ନୟାଗଡ଼: ନୟାଗଡ଼ ଦଶପଲ୍ଲା ବ୍ଲକ୍ ୫୭ ନଂ ଜାତୀୟ ରାଜପଥର ଖଡାପିଟା ଘାଟିରେ ସଡ଼କ ଦୁର୍ଘଟଣା। ଭାରସାମ୍ୟ ହରାଇ ଦୁର୍ଘଟଣାଗସ୍ତ ହେଲା ସ୍କୁଟି। ଘଟଣାସ୍ଥଳରେ ୨ ଜଣଙ୍କର ମୃତ୍ୟୁ ହୋଇଥିବା ବେଳେ ଅନ୍ୟ ଜଣକ ଅବସ୍ଥା ଗୁରୁତର ଥିବା ଜଣାପଡିଛି। ସୂଚନା ଅନୁସାରେ ସ୍କୁଟିରେ ୩ ଜଣ ଯୁବକ ରାଧେଶ୍ୟାମ ଖର୍ଦି, ଆଲୋକ ଶତପଥୀ ଓ ମନୋଜ କୁମାର ନାୟକ ଭୁବନେଶ୍ୱରରୁ ବାଲିଗୁଡା ଅଭିମୁଖେ ଯାଉଥିଲେ। ରାସ୍ତାରେ ଗଲା ବେଳେ ସ୍କୁଟିଟି ଭାରସାମ୍ୟ ହରାଇ ଦୁର୍ଘଟଣା ଗ୍ରସ୍ତ ହୋଇଥିଲା।

ଦୁର୍ଘଟଣା ସମୟରେ ଦୁଇଜଣଙ୍କର ସେହି ସମୟରେ ହିଁ ମୃତ୍ୟୁ ହୋଇଯାଇଥିଲା। ତେବେ ଗୁରୁତରଙ୍କୁ  ଡାକ୍ତରଖାନାରେ ଭର୍ତ୍ତି କରାଯିବା ସହ ପୋଲିସ ଘଟଣାସ୍ଥଳରେ ପହଁଚି ସ୍କୁଟିକୁ ଜବତ କରିଛି। ପ୍ରାଥମିତ ତଦନ୍ତରୁ ଜଣାପଡ଼ିଛି ରାଧେଶ୍ୟାମ, ଆଲୋକ ଓ ମନୋଜଙ୍କ ଘର କନ୍ଧମାଳ ଜିଲ୍ଲା ବାଲିଗୁଡ଼ା ଅଞ୍ଚଳରେ।

ଭୁବନେଶ୍ୱର: ବିଜେପିର ଦୋମୁହାଁ ନୀତି। ବିଧାନସଭାରେ ବିରୋଧୀ ସଦସ୍ୟଙ୍କ ଆଚରଣକୁ ସାଧାରଣ ଲୋକ ଦୁର୍ଭାଗ୍ୟଜନକ ବୋଲି କହିଲେଣି। ଲୋକଙ୍କ ପ୍ରସଙ୍ଗ, ସ୍ୱାର୍ଥକଥା ଭୁଲି କେବଳ ରାଜନୀତି କରିବାରେ ଲାଗିଛନ୍ତି ବିରୋଧୀ। ବିଶେଷକରି ବିଜେପିର ଦୋମୁହାଁ ନୀତିକୁ ସାଧାରଣରେ ନାପସନ୍ଦ କରାଯାଉଛି। ଗତ ପାର୍ଲାମେଣ୍ଟ ଅଧିବେଶନ ବେଳେ ବିରୋଧୀ ଅଚଳାବସ୍ଥା ସୃଷ୍ଟି କରିବାରୁ ରାଜ୍ୟସଭା ଅଧ୍ୟକ୍ଷ ଭେଙ୍କେୟା ନାଇଡୁ କାନ୍ଦି ପକାଇଥିଲେ।

ଭେଙ୍କେୟା ନାଇଡୁ କହିଥିଲେ ଯେ, ସଦନରେ ବିଭିନ୍ନ ପ୍ରସଙ୍ଗରେ ଆଲୋଚନା ବେଳେ କୌଣସି ବିଶୃଙ୍ଖଳା ହେବା ଉଚିତ ନୁହେଁ। ଲୋକସଭା ବାଚସ୍ପତି ଓମ ବିର୍ଲା ମଧ୍ୟ ଅନୁରୂପ ଭାବେ ଉଦବେଗ ପ୍ରକାଶ କରିଥିଲେ। ରାଜ୍ୟସଭା ଅଧ୍ୟକ୍ଷ ଭେଙ୍କେୟା ନାଇଡୁ କହିଥିଲେ, ବିରୋଧୀଙ୍କ ବିଶୃଙ୍ଖଳିତ ଆଚରଣ ଓ ଗୃହକୁ ଚଳାଇନଦେବା ପବିତ୍ର ଗଣତନ୍ତ୍ରର ପରିପନ୍ଥୀ। ଗଣତନ୍ତ୍ର ମନ୍ଦିର ପ୍ରତି ଏହା କୁଠାରାଘାତ। ନାଇଡୁ କହିଥିଲେ ଯେ, ବିରୋଧୀଙ୍କ ଏଭଳି ଅସହଯୋଗକୁ ନିନ୍ଦା କରିବା ଲାଗି ତାଙ୍କ ନିକଟରେ ଭାଷା ନାହିଁ। ଏହି କାରଣରୁ ସେ ରାତି ସାରା ଶୋଇ ପାରୁନାହାନ୍ତି। ନାଇଡୁଙ୍କ କଣ୍ଠ ଘୃଣାରେ ଥରୁଥିଲା। ବିରୋଧୀଙ୍କ ଏଭଳି ଆଚରଣ ପଛର କାରଣ ସେ ଖୋଜି ପାଇନଥିବା ଦୁଃଖର ସହ କହିଥିଲେ।

ଲୋକସଭାର ମୌସୁମୀ ଅଧିବେଶ ବେଳେ ବିରୋଧୀ ସଦସ୍ୟଙ୍କ ଅସହଯୋଗ କାରଣରୁ ସବୁଠୁ କମ କାମ ହେବାନେଇ ବାଚସ୍ପତି ଓମ୍ ବିର୍ଲା ଅସନ୍ତୋଷ ବ୍ୟକ୍ତ କରିଥିଲେ। ସେ କହିଥିଲେ ଗୃହକୁ ସୁରୁଖୁରୁ ଚଳାଇବା ପାଇଁ ତାଙ୍କର ସମସ୍ତ ଉଦ୍ୟମ ସତ୍ତ୍ୱେ ଏଭଳି ଅଭାବନୀୟ ପରିସ୍ଥିତି ସୃଷ୍ଟି ହେଉଛି।

ଓମ ବିର୍ଲା କହିଥିଲେ, ଯେ ଗୃହରେ ଲୋକଙ୍କ କଥା ଆଲୋଚନା ହୋଇନପାରିବାରୁ ସାଧାରଣ ଜନତା ଅତ୍ୟନ୍ତ ଦୁଃଖିତ ଓ କ୍ଷୁବ୍ଧ। ଲୋକଙ୍କର ଏହି ଉଦବେଗ ସହିତ ସେ ଏକମତ ବୋଲି ପ୍ରକାଶ କରିଥିଲେ। ଏଭଳି ପରିସ୍ଥିତିରେ ସଂସଦୀୟ ବିଧି ବ୍ୟବସ୍ଥା ସଂପର୍କିତ ନିୟମ କାନୁନର ପୁନଃ ସମୀକ୍ଷାପାଇଁ ଲୋକସଭା ବାଚସ୍ପତି ପ୍ରସ୍ତାବ ରଖିଥିଲେ। ଏ ସଂପର୍କରେ ଅଧିକାରୀମାନେ ଏକ କମିଟି ଗଠନ କରି ଆଲୋଚନା କରିବା ସହ ଚୂଡାନ୍ତ ରିପୋର୍ଟ ପ୍ରଦାନ କରନ୍ତୁ କୁହାଯାଇଥିଲା।

ପାର୍ଲାମେଣ୍ଟରେ ବିଭିନ୍ନ ବିରୋଧୀ ଦଳ ଅଚଳାବସ୍ଥା ସୃଷ୍ଟି ପାଇଁ ଉଦ୍ୟମ କରୁଥିବା ବେଳେ ବିଜେଡି ସାଂସଦମାନେ କିନ୍ତୁ, ଦାୟିତ୍ୱ ସମ୍ପନ୍ନ। ବିଜେଡି ସାଂସଦମାନେ ଶୃଙ୍ଖଳିତ। ଲୋକପ୍ରତିନିଧି ହିସାବରେ ପ୍ରତ୍ୟେକ ଆଲୋଚନାରେ ଅଂଶଗ୍ରହଣ କରି ମତ ରଖିଥିଲେ। ଗୋଟିଏ ପଟେ ବିଜେପିର କେନ୍ଦ୍ରୀୟ ନେତାମାନେ ବିଭିନ୍ନ ବିଧେୟକ ସଂପର୍କରେ ଆଲୋଚନା ଏବଂ ଶୃଙ୍ଖଳିତ ତର୍ଜମା ପାଇଁ ଆହ୍ୱାନ ଦେଉଥିବା ବେଳେ, ଅନ୍ୟପଟେ ରାଜ୍ୟ ବିଜେପି କିନ୍ତୁ ବିଧାନସଭାରେ ଓଲଟା ଆଚରଣ ଓ ଆଭିମୁଖ୍ୟ ଗ୍ରହଣ କରୁଛି। ଅନ୍ୟ ଅର୍ଥରେ କହିଲେ ସଂପୂର୍ଣ୍ଣ ଭାବେ ଏହା ବିଜେପିର ଦୋମୁହାଁ ନୀତି ବୋଲି ବୁଦ୍ଧିଜୀବୀ ମତ ଦେଇଛନ୍ତି। ବିଧାନସଭାର ମୌସୁମୀ ଅଧିବେଶନରେ ଲୋକଙ୍କ କଥାକୁ ଜଳାଞ୍ଜଳି ଦେଇ ବିଜେପି ଗୃହ ଚଳାଇନଦେବାକୁ ନିଷ୍ପତ୍ତି ନେଇସାରିଛି।

ଭୁବନେଶ୍ୱର: ରାଜ୍ୟରେ ଏବେ ଶିଶୁ ମାନଙ୍କ କ୍ଷେତ୍ରରେ କରୋନା ସଂକ୍ରମଣ ଧିରେ ଧିରେ ବଢ଼ିବାରେ ଲାଗିଛି। ପ୍ରତିଦିନ ୧୦୦ ପରେ ରହୁଛି ଶୂନରୁ ୧୮ ମଧ୍ୟରେ ପିଲାଙ୍କୁ ସଂକ୍ରମଣ। ତେବେ କୋଭିଡ ସଂକ୍ରମଣର ଏକ ମାସ ପରେ ଶୂନରୁ ୧୦ ବର୍ଷ ପିଲାଙ୍କ ଭିତରେ ମଲ୍ଟି ସିଷ୍ଟମ ଇନ୍‌ଫ୍ଲାମାଟୋରୀ ସିଣ୍ଡ୍ରମ ବା ଏମ୍‌ଆଇ ସିଣ୍ଡ୍ରମର ସମ୍ଭାବନା ବଢିଯାଉଛି।

ଯିଦି ଦେଖିବା ତେବେ ଏହା ପ୍ରଥମ ଲହରିରେ ଚିହ୍ନଟ ହୋଇ ନଥିଲା। ଏହା ଦ୍ଵିତୀୟ ଲହରିରେ ଦେଖାଗଲା ଯେ ବହୁତ ପିଲା ଏମ୍ଆଇ ସିଣ୍ଡ୍ରମରେ ହସ୍ପିଟାଲ ଆସୁଛନ୍ତି। ଏହାର ଲକ୍ଷଣ ହେଉଛି କୋଭିଡରୁ ସୁସ୍ଥ ହେବାର ଏକ ମାସ ପରେ ସେମାନଙ୍କ ମୁଣ୍ଡ ବିନ୍ଧା, ଝାଡ଼ା, ବାନ୍ତି ହେଉଛି। ଏହି ଲକ୍ଷଣ ଦେଖାଯିବା ମାତ୍ରେ ଡାକ୍ତରଙ୍କ ପରାମର୍ଶ ନେଇ ହସ୍ପିଟାଲରେ ଭର୍ତ୍ତି ହେଲେ ମୃତ୍ୟୁହାର କମିବ ବୋଲି କହିଛନ୍ତି ଜନସ୍ୱାସ୍ଥ୍ୟ ନିର୍ଦ୍ଦେଶକ ଡାକ୍ତର ନିରଞ୍ଜନ ମିଶ୍ର।

ସେ କହିଛନ୍ତିଯେ ଜିଲ୍ଲା ସମେତ ସବୁ ହସ୍ପିଟାଲରେ ପିଲାଙ୍କ ପାଇଁ ଅକ୍ସିଜେନ ସିଲିଣ୍ଡର ଓ ବେଡ଼ ବଢ଼ାଇବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିର୍ଦ୍ଦେଶ ଦେଇଛନ୍ତି। ICU ଓ HDU ବ୍ୟବସ୍ଥା ପାଇଁ ବନ୍ଦୋବସ୍ତ ଚାଲିଛି। ଖୁବ ଶୀଘ୍ର ସବୁ ହସ୍ପିଟାଲରେ ଏହି ଚିକିତ୍ସା ସୁବିଧା ମିଳିବ। ବର୍ତ୍ତମାନ ସବୁ ମେଡିକାଲ କଲେଜରେ ଏହି ସୁବିଧା ଅଛି ବୋଲି ସୂଚନା ଦେଇଛନ୍ତି।

କଳାହାଣ୍ଡି: ଜିଏସଟି ଫାଙ୍କିବା ଅଭିଯୋଗରେ ଟ୍ରକରୁ ଜୋରିମାନା ଆଦାୟ। କଳାହାଣ୍ଡି ଜିଲ୍ଲା କେସିଙ୍ଗାରେ ସୁପରଫାଷ୍ଟ ମୁଭେର ପ୍ରାଇଭେଟ ଲିମିଟେଡ଼ ଉପରେ ଜିଏସଟି ଏନଫୋର୍ସମେଣ୍ଟ ଟିମର ଚଢାଉ। ବିନା ବିଲ୍‌ରେ ଟ୍ରକରେ ରଖାଯାଇଥିବା କପଡାକୁ ଜବତ କଲା ଏନଫୋର୍ସମେଣ୍ଟ ଟିମ। ତଦନ୍ତ କରି ଦେଢ ଲକ୍ଷ ଟଙ୍କା ଜୋରିମାନା ଆଦାୟ କରିଛି ତଦନ୍ତକାରୀ ଦଳ। ଜିଏସଟି ବିଲ୍‌ରେ ଚଞ୍ଚକତା ଅଭିଯୋଗରେ ଜିଲ୍ଲା ଜିଏସଟି ଇନଫୋର୍ସମେଣ୍ଟ ତରଫରୁ କଳିଙ୍ଗ ସୁପରଫାଷ୍ଟ ମୁଭେର ପ୍ରାଇଭେଟ୍ ଲିମିଟେଡ ଗୋଦାମ ଉପରେ ଚଢ଼ାଉ କରାଯାଇଥିଲା।

ଏହିସମୟରେ ରେଡିମେଟ କପଡା ସହ ଅନ୍ୟାନ୍ୟ ଜିନିଷ ଭର୍ତ୍ତି ରହିଥିବା ଏକ ଟ୍ରକ ଜିଏସଟି ଅଧିକାରୀଙ୍କ ସନ୍ଦେହ ଘେରକୁ ଆସିଥିଲା। ଏହାର ତଦନ୍ତ ପରେ ସଂପୃକ୍ତ ସଂସ୍ଥା ଜିଏସଟି ଫାଙ୍କିଥିବା ଜଣାପଡିଥିଲା। ଟ୍ରକରେ ଥିବା ୯୭ଟି ବଣ୍ଡଲରୁ ୬୦ଟିର ବିଲ୍ ଭାଉଚର ନଥିଲା। ଫଳରେ ଟ୍ୟାସ୍କ ଓ ଜୋରିମାନା ବାବଦକୁ ୧ଲକ୍ଷ ୫୦ ହଜାର ଟଙ୍କା ଅସୁଲ କରାଯାଇଛି।

ଗୁଣୁପୁର: ଅନ୍ଧ ବିଶ୍ୱାସର ବଶବର୍ତ୍ତୀ ହୋଇ ମାଟି ଖୋଳି ଖୋଜିଲେ ଗୁପ୍ତଧନ। ଗତ ରାତିରେ ଚାଲିଥିଲା ଗୁଣିଆଙ୍କ ସହ ପୂଜାର୍ଚ୍ଚନା। ଅମାବାସ୍ୟା ରାତିରେ ପୂଜାର୍ଚ୍ଚନା ଚାଲିଥିବା ବେଳେ ଗାଁ ଲୋକଙ୍କ ହାବୁଡ଼ରେ ପଡ଼ିଲେ ୧୧ଜଣ ବ୍ୟକ୍ତି। ଏଭଳି ଏକ ଘଟଣା ଦେଖିବାକୁ ମିଳିଛି ରାୟଗଡା ଜିଲ୍ଲା ବିଷମ କଟକ ଥାନା ଅନ୍ତର୍ଗତ ଡୁକମ ପଞ୍ଚାୟତ ଡେଡ଼ିପଡ଼ା ଗାଁରେ।

ଉକ୍ତ ଗାଁର କାଣିମାଣି ଠାକୁରାଣୀ ଝାଙ୍କିରି ମାଁ ପୀଠରେ ଗତକାଲି ଚାଲିଥିଲା ଏଭଳି କାର୍ଯ୍ୟ। ୧୧ଜଣ ଲୋକ ମିଳିମିଶି ପୂଜା ପାଠ କରିବା ସମୟରେ ଗ୍ରାମବାସୀ ଏମାନଙ୍କୁ କାବୁକରି ଏକ କୋଠରୀରେ  ଅଟକ ରଖିଛିଥିଲେ। ଗୁପ୍ତଧନ ବାହାର କରିବା ପାଇଁ ପୂଜାପାଠ ଚାଲିଥିବା ବେଳେ ଗାଁ ଲୋକ ସମସ୍ତ ୧୧ ଜଣଙ୍କୁ ଧରିଥିଲେ। ଗୁଣିଆ ମନ୍ତ୍ର ବୋଲୁଥିବା ବେଳେ ବାକି ୧୧ ଜଣ ମାଟି ଖୋଳିବାରେ ଲାଗିଥିଲେ।

ଏବେ ସମସ୍ତଙ୍କୁ ଏକ ଘରେ ବନ୍ଦୀ କରି ରଖାଯାଇଛି। ତେବେ ଗାଁରେ ଏକ ବୈଠକରେ ନିଷ୍ପତି ହେବା ପରେ ଏମାନଙ୍କୁ ଛଡ଼ାଯିବା ବୋଲି ଗ୍ରାମବାସୀ କହିଛନ୍ତି। ଏହି ୧୧ ଜଣଙ୍କ ମଧ୍ୟରୁ କଳାହାଣ୍ଡି ଭବାନୀ ପାଟଣାର ୩ ଜଣ, ବିଶ୍ୱନାଥଥପୁରର ୩ଜଣ ଓ ରାୟଗଡା ଜିଲ୍ଲା ପଦ୍ମପୁର ବ୍ଲକର ଜଣେ ଥିବା ବେଳେ ବିଷମ କଟକ ଥାନା ଅଞ୍ଚଳର ୪ ଜଣ ରହିଛନ୍ତି। ଏମାନଙ୍କୁ ଗତକାଲି ରାତି ୮ ଟାରୁ ଗାଁ ଲୋକ ଗୋଟିଏ ଘରେ ରଖି ନିର୍ଧୁମ ମାଡ଼ ମାରିବା ସହ ୨ ଲକ୍ଷ ଟଙ୍କା ଦାବୀ କରୁଥିବା କହିଛନ୍ତି ଅଟକ ଥିବା ବ୍ୟକ୍ତି। ଘଟଣା ସ୍ଥଳରେ ପୋଲିସ ପହଞ୍ଚି ପଚରାଉଚୁରା କରିଥିଲା। ଏନେଈ ବିଷମକଟକ ଥାନାରେ କିଛି ଅଭିଯୋଗ ହୋଇନାହିଁ।