spot_img
Home Blog Page 5939

ଗ୍ୟାଙ୍ଗଷ୍ଟରଙ୍କୁ ପ୍ରେମ କରି ଫସିଲେ ଡାକ୍ତରଙ୍କ ଝିଅ, ଜେଲରେ ରହିଲେ ୨ ମାସ

ଅଲବର: ଗ୍ୟାଙ୍ଗଷ୍ଟର ସହ ପ୍ରେମ ପଡ଼ିଲା ମହଙ୍ଗା । ୨ ମାସ ଜେଲରେ ରହିଲେ ଯୁବତୀ । ଏମିତି ଏକ ଅଭାବନୀୟ ଘଟଣା ରାଜସ୍ଥାନର ଅଲବର ଜିଲ୍ଲାରେ ଘଟିଛି । ଜିଆ ସିକଲଗର ନାମକ ଜଣେ ଯୁବତୀ କୁକ୍ଷାତ ଗ୍ୟାଙ୍ଗଷ୍ଟର ବିକ୍ରମ ଉର୍ଫ ପପଲା ଗୁଜ୍ଜରଙ୍କୁ ପ୍ରେମ କରି ଫସିଯାଇଛନ୍ତି । ରାଜସ୍ଥାନ ହାଇକୋର୍ଟରୁ ଜାମିନ ମିଳିବା ପରେ ଜିଆ ବୁଧବାର ସେଣ୍ଟ୍ରାଲ୍ ଜେଲରୁ ବାହାରକୁ ଆସିଛନ୍ତି । ତେବେ ବାହାରକୁ ଆସିବା ପରେ ସେ ବହୁତ କାନ୍ଦିଛନ୍ତି ଏବଂ ଅଭିଯୋଗ କରିଛନ୍ତି ଯେ ପପଲା ଗୁଜ୍ଜର ତାଙ୍କୁ ଧୋକା ଦେଇଛି ।

ଜିଆଙ୍କ କହିବା କଥା ଯେ ବିକ୍ରମ ତାଙ୍କୁ କହିଥିଲେ ଯେ ସେ ଦିଲ୍ଲୀର ଜଣେ ଧନୀ ବିଜନେସ ମ୍ୟାନ୍ । ଲକଡାଉନ ପାଇଁ ରାଜସ୍ଥାନରେ ଫସିଯାଇଛନ୍ତି । ସେ ଆଦୌ ଜାଣିନଥିଲେ ଯେ ସେ ଜଣେ କୁକ୍ଷାତ ଗ୍ୟାଙ୍ଗଷ୍ଟର ବୋଲି। ଅଲବର ପୁଲିସ୍ ପପଲା ଗୁଜ୍ଜର ଓ ଗର୍ଲଫ୍ରେଣ୍ଡ ଜିଆଙ୍କୁ ମହାରାଷ୍ଟ୍ରର କୋହ୍ଲାପୁରରୁ ଗିରଫ କରିଥିଲା । ୭ ଦିନିଆ ରିମାଣ୍ଡ ପରେ ଫେବୃଆରୀ ୪ରେ  ଜିଆଙ୍କୁ ଜେଲ ପଠାଇଦିଆଯାଇଥିଲା ।

ଜିଆଙ୍କ ଓକିଲ ଅଙ୍କିତ ଗର୍ଗଙ୍କ ମୁତାବକ କୋହ୍ଲାପୁରର ଏକ ଜିମରେ ଜିଆ ଟ୍ରେନର ଭାବେ କାମ କରନ୍ତି। ତେବେ ସେହି ଜିମରେ ପପଲା ଗୁଜ୍ଜର ବି ଆସୁଥିଲା । ଓ ନିଜକୁ ବିଜନେସ ମ୍ୟାନର ପରିଚୟ ଦେଇଥିଲା। ପପଲା ନିଜର ନକଲି ଆଧାରକାର୍ଡ଼ ମଧ୍ୟ ବନେଇଛି । ଯେଉଁଥରେ ତା’ର ନାଁ ମାନ ସିଂ ଲେଖାହୋଇଛି। ପପଲା ଜିଆଙ୍କୁ ନିଜର ଜିମ୍ ଖୋଲିବାକୁ ପରାମର୍ଶ ଦେଇଥିଲା । ଏବଂ ଏଥିରେ ସେ ତାଙ୍କୁ ଆର୍ଥିକ ସହଯୋଗ କରିବ ବୋଲି ମଧ୍ୟ କହିଥିଲା । ଏହାପରଠୁ ଦୁହିଁଙ୍କ ମଧ୍ୟରେ କଥାବର୍ତ୍ତା ବଢ଼ିଥିଲା ଓ ପ୍ରେମ ସମ୍ପର୍କ ଗଢ଼ି ଉଠିଥିଲା।

ଜିଆଙ୍କ ପିତା ଚାନ୍ଦ ସିକଲଗର ଜଣେ ଡାକ୍ତର ଓ ମା ହେଉଛନ୍ତି ହାଉସ ୱାଇଫ୍ । ଜିଆଙ୍କର ଜଣେ ସାନ ଭଉଣୀ ବି ଅଛନ୍ତି, ସେ ଏବେ ପଢ଼ୁଛନ୍ତି | ଜିଆ ୨୦୧୪ରେ ଭୋପାଳର ଏକ ନୱାବ ପରିବାରରେ ବିବାହ କରିଥିଲେ। କିନ୍ତୁ ତାଙ୍କ ସ୍ୱାମୀଙ୍କର ଅନ୍ୟ ଝିଅ ସହିତ ସମ୍ପର୍କ ଥିବାରୁ ସେ ତାଙ୍କୁ ଛାଡ଼ପତ୍ର ଦେଇଥିଲେ। ଏବେ ତାଙ୍କ ପରିବାର ହିଁ ତାଙ୍କ ବିବାହ ସ୍ଥିର କରିବେ।

ସୂଚନାଯୋଗ୍ୟ, ପପଲା ଗୁଜ୍ଜରକୁ ଅଲବର ଜିଲ୍ଲାର ବେହେରୋର ପୋଲିସ ସେପ୍ଟେମ୍ବର ୫ରେ ୩୧ ଲକ୍ଷ ୯୦ ହଜାର ଟଙ୍କା ସହ ଗିରଫ କରିଥିଲା। ହେଲେ ପରଦିନ ତାର ଜଣେ ସାଥି ବେହେରୋର ଥାନାରେ ଅଚାନକ ଗୁଳି ବର୍ଷଣ କରି ପପଲାକୁ ହାଜତରୁ ବାହାରକୁ ନେଇଯାଇଥିଲା।

ଆଜି ସନ୍ଧ୍ୟା ସୁଦ୍ଧା ଟିକା ନ ଆସିଲେ ଶନିବାରଠାରୁ ବନ୍ଦ ହେବ ଟିକାକରଣ: ସ୍ୱାସ୍ଥ୍ୟମନ୍ତ୍ରୀ ନବ ଦାସ

ଭୁବନେଶ୍ୱର: ଆଜି ସନ୍ଧ୍ୟା ସୁଦ୍ଧା ଟିକା ନ ଆସିଲେ ଶନିବାରଠାରୁ ବନ୍ଦ ହେବ ଟିକାକରଣ । କେନ୍ଦ୍ରକୁ ଚିଠି ପରେ ବି କୌଣସି ଉତ୍ତର ମିଲୁନଥିବାରୁ ଏପରି ପ୍ରତିକ୍ରିୟା ରଖିଛନ୍ତି ସ୍ୱାସ୍ଥ୍ୟମନ୍ତ୍ରୀ ନବ ଦାସ । ଗତକାଲି କେନ୍ଦ୍ରମନ୍ତ୍ରୀଙ୍କୁ ୨୫ ଲକ୍ଷ ଟିକା ପାଇଁ ସେ ଚିଠି ଲେଖିଛନ୍ତି । ପୂର୍ବର ACSବି ଚିଠି ଲେଖିଥିଲେ । ଦିନକୁ ୨.୫ ଲକ୍ଷ ଟୀକା ଦରକାର । ଓଡ଼ିଶାରେ ମାତ୍ର ୦.୫ ଟିକା ନଷ୍ଟ ହୋଇଛି ।

୧୦ ଦିନରେ ୨୫ ଲକ୍ଷ ଟିକା ଦେବାକୁ ଚିଠିରେ ଉଲ୍ଲେଖ କରାଯାଇଛି । ହେଲେ ଏ ଯାଏ ଟିକା ଆସିନି। ଆଜି ମୁଖ୍ୟମନ୍ତ୍ରୀ ଓ ପ୍ରଧାନମନ୍ତ୍ରୀଙ୍କ ଭିତରେ ଆଲୋଚନା ଅଛି । ଆଶା କରୁଛି ଯେ ମୁଖ୍ୟମନ୍ତ୍ରୀ ଟିକା ପାଇଁ ଦାବି କରିବେ। ପଡୋଶୀ ରାଜ୍ୟରୁ ଆସୁଥିବା ଲୋକଙ୍କ ଆରଟି-ପିସିଆର ଟେଷ୍ଟ ନେଇ ଖୁବଶୀଘ୍ର ନିଷ୍ପତ୍ତି ନିଆଯିବ ବୋଲି ମନ୍ତ୍ରୀ ନବ ଦାସ ସୂଚନା ଦେଇଛନ୍ତି । ୭ ଦିନ ସଂଗରୋଧର ବ୍ୟବସ୍ଥା ବି ହେବ । ପଶ୍ଚିମବଙ୍ଗ ଫେରନ୍ତାଙ୍କର ବି ପରୀକ୍ଷା କରାଯିବ । ଏଯାଏ ବିଶେଷ କଟକଣା ଜାରି ହୋଇନି । ସରକାରୀ ଓ ଘରୋଇ ହସ୍ପିଟାଲ ପ୍ରସ୍ତୁତ ରଖିବାକୁ ଜିଲ୍ଲାପାଳମାନଙ୍କୁ ନିର୍ଦ୍ଦେଶ ଦିଆଯାଇଛି ।

ଫ୍ଲାଇଟରେ ଜନ୍ମ ହୋଇଥିବାରୁ ନବଜାତକୁ ମିଳୁନି ଜନ୍ମ ପ୍ରମାଣପତ୍ର

ଆଜମେର:     ଶିଶୁ ଜନ୍ମ ହେବାମାତ୍ରେ ବର୍ଥ ସାର୍ଟିଫିକେଟ୍‌ବା ଜନ୍ମପ୍ରମାଣ ମିଳିଥାଏ । ଯେଉଁଥିରେ ନବଜାତ ଶିଶୁର ଜନ୍ମସ୍ଥାନ ଉଲ୍ଲେଖ ଥାଏ । କିନ୍ତୁ ଏହା ଶିଶୁ ଜନ୍ମ ହୋଇଥିବା ସ୍ଥାନକୁ ଆଧାର କରି ହୋଇଥାଏ । ଏହା ମଧ୍ୟରେ ସବୁଠାରୁ ବଡ଼ ପ୍ରଶ୍ନ ହେଉଛି ଯଦି ଶିଶୁର ଜନ୍ମ ଫ୍ଲାଇଟ୍‌ମଧ୍ୟରେ ହୋଇଥିବ ତେବେ ନବଜାତକୁ କିଭଳି ଜନ୍ମ ପ୍ରମାଣ ମିଳିବ? ନିକଟରେ ସେହିଭଳି ଏକ ଘଟଣା ସାମ୍ନାକୁ ଆସିଛି, ଯେଉଁଥିରେ ନବଜାତକୁ ୨୨ ଦିନ ବିତି ଯାଇଥିଲେ ମଧ୍ୟ ବର୍ଥ ସାର୍ଟିଫିକେଟ୍‌ଦେବାରେ ବିଳମ୍ବ ହେଉଛି । ଏହାର ଏକମାତ୍ର କାରଣ ହେଉଛି ଶିଶୁଟିର ଜନ୍ମ ଫ୍ଲାଇଟ ଉଡ଼ାଣ ସମୟରେ ହୋଇଛି ।

ଆଜିଠାରୁ ୨୨ ଦିନ ପୂର୍ବେ ୧୭ ମାର୍ଚ୍ଚରେ ଇଣ୍ଡିଗୋ ଫ୍ଲାଇଟରେ ଜନ୍ମ ହୋଇଥିବା ଏକ ନିରୀହ ନବଜାତକୁ ଏପର୍ଯ୍ୟନ୍ତ ଜନ୍ମ ପ୍ରମାଣ ମିଳିନାହିଁ । ସରକାରଙ୍କ ଯନ୍ତ୍ରପାତି ଜାଲରେ ଫସିଥିବା ନବଜାତର ବାପା ଅଧିକ ଶିକ୍ଷିତ ହୋଇନଥିବାରୁ ସରକାରୀ କାର୍ଯ୍ୟାଳୟର ଚକ୍କର କାଟୁଛନ୍ତି । ଏହାକୁ ନେଇ ସେ ସୋସିଅଲ ମିଡିଆରେ ଏକ ଭିଡ଼ିଓ ମଧ୍ୟ ଶେୟାର କରିଛନ୍ତି ଯାହା ଖୁବ୍‌ଭାଇରାଲ ହେଉଛି ।

ଆଜମେର ଜିଲ୍ଲାର ବ୍ୟାଓ୍ୱର ଅଞ୍ଚଳର ଜାଲିୟା ରୂପବାସ ଗାଁର ଭିରୁ ସିଂ ଧର୍ମପତ୍ନିଙ୍କ ସହ ବାଙ୍ଗାଲୋରରେ ରୁହନ୍ତି । ପେଶାରେ ଭିରୁ ଜଣେ ଅଟୋ ଚାଳକ । ଅଚାନକ ଭିରୁଙ୍କ ବାପାଙ୍କ ଶରୀର ଅସୁସ୍ଥ ହେବା ଖବର ପାଇ ଗର୍ଭବତୀ ଥିବା ପତ୍ନି ଲଳିତା ସହ ଗତ ମାର୍ଚ୍ଚ ମାସରେ ଫ୍ଲାଇଟରେ ବାଙ୍ଗାଲୁରୁରୁ ଜୟପୁର ସ୍ଥିତ ଗାଁକୁ ଫେରିବା ବେଳେ ଫ୍ଲାଇଟରେ ଲଳିତା ଏକ ଶିଶୁକୁ ଜନ୍ମ ଦେଇଥିଲେ ।

ଗାଁକୁ ଫେରିବା ପରେ ଜନ୍ମ ପ୍ରମାଣ ବାବଦରେ ସରପଞ୍ଚକୁ ଜଣାଇଥିଲେ ଭୀରୁ । କିନ୍ତୁ ଶିଶୁର ଜନ୍ମ ପ୍ରମାଣ ଜୟପୁରରୁ ମିଳିବ ବୋଲି କହିଥିଲେ ସରପଞ୍ଚ । ଏହାପରେ ବାରମ୍ବାର ଭୀରୁ ନବଜାତର ଜନ୍ମ ପ୍ରମାଣ ପାଇଁ ଜୟପୁର ଏୟାରପୋର୍ଟ ସହିତ ଫୋନ୍‌ମାଧ୍ୟମରେ ଯୋଗାଯୋଗ କରିବାକୁ ଚେଷ୍ଟା କରିଥିଲେ ମଧ୍ୟ ଜୟପୁର ଏୟାରପୋର୍ଟ କର୍ମଚାରୀଙ୍କ ସହ କୌଣସି ଯୋଗାଯୋଗ ହୋଇପାରିଲା ନାହିଁ । ଅନେକ ଚେଷ୍ଟା ପରେ ମଧ୍ୟ ନବଜାତଙ୍କୁ ଏପର୍ଯ୍ୟନ୍ତ ଜନ୍ମ ପ୍ରମାଣ ମିଳିପାରି ନାହିଁ । ଅନ୍ୟପଟେ ଫ୍ଲାଇଟରେ ଲଳିତାଙ୍କ ଡେଲିଭରି କରାଇଥିବା ଡାକ୍ତର ଏହି ମାମଲାରେ ସାହାଯ୍ୟ କରିବେ ବୋଲି ଭିରୁକୁ ପ୍ରତିଶୃତି ଦେଇଛନ୍ତି ।

ତେବେ ନବଜାତର ଜନ୍ମ ପ୍ରମାଣ ପାଇଁ ବାରମ୍ବାର ଚକ୍କର କାଟୁଥିବା ଭିରୁ ଶେଷରେ ସୋସିଅଲ ମିଡିଆରେ ଏକ ଭିଡ଼ିଓ ଶେୟାର ସମସ୍ୟା ଜଣାଇଛନ୍ତି । ଭିରୁଙ୍କ ଏହି ଭିଡ଼ିଓ ସୋସିଅଲ ମିଡିଆରେ ଖୁବ୍‌ଭାଇରାଲ ହେଉଛି ।

ବିଜାପୁରରେ ମାଓ ଆକ୍ରମଣରେ ଆହତ ଯବାନଙ୍କୁ ଭେଟିଲେ ନନ୍ଦିଘୋଷ ଟିଭି ଟିମ୍

ଛତିଶଗଡ଼: ବିଜାପୁରରେ ନନ୍ଦିଘୋଷ ଟିଭି । ଛତିଶଗଡ଼ରେ ମାଓ ଆକ୍ରମଣରେ ଆହତ ଯବାନଙ୍କୁ ଭେଟିଛନ୍ତି ନନ୍ଦିଘୋଷ ପ୍ରତିନିଧି । ମେଡିକାଲରେ ଚିକିତ୍ସାଧୀନ ଯବାନମାନଙ୍କୁ ସ୍ୱାସ୍ଥ୍ୟାବସ୍ଥା ପଚାରି ବୁଝିବା ସହ କେମିତି ଥିଲା ସେଦିନର ଲୋମହର୍ଷକାରୀ ଘଟଣା ତଥ୍ୟ ସଂଗ୍ରହ କରିଛି ନନ୍ଦିଘୋଷ ଟିଭି । ଅନ୍ୟପଟେ ଆଜି ମିଳିବ କି ମାଓବାଦୀଙ୍କ ନିକଟରେ ବନ୍ଧକ ଥିବା ଯବାନଙ୍କୁ ମୁକ୍ତି ? ଆଜି ଘୋଷଣା କରାଯିବ କି ମଧ୍ୟସ୍ଥିଙ୍କ ନାଁ ? ଗତକାଲି ଛତିଶଗଡ଼ ସରକାର ମଧ୍ୟସ୍ଥି ପ୍ରସଙ୍ଗରେ ରାଜ୍ୟ କ୍ୟାବିନେଟ ବୈଠକରେ ଆଲୋଚନା କରିଛନ୍ତି । ମାଓବାଦୀଙ୍କ ସହ କଥାବାର୍ତ୍ତା ପାଇଁ କିଏ କିଏ ମଧ୍ୟସ୍ଥି ହେବେ ସେନେଇ ଖୁବ୍‌ଶୀଘ୍ର ଘୋଷଣା କରାଯିବ ବୋଲି ସୂଚନା ମିଳିଛି ।

ସିଆରପିଏଫ ଡିଜି କୁଲଦୀପ ସିଂହଙ୍କ କହିବା କଥା, ଯବାନଙ୍କୁ ମାଓବାଦୀମାନେ ଅପହରଣ କରି ନେଇଥିବା ବେଳେ ତାଙ୍କୁ ମୁକୁଳାଇବା ପାଇଁ ଯୋଜନା କରାଯାଉଛି । ବିଜାପୁରରେ ମାଓ ହମଲା ବେଳେ ସିଆରପିଏଫ କୋବ୍ରା ବାଟାଲିୟନର ଯବାନ ରାକେଶ୍ବର ସିଂହଙ୍କୁ ଅପହରଣ କରିନେଇଛନ୍ତି ମାଓବାଦୀ । ତେବେ ସେ ସୁରକ୍ଷିତ ଥିବା ଏକ ଫଟୋ ଜାରି କରି କହିଛନ୍ତି ମାଓବାଦୀ ।

ରାକେଶ୍ୱର ଜଙ୍ଗରଗୁଣ୍ଡା ଜଙ୍ଗଲରେ ଥିବା ଜଣାପଡିଛି । ଏଥିସହ ଯବାନ ଥିବା ଅଞ୍ଚଳ ପାହାଡିଆ ବୋଲି ଅନୁମାନ କରାଯାଇଛି । ଯବାନଙ୍କୁ ଛାଡିବା ପାଇଁ ମଧ୍ୟସ୍ଥତା ମାଧ୍ୟମରେ ଆଲୋଚନା କରିବେ ବୋଲି ମାଓବାଦୀମାନେ ଏକ ପ୍ରେସ ରିଲିଜ ଜାରି କରିଥିଲେ । ଏଥିସହ ମଧ୍ୟସ୍ଥିଙ୍କ ନାଁ ମଧ୍ୟ ଘୋଷଣା କରିବାକୁ କହିଥିଲେ । ପୂର୍ବରୁ ହ୍ୱାଟ୍ସଆପରେ ଭିଡିଓ କଲ୍‌ କରି ମଧ୍ୟ ଯବାନ ସୁରକ୍ଷିତ ଥିବା ମାଓବାଦୀ କହିଥିଲେ ।

ଆଉ ଚାରି ଦିନ ବନ୍ଦ ହେଲା ଭୁବନେଶ୍ୱର ସ୍ଥିତ SBI ମୁଖ୍ୟ କାର୍ଯ୍ୟାଳୟ

ଭୁବନେଶ୍ୱର: ଭୁବନେଶ୍ୱର ୟୁନିଟ-୧ ସ୍ଥିତ ଭାରତୀୟ ଷ୍ଟେଟ ବ୍ୟାଙ୍କ ମୁଖ୍ୟ କାର୍ଯ୍ୟାଳୟ ଆଉ ୪ଦିନ ବନ୍ଦ ରହିବ । କାର୍ଯ୍ୟାଳୟରୁ ଅଧିକ ସଂଖ୍ୟକ ସଂକ୍ରମିତ ଚିହ୍ନଟ ପରେ ବିଏମସି ପକ୍ଷରୁ ଏଭଳି ନିଷ୍ପତ୍ତି ନିଆଯାଇଛି । ଭୁବନେଶ୍ୱର ୟୁନିଟ-୧ ସ୍ଥିତ ଭାରତୀୟ ଷ୍ଟେଟ ବ୍ୟାଙ୍କ ମୁଖ୍ୟ କାର୍ଯ୍ୟାଳୟର ଉଭୟ ତଳ ଓ ପ୍ରଥମ ମହଲାକୁ ଆଜିଠୁ ୧୧ତାରିଖ ପର୍ଯ୍ୟନ୍ତ ବନ୍ଦ ରହିବ । ପୂର୍ବରୁ ବ୍ୟାଙ୍କରୁ ଏକାଧିକ ପଜିଟିଭ ଚିହ୍ନଟ ପରେ ଦୁଇ ଦିନ ପାଇଁ ବ୍ୟାଙ୍କକୁ ସିଲ କରିଥିଲା ବିଏମସି । ବିଭିନ୍ନ ପର୍ଯ୍ୟାୟରେ ଟେଷ୍ଟିଂରେ ୨୪ ପଜିଟିଭ ଚିହ୍ନଟ ହୋଇଛନ୍ତି ।

ଅନ୍ୟପଟେ କଟକରେ ଆଜି ସିଏମସି ଏନ୍ଫୋର୍ସମେଣ୍ଟ ଟିମ ପକ୍ଷରୁ ଅରୁନଦୟ ନଗରରେ ଥିବା ମହେନ୍ଦ୍ର କୋଚିଂ ସେଣ୍ଟରକୁ ସିଲ କରାଯାଇଛି । କୋଚିଂ ସେଣ୍ଟରରେ ସାମାଜିକ ଦୂରତା ଓ ମାକ୍ସ ପିନ୍ଧିବାର ନିୟମକୁ ଉଲଙ୍ଘନ କରାଯାଇଥିଲା । ବହୁ ସଂଖ୍ୟାରେ ବିଦ୍ୟାର୍ଥୀ ପାଠ ପଢୁଥିଲେ ।

ଶିକ୍ଷକ ବା ବିଦ୍ୟାର୍ଥୀ କେହି ନିୟମ ପ୍ରତି ସଚେତନ ନଥିବା ଦେଖିବାକୁ ମିଳିଥିଲା । ତେଣୁ କୋଚିଂ ସେଣ୍ଟର ସିଲ କରାଗଲା ବୋଲି ସିଏମସି ଡେପୁଟି କମିଶନର ଅବିନାଶ ରାଉତ ସୂଚନା ଦେଇଛନ୍ତି । ଆଗକୁ ମଧ୍ୟ ସଚେତନତା ଓ ଚଢ଼ାଉ ଉଭୟ ଜାରି ରହିବ ।

ଆଧୁନିକ ଅସ୍ତ୍ରଶସ୍ତ୍ର ରଖୁଥିବା ନକ୍ସଲ କେଉଁଠୁ ଆଣନ୍ତି ଟଙ୍କା?

ନୂଆଦିଲ୍ଲୀ:   ଛତିଶଗଡ଼ରେ ସୁରକ୍ଷାବାହିନୀ ଉପରେ ବଡ଼ ଧରଣର ଆକ୍ରମଣ ପରେ ନକ୍ସଲମାନେ ପୁଣି ଚର୍ଚ୍ଚାକୁ ଆସିଛନ୍ତି । ଥରେ ନୁହେଁ କି ଦୁଇ ଥର ନୁହେଁ ବରଂ ବାରମ୍ବାର ଏଭଳି ଆକ୍ରମଣ କରୁଥିବା ନକ୍ସଲଙ୍କୁ ନେଇ ଚର୍ଚ୍ଚା ତ ହୁଏ କିନ୍ତୁ ଅଧିକ ଚର୍ଚ୍ଚା ହୁଏ ସେମାନଙ୍କ ଫଣ୍ଡିଂକୁ ନେଇ । ସବୁଠାରୁ ବଡ଼ ପ୍ରଶ୍ନ ହେଉଛି ସୁରକ୍ଷା ବାହିନୀ ସହିତ ଲଢିବା ପାଇଁ ଆଧୁନିକ ଅସ୍ତ୍ରଶସ୍ତ୍ର ରଖୁଥିବା ନକ୍ସଲଙ୍କ ନିକଟରେ ଏତେ ଫଣ୍ଡ୍ ଆସେ କେଉଁଠୁ? ଏହି ପ୍ରଶ୍ନର ଉତ୍ତର ହୁଏତ ନାହିଁ । କିନ୍ତୁ ଏହାର ଏକାଧିକ ଦିଗ ରହିଛି । ଖାଲି ସେତିକି ନୁହେଁ ବରଂ ସମସ୍ତେ ଏହା ଜାଣିବା ପାଇଁ ଚାହାଁନ୍ତିଯେ, ନକ୍ସଲମାନେ ଟଙ୍କା କେଉଁଠୁ ଆଣନ୍ତି ଏବଂ ଏହାକୁ ଖର୍ଚ୍ଚ କିଭଳି କରନ୍ତି? ସେମାନେ କ’ଣ ନିବେଶ ପାଇଁ ଆଗ୍ରହୀ? ତେବେ ନକ୍ସଲଙ୍କ ଆର୍ଥିକ ସଙ୍କଟ କ’ଣ ?

ନକ୍ସଲଙ୍କ ଫଣ୍ଡିଂ ବିଷୟରେ ଆଲୋଚନା କଲେ ଶିଳ୍ପକ୍ଷେତ୍ରରୁ ଜବରଦସ୍ତି ବଟି ଆଦାୟ ଘଟଣା ସାମ୍ନାକୁ ଆସେ । ଝାଡ଼ଖଣ୍ଡ ଏବଂ ବିହାରରୁ ଗତ ଏକ ଦଶକ ମଧ୍ୟରେ ମାଓବାଦୀ ସଙ୍ଗଠନର କିଛି ସଦସ୍ୟଙ୍କୁ ଗିରଫ କରିବା ପରେ ଏହି କଥା ବାରମ୍ବାର କୁହାଯାଇଛିଯେ, ମାଓବାଦୀ ପ୍ରଭାବିତ ଅଞ୍ଚଳରେ କର୍ପୋରେଟ୍ ବିଜନେସ କରୁଥିବା ବ୍ୟକ୍ତିଙ୍କ ଠାରୁ ମାଓବାଦୀ ସଙ୍ଗଠନ ଜବରଦସ୍ତି ବଡ଼ ରକମର ଫଣ୍ଡ୍ ଆଦାୟ କରିଥାନ୍ତି ।

 

ଅନ୍ୟପଟେ କର୍ପୋରେଟ୍ ଠାରୁ ଅଧିକ ବଟି ଆଦାୟ ହୋଇଥାଏ ମାଇନିଙ୍ଗ ବା ଖଣିରୁ। ନକ୍ସଲ ପ୍ରଭାବିତ ଅଞ୍ଚଳରେ ନକ୍ସଲଙ୍କୁ ବଟି ନ ଦେଲେ ବାଣିଜ୍ୟ କାରବାରରେ ବାଧା ସୃଷ୍ଟି ହୋଇଥାଏ । ଏଭଳି ଅଞ୍ଚଳରେ ଏମାନଙ୍କ ଆଧିପତ୍ୟ ଯଥେଷ୍ଟ ଅଧିକ । ଅବୈଧ ଖନନରେ ମଧ୍ୟ ନକ୍ସଲ ମାନଙ୍କର ଏକ ବିଶେଷ ଭୂମିକା ରହିଛି । ମାର୍ଚ୍ଚ ୨୦୧୦ କେନ୍ଦ୍ର ଖଣିମନ୍ତ୍ରୀ ହାଣ୍ଡିକ ଦେଇଥିବା ବୟାନ ଅନୁସାରେ ଛତିଶଗଡ଼, ଝାଡ଼ଖଣ୍ଡ ଏବଂ ଓଡ଼ିଶାର ନକ୍ସଲ ପ୍ରଭାବିତ ଅଞ୍ଚଳରେ ଏକ ଲକ୍ଷ ୬୧ ହଜାର ୪୦ ଅବୈଧ ମାଇନ୍ସ ରହିଛି ।

ରିପୋର୍ଟ କହୁଛି ୨୦୧୮ ଶେଷ ବେଳକୁ ନ୍ୟାସନାଲ ଇନଭେଷ୍ଟିଗେସନ ଏଜେନ୍ସି ଏନଆଇଏ ଏକ ବଡ଼ ଖୁଲାସା କରିଥିଲା । ଏହି ରିପୋର୍ଟ ଅନୁସାରେ ନକ୍ସଲମାନେ କେବଳ କର୍ପୋରେଟ୍ ବିଜନେସମ୍ୟାନ ବା ମାଇନିଙ୍ଗ୍ ରୁ ନୁହେଁ ବରଂ ନିଜ ଅଞ୍ଚଳର ଲୋକଙ୍କ ଠାରୁ ମଧ୍ୟ ଜୋର ଜବରଦସ୍ତି ବଟି ଆଦାୟ କରିଥାନ୍ତି । ଖାଲି ସେତିକି ନୁହେଁ ବରଂ ଏମାନେ ଅପରେଟିଭ୍ ସୋସାଇଟି ଏବଂ ମ୍ୟୁଚୁଆଲ ଫଣ୍ଡସରେ ମଧ୍ୟ ପୁଞ୍ଜିନିବେଶ କରନ୍ତି । ଏନଆଇଏ ଅନୁସାରେ ଗିରଫ ହୋଇଥିବା ଏକ ମାଓବାଦୀ ଠାରୁ ୧୨ ଲକ୍ଷ ଟଙ୍କାର ପଣ୍ଡ୍ସ ମିଳିଥିଲା ।

 

ନକ୍ସଲଙ୍କ ଫଣ୍ଡିଂର ଆଉ ଏକ ଉତ୍ସ ହେଉଛି ପାକିସ୍ତାନ ଏବଂ ଆତଙ୍କବାଦୀ ସଙ୍ଗଠନ । ବିବେକାନନ୍ଦ ଇଣ୍ଟରନ୍ୟାସନାଲ ସୋସାଇଟି ଦ୍ୱାରା ହୋଇଥିବା ଏକ ଅଧ୍ୟୟନ ଅନୁସାରେ ମାଓବାଦୀଙ୍କ ଲିଙ୍କ୍ ପାକିସ୍ତାନର ଆଇଏସଆଇ ଏବଂ ଅଣ୍ଡରଓ୍ୱର୍ଲଡ ନେତାଙ୍କ ସହିତ ରହିଛି । ଅଧ୍ୟୟନ ଏହା ମଧ୍ୟ କହୁଛିଯେ, ମାଓବାଦୀଙ୍କ ଫଣ୍ଡିଂର ଆଉ ଏକ ସୋର୍ସ ହେଉଛି ବ୍ଲାକମେଲିଂ ଏବଂ ରବରୀ । ତେବେ ଏହି ଫଣ୍ଡ୍ କୁ ଅସ୍ତ୍ରଶସ୍ତ୍ର କିଣିବା ଓ ଆନ୍ଦୋଳନ ପାଇଁ ବ୍ୟବହାର କରୁଥିବା ମାଓବାଦୀଙ୍କ ସ୍ଥିତି ପୂର୍ବାପେକ୍ଷା ଦୁର୍ବଳ ହୋଇପଡ଼ିଛି ।

ନିର୍ବାଚନୀ ପ୍ରଚାରରେ ମାସ୍କ କାହିଁକି ବାଧ୍ୟତାମୁଳକ ନୁହେଁ ? ପଚାରିଲେ ଦିଲ୍ଲୀ ହାଇକୋର୍ଟ

ନୂଆଦିଲ୍ଲୀ: ପଶ୍ଚିମବଙ୍ଗ ସମେତ ତାମିଲନାଡୁ,କେରଳ ଓ ଆସାମରେ ହାଇଭୋଲଟାଜ୍ ନିର୍ବାଚନୀ ଡ୍ରାମା ଚାଲିଛି । ସବୁ ଦଳର ବଡ଼ବ଼ଡ଼ ନେତା ପ୍ରଚାର ମୈଦାନରେ ଅଛନ୍ତି । କିନ୍ତୁ ପ୍ରଚାର କାଳରେ ଗୋଟିଏ ବ୍ୟତିକ୍ରମ ଦେଖିବାକୁ ମିଳୁଛି । ନା ନେତା ପିନ୍ଧୁଛନ୍ତି ମାସ୍କ ନା କର୍ମୀ । କରୋନା ଗାଇଡ୍ ଲାଇନ୍ ମାନିବାକୁ କେନ୍ଦ୍ର ଓ ରାଜ୍ୟ ସରକାର ନିବେଦନ କରୁଛନ୍ତି । ଦଣ୍ଡ ଓ ତଣ୍ଡ କଥା କହି ଡରାଉଛନ୍ତି କିନ୍ତୁ ପ୍ରଚାର କଥା ଆସିବା ବେଳକୁ ଖୋଦ ନେତା ଏହାକୁ ଭୁଲି ଯାଉଛନ୍ତି । ନେତାଙ୍କଠାରୁ ବଳକା କର୍ମୀ । ନା ରହୁଛି ସାମାଜିକ ଦୂରତା ନା ପିନ୍ଧୁଛନ୍ତି ମାସ୍କ । ଏମିତିରେ ଅନେକ ଲୋକ ପ୍ରଶ୍ନ କରୁଛନ୍ତି ଯେ, ଭୋଟ୍ ପ୍ରଚାର ବେଳେ କ’ଣ କରୋନା ସଂକ୍ରମଣ ହେଉନାହିଁ ? ନିର୍ବାଚନ ପ୍ରଚାର ବେଳେ ମାସ୍କ ପିନ୍ଧିବାକୁ ବାଧ୍ୟତାମୁଳକ କରିବା ପାଇଁ ଦିଲ୍ଲୀ ହାଇକୋର୍ଟରେ ଦାଏର ଏକ ଆବେଦନ ଉପରେ ଶୁଣାଣି କରି ଗୁରୁବାର ଦିନ ହାଇକୋର୍ଟ କେନ୍ଦ୍ର ସରକାରଙ୍କୁ ନୋଟିସ ଜାରି କରିଛନ୍ତି । ଏହା ସହ ଏହି ପ୍ରସଙ୍ଗକୁ ନେଇ କେନ୍ଦ୍ର ସରକାରଙ୍କ ଆଭିମୁଖ୍ୟ କ’ଣ ତାହା ଜାଣିବାକୁ ହାଇକୋର୍ଟ ଚାହିଁଛନ୍ତି ।

ସୂଚନାଯୋଗ୍ୟ ଯେ, ଦେଶରେ କରୋନା ସଂକ୍ରମଣ ବୃଦ୍ଧିକୁ ନେଇ ଦିଲ୍ଲୀ ହାଇକୋର୍ଟ ବୁଧବାର ଦିନ ଉଦବେଗ ପ୍ରକାଶ କରିଥିଲେ । ବୁଧବାର ଏକା ରାୟ ଦେଇ ହାଇକୋର୍ଟ କହିଥିଲେ ଯେ ,କାରରେ ଡ୍ରାଇଭର ଏକାକୀ ଥିଲେ ମଧ୍ୟ ତାଙ୍କ ପାଇଁ ମାସ୍କ ବାଧ୍ୟତାମୁଳକ ହେବ । ହାଇକୋର୍ଟଙ୍କ ଏହି ରାୟ ପରଠାରୁ ନିର୍ବାଚନୀ ରାଲିରେ ମାସ୍କ ଅନିବାର୍ଯ୍ୟ କରିବାକୁ ନେଇ ମଧ୍ୟ ପ୍ରଶ୍ନ ଉଠୁଥିଲା । ଅନେକ ପ୍ରଶ୍ନ କରୁଥିଲେ ଯେ, ନିର୍ବାଚନୀ ରାଲି ଗୁଡିକରେ ନେତାଙ୍କଠାରୁ କର୍ମୀ କ’ଣ ପାଇଁ ମାସ୍କ ପିନ୍ଧୁ ନାହାନ୍ତି କିମ୍ବା ସୋସିଆଲ ଡିଷ୍ଟାନ୍ସିଂ ନିୟମକୁ ମାନୁ ନାହାନ୍ତି ।

ନିର୍ବାଚନୀ ରାଲିରେ ମାସ୍କ୍ ପିନ୍ଧିବାକୁ ଅନିବାର୍ଯ୍ୟ କରିବାକୁ ଦିଲ୍ଲୀ ହାଇକୋର୍ଟରେ ଏକ ଜନହିତ ମାମଲା ଦାଏର ହୋଇଥିଲା । ପିଟିସନରେ ଆବେଦନକାରୀ ନିର୍ବାଚନୀ ସଭାରେ ମାସ୍କକୁ ବାଧ୍ୟତାମୁଳକ କରିବାକୁ ନିବେଦନ କରିଥିଲେ । ଏହା ଉପରେ ଶୁଣାଣି କରି ହାଇକୋର୍ଟ କେନ୍ଦ୍ର ସରକାର ଓ ନିର୍ବାଚନ କମିଶନଙ୍କୁ ନୋଟିସ ଜାରି କରିଛନ୍ତି । ନିର୍ବାଚନୀ ରାଲିରେ କରୋନା ସଂକ୍ରମଣର କେତେ ଆଶଙ୍କା ରହିଛି ଓ ଏହି ସବୁ ରାଲିରେ ମାସ୍କକୁ ଅନିବାର୍ଯ୍ୟ କରାଯିବ କି ନାହିଁ ଏନେଇ ହାଇକୋର୍ଟ କେନ୍ଦ୍ର ଓ ନିର୍ବାଚନ କମିଶନଙ୍କୁ ପଚାରିଛନ୍ତି ।

IPL 2021: ବିମାନବନ୍ଦରରେ ପୃଥକ ଚେକ୍ ଇନ୍ କାଉଣ୍ଟର ପାଇଁ ସରକାରଙ୍କୁ ଅନୁରୋଧ କରିବ ବିସିସିଆଇ

0

ନୂଆଦିଲ୍ଲୀ: ଆସନ୍ତାକାଲିଠାରୁ ଜମିବ ଫଟାଫଟ୍ କ୍ରିକେଟ । ଏପ୍ରିଲ ୯ ତାରିଖରୁ ଆରମ୍ଭ ହେବାକୁ ଯାଉଛି ଇଣ୍ଡିଆନ ପ୍ରିମିୟର ଲିଗ୍ । ଏତିକି ବେଳେ କରୋନା କାୟାରେ ରହିଛି ପୁରା ଆଇପିଏଲ୍‌ । କିଛି ଖେଳାଳିଙ୍କ ସମେତ, ଫ୍ରାଞ୍ଚାଇଜ୍ କର୍ମଚାରୀ, ପ୍ରସାରଣକାରୀ ଏବଂ ଟୁର୍ଣ୍ଣାମେଣ୍ଟ ସହିତ ଜଡ଼ିତ ଅନ୍ୟ କେତେଜଣ ମଧ୍ୟ କରୋନାରେ ସଂକ୍ରମିତ ହୋଇସାରିଲେଣଇ । ଯାହାକି ଏବେ ବିସିସିଆଇକୁ ଚିନ୍ତାରେ ପକାଇଛି। କରୋନା ପାଇଁ ଏଥର ଟୁର୍ଣ୍ଣାମେଣ୍ଟ ଶେଷ ପର୍ଯ୍ୟନ୍ତ, ସବୁ ଆଇପିଏଲ୍ ଦଳ, ସହଯୋଗୀ ଷ୍ଟାଫ୍ ଏବଂ ଅନ୍ୟାନ୍ୟ ଶେଆର ହୋଲ୍ଡରମାନେ ବାୟୋ-ବବଲରେ ରହିବେ। ଏଥର ପଡ଼ିଆରେ ବି କୌଣସି ଦର୍ଶକ ରହିବେ ନାହିଁ। କିନ୍ତୁ ମ୍ୟାଚ୍ ଆରମ୍ଭ ହେବା ପୂର୍ବରୁ କରୋନା ପରିସ୍ଥିତି ଜଟିଳ କରିଦେଲାଣି ।

କରୋନା ଭାଇରସ ସହ ମୁକାବିଲା କରିବା ପାଇଁ ବିସିସିଆଇର ବରିଷ୍ଠ ଅଧିକାରୀମାନେ ନୂଆ ଯୋଜନା ପ୍ରସ୍ତୁତ କରୁଛନ୍ତି । ତେବେ ଏହି ନୂଆ ପଦକ୍ଷେପଗୁଡ଼ିକ ମଧ୍ୟରେ ବିମାନବନ୍ଦରରେ ପୃଥକ ଚେକ୍ ଇନ୍ କାଉଣ୍ଟର ବ୍ୟତୀତ ଦୈନିକ କରୋନା ପରୀକ୍ଷା ଏବଂ ବାୟୋ-ବବୁଲ୍ ଇଣ୍ଟିଗ୍ରିଟି ପରିଚାଳକଙ୍କ ନିଯୁକ୍ତି ମଧ୍ୟ ସାମିଲ ରହିଛି। ଆଇପିଏଲ୍ 2021ର ମ୍ୟାଚ୍ ମୁମ୍ବାଇ, ଦିଲ୍ଲୀ, କୋଲକାତା, ଅହମ୍ମଦାବାଦ, ବେଙ୍ଗାଲୁରୁ ଏବଂ ଚେନ୍ନାଇର ୬ ଟି ସହରରେ ହେବ। ଖେଳାଳୀମାନଙ୍କୁ ଗୋଟିଏ ସ୍ଥାନରୁ ଅନ୍ୟ ସ୍ଥାନକୁ ବିମାନ ଯାତ୍ରା କରିବାକୁ ପଡ଼ିବ। ପ୍ରତ୍ୟେକ ଦଳକୁ ୩ ଥର ଲେଖାଏଁ ଯାତ୍ରା କରିବାକୁ ପଡ଼ିବ । ତେବେ ବିମାନବନ୍ଦରରେ ଏମାନେ ଅନ୍ୟ ଲୋକମାନଙ୍କ ସଂସ୍ପର୍ଷରେ ଆସିଲେ କରୋନା ହେବାର ଭୟ ରହିଛି । ବିଶେଷ କରି ମୁମ୍ବାଇ ଓ ଦିଲ୍ଲୀ ଏୟାରପୋର୍ଟରେ ଏହାର ଅଧିକ ଭୟ ରହିଛି। ତେଣୁ ବିସିସିଆଇ ଭାରତ ସରକାରଙ୍କୁ ଏହି ୬ ସହରର ବିମାନବନ୍ଦରରେ ଆଇପିଏଲ୍ ପାଇଁ ପୃଥକ ଚେକ୍ ଇନ୍ କାଉଣ୍ଟରର ଅନୁମତି ଦେବାକୁ ଅନୁରୋଧ କରିବାକୁ ଯାଉଛି । ଯାହା ଦ୍ୱାରା ଦଳଗୁଡ଼ିକ ଏକ ସୁରକ୍ଷିତ ବାୟୋ-ବବଲ୍ ପାଇପାରିବେ।

ଏହା ବ୍ୟତୀତ ବାୟୋ-ବବଲକୁ ଅଧିକ ସୁରକ୍ଷିତ କରିବା ପାଇଁ ବିସିସିଆଇ ଅଧିକ କୋଭିଡ-19 ପରୀକ୍ଷା ଉପରେ ଗୁରୁତ୍ୱ ଦେଇଛି। ନିକଟରେ ଚେନ୍ନାଇକୁ ଉଡ଼ାଣ ପୂର୍ବରୁ କୋଭିଡ-19 ପରୀକ୍ଷଣରେ ଜଣେ ସଦସ୍ୟ କୋଭିଡ ରିପୋର୍ଟ ନେଗେଟିଭ୍ ବୋଲି ଜଣାପଡ଼ିଥିଲା କିନ୍ତୁ ୫ ଦିନ ପରେ ସେ କରୋନା ସଂକ୍ରମିତ ଥିବା ଜଣାପଡ଼ିଲା। ଏଥିରୁ ଜଣାପଡ଼ୁଛି ଯେ ବିମାନଯାତ୍ରା ସମୟରେ କରୋନା ହେବାର ଅଧିକ ଆଶଙ୍କା ରହିଛି । ତେଣୁ, ବିସିସିଆଇ ପୃଥକ ଚେକ୍ ଇନ୍ କାଉଣ୍ଟର ଚାହୁଁଛି।

ସଂକ୍ରମଣ ବୃଦ୍ଧି ପରେ BMC ସଜାଗ: ସମ ହସ୍ପିଟାଲରେ ଶଯ୍ୟା ସଂଖ୍ୟା ୧୫୦ ରୁ ୨୫୦କୁ ବୃଦ୍ଧି

ଭୁବନେଶ୍ୱର: ରାଜ୍ୟରେ କରୋନା ସଂକ୍ରମଣ ବୃଦ୍ଧି ପରେ ସଜାଗ ରହିଛି ଭୁବନେଶ୍ୱର ମହାନଗର ନିଗମ- ବିଏମସି । ବିଏମସି ଏନଫୋର୍ସମେଣ୍ଟ ଟିମ୍ ଓ କମିଶନରେଟ ପୋଲିସ ମିଳିତ ଭାବେ ମହାମାରୀ ବିରୋଧରେ ଯୁଦ୍ଧ ଜାରି ରଖିଛନ୍ତି । ରାଜ୍ୟରେ ନବମ ଓ ଏକାଦଶ ଶ୍ରେଣୀ ପାଠପଢ଼ା ବନ୍ଦ ପାଇଁ ସରକାରଙ୍କ ଘୋଷଣା ପରେ ଆବାସିକ ଶିକ୍ଷାଅନୁଷ୍ଠାନର ଛାତ୍ରଛାତ୍ରୀଙ୍କୁ ହଷ୍ଟେଲ ଛାଡିବାକୁ ନିର୍ଦେଶ ଦିଆଯାଇଛି ।

ଅଧିକାଂଶ ଶିକ୍ଷାନୁଷ୍ଠାନରେ ପରୀକ୍ଷା ଶେଷ ହୋଇଛି, ଏଣୁ ତୁରନ୍ତ ନିର୍ଦ୍ଦେଶ କାର୍ଯ୍ୟକାରୀ କରିବାକୁ କୁହାଯାଇଛି । ସରକାରୀ ଶିକ୍ଷାନୁଷ୍ଠାନଗୁଡିକରେ ମଧ୍ୟ ନିର୍ଦେଶ ଅନୁପାଳନ କରିବାକୁ କୁହାଯାଇଛି । ସେପଟେ ସରକାରୀ କାର୍ଯ୍ୟାଳୟରେ ସର୍ବସାଧାରଣଙ୍କ ପ୍ରବେଶ ଉପରେ ଲାଗିଛି କଟକଣା ଭୁବନେଶ୍ୱରରେ ଥିବା ଏକମାତ୍ର କୋଭିଡ ହସ୍ପିଟାଲ ସମ ହସ୍ପିଟାଲରେ ଶଯ୍ୟା ସଂଖ୍ୟା ୧୫୦ ରୁ ୨୫୦ କୁ ବୃଦ୍ଧି କରାଯାଇଛି।

ପୂର୍ବରୁ ଯେଉଁ ହସ୍ପିଟାଲଗୁଡିକ ସହ ଚୁକ୍ତିନାମା ସ୍ୱାକ୍ଷରିତ ହୋଇଥିଲା ସେମାନଙ୍କୁ ଆବଶ୍ୟକ ସ୍ଥଳେ ପୁଣିଥରେ ନିୟୋଜିତ କରାଯିବ । ବର୍ତ୍ତମାନ ଲାକଡାଉନ ଓ ସଟଡାଉନ କଥା ଚିନ୍ତା ନକରି ଏନଫୋର୍ସମେଣ୍ଟ, ମାଇକ୍ରୋ କଣ୍ଟେନମେଣ୍ଟ ଜନ୍‌ ଓ ସଚେତନତା ଉପରେ ଗୁରୁତ୍ୱ ଦିଆଯାଉଥିବା ବିଏମସି କମିଶନର ପ୍ରେମଚନ୍ଦ୍ର ଚୌଧୁରୀ କହିଛନ୍ତି ।

ଲକଡାଉନର ପଦଧ୍ୱନୀ: ଦିଲ୍ଲୀରୁ ଘରକୁ ଫେରୁଛନ୍ତି ପ୍ରବାସୀ ଶ୍ରମିକ

ନୂଆଦିଲ୍ଲୀ: କରୋନାର ଦ୍ୱିତୀୟ ପର୍ଯ୍ୟାୟ ଆକ୍ରମଣ ଆରମ୍ଭ ହୋଇ ସାରିଛି । ଗୁଜୁରାଟ, ମହାରାଷ୍ଟ୍ର ଓ ପଂଜାବରେ କରୋନା କରାଳ ରୂପ ନେଲାଣି । ଛତିଶଗଡ ରାଜଧାନୀ ରାୟପୁରରେ ୧୧ ଦିନିଆ ଲକଡାଉନ୍ ଆରମ୍ଭ ହୋଇସାରିଲାଣି । ଏହାରି ଭିତରେ ଦିଲ୍ଲୀ ଓ ମୁମ୍ବାଇ ଭଳି ସ୍ଥାନରେ କଡା କଟକଣା ଭିତରେ ପୁଣି ଥରେ ଲକଡାଉନର ସ୍ମୃତି ତାଜା ହୋଇଛି । ଗତବର୍ଷର ଲକଡାଉନ୍ ପୁଣି ପ୍ରବାସୀ ଶ୍ରମିକଙ୍କୁ ଡରାଇବାକୁ ଲାଗିଲାଣି ।
ଲକଡାଉନର ଡର ଏତେ ଯେ, ପ୍ରବାସୀ ଶ୍ରମିକ ନିଜ ଘରକୁ ଫେରିବା ଆରମ୍ଭ କଲେଣି । ଦିଲ୍ଲୀ ଓ ପୁଣେରେ କଟକଣା ବଢିବା ପ୍ରବାସୀ ଶ୍ରମିକଙ୍କୁ ଡରାଇ ଦେଇଛି । ସେମାନଙ୍କୁ ଲାଗୁଛି ଯେ, ସ୍ଥିତି ଅଧିକା ବିଗିଡିଲେ ଯେକୌଣସି ସମୟରେ ଲକଡାଉନ୍ ଲାଗିପାରେ । ଏମିତିରେ ଗତବର୍ଷର ଭୟଙ୍କର ଅନୂଭବ ସେମାନଙ୍କୁ ଆଗୁଆ ନିଜ ନିଜ ରାଜ୍ୟକୁ ଫେରିବାକୁ ବାଧ୍ୟ କରୁଛି ।

( ଆନନ୍ଦ ବିହାର ଟର୍ମିନାଲରେ ବିହାରୀ ଶ୍ରମିକ)

ଦିଲ୍ଲୀର ଆନନ୍ଦ ବିହାର ଟର୍ମିନାଲରେ ଏବେ ବିହାରି ଶ୍ରମିକଙ୍କ ଭିଡ ଜମୁଛି । ଏହି ଶ୍ରମିକ ନିଜ ରାଜ୍ୟକୁ ଫେରିବାକୁ ଏଠାରେ ଏକାଠି ହେଉଛନ୍ତି । ସେମାନଙ୍କ କହିବା ହେଉଛି ଗତବର୍ଷର ଲକଡାଉନ୍ କାଳରେ ସେମାନେ ଦିଲ୍ଲୀରେ ଫସିଯାଇଥିଲେ । ତେଣୁ ଏଥର ଆଗୁଆ ସେମାନେ ବିହାର ଯାଉଛନ୍ତି । ଲକଡାଉନ୍ ଯଦି ହୁଏ ତେବେ ଗତ ବର୍ଷ ଭଳି ସେମାନଙ୍କୁ ଖାଦ୍ୟ ପାଇଁ ହଇରାଣ ହରକତ ହେବାକୁ ପଡିପାରେ । ସୂଚନାଯୋଗ୍ୟ ଯେ, ଦିଲ୍ଲୀରେ କରୋନାକୁ ଦୃଷ୍ଟିରେ ରଖି ପୁଣି ନାଇଟ୍ କର୍ଫ୍ୟୁ ଲାଗୁ ହୋଇଛି । ଏହା ସହିତ ଅନ୍ୟାନ୍ୟ କଟକଣା ମଧ୍ୟ ଲାଗୁ ହୋଇଛି । ଏମିତିରେ ଶ୍ରମିକଙ୍କ ଆଶଙ୍କା ଯେ, ପୁଣି ଲକଡାଉନ୍ ଲାଗୁ ହୋଇପାରେ ।

ଦିଲ୍ଲୀ, ମହାରାଷ୍ଟ୍ର, ଛତିଶଗଡ,ପଂଜାବ ଭଳି ରାଜ୍ୟରେ ନାଇଟ୍ କର୍ଫ୍ୟୁ ପୁଣି ଆରମ୍ଭ ହୋଇଛି । ମହାରାଷ୍ଟ୍ରର ପୁଣା,ମୁମ୍ବାଇ ଭଳି ସହରରେ କଠୋର କଟକଣା ଲାଗୁ ହୋଇଛି । ମହାରାଷ୍ଟ୍ରର ଗୋଟିଏ ଦୁଇଟି ଜିଲ୍ଲାରେ ଲକଡାଉନ୍ ଲାଗୁ ହୋଇଥିବା ବେଳେ ଛତିଶଗଡର ରାଜଧାନୀ ରାୟପୁରରେ ୧୧ ଦିନିଆ ଲକଡାଉନ୍ ବୁଧବାରଠାରୁ ଆରମ୍ଭ ହୋଇଛି ।

ଗୁଜୁରାଟ ଭଳି ରାଜ୍ୟରେ ହସ୍ପିଟାଲରେ କରୋନା ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଇବାରୁ ହୋଟେଲକୁ ଭଡାରେ ନିଆଯାଇଛି । ଏମିତିରେ ଲକଡାଉନ୍ ଆଶଙ୍କ ବଢିଛି । ଗତବର୍ଷ ଯେଉଁଭଳି ଭାବେ ହଠାତ ଲକଡାଉନ୍ ଘୋଷଣା କରାଯାଇଥିଲା ତାହା ଦ୍ୱାରା ଲକ୍ଷ ଲକ୍ଷ ସଂଖ୍ୟାରେ ପ୍ରବାସୀ ଶ୍ରମିକ ପ୍ରଭାବିତ ହୋଇଥିଲେ । ତେଣୁ ଏବେ ଏହି ପ୍ରବାସୀ ଶ୍ରମିକ ମହାରାଷ୍ଟ୍ର ଓ ଦିଲ୍ଲୀ ଭଳି ରାଜ୍ୟରୁ ପଳାୟନ ଆରମ୍ଭ କଲେଣି ।