ନନ୍ଦିଘୋଷ ବ୍ୟୁରୋ : ଟାରିଫ ହ୍ରାସ ପରେ ଭାରତ-ଆମେରିକା ମଧ୍ୟରେ ପ୍ରତିରକ୍ଷାର ନୂଆ ସମ୍ପର୍କ । ଖୁବ୍ ଶୀଘ୍ର ଦୁଇ ଦେଶ ମଧ୍ୟରେ ହେବ 3 ବିଲିୟନ ଡଲାରର ପ୍ରତିରକ୍ଷା ଡିଲ ।ଆମେରିକାଠାରୁ ଭାରତ କିଣିବ 6ଟି P-8I ବୁଡ଼ାଜାହାଜ ବିଧ୍ବଂସୀ ତଥା ସାମୁଦ୍ରିକ ସର୍ଭେଲାନ୍ସ ଏୟାରକ୍ରାଫ୍ଟ । ଏହି ବିମାନ ଜରିଆରେ ଭାରତ ନିଜର ସାମୁଦ୍ରିକ ସୁରକ୍ଷା କରିବା ସହ ନୌସେନାକୁ ଶକ୍ତିଶାଳୀ କରିପାରିବ । ଦେଶର ବିଶାଳ ସାମୁଦ୍ରିକ ଅଞ୍ଚଳରେ ଦିନକୁ ଦିନ ନିରାପତ୍ତା ବିପନ୍ନ ହେଉଥିବା ଯୋଗୁ ଭାରତ ଏହି ବିମାନ କ୍ରୟ ଲାଗି ଯୋଜନା କରିଛି । ବର୍ତ୍ତମାନ ଭାରତ ନିକଟରେ 12ଟି P-8I ସାମୁଦ୍ରିକ ସର୍ଭେଲାନ୍ସ ଏୟାରକ୍ରାଫ୍ଟ ରହିଛି । ଏସବୁ ତାମିଲନାଡୁର ଆରାକୋନାମ ଓ ଗୋଆରେ ରହିଛି । ବିଶେଷ କରି ପୂର୍ବାଞ୍ଚଳ ଓ ପଶ୍ଚିମାଞ୍ଚଳ ସାମୁଦ୍ରିକ ଅଞ୍ଚଳର ସୁରକ୍ଷା ଲାଗି ଏସବୁ ମୁତୟନ କରାଯାଇଛି । ଖୁବ୍ ଶୀଘ୍ର ଏହି ଏୟାରକ୍ରାଫ୍ଟ କିଣିବା ଲାଗି ପ୍ରତିରକ୍ଷା ମନ୍ତ୍ରାଳୟ ନିଷ୍ପତ୍ତି ନେବ । ପରେ ଏହାକୁ ମଞ୍ଜୁର କରିବ ନିରାପତ୍ତା ସଂକ୍ରାନ୍ତ କ୍ୟାବିନେଟ କମିଟି । ଏହି ଧରଣର ବିମାନ କିଣିବା ଲାଗି ଭାରତ ଦୀର୍ଘଦିନ ଧରି ଚାହୁଁଥିଲା । ମାତ୍ର ଉଚ୍ଚ ଦର କାରଣରୁ ଏହି ପ୍ରସ୍ତାବ ଚୂଡ଼ାନ୍ତ ହୋଇପାରୁ ନଥିଲା । ଏହି ବିମାନ ଜରିଆରେ ଚୀନ ଓ ପାକିସ୍ତାନ ଆଡୁ ସୃଷ୍ଟି ହେଉଥିବା ବିପଦର ମୁକାବିଲା ସହଜ ହେବ ।
ଆମେରିକା ଓ ଇରାନ ମଧ୍ୟରେ ଆଜି ଓମାନରେ ହେବ ଆଲୋଚନା
ନନ୍ଦିଘୋଷ ବ୍ୟୁରୋ : ଆମେରିକା ଓ ଇରାନ ମଧ୍ୟରେ ଆଜି ଓମାନରେ ହେବ ଆଣବିକ ପ୍ରସଙ୍ଗରେ ଆଲୋଚନା । ପୂର୍ବରୁ ତୁର୍କୀରେ କଥାବାର୍ତ୍ତା ହେବ ବୋଲି ସ୍ଥିରୀକୃତ ହୋଇଥିବାବେଳେ ପରେ ସ୍ଥାନ ପରିବର୍ତ୍ତନ ହୋଇଥିଲା । ଆଣବିକ ପ୍ରସଙ୍ଗରେ ଆଲୋଚନା ଲାଗି ଇରାନର ଆହ୍ବାନ ତଥା ଆଣବିକ ଚୁକ୍ତି ନହେଲେ ପରିଣାମ ବିଷମ ହେବ ବୋଲି ଆମେରିକାର ଧମକ ପରେ ଏହି ଆଲୋଚନା ହେବ । ଏହି ବୈଠକରେ ଆମେରିକାର ମଧ୍ୟସ୍ଥି ଓ ଇରାନର ବରିଷ୍ଠ ଅଧିକାରୀମାନେ ସାମିଲ ହେବେ I ଏହି କଥାବାର୍ତ୍ତା ଯଦି ସଫଳ ହୁଏ ତେବେ ସମ୍ଭବତଃ ଇରାନ ଉପରେ ଆମେରିକା ହମଲା କରି ନପାରେ ବୋଲି ଚର୍ଚ୍ଚା ହେଉଛି । କେବଳ ତୁର୍କୀ ନୁହେଁ, ଇଜିପ୍ଟ, କତାର ଓ ଓମାନର ହସ୍ତକ୍ଷେପ କ୍ରମେ ଏହି ଆଲୋଚନା ହେବ I ଇରାନ ଗୋପନ ଭାବେ ଆଣବିକ କାର୍ଯ୍ୟକ୍ରମ ଚଳାଇ ରଖିଛି ବୋଲି ଆମେରିକା ପ୍ରକାଶ କରୁଥିବାବେଳେ ବେସାମରିକ କାର୍ଯ୍ଯକଳାପ ଲାଗି ଇରାନ ଆଣବିକ କାର୍ଯ୍ଯକ୍ରମ ଜାରି ରଖିଛି ବୋଲି ଇରାନ କହିଆସୁଛି ।
ଆଜି ଘୋଷଣା ହେବ ରିଜର୍ଭ ବ୍ୟାଙ୍କର ମୁଦ୍ରାନୀତି
ନନ୍ଦିଘୋଷ ବ୍ୟୁରୋ : ଆଜି ଘୋଷଣା ହେବ ରିଜର୍ଭ ବ୍ୟାଙ୍କର ମୁଦ୍ରାନୀତି। ଭାରତୀୟ ରିଜର୍ଭ ବ୍ୟାଙ୍କ ମନିଟାରୀ ପଲିସି କମିଟିର ବୈଠକ ପରେ ଘୋଷଣା ହେବ ନୂଆ ମୁଦ୍ରା ନୀତି। ଆରବିଆଇ ଗଭର୍ଣ୍ଣର ସଞ୍ଜୟ ମାଲହୋତ୍ରାଙ୍କ ଅଧ୍ୟକ୍ଷାତାରେ ଗତ ୪ ଓ ୫ ତାରିଖରେ ବସିଥିଲା ୫ ସଦସ୍ୟ ବିଶିଷ୍ଟ କମିଟିର ବୈଠକ। ଆଜି ସୁଧହାର, ମୁଦ୍ରାସ୍ଫୀତି ଲକ୍ଷ୍ୟ ଓ ଅଭିବୃଦ୍ଧି ଲକ୍ଷ୍ୟ ହାର ବି ହେବ ଘୋଷଣା। ଗତ ଡିସେମ୍ବରରେ ଅନୁଷ୍ଠିତ ବୈଠକରେ ରେପୋରେଟ ୨୫ ବେସିସ ପଏଣ୍ଟ ହ୍ରାସ ହାଇ ହୋଇଥିଲା ୫.୨୫ ପ୍ରତିଶତ। ଷ୍ଟେଟ ବ୍ୟାଙ୍କ ଅଫ ଇଣ୍ଡିଆର ରିପୋର୍ଟ ଅନୁସାରେ ରେପୋରେଟକୁ ଆରବିଆଇ ରଖିପାରନ୍ତି ଅପରିବର୍ତ୍ତିତ। ବିଶ୍ବ ଅର୍ଥନୀତିରେ ଅସ୍ଥିରତା ଜାରି ରହିଥିବାବେଳେ ଆରବିଆଇ ନୀତି ଉପରେ ରହିଛି ସଭିଙ୍କ ନଜର।.
ଭୁବନେଶ୍ବରରେ ଆରମ୍ଭ ହେଲା ଦେଶର ପ୍ରଥମ ବ୍ଲାକ ସ୍ବାନ ସମ୍ମିଳନୀ
ଭୁବନେଶ୍ବରରେ ଆରମ୍ଭ ହେଲା ଦେଶର ପ୍ରଥମ ବ୍ଲାକ ସ୍ବାନ ସମ୍ମିଳନୀ
ନନ୍ଦିଘୋଷ ବ୍ୟୁରୋ: ଦେଶରେ ପ୍ରଥମ ଥର ପାଇଁ ବ୍ଲାକ ସ୍ବାନ ସମ୍ମିଳନୀ ଅନୁଷ୍ଠିତ ହେଉଛି । ଆଜିଠାରୁ ଆରମ୍ଭ ହୋଇଥିବା ଏହି ଦୁଇ ଦିନିଆ ଅଧିବେଶନ ଭୁବନେଶ୍ବରରେ ରାଜ୍ୟ ସରକାରଙ୍କ ଆନୁକୂଲ୍ୟରେ କରାଯାଉଛି । ଏହା ଗ୍ଲୋବାଲ ଫିଣ୍ଟେକ ପାଇଁ ହେଉଛି । ଯେଉଁଥିରେ ୨୪ ଦେଶର ବକ୍ତା ଯୋଗ ଦେବାକୁ ଆସିଛନ୍ତି । ରାଜ୍ୟକୁ ଆର୍ଥିକ ସ୍ଥିତିରେ ଆହୁରି ସ୍ବଚ୍ଛ କରିବାକୁ ମାଇଣ୍ଡ ଇକୋନୋମିର ଆବଶ୍ୟକ । ଏଥିରେ ଏଆଇ ଓ ଷ୍ଟାର୍ଟ ଅପକୁ ପ୍ରମୁଖ ଅଂଶ କରିବାକୁ ଏହି ସମ୍ମିଳନୀରେ ଲକ୍ଷ୍ୟ ରଖାଯାଇଛି ।
ଓଡ଼ିଶା ପାଇଁ ମାଇନ୍ସ ଇକୋନୋମି ସହ ବର୍ତ୍ତମାନ ସମୟରେ ମାଇଣ୍ଡ ଇକୋନୋମି ଅଧିକ ଗୁରୁତ୍ବପୂର୍ଣ୍ଣ । ଭୁବନେଶ୍ବରରେ ଆରମ୍ଭ ହୋଇଥିବା ଦୁଇ ଦିନିଆ ବ୍ଲାକ ସ୍ବାନ ସମ୍ମିଳନୀର ଉଦଘାଟନୀ ଦିବସରେ ଏହା ଉପରେ ଗୁରୁତ୍ବାରୋପ କରିଛନ୍ତି ମୁଖ୍ୟ ଶାସନ ସଚିବ ଅନୁ ଗର୍ଗ । ଓଡ଼ିଶାର ଭବିଷ୍ୟତ ହେଉଛି ଡିଜିଟାଲ ଇକୋନୋମି । ବ୍ଲାକ ସ୍ବାନ ସମ୍ମିଳନୀ ପରି ଅର୍ନ୍ତଜାତୀୟ କାର୍ଯ୍ୟକ୍ରମ ଜରିଆରେ ଓଡ଼ିଶା ପାଇଁ ବଡ଼ ସୁଯୋଗ ଆଣିବାର ଲକ୍ଷ୍ୟ ରଖାଯାଇଛି । ଏହାକୁ ନେଇ ଆଗାମୀ ଦିନରେ ଓଡିଶା ସରକାରଙ୍କ ପକ୍ଷରୁ ସମସ୍ତ ପ୍ରକାର ସୁବିଧା ସୁଯୋଗ ଯୋଗାଇ ଦିଆଯିବ । ଏହାରି ମାଧ୍ୟମରେ ଓଡ଼ିଶାର ଯୁବକ ଯୁବତୀ ଦକ୍ଷ ହେବେ । ଫିଣ୍ଟେକ, ଇନ୍ସଟେକ, ଡିଜିଟାଲ ଇନଫ୍ରାଷ୍ଟକଚରରେ ଯାହା ଉନ୍ନତି ହେଉଛି ରାଜ୍ୟର ଯୁବକ ଯୁବତୀ କିଭଳି ଏହାକୁ ନେଇ ନିଜର ପ୍ରସ୍ତୁତି କରିବେ ତାହା ଉପରେ ଫୋକସ କେନ୍ଦ୍ରୀଭୂତ ହେବ । ଯାହା ୫୦୦ ବିଲିଅନ ଡଲାର ଅର୍ଥନୀତିର ଲକ୍ଷ୍ୟ ସାଧନ କରିବାରେ ସହାୟକ ହେବ । ଏହି ପ୍ରୋଗାମ ଗ୍ଲୋବାଲ ଶିକ୍ଷା, ମାନସିକତା ଓ ଇନୋଭେସନ ସେଣ୍ଟର ଆଡ଼କୁ ଓଡ଼ିଶାକୁ ଗତି କରାଇବ । ଗ୍ଲୋବାଲ ଶିକ୍ଷା ଅଧୀନରେ ଗ୍ଲୋବାଲ ଫିନଟେକରେ କାମ କରିବା ପାଇଁ ଦକ୍ଷତା ପ୍ରତିପାଦନ କରାଯାଉଛି । ଏଥିପାଇଁ ନ୍ୟାସନାଲ ୟୁନିଭରସିଟି ଅଫ ସିଙ୍ଗାପୁର ସହ ଏକ ପାଞ୍ଚ ମାସିଆ କୋର୍ସ ପାଇଁ ଚୁକ୍ତିନାମା ହୋଇଥିଲା । ଗତକାଲି ୧୯୫ ଜଣ ଛାତ୍ରଛାତ୍ରୀ ଏହି କୋର୍ସ ସଫଳତା ସହ ସାରିଛନ୍ତି । ସେମାନଙ୍କ ଭିତରୁ ଏକ ତୃତୀୟାଂଶ ଜଣ ବଡ଼ ବଡ଼ କମ୍ପାନୀରେ ଚାକିରି ପାଇଛନ୍ତି । ଗ୍ଲୋବାଲ ମାନସିକତାରେ ବ୍ଲାକ ସ୍ବାନ ପରି ସମ୍ମିଳନୀ ଅଧିକରୁ ଅଧିକ କରାଯିବ । ଏଥିରେ ଇନୋଭେଟର, ନୀତି ନିର୍ଦ୍ଧାରକ ଓ କର୍ପୋରେଟ ଜଗତରୁ ବିଶେଷଜ୍ଞ ଆସି ଗ୍ଲୋବାଲ ଅର୍ଥନୀତିର ଭବିଷ୍ୟତ ଉପରେ ଆଲୋକପାତ କରିବେ । ଗ୍ଲୋବାଲ ଇନୋଭେସନ ସେଣ୍ଟର ଜରିଆରେ ଷ୍ଟାର୍ଟ ଅପ ପାଇଁ ନିବେଶକଙ୍କୁ ଆକୃଷ୍ଟ କରାଯିବ ।
ଖଣିଜ ଶିଳ୍ପରୁ ଖାଦ୍ୟ ପ୍ରକ୍ରିୟାକରଣ, ଆଇଟି ସର୍ଭିସ ଆଡ଼କୁ ଓଡ଼ିଶା ଯାଉଛି । ଭାରତନେତ୍ର ଓଡ଼ିଶାର ନିରନ୍ତର, ପ୍ରଯୁକ୍ତିବିଦ୍ୟା-ଚାଳିତ ଅଭିବୃଦ୍ଧି ପାଇଁ ରଣନୀତିକୁ ପ୍ରତିଫଳିତ କରେ ଯାହା ନବସୃଜନକୁ ଆୟ ପ୍ରସାର, ସମାବେଶୀ ବିକାଶ ଓ ସ୍ଥାୟୀ ନିଯୁକ୍ତିରେ ପରିଣତ କରେ । କେବଳ ପ୍ରଯୁକ୍ତିବିଦ୍ୟା ଗ୍ରହଣ ଉପରେ ଧ୍ୟାନ ଦେବା ପରିବର୍ତ୍ତେ ଓଡ଼ିଶାର ମାପନଯୋଗ୍ୟ ଫଳାଫଳ, ଚାକିରି, ଦକ୍ଷତା, ଉଦ୍ୟୋଗ ସୃଷ୍ଟି ଏବଂ ବିଶ୍ବସ୍ତରୀୟ ପ୍ରତିଯୋଗିତାମୂଳକତା ଉପରେ ଡିଜିଟାଲ୍ ନୀତିକୁ ପୁନଃନିର୍ମାଣ କରୁଛି । ଏହାକୁ ଦୃଷ୍ଟିରେ ରଖି ଡିଜିଟାଲ ଇକୋନୋମି ଓ ଏଆଇକୁ ନେଇ ବ୍ଲାକ ସ୍ବାନ ସମ୍ମିଳନୀରେ ଷ୍ଟାର୍ଟ ଅପ ଅଂଶଗ୍ରହଣ କରିଛନ୍ତି ।
ଓଡ଼ିଶା କେବଳ ବିଶ୍ବ ଡିଜିଟାଲ୍ ଅର୍ଥନୀତିରେ ଅଂଶଗ୍ରହଣ କରିବାକୁ ପ୍ରସ୍ତୁତ ହେଉ ନାହିଁ । ଏହାକୁ ଏକ ଆଗ ଧାଡ଼ିର ଅବଦାନକାରୀ ଭାବରେ ଗଢ଼ି ତୋଳିବାରେ ଏପରି କାର୍ଯ୍ୟକ୍ରମ ସହାୟକ ହେବ । ଏଆଇ ଏବଂ ଡିଜିଟାଲ୍ ଫାଇନାନ୍ସକୁ ଏପରି ଭାବରେ କାର୍ଯ୍ୟକାରୀ କରାଯିବ ଯାହା ପ୍ରକୃତ ଆର୍ଥିକ ମୂଲ୍ୟ ସହ ଦୀର୍ଘକାଳୀନ ସଂସ୍ଥାଗତ କ୍ଷମତା ପ୍ରଦାନ କରିଥାଏ ।
୨୧ ବରିଷ୍ଠ ଆଇଏଏସ ଅଧିକାରୀଙ୍କ ବିଭାଗ ଅଦଳବଦଳ
୨୧ ବରିଷ୍ଠ ଆଇଏଏସ ଅଧିକାରୀଙ୍କ ବିଭାଗ ଅଦଳବଦଳ
ନନ୍ଦିଘୋଷ ବ୍ୟୁରୋ: ଆଇଏଏସ ସ୍ତରରେ ହୋଇଛି ବଡ଼ ଧରଣର ଅଦଳବଦଳ । ୨୧ ବରିଷ୍ଠ ଆଇଏଏସଙ୍କ ବିଭାଗ ଅଦଳବଦଳ ହୋଇଛି । ଉନ୍ନୟନ କମିଶନର ଦେଓ ରଞ୍ଜନ କୁମାର ସିଂଙ୍କୁ ଖଣି ଓ ଇସ୍ପାତ ବିଭାଗର ଅତିରିକ୍ତ ଦାୟିତ୍ବ ମିଳିଛି । ଏସିଏସ ସୁରେନ୍ଦ୍ର କୁମାର କେବଳ ସାଧାରଣ ପ୍ରଶାସନ ବିଭାଗ ସଚିବ ଦାୟିତ୍ୱ ତୁଲାଇବେ। ବରିଷ୍ଠ ଆଇଏଏସ ଅଧିକାରୀ ବିଷ୍ଣୁପଦ ସେଠୀ ହୋଇଛନ୍ତି କେବିକେ ମୁଖ୍ୟ ପ୍ରଶାସନ । ତାଙ୍କୁ OFDCର ଅଧ୍ୟକ୍ଷ ଦାୟିତ୍ୱ ଦିଆଯାଇଛି । ଚିତ୍ରା ଅର୍ମୁଗମ ଗୋପବନ୍ଧୁ ଏକାଡେମୀ ଡିଜି ଭାବେ ଅତିରିକ୍ତ ଦାୟିତ୍ୱ ତୁଲାଇବେ ।
ଏସିଏସ ଅରବିନ୍ଦ ପାଢ଼ୀ ହୋଇଛନ୍ତି ରାଜସ୍ୱ ବିଭାଗ ସଚିବ । ସୁରେଶ ବଶିଷ୍ଠ ଭିନ୍ନକ୍ଷମ ସଶକ୍ତୀକରଣ ବିଭାଗ ପ୍ରମୁଖସଚିବ ହୋଇଥିବାବେଳେ ଏସିଏସ ଉଷା ପାଢ଼ୀ ଗୃହ ଓ ନଗର ଉନ୍ନୟନ ସହ ଆଇଡିସିଓ ଅଧ୍ୟକ୍ଷ ହୋଇଛନ୍ତି । ବାଣିଜ୍ୟ ଓ ପରିବହନ ଏବଂ ଓଏସଆରଟିସି ଦାୟିତ୍ୱରୁ ହଟିଛନ୍ତି ଉଷା ପାଢ଼ୀ । ସଂଜୀବ ମିଶ୍ରଙ୍କ ନିକଟରୁ ଆଇଡିସିଓ ଅଧ୍ୟକ୍ଷ ଦାୟିତ୍ୱ ହଟାଇ ନିଆଯାଇଛି । ଶୁଭା ଶର୍ମା ମହିଳା ଓ ଶିଶୁ ବିକାଶ ବିଭାଗ ସହ ଜଳ ସଂପଦ ପ୍ରମୁଖ ସଚିବ ହୋଇଛନ୍ତି । ଏନବିଏସ୍ ରାଜପୁତ ହୋଇଛି ସିଏମଡି ଓଏସଆରଟିସି, ବାଣିଜ୍ୟ ଓ ପରିବହନ ପ୍ରମୁଖ ସଚିବ । ଗିରୀଶ ଏସଏନ ପଞ୍ଚାୟତିରାଜ ସଚିବ ସହ ଓଏମସି ଅଧ୍ୟକ୍ଷ ଦାୟିତ୍ବ ତୁଲାଇବେ ।
ବଲଓ୍ୱନ୍ତ ସିଂଙ୍କୁ OSHAର ଏମଡି ଭାବେ ଅତିରିକ୍ତ ଦାୟିତ୍ୱ ମିଳିଛି । ସଚିନ ଆର. ଯାଦବ ହୋଇଛନ୍ତି କୃଷି ବିଭାଗ ସଚିବ । ସେ ଯୁବ ଓ କ୍ରୀଡ଼ା ବିଭାଗର ଅତିରିକ୍ତ ଦାୟିତ୍ୱ ତୁଲାଇବେ । ସୁଧାଂଶୁ ସାମଲଙ୍କୁ କେନ୍ଦ୍ରାଞ୍ଚଳ ଆରଡିସି ଭାବେ ଅତିରିକ୍ତ ଦାୟିତ୍ୱ ମିଳିଛି । ରଶ୍ମିତା ପଣ୍ଡାଙ୍କୁ ବିଡିଏ ଉପାଧ୍ୟକ୍ଷ ଭାବେ ଅତିରିକ୍ତ ଦାୟିତ୍ୱ ମିଳିଛି । ମହମ୍ମଦ ସାଦ୍ଦିକ ଆଲାମ ହୋଇଛନ୍ତି ସାଧାରଣ ଉଦ୍ୟୋଗ ବିଭାଗ ସଚିବ । ସେ CRUTର ଏମଡି ଭାବେ ଅତିରିକ୍ତ ଦାୟିତ୍ୱ ତୁଲାଇବେ । ମାନସୀ ନିମ୍ଭାଲ ମିଶନ ଶକ୍ତି ବିଭାଗର ସଚିବ ହୋଇଥିବାବେଳେ ପ୍ରେମଚନ୍ଦ୍ର ଚୌଧରୀ ମତ୍ସ୍ୟ ଓ ପ୍ରାଣୀ ସମ୍ପଦ ବିଭାଗ ସଚିବ ହୋଇଛନ୍ତି । ଅନୁପମ ଶାହା OBCC ଏମଡି ଭାବେ ଅତିରିକ୍ତ ଦାୟିତ୍ୱ ତୁଲାଇବେ । ଦକ୍ଷିଣାଞ୍ଚଳ ଆରଡିସି ସଂଗ୍ରାମ କେଶରୀ ମହାପାତ୍ରଙ୍କୁ ଉତ୍ତରାଞ୍ଚଳ ଆରଡିସି ଭାବେ ଅତିରିକ୍ତ ଦାୟିତ୍ୱ ମିଳଇଛି । ସେ ପଶ୍ଚିମ ଓଡ଼ିଶା ବିକାଶ ପରିଷଦ ଅଧ୍ୟକ୍ଷ ଦାୟିତ୍ୱ ତୁଲାଇବେ ।
ତେଜିଲା ପୁରୀ ଉଠାଦୋକାନୀଙ୍କ ଆନ୍ଦୋଳନ, ବଡ଼ଦାଣ୍ଡ ଦୁଇ ପାର୍ଶ୍ବରେ ପୁଣି ଦୋକାନ ଖୋଲିଲେ ୧୨ ଶହରୁ ଅଧିକ ଦୋକାନୀ
ତେଜିଲା ପୁରୀ ଉଠାଦୋକାନୀଙ୍କ ଆନ୍ଦୋଳନ, ବଡ଼ଦାଣ୍ଡ ଦୁଇ ପାର୍ଶ୍ବରେ ପୁଣି ଦୋକାନ ଖୋଲିଲେ ୧୨ ଶହରୁ ଅଧିକ ଦୋକାନୀ
ନନ୍ଦିଘୋଷ ବ୍ୟୁରୋ: ପୁରୀ ଉଠାଦୋକାନୀଙ୍କ ତେଜିଲା ଆନ୍ଦୋଳନ । ବାରମ୍ବାର ଗୁହାରୀ ସତ୍ତ୍ବେ କୌଣସି ସୁଫଳ ନ ମିଳୁ ନଥିବା ଅଭିଯୋଗ । ବଡ଼ଦାଣ୍ଡରର ଉଭୟ ପାର୍ଶ୍ବରେ ପୁଣି ଦୋକାନ ଖୋଲି ପ୍ରତିବାଦ କଲେ ଉଠା ଦୋକାନୀ । ଥଇଥାନ ଓ ୧୪ ମାସର କ୍ଷତିପୂରଣ ରାଶି ନମିଳିବା ପର୍ଯ୍ଯନ୍ତ ଦୋକାନ ଖୋଲା ରହିବ ବୋଲି ଚେତାବନୀ ଦେଇଛନ୍ତି ୧୨ ଶହରୁ ଅଧିକ ଦୋକାନୀ । ଅନ୍ୟପକ୍ଷରେ ସରକାରଙ୍କ ନିୟମ ଅନୁସାରେ ଶ୍ରୀସେତୁ ତଳେ ଦୋକାନ ଓ ବିଦ୍ୟୁତ ବ୍ୟବସ୍ଥା କରାଯାଇଥିବା କହିଛନ୍ତି ପୌର ନିର୍ବାହୀ ଅଧିକାରୀ ।
ପେଟପାଟଣା ପାଇଁ ପୁଣି ବଡ଼ଦାଣ୍ଡରେ ଉଠା ଦୋକାନୀ । ବକେୟା କ୍ଷତିପୂରଣ ସହ ଥଇଥାନ ଦାବି । ଧାଡ଼ିରେ ଦୋକାନ ଖୋଲିଲେ ୧୨ ଶହରୁ ଅଧିକ ଦୋକାନୀ । ପୁରୀରେ ଭକ୍ତଙ୍କ ଭିଡ଼କୁ ନଜରରେ ରଖି ଗତ ସରକାର ସମୟରେ ଉଠା ଦୋକାନୀଙ୍କୁ ବଡ଼ଦାଣ୍ଡରୁ ହଟାଯାଇଥିଲା । ସେମାନଙ୍କୁ ଥଇଥାନ କରିବା ପର୍ଯ୍ୟନ୍ତ କ୍ଷତିପୂରଣ ରାଶି ପ୍ରଦାନ କରାଯିବାକୁ କୁହାଯାଇଥିଲା । ପୂର୍ବ ସରକାରଙ୍କ ସମୟରେ କିଛି କ୍ଷତି ପୂର୍ଣ ପାଇଥିଲେ ଦୋକାନୀ । କିନ୍ତୁ ସରକାର ପରିବର୍ତ୍ତନ ପରେ ଥଇଥାନ କି କ୍ଷତିପୂରଣ ନ ମିଳିବାରୁ ପୁଣି ବଡ଼ଦାଣ୍ଡକୁ ଓହ୍ଲାଇଛନ୍ତି ଉଠା ଦୋକାନୀ । ବଡ଼ଦାଣ୍ଡର ଦୁଇ ପାର୍ଶ୍ବରେ ଦୋକାନ ଖୋଲି ପ୍ରତିବାଦ କରିଛନ୍ତି ୧୨ ଶହରୁ ଅଧିକ ଦୋକାନୀ । ଶ୍ରୀସେତୁ ତଳେ ବିଶ୍ବ ସ୍ତରୀୟ ଭେଣ୍ଡିଂ ଜୋନ କାର୍ଯ୍ୟ ବିଳମ୍ବ, ବକେୟା ରାଶି ଓ ଥଇଥାନ ନହେବ ପର୍ଯ୍ଯନ୍ତ ବଡ଼ଦାଣ୍ଡରେ ପୂର୍ବପରି ବ୍ଯବସାୟ କରିବାକୁ ଦାବି କରିଛନ୍ତି ।
ଶ୍ରୀମନ୍ଦିର ଚତୁଃପାର୍ଶ୍ଵ, ମାର୍କେଟ ଛକ, ମରିଚିକୋଟ ଛକରୁ ବିଭିନ୍ନ ପର୍ଯ୍ୟାୟରେ ୧୨ ଶହ ଉଠା ଦୋକାନୀଙ୍କୁ ଉଚ୍ଛେଦ କରାଯାଇଥିଲା । ସେମାନଙ୍କ ମଧ୍ୟରୁ ଏକ ହଜାର ୪୮ ଉଠା ଦୋକାନୀ ଶ୍ରୀସେତୁ ତଳେ ଦୋକାନ କରିଛନ୍ତି । ଭେଣ୍ଡିଂ ଜୋନରେ ବିଦ୍ୟୁତ ବ୍ୟବସ୍ଥା ସହ ସୁରକ୍ଷା ବ୍ୟବସ୍ଥା ଉପଲବ୍ଧ କରାଯାଇଛି । ତେଣୁ ଜିଦନ ନକରି ସେଠାରେ ଦୋକାନ ଖୋଲିବାକୁ ନିବେଦନ କରିଛନ୍ତି ପୌର ନିର୍ବାହୀ ଅଧିକାରୀ । ସରକାର ବଦଳିବା ପରେର ଦୋକାନୀଙ୍କ ସମସ୍ଯାକୁ ଅଣଦେଖା କରାଯାଉଥିବା ଅଭିଯୋଗ କରିଛନ୍ତି ଉଠା ଦୋକାନୀ ।
ବିଛଣାରେ ଘରର ମୁରବୀ: ବାପାଙ୍କ ଚିକିତ୍ସା ପାଇଁ ପାଠପଢ଼ା ଛାଡି ମୂଲ ଲାଗୁଛନ୍ତି ପୁଅଝିଅ
ବିଛଣାରେ ଘରର ମୁରବୀ: ବାପାଙ୍କ ଚିକିତ୍ସା ପାଇଁ ପାଠପଢ଼ା ଛାଡି ମୂଲ ଲାଗୁଛନ୍ତି ପୁଅଝିଅ
ନନ୍ଦିଘୋଷ ବ୍ୟୁରୋ: ରୋଗ ଶଯ୍ୟାରେ ବିତୁଛି ଜୀବନ । ବାଲିଗୁଡା ବ୍ଲକ ସଲାଗୁଡ଼ା ପଞ୍ଚାୟତ ଡାକା ଗାଁର ସଦନ ମଲ୍ଲିକ ଯନ୍ତ୍ରଣାରେ ଛଟପଟ ହେଉଛନ୍ତି । ହେଲେ ଚିକିତ୍ସା ପାଇଁ ଅର୍ଥ ବାଧକ ସାଜିଛି । ପାଠପଢ଼ା ବନ୍ଦ କରି ପରିବାର ଚଳାଇବା ସହ ବାପାଙ୍କ ଚିକିତ୍ସା ପାଇଁ ମୂଲ ଲାଗୁଛନ୍ତି ପୁଅ ଓ ଝିଅ । ସଦନଙ୍କ ଚିକିତ୍ସା ପାଇଁ ସରକାରଙ୍କ ନିକଟରେ ଆର୍ଥିକ ସହାୟତା ଲୋଡିଛନ୍ତି ପୂରା ପରିବାର ।
ଯିଏ ଦିନେ ପରିବାର ଲୋକଙ୍କ ମୁହଁରେ ଦାନା ଗଣ୍ଡେ ଦେଉଥିଲା, ସେ ଆଜି ବିଛଣାରେ । ଆମେ କହୁଛୁ ବାଲିଗୁଡା ବ୍ଲକ ସଲାଗୁଡ଼ା ପଞ୍ଚାୟତ ଡାକା ଗାଁର ସଦନ ମଲ୍ଲିକଙ୍କ କଥା । ଗତ ଦୁଇ ମାସ ତଳେ ତାଙ୍କର ଆଣ୍ଠୁଗଣ୍ଠି ବ୍ୟଥା ହେବାରୁ ସେ ଚିକିତ୍ସା ପାଇଁ ବାହାରକୁ ଯାଇଥିଲେ । ହେଲେ ରୋଗ ଭଲ ହେବା ବଦଳରେ ସେ ଅଧିକ ରୋଗାକ୍ରାନ୍ତ ହୋଇପଡିଛନ୍ତି । ବାଧ୍ୟ ହୋଇ ପାଠପଢା ବନ୍ଦ କରି ପରିବାର ଚଳାଇବା ସହ ବାପାଙ୍କ ଚିକିତ୍ସା ପାଇଁ ମୂଲ ଲାଗୁଛନ୍ତି ସଦନଙ୍କ ପୁଅ ଓ ଝିଅ ।
୯ ଜଣ ପ୍ରାଣୀ କୁଟୁମ୍ବଙ୍କୁ ନେଇ ସଦନଙ୍କ ପରିବାର । ସଦନ ମୂଲମଜୁରୀ ଲାଗି ପରିବାର ପ୍ରତିପୋଷଣ କରୁଥିଲେ । ଏବେ ସେ ବିଛଣାରେ ପଡିଥିବାରୁ ପରିବାର ଲୋକେ ବହୁ କଷ୍ଟରେ ଜୀବନ ବିତାଉଛନ୍ତି । ଏଣୁ ସ୍ଥାନୀୟ ପ୍ରଶାସନ ଓ ରାଜ୍ୟ ସରକାର ଏହି ଅସହାୟ ପରିବାର ପ୍ରତି ଦୃଷ୍ଟି ଦେଇ ସହାୟତା ଯୋଗାଇ ଦେବାକୁ ଅନୁରୋଧ କରିଛନ୍ତି ସ୍ଥାନୀୟ ଲୋକେ । ଅନ୍ୟପଟେ ପ୍ରଶାସନିକ ସ୍ତରରେ ଯାହା ସମ୍ଭବ ସାହାଯ୍ୟ କରିବୁ ବୋଲି କହିଛନ୍ତି ବାଲିଗୁଡା ଉପଜିଲ୍ଲାପାଳ ପ୍ରଣିତା ଦାସ ।
ଗଜପତିରେ ପ୍ରଶାସନ ପକ୍ଷରୁ ଜାଗା ଚିହ୍ନଟ ପରେ ଚିନ୍ତାରେ ଜବରଦଖଲକାରୀ
ଗଜପତିରେ ପ୍ରଶାସନ ପକ୍ଷରୁ ଜାଗା ଚିହ୍ନଟ ପରେ ଚିନ୍ତାରେ ଜବରଦଖଲକାରୀ
ନନ୍ଦିଘୋଷ ବ୍ୟୁରୋ: ଜବରଦଖଲକାରୀଙ୍କୁ କରାଯିବ ଉଚ୍ଛେଦ । ପ୍ରଶାସନ ପକ୍ଷରୁ ଜାଗା ଚିହ୍ନଟ ପରେ ଚିନ୍ତାରେ ୨୭ ପରିବାର । ଗଜପତି ଜିଲ୍ଲା ଗୋଷାଣୀ ବ୍ଲକ କୁଡୁଡା ମୌଜାର ୪୩ ଏକର ଘରୋଇ ଜମିକୁ କିଛି ଲୋକ ଦୀର୍ଘ ବର୍ଷ ହେଲା ଜବରଦଖଲ କରି ଚଳୁଛନ୍ତି । ଜମିର ଖଜଣା ବି ଦେଉଛନ୍ତି । ଏବେ ହଠାତ ଜମିର ମାଲିକ ନିଜ ଅଧିକାର ପାଇବା ଆଶାରେ ଉପଜିଲ୍ଲାପାଳଙ୍କ କୋର୍ଟର ଦ୍ଵାରସ୍ଥ ହେବା ପରେ ଦେଖାଦେଇଛି ବିବାଦ ।
ଜମିରେ ପିଢି ପରେ ପିଢି ଚାଷ କରିଆସୁଥିଲେ । ଖଜଣା ମଧ୍ୟ ଦେଉଥିଲେ । ଦୀର୍ଘ ବର୍ଷ ପରେ ଜବରଦଖଲ ଜମିକୁ ନେଇ ଉଠିଛି ବିବାଦ । ୫୦ରୁ ଊର୍ଦ୍ଧ୍ଵ ଚାଷୀଙ୍କ ପେଟପାଟଣା ଉପରେ ଚାଲିବାକୁ ବସିଛି ବୁଲଡୋଜର । କୁଡୁଡା ମୌଜାର ୪୩ ଏକର ଘରୋଇ ଜମିକୁ କିଛି ଲୋକ ଦୀର୍ଘ ବର୍ଷ ଧରି ବ୍ୟବହାର କରୁଛନ୍ତି । ସେହି ଜାଗାରେ ଘର, ଦୋକାନ ତିଆରି କରି ଜୀବିକା ନିର୍ବାହ କରିଆସୁଛନ୍ତି । ହେଲେ ଦୀର୍ଘ ବର୍ଷ ପରେ ନିଜ ଜମି ଫେରି ପାଇବା ପାଇଁ ଜମି ମାଲିକ ଉପଜିଲ୍ଲାପାଳଙ୍କ କୋର୍ଟରେ ଆବେଦନ କରିବା ପରେ ଉପୁଜିଛି ସମସ୍ୟା । ଜମିର ସତ୍ତ୍ଵାଧିକାରୀ ଅନୁସୂଚିତ ଜାତିର ହୋଇଥିବାରୁ ଜବରଦଖଲରେ ଥିବା ତାଙ୍କ ଜମିକୁ ହସ୍ତାନ୍ତର ପାଇଁ ୨୩ (ଏ) ଓ ୧୬୩ ବିଏନଏସ ଅନୁସାରେ କୋର୍ଟ ଉଚ୍ଛେଦ ପାଇଁ ନିର୍ଦ୍ଦେଶ ଦେଇଛନ୍ତି । ପାରଳାଖେମୁଣ୍ଡି ତହସିଲଦାର, ରାଜସ୍ଵ ନିରୀକ୍ଷକ ଓ ପୋଲିସ ଉପସ୍ଥିତିରେ ଜମି ମାପଚୁପ କରିବା ସହ ଚିହ୍ନଟ କରାଯାଇଛି । ବିଦ୍ୟୁତ ସଂଯୋଗ ବିଚ୍ଛିନ୍ନ କରାଯାଇଛି । ଯାହାକୁ ନେଇ ଚିନ୍ତାରେ ପଡ଼ିଛନ୍ତି ଜବରଦଖଲକାରୀ ।
କୁଡୁଡା ମୌଜାର ୩୨୬ ନମ୍ବର ଜାତୀୟ ରାଜପଥ କଡ଼ରେ ଥିବା ଉକ୍ତ ଜମିକୁ ୨୭ଟି ପରିବାର ଦଖଲ କରି ରଖିଛନ୍ତି । କିନ୍ତୁ ଏହା ବ୍ୟକ୍ତଗତ ଜାଗା ହୋଇଥିବାରୁ ସେଠାରେ ଚାଷ କରିବା ଓ ଘର ନିର୍ମାଣ କରିବା ବେଆଇନ ବୋଲି ରାଜସ୍ଵ ବିଭାଗ ପକ୍ଷରୁ କୁହାଯାଇଛି । ସେହି ଜମିକୁ ସଂପୃକ୍ତ ମାଲିକଙ୍କୁ ହସ୍ତାନ୍ତର କରାଯିବ ବୋଲି ଉପଜିଲ୍ଲାପାଳ କହିଛନ୍ତି । ଅନ୍ୟପଟେ ଆପୋଷ ବୁଝାମଣା ଜରିଆରେ ସମାଧାନ କରିବାକୁ ଅନୁରୋଧ କରିଛନ୍ତି ଜବରଦଖଲକାରୀ ।
ପ୍ରଶ୍ନ ଉଠୁଛି, ଏତେ ବର୍ଷ ଧରି ଜମିର ମାଲିକ କେଉଁଠି ଥିଲେ ? ଆଗରୁ ଜବରଦଖଲକୁ ବିରୋଧ କଲେ ନାହିଁ କାହିଁକି ? ଏବେ ହଠାତ ୨୭ ପରିବାରଙ୍କୁ ଉଚ୍ଛେଦ କରାଗଲେ ସେମାନେ ରହିବେ କେଉଁଠି ? ପ୍ରଶାସନ ଚାଷୀଙ୍କ ଅନୁରୋଧ ରକ୍ଷା କରିବ ନା ଜବରଦଖଲ ଉଚ୍ଛେଦ ପାଇଁ ବୁଲଡୋଜର ଚଲାଇବ ?
ବିଭାଗୀୟ ଅଧିକାରୀଙ୍କ ଦାୟିତ୍ଵହୀନତାରୁ ଖତ ଖାଉଛି ୨୦ ଲକ୍ଷ ଟଙ୍କାରେ ନିର୍ମିତ ୨ଟି ପାର୍କ
ବିଭାଗୀୟ ଅଧିକାରୀଙ୍କ ଦାୟିତ୍ଵହୀନତାରୁ ଖତ ଖାଉଛି ୨୦ ଲକ୍ଷ ଟଙ୍କାରେ ନିର୍ମିତ ୨ ଗୋଟି ପାର୍କ
ନନ୍ଦିଘୋଷ ବ୍ୟୁରୋ: ଜରାଜୀର୍ଣ୍ଣ ଅବସ୍ଥାରେ ଚମ୍ପୁଆ ଅଲ୍ଲୀନଗରରେ ନିର୍ମିତ ପାର୍କ । ବିଭାଗୀୟ ଅଧିକାରୀଙ୍କ ଦାୟିତ୍ଵହୀନତାରୁ ୨ ବର୍ଷରେ ଶ୍ରୀହୀନ ହୋଇପଡ଼ିଛି ୨ଟି ପାର୍କ । ଗୋଟିଏ ପାର୍କ ବସ୍ତି ବାସିନ୍ଦାଙ୍କ ମୁକ୍ତାକାଶ ଶୌଚାଳୟ ପାଲଟିଥିବା ବେଳେ ଅନ୍ୟଟି ମଦୁଆଙ୍କ ଆଡ୍ଡାସ୍ଥଳୀ । ହେଲେ ପ୍ରଶାସନ ଦୃଷ୍ଟି ଦେଉ ନଥିବାରୁ ସାଧାରଣରେ ତୀବ୍ର ଅସନ୍ତୋଷ ଦେଖାଦେଇଛି ।
ଜଙ୍ଗଲ ପରି ଦିଶୁଛି ପାର୍କ ପରିସର । ପାଲଟିଛି ନିଶାଡିଙ୍କ ଆଡ୍ଡାସ୍ଥଳୀ । ଏଣେତେଣ ପଡ଼ିଛି ଖେଳ ଉପକରଣ ସାମଗ୍ରୀ । ଏ ହେଉଛି କେନ୍ଦୁଝର ଜିଲ୍ଲା ଚମ୍ପୁଆ ଏନଏସି ଅଲ୍ଲୀନଗରରେ ଥିବା ପାର୍କ । ପୂର୍ବ ସରକାର ସମୟରେ ଏଠାରେ ସ୍ଥାନୀୟ ଲୋକଙ୍କ ଅବସର ବିନୋଦନ ପାଇଁ ଦୁଇଟି ପାର୍କ ନିର୍ମାଣ ହୋଇଥିଲା । ଦଶ ଲକ୍ଷ ଟଙ୍କା ଲେଖାଏଁ ବ୍ୟୟ ବରାଦରେ ଦୁଇଟି ପାର୍କ ନିର୍ମାଣ ହୋଇଥିଲା । ହେଲେ ବିଭାଗୀୟ ଅଧିକାରୀଙ୍କ ଅବହେଳାରୁ ଦୁଇ ବର୍ଷରେ ଦୁଇଟି ଯାକ ପାର୍କ ଶ୍ରୀହୀନ ହୋଇ ପଡ଼ିଛି । ପାର୍କରେ ଲାଗିଥିବା ସିମେଣ୍ଟ ଚେୟାର ଗୁଡ଼ିକ ଭାଙ୍ଗି ପଡିଥିବାବେଳେ ଦୋଳି ଓ ବ୍ୟାୟାମ ସାମଗ୍ରୀ ଚୋରି ହୋଇଯାଇଛି ।
ଚମ୍ପୁଆ NACର ଆନ୍ତରିକତା ଅଭାବରୁ ଦୁଇଟି ଯାକ ପାର୍କ ସଂପୂର୍ଣ୍ଣ ଉଜୁଡି ଯାଇଛି । ଗୋଟିଏ ସ୍ଥାନୀୟ ବସ୍ତି ବାସିନ୍ଦାଙ୍କ ମୁକ୍ତାକାଶ ଶୌଚାଳୟ ପାଲଟିଥିବା ବେଳେ ଅନ୍ୟଟି ମଦୁଆଙ୍କ ଆଡ୍ଡାସ୍ଥଳୀ ପାଲଟିଛି । ସନ୍ଧ୍ଯା ହେଲେ ଅସାମାଜିକ କାର୍ଯ୍ୟକଳାପ ଚାଲୁଥିବାରୁ ଲୋକ ଏଠାକୁ ଆସିବାକୁ ଭୟ କରୁଛନ୍ତି । ଶୀଘ୍ର ପାର୍କ ଗୁଡି଼କୁ ମରାମତି କରିବାକୁ ସ୍ଥାନୀୟ ଲୋକେ ଦାବି କରିଛନ୍ତି । ଅନ୍ୟପଟେ ସମାଧାନର ପ୍ରତିଶୃତି ଦେଇଛନ୍ତି ନିର୍ବାହୀ ଅଧିକାରୀ ।
ବାପାଙ୍କ ଋଣ ଭାର ହେଲା ତିନି ନାବାଳିକା ଭଉଣୀଙ୍କ ଆତ୍ମହତ୍ୟାର କାରଣ
ବାପାଙ୍କ ଋଣ ଭାର ହେଲା ତିନି ନାବାଳିକା ଭଉଣୀଙ୍କ ଆତ୍ମହତ୍ୟାର କାରଣ
ନନ୍ଦିଘୋଷ ବ୍ୟୁରୋ: ଗାଜିଆବାଦରେ ୩ ଭଉଣୀଙ୍କ ଆତ୍ମହତ୍ୟା ଘଟଣାକୁ ନେଇ ଆସିଲା ଚାଞ୍ଚଲ୍ୟକର ତଥ୍ୟ । ବାପାଙ୍କ ଋଣ ଭାର ଥିଲା ତିନି ଭଉଣୀଙ୍କ ମୃତ୍ୟୁର କାରଣ । ମୃତ ନାବାଳିକାଙ୍କ ବାପା ଚେତନ କୁମାର ପ୍ରାୟ ୨ କୋଟି ଟଙ୍କାର ଋଣ ଭାରରେ ବୁଡି ରହିଥିଲେ । ଏହି ୩ ଭଉଣୀ କୋରିଆ ସଂସ୍କୃତି ପ୍ରତି ବେଶ୍ ଜଡ଼ିତ ହୋଇଯାଇଥିଲେ । କେ-ପପ, କୋରିଆ ଡ୍ରାମା ଓ କୋରିଆ ସିନେମା ପ୍ରତି ସେମାନଙ୍କୁ ପ୍ରବଳ ଆଗ୍ରହ ଥିଲା । ମାତ୍ର ବାପା ଚେତନ କୁମାର ଏହା ସହିପାରି ନଥିଲେ । ସେ ଝିଅମାନଙ୍କଠାରୁ ମୋବାଇଲ ଛଡ଼ାଇ ନେଇଯାଇଥିଲେ । ଏଥିରେ ଉତ୍ତ୍ୟକ୍ତ ହୋଇ ଝିଅମାନେ ଆତ୍ମହତ୍ୟାର ପଥ ବାଛିଥିବା କୁହାଯାଇଛି ।
ଏପରିକି ଝିଅମାନେ ୨ରୁ ୩ ବର୍ଷ ଧରି ସ୍କୁଲକୁ ଯାଉ ନଥିଲେ । ଚେତନ ଏତେ ଅଭାବ ମଧ୍ୟରେ ରହିଥିଲେ ଯେ ସେ ଘରର ବିଦ୍ୟୁତ ଦେୟ ଭରିବା ଲାଗି କିଛି ଦିନ ତଳେ ନିଜର ମୋବାଇଲ ଫୋନକୁ ବିକି ଦେଇଥିଲେ । ସେ ଜଣେ ଅନଲାଇନ ଟ୍ରେଡର ଥିଲେ । କିଛି ଦିନ ମଧ୍ୟରେ ସେ ପ୍ରାୟ ୩୦ ଲକ୍ଷ ଟଙ୍କା କ୍ଷତି ସହିଥିଲେ । ୩ ଭଉଣୀଙ୍କ ନାମ ନିଶିକା, ପ୍ରାଚୀ ଓ ପାଖି । ସେମାନଙ୍କ ନାମକୁ ବି ଆଲିଜା, ସିଣ୍ଡି ଓ ମାରିଆ ନାମରେ ପରିବର୍ତ୍ତନ କରିଥିଲେ । ଗତ ୪ ତାରିଖ ରାତିରେ ଗାଜିଆବାଦର ଏକ ଆପାର୍ଟମେଣ୍ଟର ନବମ ମହଲାରୁ ଡେଇଁ ସେମାନେ ଆତ୍ମହତ୍ୟା କରିଥିଲେ ।