spot_img
Home Blog Page 5778

କରୋନା ଟେଷ୍ଟ କରିବେ ଡଙ୍ଗରିଆ କନ୍ଧ, ନିୟମଗିରିରରୁ ଦୂରେଇବ ଭୂତାଣୁ

ରାୟଗଡ଼ା: କରୋନା ଟେଷ୍ଟ କରିବାକୁ ରାଜି ହେଲେ ନିୟମଗିରିର ଡଙ୍ଗରିଆ କନ୍ଧ । ଉପଜିଲ୍ଲାପାଳଙ୍କ ବୁଝାସୁଝା ପରେ କରୋନା ପରୀକ୍ଷା କରିବାକୁ ସେମାନେ ରାଜି ହୋଇଥିବା ଜଣାପଡିଛି । ଆସନ୍ତାକାଲି ମେଡିକାଲ୍ ଟିମ୍ ଯାଇ ଟେବାପତା ଓ କାଡ୍ରାକା ବଣ୍ଡେଲି ଗାଁର ଡଙ୍ଗରିଆ କନ୍ଧଙ୍କ କରୋନା ଟେଷ୍ଟ କରିବ । ରାୟଗଡ଼ା ଉପଜିଲ୍ଲାପାଳ ପ୍ରତାପ ଚନ୍ଦ ପ୍ରଧାନ ନିୟମଗିରିର ସୁନାଖଣ୍ଡି ଓ ପାର୍ସାଲି ପଞ୍ଚାୟତର ବିଭିନ୍ନ ଗାଁକୁ ଯାଇ ଡଙ୍ଗରିଆ କନ୍ଧଙ୍କ ସହିତ ଆଲୋଚନା କରିଛନ୍ତି ।

ତେବାପଡା,କାଡ୍ରାକାବଣ୍ଡେଲି ଓ ପାର୍ସାଲି ଗାଁରେ ଲୋକମାନଙ୍କ ସମସ୍ୟା ସମ୍ପର୍କରେ ସେ ଆଲୋଚନା କରିଛନ୍ତି । ସମସ୍ତ ଡଙ୍ଗରିଆ କନ୍ଧଙ୍କୁ ଉପଜିଲାପାଳ ମାସ୍କ ବାଣ୍ଟିବା ସହିତ ମାସିକ ଭତ୍ତା ମଧ୍ଯ ପ୍ରଦାନ କରିଛନ୍ତି । ପରେ ପାର୍ସାଲି ଠାରେ ଅଙ୍ଗନାବାଡି କର୍ମୀଙ୍କୁ ନେଇ ଏକ ବୈଠକରେ ସ୍ଥାନୀୟ ଅଞ୍ଚଳରେ କରୋନାର ମୁକାବିଲା ଉପରେ ଆଲୋଚନା କରିଥିଲେ । ଘରକୁଘର ବୁଲି କୋଭିଡ ଟେଷ୍ଚ ସହିତ ସ୍ବାସ୍ଥ୍ୟ ପରୀକ୍ଷା ଉପରେ ସେ ଗୁରୁତ୍ବ ଦେଇଛନ୍ତି ।

କମ୍ ଲୋକରେ ବିବାହ କାର୍ଯ୍ୟ କରିବା ସହିତ ଭୋଜିଭାତ ନକରିବାକୁ ଉପଜିଲ୍ଲାପାଳ ପରାମର୍ଶ ଦେଇଛନ୍ତି । ଅନ୍ୟପଟେ ପାର୍ସାଲି ସରପଞ୍ଚ ବାମକାଡ୍ରାକା କରୋନାରେ ଆକ୍ରାନ୍ତ ହୋଇ ସଂଗରୋଧରେ ଅଛନ୍ତି । ଅନ୍ଧ ବିଶ୍ବାସକୁ ଭରସା ନକରି କରୋନା ଟେଷ୍ଟ କରିବାକୁ ସେ ସମସ୍ତଙ୍କୁ ଅନୁରୋଧ କରିଛନ୍ତି ।

‘ଦେଶର ୫୦ ପ୍ରତିଶତ ଲୋକ ମାସ୍କ ପିନ୍ଧୁନାହାଁନ୍ତି’

ନୂଆଦିଲ୍ଲୀ: ଦେଶରେ କମୁଛି କରୋନା ସଂକ୍ରମଣ । କିନ୍ତୁ ବଢିଚାଲିଛି ସୁସ୍ଥ ହାର । ଦେଶରେ ୧୨ ଦଶମିକ ୧ ପ୍ରତିଶତ ଆକ୍ଟିଭ କେସ୍ ଥିବାବେଳେ ସୁସ୍ଥ ହାର ହେଉଛି ୮୬ ଦଶମିକ ୭ ପ୍ରତିଶତ । ଦେଶର ୮ ରାଜ୍ୟରେ ୧ ଲକ୍ଷରୁ ଅଧିକ ମାମଲା ରହିଛି । ଦେଶର ୫୦ ପ୍ରତିଶତ ଲୋକ ମାସ୍କ ପିନ୍ଧୁନଥିବା କହିଛି କେନ୍ଦ୍ର ସ୍ବାସ୍ଥ୍ୟ ମନ୍ତ୍ରାଳୟ ।

ସେପଟେ ୯ ରାଜ୍ୟରେ ୫୦ ହଜାରରୁ ୧ ଲକ୍ଷ ମାମଲା ଥିବାବେଳେ ୧୯ ରାଜ୍ୟରେ ୫୦ ହଜାରରୁ କମ ମାମଲା ରହିଛି । ମହାରାଷ୍ଟ୍ର, ରାଜସ୍ଥାନ, ୟୁପି, ହରିୟାଣା, ଗୁଜରାଟ, ଛତିଶଗଡ, ବିହାର, ଦିଲ୍ଲୀ ଓ ଝାଡ଼ଖଣ୍ଡରେ କମ ରହିଛି ସଂକ୍ରମଣ । ତେବେ ତାମିଲନାଡୁ, ମେଘାଳୟ, ତ୍ରିପୁରା ଓ ମଣିପୁରରେ କରୋନା ଗ୍ରାଫ ବଢିବାରେ ଲାଗିଛି । ନୂଆ ଗାଇଡଲାଇନ୍ ଅନୁସାରେ କରୋନାରେ ସୁସ୍ଥ ହେବାର ତିନି ମାସ ପରେ ଟିକା ନେବାକୁ ହେବ ବୋଲି କେନ୍ଦ୍ର ସ୍ବାସ୍ଥ୍ୟ ମନ୍ତ୍ରାଳୟର ଯୁଗ୍ମସଚିବ ଲବ ଅଗ୍ରଓ୍ବାଲ କହିଛନ୍ତି ।

କରୋନା ଚେନ୍ ଭାଙ୍ଗିବାକୁ ହେଲେ ଟେଷ୍ଟିଂ ଜୋରଦାର କରିବା ସହ ଆଇସୋଲେସନ୍ ଓ ଚିକିତ୍ସା ପ୍ରତି ଧ୍ୟାନ ଦେବାର ଆବଶ୍ୟକ ବୋଲି ICMR DG ବଳରାମ ଭାର୍ଗବ କହିଛନ୍ତି । ଦେଶରେ ଦୈନିକ ୪୫ ଲକ୍ଷ ଟେଷ୍ଟିଂ କରିବା ପାଇଁ ଲକ୍ଷ୍ୟ ରଖାଯାଇଛି । DRDOର 2_ DG ମେଡିସିନ୍ ପୂର୍ବରୁ କର୍କଟ ରୋଗୀଙ୍କ କ୍ଷେତ୍ରରେ ଉପଯୋଗୀ କରାଯାଉଥିଲା । ଏବେ କରୋନା ରୋଗୀଙ୍କ କ୍ଷେତ୍ରରେ ଏହାକୁ ବିନିଯୋଗ କରାଯିବ ।

‘କୋଭିଡକୁ ନେଇ ବୈଠକ ଡାକିଥିଲେ, କିନ୍ତୁ ନିଜେ କହିଲେ’

ନୂଆଦିଲ୍ଲୀ: କୋଭିଡକୁ ନେଇ ବୈଠକ ଡାକିଥିଲେ। କିନ୍ତୁ ନିଜେ କହିଲେ । ମୁଖ୍ୟମନ୍ତ୍ରୀଙ୍କ ମତ ନେଲେନି କିମ୍ବା କହିବାର ସୁଯୋଗ ଦେଲେନି । ପ୍ରଧାନମନ୍ତ୍ରୀଙ୍କ ବିରୋଧରେ ଏପରି ଅଭିଯୋଗ ଆଣିଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ । କରୋନାକୁ ନେଇ ହେଉଥିବା ବୈଠକରେ କିଛି କହିବାକୁ ସୁଯୋଗ ଦେଉ ନାହାଁନ୍ତି ପ୍ରଧାନମନ୍ତ୍ରୀ, ନା କିଛି ଶୁଣୁଛନ୍ତି । ଦେଶରେ ଲାଗି ରହିଥିବା କରୋନା ସ୍ଥିତିକୁ ନେଇ ୧୦ ରାଜ୍ୟର ମୁଖ୍ୟମନ୍ତ୍ରୀ ଓ ୫୪ ଜିଲ୍ଲାର ଜିଲ୍ଲାପାଳଙ୍କ ସହ ଆଜି ଆଲୋଚନା କରିଛନ୍ତି ମୋଦି । ତେବେ ଏହି ବୈଠକରେ କିଛି କି କହିବାକୁ ସୁଯୋଗ ମିଳିନଥିବା ଆରୋପ ଲଗାଇଛନ୍ତି ମମତା ବାନାର୍ଜୀ ।

ପ୍ରଧାନମନ୍ତ୍ରୀଙ୍କ ସହ ହୋଇଥିବା ଆଜିର ବୈଠକ ଫ୍ଲପ୍ ଓ ଅପମାନଜନକ ବୋଲି କହିଛନ୍ତି ମମତା । ଯଦି ଦେଶରେ କରୋନା ସଂକ୍ରମଣ ସଂଖ୍ୟା କମୁଛି, ତେବେ ମୃତକଙ୍କ ସଂଖ୍ୟା କିଭଳି ବଢୁଛି ବୋଲି ପ୍ରଶ୍ନ କରିଛନ୍ତି ଦିଦି । ସେପଟେ ଏହାର ଜବାବରେ କେନ୍ଦ୍ର ଆଇନ୍ ମନ୍ତ୍ରୀ ରବିଶଙ୍କର ପ୍ରସାଦ କହିଛନ୍ତି ଜଣେ ମୁଖ୍ୟମନ୍ତ୍ରୀଙ୍କ ଏଭଳି ଆଚରଣ ଆଦୌ ବି ଗ୍ରହଣୀୟ ନୁହେଁ । ଦେଶରେ କରୋନାର ଦ୍ବିତୀୟ ଲହର ଅେକ କ୍ଷତି ପହଞ୍ଚାଉଥିବାବେଳେ ତୃଣମୂଳସ୍ତରରେ ଏହାର ମୁକାବିଲା ପାଇଁ ଜିଲ୍ଲାପାଳଙ୍କୁ ପରାମର୍ଶ ଦେଇଛନ୍ତି ପ୍ରଧାନମନ୍ତ୍ରୀ ।

ବିଦେଶରୁ ଆସିବ ଟିକା: ଗ୍ଲୋବାଲ୍ ଟେଣ୍ଡର ପାଇଁ ସରିଛି ପ୍ରି-ବିଡିଂ

ଭୁବନେଶ୍ୱର: ଗ୍ଲୋବାଲ୍ ଟେଣ୍ଡର ଜରିଆରେ ରାଜ୍ୟ ସରକାରଙ୍କ କରୋନା ଟିକା କିଣିବା ପ୍ରକ୍ରିୟା ପାଦେ ଆଗେଇଛି । ଗତକାଲି ପ୍ରି-ବିଡିଂ ସରିଛି । ବିଭିନ୍ନ କମ୍ପାନୀ ଟେଣ୍ଡର ପ୍ରକ୍ରିୟା ନେଇ ମତାମତ ରଖିଛନ୍ତି । କମ୍ପାନୀଗୁଡ଼ିକୁ ଆସନ୍ତାକାଲି ରାଜ୍ୟ ସରକାର ଉତ୍ତର ଦେବେ । ସ୍ବାସ୍ଥ୍ୟ ନିର୍ଦ୍ଦେଶକ ବିଜୟ ମହାପାତ୍ର ଏହି ସୂଚନା ଦେଇଛନ୍ତି ।

ଗ୍ଲୋବାଲ୍ ଟେଣ୍ଡର ମାଧ୍ୟମରେ ୩କୋଟି ୮୦ ଲକ୍ଷ ଟିକା ବିଭିନ୍ନ ଟିକା ଉତ୍ପାଦନକାରୀ କମ୍ପାନୀଠାରୁ ସରକାର କିଣିବେ । ଏନେଇ ୨୦ରୁ ୨୮ ତାରିଖ ପର୍ଯ୍ୟନ୍ତ ଅନ୍‌ଲାଇନ୍‌ ଟେଣ୍ଡର ପ୍ରକ୍ରିୟା ଖୋଲାରହିଛି । ଓଡ଼ିଶା ଔଷଧ ନିଗମ ପକ୍ଷରୁ କରାଯାଇଥିବା ଏହି ଅନ୍‌ଲାଇନ୍‌ ଟେଣ୍ଡର ପ୍ରକ୍ରିୟାରେ ଡିସିଜିଆଇ ଦ୍ବାରା ଅନୁମତିପ୍ରାପ୍ତ ବିଭିନ୍ନ ଟିକା ଉତ୍ପାଦନକାରୀ କମ୍ପାନୀ ଭାଗ ନେଇପାରିବେ । ୨୮ ତାରିଖ ଦିନ କେତେ କମ୍ପାନୀ ଭାଗ ନେଉଛନ୍ତି, ସେନେଇ ଜଣାପଡ଼ିବ ବୋଲି ସ୍ବାସ୍ଥ୍ୟ ନିର୍ଦ୍ଦେଶକ ବିଜୟ ମହାପାତ୍ର କହିଛନ୍ତି ।

ରାଜ୍ୟରେ ଟିକା ଅଭାବ ଦୂର କରି ସମସ୍ତଙ୍କୁ ମାଗଣାରେ ଟିକା ଯୋଗାଇ ଦେବା ପାଇଁ ରାଜ୍ୟ ସରକାରଙ୍କ ପକ୍ଷରୁ ଗ୍ଲୋବାଲ ଟେଣ୍ଡର ବ୍ୟବସ୍ଥା କରାଯାଇଥିବା ସ୍ବାସ୍ଥ୍ୟ ନିର୍ଦ୍ଦେଶକ ବିଜୟ ମହାପାତ୍ର ସୂଚନା ଦେଇଛନ୍ତି ।

ବ୍ଲାକ ଫଙ୍ଗସକୁ ନୋଟିଫାଏବୁଲ ଡିଜିଜ ଘୋଷଣା, ରାଜ୍ୟରେ ଏଯାଏଁ ୧୧ ରୋଗୀ

ଭୁବନେଶ୍ୱର: ଭାଇରସର ଭୟ ଭିତରେ ବ୍ଲାକ ଫଙ୍ଗସର ହାହାକାର । ବ୍ଲାକ ଫଙ୍ଗସକୁ  ନୋଟିଫାଏବୁଲ ଡିଜିଜ ଘୋଷଣା କଲେ ରାଜ୍ୟ ସରକାର । ରୋଗର ଭୟାବହତାକୁ ଦୃ୍ଷ୍ଟିରେ ରଖି ରାଜ୍ୟ ସରକାର ଏହି ଘୋଷଣା କରିଛନ୍ତି । ରାଜ୍ୟରେ ବ୍ଲାକ ଫଙ୍ଗସ୍ ନେଇ ରାଜ୍ୟ ସରକାରଙ୍କୁ ୬ଟି ସୁପାରିସ କରିଛି ଉଚ୍ଚସ୍ତରୀୟ କମିଟି । ସୁପାରିସ ଗୁଡିକ ହେଉଛି ଆବଶ୍ୟକ ଔଷଧ ଯୋଗାଇଦେବା । ନୋଟିଫାଏ ରୋଗ ଭାବେ ଘୋଷଣା କରିବା । ଜିଲ୍ଲାସ୍ତରରେ ରୋଗ ଜଣାଇବାକୁ ବାଧ୍ୟ କରାଯିବା ।

ପରୀକ୍ଷା, ନିରୀକ୍ଷା ଓ ଚିକିତ୍ସା ପାଇଁ ପ୍ରୋଟୋକଲ କାଯିବା । ଖବର ସଂଗ୍ରହ ଉପରେ ବ୍ୟବସ୍ଥା କରିବା । ଲୋକଙ୍କୁ ପୋଷ୍ଟର, ବ୍ୟାନର ମାଧ୍ୟମରେ ସଚେତନ କରାଇବାକୁ ସୁପାରିସ କରିଛନ୍ତି ଉଚ୍ଚସ୍ତରୀୟ କମିଟି । ରାଜ୍ୟରେ ଏଯାଏଁ ୧୧ ବ୍ଲାକ ଫଙ୍ଗସ୍ ରୋଗୀ ଚିହ୍ନଟ ହୋଇଛନ୍ତି । ସମସ୍ତ ରୋଗୀ ଭୁବନେଶ୍ୱରରେ ଚିକିତ୍ସିତ ହେଉଛନ୍ତି ।

ବ୍ଲାକ ଫଙ୍ଗସ ପରେ ଚିନ୍ତାର କାରଣ ପାଲଟିଲାଣି ହ୍ବାଇଟ ଫଙ୍ଗସ । ବିହାର ପାଟନାରେ ହ୍ବାଇଟ ଫଙ୍ଗସ ରୋଗୀ ଚିହ୍ନଟ ହୋଇଛନ୍ତି । ହ୍ବାଇଟ ଫଙ୍ଗସ ଅତି ସାଂଘାତିକ ବୋଲି ବିଶେଷଜ୍ଞ କହିଛନ୍ତି । ଏଥିରେ ଫୁସ୍‌ଫୁସ୍‌, ମୁହଁ, କିଡନୀ, ପେଟରେ ସମସ୍ୟା ସୃଷ୍ଟି ହୁଏ ।  ରୋଗର ଭୟାବହତାକୁ ଦୃ୍ଷ୍ଟିରେ ରଖି ରାଜ୍ୟ ସରକାର ଏହି ଘୋଷଣା କରିଛନ୍ତି । ରାଜ୍ୟରେ ଏଯାଏଁ ୧୧ଜଣ ବ୍ଲାକ୍‌ ଫଙ୍ଗସ୍ ରୋଗୀ ଚିହ୍ନଟ ହୋଇଛନ୍ତି । ସମସ୍ତ ରୋଗୀ ଭୁବନେଶ୍ବରରେ ଚିକିତ୍ସାଧୀନ ଅଛନ୍ତି । ସେପଟେ ଗୁଜରାଟରେ ମଧ୍ୟ ବ୍ଲାକ ଫଙ୍ଗସକୁ ନୋଟିଫାଏବୁଲ ଡିଜିଜ ଘୋଷଣା କରାଯାଇଛି । ଆଜି ଏନେଇ କେନ୍ଦ୍ର ସରକାର ବିଭିନ୍ନ ରାଜ୍ୟକୁ ପରାମର୍ଶ ଦେଇଥିଲେ ।

ବ୍ଲାକ ଫଙ୍ଗସକୁ ଚାହିଁଲେ ରାଜ୍ୟ ସରକାର ନୋଟିଫାଏବୁଲ ଡିଜିଜ ଘୋଷଣା କରିପାରିବେ । ବ୍ଲାକ୍‌ ଫଙ୍ଗସ୍‌ରୁ ଭଲ ହୋଇଥିବା ଲୋକ ଓ ସଂକ୍ରମିତ ବ୍ୟକ୍ତିଙ୍କ ତାଲିକା ଦେବାକୁ କୁହାଯାଇଛି । ଦେଶର ଅନେକ ରାଜ୍ୟରେ ଏବେ ବ୍ଲାକ୍‌ ଫଙ୍ଗସ୍‌ ମାମଲା ବଢୁଥିବା ବେଳେ କରୋନା ସଂକ୍ରମିତଙ୍କ ଦେହରେ ଏହା ଗୁରୁତର ହେଉଛି । ରାଜସ୍ଥାନ ଓ ତେଲେଙ୍ଗାନା ପୂର୍ବରୁ ବ୍ଲାକ୍‌ ଫଙ୍ଗସ୍‌କୁ ନୋଟିଫାଏବୁଲ ଡିଜିଜ କରିସାରିଛନ୍ତି ।

୨୪ରେ ବାତ୍ୟାର ରୂପ ନେବ ‘ୟଶ’, ପ୍ରସ୍ତୁତି କାର୍ଯ୍ୟ ଆରମ୍ଭ ହୋଇଛି

ଭୁବନେଶ୍ୱର: ଉତ୍ତର ଆଣ୍ଡାମାନରେ ଆସନ୍ତା ୨୨ ତାରିଖରେ ଲଘୁଚାପ ସୃଷ୍ଟି ହେବାର ସମ୍ଭାବନା ଅଛି । ଆସନ୍ତା ୨୪ ତାରିଖ ବେଳକୁ ବାତ୍ୟାର ରୂପ ନେବାର ସମ୍ଭାବନା ଅଛି । ଏହି ବାତ୍ୟା ଉତ୍ତର ଓଡିଶା ଉପକୂଳ କିମ୍ବା ବାଂଲାଦେଶରେ ସ୍ଥଳଭାଗକୁ ଛୁଇଁପାରେ । ଏନେଇ ପ୍ରାକ୍ ପ୍ରସ୍ତୁତି କାର୍ଯ୍ୟ ଆରମ୍ଭ କରାଯାଇଥିବା କହିଛନ୍ତି ଏସଆରସି ପ୍ରଦୀପ ଜେନା ।

ସେପଟେ ବିକଳ୍ପ ପାନୀୟ ଓ ବିଦ୍ୟୁତ ଯୋଗାଣ ନେଇ କାର୍ଯ୍ୟକ୍ରମ ଆରମ୍ଭ ହୋଇଛି । ମାଛଧରା ବନ୍ଦରରେ ଲୋକଙ୍କୁ ସମୁଦ୍ର ଭିତରକୁ ନଯିବାକୁ ସଚେତନା କରାଯାଉଛି । ଜେଟିରେ ଡଙ୍ଗାଗୁଡିକୁ ସୁରକ୍ଷିତ ରଖିବାକୁ ପରାମର୍ଶ ଦିଆଯାଇଛି । ବିଭିନ୍ନ ବିଭାଗ ପକ୍ଷରୁ ମଧ୍ୟ ସତର୍କତାମୂଳକ କାର୍ଯ୍ୟ ଆରମ୍ଭ ହୋଇଛି । ବାତ୍ୟାର ସ୍ପଷ୍ଟ ସୂଚନା ମିଳିଲେ ଓଡ୍ରାଫ ଓ ଏନଡିଆରଫ ଟିମକୁ ମୁଭ କରାଯିବ ।

ଟେଲିକମ ସେବା ନେଇ ସବୁ ଟେଲିକମ କମ୍ପାନୀ ସହ ଆଲୋଚନା କରାଯାଇଛି । ତେବେ ଅଜଥା ଭୟ କରି ହାଟବଜାରରେ ଭିଡ କରନ୍ତୁ ନାହିଁ କିମ୍ବା ହୋଡିଂ ନକରିବାକୁ ଏସଆରସିଙ୍କ ଅପିଲ । କଳାବଜାରୀଙ୍କ ଉପରେ ସତର୍କ ଦୃଷ୍ଟି ରଖିବାକୁ ଜିଲ୍ଲା ପ୍ରଶାସନକୁ ନିର୍ଦ୍ଦେଶ ।

ଲକଡାଉନ୍ ସମୟରେ ଚଳଞ୍ଚଚଳ ସଙ୍ଗୀତକାର ଅଭିଜିତ୍ ମଜୁମ୍‌ଦାର

ଭୁବନେଶ୍ୱର: ବିଗତ ବର୍ଷେ ହେଲା ଓଲିଉଡ ଜଗତ ଅତି ସଙ୍ଗୀତ ପରିସ୍ଥିତି ଦେଇ ଗତି କରୁଛି । ତଥାପି ସଙ୍ଗୀତର ସାଥ୍ ଛାଡିିନାହାଁନ୍ତି ସଙ୍ଗୀତକାର ଅଭିଜିତ ମଜୁମଦାର । ସେ ଛୋଟ ହେଉ କି ବଡ ବଜେଟ୍ ଫିଲ୍ମ । ଅଭିଜିତଙ୍କ ପାଖରେ ଫିଲ୍ମର ସଂଖ୍ୟା ସବୁଠୁ ଅଧିକ । ଲକି ର ଲକଡାଉନ୍ ଲଭଷ୍ଟୋରୀ, ଅରୁନ୍ଧତୀ, ଦିଲରେ ଅଛି ତୋର ନାଁ, ଲାଗେ ମୋତେ କେମିତି କେମିତି, ଜଗୁ ଟ୍ୟାକ୍ସି ଡ୍ରାଇଭର, ଇଏ ବି ଗୋଟିଏ ଲଭଷ୍ଟୋରୀ, ଚୁମ୍‌କି ମାଇଁ ଡାର୍ଲିଂ, ଇନ୍ଦ୍ରଜାଲ, ଏଇ ବୋଧେ ଭଲପାଇବା, ଅଟୋଗ୍ରାଫ, ଧୋ ରେ ବାଇୟା ଧୋ, ଚୁଲ୍‌ବୁଲ୍ ପାଣ୍ଡେ, ପ୍ରେମୀ ଆୱାରା, ମୋ କାହାଣୀରେ ତୋରି ନାଁ ଓ ଚକ୍ଷୁବନ୍ଧନ ଭଳି ଅନେକ ଫିଲ୍ମ ଅଭିଜିତଙ୍କ ତାଲିକାରେ ରହିଛି ।

ସେ ୟୁଟ୍ୟୁବ ପ୍ଲାଟଫର୍ମରେ ମଧ୍ୟ ସମସ୍ତଙ୍କୁ ପଛରେ ପକାଇଦେଇଛନ୍ତି । ବର୍ଷେ ଭିତରେ ସେ କେ ୧ ପ୍ରଡକ୍ସନ୍‌, ବସନ୍ତ ସ୍ନେହା ପ୍ରଡକ୍ସନ୍‌, ତରଙ୍ଗ ମ୍ୟୁଜିକ, ତାରା ମ୍ୟୁଜିକ, ଦୀପ ମ୍ୟୁଜିକ ଓ ଅନ୍ୟାନ୍ୟ ପାଖାପାଖି ୫୦ଟି ୟୁଟ୍ୟୁବ୍ ଚ୍ୟାନେଲ ପାଇଁ ସେ ଗୀତ କରିଛନ୍ତି । ସ୍ୱର କରିବା ସହ ଗାଇବାକୁ ବାଦ୍ ଦେଲେ ସେ ବିଭିନ୍ନ କାର୍ଯ୍ୟକ୍ରମର ସୁଟିଂ ପାଇଁ ବ୍ୟସ୍ତ ରହିଥାନ୍ତି । ତରଙ୍ଗ ଲକଡାଉନ୍ ଅନ୍ତାକ୍ଷରୀ, ତରଙ୍ଗ ମହାସଙ୍ଗମ, ବିଭିନ୍ନ ୟୁଟ୍ୟୁବ, ଫେସବୁକ ଓ ଇନଷ୍ଟାଗ୍ରାମ୍ ଚ୍ୟାନେଲଗୁଡିକରେ ଲାଇଭ ଆସିବା ଏବଂ ୟୁଏସ୍ ଓ ୟୁକେ ପାଇଁ ଦୁଇତିନିଟା ଅନଲାଇନ୍ ସୋ’ କରିବା ତାଙ୍କ ବ୍ୟସ୍ତତାର ପ୍ରମାଣ ଦିଏ ।

ସଙ୍ଗୀତ ଭିତରେ ଥାଇ ମଧ୍ୟ ସେ କବେ ବି ସମାଜସେବାରୁ ନିବୃତ୍ତ ହୋଇନାହାଁନ୍ତି । OMAWA ର ସଭାପତି ପଦରେ ଥାଇ ଅଭିଜିତ୍ କଳାକାରଙ୍କ ଦୁଃଖ ସରକାରଙ୍କୁ ଜଣାଇବାକୁ ଚେଷ୍ଟା କରିଛନ୍ତି । ଅସୁବିଧାରେ ଥିବା କଳାକାରଙ୍କୁ ସାହାଯ୍ୟ କରିବା , ଓଡିଶାରେ ଥିବା ସବୁ କଳାକାରଙ୍କ ଭିତରେ ଭାଇଚାରା ବଢାଇବା ପାଇଁ କ୍ରିକେଟ ମ୍ୟାଚ୍ ଅନୁଷ୍ଠିତ କରାଇବା, ବରିଷ୍ଠ କଳାକାରଙ୍କୁ ସମ୍ମାନିତ କରିବା, ନିଜ ସାଙ୍ଗସାଥୀଙ୍କ ମେଳରେ ମିଶି ରକ୍ତ ଶିବିର ଅନୁଷ୍ଠିତ କରିବା, ଛୋଟବଡ ଅନେକ ସମାଜିକ ଅନୁଷ୍ଠାନମାନଙ୍କ ପାଇଁ ଆଗକୁ ଆସିବା ତାଙ୍କ ଉଦରତାକୁ ଦର୍ଶାଇଥାଏ ।

ନିଜର ବ୍ୟସ୍ତବହୁଳ ଜୀବନ ଭିତରେ ସେ ସବୁବେଳେ ବିନ୍ଦାସ ରହିଥାନ୍ତି । ସମସ୍ତଙ୍କୁ ଧୌର୍ଯ୍ୟ ଧରିବା ପାଇଁ ବାରମ୍ବାର ଅନୁରୋଧ କରିବା ସହିତ ଭାତଟେ ହେବ, ଡାଲିଟେ ହେବ କିମ୍ବା ମୁଁ ପ୍ରଥମ ଶ୍ରେଣୀରେ ପଢୁଛି ଗୀତ ଗାଇ ଲୋକମାନଙ୍କର ମନୋରଂଜନ କରିଚାଲିଛନ୍ତି ।

ପ୍ରଭୁ ଚାୱଲାଙ୍କ ସର୍ଭେରେ ନବୀନଙ୍କୁ ସର୍ବାଧିକ ଭୋଟ, କୋଭିଡ ମୁକାବିଲାରେ ଆଗରେ ଓଡିଶା

ଭୁବନେଶ୍ବର: କୋଭିଡ ମୁକାବିଲାରେ ପୁଣି ନବୀନ ସରକାରଙ୍କୁ ପ୍ରଶଂସା । ବରିଷ୍ଠ ସାମ୍ବାଦିକ ପ୍ରଭୁ ଚାଓ୍ବଲାଙ୍କ ପକ୍ଷରୁ ହୋଇଥିବା ଅନଲାଇନ୍ ସର୍ଭେରେ ସର୍ବାଧିକ ଭୋଟ ପାଇ ଆଗରେ ରହିଛନ୍ତି ନବୀନ ପଟ୍ଟନାୟକ । ସର୍ଭେରେ ନବୀନ ପାଇଛନ୍ତି 57 ପ୍ରତିଶତ ଭୋଟ । ପଞ୍ଜାବ ମୁଖ୍ୟମନ୍ତ୍ରୀ ଅମରିନ୍ଦର ସିଂ 26 ପ୍ରତିଶତ ଭୋଟ ପାଇ ଦ୍ବିତୀୟରେ ଥିବାବେଳେ ମଧ୍ୟ ପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ଚୌହାନ 14 ପ୍ରତିଶତ ଭୋଟ ଓ କର୍ଣ୍ଣାଟକ ମୁଖ୍ୟମନ୍ତ୍ରୀ ବି.ଏସ ୟେଦିୟୁରପ୍ପା ପାଇଛନ୍ତି ମାତ୍ର 3.2 ପ୍ରତିଶତ ଭୋଟ ।

ସେହିଭଳି ଅଧିକ ପ୍ରଭାବିତ ହୋଇଥିବା ରାଜ୍ୟକୁ ନେଇ ହୋଇଥିବା ସର୍ଭେରେ ୫୬ ପ୍ରତିଶତ ଭୋଟ ପାଇ ଆଗରେ ରହିଛନ୍ତି ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ । ତାଙ୍କ ପଛରେ ରହିଛନ୍ତି ଉଦ୍ଧବ ଠାକରେ, ତାଙ୍କୁ ମିଳିଛି ୩୦ ପ୍ରତିଶତ ଭୋଟ । ଏହା ପରେ କେରଳ ମୁଖ୍ୟମନ୍ତ୍ରୀ ପିନାରାଇ ବିଜୟନ ୮ ପ୍ରତିଶତ ପାଇଥିବାବେଳେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ୬ ପ୍ରତିଶତ ଭୋଟ ପାଇଛନ୍ତି ।

ଓଡ଼ିଶା ସାହିତ୍ୟ ଏକାଡେମୀ ସଭାପତି ହେଲେ ହୃଷୀକେଶ ମଲ୍ଲିକ

ଭୁବନେଶ୍ୱର: ହୃଷୀକେଶ ମଲ୍ଲିକ ହେଲେ ଓଡ଼ିଶା ସାହିତ୍ୟ ଏକାଡେମୀ ସଭାପତି । ପୂର୍ବରୁ ଡକ୍ଟର ହରିହର ମିଶ୍ର ଥିଲେ ଏକାଡେମୀର ସଭାପତି । ସେହିପରି ଉପସଭାପତି ହେଲେ ସଂଗ୍ରାମ ଜେନା । ସମ୍ପାଦକ ହେଲେ ଓଡ଼ିଶା ପ୍ରଶାସନିକ ସେବାର ଅଧିକାରୀ ପ୍ରବୋଧ କୁମାର ରାଉତ । ସେହିପରି ଓଡ଼ିଶା ସଙ୍ଗୀତ ନାଟକ ଏକାଡେମୀର ନୂଆ କର୍ମକର୍ତ୍ତା ଚୟନ ହୋଇଛି ।  ଅରୁଣା ମହାନ୍ତି ଓଡ଼ିଶା ସଙ୍ଗୀତ ନାଟକ ଏକାଡେମୀର ନୂଆ ସଭାପତି ମନୋନୀତ ହୋଇଛନ୍ତି ।

ନାଟ୍ୟକାର ମନ୍ମଥ କୁମାର ଶତପଥୀ ହୋଇଛନ୍ତି ଓଡ଼ିଶା ସଙ୍ଗୀତ ନାଟକ ଏକାଡେମୀର ଉପସଭାପତି । ସେହିପରି ଲଳିତ କଳା ଏକାଡେମୀ ପାଇଁ କର୍ମକର୍ତ୍ତା ଚୟନ କରାଯାଇଛି । ଲଲିତ କଳା ଏକାଡେମୀର ଉପସଭାପତି ହୋଇଛନ୍ତି ଶ୍ରୀନିବାସ ପଢ଼ିହାରୀ ଓ ସମ୍ପାଦକ ପଞ୍ଚାନନ ସାମଲ ହୋଇଛନ୍ତି । ଓଡ଼ିଶା ଉର୍ଦ୍ଦୁ ଏକାଡେମୀର ସମ୍ପାଦକ ହୋଇଛନ୍ତି ଡକ୍ଟର ସୟଦ ମୁସିର ଆଲମ । ମୁଖ୍ୟମନ୍ତ୍ରୀ ଏହି ଚୟନକୁ ଅନୁମୋଦନ ପ୍ରଦାନ କରିଛନ୍ତି ।

ମହାରାଷ୍ଟ୍ର ଯାତ୍ରା କଲେ ସାଥିରେ ନିଅନ୍ତୁ ନେଗେଟିଭ ରିପୋର୍ଟ

ମୁମ୍ବାଇ: ମହାରାଷ୍ଟ୍ର ଯାତ୍ରା କରୁଥିବା ଟ୍ରେନ ଯାତ୍ରୀଙ୍କ ପାଇଁ ନେଗେଟିଭ ଆରଟିପିସିଆର ରିପୋର୍ଟ ବାଧ୍ୟତାମୂଳକ ହୋଇଛି  । ଟ୍ରେନରେ ଯାତ୍ରା କରୁଥିବା (ବୋର୍ଡିଂ, ଭ୍ରମଣ ଏବଂ ଗନ୍ତବ୍ୟ ସ୍ଥଳରେ) ଯାତ୍ରୀମାନଙ୍କୁ କୋଭିଡ ଉପଯୁକ୍ତ ଆଚରଣ ଅନୁସରଣ କରିବାକୁ ପରାମର୍ଶ ଦିଆଯାଉଅଛି । ଯେକୌଣସି ପରିବହନ ଦ୍ୱାରା ମହାରାଷ୍ଟ୍ର ରାଜ୍ୟକୁ ପ୍ରବେଶ କରୁଥିବା ବ୍ୟକ୍ତିଙ୍କୁ ଏକ ନେଗେଟିଭ ଆରଟିପିସିଆର (RT-PCR) ପରୀକ୍ଷା ରିପୋର୍ଟ ବହନ କରିବାକୁ ପଡିବ ଯାହା ମହାରାଷ୍ଟ୍ରରେ ପ୍ରବେଶ କରିବାର ସର୍ବାଧିକ 48 ଘଣ୍ଟା ମଧ୍ୟରେ ପରୀକ୍ଷା ହୋଇଥିବା ଆବଶ୍ୟକ ବୋଲି ଉକ୍ତ ରାଜ୍ୟ ସରକାର ଘୋଷଣା କରିଛନ୍ତି ।

ସମ୍ବେଦନଶୀଳ ଅଞ୍ଚଳରୁ ଅର୍ଥାତ କେରଳ, ଗୋଆ, ରାଜସ୍ଥାନ, ଗୁଜୁରାଟ, ଦିଲ୍ଲୀ ଏବଂ ଏନସିଆର ଅଞ୍ଚଳ, ଉତ୍ତରପ୍ରଦେଶ, ପଶ୍ଚିମବଙ୍ଗ ଏବଂ ଉତ୍ତରପ୍ରଦେଶରୁ ଆସୁଥିବା ବ୍ୟକ୍ତିଙ୍କ ସହିତ ଭାରତର ଯେକୌଣସି ଅଞ୍ଚଳରୁ ମହାରାଷ୍ଟ୍ର ଆସୁଥିବା ଯାତ୍ରୀ ମାନଙ୍କ ପାଇଁ ଏପ୍ରିଲ ମାସ ୧୮ ତାରିଖ ଓ ମଇ ମାସ ପହିଲା ଆଦେଶନାମା ଅନୁଯାୟୀ ସମସ୍ତ ପ୍ରତିବନ୍ଧକ ପ୍ରଯୁଜ୍ୟ ହେବ । ରାଜ୍ୟ ଗୁଡିକର ସର୍ବଶେଷ ସୂଚନା ନିମନ୍ତେ ୱେବସାଇଟ୍ http://contents.irctc.co.in/en/stateWiseAdvisory.html ରେ ଉପଲବ୍ଧ ହୋଇଛି ।

ସେହିପରି ଦୂରଗାମୀ ଟ୍ରେନରେ ଯାତ୍ରା କରୁଥିବା ଯାତ୍ରୀମାନଙ୍କୁ ପରାମର୍ଶ ଦିଆଯାଉଅଛି ଯେ ସେମାନେ ଯାତ୍ରା କରିବା ପୂର୍ବରୁ କୋଭିଡ ୧୯ ଯାତ୍ରା ଆଦେଶନାମା ଏବଂ ଉପଯୁକ୍ତ ଆଚରଣ ଅନୁସରଣ କରିବା ସହିତ ଅନ୍ୟମାନଙ୍କ ସୁରକ୍ଷା ପ୍ରତି ଧ୍ୟାନଦେବାକୁ ଅନୁରୋଧ କରାଯାଇଛି |