ଭୁବନେଶ୍ୱର: ବିଜେଡି ଟିକେଟ୍ କ୍ରେଜ୍ । ପ୍ରତିଦିନ ଟିକେଟ୍ ଆଶାୟୀଙ୍କ ସଂଖ୍ୟା ବଢୁଛି । କିଏ ସଂଗନଠ ଜରିଆରେ ଆବେଦନ କରୁଛନ୍ତି ତ କିଏ ନବୀନ ନିବାସକୁ ନିଜ ପ୍ରୋଫାଇଲ ପଠାଉଛନ୍ତି । ଆଗାମୀ ନିର୍ବାଚନରେ ବିଜେଡିର ବଡ଼ ବିଜୟ ନେଇ ବିଭିନ୍ନ ସର୍ଭେ ରିପୋର୍ଟ ଆସିବା ପରେ ଏହି ଦଳରୁ ପ୍ରାର୍ଥୀ ହେବା ପାଇଁ ଆଶାୟୀଙ୍କ ଆଗ୍ରହ ବଢୁଛି । ବିଜେଡି ୧୨୮ ବିଧାନସଭା ଓ ୧୮ ଲୋକସଭା ଆସନ ଜିତିବା ଚିତ୍ର ସ୍ପଷ୍ଟ ହେଉଥିବାରୁ ସୃଷ୍ଟି ହୋଇଛି ଏଭଳି ସ୍ଥିତି ।

୧୦ ହଜାରରୁ ଅଧିକ ଆବେଦନ ଆସିଥିବା ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ସୋସିଆଲ ମିଡିଆରେ ସୂଚନା ଦେଇଛନ୍ତି । ଓଡ଼ିଶାବାସୀଙ୍କ ଆଶୀର୍ବାଦରୁ ୨୪ରେ ବିଜେଡିର ଐତିହାସିକ ବିଜୟ ହେବ ବୋଲି ସେ ଦମ୍ଭୋକ୍ତି ପ୍ରକାଶ କରିଛନ୍ତି । ସର୍ଭେ ରିପୋର୍ଟ ଓ ଓଡ଼ିଶାବାସୀ ନବୀନ ପଟ୍ଟନାୟକଙ୍କୁ ଷଷ୍ଠଥର ମୁଖ୍ୟମନ୍ତ୍ରୀ କରିବାକୁ ମନସ୍ଥ କରିଥିବା ସଂକେତ ମିଳିବା ପରେ ବିଜେଡି ପ୍ରାର୍ଥୀ ହେବାକୁ ଜାତୀୟ ଦଳର ନେତା, ବିଭିନ୍ନ ବର୍ଗର ପେସାଦାର ବ୍ୟକ୍ତି ଓ ମହିଳାଙ୍କ ଆଗ୍ରହ ବଢ଼ିଛି । ତେବେ ମୁଖ୍ଯମନ୍ତ୍ରୀ ଚୂଡ଼ାନ୍ତ ନିଷ୍ପତ୍ତି ନେବେ।

ଭୁବନେଶ୍ୱର: ଓଡ଼ିଶାରେ ମାଇକ୍ରୋସଫ୍ଟର ସହ-ପ୍ରତିଷ୍ଠାତା ବିଲ ଗେଟ୍ସ। ଆସନ୍ତାକାଲି ସେ ଭୁବନେଶ୍ବରରେ ବିଭିନ୍ନ କାର୍ଯ୍ଯକ୍ରମରେ ଯୋଗଦେବେ। ମାଆ ମଙ୍ଗଳା ବସ୍ତି ଗସ୍ତ କରି ମୁକ୍ତା ଓ ଜାଗା ମିଶନରେ ହୋଇଥିବା ବିକାଶମୂଳକ କାର୍ଯ୍ୟ ବୁଲି ଦେଖିବେ। ଯୋଜନାରେ କିଭଳି ଲୋକଙ୍କୁ ଥଇଥାନ କରାଯାଇଛି ସେନେଇ ଅନୁଧ୍ଯାନ କରିବେ ବିଲ ଗେଟ୍ସ।

କିଟ ଆଉ କିସର ପ୍ରତିଷ୍ଠାତା ଅଚ୍ଯୁତ ସାମନ୍ତଙ୍କ ସହ ଏକ ବୈଠକ କାର୍ଯ୍ୟକ୍ରମ ରହିଛି। ଏହାପରେ କୃଷି ଭବନ ପରିଦର୍ଶନ କରିବା ସହ କୃଷି ସମୀକ୍ଷା କେନ୍ଦ୍ର ଯାଇ ଅନୁଧ୍ୟାନ କରିବେ। ବିଲ୍ ଆଣ୍ଡ ମେଲିନ୍ଦା ଗେଟସ୍ ଫାଉଣ୍ଡେସନର ବୈଷୟିକ ସହଯୋଗରେ ଚାଲିଛି କୃଷି ସମୀକ୍ଷା କେନ୍ଦ୍ର। କୃଷିର ଇଣ୍ଟିଗ୍ରେଟେଡ୍ କମାଣ୍ଡ ସିଷ୍ଟମ ଭାବେ କୃଷି ସମୀକ୍ଷା କେନ୍ଦ୍ର କାମ କରୁଛି। କୃଷି ସମୀକ୍ଷା କେନ୍ଦ୍ର ଜରିଆରେ ଜମି ନଥିବା ଚାଷୀଙ୍କୁ ମଧ୍ୟ ପରାମର୍ଶ ଦିଆଯାଉଛି।

ଏହାପରେ ବିଲ ଗେଟ୍ସ ମିଶନ ଶକ୍ତି ବଜାର ମଧ୍ଯ ଯିବାର କାର୍ଯ୍ଯକ୍ରମ ରହିଛି। ପରେ ନବୀନ ନିବାସ ଯାଇ ମୁଖ୍ଯମନ୍ତ୍ରୀଙ୍କୁ ସାକ୍ଷାତ କରିବେ। ବିଲ ଗେଟ୍ସଙ୍କ ଓଡ଼ିଶା ଗସ୍ତ ଅନେକ ସମ୍ଭାବନା ନେଇଆସିଛି। ବିଶେଷକରି କୃଷି କ୍ଷେତ୍ରରେ ଏଆଇର ପ୍ରଚଳନ ଏବଂ ଜାଗାମିଶନ ଓ ମିଶନ ଶକ୍ତି କ୍ଷେତ୍ରରେ ନୂଆ ଆଶା ସୃଷ୍ଟି ହୋଇଛି।

ଭୁବନେଶ୍ବର: ଭୁବନେଶ୍ବର ଉପକଣ୍ଠ ଜଟଣୀ ବ୍ଲକ ବରକୁଦା ଗ୍ରାମନିବାସୀ ଦୀନବନ୍ଧୁ। ଯୁଆଡ଼େ ଯାଆନ୍ତି ସିଆଡେ ଗଛଟିଏ ଲଗାନ୍ତି। ଏହା ତାଙ୍କର ଜୀବିକା ନୁହେଁ ବରଂ ତ୍ଯାଗର ବିରଳ ଉଦାହରଣ। ସମାଜ ଓ ପ୍ରକୃତି ଲାଗି ନେଇଛନ୍ତି ବଡ଼ ନିଷ୍ପତ୍ତି। ଦୀନବନ୍ଧୁଙ୍କ ପରିବାର କହିଲେ ପତ୍ନୀ, ପୁଅ, ବୋହୂ ଓ ଗୋଟିଏ ନାତି । ପରିବାରର ହସଖୁସି ଭିତରେ ଦୁନିଆକୁ ବଞ୍ଚାଇବା ଲାଗି ପଣ କରିଛନ୍ତି ଦୀନବନ୍ଧୁ। ଚାଷ ଓ ପୁଅଙ୍କ ରୋଜଗାରରେ ଘର ଚଳେ । ଦୀନବନ୍ଧୁଙ୍କ ମହତ କାର୍ଯ୍ୟକୁ ସହଯୋଗ କରିଆସିଛନ୍ତି ଗ୍ରାମବାସୀ । ବିଭିନ୍ନ ଅନୁଷ୍ଠାନ ପକ୍ଷରୁ ମିଳିଛି ଶତାଧିକ ସମ୍ମାନ ଓ ପ୍ରଶଂସା ପତ୍ର।

କେବଳ ମନରେ ନୁହେଁ, ଦେହରେ ବି ସବୁଜିମାର ବାର୍ତ୍ତା। ପରିଣତ ବୟସରେ ବିରଳ ଉନ୍ମାଦନା। ପ୍ରାଣର ସ୍ପନ୍ଦନ ସହ ଏକୀଭୂତ ବୃକ୍ଷର ଜୀବନ। ଏ ହେଉଛନ୍ତି ଦୀନବନ୍ଧୁ ବେହେରା। ନା ଖରା, ନା ବର୍ଷା, ଗାଁ ରାସ୍ତା ହେଉ ବା ରାଜରାସ୍ତା । ସବୁଠି ଦେଖାଯାନ୍ତି ଦୀନବନ୍ଧୁ। ସବାରୀ- ପୁରୁଣାକାଳିଆ ଲୁନା। ପଛରେ ବି ଲେଖାଅଛି ଆହ୍ବାନର ବାର୍ତ୍ତା। ଆଉ ଲୁନା ମଝିରେ ଲଦା ବିଭିନ୍ନ କିସମର ଗଛ। ବୟସର ସାୟାହ୍ନରେ ଦୀନବନ୍ଧୁ। ହେଲେ ଥକିନାହାନ୍ତି ଏ ସବୁଜ ସାଧକ।

କେବଳ ଏତିକି ନୁହେଁ ଗଛ ଲଗାଇବା ପରେ ତାହାର ଯତ୍ନ ନେବାକୁ ପଛାନ୍ତି ନାହିଁ ଦୀନବନ୍ଧୁ। ୬୫ ବର୍ଷ ବୟସରେ ବି ଥକିନଥିବା ଦୀନବନ୍ଧୁ ଗତ ୪୫ବର୍ଷ ମଧ୍ୟରେ ଭୁବନେଶ୍ବର ସମେତ ରାଜ୍ୟର ବିଭିନ୍ନ ସ୍ଥାନରେ ରୋପଣ କରିଛନ୍ତି ଲକ୍ଷାଧିକ ବୃକ୍ଷ। ନିଜ ଘରେ କରିଥିବା ଚାରା ଫାର୍ମରୁ କିଛି ଗଛ, କଟୁରୀ, ଲୁହାରଡ, ପାଣି ବୋତଲ ଧରି ବାହାରି ଯାଆନ୍ତି। ଆଉ ରାସ୍ତା ପାର୍ଶ୍ଵ, ମନ୍ଦିର, ସ୍କୁଲ ଓ ମସଜିଦ ଓ ପଡିଆରେ ଗଛ ଲଗାନ୍ତି । ଲୁନା ପଛରେ ବି ଲେଖିଛନ୍ତି ଗୋଟିଏ ଗଛ ବଢେଇ ଦିଅ, ପ୍ରଳୟର ଦିନ ଘୁଞ୍ଚାଇ ଦିଅ । ସ୍ଥାନୀୟ ଅଞ୍ଚଳରେ ତାଙ୍କୁ କିଏ ଗଛ ମଉସା ଡାକେ ତ କିଏ କହେ ଗ୍ରୀନ ମ୍ୟାନ । ଆଉ କିଏ କୁହନ୍ତି ସେ ଦୀନବନ୍ଧୁ ନୁହନ୍ତି ସେ ବୃକ୍ଷର ବନ୍ଧୁ ।

ଭୁବନେଶ୍ୱର: ଓଡ଼ିଶାରେ ଏଣିକି ପ୍ରତି ବର୍ଷ ହେବ ବାଘ ଗଣନା। କ୍ୟାମେରା ଟ୍ରାପ ଜରିଆରେ ବର୍ଷ ସାରା ମହାବଳ ବାଘଙ୍କ ସ୍ଥିତି ଉପରେ ରଖାଯିବ ନଜର । ଗତକାଲି ପ୍ରକାଶ ପାଇଥିବା ରାଜ୍ୟର ପ୍ରଥମ ବାଘ ଗଣନା ରିପୋର୍ଟରେ ରାଜ୍ୟରେ ୩୦ଟି ମହାବଳ ଓ ୮ଟି ଶାବକ ଥିବା ଜଣାପଡିଛି । ସେଥିରୁ ଶିମିଳିପାଳରେ ୨୭ଟି ମହାବଳ ବାଘ ସହ ୮ ଶାବକ ଥିବା ବେଳେ କେନ୍ଦୁଝର, ପାରଳାଖେମୁଣ୍ଡି ଓ ହୀରାକୁଦ ବନଖଣ୍ଡରେ ଗୋଟିଏ ଲେଖାଏଁ ମହାବଳଙ୍କ ଉପସ୍ଥିତି ସ୍ପଷ୍ଟ ହୋଇଛି।

ପ୍ରାଣୀ ପ୍ରେମୀଙ୍କ ଲାଗି ଖୁସି ଖବର। ଓଡ଼ିଶାରେ ବଢୁଛି ବାଘ ସଂଖ୍ୟା। ଶିମିଳିପାଳ ବ୍ୟତୀତ ହୀରାକୁଦ, ପାରଳାଖେମୁଣ୍ଡି ଓ କେନ୍ଦୁଝରରେ ବି ରହିଛି ବାଘଙ୍କ ଉପସ୍ଥିତି। ସାରା ବିଶ୍ୱରେ କେବଳ ଶିମିଳିପାଳରେ ଅଛନ୍ତି ୧୩ କଳା ବାଘ। ହଦଗଡ଼, କେନ୍ଦୁଝର ଓ କୁଲଡ଼ିହା ଅଭୟାରଣ୍ୟକୁ ନେଇ ବଢିବ ଶିମିଳିପାଳର କରିଡ଼ର।

୨୦୨୨ରେ ଏନଟିସିଏ ଦ୍ବାରା ହୋଇଥିବା ବାଘ ଗଣନାରେ ରାଜ୍ୟରେ ୨୦ଟି ବାଘ ଥିବା ବେଳେ ଏଥର ଏହା ୩୦କୁ ବୃଦ୍ଧି ପାଇଛି। ରାଜ୍ୟରେ ବାଘ ସଂଖ୍ୟା ବୃଦ୍ଧି ପାଉଥିବା ଉତ୍ସାହଜନକ ବୋଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଟ୍ବିଟ କରିଛନ୍ତି। ଶିମିଳିପାଳରେ ମୋଟ ୨୭ଟି ବାଘ ଥିବା ବେଳେ ଏଥିରୁ କଳାବାଘ ସଂଖ୍ୟା ୧୩। ଇନ୍ ବ୍ରିଡ଼ିଂ ଯୋଗୁଁ କଳା ବାଘଙ୍କ ସଂଖ୍ୟା ବଢ଼ୁଥିବା କହିଛନ୍ତି ବନ୍ୟପ୍ରାଣୀ ପିସିସିଏଫ୍। ଏହି ସମସ୍ୟାର ସମାଧାନ ପାଇଁ ଅନ୍ୟ ସ୍ଥାନରୁ ବାଘୁଣୀ ଆଣି ଶିମିଳିପାଳରେ ଛାଡ଼ିବାକୁ ଯୋଜନା ହୋଇଛି। ଏଥିପାଇଁ NTCA ଓ ୱାଇଲ୍ଡ ଲାଇଫ ଇନଷ୍ଟିଚ୍ୟଟ ଅଫ ଇଣ୍ଡିଆ ସହ ଯୋଗାଯୋଗ କରାଯାଇଛି।

ଭୁବନେଶ୍ୱର: ଏଣିକି ଆଉ ୫ ଲକ୍ଷ ନୁହେଁ ୭୦ ଲକ୍ଷ ଏସଏଚଜିକୁ ବିନା ସୁଧରେ ୧୦ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ବ୍ୟବସ୍ଥାର ଶୁଭାରମ୍ଭ କରିଛନ୍ତି ମୁଖ୍ଯମନ୍ତ୍ରୀ। ଆସନ୍ତା ୫ ବର୍ଷ ମଧ୍ୟରେ ୭୫ ହଜାର କୋଟି ଟଙ୍କାର ବ୍ୟାଙ୍କ ଋଣ ମା’ ମାନଙ୍କୁ ଯୋଗାଇ ଦିଆଯିବାକୁ ଲକ୍ଷ୍ଯ ରଖାଯାଇଛି। ଏହାଛଡ଼ା ୭୩୦ କୋଟି ଟଙ୍କା ଅଟକଳରେ ମିଶନ ଶକ୍ତି ମାଆଙ୍କ ପାଇଁ ୟୁନିଫର୍ମ ଓ ବ୍ଲେଜର ସହାୟତା ଏବଂ  ୧୪୫ କୋଟି ଟଙ୍କାର ସୁଧ ଫେରସ୍ତ କରିଥିଲେ ନବୀନ।

ଏହି ଅବସରରେ ନବୀନ କହିଥିଲେ, ମିଶନ ଶକ୍ତି ମୋର ସବୁଠାରୁ ପ୍ରିୟ କାର୍ଯ୍ୟକ୍ରମ। ବିଦେଶ ଯାଇ ମହିଳାମାନେ ଭିନ୍ନ ଅନୁଭୂତି ନେଇଥିବାରୁ ଖୁସି ପ୍ରକାଶ କରିଥିଲେ ମୁଖ୍ଯମନ୍ତ୍ରୀ।

ମିଶନ ଶକ୍ତି ମାଆମାନେ ହୋଇଛନ୍ତି ସରକାରଙ୍କ ପାର୍ଟନର। ସେମାନଙ୍କ ହାତ ତିଆରି ଜିନିଷର ବିକ୍ରି ପାଇଁ ହୋଇଛି ମିଶନ ଶକ୍ତି ବଜାର।  ଭୁବନେଶ୍ୱରରେ ଅତ୍ୟାଧୁନିକ ମିଶନ ଶକ୍ତି ବଜାର ଖୋଲାଯାଇଛି। ଆସନ୍ତା ୫ ବର୍ଷ ମଧ୍ୟରେ ରାଜ୍ୟରେ ୫ ହଜାର ମିଶନ ଶକ୍ତି ବଜାର ଓ ରିଟେଲ ଆଉଟଲେଟ ଖୋଲାଯିବ। ମାଆଙ୍କୁ ୮ ହଜାର କୋଟି ଟଙ୍କାର ସରକାରୀ ବିଜିନେସ୍ ସହାୟତା ଯୋଗାଇ ଦିଆଯାଇଅଛି। ମିଶନ ଶକ୍ତି କମ୍ୟୁନିଟି ସପୋର୍ଟ ଷ୍ଟାଫ ଓ ଫେଡେରେସନ ଲିଡର ମାନେ ଖୁବଶୀଘ୍ର ଖୁସି ଖବର ପାଇବେ ବୋଲି ପ୍ରତିଶ୍ରୁତି ଦେଇଛନ୍ତି ନବୀନ ।

ମୁଖ୍ଯମନ୍ତ୍ରୀଙ୍କ ମହିଳା ସଶକ୍ତିକରଣ ନୀତି ନାରୀ ଶକ୍ତିରେ ଆଣିଛି ଆନ୍ଦୋଳନ। ମାଆମାନଙ୍କୁ ଘରର ଚାରିକଣରୁ ନେଇ ଦୁବାଇ ଓ ସିଙ୍ଗାପୁରର ଅନୁଭୂତି ଦେଇଛନ୍ତି ରାଜ୍ଯ ସରକାର। ସ୍ବତନ୍ତ୍ର ପରିଚୟ ଦେଇଥିବାରୁ ମୁଖ୍ଯମନ୍ତ୍ରୀ ନବୀନ ପଟ୍ଟନାୟକଙ୍କୁ କୃତଜ୍ଞତା ଜଣାଇଛନ୍ତି ମିଶନ ଶକ୍ତି ସଦସ୍ଯା।