spot_img
Home Blog Page 5167

ବନ୍ଦ ପାଳନ ନାଁରେ କଲେଜ ଛାତ୍ରୀଙ୍କୁ ଜୋର ଜବରଦସ୍ତ କରୁଛନ୍ତି ବିଜେପିର ମହିଳା କର୍ମୀ, ଦେଖନ୍ତୁ ଭିଡିଓ

ବାଲେଶ୍ୱର: ବାଲେଶ୍ୱର ଚାରୁକଳା ମହାବିଦ୍ୟାଳୟରେ ବିଜେପି କର୍ମୀଙ୍କ ଗୁଣ୍ଡାଗିରି । ବିଜେପି ତରଫରୁ ଗତକାଲି ୧୨ ଘଣ୍ଟିଆ ବାଲେଶ୍ୱର ବନ୍ଦ ଡାକରା ଦିଆଯାଇଥିଲା । ଏହି ସମୟରେ ବିଜେପିର ରାଜ୍ୟ କାର୍ଯ୍ୟକାରିଣୀ ସଦସ୍ୟା ଶୋଭନା ମହାନ୍ତିଙ୍କ ନେତୃତ୍ୱରେ କିଛି କର୍ମୀ ଚାରୁକଳା ମହାବିଦ୍ୟାଳୟର ଶ୍ରେଣୀଗୃହରେ ପଶି ହୋ-ହାଲ୍ଲା କରିଥିଲେ ।

BJP Workers Misbehave College Students During Strike In Balasore

ଏଥିସହ ପଢ଼ନ୍ତୁ: ଘେରାଉ ନାଁରେ ବିଜେପିର ଗୁଣ୍ଡାଗର୍ଦ୍ଦି, ଦଳର ୩୨ ନେତା ଓ କର୍ମୀଙ୍କ ବିରୋଧରେ ଏତଲା ରୁଜୁ

ଶ୍ରେଣୀଗୃହରେ ଥିବା ଚିତ୍ର ସବୁକୁ ଧରି ଏହା ସଂସ୍କୃତିକୁ ବିକୃତ କରୁଛି ବୋଲି କହି ଫିଙ୍ଗାଫିଙ୍ଗି କରିଥିଲେ । ଶ୍ରେଣୀରେ ଥିବା ଛାତ୍ରଛାତ୍ରୀମାନଙ୍କୁ ଅଶାଳୀନ ବ୍ୟବହାର ସହିତ ଅସଭ୍ୟ ଭାଷାରେ ଗାଳି ଗୁଲଜ କରିଥିବା ଅଭିଯୋଗ ହୋଇଛି । ବିଜେପି କର୍ମୀଙ୍କ ଏଭଳି କାଣ୍ଡ ସାମାଜିକ ଗଣମାଧ୍ୟମରେ ଭାଇରାଲ ହେବାପରେ ଘଟଣାକୁ ବିଭିନ୍ନ ମହଲରୁ ନିନ୍ଦା କରାଯାଇଛି ।

ରାଷ୍ଟ୍ରୀୟ ମର୍ଯ୍ୟାଦା ସହ ଶେଷ ହେଲା ପୁନୀତଙ୍କ ଶେଷକୃତ୍ୟ

ବେଙ୍ଗାଲୁରୁ: ରାଷ୍ଟ୍ରୀୟ ମର୍ଯ୍ୟାଦା ସହ ସମ୍ପନ୍ନ ହେଲା ପୁନୀତ ରାଜକୁମାରଙ୍କ ଶେଷକୃତ୍ୟ । ପରିବାର, ପ୍ରିୟଜନ ଏବଂ ହଜାର ହଜାର ପ୍ରଶଂସକଙ୍କ ଗ୍ରହଣରେ ପୁନୀତଙ୍କୁ ଦିଆଯାଇଛି ଶେଷ ବିଦାୟ । ବେଙ୍ଗାଲୁରୁର କାନ୍ତିରବା ଷ୍ଟାଡିୟମରେ ରାଷ୍ଟ୍ରୀୟ ମର୍ଯ୍ୟାଦା ସହ ତାଙ୍କ ଶେଷକୃତ୍ୟ ହୋଇଛି । ଆଜି ସକାଳୁ ପ୍ରଶଂସକମାନେ ତାଙ୍କ ପ୍ରିୟ ଷ୍ଟାରଙ୍କୁ ଶେଷ ବିଦାୟ ଦେବା ପାଇଁ କାନ୍ତିରବା ଷ୍ଟାଡିୟମର ଚାରିପାଖରେ ଥିବା ବିଲ୍ଡିଂ ଛାତ ଉପରେ ଏକାଠି ହୋଇଥିଲେ ।

ପୁନୀତଙ୍କ ଶେଷକୃତ୍ୟ ପରିବାର, ବନ୍ଧୁ ଏବଂ ହଜାର ହଜାର ପ୍ରଶଂସକଙ୍କ ଉପସ୍ଥିତିରେ ହୋଇଥିଲେ । ପୁନୀତଙ୍କ ମୃତଦେହ ତାଙ୍କ ପିତାମାତାଙ୍କ ସମାଧୀ ନିକଟରେ ରଖାଯାଇଥିଲା । କର୍ଣ୍ଣାଟକ ମୁଖ୍ୟମନ୍ତ୍ରୀ ବସବରାଜ ବୋମାଇ ବି ସମାଧୀ ସ୍ଥଳରେ ଉପସ୍ଥିତ ଥିଲେ । ପୁନୀତଙ୍କୁ ଶେଷ ବିଦାୟ ଦେବା ସମୟରେ ସେ ବି ଭାବ ବିହ୍ବଳ ହୋଇପଡ଼ିଥିଲେ । ପୁନୀତଙ୍କୁ ଶେଷ ଥର ପାଇଁ ଦେଖିବା ପାଇଁ କର୍ଣ୍ଣାଟକର ବହୁ ବରିଷ୍ଠ ନେତା,ବ୍ୟକ୍ତି ଏବଂ ସାଉଥ ଫିଲ୍ମ୍ ଇଣ୍ଡଷ୍ଟ୍ରିର ବହୁ ଷ୍ଟାର କାନ୍ତରବା ଷ୍ଟାଡିୟମରେ ପହଞ୍ଚିଥିଲେ ।

ଗତକାଲି ରାତିରେ ପୁନୀତଙ୍କ ଦୁଇ ଝିଅ ବିଦେଶରୁ ଫେରିବା ପରେ ପୁନୀତଙ୍କ ଶେଷକୃତ୍ୟ ଆରମ୍ଭ ହୋଇଥିଲା । ବାପାଙ୍କୁ ଏଭଳି ଅବସ୍ଥାରେ ଦେଖି ନିଜ କୋହ ସମ୍ଭାଳି ପାରିନଥିଲେ ଦୁଇ ଝିଅ । ୪୬ ବର୍ଷରେ ପୁନୀତଙ୍କ ମୃତ୍ୟୁ ପୂରା ସାଉଥ ଇଣ୍ଡଷ୍ଟ୍ରି ସହ ବଲିଉଡ୍ ଇଣ୍ଡଷ୍ଟ୍ରି ପୂରା ସ୍ତବ୍ଧ ହୋଇଯାଇଛି ।

ବିରାଟଙ୍କ ପାଇଁ ବଡ଼ ଆହ୍ବାନ

ଦୁବାଇ: ସୁପର ସଣ୍ଡେରେ ସୁପର ମୁକାବିଲା । ଚଳିତ ଟି-୨୦ ବିଶ୍ବକପରେ ଆଜି ଭାରତ ତା’ର ଦ୍ବିତୀୟ ମ୍ୟାଚ ଖେଳିବାକୁ ଯାଉଛି ।  ଦ୍ବିତୀୟ ମ୍ୟାଚରେ ଆଜି ଟିମ୍ ଇଣ୍ଡିଆ ନ୍ୟୁଜିଲାଣ୍ଡକୁ ଭେଟିବ । କର ବା ମର ସ୍ଥିତିରେ ଉଭୟ ଦଳ । କାହିଁକି ନା ଉଭୟ ଦଳ ସେମାନଙ୍କ ପ୍ରଥମ ମ୍ୟାଚ ପାକିସ୍ତାନଠାରୁ ପରାଜିତ  ହୋଇଛନ୍ତି । ଏପରି ସ୍ଥିତିରେ ସେମିଫାଇନାଲ ରେସରେ ରହିବାକୁ ହେଲେ ପ୍ରଥମ ବିଜୟ ଲକ୍ଷ୍ୟରେ ରହିଛନ୍ତି ଉଭୟ ଦଳ । ତେବେ ଏହି ହାଇଭୋଲଟେଜ୍ ଟକ୍କର ଉପରେ ରହିଛି କ୍ରୀଡାପ୍ରେମୀଙ୍କ ନଜର ।

ଅନ୍ୟପକ୍ଷରେ ଆଇସିସି ପ୍ରତିଯୋଗିତାରେ ନ୍ୟୁଜିଲାଣ୍ଡ ଭାରତ ପାଇଁ ଏକ ବଡ଼ ବିପଦ ସୃଷ୍ଟି କରିଛି । ୨୦୦୩ ଦିନିକିଆ ବିଶ୍ବକପ ପରଠାରୁ ଭାରତ କୌଣସି ଆଇସିସି ପ୍ରତିଯୋଗିତାରେ ନ୍ୟୁଜିଲାଣ୍ଡକୁ ପରାସ୍ତ କରିନାହିଁ । ୨୦୧୯ ଦିନିକିଆ ବିଶ୍ବକପ ସେମିଫାଇନାଲ ଏବଂ ବିଶ୍ବ ଟେଷ୍ଟ ଚମ୍ପିଆନସିପ୍ ଫାଇନାଲରେ ଭାରତକୁ ମାତ୍ ଦେଇଛି ନ୍ୟୁଜିଲାଣ୍ଡ । ଯଦି ଆମେ ଟି-୨୦ କଥା କହିବା ତାହାଲେ ଟି-୨୦ରେ ବି ନ୍ୟୁଜିଲାଣ୍ଡ ଭାରତ ଆଗରେ ରହିଛି ।  ଉଭୟ ଦଳ ଏଯାବତ ୧୮ଟି ମ୍ୟାଚରେ ମୁହାଁମୁହିଁ ହୋଇଥିବାବେଳେ ସେଥିରୁ ୮ ମ୍ୟାଚ ନ୍ୟୁଜିଲାଣ୍ଡ ଜିତିଥିବା ବେଳେ ୬ଟି ମ୍ୟାଚ ଜିତିଛି ଭାରତ ।

ତେବେ ପ୍ରଥମ ମ୍ୟାଚରେ ପାକିସ୍ତାନ ବିପକ୍ଷରେ ଲଜ୍ଜାଜନକ ପରାଜୟ ପରେ କମବ୍ୟାକ ଲକ୍ଷ୍ୟରେ ବିରାଟ ବାହିନୀ । ପ୍ରଥମ ମ୍ୟାଚରେ ହୋଇଥିବା ତ୍ରୁଟିକୁ ଏହି ମ୍ୟାଚରେ ସୁଧାରିବ ଟିମ୍ ଇଣ୍ଡିଆ । ଏହି ମ୍ୟାଚରେ ଭାରତକୁ ଜିତିବାକୁ ହେଲେ ସମସ୍ତ କ୍ଷେତ୍ରରେ ଦମଦାର ପ୍ରଦର୍ଶନ କରିବାକୁ ପଡ଼ିବ । ଅନ୍ୟପଟେ ଚୁଡାନ୍ତ ଏକାଦଶ କଥା ଯଦି କହିବା ତାହାଲେ ଭାରତ ତା’ର ପ୍ଲେଇଂ ଇଲେଭେନରେ କୌଣସି ପରିବର୍ତ୍ତନ କରିବ ନାହିଁ ବୋଲି ଆଶା କରାଯାଉଛି । କାହିଁକି ନା ପାକିସ୍ତାନ ବିପକ୍ଷରେ ଆହାତ ହୋଇଥିବା ଷ୍ଟାର ଅଲରାଉଣ୍ଡର  ହାର୍ଦ୍ଦିକ ପାଣ୍ଡ୍ୟା ସମ୍ପୂର୍ଣ୍ଣ ଫିଟ୍ ଅଛନ୍ତି । ନେଟ୍ସରେ ଦମଦାର ବୋଲିଂ କରୁଥିବା ମଧ୍ୟ ଦେଖିବାକୁ ମିଳିଛି । ତେଣୁ ସେ ଏହି ମ୍ୟାଚରେ ଚୁଡାନ୍ତ ଏକାଦଶରେ ମଧ୍ୟ ସ୍ଥାନ ପାଇବେ ବୋଲି ଆଶା କରାଯାଉଛି ।

ଗ୍ୟାସ ସିଲିଣ୍ଡର ମୁଣ୍ଡାଇ, ରାସ୍ତା ଉପରେ ଚୂଳି ଜାଳି ବିଜେଡିର ପ୍ରତିବାଦ

ଭୁବନେଶ୍ୱର: ହୁ ହୁ ହୋଇ ବଢ଼ୁଛି ଦରଦାମ । କିଣିବା ତ ଦୂର କଥା ଦେଖିଲେ ବି ଡର ଲାଗୁଛି । ତୈଳଦର, ଗ୍ୟାସ୍ ଓ ଅତ୍ୟାବଶ୍ୟକୀୟ ସାମଗ୍ରୀର ଦରବୃଦ୍ଧି ଜନତାଙ୍କୁ ଭାରି ବାଧୁଛି । କେନ୍ଦ୍ର ସରକାରଙ୍କ ଭୁଲ୍ ଆର୍ଥିକ ପରିଚାଳନା ନୀତି ଯୋଗୁଁ ବଢ଼ି ଚାଲିଛି ଦରଦାମ । ଏହାର ବିରୋଧ କରି ଆନ୍ଦୋଳନକୁ  ଓହ୍ଲାଇଛି ବିଜେଡି । ଆଜି ବିଜେଡି ପକ୍ଷରୁ ରାଜଭବନ ଆଗରେ ବିକ୍ଷୋଭ ଓ ପ୍ରତିବାଦ ସଭା କରାଯାଇଛି । ଏଥିରେ ସଂଖ୍ୟାଧିକ ମହିଳା ସାମିଲ୍ ହୋଇ ବିରୋଧ ପ୍ରଦର୍ଶନ କରିଛନ୍ତି ।

BJD Protest Against Fuel And Gas Price Hiked

ମହିଳା ବିଜେଡି କର୍ମୀ ଦରଦାମ ବୃଦ୍ଧିର ତୀବ୍ର ବିରୋଧ କରିଛନ୍ତି । ଗ୍ୟାସ୍ ସିଲିଣ୍ଡର ମୁଣ୍ଡାଇବା ସହ ରାସ୍ତା ଉପରେ ଚୂଲି ଜାଳି ବିଜେଡି ପ୍ରତିବାଦ କରିଛି । ଗଣଧାରଣା ଦେବା ସହ ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ରାଜ୍ୟପାଳଙ୍କୁ ସ୍ମାରକ ପତ୍ର ଦେଇଛି ଦଳ । ନଭେମ୍ବର ପହିଲାରେ ଦରଦାମ ବୃଦ୍ଧିକୁ ବିରୋଧ କରି ୧୪୭ଟି ନିର୍ବାଚନ ମଣ୍ଡଳୀରେ ମହିଳା ବିଜେଡି ପକ୍ଷରୁ ପ୍ରତିବାଦ ସଭା କରାଯିବ । ୫ ତାରିଖରୁ ୭ ତାରିଖ ଯାଏଁ ପେଟ୍ରୋଲ ଓ ଡିଜେଲ୍ ଦର ବୃଦ୍ଧିକୁ ବିରୋଧ କରି ବିଜୁ ଯୁବ ଛାତ୍ର ସଂଗଠନ ପକ୍ଷରୁ ପେଟ୍ରୋଲ ପମ୍ପ ସମ୍ମୁଖରେ ଧାରଣା ଓ ପ୍ରତିବାଦ ସଭା ହେବ ।

ଆଜି ବି ବଢ଼ିଲା ତୈଳଦର, ଭୁବନେଶ୍ୱରରେ ପେଟ୍ରୋଲ ୧୧୦ ପାର୍

ଭୁବନେଶ୍ୱର: ସବୁଦିନ ବଢ଼ୁଛି ତୈଳଦର । ଲଗାତାର ୫ ଦିନ ହେଲା ପେଟ୍ରୋଲ ଓ ଡିଜେଲ୍ ଦର ଲଗାତାର ବଢ଼ି ବଢ଼ି ଚାଲିଛି । ଆଜି ପେଟ୍ରୋଲ ଓ ଡିଜେଲ୍ ଲିଟର ପିଛା ୩୫ ପଇସା ମହଙ୍ଗା ହୋଇଛି । ରାଷ୍ଟ୍ରୀୟ ରାଜଧାନୀ ଦିଲ୍ଲୀରେ ପେଟ୍ରୋଲ ଦର ଲିଟର ପିଛା ୧୦୯ ଟଙ୍କା ୩୪ ପଇସା ଥିବାବେଳେ ଡିଜେଲ୍ ୯୮ ଟଙ୍କା ୭ ପଇସା ରହିଛି ।

Petrol Diesel Prices Hiked For Fifth Consecutive Day Check

ଭୋପାଳରେ ପେଟ୍ରୋଲ ୧୧୮ ଟଙ୍କା ୭ ପଇସା, ଡିଜେଲ୍ ୧୦୭ ଟଙ୍କା ୫୦ ପଇସା, ବେଙ୍ଗଳୁରୁରେ ପେଟ୍ରୋଲ ୧୧୩ ଟଙ୍କା ୧୫ ପଇସା, ଡିଜେଲ୍ ୧୦୪ ଟଙ୍କା ୮ ପଇସା, ମୁମ୍ବାଇରେ ପେଟ୍ରୋଲ ୧୧୫ ଟଙ୍କା ୧୫ ପଇସା, ଡିଜେଲ୍ ୧୦୬ ଟଙ୍କା ୨୩ ପଇସା ରହିଛି । ପାଟଣାରେ ପେଟ୍ରୋଲ ଦର ୧୧୩ ଟଙ୍କା ୧୦ ପଇସା ଓ ଡିଜେଲ ଲିଟର ପିଛା ୧୦୪ ଟଙ୍କା ୭୧ ପଇସାରେ ବିକ୍ରି ହେଉଛି ।

ରାଜଧାନୀ ଭୁବନେଶ୍ୱରରେ ମଧ୍ୟ ତୈଳଦର ୧୧୦ ଟଙ୍କା ଟପିଛି । ଭୁବନେଶ୍ୱରରେ ପେଟ୍ରୋଲ ଲିଟର ପିଛା ୧୧୦ ଟଙ୍କା ୩୨ ପଇସା ଓ ଡିଜେଲ୍ ଲିଟର ପିଛା ୧୦୬ ଟଙ୍କା ୯୯ ପଇସା ରହିଛି । ରାଜ୍ୟର ସମସ୍ତ ୩୦ ଜିଲ୍ଲାରେ ପେଟ୍ରୋଲ୍ ଦର ୧୦୫ ଟଙ୍କା ଉପରେ ରହିଥିବା ବେଳେ ଡିଜେଲ୍ ଦର ମଧ୍ୟ ଶହେ ଟଙ୍କା ଉପରେ ରହିଛି ।

ରାଜ୍ୟର ୨୩ ଜିଲ୍ଲାରୁ ୪୮୮ କୋଭିଡ୍ ପଜିଟିଭ୍ ଚିହ୍ନଟ

ଭୁବନେଶ୍ୱର: ଗତ ୨୪ ଘଣ୍ଟାରେ ରାଜ୍ୟର ୨୩ ଜିଲ୍ଲାରୁ ଆଉ ୪୮୮ କୋଭିଡ୍ ସଂକ୍ରମିତ ଚିହ୍ନଟ ହୋଇଛନ୍ତି । ଶୂନରୁ ୧୮ ବର୍ଷ ବୟସ ମଧ୍ୟରେ ୭୭ ଜଣ ସଂକ୍ରମିତ ଅଛନ୍ତି । କ୍ୱାରେଣ୍ଟାଇନରୁ ୨୮୫ ଜଣ ସଂକ୍ରମିତ ଚିହ୍ନଟ ହୋଇଥିବା ବେଳେ ୨୦୩ଟି ମାମଲା ସ୍ଥାନୀୟ ସଂକ୍ରମିତ । ଖୋର୍ଦ୍ଧାରୁ ସର୍ବାଧିକ ୨୫୦ ଜଣ କୋଭିଡ୍ ସଂକ୍ରମିତ ଚିହ୍ନଟ ହୋଇଛନ୍ତି ।

ଅନୁଗୁଳରୁ ଜଣେ, ବାଲେଶ୍ୱରରୁ ୫, ଭଦ୍ରକରୁ ୩, କଟକରୁ ୫୪, ଦେବଗଡ଼ରୁ ୨, ଢେଙ୍କାନାଳରୁ ୫, ଗଜପତିରୁ ୫, ଗଞ୍ଜାମରୁ ୮, ଜଗତସିଂହପୁରରୁ ୯, ଯାଜପୁରରୁ ୯, ଝାରସୁଗୁଡ଼ାରୁ ୩, କଳାହାଣ୍ଡିରୁ ୨, କେନ୍ଦ୍ରାପଡ଼ାରୁ ୮, କେନ୍ଦୁପଝରରୁ ଜଣେ, କୋରାପୁଟରୁ ଜଣେ, ମୟୂରଭଞ୍ଜରୁ ୧୯, ନୟାଗଡ଼ରୁ ୨, ନୂଆପଡ଼ାରୁ ଜଣେ, ପୁରୀରୁ ୧୫ ଜଣ ସଂକ୍ରମିତ ଚିହ୍ନଟ ହୋଇଛନ୍ତି ।

ସେହିଭଳି ରାୟଗଡ଼ାରୁ ୬, ସମ୍ବଲପୁରରୁ ୧୩, ସୁନ୍ଦରଗଡ଼ରୁ ୧୩ ଓ ଷ୍ଟେଟପୁଲରୁ ୫୩ ଜଣ ସଂକ୍ରମିତ ଚିହ୍ନଟ ହୋଇଛନ୍ତି । ରାଜ୍ୟରେ ମୋଟ କୋଭିଡ୍ ସଂକ୍ରମିତଙ୍କ ସଂଖ୍ୟା ୧୦ ଲକ୍ଷ ୪୧ ହଜାର ୪୫୭କୁ ବୃଦ୍ଧି ପାଇଛି । ଗତ ୨୪ ଘଣ୍ଟାରେ ୪୯୦ ଜଣ କରୋନାରୁ ସୁସ୍ଥ ହୋଇଛନ୍ତି । ମୋଟ ୧୦ ଲକ୍ଷ ୨୮ ହଜାର ୬୯୭ ଜଣ ସୁସ୍ଥ ହୋଇଛନ୍ତି । ଏବେ ରାଜ୍ୟରେ ୪ ହଜାର ୩୭୪ଟି ସକ୍ରିୟ ସଂକ୍ରମଣ ମାମଲା ରହିଛି ।

ନୌସେନାରେ ସାମିଲ ହେଲା ପ୍ରଥମ P15B ଷ୍ଟେଲଥ ଗାଇଡେଡ୍ ମିସାଇଲ ଡେଷ୍ଟ୍ରୟର

ମୁମ୍ବାଇ: ଶକ୍ତିଶାଳୀ ହେଲା ଭାରତୀୟ ନୌସେନା । ନୌସେନାରେ ସାମିଲ ହୋଇଛି ପ୍ରଥମ P15B ଷ୍ଟେଲଥ ଗାଇଡେଡ୍ ମିସାଇଲ ଡେଷ୍ଟ୍ରୟର । ବିଶାଖପାଟଣମ ନାମରେ ନାମିତ ଏହି ଜାହାଜ ହାସଲ କରିବା ଯୋଗୁଁ ନୌସେନାର ଶକ୍ତି ବୃଦ୍ଧି ହୋଇଛି । ମାଜଗାଓଁ ଜାହାଜ କାରଖାନାରେ ଏହି ଜାହାଜ ନିର୍ମିତ ହୋଇଛି । ଦେଶରେ ଚାଲିଥିବା ସ୍ୱଦେଶୀ ଯୁଦ୍ଧ ଜାହାଜ ନିର୍ମାଣ ପ୍ରକ୍ରିୟାରେ ଆଉ ଏକ ସଫଳତା ଯୋଡ଼ି ହୋଇଛି । ଏହି ଜାହାଜର ଡେକରୁ ବିମାନ ବିଧ୍ୱଂସୀ କ୍ଷେପଣାସ୍ତ୍ର ନିକ୍ଷେପ କରାଯାଇପାରିବ ।

Indian Navy receives first ‘Mormugao’ P15B guided-missile destroyer

ଏହି ଯୁଦ୍ଧ ଜାହାଜ ହାସଲ ହେବା ପରେ ଭାରତୀୟ ନୌସେନା କୌଣସି ପରିସ୍ଥିତିରେ ବି ଶତ୍ରୁ ପକ୍ଷର ମୁକାବିଲା କରିପାରିବ । ଏହି ଯୁଦ୍ଧଜାହାଜ ଲାଗି ୩୫ ହଜାର ୮୦୦ କୋଟି ଟଙ୍କା ଖର୍ଚ୍ଚ ହୋଇଥିବା ବେଳେ ଏହାର ପେଲୋଡ୍ କ୍ଷମତା ୭ ହଜାର ଟନ୍ ରହିଛି । ଏହାର ଲମ୍ବ ରହିଛି ୧୬୩ ମିଟର । ଏହା ଘଣ୍ଟା ପ୍ରତି ୫୬ କିଲୋମିଟର ବେଗରେ ଗତି କରିପାରିବ ।

ଏଥିରେ ୫୦ ଅଫିସର ଓ ୨୫୦ ଯାତ୍ରୀ ବା ସୈନିକ ବସିବାର କ୍ଷମତା ରହିଛି । ଅତ୍ୟାଧୁନିକ ସେନସର ଓ ପ୍ରୋସେସିଂ ସିଷ୍ଟମ ଏଥିରେ ରହିଥିବା ବେଳେ ଇଲେକ୍ଟ୍ରୋନିକ୍ସ ୱାରଫେରର ବ୍ୟବସ୍ଥା ରହିଛି । ଏଥିରେ ୨ଟି କାଭାଚ ଆଣ୍ଟି ମିସାଇଲ୍ ଡିକୟ ସିଷ୍ଟମ ରହିଛି ଯାହାକି ପ୍ରତିରକ୍ଷା କ୍ଷମତାକୁ ଅଧିକ ଶକ୍ତିଶାଳୀ କରିବ । ଏହାସହ ଟର୍ପେଡୋର ମୁକାବିଲା ଲାଗି ଏଥିରେ ଏନଏସଟିଏଲ ମାରିଚ ଟର୍ପେଡୋ କାଉଣ୍ଟର ମେଜର ବ୍ୟବସ୍ଥା ବି ରହିଛି ।

କେନ୍ଦ୍ର ଗୃହ ରାଷ୍ଟ୍ରମନ୍ତ୍ରୀଙ୍କ ଗସ୍ତକୁ ବିରୋଧ, ଗାଡ଼ି ଉପରକୁ ଅଣ୍ଡା ସହ କାଳି ଫିଙ୍ଗିଲା କଂଗ୍ରେସ

ଭୁବନେଶ୍ୱର: ଓଡ଼ିଶା ଗସ୍ତରେ ଆସିଥିବା କେନ୍ଦ୍ର ଗୃହ ରାଷ୍ଟ୍ରମନ୍ତ୍ରୀ ଅଜୟ ମିଶ୍ରଙ୍କୁ କଂଗ୍ରେସର ବିରୋଧ । ଏୟାରପୋର୍ଟ ଛକରେ ବିରୋଧ କରିଛନ୍ତି କଂଗ୍ରେସ କର୍ମୀ । ଅଜୟ ମିଶ୍ରଙ୍କ ଗାଡ଼ିକୁ କଂଗ୍ରେସ କର୍ମୀ କଳାପତାକା ଦେଖାଇବା ସହ ଅଣ୍ଡା ଓ କାଲି ମାଡ଼ କରିଛନ୍ତି । ପୋଲିସ ସହ କଂଗ୍ରେସ କର୍ମୀଙ୍କ ଧସ୍ତାଧସ୍ତି ହୋଇଛି । କେନ୍ଦ୍ର ମନ୍ତ୍ରୀଙ୍କ ଗସ୍ତ ପାଇଁ ପୋଲିସ ପକ୍ଷରୁ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି ।

Eggs Thrown At Union Minister Ajay Mishra's Vehicle By Congress Workers In Bhubaneswar

ଉତ୍ତରପ୍ରଦେଶ ଲଖିମପୁର ଖେରିରେ ଗାଡ଼ି ଚଢ଼ାଇ ୮ ଜଣ ଚାଷୀଙ୍କୁ ହତ୍ୟା ଘଟଣାରେ ସମ୍ପୃକ୍ତ କେନ୍ଦ୍ରମନ୍ତ୍ରୀ ଅଜୟ ମିଶ୍ରଙ୍କ ପୁଅ ଆଶିଷ ମିଶ୍ର । ସେଠାରେ କେନ୍ଦ୍ରମନ୍ତ୍ରୀ ନୈତିକତା ଭୁଲି ଯାଇଥିବା କଂଗ୍ରେସ ଅଭିଯୋଗ କରିଛି । ମନ୍ତ୍ରୀ ସେଠି ନୈତିକତା ଦୃଷ୍ଟିରୁ ଇସ୍ତଫା ଦେଇନଥିବା ବେଳେ ଏଠି ତାଙ୍କ ଦଳ କାହିଁକି ନୀତି ନୈତିକତା କଥା କହୁଛି ବୋଲି କଂଗ୍ରେସ ପ୍ରଶ୍ନ କରିଛି ।

ଦୀପାବଳିକୁ ଲକ୍ଷ୍ୟରେ ରଖି କଡ଼ାକଡ଼ି ହୋଇପାରେ କରୋନା କଟକଣା

ଭୁବନେଶ୍ୱର: ନଭେମ୍ବରରେ କେମିତି ରହିବ କରୋନା କଟକଣା । ଦୀପାବଳିକୁ ଲକ୍ଷ୍ୟରେ ରଖି କଡ଼ାକଡ଼ି କରାଯିବ କି ନିୟମ । ନା ପୂର୍ବାପେକ୍ଷା କଟକଣା କୋହଳ କରିବେ ରାଜ୍ୟ ସରକାର । ଏନେଇ ଆଜି ଆସିପାରେ ସ୍ପଷ୍ଟ ଚିତ୍ର । ନଭେମ୍ବର ମାସ ପାଇଁ ଆଜି କରୋନା ଗାଇଡଲାଇନ୍ ଜାରି କରିପାରନ୍ତି ରାଜ୍ୟ ସରକାର । ଦୀପାବଳି ପାଇଁ ବାଣ ଫୁଟା ଉପରେ ଲାଗିପାରେ ରୋକ୍ ।

ଏଥିସହ ପଢ଼ନ୍ତୁ: ଘେରାଉ ନାଁରେ ବିଜେପିର ଗୁଣ୍ଡାଗର୍ଦ୍ଦି, ଦଳର ୩୨ ନେତା ଓ କର୍ମୀଙ୍କ ବିରୋଧରେ ଏତଲା ରୁଜୁ

ସାମାଜିକ ଓ ସାଂସ୍କୃତିକ କାର୍ଯ୍ୟକ୍ରମ ଉପରେ ମଧ୍ୟ ଜାରି ରହିପାରେ କଟକଣା । ରାଜ୍ୟରେ କରୋନା ସଂକ୍ରମଣ ସ୍ଥିର ରହିଛି । ଭୁବନେଶ୍ୱରରେ ସଂକ୍ରମଣ ସାମାନ୍ୟ ଅଧିକ ରହୁଛି । ଏଣୁ ପରିସ୍ଥିତିକୁ ଦୃଷ୍ଟିରେ ରଖି ଗାଇଡଲାଇନ୍ ଜାରି କରିବେ ସରକାର । ସେପଟେ ଦେଶର ବିଭିନ୍ନ ରାଜ୍ୟରେ ସଂକ୍ରମଣ ବଢୁଥିବାରୁ ତାହାକୁ ମଧ୍ୟ ନଜରରେ ରଖିପାରନ୍ତି ସରକାର । ପାର୍ବଣ ସହିତ ସବୁ ଦିଗକୁ ଲକ୍ଷ୍ୟରେ ରଖି ନୂଆ ଗାଇଡଲାଇନ୍ ଜାରି କରାଯିବ ।

ଘେରାଉ ନାଁରେ ବିଜେପିର ଗୁଣ୍ଡାଗର୍ଦ୍ଦି, ଦଳର ୩୨ ନେତା ଓ କର୍ମୀଙ୍କ ବିରୋଧରେ ଏତଲା ରୁଜୁ

ବ୍ରହ୍ମପୁର: ବିଜେପିର ହିଂସା ରାଜନୀତି । ଘେରାଉ ନାଁରେ ଗୁଣ୍ଡାଗର୍ଦ୍ଦି କରୁଛନ୍ତି ଦଳର ନେତା ଓ କର୍ମୀ । ମମିତା ମେହେର ହତ୍ୟା ଘଟଣାର ପ୍ରତିବାଦରେ ଗଞ୍ଜାମ ଜିଲ୍ଲା ବିଜେପି ଗତ ୨୮ ତାରିଖରେ ବ୍ରହ୍ମପୁର ଏସପି ଅଫିସ୍ ଘେରାଉ କରିଥିଲା । ପ୍ରତିବାଦ ବେଳେ ପୋଲିସ ଓ ବିଜେପି କର୍ମୀଙ୍କ ମଧ୍ୟରେ ଧସ୍ତାଧସ୍ତି ହୋଇଥିଲା । ଏଥିରେ ୩ ପୋଲିସ ଅଧିକାରୀଙ୍କ ସହ ଜଣେ କନେଷ୍ଟବଳ ଓ ଜଣେ ସାମ୍ବାଦିକ ଆହତ ହୋଇଥିଲେ । ଏସପି ଅଫିସ୍ ଘେରାଉ ସମୟରେ ବିଜେପି କର୍ମୀ ପୋଲିସ ଉପରକୁ ଆକ୍ରମଣ କରିଥିବା ନେଇ ବୈଦ୍ୟନାଥପୁର ଥାନା ଅଧିକାରୀ ରାମ କୁମାର ମୁର୍ମୁ ଏତଲା ଦେଇଛନ୍ତି ।

Brahmapur Police Filed FIR Against 32 BJP Leader And Worker

ଏସପି ଅଫିସ୍ ମୁଖ୍ୟ ଫାଟକରେ ଧସେଇ ପଶିବାକୁ ଉଦ୍ୟମ ସହ ପୋଲିସ ଉପରକୁ ଅଣ୍ଡା, ଟମାଟୋ ମାଡ଼ ସହ ଢେଲା ମାଡ଼ ହୋଇଥିବା ଏତଲାରେ ଦର୍ଶାଯାଇଛି । ଆକ୍ରମଣରେ ଡିଏସପି ଓ ଏସଡିପିଓଙ୍କ ସହ ଜଣେ ଏସଆଇ ଏବଂ ଜଣେ କନେଷ୍ଟବଳ ଆହତ ହୋଇଥିବା ସେ ଅଭିଯୋଗ କରିଛନ୍ତି । ଏହି ଘଟଣାରେ ବୈଦ୍ୟନାଥପୁର ଥାନା ପୋଲିସ ଏକ ମାମଲା ରୁଜୁ କରିଛି । ୩୧ଜଣ ବିଜେପି ନେତା ଓ କର୍ମୀଙ୍କ ନାଁରେ ମାମଲା ରୁଜୁ ହୋଇଥିବା ଜଣାପଡ଼ିଛି । ଏହି ଘଟଣାର ତଦନ୍ତ କରାଯିବ ବୋଲି କହିଛନ୍ତି ବ୍ରହ୍ମପୁର ଏସପି ପିନାକ ମିଶ୍ର ।

Brahmapur Police Filed FIR Against 32 BJP Leader And Worker

ବିଜେପି ଜିଲ୍ଲା ସଭାପତି ବିଭୁତି ଭୂଷଣ ଜେନା, ଯୁବମୋର୍ଚ୍ଚା ଜିଲ୍ଲା ସଭାପତି ଏଲ୍. ମୋହନ ଦାସ, ରାଜ୍ୟ ଉପସଭାପତି ଭୃଗୁ ବକ୍ସିପାତ୍ର, ରାଜ୍ୟ ସାଧାରଣ ସମ୍ପାଦକ ଓମ୍ ପ୍ରକାଶ ମିଶ୍ରଙ୍କ ସହ ନିଳାଦ୍ରୀ ପାତ୍ର, ମନୋରଞ୍ଜନ ଦ୍ୟାନସାମନ୍ତରା, ପ୍ରଶାନ୍ତ କର, ଶରତ କୁମାର ସାହୁ, ସରୋଜ ସାବତ, ମହାନ୍ତି ଚିନ୍ମୟାନନ୍ଦ ମହାରାଜ, ଯୁବମୋର୍ଚ୍ଚା ଜିଲ୍ଲା ସଭାପତି ସରୋଜ ସାବତ , ମହନ୍ତ ଚିନ୍ମୟାନନ୍ଦ ମହାରାଜ, ସୁଜିତ ନାୟକ, ସିଦ୍ଧାନ୍ତ ଗଙ୍ଗଦେବ, ଶିବଶଙ୍କର ଶତପଥି, ଗଙ୍ଗାଧର ଶତପଥି, ମନୋଜ ପଟ୍ଟନାୟକ, ରାମ କୁମାର ପାତ୍ର, ପ୍ରଭାତ କିରଣ ଷଡ଼ଙ୍ଗୀ, ସୁନୀଲ କୁମାର ସାହୁ, ସୁବାଷିନୀ ପଟ୍ଟନାୟକ, ମୀନା ଦ୍ୟାନସାମନ୍ତରା, ଏସ୍.ରାଣୀ, ନମିତା ରାଣୀ ପଣ୍ଡା, ସନ୍ଦୀପ ଶତପଥି, ପି.କରୁଣାକର, ଗୋପିନାଥ ପଣ୍ଡା, ପରେଶ ରଥ, କିରଣ ସାହୁ, ମଧୁସୂଦନ ସାହୁ, ଜଗଦୀଶ ପ୍ରଧାନ, ସୁମିତ ପାତ୍ର ଓ ଶିବ ଶଙ୍କର ନାୟକଙ୍କ ନାଁରେ ଏତଲା ହୋଇଛି ।

Brahmapur Police Filed FIR Against 32 BJP Leader And Worker

ଅଭିଯୁକ୍ତଙ୍କ ବିରୋଧରେ ଆଇପିସି ଧାରା ୭, ୧୪୭, ୧୪୮, ୧୫୨, ୧୫୩, ୩୩୨, ୩୩୩, ୩୨୫, ୪୩୧, ୫୦୬, ୧୪୯, ୩ (ସରକାରୀ ସମ୍ପତ୍ତିକୁ କ୍ଷତି ପହଞ୍ଚାଇବା) ଲାଗିଛି ।