spot_img
Home Blog Page 5756

ସ୍ୱାସ୍ଥ୍ୟକର୍ମୀଙ୍କ ବଡ଼ ଅବହେଳା; ପ୍ରଥମେ ଡୋଜରେ କୋଭିସିଲ୍ଡ, ଦ୍ୱିତୀୟ ଡୋଜରେ ଦେଲେ କୋଭାକ୍ସିନ୍

ଲକ୍ଷ୍ନୌ: ଦେଶରେ ଭ୍ୟାକ୍ସିନ୍ ସଂକଟ ଲାଗି ରହିଥିବା ବେଳେ ଉତ୍ତରପ୍ରଦେଶରୁ ଆସିଛି ଅବହେଳାର ଚିତ୍ର । ୟୁପିର ସିଦ୍ଧାର୍ଥନଗରରେ କୋଭିଡ୍ ଟିକାକରଣ ବେଳେ ସ୍ୱାସ୍ଥ୍ୟକର୍ମୀଙ୍କ ଖାମଖିଆଲି ପଦାରେ ପଡ଼ିଛି । କିଛି ଲୋକଙ୍କୁ ପ୍ରଥମ ଡୋଜରେ କୋଭିସିଲ୍ଡ ଟିକା ଦିଆଯାଇଥିବା ବେଳେ ଦ୍ୱିତୀୟ ଡୋଜ୍ କୋଭାକ୍ସିନ୍ ଟିକା ଦିଆଯାଇଥିବା ଜଣାପଡ଼ିଛି । ଭ୍ୟାକ୍ସିନର କକଟେଲ୍ ଡୋଜକୁ ନେଇ ଲୋକ ଚିନ୍ତାରେ ପଡ଼ିଥିବା ବେଳେ ସମସ୍ତେ ସୁସ୍ଥ ଅଛନ୍ତି ।

ବଢ଼ନି ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରରେ ଏଭଳି ଘଟଣା ଘଟିଛି । ଔଦହି ଗାଁର ପ୍ରାୟ ୨୦ ଜଣ ଲୋକ କୋଭିସିଲ୍ଡ ଟିକାର ପ୍ରଥମ ଡୋଜ୍ ନେଇଥିଲେ । ମେ ୧୪ରେ ସେମାନଙ୍କୁ ଦ୍ୱିତୀୟ ଡୋଜରେ କୋଭାକ୍ସିନ୍ ଦିଆଯାଇଛି । ଏ କଥା ଜଣାପଡ଼ିବା ପରେ ସ୍ୱାସ୍ଥ୍ୟ ବିଭାଗ ତତ୍ପର ହୋଇ ଉଠିଥିବା ବେଳେ ଲୋକେ ଭୟଭୀତ ହୋଇ ପଡ଼ିଛନ୍ତି । ତେବେ ଆଶ୍ୱସ୍ତିର କଥା ହେଉଛି କକଟେଲ୍ ଭ୍ୟାକ୍ସିନ୍ ଡୋଜ୍ ନେବା ପରେ କାହାରି ସ୍ୱାସ୍ଥ୍ୟାବସ୍ଥା ବିଗିଡ଼ି ନାହିଁ ।

ବିପର୍ଯ୍ୟୟ ଆଗରେ ହିମାଳୟ ଭଳି ମଜଭୁତ୍ ନବୀନ

୧୯୯୯ ମହାବାତ୍ୟା କଥା ଭାବିଲେ ଏବେ ବି ଲୋମ ଟାଙ୍କୁରି ଉଠେ। ପ୍ରକୃତିର କୋପ ଆଗରେ ସମ୍ପୂର୍ଣ୍ଣ ଅସହାୟ ହୋଇ ପଡ଼ିଥିଲା ଓଡ଼ିଶା। ଜୀବନ ହରାଇଥିଲେ ୧୦ ହଜାରରୁ ଅଧିକ ଓଡ଼ିଆ। ଅନେକ ଛୁଆ ଅନାଥ ହୋଇଯାଇଥିଲେ ତ ଅନେକ ବାପା ମାଆ ନିଜ ସନ୍ତାନଙ୍କୁ ସବୁଦିନ ପାଇଁ ହରାଇଥିଲେ। ବଦଳି ଯାଇଥିଲା ଅନେକ ଅଞ୍ଚଳର ଭୂଗୋଳ। ଲେଖା ହୋଇଥିଲା ଅଭୁଲା ଯନ୍ତ୍ରଣାର ଦୁଃଖଦାୟକ ଇତିହାସ।

Image

ହେଲେ ଗତ ଦୁଇ ଦଶନ୍ଧିରେ ଓଡ଼ିଶା ଏବେ ଏତେ ମଜବୁତ ହୋଇଯାଇଛି ଯେ ପ୍ରାକୃତିକ ବିପର୍ଯ୍ୟୟ ଆଗରେ ହିମାଳୟ ଭଳି ଠିଆ ହୋଇ ରହି ପାରୁଛି। ସେ ୨୦୧୩ ଫାଇଲିନ୍ ହେଉ କି ୨୦୧୪ ହୁଡହୁଡ୍, ୨୦୧୮ ତିତଲି କିମ୍ବା ୨୦୧୯ ଫନି ଅଥବା ୨୦୨୦ ଅମ୍ଫାନ୍ କିମ୍ବା ଏବେ ଏବେ ଯାଇଥିବା ୟସ୍… ଯାହା ଦେଖାଯାଉଛି ଓଡ଼ିଶାକୁ ସତେ ଯେମିତି ପର୍ଯ୍ୟଟକ ଭଳି ଆସିବାରେ ଲାଗିଛି ବାତ୍ୟା ପରେ ବାତ୍ୟା। ଉପରୋକ୍ତ ସମସ୍ତ ପ୍ରାକୃତିକ ବିପର୍ଯ୍ୟୟରେ ଉଣାଅଧିକ ପ୍ରଭାବିତ ହୋଇଛି ଓଡ଼ିଶା। କେଉଁଠି ବାତ୍ୟା ସିଧାସଳଖ ଓଡ଼ିଶାକୁ ମାଡ଼ କରିଛି ତ କେବେ ଘଷିମାଜି ହୋଇ ପଡ଼ୋଶୀ ରାଜ୍ୟରେ ଲାଣ୍ଡଫଲ୍ କରିଛି। କିନ୍ତୁ ପ୍ରତିଟି ଥର ଦେଖାଯାଇଛି ଯେ- ପୂର୍ବାପେକ୍ଷା କ୍ଷୟକ୍ଷତି କମିଛି। ବିଶେଷ କରି ଧନଜୀବନ ସୁରକ୍ଷା କରି ଓଡ଼ିଶା ଏବେ ସାଇକ୍ଲୋନ୍ ଫାଇଟରେ ଚାମ୍ପିଅନ୍। ଯାହା ବି ନଷ୍ଟ ହୋଇଛି ସ୍ବଳ୍ପ ସମୟରେ ତାକୁ ପୁଣି ସଳଖି ଠିଆ କରାଯାଇ ପାରିଛି। ଥଇଥାନ କାମ ପ୍ରଭାବୀ ଢଙ୍ଗରେ କରାଯିବାରୁ କମ୍ ଅବଧିରେ ଓଡ଼ିଶାବାସୀ ସ୍ୱାଭାବିକ ଜୀବନଯାତ୍ରାକୁ ଫେରିପାରିଛନ୍ତି।

Image

ତେବେ ଦିନକରେ କି ମାସକରେ କିମ୍ବା ବର୍ଷକ ମଧ୍ୟରେ ଏ ପରିବର୍ତ୍ତନ ରାତାରାତି ହୋଇଯାଇନି। ଏଥିପାଇଁ ନିରନ୍ତର ପ୍ରଚେଷ୍ଟା, ଦୂରଦୃଷ୍ଟି ସମ୍ପନ୍ନ ରଣନୀତି, ଯୋଜନାବଦ୍ଧ ଭାବେ ଭିଭିଭୂମିର ବିକାଶ କରି ରାଜ୍ୟକୁ ଏଭଳି ପ୍ରସ୍ତୁତ କରାଯାଇଛି ଯେ ୧୯୯୯ ମହାବାତ୍ୟା ପରିସ୍ଥିତିର ପୁନରାବୃତ୍ତି ଛାଡ଼ନ୍ତୁ, ସେହିଭଳି ସ୍ଥିତି ଆଉ ରାଜ୍ୟବାସୀଙ୍କୁ କେବେବି ସାମନା କରିବାକୁ ନପଡ଼ିବ ତାହା ସୁନିଶ୍ଚିତ କରାଇ ପାରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ବରଂ ସ୍ଥିତି ଆଜି ୧୮୦ ଡିଗ୍ରୀ ପରିବର୍ତ୍ତନ ହୋଇଛି ଯେତେବେଳେ କି ଦେଶରେ କେଉଁଠି ବି ପ୍ରାକୃତିକ ବିପର୍ଯ୍ୟୟ ହେଲେ ଓଡ଼ିଶା ମୁକାବିଲା ଓ ଥଇଥାନରେ ସହାୟତା କରିବାରେ ଆଗୁଆ ରହୁଛି। ଅନ୍ୟ ରାଜ୍ୟ ଏବେ ଓଡ଼ିଶା ଆଡ଼କୁ ସହଯୋଗ ପାଇଁ ଆଶାର ଦୃଷ୍ଟିରେ ଚାହିଁ ରହୁଛନ୍ତି। ଏସବୁ ଶ୍ରେୟର ହକଦାର ଅଚିରେ ହେଉଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯିଏକି ୧୯୯୯ ସୁପର୍ ସାଇକ୍ଲୋନ୍ ଦୁର୍ଦ୍ଦଶାର ନିରୀହ ଶିକାର ଓଡ଼ିଶାକୁ ଏବେ ବାତ୍ୟା ମୁକାବିଲାରେ ଶୀର୍ଷ ସ୍ଥାନରେ ପହଞ୍ଚାଇ ପାରିଛନ୍ତି।

ନିଃସ୍ୱ ଅସହାୟ ଓଡ଼ିଶାର ଦକ୍ଷତାରେ ଏଭଳି ଆମୂଳଚୂଳ ପରିବର୍ତ୍ତନ ଆଣିପାରିଛନ୍ତି ରାଜ୍ୟର ମୁଖ୍ୟମନ୍ତ୍ରୀ। ବାତ୍ୟା ସମ୍ପର୍କରେ ଜଣାପଡ଼ିବା କ୍ଷଣି ଆରମ୍ଭ ହୋଇ ଯାଉଛି ତାହାର ମୁକାବିଲା ପ୍ରାକ୍- ପ୍ରସ୍ତୁତି। ସମ୍ଭାବ୍ୟ ଗତିପଥ ଉପରେ ନଜର ରଖି ଲ୍ୟାଣ୍ଡଫଲ୍ ଓ ତାହାର ପ୍ରଭାବର ସଠିକ୍ ଆକଳନ କରାଯାଉଛି। ପ୍ରଭାବିତ ହେବାକୁ ଥିବା ଇଲାକାର ଲୋକଙ୍କୁ ଆଗୁଆ ସୁରକ୍ଷିତ ଜାଗାକୁ ସ୍ଥାନାନ୍ତର କରାଯାଉଛି। ଏଥିପାଇଁ ରାଜ୍ୟରେ ହଜାର ହଜାର ବାତ୍ୟା ଆଶ୍ରୟସ୍ଥଳ ଏବେ ନିର୍ମାଣ ହୋଇସାରିଛି। ତା ବାଦେ ବିଦ୍ୟାଳୟ କୋଠାଗୁଡ଼ିକୁ ମଧ୍ୟ ଅସ୍ଥାୟୀ ଆଶ୍ରୟସ୍ଥଳ ଭାବେ ବ୍ୟବହାରଯୋଗ୍ୟ କରାଯାଇ ପାରିଛି। ଲୋକଙ୍କୁ ସଜାଗ କରିବାକୁ ବ୍ୟାପକ ସଚେତନତା ପଦକ୍ଷେପ ହାତକୁ ନିଆଯାଉଛି। କେବଳ ମାନବ ସମ୍ବଳ ନୁହେଁ, ପଶୁ ସମ୍ପଦକୁ ମଧ୍ୟ ସୁରକ୍ଷିତ ସ୍ଥାନକୁ ଅଣାଯାଉଛି। ସେମାନଙ୍କ ସୁଚାରୁ ରୂପେ ରହଣୀ ପାଇଁ ରନ୍ଧା ଓ ଶୁଖିଲା ଖାଦ୍ୟ, ପାନୀୟ ଜଳ, ଆଲୋକ ବ୍ୟବସ୍ଥା କରାଯାଇ ପାରୁଛି।

Image

ପୁଣି ବାତ୍ୟା ପରବର୍ତ୍ତୀ ସ୍ଥିତିରେ ରିଲିଫ୍ ସାମଗ୍ରୀ ଯୋଗାଣରୁ ଆରମ୍ଭ କରି ବିଦ୍ୟୁତ୍ ଓ ଯୋଗାଯୋଗ ଯଥାଶୀଘ୍ର ପୁନଃସ୍ଥାପନ କରିବା ହେଉ ବା ରାସ୍ତା, ପୋଲ, ବିଦ୍ୟୁତ୍ ଭିଭିଭୂମି ଆଦି ପୁନଃନିର୍ମାଣ କରିବା ନିଜ ଦମ୍ଭରେ କମ୍ ସମୟରେ ସମ୍ପନ୍ନ କରଯାଇ ପାରୁଛି। ଜାତୀୟସ୍ତରରେ ଏନଡିଆରଏଫ୍ ପରି ଆମ ରାଜ୍ୟରେ ଓଡ୍ରାଫ୍ ଟିମ୍, ଅଗ୍ନିଶମ ବାହିନୀ ଏବେ ଏ ଦିଗରେ ସ୍ଵୟଂସମ୍ପୂର୍ଣ୍ଣ। ଅନ୍ୟ କାହା ଉପରେ ନିର୍ଭର କରିବାକୁ ପଡ଼ୁନି। ସୂଚନା ମିଳିବା ମାତ୍ରକେ ସବୁ ଏତେ ବ୍ୟବସ୍ଥିତ, ସୁନିୟୋଜିତ ଢଙ୍ଗରେ ଆପେ ଆପେ କାମ ଆଗେଇ ଚାଲିଛି। କାରଣ ନବୀନ ପଟ୍ଟନାୟକଙ୍କ ମୁଖ୍ୟମନ୍ତ୍ରୀତ୍ୱରେ ରାଜ୍ୟ ସରକାର ଗତ କିଛି ବର୍ଷ ମଧ୍ୟରେ ଏକ୍ଷେତ୍ରରେ ଭିତ୍ତିଭୂମି ବିକାଶକୁ ବେଶ୍ ଆଗେଇ ନେଇଛନ୍ତି ଯେ ପ୍ରାକୃତିକ ବିପର୍ଯ୍ୟୟ ମୁକାବିଲାରେ ଏବେ ଓଡ଼ିଶା ରୋଲ୍ ମଡେଲ୍।

Image

‘ଜିରୋ କାଜୁଆଲିଟି’ ଅର୍ଥାତ୍ ପ୍ରତିଟି ଜୀବନ ମୂଲ୍ୟବାନ, କାହାର ମୃତ୍ୟୁ ଘଟିବାକୁ ଦିଆଯିବନି… ଏହାକୁ ଲକ୍ଷ୍ୟରେ ରଖି ମିଶନ୍ ମୋଡ୍‌ରେ କାମ କରିବାକୁ ସର୍ବଦା ପ୍ରେରଣା, ପରାମର୍ଶ ଦେଇ ଆସିଛନ୍ତି ଓଡ଼ିଶା ମୁଖ୍ୟମନ୍ତ୍ରୀ। ସେଥିପାଇଁ ତ ରାଜ୍ୟର ସର୍ବୋଚ୍ଚ ପ୍ରଶାସନିକ କଳରୁ ଆରମ୍ଭ କରି ପଞ୍ଚାୟତସ୍ତରର ଜନପ୍ରତିନିଧି, ତୃଣମୂଳସ୍ତରରେ କାମ କରୁଥିବା ଆଶା କର୍ମୀ, ଅଙ୍ଗନବାଡ଼ି ଦିଦି, ଏଏନ୍ଏମ୍ ଅଥବା ଏସ୍ଏଚଜି ମହିଳା ସଦସ୍ୟା ପ୍ରତ୍ୟେକ ଏ ଦିଗରେ ଏବେ ଅଭିଜ୍ଞ, ପାରଙ୍ଗମ। ଏକ କୁଶଳ ମାନବ ସମ୍ବଳ ବାହିନୀ ଏବେ ଏଥିପାଇଁ ସୁପ୍ରସ୍ତୁତ। ଉଲ୍ଲେଖନୀୟ ଭାବେ ‘ୟସ୍’ ଥିଲା ଅନ୍ୟ ବାତ୍ୟା ଠାରୁ କିଛିଟା ଭିନ୍ନ। ଗୋଟିଏ ପଟେ ପ୍ରାକୃତିକ ବିପର୍ଯ୍ୟୟ ତ ଆରପଟେ ଥିଲା କରୋନା ମହାମାରୀ ସଂକ୍ରମଣର ଭୟ। ହେଲେ ଏହାକୁ ଡବଲ ଚ୍ୟାଲେଞ୍ଜ ଭାବି ସେହି ଅନୁସାରେ ପ୍ରସ୍ତୁତିକୁ ଆଗେଇ ନେଇଥିଲେ ଟିମ୍ ନବୀନ। ବାତ୍ୟା ଆଶ୍ରୟସ୍ଥଳରେ କୋଭିଡ୍ ଗାଇଡ୍‌ଲାଇନ୍ ମୁତାବକ ରହଣୀ, ଘରୋଇ ସଙ୍ଗରୋଧରେ ରହୁଥିବା କରୋନା ପଜିଟିଭଙ୍କ ପାଇଁ ସ୍ଵତନ୍ତ୍ର ଆଶ୍ରୟସ୍ଥଳର ବ୍ୟବସ୍ଥା, ସେହି ଅନୁସାରେ ଲୋକଙ୍କୁ ସ୍ବତନ୍ତ୍ର ବ୍ୟବସ୍ଥାରେ ସ୍ଥାନାନ୍ତରଣ, ଗର୍ଭବତୀ ଓ ପ୍ରସୂତିଙ୍କ ପାଇଁ ବିଶେଷ ଧ୍ୟାନ ଭଳି ସମସ୍ତ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ନିର୍ଦ୍ଦେଶ ଦେଇଥିଲେ ମୁଖ୍ୟମନ୍ତ୍ରୀ।

Image

ଫଳରେ ଏତେ ବଡ଼ ବାତ୍ୟା ସତ୍ତ୍ବେ ୭ ଲକ୍ଷରୁ ଊର୍ଦ୍ଧ୍ୱ ଲୋକଙ୍କୁ ପ୍ରାୟ ୩୦୦୦ ଆଶ୍ରୟସ୍ଥଳରେ ନିରାପଦରେ ଆଶ୍ରୟ ଦିଆଯାଇ ପାରିଥିଲା। ବାତ୍ୟା ଦ୍ବାରା ପ୍ରଭାବିତ ହେବାକୁ ଥିବା ଜିଲ୍ଲାର ୨୧୦୦ ଗର୍ଭବତୀଙ୍କ ନିରାପଦ ପ୍ରସବ ସକାଶେ ସେମାନଙ୍କୁ ଆଗୁଆ ଡାକ୍ତରଖାନା ସ୍ଥାନାନ୍ତର କରାଯାଇଥିଲା। ପ୍ରାୟ ୭୫୦ ଛୁଆ ବାତ୍ୟାର ବିପଦ ସତ୍ତ୍ବେ ସୁରକ୍ଷିତ ଜନ୍ମଗ୍ରହଣ କରିଥିଲେ। ୨୫ ତାରିଖ ସନ୍ଧ୍ୟାରୁ ୨୪ ଘଣ୍ଟା ମଧ୍ୟରେ ୧୦୮ ଆମ୍ବୁଲାନ୍ସ ଦ୍ବାରା ୩୩୪୯ ରୋଗୀଙ୍କୁ ସୁରକ୍ଷିତ ଭାବେ ଡାକ୍ତରଖାନାରେ ପହଞ୍ଚା ଯାଇଥିଲା। ପ୍ରବଳ ବର୍ଷା ଓ ପବନ ମଧ୍ୟରେ ବାଲେଶ୍ବର, ଭଦ୍ରକ, ମୟୂରଭଞ୍ଜ, କେନ୍ଦ୍ରାପଡା ଓ ଜଗତସିଂହପୁର ଜିଲ୍ଲାର ୮୭୯ ରୋଗୀ ଡାକ୍ତରଖାନାରେ ପହଞ୍ଚିବା ପଛରେ ସୁନିୟନ୍ତ୍ରିତ ଡ୍ରାଇଭର, ପରିଚାଳକଙ୍କ ନେଟୱର୍କ ଦକ୍ଷତାର ସହ ଦାୟିତ୍ୱ ନିର୍ବାହ କରିଥିଲା।୧୯୯୯ରେ ୧୦ ହଜାରରୁ ଅଧିକ ମୃତ୍ୟୁ ଆଉ ୨୨ ବର୍ଷ ପରେ ମାତ୍ର ୨ ଜଣଙ୍କ ଜୀବନହାନୀ ହିଁ ଆମ ରାଜ୍ୟର ବିପର୍ଯ୍ୟୟ ମୁକାବିଲା ଦକ୍ଷତାରେ ଆକାଶ ପାତାଳ ପାର୍ଥକ୍ୟକୁ ସ୍ପଷ୍ଟ ଇଙ୍ଗିତ କରୁଛି। ଏହା ହିଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଦ୍ବିତୀୟ ସଫଳତା।

Image

ଆହୁରି ମଧ୍ୟ ବାତ୍ୟା ସମୟରେ ମୁକାବିଲା ଓ ପରେ ଥଇଥାନ ପାଇଁ ବରିଷ୍ଠ ଆଇଏଏସ୍, ଆଇପିଏସ୍, ଡାକ୍ତରଙ୍କୁ ସମ୍ପୃକ୍ତ ଜିଲ୍ଲାମାନଙ୍କୁ ପଠାଇଥିଲେ ମୁଖ୍ୟମନ୍ତ୍ରୀ। ଫଳରେ ମୁକାବିଲାରେ ନିୟୋଜିତ ଜିଲ୍ଲା ଓ ତଳସ୍ତରର ଅଧିକାରୀଙ୍କ ମନୋବଳ ବୃଦ୍ଧି ପାଇଥିଲା। ସେମାନଙ୍କ ଅଭିଜ୍ଞତା ଏ ଦିଗରେ ସହାୟକ ହୋଇଥିଲା। ଏତେ ବ୍ୟାପକ କାର୍ଯ୍ୟଭାର ସତ୍ତ୍ବେ ନିଜର ଏକ ଗୁରୁ ଦାୟିତ୍ୱକୁ ହେଳା କରି ନଥିଲେ ନବୀନ ପଟ୍ଟନାୟକ। ଅନ୍ୟ ରାଜ୍ୟକୁ ନିରନ୍ତର ଅମ୍ଲଜାନ ଟ୍ୟାଙ୍କର୍ ଯୋଗାଣ ଜାରି ରହିଥିଲା। ମୁଖ୍ୟମନ୍ତ୍ରୀଙ୍କ ସଚିବ ଭି.କେ.ପାଣ୍ଡିଆନ ପ୍ରତ୍ୟକ୍ଷ ଭାବେ ତଦାରଖ କରୁଥିଲେ ଯେ ବିନା ବାଧାରେ, ଉଚିତ ସୁରକ୍ଷାରେ ଏସବୁ ଟ୍ୟାଙ୍କର ନିଜ ଲକ୍ଷ୍ୟସ୍ଥଳରେ ପହଞ୍ଚି ପାରିବ। ଶିଳ୍ପ ବିଭାଗ ମଧ୍ୟ ଅକ୍ସିଜେନ୍ ଉତ୍ପାଦନ ଅବ୍ୟାହତ ରଖିଥିଲା। ଏ ଥିଲା ବିଭିନ୍ନ ବିଭାଗ ମଧ୍ୟରେ ସମନ୍ବୟର ଅନନ୍ୟ ଉଦାହରଣ।

 

ଦୂରଦ୍ରଷ୍ଟା ନବୀନ ପଟ୍ଟନାୟକ ଜାଣିସାରିଥିଲେ ଯେ ବାତ୍ୟାପ୍ରବଣ ଓଡ଼ିଶାବାସୀଙ୍କୁ ନିଜ ଦମ୍ଭରେ ହିଁ ବାରମ୍ବାର ଏହାର ମୁକାବିଲା ପାଇଁ ପ୍ରସ୍ତୁତ ହେବାକୁ ପଡ଼ିବ। ସେଥିପାଇଁ ଦୀର୍ଘମିଆଦୀ ଯୋଜନା, ପ୍ରେରଣାଦାୟୀ ନେତୃତ୍ବ, ଆବଶ୍ୟକ ଅନୁଦାନ ମଞ୍ଜୁରୀ, ମାନବ ସମ୍ବଳକୁ ପ୍ରଶିକ୍ଷଣ ଆଦି ଜରିଆରେ ସେ ଏବେ ଏଭଳି ଏକ ପରିବେଶ, ପରିସ୍ଥିତି ସୃଷ୍ଟି କରି ସାରିଛନ୍ତି କି ଯେକୌଣସି ପ୍ରାକୃତିକ ବିପତ୍ତିର ସମ୍ମୁଖୀନ ହେବାକୁ ଓଡ଼ିଶା ବେଶ୍ ପ୍ରସ୍ତୁତ। କେବଳ ସରକାରୀ କଳ ନୁହେଁ, ଗୋଷ୍ଠୀଗତ ସମ୍ପୃକ୍ତି ଜରିଆରେ କିଭଳି ପ୍ରାକୃତିକ ବିପତ୍ତିକୁ ପ୍ରତିହତ କରିହେବ ସେ କ୍ଷେତ୍ରରେ ମଧ୍ୟ ଅନ୍ୟମାନଙ୍କ ପାଇଁ ଉଦାହରଣ ସୃଷ୍ଟି କରିପାରିଛନ୍ତି ନବୀନ ପଟ୍ଟନାୟକ। ସିଧାସଳଖ ରାଜ୍ୟବାସୀଙ୍କୁ ଉଦବୋଧନ ଦେଇ ସେମାନଙ୍କ ମନୋବଳକୁ ମଜବୁତ କରି ଆସୁଛନ୍ତି ସେ। ସେଥିପାଇଁ ତ ଓଡ଼ିଶା କେବଳ ଜାତୀୟ ନୁହେଁ, ଅନ୍ତର୍ଜାତୀୟସ୍ତରରେ ମଧ୍ୟ ଉଚ୍ଚ ପ୍ରଶଂସିତ। ଏହାର ଅନେକ ସୀକୃତି, ସମ୍ମାନ ପାଇପାରିଛନ୍ତି ଓଡ଼ିଶା ମୁଖ୍ୟମନ୍ତ୍ରୀ।

ଓଡ଼ିଶା ରାଜ୍ୟ ବିପର୍ଯ୍ୟୟ ପରିଚାଳନା ପ୍ରାଧିକରଣ (ଓସଡମା) ଗଠନ ହେଉ କି ଓଡ୍ରାଫ୍ ଭଳି ସୁଦକ୍ଷ ବିପର୍ଯ୍ୟୟ ମୁକାବିଲା ବାହିନୀ ଗଠନ, ପ୍ରାକ୍ ସୂଚନା ହସ୍ତଗତ ହେବାରୁ ଆରମ୍ଭ କରି ଯାହା ବି ଉପୁଡ଼ି ଭାଙ୍ଗି ଯାଇଥିବ ତାହାକୁ ସଜାଡ଼ି ଜୀବନଯାତ୍ରା ସ୍ଵାଭାବିକ କରିବା ପର୍ଯ୍ୟନ୍ତ କାର୍ଯ୍ୟକୁ ଏଭଳି ସୁବ୍ୟବସ୍ଥିତ କରାଯାଇଛି ଯେ, ଲୋକଙ୍କ ମନରେ ଆଉ ବାତ୍ୟା ନେଇ ବିଶେଷ ଆଶଙ୍କା ବା ଭୟ ରହୁନି। ବରଂ ଦୃଢ଼ ଭିତ୍ତିଭୂମି ସହ ସମସ୍ତେ ବାତ୍ୟା ମୁକାବିଲା ପାଇଁ ସଜାଗ ରହୁଛନ୍ତି। ଫାଇଲିନ୍ ମହାବାତ୍ୟା ମୁକାବିଲାରେ ଓଡ଼ିଶା ସରକାରଙ୍କ ସଫଳତାକୁ ଜାତିସଂଘ ‘ବିଶ୍ୱସ୍ତରୀୟ ସଫଳତାର କାହାଣୀ’ ବୋଲି ଦର୍ଶାଇଥିଲା।

Image

ଫନି (୧୫୦ ବର୍ଷରେ ତୃତୀୟ ଥର ଓଡ଼ିଶା ସମ୍ମୁଖୀନ ହୋଇଥିବା ବିରଳ ଗ୍ରୀଷ୍ମ ଋତୁକାଳୀନ ମହାବାତ୍ୟା) ବେଳକୁ ରେକର୍ଡ ୧.୨ କୋଟି ଲୋକଙ୍କୁ ମାତ୍ର ୨୪ ଘଣ୍ଟାରେ ୯ ହଜାରରୁ ଅଧିକ ସୁରକ୍ଷିତ ଆଶ୍ରୟସ୍ଥଳକୁ ନେବା ଭଳି ଆହ୍ଵାନଭରା କାର୍ଯ୍ୟକୁ ସୂଚାରୁ ରୂପେ ସମ୍ପନ୍ନ କରାଯାଇ ଥିଲା। ଫଳତଃ ଧନଜୀବନ ହାନୀକୁ ଅତ୍ୟନ୍ତ ସୀମିତ କରିବାରେ ସଫଳତା ନବୀନ ପଟ୍ଟନାୟକଙ୍କ ନେତୃତ୍ବାଧୀନ ରାଜ୍ୟ ସରକାରଙ୍କ ବର୍ଷ ବର୍ଷର ପ୍ରସ୍ତୁତି ଉପରେ ଆଉ ଏକ ସଫଳତାର ମୋହର ମାରିଥିଲା। ସାରା ବିଶ୍ୱ ଦେଖିଥିଲା ରୂପାନ୍ତରିତ ଆଉ ମଜବୁତ ଓଡ଼ିଶାର ବିପର୍ଯ୍ୟୟ ମୁକାବିଲା ପ୍ରସ୍ତୁତିର ଉଦାହରଣ। ମୁଖ୍ୟମନ୍ତ୍ରୀଙ୍କ ଜିରୋ କାଜୁଆଲିଟି (ଶୂନ ମୃତ୍ୟୁ) ଆଜି ବାସ୍ତବ ରୂପ ନେଇପାରିଛି। ସେଥିପାଇଁ ତ ଗଞ୍ଜାମ ଜିଲ୍ଲାର ଭେଙ୍କଟରାୟପୁର ଓ ଜଗତସିଂହପୁର ଜିଲ୍ଲାର ନୋଳିଆ ସାହି ‘ସୁନାମି ମୁକାବିଲା ପ୍ରସ୍ତୁତ ଗ୍ରାମ’ ଭାବେ ୟୁନେସ୍କୋ ଓସିନୋଗ୍ରାଫିକ୍ କମିଶନ୍ ଦ୍ବାରା ପୁରସ୍କୃତ ହୋଇଛି। ଗୋଷ୍ଠୀ (କମ୍ୟୁନିଟି) ସ୍ତର ପର୍ଯ୍ୟନ୍ତ ବିପର୍ଯ୍ୟୟ ମୁକାବିଲା ପ୍ରସ୍ତୁତି ନେଇ ଏହା ଭାରତ ପାଇଁ ଗୌରବ ଆଣି ଦେଇଥିଲା।

Image

ଯେଭଳି ଯୁଦ୍ଧର ସମ୍ମୁଖ ଭାଗରେ ରହି ସେନାପତି ନିଜ ସେନାକୁ ଶତ୍ରୁର ସମ୍ମୁଖୀନ ହେବାକୁ ଆଗେଇ ନିଏ, ସେହିପରି ସାରା ରାଜ୍ୟର ସର୍ବମାନ୍ୟ ନେତା ମୁଖ୍ୟମନ୍ତ୍ରୀ ନିଜେ ପ୍ରତ୍ୟକ୍ଷ ଭାବେ ପ୍ରତିଟି ସମୟରେ ବାତ୍ୟା ମୁକାବିଲାର ତଦାରଖ କରି ଆସୁଛନ୍ତି। ପ୍ରତ୍ୟକ୍ଷ ଅନୁଧ୍ୟାନରେ ପ୍ରତିଟି ଲୋକର ଜୀବନ ରକ୍ଷା ପାଇଁ ପ୍ରଶାସନିକ କଳକୁ ତତ୍ପରତାର ସହ ନିୟୋଜିତ କରାଇ ଆସିଛନ୍ତି। ସେ ଦଳୀୟ କର୍ମକର୍ତ୍ତା ହୁଅନ୍ତୁ ଅଥବା ୟୁଥ କ୍ଲବ୍, ପୁଲିସ ପ୍ରଶାସନ ଅଥବା ପଞ୍ଚାୟତ ଜନପ୍ରତିନିଧି ସମସ୍ତଙ୍କୁ ସାଥିରେ ନେଇ ବିଭିନ୍ନ ସମୟରେ ଭିନ୍ନ ଭିନ୍ନ ବାତ୍ୟାର ସଫଳ ମୁକାବିଲା କରି ଜିରୋ କାଜୁଆଲିଟିକୁ ବାସ୍ତବତାର ପରିଣତ କରାଇ ପାରିଛନ୍ତି ନବୀନ ପଟ୍ଟନାୟକ। ସମୟୋଚିତ ପଦକ୍ଷେପ ଜରିଆରେ ପ୍ରାକୃତିକ ବିପତ୍ତିର ମୁକାବିଲାରେ ଓଡ଼ିଶା ଗ୍ଲୋବାଲ୍ ବେଞ୍ଚମାର୍କ ସୃଷ୍ଟି କରିପାରିବା ସତରେ ଅନ୍ୟ ରାଜ୍ୟମାନଙ୍କ ସକାଶେ ଏକ ଅନୁକରଣୀୟ ନଜିର। ଆଉ ଓଡିଶାବାସୀ ଏବଂ ପ୍ରାକୃତିକ ବିପର୍ଯ୍ୟୟ ମଧ୍ୟରେ ହିମାଳୟ ଭଳି ମଜବୁତ ପ୍ରାଚୀର ହୋଇ ଠିଆ ରହି ନିଜ ୪ କୋଟି ସଦସ୍ୟବିଶିଷ୍ଟ ପରିବାରକୁ ସୁରକ୍ଷା ଦେଇ ଆସୁଛନ୍ତି ସେ।

ଡକ୍ଟର ଗୋପବନ୍ଧୁ ଦାସ

‘ୟାସ୍’ ବାତ୍ୟା ପ୍ରଭାବିତ ଜିଲ୍ଲାରେ ବିଜୁ ଯୁବ ଛାତ୍ର ଜନତା ଦଳ ପକ୍ଷରୁ ରିଲିଫ୍ ବଣ୍ଟନ

ଭୁବନେଶ୍ୱର: ‘ୟାସ୍’ ବାତ୍ୟା ପ୍ରବାଭିତ ଜିଲ୍ଲାମାନଙ୍କରେ ବିଜୁ ଯୁବ ଛାତ୍ର ଜନତା ଦଳ ପକ୍ଷରୁ ରିଲିଫ୍ ଏବଂ ଶୁଖିଲା ଖାଦ୍ୟ ସାମଗ୍ରୀ ବଣ୍ଟନ କାର୍ଯ୍ୟକ୍ରମ ଆରମ୍ଭ ହୋଇଯାଇଛି । ମୁଖ୍ୟମନ୍ତ୍ରୀ ତଥା ବିଜେଡି ରାଜ୍ୟ ସଭାପତି ନବୀନ ପଟ୍ଟନାୟକଙ୍କ ନିର୍ଦ୍ଦେଶକ୍ରମେ ଆଜି ବିଜେଡି ରାଜ୍ୟ ସାଧାରଣ ସମ୍ପାଦକ (ଯୁବ ବ୍ୟାପାର) ତଥା ବିଧାୟକ ପ୍ରଣବ କୁମାର ବଳବନ୍ତରାୟ ଏବଂ ଛାତ୍ର ବିଜେଡି ରାଜ୍ୟ ସଭାପତି ତଥା ବିଧାୟକ ଦେବୀ ରଞ୍ଜନ ତ୍ରିପାଠୀ ବାଲେଶ୍ଵର, ଭଦ୍ରକ ଏବଂ କେନ୍ଦ୍ରାପଡ଼ା ଜିଲ୍ଲା ଗ୍ରସ୍ତ କରି ରିଲିଫ୍ ବଣ୍ଟନ କାର୍ଯ୍ୟକ୍ରମର ନେତୃତ୍ବ ନେଇଛନ୍ତି ।

BYCJD Distributing Relief In Cyclone Yaas Affected Districts

ଉଭୟ ପ୍ରଥମେ ବାଲେଶ୍ଵର ଜିଲ୍ଲା ଗ୍ରସ୍ତ କରି ‘ୟାସ୍’ ବାତ୍ୟା ପ୍ରଭାବିତ ସମସ୍ତ ଅଞ୍ଚଳ ଗୁଡ଼ିକୁ ପରିଦର୍ଶନ କରିବା ସହ ରିଲିଫ୍ ସାମଗ୍ରୀ ବଣ୍ଟନ କରିଥିଲେ । ଏହି ପରିପ୍ରେକ୍ଷୀରେ ବିଜେଡି ରାଜ୍ୟ ସାଧାରଣ ସମ୍ପାଦକ (ଯୁବ ବ୍ୟାପାର) ପ୍ରଣବ କୁମାର ବଳବନ୍ତରାୟ କହିଛନ୍ତି, ‘ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଆହ୍ବାନ କ୍ରମେ ବିଜୁ ଯୁବ ଛାତ୍ର ଜନତା ଦଳ ସର୍ବଦା ସାମାଜିକ ପ୍ରତିବଦ୍ଧତା ନିମନ୍ତେ ସଂକଳ୍ପବଦ୍ଧ ।’

BYCJD Distributing Relief In Cyclone Yaas Affected Districts

ବାଲେଶ୍ଵର, ଭଦ୍ରକ ଏବଂ କେନ୍ଦ୍ରାପଡ଼ା ଜିଲ୍ଲାରେ ସ୍ବଭାବିକ ପରିସ୍ଥିତି ଫେରି ଆସିବା ପର୍ଯ୍ୟନ୍ତ ଏହି ରିଲିଫ୍ ବଣ୍ଟନ କାର୍ଯ୍ୟକ୍ରମ ଜାରି ରହିବ । ଯୁବ ଛାତ୍ର ନେତୃବୃନ୍ଦଙ୍କ ସାମାଜିକ ସହଯୋଗ ପାଇଁ ସମସ୍ତଙ୍କୁ ଧନ୍ୟବାଦ ଜଣାଇଛନ୍ତି ପ୍ରଣବ ବଳବନ୍ତରାୟ । ବିଜେଡି ଛାତ୍ର ସଭାପତି ତ୍ରିପାଠୀ ରିଲିଫ୍ କାର୍ଯ୍ୟକ୍ରମରେ ସାମିଲ୍ ହୋଇ ସମସ୍ତ ଛାତ୍ର ନେତା ମାନଙ୍କୁ ଉତ୍ସାହିତ କରିଥିଲେ ।

ମୁଖ୍ୟମନ୍ତ୍ରୀଙ୍କ ବାତ୍ୟା ପୁନରୁଦ୍ଧାର ସମୀକ୍ଷା, ପୁନର୍ଗଠନ କାର୍ଯ୍ୟ ଯୁଦ୍ଧକାଳୀନ ଭିତ୍ତିରେ କରିବାକୁ ନିର୍ଦ୍ଦେଶ

ଭୁବନେଶ୍ୱର: ଦିନରେ ଆକାଶ ମାର୍ଗରୁ ବାତ୍ୟା ପ୍ରଭାବିତ ଅଞ୍ଚଳ ବୁଲି ଦେଖିବା ପରେ ସନ୍ଧ୍ୟାରେ ସମୀକ୍ଷା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଭିଡିଓ କନଫରେନ୍ସିଂ ମାଧ୍ୟମରେ ବାତ୍ୟା ‘ୟାସ’ ପରବର୍ତ୍ତୀ ପୁନର୍ଗଠନ ଓ ପୁନରୁଦ୍ଧାର କାର୍ଯ୍ୟର ସମୀକ୍ଷା କରିଛନ୍ତି । ୭ ଦିନ ମଧ୍ୟରେ ପ୍ରଭାବିତ ଜିଲ୍ଲା ଗୁଡ଼ିକରେ ଭାଙ୍ଗି ଯାଇଥିବା ଘର ଗୁଡିକ ସମ୍ପର୍କରେ ଆକଳନ କରି ରିପୋର୍ଟ ପ୍ରଦାନ ପାଇଁ ନିର୍ଦ୍ଦେଶ ଦେଇଛନ୍ତି ।

ମୁଖ୍ୟମନ୍ତ୍ରୀ କହିଛନ୍ତି, ବର୍ତ୍ତମାନ ରିଲିଫ ଓ ପୁନର୍ଗଠନ ସହ ପୁନରୁଦ୍ଧାର ପ୍ରକ୍ରିୟା ଉପରେ ସମସ୍ତ ଧ୍ୟାନ କେନ୍ଦ୍ରୀତ କରିବାକୁ ପଡ଼ିବ । କ୍ଷତିଗ୍ରସ୍ତ ଜଳମଗ୍ନ ଅଞ୍ଚଳରେ ୭ ଦିନ ପାଇଁ ରିଲିଫ୍ ଘୋଷଣା କରାଯାଇଛି ବୋଲି ପ୍ରକାଶ କରି ସମସ୍ତ ମରାମତି ଓ ପୁନରୁଦ୍ଧାର କାର୍ଯ୍ୟକୁ ଯୁଦ୍ଧକାଳୀନ ଭିତ୍ତିରେ ଜାରି ରଖିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି । ପାନୀୟ ଜଳ ଓ ବିଦ୍ୟୁତ୍ ଯୋଗାଣ ପ୍ରକ୍ରିୟା ଖୁବଶୀଘ୍ର ସ୍ୱଭାବିକ କରିବା ପାଇଁ ପରାମର୍ଶ ଦେଇଛନ୍ତି ନବୀନ । ସନ୍ଧ୍ୟା ସୁଦ୍ଧା ସମସ୍ତ ମୁଖ୍ୟ ସଡ଼କ ଗୁଡ଼ିକ ଯାନବାହାନ ଚଳାଚଳ ପାଇଁ ଅବରୋଧମୁକ୍ତ ହେବ ବୋଲି ସେ ଆଶାପ୍ରକାଶ କରିଛନ୍ତି ।

ସେହିପରି ବୈତରଣୀ ନଦୀର ତଳ ଅଞ୍ଚଳରେ ବନ୍ୟା ଆସିବାର ସମ୍ଭାବନା ଥିବାରୁ ପ୍ରଶାସନ ସତର୍କ ଦୃଷ୍ଟି ରଖିବା ପାଇଁ ସେ ନିର୍ଦ୍ଦେଶ ଦେଇଛନ୍ତି । ବାତ୍ୟା ‘ୟାସ’ର ପରିଚାଳନାରେ ଉଲ୍ଲେଖନୀୟ ସଫଳତା ପାଇଁ ପ୍ରଶାସନିକ ଅଧିକାରୀମାନଙ୍କୁ ପ୍ରଶଂସା କରି ମୁଖ୍ୟମନ୍ତ୍ରୀ କହିଛନ୍ତି, ସମସ୍ତ ବିଷୟକୁ ଦୃଷ୍ଟିରେ ରଖି ବିଧିବଦ୍ଧ ଯୋଜନା ଏବଂ ତ୍ରୁଟିଶୂନ୍ୟ ପରିଚାଳନା ଯୋଗୁଁ ବାତ୍ୟା ‘ୟାସ’ର ସଫଳ ମୁକାବିଲା କରାଯାଇ ପାରିଛି । ଜନସାଧାରଣଙ୍କ ସହଯୋଗରେ ପ୍ରାକୃତିକ ବିପର୍ଯ୍ୟୟ ପରିଚାଳନାରେ ଓଡ଼ିଶା ଅତ୍ୟନ୍ତ ସଫଳ ଓ ପ୍ରଭାବୀ ବୋଲି ପୁଣି ଥରେ ପ୍ରମାଣିତ କରି ପାରିଛି ।

ବାତ୍ୟା ପ୍ରଭାବିତ ଜିଲ୍ଲାଗୁଡିକର ସମସ୍ତ ଜନସାଧାରଣ, ନାଗରିକ ସଂଗଠନ ମାନଙ୍କୁ ରିଲିଫ୍ ଓ ସ୍ଥାନାନ୍ତର କାର୍ଯ୍ୟରେ ସେମାନଙ୍କ ସହଯୋଗ ପାଇଁ ମୁଖ୍ୟମନ୍ତ୍ରୀ ଧନ୍ୟବାଦ ଦେଇଛନ୍ତି ।  କେନ୍ଦ୍ର ସରକାର ଏବଂ ବିଭିନ୍ନ କେନ୍ଦ୍ରୀୟ ସଂସ୍ଥା ଯଥା NDRF, IMD ଓ ଅନ୍ୟାନ୍ୟ କେନ୍ଦ୍ରୀୟ ସଂସ୍ଥାକୁ ସେମାନଙ୍କ ସହଯୋଗ ପାଇଁ ମୁଖ୍ୟମନ୍ତ୍ରୀ ଧନ୍ୟବାଦ ଦେଇଛନ୍ତି ।

CM Naveen Patnaik Directs For House Damage Assessment Within 7 Days Cyclone Yass

ପରିଶେଷରେ ମୁଖ୍ୟମନ୍ତ୍ରୀ ପୁନରୁଦ୍ଧାର ଓ ପୁନର୍ବାସ କାର୍ଯ୍ୟରେ ଏହିଭଳି ଦକ୍ଷତାର ସହ କାର୍ଯ୍ୟ ଜାରି ରଖିବାକୁ ପରାମର୍ଶ ଦେଇଥିଲେ । ସୂଚନାଯୋଗ୍ୟ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ହେଲିକପ୍ଟର ଯୋଗେ ଆକାଶମାର୍ଗରୁ ବାତ୍ୟା କ୍ଷୟକ୍ଷତିର ଆକଳନ କରିଥିଲେ ।

ବୈଠକରେ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର କହିଛନ୍ତି, ଭଦ୍ରକ ଓ ବାଲେଶ୍ବର ଜିଲ୍ଲା ସର୍ବାଧିକ ପ୍ରଭାବିତ ହୋଇଛି । ବିଦ୍ୟୁତ୍, ଯୋଗାଯୋଗ ପ୍ରକ୍ରିୟା ୭୫ ରୁ ୮୦ ପ୍ରତିଶତ ସ୍ବଭାବିକ ହୋଇଛି । ଜଳମଗ୍ନ ଅଞ୍ଚଳ ବ୍ୟତୀତ ଅନ୍ୟ ସମସ୍ତ ସ୍ଥାନରେ ବିଦ୍ୟୁତ୍ ଯୋଗାଯୋଗ ସ୍ବଭାବିକ ହୋଇଛି । ପାନୀୟ ଜଳ ପାଇଁ ଡିଜି ସେଟ୍‌, ଟ୍ୟାଙ୍କର ଜରିଆରେ ବ୍ୟବସ୍ଥା କରାଯାଉଛି ବୋଲି ସେ ସୂଚନା ଦେଇଛନ୍ତି ।

ସ୍ବତନ୍ତ୍ର ରିଲିଫ କମିଶନର ଶ୍ରୀ ପି.କେ. ଜେନା ଏକ ଉପସ୍ଥାପନା ରଖି କହିଛନ୍ତି, ଲୋକଙ୍କ ସୁରକ୍ଷା ପାଇଁ ୧୨ ଜିଲ୍ଲାର ୭ ଲକ୍ଷ ୧୦ ହଜାର ଲୋକଙ୍କୁ ସ୍ଥାନାନ୍ତର କରାଯାଇ ୮୪୧୦ଟି ଆଶ୍ରୟ ସ୍ଥଳରେ ରଖାଯାଇଥିଲା ।  ୨୦୦ ବ୍ଲକ୍‌ରେ ପ୍ରବଳ ବର୍ଷା ହୋଇଥିଲା । ମୟୂରଭଞ୍ଜର କୁସୁମୀ ବ୍ଲକ୍‌ରେ ୫୧୫ ମି.ମି ବର୍ଷା ହୋଇଥିବାର ସେ ସୂଚନା ଦେଇଛନ୍ତି । ସୁବର୍ଣ୍ଣରେଖା ଓ ବୁଢାବଳଙ୍ଗ ନଦୀରେ ବନ୍ୟାଜଳ ବଢୁଥିବା ସତ୍ତ୍ୱେ ବନ୍ୟା ଆଶଙ୍କା କମ୍‌ ବୋଲି ପ୍ରକାଶ କରି କହିଛନ୍ତି, ବୈତରଣୀ ନଦୀର ତଳିଆ ଅଞ୍ଚଳରେ ବନ୍ୟା ଆଶଙ୍କା ରହିଛି ଓ ସେଥିପ୍ରତି ସତର୍କ ଦୃଷ୍ଟି ରଖାଯାଇଛି ।

ଶକ୍ତି ବିଭାଗ ପକ୍ଷରୁ ସୂଚନା ଦିଆଯାଇ କୁହାଯାଇଛି, ସମସ୍ତ ୩୩ ଓ ୧୧ କେଭି ଫିଡର ମରାମତି ପ୍ରକ୍ରିୟା ଜାରି ରହିଛି ଏବଂ ଏହା ଖୁବ୍‌ ଶୀଘ୍ର ଶେଷ ହେବ । ୩୦ ଲକ୍ଷ ପ୍ରଭାବିତ ଉପଭୋକ୍ତାଙ୍କ ମଧ୍ୟରୁ ଆଜି ସନ୍ଧ୍ୟା ସୁଦ୍ଧା ୨୩ ଲକ୍ଷ ଉପଭୋକ୍ତାଙ୍କୁ ବିଜୁଳି ଯୋଗାଯୋଗ ସ୍ବଭାବିକ କରାଯିବ ।

ସେହିପରି ପଞ୍ଚାୟତିରାଜ ଓ ପାନୀୟ ଜଳ ବିଭାଗ ପକ୍ଷରୁ ସୂଚନା ଦିଆଯାଇ କୁହାଯାଇଛି, ସମୁଦାୟ ୬୨ଟି ବ୍ଲକ ପ୍ରଭାବିତ ହୋଇଛି । ସବୁ ପାଇପ ଜଳ ପ୍ରକଳ୍ପ କାର୍ଯ୍ୟକାରୀ କରାଯାଇଛି ବୋଲି ସୂଚନା ଦିଆଯାଇଛି ।  ୫୭୧ଟି ପାଇପ ଜଳ ପ୍ରକଳ୍ପକୁ ଡିଜିସେଟ୍‌ ଜରିଆରେ କାର୍ଯ୍ୟକାରୀ କରାଯାଉଛି ଏବଂ ୩୪୬ଟି ଟ୍ୟାଙ୍କର ଜରିଆରେ ଜଳମଗ୍ନ ସ୍ଥାନକୁ ପାନୀୟ ଜଳ ଯୋଗାଇ ଦିଆଯାଉଛି । ବାଲେଶ୍ବର ଓ ଭଦ୍ରକ ଜିଲ୍ଲାକୁ ଅତିରିକ୍ତ ଟ୍ୟାଙ୍କର ପଠାଯାଇଛି । ଗୃହନିର୍ମାଣ ଓ ନଗର ଉନ୍ନୟନ ବିଭାଗ ପକ୍ଷରୁ ସୂଚନା ଦିଆଯାଇଛି ଯେ, ସମସ୍ତ ପୌରାଞ୍ଚଳରେ ପାନୀୟ ଜଳ ଯୋଗାଣ ପ୍ରକ୍ରିୟା ସ୍ବଭାବିକ କରାଯାଇଛି ।

ଜଳସମ୍ପଦ ବିଭାଗର ସୂଚନା ଅନୁଯାୟୀ କେନ୍ଦ୍ରାପଡ଼ା, ବାଲେଶ୍ୱର ଓ ଭଦ୍ରକ ଅଞ୍ଚଳରେ କେତେକ ସ୍ଥାନରେ ଘାଇ ସୃଷ୍ଟି ହୋଇଛି ଏବଂ ଜଳମଗ୍ନ ଅଞ୍ଚଳରେ ସୃଷ୍ଟି ହୋଇଥିବା ଘାଇର ଆକଳନ କରାଯାଉଛି ଏବଂ ବିଭିନ୍ନ ସ୍ଥାନରେ ମରାମତି କାର୍ଯ୍ୟ ଚାଲିଛି ।

ମହିଳା ଓ ଶିଶୁବିକାଶ ବିଭାଗର ସୂଚନା ଅନୁଯାୟୀ ୪୫୦୦ ଗର୍ଭବତୀ ମହିଳାଙ୍କୁ ଚିହ୍ନଟ କରାଯାଇଥିଲା । ସେଥିମଧ୍ୟରୁ ୨୧୦୦ଙ୍କୁ ହସ୍ପିଟାଲକୁ ସ୍ଥାନାନ୍ତରିତ କରାଯାଇଥିଲା । ବାତ୍ୟା ସମୟରେ  ୭୫୦ ନବଜାତ ଶିଶୁ ଜନ୍ମ ହୋଇଛନ୍ତି ।

ସେହିପରି ପୂର୍ତ୍ତ ବିଭାଗ ପକ୍ଷରୁ ସୂଚନା ଦିଆଯାଇଥିଲା ଯେ ସମସ୍ତ କୋଭିଡ ହସ୍ପିଟାଲରେ ଭିତ୍ତିଭୂମି ଠିକ୍‌ ରହିଛି । ଆଜି ସନ୍ଧ୍ୟା ସୁଦ୍ଧା ଗଛ ପଡ଼ି ଅବରୋଧ ହୋଇଥିବା ସମସ୍ତ ସଡକ ଗୁଡିକ ଅବରୋଧମୁକ୍ତ କରାଯିବ। ସେହିପରି ଗ୍ରାମ ଉନ୍ନୟନ ବିଭାଗର ୩୫୦ଟି ସଡ଼କ ଅବରୋଧ ହୋଇଥିବା ବେଳେ ଏହିସବୁ ଗୁଡିକ ଆଜି ସନ୍ଧ୍ୟା ସୁଦ୍ଧା ଅବରୋଧମୁକ୍ତ ହେବ ।

ବୈଠକରେ ବାଲେଶ୍ୱର, ଭଦ୍ରକ, ମୟୂରଭଞ୍ଜ ଓ କେନ୍ଦ୍ରାପଡ଼ା ଜିଲ୍ଲାର ଜିଲ୍ଲାପାଳମାନେ ଜିଲ୍ଲାରେ ଚାଲିଥିବା ପୁନରୁଦ୍ଧାର କାର୍ଯ୍ୟକ୍ରମ ଗୁଡ଼ିକର ସୂଚନା ଦେଇଥିଲେ। ମୁଖ୍ୟମନ୍ତ୍ରୀ ଜିଲ୍ଲା ପ୍ରଶାସନର କାର୍ଯ୍ୟକୁ ପ୍ରଶଂସା କରି ଏହିଭଳି କାର୍ଯ୍ୟ ଜାରି ରଖିବାକୁ ପରାମର୍ଶ ଦେଇଥିଲେ ।

ମୁଖ୍ୟମନ୍ତ୍ରୀଙ୍କ ସଚିବ (୫-ଟି) ଭି.କେ. ପାଣ୍ଡିଆନ ବୈଠକ ସଂଯୋଜନା କରିଥିଲେ । ସଂପୃକ୍ତ ବିଭାଗର ପ୍ରମୁଖ ସଚିବ ଓ ସଚିବମାନେ ଉପସ୍ଥିତ ଥିଲେ।

ମୁଖ୍ୟମନ୍ତ୍ରୀଙ୍କୁ ରାଜ୍ୟପାଳଙ୍କ ପ୍ରଶଂସା, ବାତ୍ୟା ପରିଚାଳନାରେ ନବୀନଙ୍କ ଦକ୍ଷତାକୁ ସାବାସୀ

ଭୁବନେଶ୍ୱର: ପ୍ରତିବର୍ଷର ବାତ୍ୟାର ସମ୍ମୁଖୀନ ହେଉଛି ଓଡ଼ିଶା । କେବେ ପୁରୀ ତ କେବେ ପାରଦୀପ । ଆଉ କେବେ ଗୋପାଳପୁର ତ କେବେ ଚାନ୍ଦିପୁର । ବଙ୍ଗୋପସାଗରରେ ସୃଷ୍ଟି ହେଉଥିବା ବାତ୍ୟାରେ ସବୁବର୍ଷ ପ୍ରଭାବିତ ହେଉଛି ଓଡ଼ିଶା । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦୂରଦୃଷ୍ଟି ଓ ପ୍ରଭାବୀ ପଦକ୍ଷେପ ଯୋଗୁଁ ଲୋକଙ୍କ ଜୀବନ ବଞ୍ଚିଯାଉଛି ।

ଉତ୍ତର ଓଡ଼ିଶାର ଭଦ୍ରକ-ବାଲେଶ୍ୱରରେ ବାତ୍ୟା ‘ୟାସ୍’ ଗତକାଲି ମାଡ଼ ହୋଇଥିଲା । ବାତ୍ୟାରେ ବଡ଼ ଧରଣର ଜୀବନ ହାନି ହୋଇନାହିଁ । ରାଜ୍ୟପାଳ ପ୍ରଫେସର ଗଣେଶୀଲାଲ୍ ବାତ୍ୟାର ସୁପରିଚାଳନା ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ପ୍ରଶଂସା କରିଛନ୍ତି । ନବୀନଙ୍କ ଦୂରଦୃଷ୍ଟି ସମ୍ପନ୍ନ ପଦକ୍ଷେପ, ଅଭିଜ୍ଞତା ଓ ଯତ୍ନର ସହ ବାତ୍ୟା ପରିଚାଳନାକୁ ରାଜ୍ୟପାଳ ସର୍ବୋକୃଷ୍ଟ ବୋଲି କହିଛନ୍ତି ।

 Governor Appreciated CM Naveen Patnaik for Meticulous Management of Cyclone Yaas

ଏଥିସହ ବାତ୍ୟା ପରିଚାଳନାରେ ନିୟୋଜିତ କେନ୍ଦ୍ର, ରାଜ୍ୟ ସରକାରଙ୍କ ବିଭିନ୍ନ ସଂସ୍ଥା, ଭାରତୀୟ ରେଡକ୍ରସ ସୋସାଇଟିର ଓଡ଼ିଶା ଶାଖା, ବିଭିନ୍ନ ସ୍ୱେଚ୍ଛାସେବୀଙ୍କ ସଂଗଠନର ସମୟଯୋଗୀ ପଦକ୍ଷେପ ସହ ଉଦ୍ଧାର ଓ ପୁନରୁଦ୍ଧାର କାର୍ଯ୍ୟକୁ ରାଜ୍ୟପାଳ ପ୍ରଶଂସା କରିଛନ୍ତି ।

ଋତୁସ୍ରାବ ସମୟରେ କରୋନା ଟିକା ନେବା ଉଚିତ୍‌ କି ? ବିଶେଷଜ୍ଞ କଣ କହୁଛନ୍ତି ଜାଣନ୍ତୁ

ନୂଆଦିଲ୍ଲୀ: ଅଦୃଶ୍ୟ ଭୂତାଣୁ ସହ ଲଢ଼ିବା ପାଇଁ ଏକ ମାତ୍ର ଅସ୍ତ୍ର କରୋନା ଟିକା। ସାରା ଦେଶରେ ଏବେ କରୋନାକୁ ହରାଇବା ପାଇଁ ଚାଲିଛି ଟିକାକରଣ। ତେବେ କେଉଁ କେଉଁ ମାନେ କରୋନା ଟିକା ନେବେ ତାହା ପୂର୍ବରୁ ଦେଶର ସ୍ୱାସ୍ଥ୍ୟ ବିଭାଗ ସ୍ଥିର କରିଛି। ତେବେ ଏକ ସୋସିଆଲ ମିଡିଆରେ କୁହାଯାଏ କି ପିରିୟଡ଼ ସମୟରେ ମହିଳାମାନଙ୍କର ଆଣ୍ଟିବଡି ବହୁତ କମ୍ ହୋଇଥାଏ। ଟିକାର ପ୍ରଥମ ଡୋଜ ନେବା ପରେ ମଧ୍ୟ ଦେହରେ ରୋଗ ପ୍ରତିରୋଧକ ଶକ୍ତି ହ୍ରାସ ହୋଇଥାଏ। କିଛି ଦିନ ପରେ ହ୍ରାସ ହୋଇଥିବା ପ୍ରତିରୋଧକ ଶକ୍ତି ଧୀରେ ଧୀରେ ପୂନର୍ବାର ବଢ଼ିବାକୁ ଲାଗିଥାଏ। ତେଣୁ, ଯଦି ମହିଳା ମାନେ ଏହି ସମୟ ମଧ୍ୟରେ ଟିକା ନିଅନ୍ତି, ତେବେ ସଂକ୍ରମଣ ହେବାର ଆଶଙ୍କା ଅଧିକ ରହିବ। ତେବେ ସୋସିଆଲ ମିଡିଆରେ ଭାଇରାଲ ହେଉଥିବା ଏଭଳି କଥାରେ କେତେ ସତ୍ୟତା ରହିଛି ତାହା ଆସନ୍ତୁ ଜାଣିବା।

ଆଗ୍ରା ସରୋଜିନୀ ନାଇଡୁ ମେଡିକାଲ କଲେଜର ମହିଳା ଏବଂ ପ୍ରସୂତି ବିଶେଷଜ୍ଞ ଡକ୍ଟର ନିଧି ଗୁପ୍ତା କହିଛନ୍ତି ଯେ ଏଭଳି ମେସେଜରେ କୌଣସି ସତ୍ୟତା ନାହିଁ। ଏହା କେବଳ ପୌରାଣିକ କଥା। ମାସିକ ଋତୁସ୍ରାବ ମହିଳାମାନଙ୍କଠାରେ ଏକ ସାଧାରଣ ପ୍ରାକୃତିକ ପ୍ରକ୍ରିୟା। ଏହି ସମୟ ମଧ୍ୟରେ ରୋଗ ପ୍ରତିରୋଧକ ଶକ୍ତି କୌଣସି ପ୍ରକାରେ ହ୍ରାସ ହୁଏ ନାହିଁ । ତେବେ ଏପର୍ଯ୍ୟନ୍ତ ସେପରି କୌଣସି ଅଧ୍ୟୟନ ପ୍ରକାଶ କରାଯାଇ ନାହିଁ। ତେଣୁ ଏହି ପୁରାଣ କଥାବସ୍ତୁ ବିଷୟରେ କେହି ଅଧିକ ଗମ୍ଭୀର ହେବା ଉଚିତ୍ ନୁହେଁ।

ଡକ୍ଟର ନିଧି କହିଛନ୍ତି ଯେ ଗର୍ଭାବସ୍ଥାରେ ମହିଳାମାନେ ଟିକା ଗ୍ରହଣରୁ ଦୂରେଇ ରହିବା ଉଚିତ। କାରଣ ଏନେଇ ଏପର୍ଯ୍ୟନ୍ତ ଭାରତ ସରକାରଙ୍କ ଦ୍ୱାରା କୌଣସି ନିର୍ଦ୍ଦେଶନାମା ଜାରି କରାଯାଇ ନାହିଁ। ସେ ଏହା ମଧ୍ୟ କହିଛନ୍ତି ଯେ ସ୍ତନ୍ୟପାନ କରାଉଥିବା ମାଆ ମାନେ ଏବଂ ଋତୁସ୍ରାବ ସମୟରେ ନାରୀ ବା ମହିଳା ମାନେ କରୋନା ଟିକା ନେଇପାରିବେ। ଏଥିରେ କୌଣସି ପ୍ରକାରର ଅସୁବିଧା ହେବନାହିଁ।

ଖାଲି ସେତିକି ନୁହେଁ ଏବେ ଏହା ମଧ୍ୟ ଚର୍ଚ୍ଚା ହେଉଛି ଯେ ଅନେକ ମହିଳାଙ୍କଠାରେ କରୋନା ସଂକ୍ରମଣ ପରେ ପିରିୟଡସ ବା ଋତୁସ୍ରାବର ତାରିଖ ବଦଳୁଛି। ଏହା ସହିତ କରୋନା ସଂକ୍ରମଣ ହେବା ପରେ ଶରୀରର ପ୍ରତିରୋଧକ ଶକ୍ତି କମିଯାଏ, କେତେକ ଲୋକଙ୍କର ଫୁସଫୁସ ସମସ୍ୟା ମଧ୍ୟ ବାହାରି ପଡ଼େ। କିନ୍ତୁ, ଡାକ୍ତରମାନେ କହିଛନ୍ତି ଯେ ଅଧ୍ୟୟନରୁ ଏପର୍ଯ୍ୟନ୍ତ ସେମିତି କିଛି ଖୁଲାସା ହୋଇନାହିଁ।

ତେବେ କରୋନା ସମୟରେ ମହିଳା ମାନଙ୍କୁ ଏଥିପ୍ରତି ଅଧିକ ଧ୍ୟାନ ଦେବାକୁ ପଡ଼ିବ। ମହିଳା ମାନେ ଖାଦ୍ୟରେ ପୁଷ୍ଟିକର ଖାଦ୍ୟ ଖାଆନ୍ତୁ ଏବଂ ନିୟମିତ ବ୍ୟାୟାମ କରନ୍ତୁ। କରୋନା ରୋଗରୁ ସୁସ୍ଥ ହେବା ପରେ ଶରୀରକୁ ଯଥେଷ୍ଟ ପରିମାଣରେ ବିଶ୍ରାମ ଦେବା ଆବଶ୍ୟକ। ଏହା ବ୍ୟତୀତ ପର୍ଯ୍ୟାପ୍ତ ପରିମାଣରେ ଶୋଇବା ଆବଶ୍ୟକ ଏବଂ ପ୍ରଚୁର ପରିମାଣରେ ପାଣି ପିଇବା ଦରକାର। ଯଦି ଆପଣ ଗର୍ଭବତୀ ହେବାକୁ ଯାଉଛନ୍ତି, ତେବେ ନିଜକୁ ଘରେ ଅଲଗା ରଖନ୍ତୁ ବୋଲି ଡାକ୍ତରମାନେ ପରାମର୍ଶ ଦେଇଛନ୍ତି।

 

 

୨ ରାଜ୍ୟ ବଢ଼ାଇଲେ ଲକଡାଉନ୍ ଅବଧି

ନୂଆଦିଲ୍ଲୀ: ଦେଶରେ କରୋନା ସଂକ୍ରମଣ ମାମଲା ଖସୁଥିବା ବେଳେ କିଛି ରାଜ୍ୟରେ ମାମଲା ବଢ଼ୁଛି । କରୋନା ସଂକ୍ରମଣ ମାମଲାକୁ ଦୃଷ୍ଟିରେ ରଖି ପଶ୍ଚିମବଙ୍ଗ ସରକାର ଲକଡାଉନ୍ ସମୟସୀମା ବୃଦ୍ଧି କରିଛନ୍ତି । ରାଜ୍ୟରେ ଜୁନ୍ ୧୫ ତାରିଖ ଯାଏ ଲକଡାଉନ୍ କଟକଣା ବଳବତ୍ତର ରହିବା ନେଇ ମୁଖ୍ୟମନ୍ତ୍ରୀ ମମତା ବାନାର୍ଜୀ ସୂଚନା ଦେଇଛନ୍ତି । ରାଜ୍ୟରେ ଜୁଲାଇ ଶେଷରେ ରାଜ୍ୟ ବୋର୍ଡର ଦ୍ୱାଦଶ ପରୀକ୍ଷା ଏବଂ ଅଗଷ୍ଟ ଦ୍ୱିତୀୟ ସପ୍ତାହରେ ଦଶମ ଶ୍ରେଣୀ ବୋର୍ଡ ପରୀକ୍ଷା ହେବ ବୋଲି ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ମମତା ବାନାର୍ଜୀ ।

ଅନ୍ୟପଟେ ବିଶେଷଜ୍ଞଙ୍କ ସୁପାରିସ୍ ଅନୁଯାୟୀ, ପଞ୍ଜାବ ମୁଖ୍ୟମନ୍ତ୍ରୀ କ୍ୟାପଟେନ୍ ଅମ୍ରିନ୍ଦର ସିଂ ଜୁନ୍ ୧୦ ଯାଏ ଲକଡାଉନକୁ ବୃଦ୍ଧି କରିଛନ୍ତି । ଲକଡାଉନ୍ ବଢ଼ିଥିବା ସରକାର କଟକଣାରେ କିଛିଟା କୋହଳ କରିଛନ୍ତି । ଘରୋଇ ଗାଡ଼ିରେ ସୀମିତ ସଂଖ୍ୟା ଯାତ୍ରୀ ନେଇ ଲାଗିଥିବା ପ୍ରତିବନ୍ଧକକୁ ହଟାଇ ଦିଆଯାଇଛି । ଅକ୍ସିଜେନକୁ ମେଡିକାଲ୍ ସହ ଅନ୍ୟ କାର୍ଯ୍ୟରେ ବ୍ୟବହାର ନେଇ ଦିଆଯାଇଛି ଅନୁମତି ।

କୃଷକ ଆନ୍ଦୋଳନରେ ଭୟଙ୍କର ଷଡ଼ଯନ୍ତ୍ର, ଲାଲକିଲ୍ଲାକୁ କବ୍‌ଜାକରି କରିଥାନ୍ତେ ଆନ୍ଦୋଳନର ସ୍ଥଳ

ନୂଆଦିଲ୍ଲୀ: ଜାନୁଆରୀ ୨୬ ତାରିଖ, ସେଦିନ ଅପମାନିତ ହୋଇଥିଲା ତ୍ରୀରଙ୍ଗା। ଦେଶର ଐତିହାସିକ ଏବଂ ଗର୍ବିତ ମନେକରାଯାଉଥିବା ଲାଲକିଲ୍ଲା ଉପରେ ହୋଇଥିଲା ଆକ୍ରମଣ। ନୂଆ କୃଷି ଆଇନ୍‌କୁ ବିରୋଧ କରି ଆରମ୍ଭ ହୋଇଥିଲା ଟ୍ରାକ୍ଟର ରାଲି। କୌଣସି ଅପ୍ରୀତିକର ପରିସ୍ଥିତି ନ ଉପୁଜିବା ପାଇଁ ଟ୍ରାକ୍ଟର ରାଲି ପାଇଁ ତିଆରି ହୋଇଥିଲା ସ୍ୱତନ୍ତ୍ର ମାର୍ଗ। ତଥାପି କ୍ଷଣିକରେ ବଦଳି ଯାଇଥିଲା ପରିସ୍ଥିତି। ରାଲି ପାଇଁ ତିଆରି ହୋଇଥିବା ସ୍ୱତନ୍ତ୍ର ରାସ୍ତାରେ ଆନ୍ଦୋନକାରୀ ନଯାଇ ବିଶୃଙ୍ଖଳା ସୃଷ୍ଟି କରିବା ପାଇଁ ଅଲଗା ମାର୍ଗରେ ଯିବାକୁ ଜିଦ କରିଥିଲେ। ହିଂସା ହେଲା, ହିଂସାରେ ୩୦୦ରୁ ଅଧିକ ପୋଲିସ କର୍ମଚାରୀ ଆହତ ହେଲେ ଏବଂ ଟ୍ରାକ୍ଟର ରାଲି ବେଳେ କିଛି ଆନ୍ଦୋଳନକାରୀ ଚାଷୀଙ୍କ ମଧ୍ୟ ମୃତ୍ୟୁ ହୋଇଥିଲା। ସିସିଟିଭି ଦେଖି ଅନେକ ଚାଷୀଙ୍କ ନାମରେ ମାମଲା ରୁଜୁ ମଧ୍ୟ କରାଯାଇଥିଲ।

ତେବେ ଜାନୁଆରୀର ସେହି  ହିଂସା ମାମଲାରେ ଦିଲ୍ଲୀ ପୋଲିସ କୋର୍ଟରେ ଏକ ଚାର୍ଜସିଟ ଦାଖଲ କରିଛି। ଏହି ମାମଲା ନେଇ କୋର୍ଟ ୨୮ ମେରେ ବିଚାର କରିବେ। କ୍ରାଇମବ୍ରାଞ୍ଚର ସୂତ୍ର ଅନୁଯାୟୀ ଦାଖଲ ହୋଇଥିବା ଚାର୍ଜସିଟର ତଦନ୍ତ ସମୟରେ ଅନେକ ବଡ଼ ଷଡଯନ୍ତ୍ର ସାମ୍ନାକୁ ଆସିଛି। ଯେଉଁଥିରେ ମିଳିଥିବା ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ସେଦିନ ଆନ୍ଦୋଳନକାରୀ କୃଷକ ଲାଲକିଲ୍ଲାକୁ ସେମାନଙ୍କ ଅଧିନକୁ ନେଇଥାନ୍ତେ। ଲାଲକିଲ୍ଲାକୁ କବ୍‌ଜାକୁ ନେବା ପରେ ଉଗ୍ର କୃଷକ ଆନ୍ଦୋଳନକାରୀ ମାନେ ସେଠାରେ ସିଙ୍ଘୁ ଏବଂ ଟିକାରୀ ସୀମା ପରି ଆନ୍ଦୋଳନର ସ୍ଥାନ ସୃଷ୍ଟି କରିଥାନ୍ତେ। ଏହି ମାମଲାରେ ଗିରଫ ହୋଇଥିବା ଅନେକ ଅଭିଯୁକ୍ତ ଏବଂ ସେମାନଙ୍କ ଠାରୁ ରେକର୍ଡ କରାଯାଇଥିବା ବ୍ୟକ୍ତିକୁ ନେଇ ପ୍ରମାଣ ଆଧାରରେ ଏହି ଚାର୍ଜସିଟ୍ ପ୍ରସ୍ତୁତ କରାଯାଇଛି।

ତେବେ ଏତେ ସୁରକ୍ଷା ମଧ୍ୟରେ ଲାଲକିଲ୍ଲା ଭିତରକୁ ଯିବା ପାଇଁ କେମିତି ତିଆରି ହୋଇଥିଲା ପ୍ଲାନ୍‌। କ୍ରାଇମବ୍ରାଞ୍ଚର ରିପୋର୍ଟ ଅନୁଯାୟୀ  ୨୬ ଜାନୁଆରୀରେ ବିରୋଧ ପ୍ରଦର୍ଶନ ରାଲିରେ ବୃଦ୍ଧ କୃଷକଙ୍କୁ ଆଗରେ ନେବାକୁ ଯୋଜନା କରାଯାଇଥିଲା। ଯାହା ଦ୍ୱାରା କୌଣସି ପୋଲିସ କର୍ମଚାରୀ ସେମାନଙ୍କ ବିରୋଧରେ କୌଣସି କଠୋର କାର୍ଯ୍ୟାନୁଷ୍ଠାନ ଯେମିତି ଗ୍ରହଣ କରିପାରିବେ ନାହିଁ। ଏହା ସହିତ ଆନ୍ଦୋଳନରେ ସାମିଲ ଥିବା ଯୁବ କୃଷକ ମାନଙ୍କୁ ମୋବାଇଲ୍ ଫୋନ୍ ଏବଂ ସୋସିଆଲ୍ ମିଡିଆ ମାଧ୍ୟମରେ ଲାଇଭ୍ ଦେଖାଇବା ପାଇଁ ଏକ ଷଡଯନ୍ତ୍ର ମଧ୍ୟ କରାଯାଇଥିଲା ବୋଲି ଚାର୍ଜସିଟରେ ଉଲ୍ଲେଖ ଅଛି। ତେବେ ଏହି ଷଡ଼ଯନ୍ତ୍ର ନେଇ ସମ୍ପୂର୍ଣ୍ଣ ତଥ୍ୟ ଆସନ୍ତା ୨୮ ତାରିଖ ପରେ ମିଳିପାରିବ ବୋଲି ଜଣାପଡ଼ିଛି।

ତେବେ ଏଠାରେ ପ୍ରଶ୍ନ ଉଠୁଛି କାହିଁକି ୨୬ ଜାନୁଆରୀକୁ ଏହି ଆନ୍ଦୋଳନ ପାଇଁ ଠିକ୍‌ ଦିନ ବୋଲି ବଛା ଯାଇଥିଲା। ୨୬ ଜାନୁଆରୀରେ ଟ୍ରାକ୍ଟର ରାଲି କରିବା ପଛରେ ଆନ୍ଦୋଳନକାରୀ ମାନଙ୍କର ମଧ୍ୟ ଥିଲା ଏକ ବଡ଼ ଷଡ଼ଯନ୍ତ୍ର। କାରଣ ଏହି କୃଷକ ଆନ୍ଦୋଳନ ସମୟରେ କେତେକ ସାମାଜିକ ବିରୋଧୀ ଏବଂ ହିଂସା କରିଥିବା ବ୍ୟକ୍ତି ଏହା ଚିନ୍ତା କରିଥିଲେ ଯେ ଜାନୁଆରୀ ୨୬ରେ କେନ୍ଦ୍ର ସରକାର କୌଣସି ବଳ ପ୍ରୟୋଗ କରିବେ ନାହିଁ। କାରଣ ସେହି ଦିନ ଜାତୀୟ ଉତ୍ସବ ସ୍ୱତନ୍ତ୍ରତା ଦିବସ ପାଳନ କରାଯାଉଥିଲା। ଆଉ ଏହା ଥିଲା ଟ୍ରାକ୍ଟର ଆନ୍ଦୋଳନ କରିବାର ଏକ ମୁଖ୍ୟ କାରଣ। ସାରା ବିଶ୍ୱ ଆଗରେ ସରକାରଙ୍କର ଭାବମୂର୍ତ୍ତିକୁ ଲଜ୍ଜିତ କରାଇବା ମଧ୍ୟ ଥିଲା ଆଉ ଏକ ପ୍ରମୁଖ କାରଣ।

କୋର୍ଟରେ ଦାଖଲ ହୋଇଥିବା ଚାର୍ଜସିଟରେ ଉଲ୍ଲେଖ କରାଯାଇଛି ଯେ ଲାଲକିଲ୍ଲାରୁ ତ୍ରିରଙ୍ଗା ପତାକାକୁ କାଢ଼ି ଅନ୍ୟ କୌଣସି ପତାକା ଲଗାଇବା ପାଇଁ ଅଭିଯୁକ୍ତ ମାନଙ୍କୁ ପ୍ରଚୁର ପରିମାଣରେ ଅର୍ଥ ଦିଆଯାଇଥିଲା। ଦେଶ ବିରୋଧି କାର୍ଯ୍ୟ ପାଇଁ ଶିଖ୍ ଫର ଜଷ୍ଟିସ୍ ସଂସ୍ଥା ଏବଂ ଏହାର ମୁଖ୍ୟ ଗୁରୁପତବନ୍ତ ସିଂ ପନ୍ନୁଙ୍କ ଦ୍ୱାରା ଏହି କାର୍ଯ୍ୟ ପାଇଁ ପ୍ରଚୁର ଟଙ୍କାର ପୁରସ୍କାର ଘୋଷଣା ମଧ୍ୟ କରାଯାଇଥିଲା। ଚାର୍ଜସିଟରେ ଗିରଫ ହୋଇଥିବା ଜଣେ ଅଭିଯୁକ୍ତଙ୍କ ଝିଅର ଆନ୍ତଃରାଜ୍ୟ କଲ୍ ରୋକର୍ଡକୁ ମଧ୍ୟ ଦିଲ୍ଲୀ ପୋଲିସ ଚାର୍ଜସିଟ୍ରେ ଅନ୍ତର୍ଭୁକ୍ତ କରିଛି। ଯେଉଁଥିରେ ବାପାଙ୍କୁ ୫୦ ଲକ୍ଷ ଟଙ୍କା ମିଳିବାକୁ ଯାଉଛି ବୋଲି ଝିଅ କହୁଥିବାର ରେକର୍ଡ ରହିଛି। ତେଣୁ ମାମଲାର ଗମ୍ଭୀରତାକୁ ଦୃଷ୍ଟିରେ ରଖି ଅନେକ ପ୍ରମାଣ ସଂଗ୍ରହ କରାଯାଇଛି ଏବଂ ଏହାକୁ ଚାର୍ଜସିଟରେ ମଧ୍ୟ ଅନ୍ତର୍ଭୁକ୍ତ କରାଯାଇଛି।

ସୂତ୍ରରୁ ଜଣାପଡ଼ିଛି ଏହି ଉଗ୍ର ଆନ୍ଦୋଳନ ହିଂସା ପାଇଁ ସ୍କ୍ରିପ୍ଟ ବହୁ ପୂର୍ବରୁ ଲେଖାଯାଇଥିଲା। ଜାନୁଆରୀ ୨୬ର ଲାଲକିଲ୍ଲା ଆନ୍ଦୋଳନ ପାଇଁ ନଭେମ୍ବର / ଡିସେମ୍ବର ୨୦୨୦ ରେ ହିଂସାର ଷଡଯନ୍ତ୍ର କରାଯାଇଥିଲା। ଏଥିପାଇଁ ପଞ୍ଜାବ ଏବଂ ହରିୟାଣାରେ ଟ୍ରାକ୍ଟର ଏବଂ ବହୁ ସାମଗ୍ରୀ ଆଗୁଆ କିଣା ଯାଇଥିଲା। ସେହି ସମୟରେ ପଞ୍ଜାବରେ ବୃଦ୍ଧି ପାଉଥିବା ଟ୍ରାକ୍ଟର କିଣା ତଥ୍ୟକୁ ଦିଲ୍ଲୀ ପୋଲିସ ଚାର୍ଜସିଟରେ ସାମିଲ କରିଛି। ନଭେମ୍ବର ୨୦୨୦ରେ  ୪୩ ପ୍ରତିଶତ  ଟ୍ରାକ୍ଟର କିଣା ବୃଦ୍ଧି ପାଇଥିଲା ଏବଂ ଡିସେମ୍ବରରେ ଏହା ୯୪ ପ୍ରତିଶତକୁ ବୃଦ୍ଧି ପାଇଥିଲା। ତେଣୁ ଘଟଣାର ଗମ୍ଭୀରତାକୁ ଦୃଷ୍ଟିରେ ରଖି କ୍ରାଇମବ୍ରାଞ୍ଚ ଟିମ୍ ଏହାର ସବିଶେଷ ଅନୁସନ୍ଧାନ କରି ଏକ ଚାର୍ଜସିଟ୍ ପ୍ରସ୍ତୁତ କରିଛି।

କରୋନା: ଦ୍ୱିତୀୟ ଡୋଜରେ ଅନ୍ୟ ଟିକା ନେଲେ କ’ଣ ହେବ ? ଏମିତି କହିଲା ସ୍ୱାସ୍ଥ୍ୟ ବିଭାଗ

ନୂଆଦିଲ୍ଲୀ: ଦେଶରେ କରୋନା ସଂକ୍ରମଣ ମାମଲା ଖସିଥିବା ବେଳେ ସୁସ୍ଥତା ହାର୍ ବଢ଼ିଛି । ସୁସ୍ଥତା ହାର୍ ୯୦ ପ୍ରତିଶତରେ ପହଞ୍ଚିଥିବା କହିଛି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ । ଦେଶରେ ଭ୍ୟାକ୍ସିନ୍ ଅଭାବ ଲାଗି ରହିଥିବା ବେଳେ ମହାରାଷ୍ଟ୍ର ଓ ୟୁପିରେ କେତେକ ଲୋକଙ୍କୁ ପ୍ରଥମ ଡୋଜ୍ କୋଭିଡ୍ ଟିକାରେ କୋଭାକ୍ସିନ୍ ଓ ଦ୍ୱିତୀୟ ଡୋଜରେ କୋଭିସିଲ୍ଡ ଟିକା ଦିଆଯାଇଥିବା ଖବର ଆସିଛି ।

ଏହାକୁ ନେଇ ପ୍ରତିକ୍ରିୟା ରଖିଛନ୍ତି ନୀତି ଆୟୋଗର ଡକ୍ଟର ବିକେ ପାଉଲ । କହିଛନ୍ତି- ପ୍ରୋଟୋକଲରେ ସ୍ପଷ୍ଟ ଭାବେ କୁହାଯାଇଛି ୨ଟି ଯାକ ଡୋଜ୍ ଗୋଟିଏ ଭ୍ୟାକ୍ସିନର ଦିଆଯିବ । ଯେଉଁଠି ଦ୍ୱିତୀୟ ଡୋଜରେ ଅଲଗା ଟିକା ଦିଆଯାଉଛି ଯାଞ୍ଚ ହେବା ଉଚିତ୍ । ଯଦି ଦ୍ୱିତୀୟ ଡୋଜରେ ଅଲଗା କୌଣସି କୋଭିଡ୍ ଟିକା ଦିଆଯାଉଛି ତ କିଛି ଚନ୍ତାର କାରଣ ନାହିଁ ବୋଲି ସେ କହିଛନ୍ତି ।

ବିଦେଶୀ କମ୍ପାନୀର ଭ୍ୟାକ୍ସିନ୍ ନେଇ ବିକେ ପାଉଲ୍ କହିଛନ୍ତି, କେନ୍ଦ୍ର ସରକାର ବିଦେଶୀ ଉତ୍ପାଦନକାରୀଙ୍କ ସହ ସମ୍ପର୍କରେ ଅଛନ୍ତି । ମେକ୍ ଇନ୍ ଇଣ୍ଡିଆ, ମେଡ୍ ଇନ୍ ଇଣ୍ଡିଆ ହେଉଛି ଆମ ପ୍ରାଥମିକତା । ଆମେ ଫାଇଜର ସହ ଆଲୋଚନା ଜାରି ରଖିଛୁ । ଜୁଲାଇ ମାସ ମଧ୍ୟରେ ଫାଇଜର ଭ୍ୟାକ୍ସିନ୍ ମିଳିବା ନେଇ କମ୍ପାନୀ ସଂକେତ ଦେଇଥିବା ସେ କହିଛନ୍ତି ।

ଲୋକେ ଘରକୁ ୧୦ ଲକ୍ଷ ଟଙ୍କା ଦେଇ କିଣି ନେଉଛନ୍ତି ବ୍ଲାକ୍‌ ଫଙ୍ଗସ୍‌, ରୋଷେଇ କରି ଖାଉଛନ୍ତି ସୁନାଠାରୁ ଅଧିକ ଟଙ୍କାର ଫଙ୍ଗସ୍‌

ନୂଆଦିଲ୍ଲୀ: ଯଦି ଫଙ୍ଗସ ଆପଣଙ୍କୁ ମାଗଣାରେ ଦିଆଯାଏ ତେବେ ଆପଣ କଣ ଫଙ୍ଗସକୁ ନେବେ…। ବ୍ଲାକ୍‌ ଫଙ୍ଗସ, ଏବେ ଏହି ନାଁ ଶୁଣିଲେ ମନରେ ଭୟର ଛନକା ପଶେ। କରୋନା ପରେ ଏବେ ଧିରେ ଧିରେ ବ୍ଲାକ୍‌ ଫଙ୍ଗସ ଦେଶରେ କାୟା ବିସ୍ତାର କରିବାରେ ଲାଗିଛି। ବ୍ଲାକ୍‌ ଫଙ୍ଗସ ପରେ ଏବେ ହ୍ୱାଇଟ ଏବଂ ୟେଲୋ ଫଙ୍ଗସ ପାଇଁ ଦୁନିଆରେ ଆତଙ୍କ ଖେଳିଯାଇଛି। କରୋନାରେ ମୃତ୍ୟୁ ସଂଖ୍ୟା ଧିରେ ଧିରେ କମୁଥିବା ବେଳେ ଏବେ ଫଙ୍ଗସ୍‌ ଆକ୍ରାନ୍ତ ହୋଇ ବଢ଼ୁଛି ମୃତ୍ୟୁ ସଂଖ୍ୟା। କିନ୍ତୁ ଆପଣ ଜାଣନ୍ତି କି ଦୁନିଆରେ ଏପରି ଏକ ଫଙ୍ଗସ୍ ମଧ୍ୟ ଅଛି, ଯାହାକୁ ଲୋକମାନେ କିଣିବା ପାଇଁ ପାଣି ପରି ଟଙ୍କା ବୁହାଇଥାନ୍ତି। ଯାହାକୁ ଦୁନିଆର ସବୁଠାରୁ ଦାମୀ ଫଙ୍ଗସ୍ କୁହାଯାଏ। ବଜାରରେ, ଏହି ଫଙ୍ଗସ୍ କିଲୋଗ୍ରାମ ପିଛା ୧୦ ଲକ୍ଷ ଟଙ୍କା ପର୍ଯ୍ୟନ୍ତ ବିକ୍ରି ହୁଏ।

ଦୁନିଆର ଏହି ମହଙ୍ଗା ଫଙ୍ଗସକୁ ଭାରତର ହିମାଳୟରେ କୀଟାଜଡ଼ି ଏବଂ ୟାରଶଙ୍ଗବା କୁହାଯାଏ। ଏଥି ସହିତ, ଅନେକ ଲୋକ ଏହାକୁ ହିମାଳୟ ଭାୟାଗ୍ରା ନାମରେ ମଧ୍ୟ ଜଣାଯାଏ। ଇଂରାଜୀରେ ଏହାକୁ କ୍ୟାଟର୍ପିଲର୍ ଫଙ୍ଗସ୍ କୁହାଯାଏ। ବିଶ୍ୱର ଅନେକ ଦେଶରେ କ୍ୟାଟର୍ପିଲର୍ ଫଙ୍ଗସର ଚାହିଦା ରହିଛି। ବିଶେଷ କରି ଚୀନ୍ରେ ଏହାର ଚାହିଦା ବହୁତ ଅଧିକ। ଏହାର ଔଷଧୀୟ ଗୁଣ ଯୋଗୁଁ ଲୋକମାନେ ଏହି ଫଙ୍ଗସ କିଣିବାକୁ ସବୁ ସମୟରେ ଆଗ୍ରହ ଦେଖାଇଥାନ୍ତି। କିନ୍ତୁ ଏହି ଫଙ୍ଗସ ସବୁ ସ୍ଥାନରେ ବଢ଼େ ନାହିଁ। କେବଳ କିଛି ନିର୍ଦ୍ଧିଷ୍ଟ ସ୍ଥାନରେ ଏହି ଫଙ୍ଗସ ବଢ଼ିଥାଏ। ତେବେ ଏହା କେଉଁଠାରେ ବଢ଼େ ଏନେଇ ଆପଣ ମାନଙ୍କ ମନରେ ପ୍ରଶ୍ନ ଉଠୁଥିବ। ଏହି ଫଙ୍ଗସ୍ କେବଳ ସମୁଦ୍ର ପତନ ଠାରୁ ୩ ହଜାର ୫ଶହ ମିଟର ଉଚ୍ଚତା ବିଶିଷ୍ଟ ଅଞ୍ଚଳରେ ଦେଖାଯାଏ।

କ୍ୟାଟର୍ପିଲର୍ ଫଙ୍ଗସ କେବଳ ଉଚ୍ଚା ସ୍ଥାନରେ ହିଁ ବଢ଼ିଥାଏ। ଭାରତର ହିମାଳୟ ସହ ନେପାଳ, ଚୀନ୍ ଏବଂ ଭୁଟାନର ଉଚ୍ଚତ୍ତମ ସ୍ଥାନରେ ଏହି ଫଙ୍ଗସ୍ ମିଳିଥାଏ। ବିଶେଷକରି ମାଳଭୂମି ଅଞ୍ଚଳରେ ଦେଖିବାକୁ ମିଳିଥାଏ। ଉତ୍ତରାଖଣ୍ଡର ପିଥୋରଗଡ, ଚାମୋଲି ଏବଂ ବାଗେଶ୍ୱରରେ ଉତ୍ପାଦିତ ହୁଏ। ତେବେ ସେମାନଙ୍କର ଉତ୍ପାଦନ ପଦ୍ଧତି ସମ୍ପୂର୍ଣ୍ଣ ଭିନ୍ନ। ଯେତେବେଳେ ମେ ଏବଂ ଜୁଲାଇ ମଧ୍ୟରେ ପର୍ବତରୁ ବରଫ ତରଳିବା ଆରମ୍ଭ ହୁଏ, ସେତେବେଳେ ସରକାର କିଛି ଲୋକଙ୍କୁ ନିଯୁକ୍ତି ଦିଅନ୍ତି ପାହାଡ଼ ଉପରକୁ ଯାଇ ଫଙ୍ଗସକୁ ସଂଗ୍ରହ କରିବା ପାଇଁ । ଫଙ୍ଗସ ଏତେ ପରିମାଣରେ ହୋଇଥାଏ ଯେ ସେଗୁଡ଼ିକୁ ଏକାଠି କରିବା ପାଇଁ ଦୁଇରୁ ୩ ମାସ ସମୟ ଲାଗିଥାଏ। ଫଙ୍ଗସ ସଂଗ୍ରହ ନସରିବା ପର୍ଯ୍ୟନ୍ତ ଶ୍ରମିକ ମାନେ ସେହି ଉପରେ ହିଁ ରହିଥାନ୍ତି ।

ହେଲେ ଏହି ଫଙ୍ଗସର ଦାମ ଏତେ ଅଧିକ କାହିଁକି ? ଏହାକୁ କେମିତି ବ୍ୟବହାର କରାଯାଏ ? ଏମିତି କିଛି ପ୍ରଶ୍ନ ଆପଣଙ୍କ ମନରେ ଉଠୁଥିବ। ତେବେ ଏହି ଫଙ୍ଗସ୍‌କୁ ସରକାର ଔଷଧରେ ବ୍ୟବହାର କରିଥାନ୍ତି। ଏହି ଔଷଧର ବ୍ୟବହାର ଦ୍ୱାରା ସେକ୍ସ ସମ୍ବନ୍ଧୀୟ ଅନେକ ରୋଗ ଭଲ ହୋଇଥାଏ। ଖାଲି ସେତିକି ନୁହେଁ, ଏହି ଫଙ୍ଗସ ବ୍ୟବହାର ଦ୍ୱାରା ଶରୀରରେ ଅନେକ ରୋଗ ମଧ୍ୟ ଦୂର ହୁଏ। ଏହାର ଦାମ ଏତେ ଅଧିକ ଯେ ଚାଇନାରେ ଏହାକୁ ବ୍ଲାକ୍‌ରେ କିଣି ଘରେ ରାନ୍ଧିଥାନ୍ତି। ଔଷଧ ବଦଳରେ ଫଙ୍ଗସକୁ ରାନ୍ଧି ବିଭିନ୍ନ ପ୍ରକାରର ଖାଦ୍ୟ ପ୍ରସ୍ତୁତ କରିଥାନ୍ତି। ତେବେ କରୋନା ଏବଂ ବିଭିନ୍ନ ପ୍ରକାରର ସୀମା ବିବାଦ ଯୋଗୁଁ ଚୀନ୍ ସହିତ ଫଙ୍ଗସ୍ର ବାଣିଜ୍ୟ ଉପରେ ପ୍ରଭାବ ପକାଇଛି। ସେପଟେ ଯଦି ଦେଖିବା ଗତ ୧୫ ବର୍ଷ ହେବ ପାଣିପାଗର ପରିବର୍ତ୍ତନ କାରଣ ଯୋଗୁଁ କ୍ୟାଟର୍ପିଲର୍ ଫଙ୍ଗସର ଉତ୍ପାଦନ ୩୦ ପ୍ରତିଶତ ପର୍ଯ୍ୟନ୍ତ ହ୍ରାସ ପାଇଛି।

ତେବେ ଏହି ଫଙ୍ଗସ କ’ଣ ଏବଂ କେମିତି ତିଆରି ହୁଏ। କ୍ୟାଟରପିଲର ଫଙ୍ଗସ୍ ହେଉଛି ଏକ ପ୍ରକାର ବଣୁଆ ଛତୁ। ଏକ ନିର୍ଦ୍ଦିଷ୍ଟ ପ୍ରକାରର ବଣୁଆ କୀଟ ମରିବା ପରେ ତାହାରି ଉପରେ ଏହି ଫଙ୍ଗସ ବଢ଼ିଥାଏ । ଏହାର ବୈଜ୍ଞାନିକ ନାମ ହେଉଛି ଓଫିଓକୋର୍ଡିସେପ୍ସ ସାଇନେସିସ୍। ଏହି କ୍ୟାଟର୍ପିଲର ଫଙ୍ଗସ୍ କ୍ୱଚିତ୍ ବହୁତ କମ୍‌ ପରିମାଣରେ ଦେଖାଯାଏ। ସେଥିପାଇଁ IUCN ଏହାକୁ ବିପଦପୂର୍ଣ୍ଣ ପ୍ରଜାତିଗୁଡିକର ତାଲିକାରେ ସାମିଲ କରିଛି। ଗ୍ଲୋବାଲ୍ ୱାର୍ମିଂ ଏବଂ ପାଣିପାଗର ପରିବର୍ତ୍ତନ ଏହାର ଅମଳ ହ୍ରାସ ହେବାର କାରଣ।