ନୂଆଦିଲ୍ଲୀ: ଦେଶରେ ହୁ ହୁ ହୋଇ ବଢ଼ି ଚାଲିଛି କରୋନା ସଂକ୍ରମଣ । କରୋନାର ନୂଆ ଭାରିଆଣ୍ଟ ଓମିକ୍ରନ ଫଳରେ ଦେଶରେ କରୋନା ସଂକ୍ରମଣ ବୃଦ୍ଧି ପାଉଛି । ତେବେ ଆଗାମୀ ଏକ ମାସ ମଧ୍ୟରେ ଗ୍ରାମାଞ୍ଚଳରେ ଓମିକ୍ରନ ଆକ୍ରାନ୍ତଙ୍କ ସଂଖ୍ୟା ବଢ଼ିବ ବୋଲି ଆକଳନ କରିଛନ୍ତି ସ୍ୱାସ୍ଥ୍ୟ ବିଶେଷଜ୍ଞ । କିନ୍ତୁ ଭାରତରେ ହାଇବ୍ରିଡ୍ ଇମ୍ୟୁନିଟି ଯୋଗୁ ଅଧିକ ଲୋକ ହସ୍ପିଟାଲରେ ଭର୍ତ୍ତି ହେବେନାହିଁ । ସେହିପରି ସ୍ୱାସ୍ଥ୍ୟସେବା କ୍ଷେତ୍ରରେ ସେଭଳି ସମସ୍ୟା ମଧ୍ୟ ଦେଖିବାକୁ ମିଳିବ ନାହିଁ ବୋଲି ପୁଲମୋନୋଲୋଜିଷ୍ଟ ଅନୁରାଗ ଅଗ୍ରୱାଲ କହିଛନ୍ତି । ଅନ୍ୟପକ୍ଷରେ ସେ ଆହୁରି କହିଛନ୍ତି ଯେ ମୁମ୍ବାଇ ଓ ଦିଲ୍ଲୀରେ କୋଭିଡ-୧୯ ମହାମାରୀର ତୃତୀୟ ଲହରର ପିକ୍ ଅତିକ୍ରମ କରିସାରିଛି । ଜାନୁଆରୀ ଶେଷରୁ ଫେବୃଆରୀ ପ୍ରଥମ ସପ୍ତାହ ମଧ୍ୟରେ ସାରା ଦେଶରେ ଓମିକ୍ରନ୍ ଲହରର ପ୍ରଭାବ ହ୍ରାସ ପାଇବ ବୋଲି ସ୍ୱାସ୍ଥ୍ୟ ବିଶେଷଜ୍ଞ କହିଛନ୍ତି ।
ନେତାଜୀଙ୍କ ପ୍ରତିମୂର୍ତ୍ତିରେ ଆଗ ଫୁଲମାଳ ଅର୍ପଣକୁ ନେଇ ଫୁଟିଲା ଗୁଳି
କୋଲକାତା: ନେତାଜୀଙ୍କ ପ୍ରତିମୂର୍ତ୍ତିରେ ଫୁଲମାଳ ଅର୍ପଣକୁ ନେଇ ଗୁଳିମାଡ଼ । ପଶ୍ଚିମବଙ୍ଗରେ ବିଜେପି ସାଂସଦ ଅର୍ଜୁନ ସିଂହଙ୍କ ଦାଦାଗିରି ଦେଖିବାକୁ ମିଳିଛି । ଉତ୍ତର ୨୪ ପ୍ରଗଣା ଭାଟପଡ଼ାରେ ନେତାଜୀଙ୍କ ପ୍ରତିମୂର୍ତ୍ତିରେ ଫୁଲମାଳ ଦେବା ନେଇ ବିଜେପି ସାଂସଦ ଅର୍ଜୁନ ସିଂହଙ୍କ ସମର୍ଥକ ଓ ଟିଏମସି ସମର୍ଥକଙ୍କ ମଧ୍ୟରେ ସଂଘର୍ଷ ହୋଇଛି । ସଂଘର୍ଷ ସହ ବୋମାମାଡ଼ ଓ ଗୁଳି ଚାଳନା କରାଯାଇଛି ।
ବିଜେପି ସାଂସଦ ଅର୍ଜୁନ ସିଂହଙ୍କ ସୁରକ୍ଷାକର୍ମୀ ଗୁଳି ଚାଳନା କରିଥିବା ଅଭିଯୋଗ ହୋଇଛି । ପରେ ଦୁଇଗୋଷ୍ଠୀ ମୁହାଁମୁହିଁ ହୋଇଥିଲେ । ପ୍ରତିମୂର୍ତ୍ତିରେ ମାଲ୍ୟାର୍ପଣ ଲାଗି ବିଜେପି ସାଂସଦ ଅର୍ଜୁନ ସିଂହ ପହଞ୍ଚିବା ମାତ୍ରେ ଉତ୍ତେଜନା ସୃଷ୍ଟି ହୋଇଥିଲା । ଅର୍ଜୁନ ସିଂହଙ୍କୁ ଲକ୍ଷ୍ୟ କରି ପଥର ଫିଙ୍ଗିଥିଲେ । ସ୍ଥିତିକୁ ନିୟନ୍ତ୍ରଣକୁ ଆଣିବାକୁ ଯାଇ ଗୁଳି ଫୁଟାଇଥିଲେ ସୁରକ୍ଷାକର୍ମୀ ।
ସ୍ଥିତିକୁ ନିୟନ୍ତ୍ରଣ କରିବାକୁ ଯାଇ ପୋଲିସ ଲାଠିଚାର୍ଜ କରିଛି । ସାଂସଦଙ୍କ ଗାଡ଼ି ଭଙ୍ଗାରୁଜା କରାଯାଇଥିବା ଅଭିଯୋଗ କରିଛି ବିଜେପି । ଉତ୍ତେଜନାକୁ ଦେଖି ଅଞ୍ଚଳରେ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଛି । ଅର୍ଜୁନ ସିଂହଙ୍କ ସୁରକ୍ଷାକର୍ମୀ ୭ ରାଉଣ୍ଡ ଗୁଳି କରିଥିବା ଟିଏମସି ଅଭିଯୋଗ କରିଛି ।
ଚୀନ ସୀମାରୁ ମିଳିଲେ ଅରୁଣାଚଳରୁ ନିଖୋଜ ଯୁବକ
ନୂଆଦିଲ୍ଲୀ: ଭାରତୀୟ ସେନାର ହସ୍ତକ୍ଷେପ ପରେ ଅପହୃତ ଭାରତୀୟ ଯୁବକଙ୍କୁ ସାତ ଦିନ ଭିତରେ ମୁକ୍ତ କରିବାକୁ ପ୍ରତିଶ୍ରୁତି ଦେଲା ପିପୁଲ୍ସ ଲିବରେସନ ଆର୍ମି । ତିନି ଦିନ ତଳେ ୧୭ ବର୍ଷ ବୟସ୍କ ମିରାମ ତାରୋନଙ୍କ ଅପହରଣ ଖବର ପ୍ରକାଶ ପାଇବା ପରେ ଚାଞ୍ଚଲ୍ୟ ସୃଷ୍ଟି ହୋଇଥିଲା । ଏନେଇ ଅରୁଣାଚଳ ପ୍ରଦେଶ ସାଂସଦ ସୂଚନା ଦେବା ପରେ ଭାରତୀୟ ସେନା ହସ୍ତକ୍ଷେପ କରିଥିଲା । ତାରୋନଙ୍କୁ ପିଏଲଏ ଅପହରଣ କରି ନେଇ ଥିବାବେଳେ ତାଙ୍କ ସାଙ୍ଗ ଜନି ୟାୟିଙ୍ଗ ଖସି ଆସିବାକୁ ସକ୍ଷମ ହୋଇଥିଲେ ।
ଅରୁଣାଚଳ ପ୍ରଦେଶର ଅପରସିଆଙ୍ଗ ଜିଲ୍ଲାରୁ ଅପହରଣ କରାଯାଇଥିବା ନେଇ ସୂଚନା ଦେଇଥିଲେ ସ୍ଥାନୀୟ ସାଂସଦ ତାପିର ଗାଓ । ସେ କହିଥିଲେ ଲୁଙ୍ଗଟା ଯୋରରୁ ମିରାମ ତାରୋନ ନାମକ ଉକ୍ତ ଯୁବକଙ୍କୁ ପିଏଲଏ ଅପହରଣ କରି ନେଇଛି । କିଛି ବର୍ଷ ତଳୁ ସେହି ଅଞ୍ଚଳରେ ଚୀନ ପ୍ରାୟ ୪ କିଲୋମିଟର ରାସ୍ତା ବି ତିଆରି କରିଛି । ଉକ୍ତ ବାଳକକୁ ଉଦ୍ଧାର କରିବା ଲାଗି ଭାରତ ସରକାରଙ୍କ ବିଭିନ୍ନ ସଂସ୍ଥାଙ୍କୁ ସେ ଅନୁରୋଧ କରିଥିଲେ । ଅପହରଣ ସମ୍ପର୍କରେ ପ୍ରଧାନମନ୍ତ୍ରୀ, ଗୃହମନ୍ତ୍ରୀ, ପ୍ରତିରକ୍ଷା ମନ୍ତ୍ରୀ, ଗୃହରାଷ୍ଟ୍ରମନ୍ତ୍ରୀ ଓ ଭାରତୀୟ ସେନା ପଦାଧିକାରୀଙ୍କୁ ବି ସାଂସଦ ସୂଚନା ଦେଇଥିଲେ ।
ଟସ୍ ଜିତି ବୋଲିଂ କରିବ ଭାରତ
କେପଟାଉନ୍: ଆଜି ଭାରତ-ଦକ୍ଷିଣ ଆଫ୍ରିକା ମଧ୍ୟରେ ଖେଳାଯାଉଛି ତୃତୀୟ ତଥା ଶେଷ ଦିନିକିଆ । ଶେଷ ଦିନିକିଆରେ ଟସ୍ ଜିତି ବୋଲିଂ କରିବାକୁ ନିଷ୍ପତ୍ତି ନେଇଛି ଟିମ୍ ଇଣ୍ଡିଆ । ଏହି ସିରିଜର ପ୍ରଥମ ଦୁଇଟି ମ୍ୟାଚରେ ପରାଜୟ ବରଣ କରି ସିରିଜକୁ ହାତଛଡା କରି ସାରିଛି ଟିମ୍ ଇଣ୍ଡିଆ । ତେବେ ତୃତୀୟ ଦିନିକିଆରେ ସମ୍ମାନ ରକ୍ଷା କରିବାକୁ ପଡ଼ିଆକୁ ଓହ୍ଲାଉଛି ଟିମ୍ ଇଣ୍ଡିଆ । ଆଜି ଭାରତ ପକ୍ଷରୁ ଦଳରେ ଚାରୋଟି ପରିବର୍ତ୍ତନ ହୋଇଛି । ତୃତୀୟ ମ୍ୟାଚରେ ସୂର୍ଯ୍ୟ କୁମାର ଯାଦବ, ଜୟନ୍ତ ଯାଦବ, ପ୍ରସିଦ୍ଧ କ୍ରିଷ୍ଣା ଓ ଦିପକ ଚହରଙ୍କୁ ସୁଯୋଗ ମିଳିଥିବାବେଳେ ରବି ଚନ୍ଦ୍ରନ ଅଶ୍ୱିନୀ, ଶାର୍ଦ୍ଦୁଳ ଠାକୁର, ଭେଙ୍କଟେଶ ଆୟର ଓ ଭୁବନେଶ୍ୱର କୁମାର ଚୁଡାନ୍ତ ଏକାଦଶରୁ ବାଦ୍ ପଡ଼ିଛନ୍ତି ।
Four changes for #TeamIndia in the final ODI.
Live – https://t.co/dUN5jhH06v #SAvIND pic.twitter.com/Ml02ISfjSE
— BCCI (@BCCI) January 23, 2022
ଦିନିକିଆ ସିରିଜର ଦୁଇଟି ମ୍ୟାଚରେ ଉଭୟ ବ୍ୟାଟିଂ ଓ ବୋଲିଂରେ ଦୁର୍ବଳ ପ୍ରଦର୍ଶନ କରି ସିରିଜ ହାତଛଡ଼ା କରିଥିଲା ଟିମ୍ ଇଣ୍ଡିଆ । ଖାସ କରି ଭାରତ ଲଗାତର ଦୁଇଟି ମ୍ୟାଚରେ ଭାରତ ପକ୍ଷରୁ ନୈରାଶଜନକ ପ୍ରର୍ଦଶନ କରିଥିଲା । ଖେଳାଯାଇଥିବା ଦୁଇଟି ମ୍ୟାଚରେ ଭାରତୀୟ ବୋଲର ମାତ୍ର ୭ଟି ଓ୍ୱିକେଟ ନେବାରେ ସଫଳ ହୋଇଥିଲେ । ତେଣୁ ଶେଷ ମ୍ୟାଚରେ ଭାରତୀୟ ଦଳରେ ଚାରୋଟି ପରିବର୍ତ୍ତନ କରିଛି । ଅନ୍ୟପଟେ ଟେଷ୍ଟ ସିରିଜକୁ ହାତେଇବା ପରେ ଦିନିକିଆ ସିରିଜ୍ ଜିତି ଦୃଢ ସ୍ଥିତିରେ ଅଛି ଦକ୍ଷିଣ ଆଫ୍ରିକା । ଲଗାତାର ଦୁଇଟି ମ୍ୟାଚ୍ ଜିତି ଖେଳାଳିଙ୍କ ମନୋବଳ ମଧ୍ୟ ଦୃଢ ଅଛି । ତେଣୁ ଶେଷ ମ୍ୟାଚରେ ବିଜୟ ଲାଭ କରି ଦିନିକିଆ ସିରିଜକୁ କ୍ଲିନ୍ ସୁଇପ କରିବା ଲକ୍ଷ୍ୟରେ ରହିଛି ଦକ୍ଷିଣ ଆଫ୍ରିକା ।
ପୁଟିନଙ୍କୁ ପ୍ରଶଂସା ପଡ଼ିଲା ମହଙ୍ଗା, ଇସ୍ତଫା ଦେଲେ ଜର୍ମାନ ନୌସେନା ଅଧ୍ୟକ୍ଷ
ନୂଆଦିଲ୍ଲୀ: ଋଷ ରାଷ୍ଟ୍ରପତିଙ୍କୁ ପ୍ରଶଂସା କରିବା ଜର୍ମାନ ନୌସେନା ଅଧ୍ୟକ୍ଷକଙ୍କୁ ପଡିଲା ମହଙ୍ଗା । ନିଜ ପଦରୁ ଇସ୍ତଫା ଦେଲେ ନୌସେନା ଅଧ୍ୟକ୍ଷ କୋ ଅଚିମ୍ ସ୍କୋନଓ୍ୱାଚ । ନୂଆଦିଲ୍ଲୀରେ ଆୟୋଜିତ ଏକ କାର୍ଯ୍ୟକ୍ରମରେ ଯୋଗଦେଇ ଋଷ ରାଷ୍ଟ୍ରପତି ଭ୍ଲାଦମିର ପୁଟିନଙ୍କୁ ପ୍ରଶଂସା କରିଥିଲେ ଅଚିମ୍ । ପୁଟିନ୍ ଉଚ୍ଚସମ୍ମାନର ହକଦାର ବୋଲି କହିଥିଲେ ଅଚିମ୍ । ୟୁକ୍ରେନ୍ ମାମଲାରେ ସମ୍ମାନୀତ ହେବା ଆବଶ୍ୟକ ବୋଲି ସେ କହିଥିଲେ । ସେ ଋଷ ସହ ଜର୍ମାନର ସମ୍ପର୍କ ସୁଦୃଢ କରିବାକୁ ମଧ୍ୟ ପରାମର୍ଶ ଦେଇଥିଲେ । ୟୁକ୍ରେନ୍ ନାଟୋର ସଦସ୍ୟ ନହେବା ଉଚିତ୍ ବୋଲି ମଧ୍ୟ କହିଥିଲେ ଅଚିମ୍ । ଏହି ମନ୍ତବ୍ୟ ପାଇଁ ଦେଶକୁ ଫେରିବା କ୍ଷଣି ତାଙ୍କୁ ନିଜ ପଦ ଛାଡିବାକୁ ପଡିଛି । କାରଣ ୟୁକ୍ରେନ୍ ଏବଂ ଋଷ ମଧ୍ୟରେ ଏବେ ଯୁଦ୍ଧର ସମ୍ଭାବନା ରହିଛି । ଋଷ ନିଜର ଏକ ଲକ୍ଷ ସୈନ୍ୟ ୟୁକ୍ରେନ୍ ସୀମାରେ ମୁତୟନ କରିଛି । ଏହାକୁ ବିରୋଧ କରିଛି ପଶ୍ଚିମ ୟୁରୋପ ଏବଂ ଆମେରିକା । ଏହି ସମୟରେ ଜର୍ମାନ ନୌସେନା ଅଧ୍ୟକ୍ଷଙ୍କ ଏଭଳି ବିବାଦୀୟ ବୟାନ ତାଙ୍କୁ ମହଙ୍ଗା ପଡିଛି ।
ବିଜେପି ଛାଡି ବିଜେଡିରେ ଯୋଗ ଦେଲେ ପୂର୍ବତନ ବ୍ଲକ ଅଧ୍ୟକ୍ଷା
ଭୁବନେଶ୍ୱର: ବଢ଼ୁଛି ବିଜେଡିର ବଳ । ଗଜପତି ଜିଲ୍ଲା ପାରଳାଖେମୁଣ୍ଡି ନିର୍ବାଚନ ମଣ୍ଡଳୀର ଗୁମ୍ମା ବ୍ଲକର ପୂର୍ବତନ ଅଧ୍ୟକ୍ଷା ମରିୟମ ରଇତ ବିଜେପି ଛାଡି ଆଜି ବିଜେଡିରେ ଯୋଗ ଦେଇଛନ୍ତି । ମରିୟମଙ୍କ ସହିତ ତାଙ୍କ ସମର୍ଥକ ଦେବଚନ୍ଦ୍ର ପ୍ରଧାନ ଅନ୍ୟମାନେ ଆଜି ବିଜେଡିରେ ଯୋଗ ଦେଇଛନ୍ତି । ଗଜପତି ଜିଲ୍ଲା ବିଜେଡି ପର୍ଯ୍ୟବେକ୍ଷକ ତଥା ବିଧାୟକ ଅତନୁ ସବ୍ୟସାଚୀ ନାୟକଙ୍କ ଉପସ୍ଥିତିରେ ଦଳରେ ଯୋଗ ଦେଇଛନ୍ତି । ଆସନ୍ତାକାଲି ତାଙ୍କର ଶତାଧିକ ସମର୍ଥକ ବିଜେଡି ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସଙ୍କ ଉପସ୍ଥିତିରେ ଗଜପତି ଜିଲ୍ଲାରେ ବିଜେଡିରେ ଯୋଗ ଦେବାର କାର୍ଯ୍ୟକ୍ରମ ରହିଛି । ନବୀନଙ୍କ ନୀତି ଆଦର୍ଶରେ ଅନୁପ୍ରାଣିତ ହୋଇ ବିଜେଡିରେ ଯୋଗଦାନ କରିଥିବା ମରିୟମ କହିଛନ୍ତି । ଅନ୍ୟପଟେ ତାଙ୍କ ଯୋଗଦାନ ଦଳକୁ ଅଧିକ ସୁଦୃଢ କରିବ ବୋଲି କହିଛନ୍ତି ଅତନୁ ସବ୍ୟସାଚୀ ନାୟକ ।
ୱାର୍ଡ ମେମ୍ବରରୁ ରାଷ୍ଟ୍ରପତି ନିର୍ବାଚନ, ୯୪ ଥର ହାରିଲେଣି
ଆଗ୍ରା: କିଏ ଜିତିବା ପାଇଁ ନିର୍ବାଚନ ଲଢ଼େ । ହେଲେ ଆଗ୍ରାର ଖେରାଗଡ଼ ତହସିଲ୍ ନଗଲା ରାମନଗରର ହସନୁରାମ ଅମ୍ବେଡକରୀ ନିର୍ବାଚନ ଲଢ଼ି ଲଢ଼ି ରେକର୍ଡ କରିଛନ୍ତି । ୧୯୮୫ରୁ ୨୦୨୨ ମସିହା ୩୬ ବର୍ଷ ମଧ୍ୟରେ ଛୋଟବଡ଼ ନିର୍ବାଚନକୁ ମିଶାଇ ପ୍ରାୟ ୯୪ ଥର ଲଢ଼ିଛନ୍ତି । ଆଉ ନିର୍ବାଚନ ଲଢ଼ିବାରେ ଶତକର ସ୍ୱପ୍ନ ଦେଖୁଛନ୍ତି । ଚଳିତ ଉତ୍ତରପ୍ରଦେଶ ବିଧାନସଭା ନିର୍ବାଚନରେ ୨ଟି ସ୍ଥାନରୁ ପ୍ରତିଦ୍ୱନ୍ଦ୍ୱିତା ପାଇଁ ଦାଖଲ କରିଛନ୍ତି ପ୍ରାର୍ଥିପତ୍ର ।
ଏହାକୁ ନେଇ ହସନୁରାମ କୁହନ୍ତି, ଶହେ ତମ ନିର୍ବାଚନ ଲଢ଼ିବାକୁ ମୁଁ ବଞ୍ଚିଛି । ମୋ ନଜର ସବୁବେଳେ ଆଗାମୀ ନିର୍ବାଚନ ଉପରେ ରହିଥାଏ । କିଛିବର୍ଷ ତଳେ ନିର୍ବାଚନ ଲଢ଼ିବାକୁ ନେଇ କୌଣସି ବିଧାୟକ ହସନୁରାମଙ୍କୁ କଟାକ୍ଷ କରିଥିଲେ । ଯାହାପରେ ନିର୍ବାଚନ ଲଢ଼ିବାକୁ ସଂକଳ୍ପ କରିଥିଲେ ସେ । ଆଉ ଏଥର ୨ଟି ସ୍ଥାନରୁ ନାମାଙ୍କନ କରିଛନ୍ତି ।
ରାଷ୍ଟ୍ରପତି ନିର୍ବାଚନରୁ ନେଇ ପଞ୍ଚାୟତ ନିର୍ବାଚନ ଲଢ଼ିଛନ୍ତି ଏହି ବ୍ୟକ୍ତି ଜଣଙ୍କ । ରାଜସ୍ୱ ବିଭାଗର ଅମୀନ ଭାବେ ହସନୁରାମ କାର୍ଯ୍ୟ କରୁଥିଲେ । ପରେ ଚାକିରିରୁ ଇସ୍ତଫା ଦେଇ ହସନୁରାମ ନିର୍ବାଚନ ଲଢ଼ୁଛନ୍ତି । ୭୬ ବର୍ଷୀୟ ହସନୁରାମ ପଣ କରିଥିଲେ ଜୀବିତ ଥିବା ଯାଏ ନିର୍ବାଚନ ଲଢ଼ିବେ । ତାଙ୍କ ପକେଟରେ ୫୦୦ ଟଙ୍କା ଓ କିଛି ଜମି ରହିଛି । ଆଉ ସବୁଠୁ ବଡ଼ କଥା ହେଉଛି କେନ୍ଦ୍ର ସରକାରଙ୍କ କୃଷକ ଯୋଜନାରେ ମିଳୁଥିବା ଟଙ୍କାରେ ହସନୁରାମ ନିର୍ବାଚନ ଲଢ଼ୁଛନ୍ତି ।
କରୋନା ପାଇଁ ବିବାହ ଘୁଞ୍ଚାଇଲେ ନ୍ୟୁଜିଲାଣ୍ଡ ପ୍ରଧାନମନ୍ତ୍ରୀ
ଓ୍ୱେଲିଙ୍ଗଟନ୍: କୋଭିଡ କଟକଣା ଯୋଗୁ ନିଜ ବିବାହ ସ୍ଥଗିତ ରଖିଲେ ନ୍ୟୁଜିଲାଣ୍ଡ ପ୍ରଧାନମନ୍ତ୍ରୀ ଜାସିଣ୍ଡା ଆର୍ଡେନ । ନିଜେ ଜାରି କରିଥିବା କଟକଣା ଯେପରି ଉଲ୍ଲଂଘନ ହେବ ନାହିଁ ସେଥିଲାଗି ସେ ନିଜ ବିବାହକୁ ଘୁଞ୍ଚାଇଛନ୍ତି । ବିବାହ ଉତ୍ସବରେ କେବଳ ଟିକା ନେଇଥିବା ୧୦୦ ଲୋକଙ୍କ ଉପସ୍ଥିତି ରହିବାକୁ ନିୟମ ଜାରି କରାଯାଇଛି । ସେ କହିଛନ୍ତି ଦେଶରେ ଓମିକ୍ରନ ସଂକ୍ରମଣ ବୃଦ୍ଧି ପାଉଥିବାରୁ ଏହା ରୋକିବା ଲାଗି ସରକାର ନୂଆ କଟକଣା ଜାରି କରିଛି । ଏହାକୁ ଦୃଷ୍ଟିରେ ରଖି ସେ ନିଜ ବିବାହକୁ ସ୍ଥଗିତ ରଖିଛନ୍ତି । ଗୋଟିଏ ପରିବାରରୁ ୫ ଜଣ ଏବଂ ଏକ ବିମାନର ଜଣେ କର୍ମଚାରୀ ଓମିକ୍ରନ ସଂକ୍ରମିତ ଚିହ୍ନଟ ହେବା ପରେ ସରକାର ବିବାହ ଉତ୍ସବରେ ତତକ୍ଷଣାତ କଟକଣା ଜାରି କରିଥିଲେ ।
ଡେଲଟା ତୁଳନାରେ ଓମିକ୍ରନ ଅଧିକ ବେଗରେ ସଂକ୍ରମଣ କରୁଥିବାରୁ ଏହାକୁ ନେଇ ଚିନ୍ତିତ ଅଛନ୍ତି ନ୍ୟୁଜିଲାଣ୍ଡ ସରକାର । ଏହା ସହ ପବ୍ଲିକ ଟ୍ରାନ୍ସପୋର୍ଟ ଓ ଦୋକାନ ଲାଗି ବି କଟକଣା ଜାରି କରିଛନ୍ତି ସରକାର । ଆର୍ଡେନ ଓ ତାଙ୍କ ଦୀର୍ଘଦିନର ପାର୍ଟନର କ୍ଲାର୍କ ଗେଫୋର୍ଡଙ୍କ ମଧ୍ୟରେ ବିବାହ ଧାର୍ଯ୍ୟ ହୋଇଥିଲା । ମାତ୍ର କଟକଣା କୋହଳ ହେବା ପରେ ଏହି ବିବାହ ଅନୁଷ୍ଠିତ ହେବ ବୋଲି ସୂଚନା ମିଳିଛି । କୋଭିଡ ସଂକ୍ରମଣ ଆରମ୍ଭ କାଳରୁ ବର୍ତ୍ତମାନ ସୁଦ୍ଧା ଦେଶରେ ମୋଟ ୧୫ ହଜାର ୧୦୪ ଜଣ ସଂକ୍ରମିତ ଚିହ୍ନଟ ହୋଇଥିବାବେଳେ ମୋଟ ମୃତ୍ୟୁସଂଖ୍ୟା ହୋଇଛି ୫୨ ।
ନାଇଟ କର୍ଫ୍ୟୁରେ ସିନ୍ଧିଚୋର, ଗ୍ରୋସରୀ ଦୋକାନରେ ବୁଲାଇଲେ କଳାକନା
ଭୁବନେଶ୍ୱର: ରାଜଧାନୀ ଭୁବନେଶ୍ୱରରେ ନାଇଟ୍ କର୍ଫ୍ୟୁ ସମୟରେ ମାତିଲେ ସିନ୍ଧିଚୋର । ଚନ୍ଦ୍ରଶେଖରପୁର ଶ୍ରୀବିହାରର ଏକ ଗ୍ରୋସରୀ ଦୋକାନରୁ ବଡ଼ ଧରଣର ଚୋରି ହୋଇଛି । ଭେରାଇଟି ଷ୍ଟୋରର କାନ୍ଥ ଭାଙ୍ଗି ଓ ଛାତ କଣା କରି ଦୋକାନରେ କଳା କନା ବୁଲାଇଛନ୍ତି ଲୁଟେରା । ଦୋକାନର କ୍ୟାସ ବାକ୍ସ ଭାଙ୍ଗି ଟଙ୍କା ନେବା ସହ ଦୋକାନରୁ ସମସ୍ତ ସାମଗ୍ରୀ ଲୁଟେରା ବୋହି ନେଇଛନ୍ତି । ବହୁ ପରିମାଣର ଚାଉଳ, ହର୍ଲିକ୍ସ, ବିସ୍କୁଟ ଓ ଅନ୍ୟ ସାମଗ୍ରୀ ଚୋରି ହୋଇଛି । ଘଟଣାସ୍ଥଳରେ ଚନ୍ଦ୍ରଶେଖରପୁର ଥାନା ପୋଲିସ ତଦନ୍ତ ଜାରି ରହିଛି । ସେପଟେ ଶ୍ରୀବିହାରର ଆଉ ଏକ ଦୋକାନରୁ ମଧ୍ୟ ଚୋରି ହୋଇଛି । ସେହିପରି ସମାନ ଢ଼ଙ୍ଗରେ ଆଉ ଏକ ପାନ ଦୋକାନରୁ ଚୋରି ହୋଇଛି । ପାନ ଦୋକାନରୁ ୧୫ ହଜାର ଟଙ୍କାର ସାମଗ୍ରୀକୁ ଚୋରି କରି ନେଇଛନ୍ତି ଲୁଟେରା । ଉଭୟ ଚୋରି ଘଟଣାରେ ପୋଲିସ ତଦନ୍ତ ଜାରି ରଖିଛି ।
ସୁଭାଷ ଚନ୍ଦ୍ର ବୋଷ ଓ ବୀର ସୁରେନ୍ଦ୍ର ସାଏଙ୍କ ଜୟନ୍ତୀରେ ଶ୍ରଦ୍ଧାଞ୍ଜଳି ଜ୍ଞାପନ କଲେ ମୁଖ୍ୟମନ୍ତ୍ରୀ
ଭୁବନେଶ୍ୱର: ଆଜି ନେତାଜୀ ସୁଭାଷ ଚନ୍ଦ୍ର ବୋଷଙ୍କ ୧୨୫ ତମ ପୁଣ୍ୟ ଜୟନ୍ତୀ । ୧୮୯୭ ଜାନୁଆରୀ ୨୩ରେ କଟକରେ ଜନ୍ମଗ୍ରହଣ କରିଥିଲେ ଏହି ମହାପୁରୁଷ । ଯାହାଙ୍କ ବୀରତ୍ୱ ପାଇଁ ସାରା ଦେଶ ଗର୍ବିତ ହୋଇଛି । ଆଜି ସୁଭାଷ ବୋଷଙ୍କ ୧୨୫ ତମ ଜୟନ୍ତୀ ସାରା ଭାରତରେ ପାଳନ କରାଯାଉଛି । ସେହିପରି ଆଜି ହେଉଛି ମହାନ ସଂଗ୍ରାମୀ ବୀର ସୁରେନ୍ଦ୍ର ସାଏଙ୍କ ୨୧୩ ତମ ଜନ୍ମଜୟନ୍ତୀ । ବୀର ସୁରେନ୍ଦ୍ର ସାଏଙ୍କ ଜୟନ୍ତୀ ତାଙ୍କ ଜନ୍ମସ୍ଥାନ ଖିଣ୍ଡା ସମେତ ସମ୍ବଲପୁରର ବିଭିନ୍ନ ସ୍ଥାନରେ ପାଳିତ ହୋଇଛି ।
ବିଶିଷ୍ଟ ସ୍ୱାଧୀନତା ସଂଗ୍ରାମୀ ବୀର ସୁରେନ୍ଦ୍ର ସାଏଙ୍କ ଜୟନ୍ତୀରେ ମୋର ଶ୍ରଦ୍ଧାଞ୍ଜଳି ଜଣାଉଛି। ଆଦିବାସୀ ତଥା ସାଧାରଣ ଜନତାଙ୍କ ସ୍ଵାର୍ଥ ରକ୍ଷା ସହ ଦେଶର ସ୍ୱାଧୀନତା ପାଇଁ ବ୍ରିଟିଶ ବିରୋଧୀ ସଶସ୍ତ୍ର ସଂଗ୍ରାମରେ ତାଙ୍କର ପରାକ୍ରମ ଏବଂ ବଳିଦାନ ସର୍ବଦା ପ୍ରେରଣାର ଉତ୍ସ ହୋଇ ରହିଛି। pic.twitter.com/95w4FTW9DX
— Naveen Patnaik (@Naveen_Odisha) January 23, 2022
ସୁଭାଷ ଚନ୍ଦ୍ର ବୋଷ ଓ ସୁରେନ୍ଦ୍ର ସାଏଙ୍କ ଜୟନ୍ତୀ ଅବସରରେ ଶ୍ରଦ୍ଧାଞ୍ଜଳି ଜ୍ଞାପନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ମୁଖ୍ୟମନ୍ତ୍ରୀ ଟ୍ୱିଟ୍ କରି କହିଛନ୍ତି, ଭାରତମାତାର ସୁଯୋଗ୍ୟ ସନ୍ତାନ ତଥା ମହାନ ସ୍ୱାଧୀନତା ସଂଗ୍ରାମୀ ନେତାଜୀ ସୁଭାଷ ଚନ୍ଦ୍ର ବୋଷଙ୍କ ଜୟନ୍ତୀରେ ମୁଁ ଶ୍ରଦ୍ଧାଞ୍ଜଳି ଜଣାଉଛି। ଓଡ଼ିଶାର ମାଟି ତାଙ୍କୁ ସେବା ଓ ସଂଗ୍ରାମର ମନ୍ତ୍ରରେ ଦୀକ୍ଷିତ କରିଥିଲା। ତାଙ୍କ ଦୃଢ ନେତୃତ୍ୱ, ଅତୁଳନୀୟ ଦେଶ ଭକ୍ତି ସମସ୍ତଙ୍କ ହୃଦୟରେ ଚିର ଅମର ହୋଇ ରହିଛି ବୋଲି ମୁଖ୍ୟମନ୍ତ୍ରୀ କହିଛନ୍ତି ।
ଭାରତମାତାର ସୁଯୋଗ୍ୟ ସନ୍ତାନ ତଥା ମହାନ ସ୍ୱାଧୀନତା ସଂଗ୍ରାମୀ ନେତାଜୀ ସୁଭାଷ ଚନ୍ଦ୍ର ବୋଷଙ୍କ ଜୟନ୍ତୀରେ ମୋର ଶ୍ରଦ୍ଧାଞ୍ଜଳି ଜଣାଉଛି। ଓଡ଼ିଶାର ମାଟି ତାଙ୍କୁ ସେବା ଓ ସଂଗ୍ରାମର ମନ୍ତ୍ରରେ ଦୀକ୍ଷିତ କରିଥିଲା। ତାଙ୍କ ଦୃଢ ନେତୃତ୍ୱ, ଅତୁଳନୀୟ ଦେଶ ଭକ୍ତି ସମସ୍ତଙ୍କ ହୃଦୟରେ ଚିର ଅମର ହୋଇ ରହିଛି। #ParakramDiwas pic.twitter.com/Q8c0auyFPj
— Naveen Patnaik (@Naveen_Odisha) January 23, 2022
ସେହିପରି ବୀର ସୁରେନ୍ଦ୍ର ସାଏଙ୍କ ଜୟନ୍ତୀ ଅବସରରେ ମଧ୍ୟ ଟ୍ୱିଟ କରି ଶ୍ରଦ୍ଧାଞ୍ଜଳି ଜ୍ଞାପନ କରିଛନ୍ତି ମୁଖ୍ୟମନ୍ତ୍ରୀ । ବିଶିଷ୍ଟ ସ୍ୱାଧୀନତା ସଂଗ୍ରାମୀ ବୀର ସୁରେନ୍ଦ୍ର ସାଏଙ୍କ ଜୟନ୍ତୀରେ ମୁଁ ଶ୍ରଦ୍ଧାଞ୍ଜଳି ଜଣାଉଛି । ଆଦିବାସୀ ତଥା ସାଧାରଣ ଜନତାଙ୍କ ସ୍ଵାର୍ଥ ରକ୍ଷା ସହ ଦେଶର ସ୍ୱାଧୀନତା ପାଇଁ ବ୍ରିଟିଶ ବିରୋଧୀ ସଶସ୍ତ୍ର ସଂଗ୍ରାମରେ ତାଙ୍କର ପରାକ୍ରମ ଏବଂ ବଳିଦାନ ସର୍ବଦା ପ୍ରେରଣାର ଉତ୍ସ ହୋଇ ରହିଛି ବୋଲି ଟ୍ୱିଟ କରି କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।