spot_img
Home Blog Page 5825

ମ୍ୟୁକୋରମାଇକୋସିସ ବା ବ୍ଲାକ୍‌ ଫଙ୍ଗସ୍‌ କ’ଣ? କରୋନା ସଂକ୍ରମିତଙ୍କୁ କାହିଁକି…

  ନୂଆଦିଲ୍ଲୀ:  କରୋନା ଭୂତାଣୁ ସଂକ୍ରମଣର ଦ୍ୱିତୀୟ ପର୍ଯ୍ୟାୟ ଚିନ୍ତା ଅଧିକ ବଢାଇ ଦେଇଛି । କରୋନା କାରଣରୁ ଲୋକ ମ୍ୟୁକୋରମାଇକୋସିସ ରୋଗରେ ଆକ୍ରାନ୍ତ ହେଉଛନ୍ତି । ଗୁଜରାଟ ଏବଂ ଦିଲ୍ଲୀରୁ ଏକାଧିକ ମାମଲା ସାମ୍ନାକୁ ଆସିଛି । ଯେଉଁଠାରେ କରୋନାରେ ସଂକ୍ରମିତ ହେବାପରେ ଲୋକ ମ୍ୟୁକୋରମାଇକୋସିସ ରୋଗରେ ସଂକ୍ରମିତ ହେଉଛନ୍ତି ।

ଗଙ୍ଗାରାମ ହସ୍ପିଟାଲର ବରିଷ୍ଠ ଇଏନଟି ସର୍ଜନ ଡାକ୍ତର ମନୀଷ ମୁଞ୍ଜାଲଙ୍କ କହିବା ହେଉଛି, କୋଭିଡ ୧୯ କାରଣରୁ କେତେକ ଖତରନାକ ଫଙ୍ଗଲ ଇନଫେକ୍ସନ ମାମଲା ସାମ୍ନାକୁ ଆସିଛି । ଗତ ଦୁଇଦିନ ମଧ୍ୟରେ ମ୍ୟୁକୋରମାଇକୋସିସର ୬ଟି ମାମଲା ସାମ୍ନାକୁ ଆସିଛି । ଗତବର୍ଷ ମଧ୍ୟ ଏହି ରୋଗରେ ଏକାଧିକ ଲୋକଙ୍କ ଜୀବନ ଯାଇଥିଲା । କେତେକ ଲୋକଙ୍କ ଆଖିର ରଶ୍ମୀ ଚାଲି ଯାଇଥିଲା ।

ଏହି ରୋଗ ଏତେ ଗମ୍ଭୀରଯେ, ବ୍ୟକ୍ତି ତତକ୍ଷଣାତ ଆଇସିୟୁର ଆବଶ୍ୟକତା ପଡ଼େ । କରୋନାରେ ସଂକ୍ରମିତ ରୋଗୀ ଯଦି ଏହି ରୋଗ କବଳରେ ଆସିଯାନ୍ତି, ତେବେ ଠିକ ସମୟରେ ଚିକିତ୍ସା ନ ହେଲେ ଜୀବନ ମଧ୍ୟ ଯାଇପାରେ । ଗତବର୍ଷ ପ୍ରଥମ ପର୍ଯ୍ୟାୟରେ ଏହି ରୋଗରେ ଅନେକ ଲୋକ ପ୍ରାଣ ହରାଇଥିଲେ । ତେବେ କ’ଣ ଏହି ରୋଗ ଏବଂ କିଭଳି ଏହା ପ୍ରଭାବ ପକାଏ ନଜର ପକାନ୍ତୁ ।

ଏହା ଏକ ଫଙ୍ଗଲ ଇନଫେକ୍ସନ ଯାହା ତୀବ୍ର ଗତିରେ ସଂକ୍ରମିତ ହୁଏ । ଏହା ବ୍ଲାକ ଫଙ୍ଗସ ନାମରେ ମଧ୍ୟ ଜଣାଶୁଣା । ଏହା ମସ୍କିଷ୍କ, ଫୁସଫୁସ ଏବଂ ଚର୍ମ ଉପରେ ପ୍ରଭାବ ପକାଏ । କେବେ କେବେ ଆଖିର ରଶ୍ମୀ ମଧ୍ୟ ଚାଲିଯାଏ । କାହାର ନାକର ହାଡ଼ ମଧ୍ୟ ପ୍ରଭାବିତ ହୁଏ ।

ଏହାଦ୍ୱାରା ମୁହଁରେ ଯନ୍ତ୍ରଣା, ମୁଣ୍ଡବିନ୍ଧା, ସାଇନସ ସମସ୍ୟା, ନାକରେ ଯନ୍ତ୍ରଣା ଏବଂ ଜ୍ୱର ଭଳି ସମସ୍ୟା ହୁଏ । ଫୁସଫୁସରେ ଏହି ରୋଗ ହେବାଦ୍ୱାରା କାଶ, ଛାତି ଯନ୍ତ୍ରଣା ଏବଂ ନିଃଶ୍ୱାସ ନେବାରେ ସମସ୍ୟା ଦେଖାଦିଏ । କେବଳ ସେତିକି ନୁହେଁ ଚର୍ମ କଳା ପଡ଼ିଯିବା ଭଳି ସମସ୍ୟା ଦେଖାଦିଏ । ଏହା ସହିତ ପେଟ ଯନ୍ତ୍ରଣା ମଧ୍ୟ ହୁଏ ।

ତେବେ ରୋଗ ପ୍ରତିରୋଧକ ଶକ୍ତି କମ୍‌ଥିବା ଲୋକଙ୍କ ନିକଟରେ ଏହି ରୋଗ ଅଧିକ ମାତ୍ରାରେ ଦେଖାଯାଏ । ତେବେ ଅଧିକ ଷ୍ଟେରଏଡ ବ୍ୟକହାର ଦ୍ୱାରା ଏଭଳି ସମସ୍ୟା ଦେଖାଦେଇପାରେ ବୋଲି କୁହନ୍ତି ଡାକ୍ତର ।

ଘରୋଇ ସଂସ୍ଥାଠାରୁ ଖାଲି ଅକ୍ସିଜେନ୍ ସିଲିଣ୍ଡର ଭଡ଼ାରେ ନେବେ ସରକାର

ଭୁବନେଶ୍ୱର: ରାଜ୍ୟରେ ଦୈନିକ କରୋନା ସଂକ୍ରମଣ ୧୨ ହଜାର ଟପିଛି । ରାଜ୍ୟରେ ଅକ୍ସିଜେନର ଅଭାବ ନାହିଁ । ତଥାପି ଅଧିକ ପରିମାଣର ଅକ୍ସିଜେନ୍ ଗଚ୍ଛିତ କରି ରଖିବାକୁ ସ୍ୱାସ୍ଥ୍ୟ ବିଭାଗ ନିଷ୍ପତ୍ତି ନେଇଛି । ଏଥିପାଇଁ ସରକାର ଘରୋଇ ସଂସ୍ଥାଠାରୁ ଅକ୍ସିଜେନ୍ ଭଡ଼ାରେ ନେବେ । ଅକ୍ସିଜେନ୍ ସିଲିଣ୍ଡର ଭଡ଼ା ସରକାର ଧାର୍ଯ୍ୟ କରିଛନ୍ତି ।

ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗର ବିଜ୍ଞପ୍ତି ଅନୁସାରେ, ବି ଟାଇପ୍ ୧.୫ କ୍ୟୁବିକ୍ ମିଟର ସିଲିଣ୍ଡର ପିଛା ସରକାର ମାସିକ ୭ ଟଙ୍କା ଦେବେ । ସେହିଭଳି ଡି ଟାଇପ୍ ୭ କ୍ୟୁବିକ୍ ମିଟର ସିଲିଣ୍ଡର ପିଛା ସରକାର ମାସିକ ୧ ହଜାର ଟଙ୍କା ଭଡ଼ା ଦେବେ ।

ଏଥିସହ ଘରୋଇ ସଂସ୍ଥାଠାରୁ ସରକାର ଭଡ଼ାରେ ନେଇଥିବା ସିଲିଣ୍ଡର କ୍ଷତିଗ୍ରସ୍ତ ହେଲେ କ୍ଷତିପୂରଣ ମିଳିବ । ବର୍ତ୍ତମାନର ବଜାର ଦର ଅନୁସାରେ ସରକାର ସିଲିଣ୍ଡରର ମୂଲ୍ୟ ଦେବେ ।

ଯୁବଗୋଷ୍ଠୀଙ୍କ ଜୀବନ ନେଉଛି ‘ଫ୍ରି ଫାୟାର’ ଗେମ୍

ଭୁବନେଶ୍ୱର: ‘ବ୍ଲୁ ହ୍ୱେଲ୍’ ପରେ ଏବେ  କାଳ ସାଜିଲା ‘ଫ୍ରି ଫାୟାର’ ଗେମ୍ । ହାରିବା ଦୁଃଖରେ ଜୀବନ ହାରୁଛନ୍ତି ଯୁବଗୋଷ୍ଠୀ। ୱାର୍କ ଫ୍ରମ ହୋମ ସାଙ୍ଗକୁ ଦରକାର ମନିଟରିଂ। କୋରନା ପାଇଁ ଅଧିକାଂଶ ରାଜ୍ୟରେ ଏବେ ଲକଡାଉନ ଚାଲିଛି। ସ୍କୁଲ କଲେଜ ଟ୍ୟୁସନ ଲକଡାଉନ୍ ସମୟରେ ସବୁ ବନ୍ଦ ରହିଛି। ପିଲାମାନଙ୍କର ସମୟ ବିତାଇବାର ମାଧ୍ୟମ ସାଜିଛି ସ୍ମାର୍ଟଫୋନ। ଆଉ ସ୍ମାର୍ଟଫୋନ୍ ଗେମ୍ ଏବେ ନେଉଛି ପିଲାଙ୍କ ଜୀବନ ।

ସ୍ମାର୍ଟ ଫୋନରେ ଥିବା ଗେମ୍ ଆପ ‘ଫ୍ରି ଫାୟାର’ ସାଜିଛି ଘାତକ। ନିକଟରେ ଖାରବେଳନଗର ଅଞ୍ଚଳରେ ଏହି ଅନଲାଇନ ଗେମ ଖେଳି ବାରମ୍ବାର ହାରିବାରୁ ୧୨ ବର୍ଷୀୟ ଯଶୋବନ୍ତ ଆତ୍ମହତ୍ୟା କରିଛନ୍ତି। ୨୦୧୮ ମସିହାରେ ‘ବ୍ଲୁ ହ୍ୱେଲ୍’ ଗେମ ଖେଳି ଶତାଧିକ ପିଲାଙ୍କ ଜୀବନ ଯିବା ପରେ ଏହାକୁ ନିଷିଦ୍ଧ ଘୋଷଣା କରାଯାଇଥିଲା। ଏବେ ଓଡ଼ିଶା ପୋଲିସ ଏ ନେଇ ଏକ ସର୍କୁଲାର ଜାରି କରିବାକୁ ଥିବା ବେଳେ ଏ ସବୁ ଆପ ଆଣ୍ଡ୍ରଏଡ଼ ଓ ୟୁଟ୍ୟୁବରୁ ହଟାଇବାକୁ ଦାବି ହୋଇଛି।

ମାନସ୍ତତ୍ତ୍ୱବିତ୍‌ଙ୍କ କହିବା ଅନୁଯାୟୀ, କରୋନା ସମୟରେ ଉଭୟ ବାପା ମା’ ୱାର୍କ ଫ୍ରମ ହୋମରେ ବ୍ୟସ୍ତ ରହୁଛନ୍ତି। ପିଲାମାନଙ୍କ ପାଠ ପଢ଼ା ପାଇଁ ଫୋନର ଆବଶ୍ୟକତା ରହିଛି। ତେବେ ସ୍ମାର୍ଟଫୋନ ବ୍ୟବହାର ସମୟରେ ଅବିଭାବକମାନେ ପିଲାଙ୍କୁ ମନିଟରିଂ କରିବା ଦରକାର । ଯଦି ପିଲାମାନେ ଏହି ଖେଳ ଦେଖୁଛନ୍ତି ତେବେ ତାକୁ ବାରଣ କରିବା ପରିବର୍ତ୍ତେ ବୁଝାଇବାର ଆବଶ୍ୟକତା ରହିଛି ।

ନବମ ଓ ଦଶମ ଶ୍ରେଣୀ ପ୍ରଦର୍ଶନ ଆଧାରରେ ମିଳିବ ମାଟ୍ରିକ୍ ମାର୍କ

ଭୁବନେଶ୍ୱର: ମାଟ୍ରିକ ମୂଲ୍ୟାୟନ ପଦ୍ଧତିକୁ ମିଳିଲା ବୋର୍ଡର ଅନୁମୋଦନ। ନବମର ଷାଣ୍ମାସିକ ଓ ବାର୍ଷିକ ପରୀକ୍ଷାକୁ ମୂଲ୍ୟାୟନ ବେଳେ ପ୍ରାଧାନ୍ୟ ଦିଆଯିବ। ନବମ ଓ ଦଶମ ପ୍ରଦର୍ଶନ ଆଧାରରେ ଛାତ୍ରଛାତ୍ରୀଙ୍କୁ ମାର୍କ ମିଳିବ। ଦଶମ ଶ୍ରେଣୀର ଦ୍ୱିତୀୟ, ତୃତୀୟ ଓ ଚତୁର୍ଥ ଅଭ୍ୟାସ ପରୀକ୍ଷାକୁ ମୂଲ୍ୟାୟନରେ ପ୍ରାଧାନ୍ୟ ଦିଆଯିବ। ଏଥିସହ ମୂଲ୍ୟାୟନ ବେଳେ ନବମର ୪୦ ପ୍ରତିଶତ ଓ ଦଶମର ୬୦ ପ୍ରତିଶତ ନମ୍ବରକୁ ବିଚାରକୁ ନିଆଯିବ। ପ୍ରତି ବିଷୟରେ ଦୁଇଟି ସର୍ବାଧିକ ନମ୍ବରକୁ ହିଁ ମୂଲ୍ୟାୟନ କରିବାକୁ ସ୍ଥିର ହୋଇଛି।

ଅନ୍ୟପଟେ ଯଦି ଜଣେ ଛାତ୍ର ଦଶମରେ ଆଦୌ ଅଭ୍ୟାସ ପରୀକ୍ଷା ଦେଇନଥିବେ, ତେବେ ନବମର ମାର୍କକୁ ଶତପ୍ରତିଶତ ପ୍ରାଧ୍ୟାନ୍ୟ ଦିଆଯିବ। ଆଉ ଯଦି ଗୋଟିଏ ଅଭ୍ୟାସ ପରୀକ୍ଷା  ଦେଇଥିବେ ନବମ ଶ୍ରେଣୀର ୭୦ ପ୍ରତିଶତକୁ ଗୁରୁତ୍ୱ ଦିଆଯିବ। ପ୍ରତି ସ୍କୁଲରେ ଛାତ୍ରଛାତ୍ରୀଙ୍କ ମାର୍କକୁ ଶିକ୍ଷକ ଅପଲୋଡ କରିବେ। ଏନେଇ ପ୍ରଧାନଶିକ୍ଷକଙ୍କ ନେତୃତ୍ୱରେ ଏକ ଟିମ୍‌ ଗଠନ କରାଯିବ । ଏଥିପାଇଁ ୨ ହଜାର ୭୬୬ଟି ସ୍କୁଲକୁ ମେଣ୍ଟର ସ୍କୁଲ ଭାବେ ଚୟନ କରାଯାଇଛି । ମେଣ୍ଟର ସ୍କୁଲ ମାଧ୍ୟମରେ ଅନ୍ୟ ସ୍କୁଲର ମୂଲ୍ୟାୟନ ହେବ । ମାର୍କ ଅପ୍‌ଲୋଡ୍‌ ବେଳେ ଜିଲ୍ଲା ଶିକ୍ଷା ଅଧିକାରୀ ଉପସ୍ଥିତ ରହିବେ । ଆସନ୍ତା ୩୧ ତାରିଖ ସୁଦ୍ଧା ଅପ୍‌ଲୋଡିଂ କାମ ସାରିବାକୁ ଲକ୍ଷ୍ୟ ରଖାଯାଇଛି । ତା’ପରେ ଟାବୁଲେସନ ଓ ରେଜଲ୍ଟ ପ୍ରସେସିଂ କାମ ଆରମ୍ଭ ହେବ । ସମସ୍ତ ଦିଗକୁ ଅନୁଧ୍ୟାନ କରି ଜୁନ ୩୦ ସୁଦ୍ଧା ପରୀକ୍ଷାଫଳ ପ୍ରକାଶ କରାଯିବାକୁ ଲକ୍ଷ୍ୟ ରଖାଯାଇଛି । ଫଳ ପ୍ରକାଶ ପରେ ଯଦି କୌଣସି ଛାତ୍ରଛାତ୍ରୀ ସନ୍ତୁଷ୍ଟ ହେବେ ନାହିଁ, ସେମାନଙ୍କ ପାଇଁ କରୋନା ସ୍ଥିତି ସୁଧୁରିବା ପରେ ଲିଖିତ ଭାବେ ପରୀକ୍ଷା ହେବ । ଏହି କ୍ଷେତ୍ରରେ ଲିଖିତ ପରୀକ୍ଷାର ଫଳ ହିଁ ଚୂଡ଼ାନ୍ତ ହେବ ।.

ରାଜଧାନୀରେ ଆରମ୍ଭ ହେବ ଭ୍ରାମ୍ୟମାଣ ଟିକାକରଣ

ନୂଆଦିଲ୍ଲୀ: ୪୫ ବର୍ଷରୁ ଅଧିକ ବୟସ୍କଙ୍କ ଦ୍ୱିତୀୟ ଡୋଜ ଟିକାକରଣ ପାଇଁ ସ୍ୱତନ୍ତ୍ର ବ୍ୟବସ୍ଥା। ଆସନ୍ତାକାଲିଠୁ ପାଇଲଟ ପ୍ରକଳ୍ପ ଭାବେ ଟିକାକରଣ କରାଯିବ। ଭୁବନେଶ୍ୱର ରସୁଲଗଡ଼ ଛକରେ ଥିବା ଏସପ୍ଲାନେଡ୍ ମଲର ପାର୍କିଂ ସ୍ଥଳରେ ଆରମ୍ଭ ହେବ ଭ୍ରାମ୍ୟମାଣ ଟିକାକରଣ।

ପ୍ରଥମ ଦିନରେ ୪ଶହ ଜଣଙ୍କୁ ଦିଆଯିବ ଟିକା। ପରେ ଦୈନିକ ୫ଶହ ଲେଖାଏଁ ଟିକା ଦିଆଯିବ। ଏଥିପାଇଁ ଅନଲାଇନରେ ସ୍ଲଟ ବୁକିଂ କରିବାକୁ ପଡ଼ିବ। ଲକଡାଉନ ସମୟରେ ଯେଉଁମାନେ ଟିକା ନେବାକୁ ଯିବେ ସେମାନଙ୍କ ପାଇଁ ସ୍ୱତନ୍ତ୍ର ନିର୍ଦ୍ଦେଶନାମା ଜାରି କରାଯାଇଛି। ମୋଟର ସାଇକେଲରେ କେବଳ ଜଣେ ଏବଂ ଚାରି ଚକିଆ ଯାନରେ ହିତାଧିକାରୀ ଓ ତାଙ୍କ ଡ୍ରାଇଭର ଟିକାକରଣ ପାଇଁ ଆସିପାରିବେ।

ତେବେ ଏହା କେବଳ ଟ୍ରାଏଲରେ ଆରମ୍ଭ କରାୟାଇଛି । ଆଗାମୀ ଦିନରେ ଲୋକଙ୍କ ସୁବିଧା ଦୃଷ୍ଟିରୁ ଭୁବନେଶ୍ୱରର ବିଭିନ୍ନ ଅଞ୍ଚଳରେ ଏଭଳି ବ୍ୟବସ୍ଥା କରାଯିବ ବୋଲି ବିଏମସି କମିଶନର ପ୍ରେମ ଚନ୍ଦ୍ର ଚୌଧରୀ କହିଛନ୍ତି।

ଟିକା କେନ୍ଦ୍ରରୁ ପୃଥକ ହେବ ଟେଷ୍ଟିଂ କେନ୍ଦ୍ର

ଭୁବନେଶ୍ୱର: ଭୁବନେଶ୍ୱରରେ ସମସ୍ତ ଟିକାକେନ୍ଦ୍ରକୁ ବ୍ୟବସ୍ଥିତ କରିବାକୁ ବିଏମସି ନେଇଛି ପଦକ୍ଷେପ। ପୂର୍ବରୁ ଗୋଟିଏ କେନ୍ଦ୍ରରେ ଉଭୟ ଟିକାକରଣ ଓ କୋଭିଡ ଟେଷ୍ଟିଂ ହେଉଥିବା ଯୋଗୁଁ ଲୋକଙ୍କ ମନରେ ସଂକ୍ରମଣ ଭୟ ଥିଲା । ଟିକା ଗ୍ରହଣ ପାଇଁ ସ୍ଲଟ୍ ବ୍ୟବସ୍ଥା ସତ୍ତ୍ୱେ ଲୋକେ ଭିଡ଼ ଜମାଉଥିଲେ। ଏସବୁକୁ ଦୃଷ୍ଟିରେ ରଖି ଆଜି ସବୁ ଟିକା କେନ୍ଦ୍ରରେ ଟେଷ୍ଟିଂକୁ ପୃଥକ କରାଯାଇଛି। ବିନା ସ୍ଲଟ୍ ବୁକିଂରେ ଯେମିତି କେହି କେନ୍ଦ୍ର ନିକଟକୁ ଆସିବେ ନାହିଁ ସେଥିପାଇଁ ପୋଲିସ ମୁତୟନ କରାଯାଇଛି।

ଅନ୍ୟପଟେ ଖରା ଦାଉରୁ ଲୋକଙ୍କୁ ରକ୍ଷା କରିବା ପାଇଁ ଟେଣ୍ଟ୍ ବ୍ୟବସ୍ଥା ମଧ୍ୟ କରାଯାଇଛି । ଏସବୁକୁ ତଦାରଖ କରିବା ପାଇଁ ସବୁ କେନ୍ଦ୍ରକୁ ବିଏମସି କମିଶନର ପ୍ରେମ ଚନ୍ଦ୍ର ଚୌଧରୀଙ୍କ ନିର୍ଦ୍ଦଶ କ୍ରମେ ସ୍ୱତନ୍ତ୍ର ଅଧିକାରୀମାନଙ୍କୁ ପଠାଯାଇଥିଲା।

ଆଇପିଏଲରୁ ଫେରି ରାଇନା କରୁଛନ୍ତି ରୋଷେଇ

ଇଣ୍ଡିୟନ ପ୍ରିମିୟର ଲିଗ୍‌ର ୧୪ତମ ସଂସ୍କରଣ ହୋଇଗଲା ସ୍ଥଗିତ । କିଛି ଟିମ୍‌ର ସଦସ୍ୟଙ୍କ କରୋନା ପଜିଟିଭ୍ ଆସିବା ପରେ ବିସିସିଆଇ ଚଳିତ ଆଇପିଏଲକୁ ସ୍ଥଗିତ ରଖିବାକୁ ନିଷ୍ପତ୍ତି ନେଇଥିଲେ । ଏହି ଲିଗ୍ ସ୍ଥଗିତ ହେବା ପର୍ଯ୍ୟନ୍ତ ୨୯ଟି ମ୍ୟାଚ ଖେଳାଯାଇଥିଲା ଏବଂ ୩୧ଟି ଖେଳା ଯିବା ପାଇଁ ବାକି ରହିଥିଲା । ଆଇପିଏଲ ବନ୍ଦ ହେବା ପରେ ସମସ୍ତ ଖେଳାଳୀ ନିଜ ନିଜ ଘରକୁ ଫେରିଯାଇଥିଲେ । ତେବେ ଦର୍ଶକମାନେ ଆଇପିଏଲ ନ ଦେଖିପାରିବାରୁ ନିରାଶ ତ ଅଛନ୍ତି । ହେଲେ ଅନ୍ୟପଟେ ନିଜ ପ୍ରିୟ ଖେଳାଳୀ ଆଇପିଏଲରୁ ଫେରିବା ପରେ ଘରେ କଣ କରୁଛନ୍ତି । ତା ଉପରେ ବି ନଜର ରଖିଛନ୍ତି । ଖେଳାଳୀ ମାନେ ନିଜ ଘରେ ପରିବାରଙ୍କ ସହ ସମୟ ଅତିବାହିତ କରୁଥିବାର ଭିଡିଓ ଏବଂ ଫୋଟ ନିଜ ନିଜ ସୋସିଆଲ ମିଡିଆ ଆକାଉଣ୍ଟରେ ପୋଷ୍ଟ କରୁଛନ୍ତି ।

ସେହି ଭିଡିଓ ଭିତରୁ ଜଣେ ଖେଳାଳୀଙ୍କ ଭିଡିଓ ବର୍ତ୍ତମାନ ସୋସିଆଲ ମିଡିଆରେ ଖୁବ୍ ଭାଇରାଲ ହେଉଛି । ଏହି ଭିଡିଓରେ ସୁରେଶ ରାଇନା ଜଣେ କୁକ୍ ଭାବେ ନଜର ଆସୁଛନ୍ତି । ଦର୍ଶକେ ସୁରେଶ ରାଇନାଙ୍କୁ ମଇଦାନରେ ଚଉକା ଛକା ମାରିବାର ଅନେକଥର ଦେଖିଛନ୍ତି । ହେଲେ ମଇଦାନରେ ଭଲ ପ୍ରଦର୍ଶନ କରୁଥିବା ସୁରେଶ ରାଇନା ରୋଷେଇ ଘରେ ବି ଭଲଭାବେ ନିଜ ପ୍ରଦର୍ଶନ ଦେଖାଇପାରନ୍ତି ବୋଲି ଖୁବ୍ କମ୍ ଲୋକେ ଜାଣିଥିବେ । ଆଇପିଏଲରୁ ଫେରିବା ପରେ ସୁରେଶ ରାଇନା କଡୀ ବନାଉଥିବାର ଭିଡିଓ ନିଜ ଇନଷ୍ଟାଗ୍ରାମରେ ପୋଷ୍ଟ କରିଛନ୍ତି । ଏହି ଭିଡିଓକୁ ସେୟାର କରି ସୁରେଶ ରାଇନା ଲେଖିଛନ୍ତି – ଏହି କଡି ତରକାରୀର ରେସିପି ତାଙ୍କ ଭଉଣୀଙ୍କର ସିକ୍ରେଟ ରେସିପୀ । ରାଇନାଙ୍କର ଏହି ଭିଡିଓକୁ ତାଙ୍କ ଫ୍ୟାନ୍ସଙ୍କର ବିପୁଳ ଭଲପାଇବା ମିଳିଛି ।

ତେବେ ଏହି ଭିଡିଓ ପୂର୍ବରୁ ଆଉ ଏକ ଭିଡିଓ ମଧ୍ୟ ରାଇନାଙ୍କର ଖୁବ୍ ଭାଇରାଲ ହୋଇଥିଲା । ଯେଉଁଥିରେ ସୁରେଶ ରାଇନା ହୋଟେଲର କୁକୁଙ୍କ ସହିତ ଖାଦ୍ୟ ବନାଉଥିବାର ନଜର ଆସିଥିଲେ । ତାଙ୍କ ସହ ଅବନ୍ତୀ ରାୟୁଡୁ ମଧ୍ୟ ରହିଥିଲେ । ଏମିତି ଅନେକ ଭିଡିଓ ସୋସିଆମ ମିଡିଆରେ ରାଇନା ପୋଷ୍ଟ କରନ୍ତି ଓ ତାହା ପରେ ତାଙ୍କ ଫ୍ୟାନ୍ସଙ୍କ ଦ୍ୱାରା ଖୁବ୍ ଭାଇରାଲ ମଧ୍ୟ ହୋଇଥାଏ । ସେହିଭଳି ଆଇପିଏଲ ସ୍ଥଗିତ ହେବା ପରେ ବିସିସିଆଇର ନିର୍ଣ୍ଣୟକୁ ସପୋର୍ଟ କରି ରାଇନା ନିଜ ଟୁଇଟରେ କହିଥିଲେ ଯେ- କରୋନାକୁ ଏବେ ଥଟ୍ଟା ଭାବେ ନେବା ବିଲକୁଲ ବି ଉଚିତ୍ ନୁହଁ । ଅନେକ ଜୀବନର ବାଜି ଲାଗିସାରିଲାଣି । ତେଣୁ ମୋର ମୋ ଦର୍ଶକଙ୍କୁ ଅନୁରୋଧ ଘରେ ରୁହନ୍ତୁ ସୁରକ୍ଷିତ ରୁହନ୍ତୁ ।

ଓଡ଼ିଶା ଫୁଟବଲ୍ କ୍ଲବ ସହ ଯୋଡ଼ି ହେଲେ କିଂବଦନ୍ତୀ ଫୁଟ୍‌ବଲର୍‌ ଡେଭିଡ୍‌ ଭିଲା

ଭୁବନେଶ୍ୱର: ଓଡ଼ିଶା ଫୁଟବଲ୍ କ୍ଲବ ସହ ଯୋଡ଼ି ହେଲେ କିଂବଦନ୍ତୀ ଫୁଟ୍‌ବଲର୍‌ ଡେଭିଡ୍‌ ଭିଲା। ସ୍ପେନ୍‌ ପାଇଁ ୯୮ ଅନ୍ତର୍ଜାତୀୟ ମ୍ୟାଚ୍‌ ଖେଳିଥିବା ଏହି ତାରକା ଷ୍ଟ୍ରାଇକର୍‌ ଏକଦା ଫିଫା ବିଶ୍ୱକପରେ ଆକର୍ଷଣର କେନ୍ଦ୍ରବିନ୍ଦୁ ଥିଲେ। ତେବେ ବର୍ତ୍ତମାନ ସେ ଓଏଫ୍‌ସିରେ ଯୋଗଦେବା ପରେ ଏହାର ଗ୍ଲୋବାଲ୍‌ ଫୁଟ୍‌ବଲ୍‌ ଅପରେସନ୍ସ ମୁଖ୍ୟ ଭାବେ କାମ କରିବେ।

ଓଏଫ୍‌ସିରେ ଯୋଗଦେବା ପରେ ଭିଲା କହିଛନ୍ତି ‘‘ମୁଁ ମୋ ଅଭିଜ୍ଞତାକୁ ଏଠାରେ ଉଚିତ ଉପ‌‌ଯୋଗ କରିବି। ମୁଁ ମୋ ଅଭିଜ୍ଞତାକୁ ଫୁଟ୍‌ବଲ୍‌ରେ ବିନିଯୋଗ କରିବି। ଓଡ଼ିଶା ଏଫ୍‌ସି ଏବେ ଶ୍ରେଷ୍ଠ ଖେଳାଳି, ପ୍ରଶିକ୍ଷକ ଓ ସହକାରୀଙ୍କୁ ପାଇ ଆଗକୁ ବଢ଼ିବ ବୋଲି ଆଶା କରିବା’’। ଡେଭିଡ ଭିଲାଙ୍କ ଆଗମନ ଓଡ଼ିଶା ଏଫ୍‌ସିର ଆଭିମୁଖ୍ୟକୁ ସ୍ପଷ୍ଟ କରିଛି ବୋଲି କ୍ଲବ୍‌ ସଭାପତି ରାଜ ଅଥ୍ୱାଲ କହିଛନ୍ତି।

ସ୍ପେନ୍‌ ପାଇଁ ୟୁରୋ କପ୍, ବିଶ୍ୱକପ୍‌, ବାର୍ସିଲୋନା ପାଇଁ ଲା ଲିଗା, ଚାମ୍ପିଅନ୍ସ ଲିଗ୍‌ ଜିତିଥିବା ଡେଭିଡ୍‌ଙ୍କ ଭଳି ଜଣେ ଖେଳାଳି ଓଡ଼ିଶା ଏଫ୍‌ସି ସହ ଯୋଡ଼ିହେବା ନିଶ୍ଚିତ ଭାବେ ଦଳକୁ ଆଗାମୀ ବର୍ଷ ଶୀର୍ଷରେ ପହଞ୍ଚାଇବାର ସୂତ୍ର ଦେଖାଇବ ବୋଲି ଓଡ଼ିଶା ସରକାରଙ୍କ କ୍ରୀଡ଼ା ଓ ଯୁବସେବା ବିଭାଗ ପ୍ରମୁଖ ସଚିବ ବିଶାଲ କୁମାର ଦେବ ଆଶା ରଖିଛନ୍ତି।

ନଭିମୁମ୍ବାଇ ମହାନଗର ନିଗମକୁ ଓଡ଼ିଶା ଭବନ ଭଡ଼ା ଛାଡ଼ କଲେ ରାଜ୍ୟ ସରକାର

ଭୁବନେଶ୍ୱର: ପୁଣି ନିଜ ଉଦାରତାର ପରିଚୟ ଦେଲେ ରାଜ୍ୟ ସରକାର। ରୋଗୀଙ୍କୁ ସେବା ଯୋଗାଉଥିବା ଡାକ୍ତର ଓ ସ୍ୱାସ୍ଥ୍ୟ କର୍ମୀ ମାନଙ୍କ ସଙ୍ଗରୋଧ ନିମନ୍ତେ ବ୍ୟବହାର ହେଉଥିବା ନଭିମୁମ୍ବାଇ ମହାନଗର ନିଗମକୁ ୨ କୋଟିରୁ ଅଧିକ ଟଙ୍କାର ଓଡ଼ିଶା ଭବନ ଭଡ଼ା ଛାଡ଼ କଲେ ରାଜ୍ୟ ସରକାର।

କୋଭିଡ ମହାମାରୀର ମୁକାବିଲା ପାଇଁ ମୁମ୍ବାଇରେ ରୋଗୀଙ୍କୁ ସେବା ଯୋଗାଉଥିବା ଡାକ୍ତର ଓ ସ୍ୱାସ୍ଥ୍ୟ କର୍ମୀ ମାନଙ୍କ ସଙ୍ଗରୋଧ ନିମନ୍ତେ ନଭି ମୁମ୍ବାଇ ମହାନଗର ନିଗମ ସେଠାରେ ଥିବା ଓଡ଼ିଶା ଭବନକୁ ୨୦୨୦ ଅପ୍ରେଲରୁ ବ୍ୟବହାର କରିଆସୁଥିଲେ। ତେବେ ଏହାର ଭଡ଼ା ବାବଦକୁ ୨କୋଟି ୧୬ହଜାର ଟଙ୍କା ବାକି ଥିଲା। ତେବେ ଏ ସମସ୍ତ ଟଙ୍କାକୁ ଛାଡ଼ କରିବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିର୍ଦ୍ଦେଶ ଦେଇଛନ୍ତି।

ମହାମାରୀର ଏହି ବିପଦ ସମୟରେ ଓଡ଼ିଶା ଭବନ ଭଡ଼ାକୁ ଛାଡ଼ି ମୁଖ୍ୟମନ୍ତ୍ରୀ ନିଜର ମାନଵିକତା ତଥା ମୁମ୍ବାଇର ଜନସାଧାରଣଙ୍କ ପ୍ରତି ସଦିଚ୍ଛାପୂର୍ଣ୍ଣ ମନୋଭାବ ପ୍ରଦର୍ଶନ କରିଛନ୍ତି। ସୂଚନା ଅନୁସାରେ ଗୁରୁତର କୋଭିଡ୍‌ ରୋଗୀଙ୍କ ଚିକିତ୍ସା ନିମନ୍ତେ ମହାରାଷ୍ଟ୍ରକୁ ଓଡ଼ିଶା ଜରୁରୀ ଭିତ୍ତିରେ ଗତ ୧୫ ଦିନ ହେଲା ଅକ୍ସିଜେନ ମଧ୍ୟ ଯୋଗାଇଆସୁଛି।

ଗ୍ରୀଷ୍ମ ଅବକାଶରେ ମଧ୍ୟ ଜାରି ରହିବ ଜରୁରୀ ଓ ଅତିଜରୁରୀ ମାମଲାର ବିଚାର

ନୂଆଦିଲ୍ଲୀ:  ମେ ୧୦ରୁ ସୁପ୍ରିମକୋର୍ଟଙ୍କ ପ୍ରଥମ ପର୍ଯ୍ୟାୟ ଗ୍ରୀଷ୍ମ ଛୁଟି ଆରମ୍ଭ ହେବ। ହେଲେ ଛୁଟି ସମୟରେ ମଧ୍ୟ ଜରୁରୀ ମାମଲାର ଶୁଣାଣି ଚାଲିବ ବୋଲି ବିଜ୍ଞପ୍ତି ପ୍ରକାଶ ପାଇଛି। ସପ୍ତାହକୁ ଦୁଇ ଦିନ ଭର୍ଚୁଆଲରେ ୨ଟି ଖଣ୍ଡପୀଠ ମାମଲାଗୁଡିକର ଶୁଣାଣି କରିବେ।

ମେ ୧୦ରୁ ୧୫ ମଧ୍ୟରେ ସପ୍ତାହକୁ ୨ଦିନ ମଙ୍ଗଳବାର ଓ ଶୁକ୍ରବାର ଶୁଣାଣି କରିବେ ଖଣ୍ଡପୀଠ। ସେହିଭଳି ଦ୍ୱିତୀୟ ପର୍ଯ୍ୟାୟ ଗ୍ରୀଷ୍ମ ଅବକାଶ ମେ ୧୭ରୁ ୨୫ ତାରିଖ ପର୍ଯ୍ୟନ୍ତ ରହିବ। ଏହି ସମୟରେ ବି ସପ୍ତାହକୁ ଦୁଇ ଦିନ ପୂର୍ବଭଳି ମଙ୍ଗଳବାର ଓ ଶୁକ୍ରବାର ଶୁଣାଣି କରାଯିବ। ତେବେ ମଙ୍ଗଳବାର ଶୁଣାଣି ପାଇଁ ଗୁରୁବାର ସୁଦ୍ଧା କେସ ପଞ୍ଜୀକରଣ କରାଯିବାକୁ କୁହାଯାଇଥିବାବେଳେ ଶୁକ୍ରବାର ଶୁଣାଣି ପାଇଁ ସୋମବାର ସୁଦ୍ଧା ପଞ୍ଜୀକରଣ ପାଇଁ ଡେଡଲାଇନ ରଖାଯାଇଛି। ଏଥର ଚାରି ପର୍ଯ୍ୟାୟରେ ଗ୍ରୀଷ୍ମ ଅବକାଶର ବିଚାର ପ୍ରକ୍ରିୟା ପାଇଁ ଦିନ ଧାର୍ଯ୍ୟ କରାଯାଇଛି।

ତୃତୀୟ ପର୍ଯ୍ୟାୟ ମେ ୨୬ରୁ ଜୁନ ୧୦ ତାରିଖ ଏବଂ ଚତୁର୍ଥ ପର୍ଯ୍ୟାୟ ପାଇଁ ଜୁନ ୧୧ରୁ ଜୁନ ୨୭ ଯାଏଁ ଅବଧି ରହିଛି। ଏହି ସମୟରେ କେଉଁ ଖଣ୍ଡପୀଠ ଶୁଣାଣି କରିବେ ସେ ନେଇ ପରବର୍ତ୍ତୀ ବିଜ୍ଞପ୍ତି ପ୍ରକାଶ ପାଇବ। ତେବେ [email protected] ଇ-ମେଲ ଠିକଣାରେ ମାମଲା ରୁଜୁ ହୋଇପାରିବ।