ନୂଆଦିଲ୍ଲୀ: ଦେଶର ନିର୍ମାଣ ଏବଂ ବିକାଶରେ ଜଣେ ଶ୍ରମିକଙ୍କର ଗୁରୁତ୍ୱପୂର୍ଣ୍ଣ ଅବଦାନ ରହିଛି | କିନ୍ତୁ ଲକ୍‌ଡାଉନ୍ ଯୋଗୁଁ ଅନେକ ଶ୍ରମିକ ଚାକିରି ହରାଇଛନ୍ତି । ଫଳରେ ଦୈନନ୍ଦିନ ଜୀବନ ଯାପନରେ ନା ନା ସମସ୍ୟାର ସମ୍ମୁଖୀନ ହେଉଛନ୍ତି । ଏଣୁ ଦେଶରେ ଲକ୍‌ଡାଉନ୍ ଲାଗୁ ହୋଇଥିବ ସତ୍ତ୍ୱେ ଶ୍ରମିକଙ୍କ ପଳାୟନ ଜାରି ରହିଛି।  ଯିବା ପାଇଁ କୌଣସି ସାଧନ ନଥିବାରୁ ବାଧ୍ୟ ହୋଇ ଶ୍ରମିକମାନେ ଚାଲି ଚାଲି ଶହ ଶହ କିଲୋମିଟର ରାସ୍ତା ଅତିକ୍ରମ କରୁଛନ୍ତି ।

ଏଭଳି ପାଦଚଲା ଶ୍ରମିକଙ୍କ ଅନେକ ଦୃଶ୍ୟ ଏବେ ସୋସିଆଲ୍ ମିଡିଆ ଓ ଟିଭି ପରଦାରେ ଦେଖିବାକୁ ମିଳୁଛି ଯାହା ସାଧାରଣରେ ସମସ୍ତଙ୍କୁ ବ୍ୟତିଥ କରୁଛି । ଏଭଳି ହିଁ ପାଦ ଚଲା ଶ୍ରମିକଙ୍କ ଏକ ଦୃଶ୍ୟ ଦେଖିବାକୁ ମିଳିଛି ଯାହା ଆପଣଙ୍କ କଳ୍ପନା ବାହାରେ । ଯାହାର ଭିଡିଓ ଏବେ ଖୁବ୍‌ ଭାଇରାଲ ।

ଏଥିରେ ଗୋଟିଏ ପରିବାର ପଞ୍ଜାବରୁ ଝାନ୍ସି ପାଦରେ ଚାଲି ଚାଲି ଯାତ୍ରା କରୁଛନ୍ତି । ସେମାନଙ୍କ ସହିତ ରହିଛି ଛୋଟ ଛୁଆ । ଯିଏ ବହୁ କିଲୋମିଟର ଚାଲିବା ପରେ ଥକି ଯାଇଛି । ଆଉ ଶୋଇପଡ଼ିଛି ଟ୍ରୋଲି ବ୍ୟାଗ୍‌ ଉପରେ । ହେଲେ ଅଟକି ଯାଇନାହାନ୍ତି ପରିବାର ଲୋକେ । ଛୋଟ ଛୁଆଟି ସେମିତି ବ୍ୟାଗ୍‌ ଉପରେ ଶୋଇଥିବା ବେଳେ ଟ୍ରୋଲି ବ୍ୟାଗ୍‌କୁ ଟାଣି ଟାଣି ନେଉଛି ତା’ ମାଆ ।

ସେମାନଙ୍କ କହିବା ହେଲା ଯେ, ଗତ ୩ ଦିନ ହେଲା ସେମାନେ ଚାଲି ଚାଲି ଘର ଅଭିମୁଖେ ବାହାରିଛନ୍ତି  । କିଛି ଶ୍ରମିକ ଟ୍ରେନ୍‌ ଓ ବସ୍‌ ମାଧ୍ୟମରେ ଘରକୁ ବାହୁଡ଼ୁଥିବା ସେମାନେ ଏନେଇ ଅବଗତ ନୁହଁନ୍ତି । ପରିବାରର ମୁଖିଆ ଧିରଜଙ୍କ କହିବା ହେଲା ଯେ, ସେମାନେ ବୁନ୍ଦଲଖଣ୍ଡ ଜିଲ୍ଲାକୁ ଯିବାର ଅଛି କିନ୍ତୁ ସେମାନେ ପ୍ରଶାସନର ବ୍ୟବସ୍ଥା ନେଇ ଅବଗତ ନଥିବା କହିଛନ୍ତି ।

ନୂଆଦିଲ୍ଲୀ: କଂଗ୍ରେସର ପୂର୍ବ ଅଧ୍ୟକ୍ଷ ତଥା ଲୋକସଭା ସାଂସଦ ରାହୁଲ ଗାନ୍ଧୀ ଗୁରୁବାର ପ୍ରବାସୀ ଶ୍ରମିକଙ୍କ ଅବସ୍ଥାକୁ ଦର୍ଶାଇ ଏକ ଆବେଗ ପୂର୍ଣ୍ଣ ଭିଡିଓ ଟ୍ୱିଟ୍ କରିଛନ୍ତି । ଭିଡିଓରେ ବଡ଼ ସହରରୁ ପାଦରେ ଚାଲି ଚାଲି ଶ୍ରମିକମାନେ ନିଜ ଘରକୁ ପଳାୟନ କରୁଥିବା ଚିତ୍ର ଦେଖିବାକୁ ମିଳିଛି । ଏଥିସହିତ ଭିଡିଓରେ ଥିବା ଏକ ଗୀତ ମାଧ୍ୟମରେ ବର୍ତ୍ତମାନ ସମୟରେ ଶ୍ରମିକ ଯେଉଁ ସମସ୍ୟ ଦେଇଗତି କରୁଛିନ୍ତି ତାହାକୁ ମଧ୍ୟ ଦର୍ଶାଯାଇଛି । ଲକ୍‌ଡାଉନ୍‌ ଏବଂ ଏହାର ପରବର୍ତ୍ତୀ ପରିସ୍ଥିତିକୁ ନେଇ ରାହୁଲ ଗାନ୍ଧୀ ସବୁବେଳେ ଗଠନମୂଳକଭାବେ ସମାଲୋଚନା କରିଆସୁଛନ୍ତି ।

https://twitter.com/RahulGandhi/status/1260895626465665025

ଭିଡିଓ ସଂଯୋଗ କରି ପୋଷ୍ଟ କରିଥିବା ଟ୍ୱିଟ୍‌ରେ ରାହୁଲ ଲୋକଙ୍କୁ ଧୌର୍ଯ୍ୟ ଧରିବାକୁ ନିବେଦନ କରିଛନ୍ତି । ବର୍ତ୍ତମାନ ଅତି କଠିନ ପରିସ୍ଥିତି ଦେଇ ସମସ୍ତେ ଗତି କରୁଛେ । ପ୍ରବାସୀ ଶ୍ରମିକଙ୍କ ସୁରକ୍ଷା ନେଇ ଆମେ ଆଙ୍ଗୀକାରବଦ୍ଧ । ଏମାନଙ୍କ ଚିତ୍କାରକୁ ଆମେ ସରକାରଙ୍କ ନିକଟରେ ପହଞ୍ଚାଇବୁ । ଏମାନଙ୍କ ହକ୍‌ର ସହାୟତା ଏମାନଙ୍କୁ ନିଶ୍ଚିତ ଯୋଗାଇବୁ । ଏମାନେ ଦେଶର ସାଧାରଣ ଜନତା ନୁହଁନ୍ତି, ଏମାନେ ତ ଦେଶର ସ୍ୱାଭିମାନର ପତାକା । ଆମେ ଏହାକୁ ନୁଇବାକୁ ଦେବୁନୁ ।

ରାହୁଲ ଗାନ୍ଧୀଙ୍କ ଏହି ଟ୍ୱିଟ୍ ଏଥିପାଇଁ ଗୁରୁତ୍ୱପୂର୍ଣ୍ଣ ଯେ, ଆଜି ବି ଅର୍ଥମନ୍ତ୍ରୀ ନିର୍ମଳା ସୀତାରମଣ ଦେଶର କୃଷକ, ପ୍ରବାସୀ ଶ୍ରମିକ ଏବଂ ଗରିବଙ୍କ ପାଇଁ ଅନେକ ଘୋଷଣା କରିଛନ୍ତି । କରୋନା ଯୋଗୁଁ ଦେଶବ୍ୟାପୀ ଲାଗୁ ହୋଇଥିବା ଲକ୍‌ଡାଉନ୍ ଫଳରେ ସହରାଞ୍ଚଳରେ ରହୁଥିବା ଗରିବ ଲୋକେ ସର୍ବାଧିକ ସମସ୍ୟାର ସମ୍ମୁଖୀନ ହୋଇଛନ୍ତି । ଟଙ୍କା ଓ କାମ ନଥିବାରୁ ଶ୍ରମିକ ବର୍ଗ ବଡ଼ ସହରୁ ନିଜ ଘରକୁ ବାହୁଡ଼ିବାକୁ ବାଧ୍ୟ ହେଉଛି ।  ଏମାନଙ୍କ ପାଇଁ ସରକାର ଶ୍ରମିକ ଟ୍ରେନ୍‌ ଆରମ୍ଭ କରିଛନ୍ତି । କିନ୍ତୁ ଏହା ସତ୍ତ୍ୱେ ସଡ଼କରେ ଲୋକେ ଚାଲିଚାଲି ଯାଉଥିବା ଦେଖିବାକୁ ମିଳୁଛି ।

ନୂଆଦିଲ୍ଲୀ: କରୋନା ସଙ୍କଟକୁ ଦୃଷ୍ଟିରେ ରଖି ରାଷ୍ଟ୍ରପତି ରାମନାଥ କୋବିନ୍ଦ ଏକ ବଡ଼ ନିଷ୍ପତ୍ତି ନେଇଛନ୍ତି । ରାଷ୍ଟ୍ରପତି ଭବନରୁ ସୂଚନା ମିଳିଛି ଯେ, ରାଷ୍ଟ୍ରପତି ତାଙ୍କର ମାସକର ଦରମା ପିଏମ କେୟାର ଫଣ୍ଡକୁ ଦେଉଛନ୍ତି ଏବଂ ସେ ତାଙ୍କ ବେତନର ୩୦ ପ୍ରତିଶତ ବର୍ଷେ ପାଇଁ ଦାନ କରିବେ । ଏହା ସହିତ ଅନ୍ୟ କେତେଗୁଡ଼ିଏ ପ୍ରସ୍ତାବ ଉପରେ ମଧ୍ୟ ପ୍ରତିବନ୍ଧକ ଲଗାଯାଇଛି।

ରାଷ୍ଟ୍ରପତି ରାମନାଥ କୋବିନ୍ଦ କିଣିବେନି ନୂଆ କାର

ରାଷ୍ଟ୍ରପତି ଭବନ ପକ୍ଷରୁ ଦିଆଯାଇଥିବା ସୂଚନାରେ, ରାଷ୍ଟ୍ରପତି କୋବିନ୍ଦ ଏକ ଲିମୋଜିନ୍ କାର କିଣିବାର ପ୍ରସ୍ତାବକୁ ମଧ୍ୟ ସ୍ଥଗିତ ରଖିଛନ୍ତି । ସୂଚନା ଅନୁସାରେ ରାଷ୍ଟ୍ରପତି ରାମ ନାଥ କୋବିନ୍ଦଙ୍କ ପାଇଁ ଚଳିତ ବର୍ଷ ଏକ ନୂଆ ଲିମୋଜିନ୍ କିଣିବାକୁ ନିଷ୍ପତ୍ତି ନିଆଯାଇଥିଲା । କାରଣ ସେ ବର୍ତ୍ତମାନ ସୁଦ୍ଧା ମର୍ସିଡିଜ୍-ବେଞ୍ଜ୍ ଏସ୍ କ୍ଲାସ୍ (S600) ପୁଲମାନ୍ ଗାର୍ଡର ପୁରୁଣା ମଡେଲ୍ ବ୍ୟବହାର କରୁଛନ୍ତି । ସେଥିପାଇଁ ୨୦୨୧ ଗଣତନ୍ତ୍ର ଦିବସ ଅବସରରେ ସେ ଏକ ନୂତନ ଲିମୋଜିନ୍ କାରରେ ପ୍ୟାରେଡରେ ଆସିବାର ଥିଲା କିନ୍ତୁ କରୋନା ସଙ୍କଟ କାରଣରୁ ଏହାକୁ ବାତିଲ କରିଦିଆଯାଇଛି । କେବଳ ଏତିକି ନୁହେଁ, ରାଷ୍ଟ୍ରପତି ଭବନର କର୍ମଚାରୀଙ୍କୁ ଖର୍ଚ୍ଚ କମ୍ କରିବାକୁ ଏବଂ ବାକି ଟଙ୍କାକୁ କୋଭିଡ -୧୯ ବିରୋଧରେ ଲଢେଇ ପାଇଁ ଦାନ କରିବାକୁ  କୁହାଯାଇଛି ।

ରାଷ୍ଟ୍ରପତି ଭବନରେ ଅଧିକ ଖର୍ଚ୍ଚ ହେବ ନାହିଁ

କୋଭିଡ -୧୯ ସଙ୍କଟ ସମୟରେ ବହୁ ପଦକ୍ଷପ ନିଆଯାଉଛି । ଯେମିତିକି ଭୋଜିରେ କମ୍ ଅତିଥି, ଫୁଲର କମ୍ ବ୍ୟବହାର ସହ ଖାଦ୍ୟ ପ୍ରକାରକୁ କମାଇଦିଆଯିବାର ପଦକ୍ଷେପ ନିଆଯାଇଛି । ଏଥି ସହିତ ସାମାଜିକ ଦୂରତା ବଜାୟ ରଖିବା ଏବଂ ଖର୍ଚ୍ଚ କମାଇବା ପାଇଁ ରାଷ୍ଟ୍ରପତିଙ୍କୁ ଘରୋଇ ପରିଦର୍ଶନ କମାଇବା ଏବଂ କମ୍ କାର୍ଯ୍ୟକ୍ରମରେ ଅଂଶଗ୍ରହଣ କରିବାକୁ କୁହାଯାଇଛି । ରାଷ୍ଟ୍ରପତି ଭବନରେ କୁହାଯାଇଛି ଯେ, ଆମେ କୌଣସି ଅତିଥିଙ୍କ ସେବାରେ ସ୍ୱାଗତରେ କୌଣସି ଅଭାବ ରଖିବୁ ନାହିଁ, କିନ୍ତୁ ବର୍ତ୍ତମାନ ବେଶି ସୋ ଅଫ୍ କରାଯିବ ନାହିଁ ।

ବଢି ଚାଲିଛି କରୋନା ସଂକ୍ରମଣ

କରୋନା ଭାଇରସ୍ ସଂକ୍ରମଣ ଦ୍ରୁତ ଗତିରେ ବ୍ୟାପିବାରେ ଲାଗିଛି ଏବଂ ଗତ ୨୪ ଘଣ୍ଟା ମଧ୍ୟରେ ୩୭୨୨ ଟି ନୂତନ କରୋନା ସଂକ୍ରମଣ ରିପୋର୍ଟ ଆସିଛି ଯାହା ଦ୍ୱାରା ସଂକ୍ରମିତଙ୍କ ସଂଖ୍ୟା ୭୮୦୦୩ ରେ ପହଞ୍ଚିଛି ଏବଂ ୧୩୪ ଜଣଙ୍କର ହୋଇଛି ଯାହାଦ୍ୱାରା ମୃତ୍ୟୁ ସଂଖ୍ୟା ୨୫୪୯ରେ ପହଞ୍ଚିଛି । ସଂକ୍ରମିତଙ୍କ ସଂଖ୍ୟା ୭୮ ହଜାର ଅତିକ୍ରମ କରିବା ପରେ, ୫୦ ହଜାରରୁ ଅଧିକ ସଂକ୍ରମଣ ଥିବା ଦେଶ ତାଲିକାରେ ଭାରତ ଦ୍ୱାଦଶ ସ୍ଥାନରେ ପହଞ୍ଚିଛି ।