ଉଚ୍ଚଶିକ୍ଷାରେ ଅଜବ ସମସ୍ୟା, ବଢୁଛି କଲେଜ ସଂଖ୍ୟା କିନ୍ତୁ ଲାଗି ରହିଛି ଅଧ୍ୟାପକଙ୍କ ଉତ୍କଟ ଅଭାବ

ଭୁବନେଶ୍ୱର: ବଢୁଛି କଲେଜ ସଂଖ୍ୟା । ବଢ଼ୁନି ଅଧ୍ୟାପକଙ୍କ ସଂଖ୍ୟା । ଉଚ୍ଚଶିକ୍ଷା ପ୍ରତି ଛାତ୍ରଛାତ୍ରୀଙ୍କ ଆଗ୍ରହ ବଢ଼ିବା ସହ ବଢ଼ିଛି ଡିଗ୍ରୀ କଲେଜ ସଂଖ୍ୟା । ହେଲେ ଅଧ୍ୟାପକଙ୍କ ଅଭାବ ଶିକ୍ଷାଦାନରେ ସମସ୍ୟା ସୃଷ୍ଟି କରିଛି । ଆଉ କିଛି କଲେଜରେ ଅଫିସ୍ ଷ୍ଟାଫ ଅଭାବ ଯୋଗୁ ଅଧ୍ୟାପକମାନଙ୍କୁ ପରିଚାଳନା କାମ କରିବାକୁ ପଡ଼ୁଛି । ଯେଉଁଥିପାଇଁ ଶିକ୍ଷାଦାନ ପ୍ରଭାବିତ ହେଉଛି । ତେବେ ଶିକ୍ଷକ ଅଭାବକୁ ଦୂର କରିବା ପାଇଁ ବିଧାନସଭାର ଉଚ୍ଚଶିକ୍ଷା ବିଭାଗ ଷ୍ଟାଣ୍ଡିଂ କମିଟି ଅବସର ବୟସସୀମା ବଢାଇବାକୁ ତା’ର ପଞ୍ଚମ ରିପୋର୍ଟରେ ପ୍ରସ୍ତାବ ଦେଇଥିଲା । ୬୦ ବଦଳରେ ୬୨ ବର୍ଷରେ ଅବସର ଉପରେ କମିଟି ଗୁରୁତ୍ବ ଦେଇଥିଲା । କାରଣ ଏହା ଜରିଆରେ ମୁଖ୍ୟତଃ ବ୍ଲକ ଗ୍ରାଣ୍ଟ ଓ ଗ୍ରାଣ୍ଟ-ଇନ୍-ଏଡ ପାଉଥିବା କଲେଜ ଗୁଡ଼ିକରେ ଅଧ୍ୟାପକ ଅଭାବ ଦୂର ହୋଇ ପାରିବ । ୨୦୧୮ ମସିହାରେ ଅଧ୍ୟାପକମାନଙ୍କ ଅବସର ବୟସକୁ ୬୨ରୁ ୬୫ ବର୍ଷ କରିଥିଲା ୟୁଜିସି । ଏହାକୁ ୧୮ଟି ରାଜ୍ୟ କାର୍ଯ୍ୟକାରୀ କରିଥିଲେ । ଅତିରିକ୍ତ ଆର୍ଥିକ ବୋଝ, ଅଧ୍ୟାପକମାନଙ୍କ ଯୋଗ୍ୟତା ଓ ଅନ୍ୟ ଦିଗକୁ ତର୍ଜମା କରି ଅଧ୍ୟାପକମାନଙ୍କ ଅବସର ବୟସସୀମାକୁ ୬୨ କରିବା ପାଇଁ ଉଚ୍ଚଶିକ୍ଷା ବିଭାଗ ଷ୍ଟାଣ୍ଡିଂ କମିଟି ରିପୋର୍ଟ କରିଥିଲା । ଉତ୍କଟ ହେଉଥିବା ଅଧ୍ୟାପକ ଅଭାବକୁ ଦୂର କରିବା ଦିଗରେ କମିଟିର ସୁପାରିସ କେତେଦୂର ଏହା କାର୍ଯ୍ୟକାରୀ ହୋଇଛି ସେନେଇ ରିପୋର୍ଟ ତଲବ କରାଯାଇଛି ।

୨୦୦୦ ମସିହାରେ ମାତ୍ର ୫୪୮ ଯୁକ୍ତ ତିନି କଲେଜ ଥିଲା । ଯାହା ଏବେ ୧୦୨୪ରେ ପହଁଚିଛି । ଏଥିରୁ ୫୧ଟି ସରକାରୀ କଲେଜ ହୋଇଥିବାବେଳେ ୯୭୩ଟି ବ୍ଲକଗ୍ରାଣ୍ଟ, ଗ୍ରାଣ୍ଟ-ଇନ-ଏଡ ବା ଅନୁଦାନ ଅପେକ୍ଷାରେ ଅଛନ୍ତି । ଅନେକ ସଂସ୍କୃତ ଓ ଘରୋଇ ଡିଗ୍ରୀ କଲେଜ ବି ରହିଛି । ଛାତ୍ରୀଙ୍କ ସଂଖ୍ୟା ୧.୬୯ ଲକ୍ଷରୁ ୩.୮୪ ଲକ୍ଷରେ ପହଁଚିଛି । ୨୦୦୦ ମସିହାରେ ୩.୨ ଲକ୍ଷ ଛାତ୍ରଛାତ୍ରୀ +୩ରେ ନାଁ ଲେଖାଇଥିବାବେଳେ ୨୦୨୩ରେ ଏହା ୬.୫ ଲକ୍ଷ ହୋଇଛି । ହେଲେ ଏବେ ବି ଦେଢ଼ ହଜାର ଅଧ୍ୟାପକ ପଦ ଖାଲି ପଡ଼ିଛି । ବର୍ତ୍ତମାନ ସ୍ଥିତିରେ ୬୨ ବର୍ଷରେ ଅବସର ନିଷ୍ପତ୍ତି ନିଆଗଲେ, ବହୁ ମାତ୍ରାରେ ଅଧ୍ୟାପକ ଅଭାବ ପୂରଣ କରାଯାଇପାରିବ ।

ବିଜ୍ଞାନ ଶିକ୍ଷା ପ୍ରତି ବି ଛାତ୍ରଛାତ୍ରୀଙ୍କ ଆଗ୍ରହ ବଢିଛି । ସେଥିପାଇଁ ଡିଗ୍ରୀ କଲେଜ ନଥିବା ବ୍ଲକରେ ଗୋଟିଏ ଲେଖାଏଁ ବିଜ୍ଞାନ ମହାବିଦ୍ୟାଳୟ ଖୋଲିବା ଉପରେ ବି ଗୁରୁତ୍ବ ଦେଉଛନ୍ତି ରାଜ୍ୟ ସରକାର।