ଭୁବନେଶ୍ବର : ପୋଲିସ ଭୂମିକାରେ ଯୁବତୀ । ନିଜ ମୋବାଇଲ ଚୋରି ହେବାପରେ ଗାଡି ଅଟକାଇ ଜଣ ଜଣଙ୍କୁ କଲେ ଯାଞ୍ଚ । ପକେଟରେ ହାତ ପୂରାଇ କଲେ ଚେକିଂ । ପଟିଆ ଜଗନ୍ନାଥ ମନ୍ଦିର ନିକଟରେ ଆମ ବସ୍ ଯାଉଥିବା ବେଳେ ଦେଖିବାକୁ ମିଳିଛି ଏଭଳି ଘଟଣା । ସୂଚନା ମୁତାବକ ଆମ ବସ୍ ରେ ଯାଉଥିବା ବେଳେ ଜଣେ ଯୁବତୀଙ୍କ ମୋବାଇଲ ଚୋରି ହୋଇଯାଇଥିଲା । ଖୋଜାଖୋଜି କରିବା ପରେ ମଧ୍ୟ ମିଳିନଥିଲା । ତେଣୁ ଗାଡିକୁ ଅଟକାଇବା ସହ ଯାତ୍ରୀଙ୍କୁ ଯାଞ୍ଚ କରିଥିଲେ ଯୁବତୀ ଜଣଙ୍କ । ପୁରୁଷ ଓ ମହିଳା କାହାରିକୁ ଛାଡିନଥିଲେ। ଖବର ପାଇ ଇନ୍ଫୋସିଟି ଥାନା ପୋଲିସ ଘଟଣାସ୍ଥଳରେ ପହଞ୍ଚି ଗାଡିକୁ ଯିବାକୁ ଦେଇଥିଲା । ସେପଟେ ଯୁବତୀଙ୍କ ମୋବାଇଲ ଚୋରି ନେଇ ଏକ ମିସିଂ ରିପୋର୍ଟ ଥାନାରେ କରାଯାଇଛି ।

ଚମ୍ପୁଆ : କେନ୍ଦୁଝର ଚମ୍ପୁଆ NACରେ ପଶିଲା ଝାଡଖଣ୍ଡୀ ଗୋଠଛଡ଼ା ଦନ୍ତା । ଘରର ଛରକା ଭାଙ୍ଗି ଖାଇଦେଲା ଧାନ । ଗତକାଲି ଝାଡଖଣ୍ଡ ପଟୁ ବୈତରଣୀ ନଦୀ ପାର ହୋଇ ଚମ୍ପୁଆ NACର ପୋଖରିଆ ଗାଁରେ ହାତୀ ପଶି ଶ୍ରୀକାନ୍ତ ମହାନ୍ତଙ୍କ ଘରର ଝରକା ଭାଙ୍ଗିଦେଇଛି । ପରେ ଘର ଭିତରୁ ଧାନ ଖାଇ ଝାଡଖଣ୍ଡକୁ ଚାଲିଯାଇଛି । ଅଳ୍ପକେ ବର୍ତ୍ତିଯାଇଛନ୍ତି ପରିବାର ଲୋକେ । ହାତୀଟି ଏନଏସି ଭିତରେ ପଶିବାକୁ ନେଇ ଭୟଭୀତ ହୋଇପଡିଛନ୍ତି ଗ୍ରାମବାସୀ ।

ରାଜନଗର : ରାଜନଗର ବନଖଣ୍ଡ ଗହୀରମଥା ସାମୁଦ୍ରିକ ଅଭୟାରଣ୍ୟରେ ବିଶାଳ ମୃତ ତିମିକୁ ଦେଖିବା ପାଇଁ ମିଳିଛି । ମାଦେଳି କ୍ୟାମ୍ପ ନିକଟ ବେଳାଭୂମିରେ ଲାଗିଛି ୩୨ ଫୁଟ ଲମ୍ବ ୧୭ ଫୁଟ ମାଟେଇର ମୃତ ତିମି । ମୃତ୍ୟୁର କାରଣ ହୋଇନି ସ୍ପଷ୍ଟ । ବ୍ରେଡସ ପ୍ରଜାତିର ମୃତ ତିମିର ପୋଷ୍ଟମଟମ ପରେ ମୃତ୍ୟୁର କାରଣ ଜଣା ପଡିବ ବୋଲି ବନବିଭାଗ ସୂଚନା ଦେଇଛି ।

ଅନୁଗୁଳ : ହାତୀ ଆକ୍ରମଣରେ ମା ଓ ପୁଅ ମୃତ । ବିଳମ୍ବିତ ରାତିରେ ଅନୁଗୁଳ ଜିଲ୍ଲା ମଧୁପୁର ନିକଟରେ ଏଭଳି ଘଟଣା ଘଟିଛି । ଆଠମଲ୍ଲିକ ଅଞ୍ଚଳରୁ କିଛି ଲୋକ ବନ୍ତଳା ଅଞ୍ଚଳକୁ ଆସି ସେଠାରେ ରହିବା ସହ ଶ୍ରମିକ ଭାବେ କାମ କରନ୍ତି । ଏହି ମା ଓ ପୁଅ ମଧ୍ୟ ସେଠାରେ ରହୁଥିଲେ । ଗତକାଲି ରାତିରେ ସେମାନେ ମଧୁପୁର ଅଞ୍ଚଳକୁ ଦଣ୍ଡ ନାଚ ଦେଖିବାକୁ ଯାଇ ବିଳମ୍ବିତ ରାତିରେ ଘରକୁ ଫେରୁଥିଲେ । ହେଲେ ବାଟରେ ଉଭୟଙ୍କୁ ହାତୀ ଆକ୍ରମଣ କରିଥିଲା । ଘଟଣା ସ୍ଥଳରେ ହିଁ ଉଭୟଙ୍କର ମୃତ୍ୟୁ ହୋଇଥିଲା । ଖବର ପାଇ ବନ୍ତଳା ପୁଲିସ ବିଳମ୍ବିତ ରାତିରେ ଘଟଣା ସ୍ଥଳକୁ ଯାଇ ଉଭୟ ମୃତଦେହ ଜବତ କରି ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇଛି ।

ପିପିଲି : ରାସ୍ତା ପାଲଟିଛି ମରଣଯନ୍ତା। ଯାତାୟତ ପାଇଁ କଲବଲ ହେଉଛନ୍ତି ଲୋକେ।ପିପିଲି ଆନନ୍ଦ ବଜାର ଛକ ଠାରୁ ପମସରା ପର୍ଯ୍ୟନ୍ତ ରାସ୍ତାର ଅବସ୍ଥା ଅତ୍ୟନ୍ତ ଶୋଚନୀୟ। ମେଟାଲ ବାହାରିଯିବା ସହିତ ଅନେକ ଖାଲଖମାରେ ଭର୍ତ୍ତି ହୋଇଛି ରାସ୍ତା। ପ୍ରତିଦିନ ଏହି ରାସ୍ତା ଦେଇ ଗ୍ରାମବାସୀଙ୍କ ଠାରୁ ଆରମ୍ଭ କରି ସ୍କୁଲ ଓ କଲେଜ ଛାତ୍ରଛାତ୍ରୀ ଯାତାୟାତ କରିଥାନ୍ତି। ଅସରାଏ ବର୍ଷାରେ ପୋଖରୀର ଭ୍ରମ ସୃଷ୍ଟି ହେବା ସହିତ କାଦୁଅ ପଙ୍କରେ ଭର୍ତ୍ତି ହେଉଛି । ରାସ୍ତାର ଦୂରାବସ୍ଥା ଯୋଗୁଁ ପ୍ରତ୍ୟକ ଦିନ ଛୋଟ ବଡ଼ ଦୁର୍ଘଟଣା ଘଟିବା ସହ ସ୍କୁଲ ପିଲାଙ୍କ ପାଇଁ ଅନେକ ସମସ୍ୟା ସୃଷ୍ଟି ହେଉଛି। ବର୍ଷ ବର୍ଷ ବିତି ଯାଇଥିଲେ ସୁଦ୍ଧା ରାସ୍ତା ସମସ୍ୟାର ସମାଧାନ ହେଉନଥିବାରୁ ଅସନ୍ତୋଷ ପ୍ରକାଶ କରିଛନ୍ତି ଲୋକେ। ଏନେଇ ପ୍ରଶାସନ ଅବହେଳା କରୁଥିବା ଅଭିଯୋଗ ଆଣିଛନ୍ତି। ଯଥାଶୀଘ୍ର ରାସ୍ତା ମରାମତି କରାନଗଲେ ଆଗାମୀ ପଞ୍ଚାୟତ ନିର୍ବାଚନରେ ଭୋଟ ବର୍ଜନ କରିବେ ବୋଲି ଚେତାବନୀ ଦେଇଛନ୍ତି ଅଞ୍ଚଳବାସୀ।

ଭୁବନେଶ୍ବର : ଗାଦିମଡା ପୋଲିସ ବାବୁଙ୍କୁ ସରକାରୀ ଛାଟ। ଏଣିକି ଆଉ ଗୋଟିଏ ସ୍ଥାନରେ ୩ ବର୍ଷ କି ଗୋଟିଏ ଜିଲାରେ ୬ ବର୍ଷରୁ ଅଧିକ ସମୟ ରହି ପାରିବେ ନାହିଁ। ଗାଦିମଡା ଅଫିସରଙ୍କ ତାଲିକା ମାଗିଲେ ରାଜ୍ଯସରକାର। ସାଧାରଣ ପ୍ରଶାସନ ବିଭାଗ ପକ୍ଷରୁ ଜାରି ହେଲା ବିଜ୍ଞପ୍ତି। ସମସ୍ତ ଜିଲ୍ଲା SP ଓ କମିଶନରେଟ ପୋଲିସର DCPଙ୍କୁ ମଗାଗଲା ଗାଦିମଡା ଅଫିସରଙ୍କ ତାଲିକା। ଯେଉଁମାନେ ବର୍ଷ ବର୍ଷ ଧରି ଗୋଟିଏ ଜିଲ୍ଲାରେ ଥାନାରୁ ସେ ଥାନା ଘୂରି ବୁଲୁଛନ୍ତି କିମ୍ବା ହେଡ ଅଫିସ ସହ ଆଟାଚ ହୋଇ ରହି ଯାଉଛନ୍ତି ସେମାନଂକୁ ବଦଳି କରିବା ପାଇଁ ନିର୍ଦ୍ଦେଶ ଦିଆଯାଇଛି। ସେହିଭଳି ବର୍ଷ ବର୍ଷ ଧରି ଗୋଟିଏ ଗୋଟିଏ ଥାନାରୁ ବଦଳି ହେଉନଥିବା ପୋଲିସ କନଷ୍ଟେବଲ, ହାବିଲଦାର, ଡ୍ରାଇଭର୍ ଙ୍କୁ ତୁରନ୍ତ ବଦଳି କରିବାକୁ ନିର୍ଦ୍ଦେଶ ଦିଆଯାଇଛି।

ସୋର : ବାଲେଶ୍ୱର ଜିଲ୍ଲା ସିମୁଳିଆ ଥାନା ନିକଟରେ ଅଘଟଣ । ଦୁର୍ଘଟଣାରେ ମା ଓ ପୁଅଙ୍କ ମୃତ୍ୟୁ। ନୀଳଗିରି ଥାନା ଶ୍ୟାମସୁନ୍ଦରପୁର ଗ୍ରାମର ବିଜୟ ସୋରେନଙ୍କ ପରିବାର ପାରାଦୀପକୁ କାମ କରିବା ପାଇଁ ଯାଇଥିଲେ। ଚଣ୍ଡୀଖୋଲରୁ ଏକ ଆଇଚର ଯୋଗେ ୭ଜଣ ଡାଲାରେ ବସି ଆସୁଥିଲେ। ସିମୁଳିଆ ଥାନା ଜାତୀୟ ରାଜପଥ ଉପରେ ଥିବା ହମ୍ସରେ ବ୍ରେକ ମାରିଦେବାରୁ ଆଇଚର ଭିତରେ ଭର୍ତ୍ତି ଥିବା ଲୁହା ରଡ଼ ଖସି ମାଆ ଓ ପୁଅ ଉପରେ ବାଜି ଯାଇଥିଲା। ଘଟଣାସ୍ଥଳରେ ୭ଜଣଙ୍କ ମଧ୍ୟରୁ ମାଆ ଓ ପୁଅଙ୍କର ମୃତ୍ୟୁ ହୋଇଥିଲା। ଗୋୖରୀ ହେମ୍ବ୍ରମ ନାମକ ଅନ୍ୟ ଜଣେ ଯାତ୍ରୀ ଗୁରୁତର ଥିବା ଜଣାପଡିଛି।