spot_img
Home Blog Page 5248

ଘରୋଇ ଉଡ଼ାଣରେ ଯାତ୍ରୀ ପରିବହନ କ୍ଷମତା ଉପରୁ ହଟିଲା କଟକଣା

ନୂଆଦିଲ୍ଲୀ: ଆସନ୍ତା ୧୮ରୁ ପୂରା ଦମ୍‌ରେ ଚାଲିବ ବିମାନ ସେବା । ଦେଶରେ କୋଭିଡ ସଂକ୍ରମଣ ହ୍ରାସ ପାଇଥିବାରୁ ବେସାମରିକ ବିମାନ ଚଳାଚଳ ମନ୍ତ୍ରାଳୟ ଏହି ନିଷ୍ପତ୍ତି ନେଇଛି । ସିଟ୍ ଅନୁସାରେ ଯାତ୍ରୀ ପରିବହନ କରାଯିବ ବୋଲି ନିର୍ଦ୍ଦେଶ ଦିଆଯାଇଛି ।

ବର୍ତ୍ତମାନ ୮୫ ପ୍ରତିଶତ ସିଟରେ ଯାତ୍ରୀ ପରିବହନ ଲାଗି ନିୟମ ରହିଛି। ଦୀର୍ଘ ଦିନ ଧରି କୋଭିଡ ଯୋଗୁ ବିମାନ ସେବାରେ ଅନିୟମିତତା ପ୍ରକାଶ ପାଇଆସୁଥିଲା । ବିମାନ ଯାତ୍ରୀଙ୍କ ସଂଖ୍ୟା ବୃଦ୍ଧି ଦୃଷ୍ଟିରୁ ସରକାର ଏହି ପଦକ୍ଷେପ ନେଇଛନ୍ତି । ଫଳରେ ଆସନ୍ତା ୧୮ ତାରିଖ ଠାରୁ ସମ୍ପୂର୍ଣ୍ଣ ସିଟରେ ଯାତ୍ରୀଙ୍କୁ ନିଆଯାଇପାରିବ।

ତେବେ ବିମାନ ଯାତ୍ରା କ୍ଷେତ୍ରରେ କୋଭିଡ ଗାଇଡଲାଇନ ସମ୍ପୂର୍ଣ୍ଣ ପାଳନ ହେବ ଏବଂ ବିମାନ ବନ୍ଦର କର୍ତ୍ତୃପକ୍ଷ ଏହା ପାଳନ କରିବା ଲାଗି ନିର୍ଦ୍ଦେଶ ଦିଆଯାଇଛି । ଗତ ଜୁଲାଇ ୫ରୁ ଅଗଷ୍ଟ ୧୨ ଯାଏଁ ୬୫ ପ୍ରତିଶତ ସାମର୍ଥ୍ୟରେ ଯାତ୍ରୀ ପରିବହନ ଲାଗି ନିର୍ଦ୍ଦେଶ ଥିଲା ।

ଘରେ ଭିତରେ ପଶିଲା ଟ୍ରକ୍, ଅଳ୍ପକେ ବର୍ତ୍ତିଲେ ତିନି ପରିବାର

ଆସିକା: ଗଞ୍ଜାମ ଜିଲ୍ଲା ଧରାକୋଟ ଥାନା ଗଡ଼ଦାମୋଦରପଲ୍ଲି ଗାଁ ଛକରେ ଭୟଙ୍କର ଦୁର୍ଘଟଣା ଘଟିଛି । ରାତି ପ୍ରାୟ ସାଢ଼େ ୯ଟା ବେଳେ ସୋରଡ଼ାରୁ ଆସିକା ଆଡ଼େ ଯାଉଥିବା ଟ୍ରକ୍ ଦୁର୍ଘଟଣାଗ୍ରସ୍ତ ହୋଇ ଘରେ ପଶି ଯାଇଛି । ଦୁର୍ଘଟଣାରୁ ଅଳ୍ପକେ ତିନି ପରିବାର ବର୍ତ୍ତି ଯାଇଛନ୍ତି ।

Truck Accident In Dharakote, House Damaged

ଟ୍ରକ୍ ଧକ୍କାରେ ତିନୋଟି ଘର ଭାଙ୍ଗି ଯାଇଛି । ଟୁନା ଗୌଡ଼ଙ୍କ ବାଇକ୍ ମଧ୍ୟ ସମ୍ପୂର୍ଣ୍ଣ ନଷ୍ଟ ହୋଇଯାଇଛି । ଟୁନା ଘର ଆଗରେ ବାଇକ୍ ରଖି ଯିବାମାତ୍ରେ ଶବ୍ଦ ଶୁଣିଥିଲେ । ସାଙ୍ଗେ ସାଙ୍ଗେ ସେ ପରିବାର ଲୋକଙ୍କୁ ଘର ଭିତରୁ ନେଇ ବାହାରକୁ ପଳାଇ ଯାଇଥିଲେ । ଫଳରେ ଘର ଭାଙ୍ଗି ଥିବାବେଳେ ପରିବାର ଅଳ୍ପକେ ବଡ଼ ଦୁର୍ଘଟଣାରୁ ରକ୍ଷା ପାଇ ଯାଇଛନ୍ତି ।

Truck Accident In Dharakote, House Damaged

ଦୁର୍ଘଟଣା ଖବର ପାଇ ଧରାକୋଟ ଥାନା ପୋଲିସ ଘଟଣାସ୍ଥଳରେ ପହଞ୍ଚିବା ସହ ଡ୍ରାଇଭର ଓ ହେଲପରକୁ ଅଟକ ରଖି ତଦନ୍ତ ଚଳାଇଛି । ଶିବଶଙ୍କର ପାଢ଼ୀଙ୍କ ଘର ମଧ୍ୟ ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଛି । ଘର ଆଗରେ ଥିବା ଇଟା ଯୋଗୁ ବଡ଼ ଅଘଟଣ ଅଳ୍ପକେ ଟଳି ଯାଇଛି ।

ପୂଜା ଛୁଟି ପରେ ବି ଖୋଲି ନପାରେ ପ୍ରାଥମିକ ସ୍କୁଲ

ଭୁବନେଶ୍ୱର: କୋଭିଡ୍ ସଂକ୍ରମଣ ଯୋଗୁଁ ପୂଜା ଛୁଟି ପରେ ବି ଖୋଲି ନପାରେ ପ୍ରାଥମିକ ସ୍କୁଲ । ଶିଶୁଙ୍କ ମଧ୍ୟରେ ସଂକ୍ରମଣ ବୃଦ୍ଧି ଓ ଅଜଣା ଜର ଭୟକୁ ଆହୁରି ବଢ଼ାଇ ଦେଇଛି । ଅଭିଭାବକମାନେ ବି ସଂକ୍ରମଣର ଭୟ ଯୋଗୁ ଛୁଆଙ୍କୁ ସ୍କୁଲ ଛାଡ଼ିବାକୁ ଅମଙ୍ଗ ।

Primary Schools May Not Opened After Puja Vacation

ଏଥର ବି ବିନା କ୍ଲାସରେ ପାସ୍ ହୋଇପାରନ୍ତି ପ୍ରାଥମିକ ଛାତ୍ରଛାତ୍ରୀ । ପୂଜା ପରେ ପ୍ରଥମେ ଷଷ୍ଠରୁ ଅଷ୍ଟମ ଶ୍ରେଣୀ ପରୀକ୍ଷାମୂଳକ ଭାବେ ଖୋଲିବାର ଆଶା ଦେଖାଯାଇଥିଲା । ପରେ ଅନ୍ୟ ଶ୍ରେଣୀ ଖୋଲିଥାନ୍ତା । ହେଲେ ପୂଜା ସମୟର ସଂକ୍ରମଣ ସେ ଆଶା ଫିକା କରି ଦେଇଛି । କିଛି ଦିନ ତଳେ ନବମରୁ ଦ୍ୱାଦଶ ଶ୍ରେଣୀ ଖୋଲିବା ପରେ ଛାତ୍ରଛାତ୍ରୀ ଓ ସ୍କୁଲ କର୍ତ୍ତୃପକ୍ଷ ସଂକ୍ରମିତ ହୋଇଥିଲେ । ଏବେ ଦୈନିକ କୋଭିଡ୍ ହାର ପୁଣି ବଢ଼ିବାରେ ଲାଗୁଛି । ଅଧିକାଂଶ ମାମଲା ଖୋର୍ଦ୍ଧା ଜିଲ୍ଲାରୁ ଆସୁଛି । ଏପରି ସ୍ଥିତିରେ ପ୍ରାଥମିକ ସ୍କୁଲ ଖୋଲି ରିସ୍କ ନ ନେଇ ପାରନ୍ତି ରାଜ୍ୟ ସରକାର ।

Primary Schools May Not Opened After Puja Vacation

ସେପଟେ ଗତ ୧୦ ଦିନ ହେଲା ଅଜଣା ଭୂତାଣୁ ଭୟ ଘାରିଛି । ୭ ବର୍ଷ ବୟସ୍କ ପର୍ଯ୍ୟନ୍ତ ପିଲାଙ୍କୁ ଜର, ଥଣ୍ଡା, କାଶ ପରି ରୋଗ ହେଉଛି । ରାଜ୍ୟରେ ପ୍ରାୟ ୮୦ ଭାଗ ଶିଶୁ ଏଥିରେ ପୀଡ଼ିତ ଅଛନ୍ତି । ଯାହାକୁ ଦୃଷ୍ଟିରେ ରଖି ପିଲାଙ୍କୁ ସ୍କୁଲ ଛାଡ଼ିବାକୁ ଅଭିଭାବକ ଅରାଜି ହେଉଛନ୍ତି ।

ପିଲାଙ୍କୁ ଦିଆଯିବ କୋଭାକ୍ସିନ୍ ଟିକା, ଜରୁରୀକାଳୀନ ବ୍ୟବହାର ଅନୁମତି ପାଇଁ ବିଶେଷଜ୍ଞ କମିଟିର ସୁପାରିସ୍

ନୂଆଦିଲ୍ଲୀ: ଖୁବଶୀଘ୍ର ଆସିବ ୨ରୁ ୧୮ବର୍ଷ ପିଲାଙ୍କ ଲାଗି ସଞ୍ଜିବନୀ । କୋଭାକ୍ସିନର ଜରୁରୀକାଳୀନ ବ୍ୟବହାରକୁ ଅନୁମତି ଦେବାକୁ ଡିସିଜିଆଇଙ୍କୁ ସୁପାରିସ କରିଛି ବିଷୟଗତ ବିଶେଷଜ୍ଞ କମିଟି । ଦ୍ୱିତୀୟ ଓ ତୃତୀୟ ପର୍ଯ୍ୟାୟ ଟ୍ରାଏଲ୍ ଶେଷ ପରେ ରିପୋର୍ଟ ଦାଖଲ କରିଥିଲା ଭାରତ ବାୟୋଟେକ୍ । ତେବେ ସବୁଜ ସଂକେତ ପୂର୍ବରୁ କମ୍ପାନୀକୁ ମାନିବାକୁ ହେବ ୪ ସର୍ତ୍ତ ।

Expert panel approves Covaxin for Children Between 2-18 Years

କୋଭିଡ ବିରୋଧରେ ବଡ଼ ମୁକାବିଲା । ଖୁବଶୀଘ୍ର ୨ରୁ ୧୮ବର୍ଷ ପିଲାଙ୍କୁ ଦିଆଯିବ କୋଭିଡ୍ ଟିକା । ଭାରତ ବାୟୋଟେକ୍ ଦ୍ୱାରା ପ୍ରସ୍ତୁତ କୋଭାକ୍ସିନର ଜରୁରୀକାଳୀନ ବ୍ୟବହାରକୁ ଅନୁମତି ଦେବାକୁ ଡିସିଜିଆଇଙ୍କୁ ସୁପାରିସ କରିଛି ବିଷୟଗତ ବିଶେଷଜ୍ଞ କମିଟି ବା ଏସଇସି । ହାଇଦ୍ରାବାଦର ଫାର୍ମାସିଟ୍ୟୁକାଲ କମ୍ପାନୀ ଦ୍ୱିତୀୟ ଓ ତୃତୀୟ ପର୍ଯ୍ୟାୟ ଟ୍ରାଏଲ ଶେଷ କରିବା ପରେ ରିପୋର୍ଟ ଦାଖଲ କରିଥିଲା । ଟ୍ରାଏଲ ରିପୋର୍ଟ ଆଧାରରେ ଏକ୍ସପର୍ଟ ପ୍ୟାନେଲ ଟିକାର ଜରୁରୀକାଳୀନ ବ୍ୟବହାର ଲାଗି ଡିସିଜିଆଇଙ୍କୁ ସୁପାରିସ କରିଛନ୍ତି ।

ଡିସିଜିଆଇ ଅନୁମତି ଦେବା ପରେ ସାରାଦେଶରେ ୨ରୁ ଊର୍ଦ୍ଧ୍ବ ବୟସ୍କଙ୍କ ପାଇଁ ଟିକାକରଣ ଆରମ୍ଭ ହେବ । ତେବେ ଡିସିଜିଆଇର ଚୂଡ଼ାନ୍ତ ଅନୁମତି ଚାରିଟି ସର୍ତ୍ତ ଉପରେ ନିର୍ଭର କରୁଛି ।

Expert panel approves Covaxin for Children Between 2-18 Years

ପ୍ରଥମ- ସ୍ବୀକୃତ କ୍ଲିନିକାଲ ଟ୍ରାଏଲ୍ ପ୍ରୋଟୋକଲ ଅନୁସାରେ କମ୍ପାନୀର ଗବେଷଣା ଜାରିରଖିବ ।

ଦ୍ବିତୀୟ- ପ୍ୟାକେଜ୍ ଇନସର୍ଟ ବା ନିର୍ଦ୍ଧାରିତ ସୂଚନା, ଉତ୍ପାଦର ବୈଶିଷ୍ଟ୍ୟ ନେଇ କମ୍ପାନୀ ସବିଶେଷ ତଥ୍ୟ ଦାଖଲ କରିବ ।

ତୃତୀୟ- କମ୍ପାନୀ ନିରାପତ୍ତା ସଂକ୍ରାନ୍ତ ଓ ଦୁଇ ମାସରେ ସର୍ବେକ୍ଷଣ ରିପୋର୍ଟ ଦାଖଲ କରିବ ।

ଚତୁର୍ଥ- କମ୍ପାନୀ ରିସ୍କ ପରିଚାଳନା ପ୍ଲାନ୍ ଦାଖଲ କରିବ । ଏହି ଟିକାକୁ ସିରିଞ୍ଜରେ ଆଗୁଆ ଭର୍ତ୍ତି କରାଯାଇ ହାଇଲେବଲ ଆକ୍ୟୁରାସି ଭିତ୍ତିରେ ପ୍ରଦାନ କରାଯିବ । ଶିଶୁଙ୍କ ଲାଗି କୋଭାକ୍ସିନର ପରିମାଣ ରହିଛି  ୦.୫ ମିଲିଲିଟର ।

Expert panel approves Covaxin for Children Between 2-18 Years

ପୂର୍ବରୁ ଗତ ଅଗଷ୍ଟରେ ଉଭୟ ବୟସ୍କ ଓ ୧୨ବର୍ଷରୁ ଅଧିକ ଲୋକଙ୍କ ଲାଗି ଜାଇଡସ କାଡିଲାର ଜାଇକୋଭ-ଡି ଟିକାକୁ ଅନୁମତି ଦିଆଯାଇଥିଲା । ୭ରୁ ୧୧ ବର୍ଷ ବୟସ୍କ ପିଲାଙ୍କ ଲାଗି ଟିକାର ଟ୍ରାଏଲ ନିମନ୍ତେ ସେରମ ଇନଷ୍ଟିଚ୍ୟୁଟର ନୋଭାଭାକ୍ସକୁ ଗତମାସରେ ଅନୁମତି ଦେଇଥିଲେ ଡିସିଜିଆଇ । ସେହିପରି ୫ ବର୍ଷର ଅଧିକ ବୟସର ପିଲାଙ୍କ ଲାଗି ଟ୍ରାଏଲ ସକାଶେ ବାୟୋଲୋଜିକାଲ-ଇ’ର କୋର୍ବେଭାକ୍ସକୁ ବି ଦିଆଯାଇଥିଲା ଅନୁମତି ।

BSKY ପାଇଁ ନୂଆ ଜୀବନ ପାଇଲେ ଭାସ୍କର

ପାରଳାଖେମୁଣ୍ଡି: ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାରେ ସ୍ମାର୍ଟ କାର୍ଡ ପାଇଁ ନୂଆ ଜୀବନ ପାଇଲେ ଭାସ୍କର । ଗଜପତି ଜିଲ୍ଲା ରାୟଗଡ଼ ବ୍ଲକ ଗଣ୍ଡହାତୀ ପଞ୍ଚାୟତ ପଦ୍ମପୁର ଗ୍ରାମର ୩୮ ବର୍ଷୀୟ ବି. ଭାସ୍କର ରାଓ । ସ୍ମାର୍ଟ ସ୍ୱାସ୍ଥ୍ୟ କାର୍ଡ ଜରିଆରେ ଚିକିତ୍ସା ସୁବିଧା ପାଇ ସୁସ୍ଥ ହୋଇ ଘରକୁ ଫେରିବା ପରେ ମୁଖ୍ୟମନ୍ତ୍ରୀଙ୍କ ଧନ୍ୟବାଦ ଜଣାଇଛନ୍ତି ଭାସ୍କର ଓ ତାଙ୍କ ପରିବାର ।

BSKY Helped In Treatment Of Bhaskar Gajapati

ଗରିବଙ୍କ ସାହା ବିଜୁ ସ୍ୱାସ୍ଥ୍ୟ କଲ୍ୟାଣ ସ୍ମାର୍ଟକାର୍ଡ । ଅଭାବୀଙ୍କୁ ଦେଉଛି ନୂଆ ଜୀବନ । ଚିକିତ୍ସା ପାଇ ସୁସ୍ଥ ହେଲେ ଗଜପତି ଜିଲ୍ଲା ରାୟଗଡ଼ର ଭାସ୍କର । ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜଣାଇଲେ ପରିବାର ଲୋକେ । ରାଜ୍ୟରେ BSKY ଆଣିଛି ବିପ୍ଲବ । ଏହି ଯୋଜନାରେ ଏବେ ନୂଆ ଜୀବନ ପାଇଛନ୍ତି ବି. ଭାସ୍କର ରାଓ । ଗତ କିଛିଦିନ ତଳେ ଭାସ୍କରଙ୍କ ଡାହାଣ ଗୋଡ଼ର ଆଣ୍ଠୁ ତଳକୁ ସମ୍ପୂର୍ଣ୍ଣ ପଚି ଯାଇଥିଲା । ଅର୍ଥାଭାବରୁ ଅସ୍ତ୍ରୋପଚାର କରି ନପାରି କଷ୍ଟ ପାଉଥିଲେ ।

BSKY Helped In Treatment Of Bhaskar Gajapati

ବିଜୁ ସ୍ମାର୍ଟ କାର୍ଡ ପାଇବା ପରେ ପାରଳାଖେମୁଣ୍ଡି ରବି ନର୍ସିଂ ହୋମରେ ତାଙ୍କର ଅସ୍ତ୍ରୋପଚାର ହୋଇଛି । ସମ୍ପୂର୍ଣ୍ଣ ମାଗଣାରେ ଚିକିତ୍ସା ପାଇ ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜଣାଇଛନ୍ତି ଭାସ୍କର ଓ ତାଙ୍କ ପରିବାର । ଗତ ୪ ତାରିଖରେ ଗଜପତି ଜିଲ୍ଲାରେ ସ୍ମାର୍ଟ କାର୍ଡର ଶୁଭାରମ୍ଭ କରିଥିଲେ ମୂଖ୍ୟମନ୍ତ୍ରୀ ନବୀନ ପଟ୍ଟନାୟକ । ଯାହା ଏବେ ଗରିବଙ୍କ ପାଇଁ ପାଲଟିଛି ଆଶିର୍ବାଦ । ଚିକିତ୍ସା କ୍ଷେତ୍ରରେ ରାଜ୍ୟ ପାଇଁ ଏହା ଏକ ଯୁଗାନ୍ତକାରୀ ପଦକ୍ଷେପ ବୋଲି କହିଛନ୍ତି ଜିଲ୍ଲା ମୁଖ୍ୟ ଚିକିତ୍ସାଧିକାରୀ ।

BSKY Helped In Treatment Of Bhaskar Gajapati

ଅପରପକ୍ଷରେ ଏହି ସ୍ମାର୍ଟ କାର୍ଡରେ ଉତ୍ତମ ବ୍ୟବସ୍ଥା କରାଯାଇଥିବାରୁ ଅଧିକରୁ ଅଧିକ ରୋଗୀ ଚିକିତ୍ସା କରିବା ପାଇଁ ଆଗ୍ରହ ପ୍ରକାଶ କରିଛନ୍ତି ବୋଲି କହିଛନ୍ତି ଭାସ୍କରଙ୍କୁ ଚିକିତ୍ସା କରିଥିବା ନର୍ସିଂହୋମର ଡାକ୍ତର । ରାଜ୍ୟ ସରକାରଙ୍କ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାର ସ୍ମାର୍ଟ କାର୍ଡ ଲୋକଙ୍କ ମୁହଁରେ ଖୁସି ଆଣିଦେଇଛି । ଏଥିପାଇଁ ସବୁ ମହଲରେ ମୂଖ୍ୟମନ୍ତ୍ରୀଙ୍କୁ ଧନ୍ୟବାଦର ସୁଅ ଛୁଟିଛି ।

ବରୁଣ ଗାନ୍ଧୀଙ୍କ ସ୍ୱାଗତ ପୋଷ୍ଟର ଶେୟାର କଲା କଂଗ୍ରେସ; ଦୁଃଖ ଭରେ ଦିନ ବିତେରେ ଭୟା…

ପ୍ରୟାଗରାଜ: ବିଜେପି ସାଂସଦ ବରୁଣ ଗାନ୍ଧୀ କୃଷକଙ୍କ ସମସ୍ୟାକୁ ନେଇ ଲଗାତାର ଭାବେ ନିଜ ଦଳକୁ ଟାର୍ଗେଟ୍ କରିବାରେ  ଲାଗିଛନ୍ତି । ଏଭଳି ସମୟରେ କଂଗ୍ରେସ ନେତା ମାନେ ତାଙ୍କର ‘ସ୍ୱାଗତ’ ପୋଷ୍ଟର ଲଗାଇଛନ୍ତି । ଯାହାକୁ ନେଇ ବରୁଣ କଂଗ୍ରେସରେ ଯୋଗଦେବା ନେଇ ଚର୍ଚ୍ଚା ହେଉଛି ।

ବରୁଣଙ୍କ ସ୍ୱାଗତ ପୋଷ୍ଟରରେ କିଛି ଏଭଳି ଲେଖାଯାଇଛି- ଦୁଃଖ ଭରେ ଦିନ ବିତେରେ ଭୟା ଅବ ସୁଖ ଆୟୋ ରେ । କେବଳ ଏତିକି ନୁହେଁ ବରୁଣଙ୍କ ସହ ପୋଷ୍ଟରରେ କଂଗ୍ରେସ ଅଧ୍ୟକ୍ଷ ସୋନିଆ ଗାନ୍ଧୀଙ୍କ ଫଟୋ ମଧ୍ୟ ରହିଛି । ସେହିପରି ତଳେ ଇରଶାଦ ଉଲ୍‌ଲା ଓ ବାବା ଅଭୟ ଅବସ୍ତୀଙ୍କ ଫଟୋ ରହିଛି। ଆଉ ଏହି ଦୁଇ ଜଣଙ୍କୁ କଂଗ୍ରେସର ବରିଷ୍ଠ ନେତା କୁହାଯାଉଛି ।

କୃଷକଙ୍କ ପ୍ରସଙ୍ଗକୁ ନେଇ ବରୁର ଗାନ୍ଧୀ ଲଗାତାର ଭାବେ ଦଳଠୁ ଅଲଗା ବୟାନ ଦେଇଥାନ୍ତି । ଏହାବ୍ୟତୀତ ସେ ଲଖିମପୁର ଖେରି ମାମଲାରେ ମୁଖ୍ୟମନ୍ତ୍ରୀ ଯୋଗୀଙ୍କୁ ଚିଠି ଲେଖି ସିବିଆଇ ଯାଞ୍ଚ କରିବାକୁ ଦାବି କରିଥିଲେ । ଏହା ବ୍ୟତୀତ ଘଟଣାର ଭିଡ଼ିଓ ଶେୟାର କରି କ୍ରୋଧ ପ୍ରକାଶ କରିଥିଲେ ।

ବାତ୍ୟାର ମାସ ଅକ୍ଟୋବର, ୨ ଦଶନ୍ଧି ଭିତରେ ଓଡ଼ିଶା ସାମ୍ନା କରିଥିବା ୪ ବାତ୍ୟା

ଭୁବନେଶ୍ୱର: ୫୦ ବର୍ଷ ଭିତରେ ଅନେକ ବାତ୍ୟାର ସାମ୍ନା କରିଛି ଓଡ଼ିଶା । ୧୯୯୯ ମହାବାତ୍ୟା ପରେ ଓଡ଼ିଶାର ବାତ୍ୟା ମୁକାବିଲା ରଣକୌଶଳ ବଦଳିଥିବା ବେଳେ କମ୍ ଧନଜୀବନ କ୍ଷୟ ହେଉଛି । ତଥାପି ଅକ୍ଟୋବର ମାସ ଆସିଲେ ଉପକୂଳିଆ ଲୋକଙ୍କୁ ଘାରୁଛି ବାତ୍ୟା ଭୟ । ୧୯୯୯ ଅକ୍ଟୋବର ୨୯ରେ ପାରାଦୀପରେ ମାଡ଼ ହୋଇଥିଲା ମହାବାତ୍ୟା । ଦେଖୁ ଦେଖୁ ଚାଲି ଯାଇଥିଲା ୧୦ ହଜାରରୁ ଅଧିକ ଜୀବନ ।

ଏହାପରେ ବାତ୍ୟା ଆସିଛି, ଯାହାର ସଫଳ ମୁକାବିଲା କରିଛି ଓଡ଼ିଶା । ୨୦୧୩ ଓ ୨୦୧୪ ମସିହା ଅକ୍ଟୋବର ମାସରେ ଓଡ଼ିଶା ଲଗାତାର ୨ଟି ଅତି ଭୀଷଣ ବାତ୍ୟାକୁ ସଫଳତାର ସହ ସାମ୍ନା କରିଛି । ୨୦୧୩ ଅକ୍ଟୋବର ୧୨ ତାରିଖରେ ପାରାଦୀପରେ ମାଡ଼ ହୋଇଥିଲା ବାତ୍ୟା ଫାଇଲିନ୍ । ଘଣ୍ଟାପ୍ରତି ୨୧୫ କିଲୋମିଟର ବେଗରେ ବହିଥିଲା ପବନ । ବାତ୍ୟାରେ ୨୧ ଜଣଙ୍କ ଜୀବନ ଯାଇଥିବା ବେଳେ ୧.୩ କୋଟି ବାତ୍ୟା ଓ ପରବର୍ତ୍ତୀ ବନ୍ୟାରେ ପ୍ରଭାବିତ ହୋଇଥିଲେ ।

October Cyclone History Of Odisha

ସେହିଭଳି ୨୦୧୪ ଅକ୍ଟୋବର ୧୨ରେ ବିଶାଖପାଟ୍ଟମଣରେ ଉପକୂଳ ଛୁଇଁଥିଲା ବାତ୍ୟା ହୁଡହୁଡ୍ । ଘଣ୍ଟାପ୍ରତି ୧୮୫ କିଲୋମିଟର ବେଗରେ ବହିଥିଲା ପବନ । ୩ ଜଣଙ୍କ ପ୍ରାଣହାନି ହୋଇଥିଲା ।  ୨୦୧୮ ଅକ୍ଟୋବର ୧୧ରେ ପଲାସା ନିକଟରେ ଲ୍ୟାଣ୍ଡଫଲ୍ କରିଥିଲା ଅତି ଭୀଷଣ ବାତ୍ୟା ତିତଲି । ୧୫୦ କିଲୋମିଟର ବେଗରେ ପବନ ହୋଇଥିଲା । ୭୭ ଜଣଙ୍କ ଜୀବନ ଯିବା ସହ ୬୦ ଲକ୍ଷ ଲୋକ ପ୍ରଭାବିତ ହୋଇଥିଲେ । ୨୦୧୮ ଗୋଟିଏ ବର୍ଷରେ ଓଡ଼ିଶା ସାମ୍ନା କରିଥିଲା ଦୁଇ ଦୁଇଟି ବାତ୍ୟାକୁ ।

ଏବେ ପୁଣି ଅକ୍ଟୋବରରେ ବାତ୍ୟା ଭୟ ଲୋକଙ୍କୁ ଘାରିଛି । ଉତ୍ତର ଆଣ୍ଡାମାନ ସାଗର ଓ ସଂଲଗ୍ନ ପୂର୍ବକେନ୍ଦ୍ରୀୟ ବଙ୍ଗୋପସାଗରରେ ଲଘୁଚାପ ସୃଷ୍ଟି ହୋଇ ବାତ୍ୟା ଆଶଙ୍କା କରୁଛନ୍ତି ପାଣିପାଗ ବିଜ୍ଞାନୀ । ତେବେ ଆଶ୍ୱସ୍ତିର କଥା ଦକ୍ଷିଣପଶ୍ଚିମ ବାୟୁ ଫେରୁଥିବାରୁ ଲଘୁଚାପ ସୃଷ୍ଟି ହେବା ବିଳମ୍ବ ହେଉଛି । ତେବେ ବାତ୍ୟା ଆସିବା ନେଇ ପାଣିପାଗ ବିଭାଗ ପକ୍ଷରୁ କୌଣସି ସ୍ପଷ୍ଟ ସୂଚନା ଦିଆ ଯାଇନାହିଁ ।

ମନୀଷଙ୍କ ଶେଷ ଫଟୋରୁ ମୃତ୍ୟୁର ସୁରାକ୍ ଖୋଜୁଛି ପୋଲିସ

ଭୁବନେଶ୍ୱର: ସାମନାକୁ ଆସିଲା ମନୀଷଙ୍କ ମୃତ୍ୟୁ ପୂର୍ବର ଶେଷ ଫଟୋ । ପାତ୍ରପଡ଼ା ସାଉଥ୍‌ ସିଟି ବାର ନିକଟ ରାସ୍ତା ଉପରେ ମନୀଷଙ୍କ ସିସିଟିଭି ଫଟୋ ଆସିଛି । ରାତି ୪ଟା ବେଳର ଏହି ଫଟୋ ହୋଇଥିବା ସନ୍ଦେହ କରାଯାଉଛି । ହୋଟେଲରୁ ବାହାରି ମନୀଷ ସାଙ୍ଗଙ୍କ କାର ନିକଟକୁ ଯାଉଥିବା ବେଳର ଏହି ଦୃଶ୍ୟ ସିସିଟିଭି କ୍ୟାମେରାରେ କଏଦ ହୋଇଛି ।

ହୋଟେଲ୍‌ରୁ ବାହାରିବା ପରେ ମନୀଷ କୁଆଡ଼େ ଯାଇଥିଲେ ? କେମିତି ହୋଇଥିଲା ମୃତ୍ୟୁ ? ପୋଖରୀ ପାଖକୁ କେମିତି ଗଲେ ମନୀଷ ? ମୃତ୍ୟୁ ପଛରେ ରହିଛି କି ସାଙ୍ଗଙ୍କ ଲିଙ୍କ୍ ? ଶେଷ ଫଟୋରୁ ମନୀଷ ମୃତ୍ୟୁର ସୁରାକ୍‌ ଖୋଜୁଛି ପୋଲିସ ।

 Last Photo Of Manish Das Captured In CCTV

ମନୀଷ ମାମଲାରେ ପୋଲିସ ଦୁଇ ସହଯୋଗୀଙ୍କୁ ଉଠାଇ ନେଇ ଜେରା କରିଛି । ସାଉଥ୍‌ ସିଟି ବାର ମ୍ୟାନେଜରଙ୍କୁ ମଧ୍ୟ ପୋଲିସ ପଚରାଉଚରା କରିଛି । ଭୋର ୪ଟା ପର୍ଯ୍ୟନ୍ତ କାହିଁକି ହୋଟେଲ ଖୋଲାଥିଲା, ସେନେଇ ତଦନ୍ତ ମଧ୍ୟ କରାଯାଉଛି ।

ମନୀଷଙ୍କ ସାଙ୍ଗ ଚଲାଉଥିବା ଏକ ଧଳା ରଙ୍ଗର କାର ପୋଲିସ ଜବତ କରିଛି । ପାତ୍ରପଡ଼ା ନିକଟରୁ କାରଟିକୁ ଜବତ କରାଯାଇଛି । ଗାଡ଼ିରେ ଥିବା ଖାତା, ଚିପ୍ସ ଜରି, ହାତ ଘଣ୍ଟା ଇତ୍ୟାଦିକୁ ତନ୍ନ ତନ୍ନ କରି ଯାଞ୍ଚ ଚଳାଇଛି ପୋଲିସ । ମନୀଷ ସାଙ୍ଗଙ୍କଠାରୁ କିଛି ଟଙ୍କା ଧାର ନେଇଥିଲେ । ମନୀଷଙ୍କ ମୃତ୍ୟୁ ପଛରେ ଏହା କାରଣ ହୋଇଥିବା ସନ୍ଦେହ କରାଯାଉଛି ।

Facebook, Insta ପରେ ଏବେ Gmail ଡାଉନ୍

ନୂଆଦିଲ୍ଲୀ: ନିକଟ ଅତୀତରେ ଫେସବୁକ୍, ଇନଷ୍ଟାଗ୍ରାମ ଓ ହ୍ୱାଟ୍ସଆପ୍ ର ସର୍ଭିସ ଡାଉନ୍ ହୋଇଥିଲା । ଆଉ ଏବେ ଜିମେଲ୍ ଡାଉନ୍ ହୋଇଥିବା ନେଇ ଖବର ମିଳିଛି । ଭାରତର ଅନେକ ଅଂଶରେ ଏଭଳି ସମସ୍ୟା ହୋଇଥିବା ବେଳେ ୟୁଜର୍ସଙ୍କ ନିକଟକୁ ମେଲ୍ ଆସୁନାହିଁ କି ପଠାଇ ପାରୁନାହାଁନ୍ତି ।

ଇଣ୍ଟରନେଟ୍ ସର୍ଭିସ୍ ଆଉଟେଜ୍ ଉପରେ ନଜର ରଖୁଥିବା  Down Detector ଅନୁଯାୟୀ, ୱେବସାଇଟ୍ ଆସେସରେ ଅସୁବିଧା ହେଉଥିବା ନେଇ ୬୮% ଲୋକ ଦାବି କରିଛନ୍ତି । ସେହିପରି ୧୮% ୟୁଜର୍ସ ସର୍ଭର କନେକ୍ସନ ନେଇ ରିପୋର୍ଟ କରିଥିବା ବେଳେ ୧୪% ଲଗ-ଇନରେ ସମସ୍ୟାର ସମ୍ମୁଖୀନ ହୋଇଥିବା ଅଭିଯୋଗ କରିଛନ୍ତି ।

ଯାହାକୁ ନେଇ ୟୁଜର୍ସ ମାନେ #gmaildown ହାସଟ୍ୟାଗ୍ ସହ ଟ୍ୱିଟ୍ କରିବାରେ ଲାଗିଛନ୍ତି । ଏଯାବତ୍ କମ୍ପାନୀ ପକ୍ଷରୁ ସର୍ଭିସ୍ ଡାଉନ୍ ନେଇ କୌଣସି କାରଣ ପ୍ରକାଶ କରାଯାଇନାହିଁ ।

ସୂଚନାଯୋଗ୍ୟ, ଅକ୍ଟୋବର ୪ ତାରିଖ ଦିନ ଫେସବୁକ ମାଲିକାନାରେ ଥିବା ଫେସ୍‌ବୁକ୍, ଇନଷ୍ଟା ଓ ହ୍ୱାଟ୍ସଆପ୍‌ ପ୍ରାୟ ୬ ଘଣ୍ଟା ପାଇଁ ଡାଉନ୍ ହୋଇପଡିଥିଲା। ସାରା ଦେଶରେ ଏହି ଲୋକପ୍ରିୟ ସୋସିଆଲ୍ ମିଡିଆଗୁଡ଼ିକ ବନ୍ଦ ହୋଇଯିବା ପରେ ଲୋକମାନେ ନାନା ହଇରାଣ ହରକତ ହେଉଥିବା ଦେଖିବାକୁ ମିଳିଥିଲା। ଯଦିଓ ଟ୍ୱିଟର ସ୍ୱାଭାବିକ ଭାବେ କାମ କରୁଥିଲା ତଥାପି ଏହି ୩ ସାମାଜିକ ଗଣମାଧ୍ୟମ କାମ କରୁନଥିବାରୁ ଏହାକୁ ନେଇ ଟ୍ୱିଟରରେ ଜୋରଦାର ଟ୍ରୋଲିଂ ହୋଇଥିଲା।

ଅଧା ଓଡ଼ିଶାରୁ ଅପସରିଲା ଦକ୍ଷିଣ ପଶ୍ଚିମ ମୌସୁମୀ ବାୟୁ, ୪୮ ଘଣ୍ଟାରେ ଲଘୁଚାପ ସମ୍ଭାବନା

ଭୁବନେଶ୍ୱର: ଓଡ଼ିଶାରୁ ଫେରୁଛି ଦକ୍ଷିଣ ପଶ୍ଚିମ ମୌସୁମୀ ବାୟୁ । ୧୨ ତାରିଖ ସୁଦ୍ଧା ଅର୍ଦ୍ଧାଧିକ ଓଡ଼ିଶାରୁ ମୌସୁମୀ ବାୟୁ ପ୍ରତ୍ୟାବର୍ତ୍ତନ କରିଛି । ଆଜି ସୁନ୍ଧା ସୁନ୍ଦରଗଡ଼, ଝାରସୁଗୁଡ଼ା, ଦେବଗଡ଼, ସମ୍ବଲପୁର, ବରଗଡ଼, ବଲାଙ୍ଗିର, ସୋନପୁର, ନୂଆପଡ଼ା, ବୌଦ୍ଧ, କଳାହାଣ୍ଡି, ନବରଙ୍ଗପୁର ଜିଲ୍ଲାରୁ ମୌସୁମୀ ବାୟୁ ସମ୍ପୂର୍ଣ୍ଣ ଫେରିଥିବା ବେଳେ ମାଲକାନଗିରି, କୋରାପୁଟ, ରାୟଗଡ଼ା, ଢେଙ୍କାନାଳ, କେନ୍ଦୁଝର ଓ ମୟୂରଭଞ୍ଜ ଜିଲ୍ଲାର କିଛି ଅଞ୍ଚଳରୁ ଫେରିଛି ।

Image

ଅନ୍ୟପଟେ ଉତ୍ତର ଆଣ୍ଡାମାନ ସାଗର ଓ ସଂଲଗ୍ନ ପୂର୍ବକେନ୍ଦ୍ରୀୟ ବଙ୍ଗୋପସାଗରରେ ୪୮ ଘଣ୍ଟା ଭିତରେ ଲଘୁଚାପ ସୃଷ୍ଟି ହେବାର ସମ୍ଭାବନା ରହିଛି । ଏହା ପଶ୍ଚିମଉତ୍ତର-ପଶ୍ଚିମ ଦିଗରେ ଗତି କରି ପରବର୍ତ୍ତୀ ୨୪ ଘଣ୍ଟାରେ ଦକ୍ଷିଣ ଓଡ଼ିଶା ଓ ଉତ୍ତର ଆନ୍ଧ୍ର ଉପକୂଳରେ ପହଞ୍ଚି ପାରେ ।

ଜଗତସିଂହପୁର, ଭଦ୍ରକ, କେନ୍ଦ୍ରାପଡ଼ା, ଗଞ୍ଜାମ, ଗଜପତି ଓ ବାଲେଶ୍ୱର ଜିଲ୍ଲାରେ ସାମାନ୍ୟ ବର୍ଷା ସହ ବଜ୍ରପାତର ଆଶଙ୍କା ରହିଛି । ସେହିଭଳି ଆଗାମୀ ୨୪ ଘଣ୍ଟା ମଧ୍ୟରେ ଉପକୂଳ ଓଡ଼ିଶାର କିଛି ସ୍ଥାନରେ ସ୍ୱଳ୍ପରୁ ମଧ୍ୟମଧରଣର ବର୍ଷା ସହ ବଜ୍ରପାତ ହେବାର ଆଶଙ୍କା ରହିଛି । ମତ୍ସ୍ୟଜୀବୀଙ୍କ ପାଇଁ କୌଣସି ସତର୍କ ସୂଚନା ନାହିଁ ।

୧୫ ତାରିଖରେ ବର୍ଷା ଓ ଘଡ଼ଘଡ଼ି ନେଇ ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡ଼ା, କଟକ, ଜଗତସିଂହପୁର, ପୁରୀ, ଖୋର୍ଦ୍ଧା, ନୟାଗଡ଼, ଗଞ୍ଜାମ, ଗଜପତି, କୋରାପୁଟ, ରାୟଗଡ଼ା, କନ୍ଧମାଳ, ବୌଦ୍ଧ, ଅନୁଗୁଳ, ଢେଙ୍କାନାଳ, ମୟୂରଭଞ୍ଜ ଓ କେନ୍ଦୁଝର ଜିଲ୍ଲାକୁ ୟେଲୋ ୱାର୍ଣ୍ଣିଂ ଦିଆଯାଇଛି । ସେହିଭଳି ୧୬ ତାରିଖରେ ପ୍ରବଳ ବର୍ଷା ନେଇ ଗଞ୍ଜାମ, ପୁରୀ, ଜଗତସିଂହପୁର ଓ କନ୍ଧମାଳକୁ ଦିଆଯାଇଛି ୟେଲୋ ୱାର୍ଣ୍ଣିଂ । ୧୮ଟି ଜିଲ୍ଲାରେ ବର୍ଷା ଓ ଘଡ଼ଘଡ଼ି ଆଶଙ୍କା ରହିଛି ।