ଗଞ୍ଜାମ : ଗ୍ରାମୀଣ ହାଟ ନାଁରେ ହରିଲୁଟ୍ । ବିନା ସୂଚନା ଫଳକରେ ଖେଳ ପଡ଼ିଆରେ ସେଡ କରି କରାଯାଇଛି ଟଙ୍କା ହଡ଼ପ । ବିଡିଓ ଓ ଠିକାଦାରଙ୍କ ମଧୁଚନ୍ଦ୍ରିକା ଅଭିଯୋଗ । ଗଞ୍ଜାମ ସାନଖେମୁଣ୍ଡି ବ୍ଲକ ପାଟପୁର ଉଚ୍ଚ ବିଦ୍ୟାଳୟର ଖେଳ ପଡ଼ିଆରେ ନିର୍ମାଣ ହୋଇଛି ଗ୍ରାମୀଣ ହାଟ । ପ୍ରଧାନ ଶିକ୍ଷୟିତ୍ରୀଙ୍କ ବିନା ଅନୁମତିରେ କାର୍ଯ୍ୟ କରାଯାଇଛି । ଦୁଇଟି ଛୋଟିଆ ଭେଣ୍ଡିଂ ଜୋନ ନିର୍ମାଣ କରି ୨୩ ଲକ୍ଷ ଟଙ୍କାର ଦୁର୍ନୀତି ହୋଇଥିବା ଅଭିଯୋଗ ହୋଇଛି । ଅଭିଯୋଗ ପରେ ସଂପୃକ୍ତ ଠିକାଦାର ତରବରିଆ ଭାବେ ପ୍ରଧାନ ଶିକ୍ଷୟିତ୍ରୀଙ୍କ ନିକଟରୁ ଅନୁମତି ପତ୍ର ଲେଖି ନେଇଥିଲେ । ପରେ ଜିଲ୍ଲା ଶିକ୍ଷା ଅଧିକାରୀଙ୍କ ନିର୍ଦ୍ଦେଶରେ ପ୍ରଧାନ ଶିକ୍ଷୟିତ୍ରୀ ଉକ୍ତ ଅନୁମତି ପତ୍ରକୁ ବାତିଲ ପାଇଁ ସାନଖେମୁଣ୍ଡି ବିଡ଼ିଓଙ୍କୁ ଚିଠି ଲେଖିଥିଲ । ଏଠି ପ୍ରଶ୍ନ ଉଠୁଛି- କାହା ନିର୍ଦ୍ଦେଶରେ ବେଆଇନ ଭାବେ ନିର୍ମାଣ ହୋଇଛି ଗ୍ରାମୀଣ ହାଟ ? ଏଥିପାଇଁ ଦାୟୀ କିଏ ?

ପାଟପୁର ପାଣ୍ଡା ଛକ ମୁଖ୍ୟ ରାସ୍ତାରେ ଅନେକ ବେପାରୀ ପରିବା ବ୍ୟବସାୟ କରୁଛନ୍ତି । ଫଳରେ ବିଭିନ୍ନ ସମୟରେ ଟ୍ରାଫିକ ସମସ୍ୟା ଉପୁଜୁଛି । ଦୁର୍ଘଟଣା ବି ଘଟୁଛି । ଯାହାକୁ ଦୃଷ୍ଟିରେ ରଖି ରାଧାଦେଇପୁର ସରପଞ୍ଚ ପଞ୍ଚାୟତର ସଂରକ୍ଷିତ ସରକାରୀ ଜାଗାରେ ଗ୍ରାମୀଣ ହାଟ ନିର୍ମାଣ ପାଇଁ ବ୍ଲକ ପ୍ରଶାସନକୁ ଲିଖିତ ଭାବେ ଜଣାଇଥିଲେ । ପ୍ରଶାସନ ପକ୍ଷରୁ ଜି.ଆଇ.ଏ ଓ ବିଜିବିଓ ପାଣ୍ଠିରୁ ରାଧାଦେଇପୁର ପଞ୍ଚାୟତରେ ରୁରାଲ ହାଟ ପାଇଁ ୧୦ ଲକ୍ଷ ଟଙ୍କା ମଞ୍ଜୁର କରାଯାଇଥିଲା । ମାର୍କେଟ ସେଡ ପାଇଁ ୩ ଲକ୍ଷ ଓ ପାଟପୁର ପଞ୍ଚାୟତ ଅଧୀନରେ ରୁରାଲ ହାଟ ପାଇଁ ୧୦ ଲକ୍ଷ ଟଙ୍କା ମଞ୍ଜୁର କରାଯାଇଥିଲା । ପାଟପୁର, ରାଧାଦେଇପୁର ପଞ୍ଚାୟତରେ ପର୍ଯ୍ୟାପ୍ତ ସରକାରୀ ଜାଗା ଅଛି । ହେଲେ ତରବରିଆ ଭାବେ ସ୍କୁଲ ପଡ଼ିଆରେ କାହିଁକି ନିର୍ମାଣ କରାଗଲା ହାଟ ? ଏହାର ଭବିଷ୍ୟତକୁ ନେଇ ଅନିଶ୍ଚିତତା ଦେଖାଦେଇଛି । ଘଟଣାର ଉଚ୍ଚସ୍ତରୀୟ ତଦନ୍ତ ଦାବି କରିଛନ୍ତି ସ୍ଥାନୀୟ ସରପଞ୍ଚ ।

ପଟାଙ୍ଗୀ : ଯୁଆଡ଼େ ଦେଖିବେ ସିଆଡ଼େ ଅଳିଆ । ମୁକୁଳା ପଡ଼ିଛି ଡ୍ରେନ । ଦୁର୍ଗନ୍ଧରେ ଫାଟି ପଡୁଛି ପରିବେଶ । ଏ ହେଉଛି କୋରାପୁଟ ଜିଲ୍ଲା ପଟାଙ୍ଗୀ ସଦର ମହକୁମା ଜନଗହଳିପୂର୍ଣ୍ଣ ଅଞ୍ଚଳର ଦୃଶ୍ୟ । ବସଷ୍ଟାଣ୍ଡ ଠାରୁ ତହସିଲ ଅଫିସ ଆଗ ପର୍ଯ୍ୟନ୍ତ କୁଢ଼କୁଢ଼ ଅଳିଆ ଆବର୍ଜନା ପଡ଼ି ରହିଛି । ଡ୍ରେନରେ ଜମି ରହିଛି ଦୂଷିତ ପାଣି । ହେଲେ ଦୀର୍ଘ ଦିନ ଧରି ସଫେଇ ହେଉନଥିବା ଅଭିଯୋଗ ହୋଇଛି । ଡ୍ରେନେଜ ପାଣି ଜମି ରହିବାରୁ ମଶାଙ୍କ ସଂଖ୍ୟା ବଢ଼ିବାରେ ଲାଗିଛି । ଯାହାକୁ ନେଇ ଚିନ୍ତାରେ ଲୋକେ ।

ପ୍ରତିଦିନ ଏହି ରାସ୍ତା ଦେଇ ଯାଆସ କରୁଛନ୍ତି ଶହ ଶହ ଲୋକ । ନିକଟରେ ସରକାରୀ କାର୍ଯ୍ୟାଳୟ, ବ୍ୟାଙ୍କ ଓ ବସଷ୍ଟାଣ୍ଡ ରହିଛି । ହେଲେ ଏଠାରୁ ଅଳିଆ ହଟୁନି । ଯାହା ପରିମଳ ବ୍ୟବସ୍ଥା ଉପରେ ପ୍ରଶ୍ନବାଚୀ ସୃଷ୍ଟି କରିଛି । ଶୀଘ୍ର ଅଞ୍ଚଳରୁ ଅଳିଆ ହଟାଯାଉ, ଡ୍ରେନ ସଫା କରିବାକୁ ସ୍ଥାନୀୟ ଲୋକେ ଦାବି କରିଛନ୍ତି । କେବେ ପ୍ରଶାସନର ନିଦ ଭାଙ୍ଗିବ ? କେବେ ପଟାଙ୍ଗୀରୁ ହଟିବ ଅଳିଆ ? କେବେ ସଫା ହେବ ଡ୍ରେନ ? ଏହା କଣ ସ୍ଵଚ୍ଛ ଭାରତ ଅଭିଯାନକୁ ଉପହାସ କରୁନି କି ?

ଜଳେଶ୍ବର : ରାସ୍ତା କଡ଼ରେ ପଡ଼ିଛି ସରକାରୀ ଔଷଧ । କନ୍ଧମାଳ ଜିଲ୍ଲା ଫୁଲବାଣୀ ସୁନାସିର ନଗର ରାସ୍ତା କଡ଼ରେ ପଡ଼ିଛି କୁଢକୁଢ ମେଡିସିନ । କଫ୍ ସିରପ୍, ଗର୍ଭଧାରଣ ପରୀକ୍ଷା କିଟ୍, ଇଞ୍ଜେକସନ, ଭିଟାମିନ, ସମେତ ବିଭିନ୍ନ ପ୍ରକାରର ଔଷଧ ପଡ଼ିଛି । ସବୁଠୁ ବଡ଼ କଥା ହେଲା କେତେକ ମେଡିସିନର ଏକ୍ସପାଏରୀ ସରିଥିବା ବେଳେ କେତେକର ଏବେବି ରହିଛି । ଏଠି ପ୍ରଶ୍ନ ଉଠୁଛି- ସରକାରୀ ମେଡିସିନ ଗୁଡିକ ରାସ୍ତା କଡ଼କୁ ଗଲା କେମିତି ? କିଏ ଓ କାହିଁକି ଆଣିଲା ? ଅନ୍ୟପଟେ ଘଟଣାର ଉଚ୍ଚସ୍ତରୀୟ ତଦନ୍ତ କରାଯିବ । ଯଦି କୌଣସି ଅବହେଳା କିମ୍ବା ଅନିୟମିତତା ହୋଇଥିବା ଜଣାପଡ଼େ । ତେବେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ଦାଇତ୍ୱରେ ଥିବା ସିଡିଏମଓ ।

ଭୁବନେଶ୍ବର : ଆଜି ସରୁଛି ବିଜେଡିର ଡେଡ୍ ଲାଇନ। ଏବେ ଆରମ୍ଭ ହୋଇଛି ଆନ୍ଦୋଳନ। ବହି ତ୍ରୁଟି ନେଇ ସ୍କୁଲ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡଙ୍କ ଇସ୍ତଫା ଦାବିରେ ଆନ୍ଦୋଳନକୁ ଜୋରଦାର କରିଛି ବିଜେଡି। ଆଜିଠୁ ଭୁବନେଶ୍ବର ଗାନ୍ଧୀ ମାର୍ଗରେ ବିଜେଡି ଯୁବ ଛାତ୍ର ସଂଗଠନର ଅହୋରାତ୍ର ଧାରଣା ଆରମ୍ଭ ହୋଇଛି। ବିଧାନସଭା ବି ଘେରାଉ କରାଯିବ। ଏଥିରେ ବିଧାୟକ, ସାଂସଦଙ୍କ ସମେତ ବୁଦ୍ଧିଜୀବୀମାନେ ବି ସାମିଲ ହେବେ । ସ୍କୁଲ ବହିରେ ୧୬୭୮ରୁ ଅଧିକ ତ୍ରୁଟି ହୋଇଛି। ଏଥିପାଇଁ ସ୍କୁଲ ଓ ଗଣଶିକ୍ଷା ମନ୍ତ୍ରୀଙ୍କୁ  ଦାୟୀ କରି ତାଙ୍କ ଇସ୍ତଫା ଦାବି କରିଥିଲା ବିଜେଡି। ମନ୍ତ୍ରୀ କିନ୍ତୁ ପଦ ଛାଡି଼ନଥିବାରୁ ଆନ୍ଦୋଳନକୁ ଜୋରଦାର କରାଯାଇଛି। ବର୍ଷାରେ ଭିଜି ଭିଜି ଧାରଣା ଦେଇଛନ୍ତି ବିଜେଡି ଯୁବ ଓ ଛାତ୍ର ସଂଗଠନର କର୍ମୀ। ବିଜେଡି ବିଧାୟକମାନେ ବି ଏଥିରେ ସାମିଲ ହୋଇଛନ୍ତି।