ଦିନକୁ ଦିନ ବଡ଼ ଖୁଲାସା ହେବାରେ ଲାଗିଛି । ଏହି ମାମଲାରେ ଜଣେ ୱାଣ୍ଟେଡ୍ ଅଭିଯୁକ୍ତ ଦାବି କରିଛି ଯେ ରାଜ କୁନ୍ଦ୍ରା ଗିରଫଦାରୀକୁ ଏଡାଇବା ପାଇଁ ମୁମ୍ବାଇ ପୋଲିସର କ୍ରାଇମ ବ୍ରାଞ୍ଚକୁ ୨୫ ଲକ୍ଷ ଟଙ୍କା ଲାଞ୍ଚ ଯାଚିଥିଲେ।

ଗଣମାଧ୍ୟମ ରିପୋର୍ଟ ଅନୁସାରେ, ଅରବିନ୍ଦ ଶ୍ରୀବାସ୍ତବ ଓରଫ୍ ୟଶ ଠାକୁର ନାମକ ଜଣେ ବ୍ୟକ୍ତି ମଧ୍ୟ ପର୍ଣ୍ଣ ଫିଲ୍ମ ମାମଲାରେ ଅଭିଯୁକ୍ତ ସାଜିଛନ୍ତି। ଏନେଇ ଗତ ମାର୍ଚ୍ଚରେ ସେ ଆଣ୍ଟି କରପସନ୍ ବ୍ୟୁରୋ (ଏସିବି)କୁ ଇମେଲ ମାଧ୍ୟମରେ ଅଭିଯୋଗ କରିଥିଲେ। ସେସମୟରେ ଏହାକୁ ଏସିବି ମୁମ୍ବାଇ ପୋଲିସ କମିସନରଙ୍କ ଅଫିସକୁ ପଠାଇଥିଲା।

ଅରବିନ୍ଦ ଶ୍ରୀବାସ୍ତବଙ୍କର ଫ୍ଲିଜ୍ ମୁଭିଜ୍ ନାମକ ଏକ ଫାର୍ମ ଥିଲା। ଏହା ପୂର୍ବରୁ ନ୍ୟୁଫ୍ଲିକ୍ସ ନାମରେ  ଥିବା ବେଳେ ଏହା ଏକ ଆମେରିକୀୟ ସଂସ୍ଥା | ମାର୍ଚ୍ଚରେ ଉକ୍ତ ସଂସ୍ଥା ଦ୍ୱାରା ଅଭିଯୋଗ କରାଯାଇଥିଲା ବେଳେ ଅରବିନ୍ଦ ଶ୍ରୀବାସ୍ତବଙ୍କ ଦୁଇଟି ବ୍ୟାଙ୍କ ଆକାଉଣ୍ଟ ଜବତ କରିଥିଲା ପୋଲିସ। ଏହି ଆକାଉଣ୍ଟରେ ୪.୫ କୋଟି ଥିଲା । ତେବେ ପୋଲିସର ଜଣେ ଖବରି ଫାର୍ମ ଠାରୁ ୨୫ ଲକ୍ଷ ଟଙ୍କା ମାଗିଥିବା ନେଇ ଇମେଲରେ ନ୍ୟୁଫ୍ଲିକ୍ସ ଦାବି କରିଛି।

ତେବେ ପର୍ଣ୍ଣ ମୁଭି ମାମଲାର ତଦନ୍ତ କରୁଥିବା ମୁମ୍ବାଇ ପୋଲିସର କ୍ରାଇମ ଶାଖାକୁ ଧିରେଧିରେ ସଫଳତା ମିଳିବାରେ ଲାଗିଛି। କ୍ରାଇମ ବ୍ରାଞ୍ଚ ସୂତ୍ରରୁ ପ୍ରକାଶ ଯେ ଅଭିଯୁକ୍ତ ଉମେଶ କାମତ ଦ୍ୱାରା ପ୍ରସ୍ତୁତ ୭୦ଟି ଭିଡିଓ ମିଳିଛି। ଯେଉଁ ସମସ୍ତ ଭିଡିଓକୁ କାମତ ବିଭିନ୍ନ ପ୍ରଡକ୍ସନ ହାଉସ୍ ସହାୟତାରେ ବନାଉଥିଲା ।

ହଟସଟ ଆପରେ ଅପଲୋଡ ହୋଇଥିବା ୨୦ ମିନିଟରୁ ୩୦ ମିନିଟ ପର୍ଯ୍ୟନ୍ତ ମୋଟ ୯୦ଟି ଭିଡିଓ କ୍ରାଇମ ବ୍ରାଞ୍ଚ ହାତରେ ଲାଗିଥିବା ସୁତ୍ରରୁ ପ୍ରକାଶ । ମୁମ୍ବାଇ କ୍ରାଇମ ବ୍ରାଞ୍ଚର ପଚରାଉଚରା ବେଳେ ରାଜ କୁନ୍ଦ୍ରାଙ୍କୁ ଏହିସବୁ ଭିଡିଓ ଦେଖାଯାଇଥିଲା ଯାହାକୁ ଉମେଶ ବ୍ରିଟେନର ପ୍ରଡକ୍ସନ କମ୍ପାନୀ କେନରିନ ନିକଟକୁ ପଠାଇଥିଲା।

ତେବେ କ୍ରାଇମ ବ୍ରାଞ୍ଚର ପଚରାଉଚରା ବେଳେ ରାଜ କୁନ୍ଦ୍ରା ବାରମ୍ବାର କହିଛନ୍ତି ଯେ ସେ ଅଶ୍ଳୀଳ ଭିଡିଓ ତିଆରି କରନ୍ତି ନାହିଁ ବରଂ ଅନ୍ୟ OTT ପ୍ଲାଟଫର୍ମରେ ଆସୁଥିବା ଇରୋଟିକ୍ ଭିଡିଓ ପରି ଭିଡିଓ ବନାନ୍ତି।

ରାଜ୍ୟସଭାରେ ହାଇଡ୍ରାମା; ଅଶ୍ୱିନୀ ବୈଷ୍ଣବଙ୍କ ହାତରୁ ବୟାନ୍ କପି ଛଡାଇ ନେଲେ ଟିଏମସି ସାଂସଦ

ନୂଆଦିଲ୍ଲୀ: ସଂସଦରେ ମୌସୁମୀ ଅଧିବେଶନ ଜାରି ରହିଥିବା ବେଳେ ବିଭିନ୍ନ ପ୍ରସଙ୍ଗକୁ ନେଇ ସରକାରଙ୍କୁ ଘେରୁଛନ୍ତି ବିରୋଧି । ଯେଉଁଥିପାଇଁ ୩ ଦିନ ହେବ ଗୃହ କାର୍ଯ୍ୟ ଠିକ୍ ଭାବେ ପରିଚାଳିତ ହୋଇପାରୁନାହିଁ । କୃଷି ଆନ୍ଦୋଳନ ବ୍ୟତୀତ କରୋନା, ପେଗାସସ୍, ଦରଦାମ୍ ବୃଦ୍ଧି ଭଳି ପ୍ରସଙ୍ଗ ବିରୋଧି ଉଠାଉଥିବା ବେଳେ ଏପଟେ କୃଷକ ସଙ୍ଗଠନ ପକ୍ଷରୁ ଜନ୍ତରମନ୍ତରରେ ବୈଠକ କରାଯାଇଛି ।

ଖାସ୍ କରି ପେଗାସସ୍ ହ୍ୟାକିଂ ମାମଲାକୁ ନେଇ ଗୃହରେ ହଟ୍ଟଚମଟ ଦେଖାଦେଇଛି । ଏପରିକି ପେଗାସସ୍ ମାମଲା ଏକ ମିଛ ଏବଂ ଏହାଦ୍ୱାରା ଦେଶର ଛବିକୁ ବିଗାଡିବା ଲାଗି ଚେଷ୍ଟା କରାଯାଉଥିବା କେନ୍ଦ୍ର ମନ୍ତ୍ରୀ ମିନାକ୍ଷୀ ଲେଖି କହିଛନ୍ତି। ଏହା ସତ୍ୱେ ବିରୋଧି ଗୃହର କାର୍ଯ୍ୟରେ ବାଧା ସୃଷ୍ଟି କରୁଛନ୍ତି। କଂଗ୍ରେସ ଓ ଟିଏମସିର କାର୍ଯ୍ୟକଳାପ ଠିକ୍ ରହୁନାହିଁ ବୋଲି ସେ ପ୍ରକାଶ କରିଛନ୍ତି ।

ଅପରପକ୍ଷେ ରାଜ୍ୟସଭାରେ ସଞ୍ଚାର ମନ୍ତ୍ରୀ ଅଶ୍ୱିନୀ ବୈଷ୍ଣବ ପେଗାସସ୍ ମାମଲାରେ ବୟାନ୍ ଦେବା ପୂର୍ବରୁ ତାଙ୍କ ହାତରୁ କାଗଜ ଛଡାଇ ଉପସଭାପତିଙ୍କ ଆଡକୁ ଫୋପାଡିଛନ୍ତି ଟିଏମସି ସାଂସଦ ଶାନ୍ତନୁ ସେନ୍ । ଯାହାକୁ ନେଇ କ୍ଷୋଭ ପ୍ରକାଶ କରିଛନ୍ତି କେନ୍ଦ୍ର ମନ୍ତ୍ରୀ ହରଦୀପ ସିଂହ ପୁରୀ। ଏହାବ୍ୟତୀତ ଗୃହକୁ ଆସନ୍ତାକାଲି ଦିନ ୧୧ଟା ଯାଏଁ ସ୍ଥଗିତ ମଧ୍ୟ କରାଯାଇଛି ।

ଟିଏମସି ସାଂସଦ ମାନେ ଅଶ୍ୱିନୀ ବୈଷ୍ଣବଙ୍କ ହାତରୁ ବୟାନର କପି ନେଇ ଫାଡି ଦେଇଥିବା ସୂଚନା ମିଳିଛି।

ସେହିପରି ଲୋକସଭାରେ ବିରୋଧିଙ୍କ ହଙ୍ଗାମା ଯୋଗୁଁ ଠିକ୍ ଭାବେ ଗୃହ ଚାଲି ପାରିନଥିଲା । ଫଳରେ ଲୋକସଭାକୁ ଅପରାହ୍ନ ୪ଟା ଯାଏଁ ସ୍ଥଗିତ କରାଯାଇଥିଲା।

 

ସନ୍ତୋଷ କୁମାର ତ୍ରିପାଠୀ ହେଲେ ଫକୀର ମୋହନ ବିଶ୍ୱବିଦ୍ୟାଳୟର ନୂଆ କୁଳପତି

ବାଲେଶ୍ୱର: ଫକୀର ମୋହନ ବିଶ୍ୱବିଦ୍ୟାଳୟର ନୂଆ କୁଳପତି ହେଲେ ପ୍ରଫେସର ସନ୍ତୋଷ କୁମାର ତ୍ରିପାଠୀ। ତାଙ୍କୁ ବିଶ୍ୱବିଦ୍ୟାଳୟର ନୂଆ କୁଳପତି ଭାବେ ନିଯୁକ୍ତ କରିଛନ୍ତି ରାଜ୍ୟପାଳ ପ୍ରଫେସର ଗଣେଶୀ ଲାଲ।

ସୂଚନା ଅନୁଯାୟୀ, ତାଙ୍କୁ ଆସନ୍ତା ୪ ବର୍ଷ ପାଇଁ ଫକିର ମୋହନ ବିଶ୍ୱବିଦ୍ୟାଳୟର ନୂଆ କୁଳପତି ଭାବେ ନିଯୁକ୍ତ କରାଯାଇଛି । ଶ୍ରୀ ତ୍ରିପାଠୀ ଉତ୍କଳ ବିଶ୍ୱବିଦ୍ୟାଳୟର ପିଏମ୍ ଆଇଆର ବିଭାଗର ପ୍ରଫେସର ଥିଲେ । ତେବେ ତାଙ୍କର ୩୦ ବର୍ଷରୁ ଅଧିକ ହେବ ଶିକ୍ଷକତା ଅଭିଜ୍ଞତା ରହିଛି। ସେ ୧୦ଟି ପୁସ୍ତକ ଲେଖିଥିବା ବେଳେ, ୧୭ ଜଣ ପିଏଚଡି ଓ ୪୦ ଜଣ ସ୍କଲାରଙ୍କୁ ଗାଇଡ କରିଥିବା ଜଣାପଡିଛି।

ବିଶ୍ୱବିଦ୍ୟାଳୟର ନୂଆ କୁଳପତି ଭାବେ ନିଯୁକ୍ତି ପାଇବା ପରେ ପ୍ରଫେସର ତ୍ରିପାଠୀ ନିଜ ପ୍ରତିକ୍ରିୟାରେ କହିଛନ୍ତି ଯେ, ଫକୀର ମୋହନ ବିଶ୍ୱବିଦ୍ୟାଳୟକୁ ଏ ପ୍ଲସ ବିଶ୍ୱବିଦ୍ୟାଳୟର ମାନ୍ୟତା ଦେବା ନେଇ ଉଦ୍ୟମ କରିବେ। ଏଥିସହ ଦେଶର ଶହେଟି ଶ୍ରେଷ୍ଠ ବିଶ୍ୱବିଦ୍ୟାଳୟ ମଧ୍ୟରେ ଫକୀର ମୋହନ ବିଶ୍ୱବିଦ୍ୟାଳୟ ସ୍ଥାନିତ ହେବ ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି।

ଉଲ୍ଲେଖଯୋଗ୍ୟ, ଗତ ୨୩ ନଭେମ୍ବର ୨୦୨୦ରେ ଉତ୍କଳ ବିଶ୍ୱବିଦ୍ୟାଳୟ ସମେତ ୬ଟି ବିଶ୍ୱବିଦ୍ୟାଳୟ ପାଇଁ କୁଳପତି ନିଯୁକ୍ତ କରାଯାଇଥିଲା। ସେତେବେଳେ କ୍ଲଷ୍ଟର ଇନୋଭେସନ ସେଣ୍ଟର ନିର୍ଦ୍ଦେଶକ ତଥା ଦିଲ୍ଲୀ ବିଶ୍ୱବିଦ୍ୟାଳୟର ବଟାନି ପ୍ରଫେସର ଦିନବନ୍ଧୁ ସାହୁଙ୍କୁ ୪ ବର୍ଷ ପାଇଁ ଫକୀର ମୋହନ ବିଶ୍ୱବିଦ୍ୟାଳୟର କୁଳପତି ଭାବେ ନିଯୁକ୍ତି ଦିଆଯାଇଥିଲା । ହେଲେ ୪ ମାସ ମଧ୍ୟରେ ପ୍ରଫେସର ଦିନବନ୍ଧୁ ସାହୁ ବ୍ୟକ୍ତିଗତ କାରଣ ଦର୍ଶାଇ ଇସ୍ତଫା ଦେଇଥିଲେ। ସେବେଠାରୁ ବାରିପଦା ଶ୍ରୀ ରାମଚନ୍ଦ୍ର ଭଞ୍ଜଦେଓ ବିଶ୍ୱବିଦ୍ୟାଳୟର କୁଳପତି କିଶୋର କୁମାର ବାସାଙ୍କୁ ଅତିରିକ୍ତ ଭାବେ ଫକୀର ମୋହନ ବିଶ୍ୱବିଦ୍ୟାଳୟର ଦାୟିତ୍ୱ ଦିଆଯାଇଥିଲା।

 

ପାକିସ୍ତାନରେ ଆତ୍ମ ସୁରକ୍ଷା ପାଇଁ ଏକେ-୪୭ ଧରି କାମ କରୁଛନ୍ତି ଚୀନ ଇଞ୍ଜିନିୟର

ନୂଆଦିଲ୍ଲୀ: ଆତଙ୍କବାଦୀଙ୍କ ଭୂସ୍ୱର୍ଗ ପାଲଟିଥିବା ପାକିସ୍ତାନ ଉପରୁ ତୁଟୁଛି ଚୀନର ଭରସା । ପାକିସ୍ତାନ ଆତଙ୍କବାଦୀଙ୍କ ପାଇଁ ସୁରକ୍ଷିତ ସ୍ଥାନ ପାଲଟିଥିବା ବେଳେ ଆତଙ୍କବାଦୀଙ୍କ ଆକ୍ରମଣ ବି ଜାରି ରହିଛି । ପାକିସ୍ତାନରେ କାମ କରୁଥିବା ଚୀନ୍ ଇଞ୍ଜିନିୟରମାନେ ନିଜ ସୁରକ୍ଷା ଦୃଷ୍ଟିରୁ ହାତରେ AK-47 ଧରି କାମ କରୁଥିବା ଦେଖିବାକୁ ମିଳିଛି । ଚୀନ୍-ପାକିସ୍ତାନ କୋନାମିକ କୋରିଡର ବା ସିପିଇସି ପ୍ରୋଜେକ୍ଟରେ କାର୍ଯ୍ୟ କରୁଥିବା ଚୀନ୍ ଇଞ୍ଜିନିୟରମାନେ ହାତରେ AK-୪୭ ଧରିଥିବା କାମ କରୁଛନ୍ତି । ନିକଟରେ ଚୀନ କର୍ମଚାରୀଙ୍କ ଉପରେ ଆତଙ୍କବାଦୀମାନେ ଆକ୍ରମଣ କରିଥିଲେ । ବସ୍ରେ ଯାଉଥିବା ବେଳେ ଚୀନ୍ କର୍ମଚାରୀଙ୍କ ଉପରେ ଆତଙ୍କୀ ହାମଲା କରାଯାଇଥିଲା । ତେଣୁ ନିଜର ସୁରକ୍ଷା ଲାଗି ହାତରେ ବନ୍ଧୁକ ଧରି କାମ କରିବାକୁ ନିଜ ଦେଶର କର୍ମଚାରୀଙ୍କୁ ଚୀନ୍ ନିର୍ଦ୍ଦେଶ ଦେଇଛି । ଏବେ ଚୀନ୍ କର୍ମଚାରୀଙ୍କ ଏହି ଫଟୋ ସୋସିଆଲ ମିଡିଆରେ ଭାଇରାଲ ହେଉଛି ।

ଏଥିସହିତ ପଢ଼ନ୍ତୁ: ‘ଦୈନିକ ଭାସ୍କର’ କାର୍ଯ୍ୟାଳୟରେ ଆୟକର ବିଭାଗ ଚଢ଼ାଉ

ସାମ୍ୱାଦିକଙ୍କୁ କନେଷ୍ଟବଳଙ୍କ ମାଡ଼ ମାରିବା ଘଟଣାରେ ବିଧାୟକଙ୍କୁ ଘେରିଲେ ସାମ୍ୱାଦିକ ସଂଘ

କେନ୍ଦ୍ରାପଡା: ୱେବ ଚ୍ୟାନେଲ ସାମ୍ବାଦିକଙ୍କୁ ମହିଳା କନେଷ୍ଟବଳ ମାଡ଼ ମାରିବା ଘଟଣାକୁ ନେଇ କେନ୍ଦ୍ରାପଡ଼ା ଜିଲ୍ଲାର କିଛି ବିଧାୟକଙ୍କୁ ଘେରିଛନ୍ତି ସାମ୍ବାଦିକ ସଂଘ । ଗତକାଲି ମହିଳା କନେଷ୍ଟବଳ ଜଣକ ମାସ୍କ ନପିନ୍ଧି କାର୍ଯ୍ୟ କରୁଥିବା ଫଟୋ ଭାଇରାଲକୁ ନେଇ ମହିଳା କନେଷ୍ଟବଳ ଜଣକ ରାଗିଯାଇଥିଲେ । କେନ୍ଦ୍ରାପଡ଼ା ଏସପିଙ୍କ କାର୍ଯ୍ୟାଳୟ ସମ୍ମୁଖରେ ଜଣେ କାର୍ଯ୍ୟରତ ସାମ୍ବାଦିକଙ୍କୁ ମାଡ଼ ମାରିବା ସହ ତାଙ୍କ ସାର୍ଟ ଚିରିଦେଇଥିଲେ । ସାମ୍ବାଦିକ ଜଣକ ନିଜର ପରିଚୟ ଦେଉଥିଲେ ମଧ୍ୟ କିଛି ଶୁଣି ନଥିଲେ ମହିଳା କନେଷ୍ଟବଳ। କେନ୍ଦ୍ରାପଡ଼ା ଏସପିଙ୍କ କାର୍ଯ୍ୟଳୟ ସମ୍ମୁଖରେ ବିଜେପି ଧାରଣାସ୍ଥଳକୁ ଖବର ସଂଗ୍ରହ ପାଇଁ ଯାଇଥିବା ସାମ୍ବାଦିକ ଜଣକ ମହିଳା କନେଷ୍ଟବଳ ମାସ୍କ ପିନ୍ଧିନଥିବା ଫଟୋକୁ ସୋସିଆଲ ମିଡିଆରେ ଛାଡିଥିଲେ। ଏହି ଘଟଣାରେ ଖପ୍ପା ହୋଇ ମହିଳା କନେଷ୍ଟବଳ ଉକ୍ତ ସାମ୍ବାଦିକଙ୍କ କଲରକୁ ଟାଣି ମାଡ଼ ମାରିଥିଲେ । ଏହି ଘଟଣାକୁ ନେଇ ସାମ୍ବାଦିକ ମହଲରେ ନିନ୍ଦା କରାଯାଇଥିବା ବେଳେ ମହିଳା କନେଷ୍ଟବଳଙ୍କ ନିଲମ୍ବନ ଦାବି କରିଛନ୍ତି । ଆଜି କେନ୍ଦ୍ରାପଡାରେ ଏକ ସରକାର କାର୍ଯ୍ୟକ୍ରମରେ ଯୋଗ ଦେବାକୁ ଯାଇଥିବା ଅବସରରେ ଜିଲ୍ଲାର ସବୁ ବିଧାୟକଙ୍କୁ ସାମ୍ବାଦିକମାନେ ଘେରିଥିଲେ । ସାମ୍ବାଦିକଙ୍କ ଉପରେ ହୋଇଥିବା ଆକ୍ରମଣ ଘଟଣାରେ କାର୍ଯ୍ୟାନୁଷ୍ଠାନ ଦାବି କରିଥିଲେ । ସାମ୍ବାଦିକଙ୍କ ଏକ ପ୍ରତିନିଧି ଦଳ ସହ ବିଧାୟକମାନେ ଆଲୋଚନା କରିଛନ୍ତି ।

ଏଥିସହିତ ପଢ଼ନ୍ତୁ: କୁଆଖାଇ ନଦୀ ପଠାରୁ ବାହାରିଲା ପୁରୁଷଙ୍କ ମୃତଦେହ: ଶବ ବ୍ୟବଚ୍ଛେଦ ପାଇଁ ଏମ୍ସ ପଠାଯିବ

ନନ୍ଦିଘୋଷ ଟିଭି ପ୍ରଭାବ: ୨ଜଣ ଗାଁ ସାଥିଙ୍କୁ ବହିଷ୍କୃତ କଲେ ବଲାଙ୍ଗୀର ଜିଲ୍ଲାପାଳ

ବଲାଙ୍ଗୀର: ପୁଇଁତଲା ବ୍ଲକ ଖରଜୁରା ଗାଁରେ ମନରେଗା କାମରେ ବ୍ୟାପକ ଦୁର୍ନୀତିରେ ଜିଲ୍ଲାପାଳଙ୍କ କାର୍ଯ୍ୟାନୁଷ୍ଠାନ । କାମ କରିନଥିବା ଶ୍ରମିକ ନାଁରେ ମିଥ୍ୟ ବିଲ କରି ଉଠିଥିଲା ଲକ୍ଷଲକ୍ଷ ଟଙ୍କା । ଦୁଇ ଜଣ ଗାଁ ସାଥି ଡାକ୍ତର ଭୋଇ ଓ ଯୁଧିଷ୍ଠିର ପଟେଲକୁ କାର୍ଯ୍ୟରୁ ବହିଷ୍କୃତ କରାଯାଇଥିବା ବେଳେ ବୁବେଳ ପଞ୍ଚାୟତର ଜିଆରଏସ ଉଦ୍ଧବ ମୁନ୍ନାକୁ ଅନ୍ୟତ୍ର ବଦଳି କରାଯାଇଛି । ପଞ୍ଚାୟତର କାର୍ଯ୍ୟନିର୍ବାହୀ ଅଧିକାରୀ(ଇଓ)କୁ ବାଙ୍କବିହାରୀ ଖମାରୀକୁ କାରଣଦର୍ଶାଅ ନୋଟିସ ଜାରି କରାଯାଇଛି । ପୁଇଁତଲା ବିଡ଼ିଓ ରବିନାରାୟଣ ଆଚାର୍ଯ୍ୟକୁ କାର୍ଯ୍ୟରେ ଅବହେଳା ପାଇଁ ତାଗିତ କରାଯାଇଥିବା ନେଇ ସୂଚନା ମିଳିଛି । କାର୍ଯ୍ୟାନୁଷ୍ଠାନ ନେଇ ସୂଚନା ଦେଇଛନ୍ତି ବଲାଙ୍ଗୀର ଜିଲ୍ଲାପାଳ ଚଞ୍ଚଳ ରାଣା । ମନରେଗା ଯୋଜନାରେ ଖରଜୁରା ଗାଁର ବନ୍ଦ କାମ ପାଇଁ ଟଙ୍କା ଆସିଥିଲା । ଦୁଇ ସପ୍ତାହ ପାଇଁ ଗାଁର ୬୦ରୁ ୭୦ଜଣ ଶ୍ରମିକମାନଙ୍କୁ କାମ ଦେଇ ସେମାନଙ୍କୁ ବାହାର କରିଦିଆଯାଇଥିଲା । ଶ୍ରମିକଙ୍କ କାମ କରିଥିବା ଟଙ୍କା ମଧ୍ୟ ମିଳିନଥିବା ଅଭିଯୋଗ କରିଥିଲେ । ଗାଁ ସାଥି ଓ ଜିଆରଏସ ଅନ୍ୟ ଅଧିକାରୀମାନଙ୍କ ସହ ମିଶି ଭୂତ ଶ୍ରମିକଙ୍କ ନାଁରେ ମିଥ୍ୟା ବିଲ କରି ଲକ୍ଷ ଲକ୍ଷ ଟଙ୍କା ହଡ଼ପ କରିଥିବା ଅଭିଯୋଗ ହୋଇଥିଲା । ଏନେଇ ନନ୍ଦିଘୋଷ ଟିଭିରେ ପ୍ରସାରଣ ପରେ ଜିଲ୍ଲା ପ୍ରଶାସନ ତରଫରୁ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ।

ଏଥିସହିତ ପଢ଼ନ୍ତୁ: ସେଲ୍‌ଫି ନେବା ବେଳେ ବୈତରଣୀ ନଦୀରେ ଭାସିଯାଇ ଜଣେ ନିଖୋଜ

 

‘ଦୈନିକ ଭାସ୍କର’ କାର୍ଯ୍ୟାଳୟରେ ଆୟକର ବିଭାଗ ଚଢ଼ାଉ

ନୂଆଦିଲ୍ଲୀ: ମିଡ଼ିଆ ଗ୍ରୁପ ଦୈନିକ ଭାସ୍କର ଅଫିସରେ ଆୟକର ବିଭାଗ ପକ୍ଷରୁ ରେଡ୍ । ଦୈନିକ ଭାସ୍କରର ଦିଲ୍ଲୀ, ମଧ୍ୟପ୍ରଦେଶ, ରାଜସ୍ଥାନ, ଗୁଜୁରାଟ ଓ ମହାରାଷ୍ଟ୍ର ଅଫିସରେ ଆୟକର ବିଭାଗ ଅଧିକାରୀ ଚଢ଼ାଉ କରିଥିବା ସୂଚନା ମିଳିଛି । ଏହାସହ ଗ୍ରୁପ ପ୍ରମୋଟର୍ସ ଓ ଅଫିସରେ ବି ଚଢ଼ାଉ କରାଯାଇଛି । ଜୟପୁର, ଅହମ୍ମଦାବାଦ, ଭୋପାଲ ଓ ଇନ୍ଦୋର ସ୍ଥିତ ଦୈନିକ ଭାସ୍କର ଅଫିସରେ ଚଢ଼ାଉ ଜାରି ରହିଥିବା ସୂଚନା ମିଳିଛି । ଟ୍ୟାକ୍ସ ଚୋରି ଅଭିଯୋଗରେ ଆୟକର ବିଭାଗ ପକ୍ଷରୁ ରେଡ୍ କରାଯାଇଥିବା ଜଣାପଡ଼ିଛି । ବୁଧବାର ରାତି ସାଢ଼େ ୨ଟାରୁ ଦୈନିକ ଭାସ୍କର ଗ୍ରୁପର ବିଭିନ୍ନ ଅଫିସରେ ଚଢ଼ାଉ ଆରମ୍ଭ ହୋଇଥିଲା । କମ୍ପାନୀର ସମସ୍ତ କର୍ମଚାରୀଙ୍କ ମୋବାଇଲ ଜବତ କରାଯାଇଛି । ଇଡି, ଇନକମ୍ ଟ୍ୟାକ୍ସ ଟିମ୍ ସହ ଲୋକାଲ ପୋଲିସ ମଧ୍ୟ ଚଢ଼ାଉରେ ସାମିଲ ଅଛି । ଚଢ଼ାଉରେ ଶହେରୁ ଊର୍ଦ୍ଧ୍ୱ କର୍ମଚାରୀ ସାମିଲ ଥିବା ବେଳେ ବହୁ ଗୁରୁତ୍ବପୂର୍ଣ୍ଣ କାଗଜପତ୍ର ଜବତ କରାଯାଇଥିବା ସୂଚନା ମିଳିଛି ।

ଏଥିସହିତ ପଢ଼ନ୍ତୁ: ଆଫଗାନିସ୍ତାନର ୮୫ ପ୍ରତିଶତ ଅଞ୍ଚଳ ତାଲିବାନ କବଳରେ

ସାମ୍ନାକୁ ଆସିଲା ବିଦ୍ୟାଭାରତୀଙ୍କ ଆଉ ଏକ ଚିଠି: ଲେଖିଛନ୍ତି, ‘ କିଛି ବି କରିକି ଡିଭୋର୍ସ କରାଇଦିଅ,

ପାରଳାଖେମୁଣ୍ଡି: ମୃତ ଏସିଏଫ ସୌମ୍ୟରଞ୍ଜନଙ୍କ ମୃତ୍ୟୁ ମାମଲାରେ ଆଉ ଏକ ଟ୍ୱିଷ୍ଟ୍  । ମିଳିଲା ପତ୍ନୀ ବିଦ୍ୟାଭାରତୀଙ୍କ ଆଉ ଏକ ହାତଲେଖା ଚିଠି  । ଯେଉଁଥିରେ ବିଦ୍ୟା ନିଜର ଭାବନାକୁ ଦୁଃଖରେ ପ୍ରକାଶ କରିଛନ୍ତି  । ଲେଖିଛନ୍ତି, କିଛି ବି କରିକି ଡିଭୋର୍ସ କରାଇଦିଅ  । ପ୍ରଭୁ ତୁମ ପାଖରେ ଋଣୀ ରହିବି  । ଯାଇକି ପୁରୀ ମନ୍ଦିରରେ ଦାସୀ ହୋଇ ସେବା କରିବି  । ସାରା ଜୀବନ କିଛି ବି କରିବି  । ଡିଭୋର୍ସ କରାଇଦିଅ  । ଏମିତି ମଣିଷ ମୁଁ ମୋ ଜୀବନରେ ଦେଖିନି  । ଏତେ ଦୁଃଖରେ କହିଲି , ଆଖି ଲୁହ ବି ଗଡୁଛି  । ଏମିତି ବହୁତ କୋହଭରା ଶବ୍ଦରେ ବିଦ୍ୟା ନିଜର ମନକଥା ଲେଖିଛନ୍ତି  । ଚିଠିରେ ଏପରି କିଛି କଥା ମଧ୍ୟ ଅଛି ଯାହା ସାଧାରଣରେ କହି ହେବନି  । ବେଶ ଅସଭ୍ୟ ଭାଷାରେ ଗାଳିଗୁଲଜ କରି ମଧ୍ୟ ଲେଖିଛନ୍ତି  । ଏଥିରୁ ଜଣାପଡୁଛି ଯେ ସ୍ୱାମୀ ସୌମ୍ୟଙ୍କ ପ୍ରତି ବିଦ୍ୟାଭାରତୀଙ୍କ କି ମାତ୍ରାରେ ଘୃଣାଭାବ ରହିଥିଲା  । ସେହିପରି ଏପ୍ରିଲ ପହିଲା, ଦୁଇ ଏପ୍ରିଲରେ ଇଂରାଜୀରେ ହେଟ ଲେଖି ମଧ୍ୟ ନିଜର ମନ କଥା ଉଦଗାରିଥିଲେ  । ଚିଠିରେ ଗାର କାଟି ହେଟ ଲେଖିଛନ୍ତି  ।

ଗତ ମଙ୍ଗଳବାର ଦିନ ମଧ୍ୟ ଏପରି ଏକ ଚିଠି ତଦନ୍ତକାରୀ ସାଇଣ୍ଟିଫିକ୍ ଟିମ୍ ହାତରେ ଲାଗିଥିଲା  । ଯେଉଁଥିରେ ବିଦ୍ୟା ତାଙ୍କ ମନର କଥାକୁ ବେଶ ଦୁଃଖ ସହକାରେ ପ୍ରକାଶ କରିଥିଲେ  । ପୃଥିବୀରେ ମୁଁ ତମକୁ ସବୁଠାରୁ ଅଧିକ ଘୃଣା କରେ  । ହେ ପ୍ରଭୁ ସବୁ ଭୁଲକୁ କ୍ଷମା କର  । ମୋ ଜୀବନକୁ ନଷ୍ଟ ହେବାକୁ ଦିଅନାହିଁ  । କେମିତି ଆଉ ୩ ଦିନ କଟିବ ୧୨ ତାରିଖରୁ ୧୫ ତାରିଖ ପରେ ଶାନ୍ତିରେ ରହିବି ବୋଲି ଚିଠିରେ ଲେଖାହୋଥିଲା  । ମୁଁ ଏହି ଲୋକକୁ ସବୁଠାରୁ ଅଧିକ ଘୃଣା କରେ  । ମୋ ନାଁକୁ ଏହି ଲୋକ ସହ ଯୋଡିବାକୁ ମଧ୍ୟ ମୋତେ ଖରାପ ଲାଗୁଛି  । ଗୋଟିଏ ଭୁଲ ନିଷ୍ପତ୍ତି କେମିତି ଜୀବନ ନଷ୍ଟ କରିଦିଏ  । ପ୍ଲିଜ ମୋତେ କ୍ଷମା କରିଦିଅ  । ଜୀବନସାରା ପାଇଁ କଷ୍ଟ ଦେଖିପାରିବିନି  । ମୁଁ କାହାର କେବେ କ୍ଷତି କରିନି  । କେବେ କାହାର କ୍ଷତି କେବେ ଚାହିଁନି ବୋଲି ଚିଠିରେ ଲେଖାହୋଇଥିଲା

ଏଥିସହିତ ପଢ଼ନ୍ତୁ: କୁଆଖାଇ ନଦୀ ପଠାରୁ ବାହାରିଲା ପୁରୁଷଙ୍କ ମୃତଦେହ: ଶବ ବ୍ୟବଚ୍ଛେଦ ପାଇଁ ଏମ୍ସ ପଠାଯିବ

ମହାପ୍ରଭୁ ଶ୍ରୀଜଗନ୍ନାଥଙ୍କୁ ସୁନାବେଶରେ ଲାଗି ହେଲା ଭଙ୍ଗା କିରୀଟ

ପୁରୀ: ପବିତ୍ର ସୁନାବେଶରେ ମହାପ୍ରଭୁ ଶ୍ରୀଜଗନ୍ନାଥଙ୍କୁ ଲାଗି ହୋଇଛି ଭଙ୍ଗାର ସୁନା କିରୀଟ । ବିଶ୍ୱ ନିୟନ୍ତା କାଳିଆ ଠାକୁର ବୁଧବାର ଭଙ୍ଗା କିରୀଟ ପିନ୍ଧିଛନ୍ତି । ଯାହା ସାଧାରଣ ଭକ୍ତଙ୍କୁ ବ୍ୟତୀତ କରିଛି । ସେବାୟତଙ୍କ ଠାରୁ ଭକ୍ତ, ଏହି ଘଟଣା ଜାଣିବା ପରେ ବିରୋଧର ସ୍ୱର ଉଠିଛି । କେଉଁ ପରିସ୍ଥିତିରେ ଏଭଳି ଘଟଣା ଘଟିଲା, ତାହାର ତଦନ୍ତ ଦାବି କରିଛନ୍ତି ଭକ୍ତ ମହଲ । ଯେଉଁଠି ମହାପ୍ରଭୁଙ୍କ ଅଳଙ୍କାର ମରାମତି ପାଇଁ ଶ୍ରୀମନ୍ଦିର ପ୍ରଶାସନ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରୁଛନ୍ତି, ସେଠି ସୁନାବେଶରରେ ଭଙ୍ଗା ସୁନା କିରୀଟ ଲାଗି ହେବା ଘଟଣାକୁ ଭକ୍ତ ମହଲ ବି ସହଜରେ ହଜମ କରିପାରୁନାହାନ୍ତି । ବୁଧବାର ଅପରାହ୍ଣରେ ମହାପ୍ରଭୁ ଶ୍ରୀଜଗନ୍ନାଥଙ୍କ ସହ ବଡ଼ଠାକୁର ଶ୍ରୀବଳଭଦ୍ର ଓ ମା’ ସୁଭଦ୍ରାଙ୍କ ପାଇଁ ଏକକାଳୀନ ସୁବର୍ଣ୍ଣ ଅଳଙ୍କାର ଶ୍ରୀମନ୍ଦିର ରତ୍ନ ଭଣ୍ଡାରରୁ ଆସିଥିଲା । ଆସିବା ସମୟରେ ମହାପ୍ରଭୁଙ୍କ କିରୀଟ ସମ୍ପୂର୍ଣ୍ଣ ଅକ୍ଷତ ଥିଲା । ସୁନାର ଦୁଇଟି ହାତୀ ମୁଣ୍ଡ ଓ ୨୧ଟି ସୁନାର ପାଖୁଡ଼ା କିରୀଟରେ ଲାଗିଥିଲା । କିରୀଟର ଦୁଇ ପାର୍ଶ୍ୱରେ ଅର୍ଥାତ ପାଖୁଡ଼ାର ଶେଷ ଦୁଇ ପାର୍ଶ୍ୱରେ ହାତୀ ମୁଣ୍ଡ ରହିଥିଲା । କିନ୍ତୁ ମହାପ୍ରଭୁଙ୍କ ଲାଗି ପରେ ସୁନାର ଦୁଇଟି ହାତୀ ମୁଣ୍ଡ ଓ ସୁନାର ୨୦ଟି ପାଖୁଡ଼ା ରହିଥିବା ଦେଖିବାକୁ ମିଳିଛି । ବାମ ପାର୍ଶ୍ୱରୁ ହାତୀ ମୁଣ୍ଡ ପରେ ସୁନାର ତୃତୀୟ ପାଖୁଡ଼ା ଗାଏବ ଥିବା ଦେଖିବାକୁ ମିଳିଛି । ଯାହା ଏବେ ବିରାଟ ପ୍ରଶ୍ନ ଠିଆ କରିଛି । କିରୀଟର ଏହି ଭଙ୍ଗା ସ୍ଥାନକୁ ଲୁଚାଇବା ପାଇଁ ଏଥିରେ ମଲ୍ଲି ଫୁଲର ମାଳ ଲଗାଯାଇଥିବା ଦେଖିବାକୁ ମିଳିଛି । ଅନ୍ୟପଟେ ଏହି ଭଙ୍ଗା ସୁନା ପାଖୁଡ଼ା କୁଆଡ଼େ ଗଲା ତାହା ଏବେ ପ୍ରଶ୍ନବାଚୀ ସୃଷ୍ଟି କରିଛି ।

ଏଥିସହିତ ପଢ଼ନ୍ତୁ: ସେଲ୍‌ଫି ନେବା ବେଳେ ବୈତରଣୀ ନଦୀରେ ଭାସିଯାଇ ଜଣେ ନିଖୋଜ

ସେଲ୍‌ଫି ନେବା ବେଳେ ବୈତରଣୀ ନଦୀରେ ଭାସିଯାଇ ଜଣେ ନିଖୋଜ

ଆନନ୍ଦପୁର: ସେଲ୍ଫି ହେଲା କାଳ, ବୈତରଣୀ ନଦୀର ଚୋରା ବାଲିରେ ଭାସି ଯାଇ ଜଣେ ନିଖୋଜ ।  ସୁନାଖମ୍ବ କୁ ବୁଲିବାକୁ ଆସି ସେଲଫି ନେବା ବେଳେ ନଦୀରେ ଖସି ଯାଇ ଜଣେ ଯୁବକ ନିଖୋଜ ଥିବା ବେଳେ ଜଣେ ଯୁବକ ଉଦ୍ଧାର ହୋଇଥିବା ସୂଚନା ମିଳିଛି । ଗତକାଲି ଉପରବେଳା ବର୍ଷା ହେବାରୁ ବୈତରଣୀ ନଦୀରେ ପାଣି ସ୍ରୋତ ବଢି ଯାଇଥିବା  । ତେଣୁ ଦମକଳବାହିନୀ ଉଦ୍ଧାର କାର୍ଯ୍ୟରେ ନିୟୋଜିତ ଥିଲେ ମଧ୍ୟ ରାତି ୯ ଟା ଯାଏଁ ଉଦ୍ଧାର କରିବା ସମ୍ଭବ ହୋଇନଥିଲା । ଆଜିବି ଠାକୁରମୁଣ୍ଡା ଓ ପାଟଣା ଅଗ୍ନିଶମ କର୍ମଚାରୀ ଉଦ୍ଧାର କାର୍ଯ୍ୟ ଜାରି ରଖିଛନ୍ତି ।  ସୂଚନା ଅନୁସାରେ କରଞ୍ଜିଆର ଅଙ୍କିତ ପେରିୱାଲଙ୍କ ପରିବାର ଲୋକଙ୍କ ସହ ସମ୍ପର୍କୀୟ ଶ୍ରୀରାମ ହୁଣ୍ଡରା ଆନନ୍ଦପୁର ମନୋହାରପୁରର ପ୍ରାକୃତିକ ସୌନ୍ଦର୍ଯ୍ୟରେ ଭରପୁର ଥିବା ସାନଖମ୍ବ ବୁଲିବାକୁ ଆସିଥିଲେ । ସେଲ୍ଫି ଉଠାଉଥିବାବେଳେ ସମ୍ପର୍କୀୟ ସହିତ ପାଣିରେ ଖସି ପଡ଼ିଥିଲେ ।ସାଙ୍ଗମାନେ ଜଣକୁ ଉଦ୍ଧାର କରିପାରିଥିବାବେଳେ ଶ୍ରୀରାମ ଭାସି ଯାଇଥିଲା । ଶ୍ରୀରାମଙ୍କ ବୟସ  ୨୦ ବର୍ଷ ହେବ ବୋଲି କୁହାଯାଉଛି । ଶ୍ରୀରାମ ଝାରଖଣ୍ଡ ଚାଇଁବସା ଅଞ୍ଚଳରୁ ସମ୍ପର୍କୀୟ ଘର କରଞ୍ଜିଆକୁ ଆସି ସୁନାଖମ୍ବ ବୁଲିବାକୁ ଆସିଥିଲେ ।

ଏଥିସହିତ ପଢ଼ନ୍ତୁ: କୁଆଖାଇ ନଦୀ ପଠାରୁ ବାହାରିଲା ପୁରୁଷଙ୍କ ମୃତଦେହ: ଶବ ବ୍ୟବଚ୍ଛେଦ ପାଇଁ ଏମ୍ସ ପଠାଯିବ