ନବରଙ୍ଗପୁର: ସାପକୁ କାହାର ବା ଡର ନାହିଁ । ସାପ ନାଁ ଶୁଣିଲେ ମନରେ ଛନକା ପଶେ । ହେଲେ ସମାଜରେ ଏଭଳି କିଛି ଲୋକ ଅଛନ୍ତି ଯେଉଁ ମାନଙ୍କୁ ସାପକୁ ନେଇ ଭୟ ତ ନାହିଁ । ପୁଣି ସାପକୁ ମାରିକି ସାପ ମାଂସ ଖାଇବାକୁ ପଛାଉନାହାଁନ୍ତି । ସାପ ମାଂସକୁ ରୁଚିକର ଓ ସୁସ୍ୱାଦୁ ଖାଦ୍ୟ ଭାବେ ଗ୍ରହଣ କରିଥାନ୍ତି ନବରଙ୍ଗପୁର ଜିଲ୍ଲା ରଙ୍ଗମାଟିଗୁଡା ଗାଁ ର କିଛି ଭୂମିଆ ସମ୍ପ୍ରଦାୟ ଲୋକ । ନାଗ, ଢମଣା, ଧଣ୍ଡ ଭଳି ସାପ ଓ ବଡ଼ ବଡ଼ ବେଙ୍ଗ ମାଂସକୁ ଖାଇଥାନ୍ତି ଏମାନେ ।

ନବରଙ୍ଗପୁର ରଙ୍ଗମାଟିଗୁଡା ଗାଁ  । ଗାଁରେ ବାସ କରୁଥିବା ଭୂମିଆ ସଂପ୍ରଦାୟ ଲୋକଙ୍କର ଆହାର ପାଲଟିଛନ୍ତି ସାପ । ବିଷଧର ହେଉ କି ଅଣବିଷଧର । ସେଥିରେ କିଛି ମାନେ ନାହିଁ । ଯାହା ଆଖିରେ ପଡ଼ିଲା ସେ ହେଲା ଭୋଜି । ସାପ ମାଂସକୁ ଏଠିକାର ବାସିନ୍ଦା ରୁଚିକର ଏବଂ ଔଷଧୀୟ ବୋଲି ଗ୍ରହଣ କରିନେଇଛନ୍ତି । ଭୟଙ୍କର ନାଗ ଢାମଣାକୁ ଏମାନେ ଚୁଟକିରେ ଧରି ଆହର ପାଇଁ ପ୍ରସ୍ତୁତ କରିଥାନ୍ତି । ଦେଖନ୍ତୁ କିପରି ଏଠି ଚାଲିଛି ସାପ ମାଂସ କଟା । ପ୍ରାୟ ଛଅ ଫୁଟର ଢାମଣା ସାପକୁ ଗଛ ଉପରେ ଟାଙ୍ଗି ଦିଆଯାଇଛି । ଏହାର ଛାଲ ଉତାରି କଣ୍ଟା ବାହାର କରି ମାଂସ କଟାଯାଉଛି । ମାଂସ ପ୍ରସ୍ତୁତ ହୋଇଗଲେ ତାକୁ ତେଲ ମସଲା ଦେଇ ତରକାରୀ କରି ଭାତ ସଙ୍ଗେ ଖାଇଥାନ୍ତି  । ଏହା ଆମ ପାଇଁ ଅଜବ ହୋଇଥିଲେ ମଧ୍ୟ ଭୂମିଆ ଜାତି ଲୋକଙ୍କ ପାଇଁ ଏହା ନିହାତି ସାଧାରଣ କଥା । ପିଲା ଠାରୁ ବୁଢା ସମସ୍ତେ ସାପ ମାଂସ ସ୍ୱାଦର ମଜା ନେଇଥାନ୍ତି । କେବଳ ସାପ ନୁହେଁ ବଡ଼ ବଡ଼ ବେଙ୍ଗ ମଧ୍ୟ ଖାଇଥାନ୍ତି ଏମାନେ ।

ତେବେ ସାପ ଓ ବେଙ୍ଗ ମାଂସରେ ଔଷଧୀୟ ଗୁଣ ରହିଥିବା ସେମାନେ ଦାବି କରନ୍ତି । ପେଟ ସମସ୍ୟାରେ ପୀଡ଼ିତ ବ୍ୟକ୍ତି କିମ୍ବା ଶିଶୁ ଖାଇଲେ ରୋଗ ଭଲ ହେଉଥିବା କହିଛନ୍ତି । ଏହାସହ ଗର୍ଭବତୀ ମହିଳା ସାପ ମାଂସ ଖାଇଲେ ପ୍ରସବ ସମୟରେ କୌଣସି ଯନ୍ତ୍ରଣା ହୋଇନଥାଏ, ସୁରକ୍ଷିତ ଡେଲିଭରି ହେଉଥିବା କହିଛନ୍ତି ଏଠିକାର ବାସିନ୍ଦା । ଧଣ୍ଡ ଓ ଢମଣା ଖାଇଲେ ଭୁତ ପ୍ରେତ ଶରୀରରେ ପ୍ରବେଶ କରି ନ ଥାନ୍ତି ବୋଲି ଏମାନଙ୍କ ବିଶ୍ୱାସ ରହିଛି । ବେଙ୍ଗ ମାଂସ ଖାଇଲେ ଶିଶୁ ହୃଷ୍ଟପୃଷ୍ଟ ହୋଇଥାଏ ବୋଲି ପ୍ରକାଶ କରିଛନ୍ତି ଜଣେ ମହିଳା । ଗାଁର କେହି କେହି ୩୦ ରୁ ଅଧିକ ସାପ ଖାଇଥିବା ପ୍ରକାଶ କରିଛନ୍ତି ।

ପୂର୍ବ ପୀଢିଙ୍କୁ ଅନୁସରଣ କରି ନିର୍ଦ୍ଧିଷ୍ଟ ପ୍ରକାର ସାପ ସହ ନାଗ ସାପ ଓ ବେଙ୍ଗରେ ଔଷଧୀୟ ଗୁଣ ରହିଥିବା ସେମାନେ କହିବା ସହ ବିଶ୍ୱାସରେ ଖାଉଛନ୍ତି । ନାଗ ଭଳି ବିଷ ଧର ସାପର ମୁଣ୍ଡ କାଟି ବିଷ କାଢି ତାକୁ ରାନ୍ଧି ଖାଇଥାନ୍ତି  । ଅପରପକ୍ଷେ ଆୟୁର୍ବେଦ ଚିକିତ୍ସାରେ ଏଭଳି କିଛି ଔଷଧ ରହିଛି କି ତାହା ଜାଣିବା ପାଇଁ ଆମେ ଭେଟିଥିଲୁ ଜଣେ ଆୟୁର୍ବେଦ ଚିକିତ୍ସକଙ୍କୁ  । ତାଙ୍କର ମତ ହେଲା ସାପ ମାଂସ ଖାଇଲେ ବିପଦ । ଏହା ଶରୀରରେ ବିଷକ୍ରିୟା ସୃଷ୍ଟି କରିବ ବୋଲି କହିଛନ୍ତି ଆୟୁର୍ବେଦ ଚିକିତ୍ସକ ।

ତେବେ ବିନା କୌଣସି ଭୟରେ ଭୂମିଆ ସଂପ୍ରଦାୟ ସାପ ମାଂସ ଖାଇବା ମନକୁ ବିଚଳିତ କରିଦେଉଛି । ତେବେ ଗାଁର କିଛି ଲୋକ ସାପ ମାଂସ ଆଦୌ ଖାଆନ୍ତି ନାହିଁ ବୋଲି କହିଛନ୍ତି  ।

ଭୁବନେଶ୍ୱର: ଗୃହନିର୍ମାଣ ସଂସ୍ଥା ଜରିଆରେ ଠକେଇର ଶିକାର ହେଉଛନ୍ତି ଲୋକେ । ନ୍ୟାୟ ପାଇଁ ଏଣେତେଣେ ବୁଲି ନୟାନ୍ତ ହେଉଛନ୍ତି କ୍ଷତିଗ୍ରସ୍ତ । ଏଭଳି ମାମଲାର ବିଚାର ପାଇଁ ଯଦିଓ ୨୦୧୭ ମସିହାରୁ ରାଜ୍ୟରେ ଓଡିଶା ରିଅଲ ଇଷ୍ଟେଟ୍ ରେଗୁଲେଟୋରୀ ଅଥୋରିଟି ବା ‘‘RERA’’ଗଠିତ ହୋଇଛି ତେବେ ଏହାର ରାୟକୁ ଚାଲେଞ୍ଜ କରିବାକୁ ଲୋକଙ୍କୁ ହାଇକୋର୍ଟକୁ ଯିବାକୁ ପଡୁଛି । ଫଳରେ ନ୍ୟାୟ ପାଇଁ ଲୋକଙ୍କୁ ଦୀର୍ଘ ଦିନ ଧରି ଅପେକ୍ଷା କରିବାକୁ ପଡୁଛି ।

ଏହି ସମସ୍ୟାର ସମାଧାନ ପାଇଁ ରାଜ୍ୟ ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ପକ୍ଷରୁ ଗଠିତ ହୋଇଛି ‘‘OREAT’’ ବା ଓଡିଶା ରିଅଲ ଇଷ୍ଟେଟ୍ ଆପିଲେଟ୍ ଟ୍ରିବ୍ୟୁନାଲ । ଫଳରେ ଏଣିକି ରାଜ୍ୟର ସମସ୍ତ ରିଅଲ ଇଷ୍ଟେଟ୍ ସମ୍ପର୍କିତ ଆପତ୍ତି ଓ ଅଭିଯୋଗର ହେବ ତ୍ୱରିତ ବିଚାର । ଆସନ୍ତା ସେପ୍ଟେମ୍ବର ୨ ତାରିଖରୁ ଭୁବନେଶ୍ୱରର ଫର୍ଚୁନ୍ ଟାଓ୍ୱାର ସ୍ଥିତ ଅସ୍ଥାୟୀ କାର୍ଯ୍ୟାଳୟରେ କାର୍ଯ୍ୟକ୍ଷମ ହେବ ଓରିଏଟ୍ ।

ରିଅଲ ଇଷ୍ଟେଟ୍ ଆଇନ ୨୦୧୬ ଓ ଓଡିଶା ରିଅଲ ଇଷ୍ଟେଟ୍ ନିୟମ ୨୦୧୭ ଆଧାରରେ ଗଠିତ ହୋଇଛି ଏହି ଆପିଲେଟ୍ ଟ୍ରିବ୍ୟୁନାଲ ଓରିଏଟ୍ । ବର୍ତ୍ତମାନ କରୋନା ଯୋଗୁଁ ଭିଡିଓ କନଫରେନ୍ସିଂ ଜରିଆରେ ହେବ ଶୁଣାଣି । ଏଥିରେ କ୍ଷତିଗ୍ରସ୍ତ ବ୍ୟକ୍ତିଗତ ମଧ୍ୟ ନିଜର ଆପତ୍ତି ଓ ଅଭିଯୋଗ କରିପାରିବେ । ଓରିଏଟ୍ ସ୍ଥାପନ ଫଳରେ ବିଲଡରମାନଙ୍କ ଉପରେ ନିୟନ୍ତ୍ରଣ ରହିବ ।

ଲୋକମାନେ ଠକାମୀର ଶିକାର ହେବା ମଧ୍ୟ କମିବ । ରାଜ୍ୟ ସରକାରଙ୍କ ଏଭଳି ପଦକ୍ଷେପକୁ ମହକିଲଙ୍କ ସହ ଓକିଲ ଏପରିକି ବିଲଡରମାନେ ମଧ୍ୟ ସ୍ୱାଗତ କରିଛନ୍ତି । ବର୍ତ୍ତମାନ ସୁଦ୍ଧା ବିକ୍ରିକର ବିଭାଗ ଅଧୀନରେ ଥିବା ୧୬ଟି ଓ ରେରା ଅଧୀନରେ ଥିବା ୭୮ଟି ଏହି ଭଳି ମୋଟ ୯୪ଟି ମାମଲା ଓରିଏଟ୍‌କୁ ସ୍ଥାନାନ୍ତର ହୋଇସାରିଛି । ଯାହାର ବିଚାର ପର୍ଯ୍ୟାୟ କ୍ରମେ ଆରମ୍ଭ ହେବ  ।

(ଭୁବନେଶ୍ୱରରୁ ଶକ୍ତିଧର ରାଜଗୁରୁ)