spot_img
Home Blog Page 5146

ନଦୀରେ ବୁଡ଼ି ଯୁବ ବ୍ୟବସାୟୀ ନିଖୋଜ, ହତ୍ୟା କରାଯାଇଥିବା ସନ୍ଦେହ

0

ପିପିଲି: ପିପିଲି କଣ୍ଟି ପଞ୍ଚାୟତ ଅନ୍ତର୍ଗତ ଦୟାନଦୀର କାକୁଡ଼ିଆ ବାଲିଘାଟରେ ଯୁବ ବ୍ୟବସାୟୀ ନିଖୋଜ । ନିଖୋଜ ଯୁବକ ହେଲେ ଭୁବନେଶ୍ୱର ପାତ୍ରପଡ଼ାର ଅଭିନାଶ ଦାଶ। ଗତକାଲି ସାଙ୍ଗ ମାନଙ୍କ ସହ ଭୋଜି କରିବାକୁ ସେ ନିଖୋଜ ଅଛନ୍ତି।

ତେବେ ତାଙ୍କୁ ହତ୍ୟା କରାଯାଇ ଥାଇପାରେ ବୋଲି ଅଭିଯୋଗ ଆଣିଛନ୍ତି ନିଖୋଜ ଅଭିନାଶଙ୍କ ଭାଇ। ନଦୀ ଗର୍ଭରେ ଥିବା ୪୦ ଗାତ ଭିତରେ ସେ ନିଖୋଜ ହୋଇଥିବା ବେଳେ, ୧୮ ଘଣ୍ଟା ପରେ ମଧ୍ୟ ଏଯାଏଁ ମିଳିନି ପତ୍ତା। ପିପିଲି ଦମକଳ ବିଭାଗ ପକ୍ଷରୁ ଘଟଣାସ୍ଥଳରେ ଉଦ୍ଧାର କାର୍ଯ୍ୟ ଜାରି ରହିଛି।

ଦୀପାବଳି ପୂର୍ବରୁ ଦିଲ୍ଲୀରେ ଚିନ୍ତା ବଢ଼ାଇଲା ବାୟୁ ପ୍ରଦୂଷଣ; AQI ପହଞ୍ଚିଲା ୩୦୩

ନୂଆଦିଲ୍ଲୀ: ପୁଣି ଚିନ୍ତା ବଢ଼ାଇଲା ଦିଲ୍ଲୀର ବାୟୁ ପ୍ରଦୂଷଣ । ଚଳିତ ବର୍ଷ ପ୍ରଥମ ଥର ଲାଗି ବାୟୁର ଗୁଣବତ୍ତା ବ୍ୟାପକ ହ୍ରାସ ପାଇଛି । ଭାରତୀୟ ପାଣିପାଗ ବିଭାଗ ପୂର୍ବରୁ ଚେତାବନୀ ଦେଇଥିଲେ କି ମଙ୍ଗଳବାର ଏବଂ ବୁଧବାର ଦିନ ଦିଲ୍ଲୀରେ ବାୟୁ ପ୍ରଦୂଷଣର ଗୁଣବତ୍ତା ହ୍ରାସ ପାଇବ । ସେହିପରି ଭାବରେ ଆସନ୍ତା ଶନିବାର ଓ ରବିବାର ବାୟୁ ଗୁଣବତ୍ତା ଅତ୍ୟନ୍ତ ଖରାପ ହେବ ବୋଲି ଭାରତୀୟ ପାଣିପାଗ ବିଭାଗ ସମ୍ଭାବନା ରହିଛି । ତେବେ ଦିଲ୍ଲୀରେ ସାମଗ୍ରିକ ବାୟୁ ଗୁଣବତ୍ତା ବା ଏକ୍ୟୁଆଇ ୩୦୩ରେ ପହଞ୍ଚିଛି ବୋଲି ସୂଚନା ଦେଇଛି କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡ । କେବଳ ଦିଲ୍ଲୀ ନୁହେଁ, ପଡୋଶୀ ସହର ଗୁଡିକରେ ବି ଏହା ପରିଲକ୍ଷିତ ହୋଇଛି ।

ଫରିଦାବାଦରେ ଏକ୍ୟୁଆଇ ୩୦୬ ଥିବାବେଳେ ଗାଜିଆବାଦରେ ୩୩୪, ନୋଏଡାରେ ୩୦୩ ରହିଛି । ଗତ ଅକ୍ଟୋବର ୧୭ରେ ଦିଲ୍ଲୀରେ ଏକ୍ୟୁଆଇ ଥିଲା ୨୯୮  । ପ୍ରଦୂଷଣ ନିୟମାବଳୀ ଅନୁସାରେ ଏକ୍ୟୁଆଇ ୦ ରୁ ୫୦ ହେଲେ ଉତ୍ତମ । ୫୧ ରୁ ୧୦୦ ହେଲେ ସନ୍ତୋଷଜନକ । ୧୦୧ରୁ ୨୦୦ ହେଲେ ମଧ୍ୟମ । ୨୦୧ ରୁ ୩୦୦ ହେଲେ ଖରାପ । ୩୦୧ ରୁ ୪୦୦ ହେଲେ ଅତି ଖରାପ । ୪୦୧ ରୁ ୫୦୦ ହେଲେ ଅତି ଗୁରୁତର । ଗତ ଦୁଇ ଦିନ ଧରି ଏହି ପ୍ରକ୍ରିୟା ଜାରି ରହିଛି । ଦୀପାବଳି ଯୋଗୁ ପ୍ରଦୂଷଣ ବଢିବା ସହ ଏକ୍ୟୁଆଇ ଉପରମୁହାଁ ହେବ ବୋଲି ଆଶଙ୍କା ପ୍ରକାଶ ପାଇଛି । ପଡୋଶୀ ଜିଲ୍ଲାରେ ଚଳିତ ବର୍ଷ ଫାର୍ମ ନିଆଁ ଲାଗି ନଥିବା ସହ ପ୍ରବଳ ବର୍ଷ ହେବାରୁ ବାୟୁ ପ୍ରଦୂଷଣ ହ୍ରାସ ପାଇଥିଲା । ବାୟୁ ପ୍ରଦୂଷଣ ଆକଳନକାରୀ ସଂସ୍ଥା ସଫର ପକ୍ଷରୁ କୁହାଯାଇଛି ଚଳିତ ବର୍ଷ ଦୀପାବଳିରେ ୫୦ ପ୍ରତିଶତ ବାଣ ହ୍ରାସ ପାଇବା ସମ୍ଭାବନା ଥିବା ସତ୍ତ୍ବେ ଏକ୍ୟୁଆଇ ଗୁରୁତର ହେବା ଆଶଙ୍କା ରହିଛି ।

 

 

ଆଜି ମିଳିବନି ଜଗା ଦର୍ଶନ, ସିଂହଦ୍ୱାର ଓ ଚତୁଃପାର୍ଶ୍ୱରେ ୧୪୪ ଧାରା ଜାରି

ପୁରୀ : ଆଜି ପୁରୀ ଶ୍ରୀମନ୍ଦିରରେ ଭକ୍ତଙ୍କ ପାଇଁ ଜଗା ଦର୍ଶନ ବନ୍ଦ। ଦୀପାବଳି ଅବସରରେ ଆଜି ଶ୍ରୀମନ୍ଦିରରେ ସାଧାରଣ ଦର୍ଶନକୁ ବନ୍ଦ କରାଯାଇଛି। ଏହା ସହିତ ସିଂହଦ୍ୱାର ଓ ଚତୁଃପାର୍ଶ୍ୱରେ ୧୪୪ ଧାରା ଲାଗି ହୋଇଛି।

ଆଜି ପ୍ରାତଃ ୪ ଘଟିକା ସମୟରୁ ମଧ୍ୟରାତ୍ର ପର୍ଯ୍ୟନ୍ତ ଧାରା ୧୪୪ ବଳବତ୍ତର ରହିବ। ବଡ଼ବଡ଼ୁଆ ଡାକ ପାଇଁ କାଉଁରିଆ କାଠି ଜାଳିବା ବେଳେ ପ୍ରବଳ ଜନ ସମାଗମ ହେବା, ପ୍ରଦୂଷଣ ମାତ୍ରା ବୃଦ୍ଧି ଓ କୋଭିଡ କଟକଣା ଉଲ୍ଲଘଂନ ହେବାର ଆଶଙ୍କା ଥିବାରୁ ପ୍ରଶାସନ ଏଭଳି ନିଷ୍ପତ୍ତି ନେଇଛି। ଉପଜିଲ୍ଲାପାଳ ଭବତାରଣ ସାହୁ ଏହି ନିର୍ଦ୍ଦେଶନାମା ଜାରି କରିଛନ୍ତି ।

ଯବାନଙ୍କ ସହ ଦୀପାବଳି ପାଳିବେ ମୋଦି

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦୀପାବଳି ଅବସରରେ ସାରା ଦେଶବାସୀଙ୍କୁ ଶୁଭେଚ୍ଛା ଜଣାଇଛନ୍ତି । ତେବେ ଦୀପାବଳି ଅବସରରେ କୁହାଯାଉଛି କି ଆଜି ମୋଦି ଜାମ୍ମୁ କାଶ୍ମୀର ଗସ୍ତ କରିବେ । ସେଠାରେ ପ୍ରଧାନମନ୍ତ୍ରୀ ମୋଦି ସୈନିକଙ୍କ ସହ ଦୀପାବଳି ପାଳନ କରିବେ । ୨୦୧୪ରୁ ପ୍ରଧାନମନ୍ତ୍ରୀ ସବୁ ଦୀପାବଳିରେ ଯବାନଙ୍କ ସହ ପାଳନ କରୁଛନ୍ତି ।  ତେବେ ଚଳିତ ଥର ମୋଦି ରଜୌରୀ ସେକ୍ଟରରେ ଉତ୍ସବ ପାଳନ କରିବେ ।

ତେବେ ରଜୌରୀ ଗସ୍ତ ପୂର୍ବରୁ ମୋଦି ଟୁଇଟ କରିଛନ୍ତି ।  ଟୁଇଟ କରି ସେ କହିଛନ୍ତି କି ଦୀପାବଳି ଅବସରରେ ସମସ୍ତଙ୍କୁ ହାର୍ଦ୍ଦିକ ଶୁଭେଚ୍ଛା ଜଣାଇଛନ୍ତି । ଏହି ଦିନ ସମସ୍ତଙ୍କ ଜୀବନରେ ସୁଖ ଓ ସମୃଦ୍ଧି ଭରି ଦେଉ ବୋଲି କହିଛନ୍ତି ମୋଦି । କୁହାଯାଉଛି କି ପ୍ରଧାନମନ୍ତ୍ରୀ ମୋଦି ଜାମ୍ମୁ କାଶ୍ମୀର ପୁଞ୍ଚ୍ ଗସ୍ତ କରିପାରନ୍ତି । କାରଣ ଏଠାରେ ଅନେକ ଯବାନ ସହିଦ ହୋଇଛନ୍ତି । ସେହିପରି ଲଦାଖ ଗସ୍ତ କରିବା ନେଇ ମଧ୍ୟ ସମ୍ଭାବନା ରହିଛି । ଏଠାରେ ଗତ ମାସ ୧୮ ମାସ ହେଲା ଭାରତ ଓ ଚୀନ ମଧ୍ୟରେ ସୀମାକୁ ନେଇ ଉତ୍ତେଜନାପୂର୍ଣ୍ଣ ସ୍ଥିତି ଲାଗି ରହିଛି ।

୨୦୧୪ରେ ନରେନ୍ଦ୍ର ମୋଦି ପ୍ରଧାନମନ୍ତ୍ରୀ ହେଲା ପରଠାରୁ ପ୍ରତି ବର୍ଷ ଦୀପାବଳି ଯବାନମାନଙ୍କ ପାଳନ କରୁଛନ୍ତି । ୨୦୧୪ ମସିହାରେ ପ୍ରଧାନମନ୍ତ୍ରୀ ହେବା ପରେ ସେହି ବର୍ଷ ମୋଦି ସିଆଚିନରେ ଦୀପାବଳି ପାଳନ କରିଥିଲେ । ୨୦୧୫ ମସିହାରେ ପଞ୍ଜାବରେ ଯବାନମାନଙ୍କ ସହ ପାଳନ କରିଥିଲେ ଏବଂ ଏହା ପରେ ସେ ୧୯୬୫ ଓ୍ବାର ମେମୋରିଆଲ ସ୍ଥାନକୁ ଯାଇଥିଲେ । ସେହିପରି ୨୦୧୬ରେ ହିମାଚଳ ପ୍ରଦେଶର କିନ୍ନେରରେ ପାଳନ କରିଥିଲେ । ୨୦୧୭ରେ ଜୁମ୍ମୁ କାଶ୍ମୀରର ଗୁରେଜଠାରେ ଯବାନମାନଙ୍କ ସହ ଦୀପାବଳି ପାଳନ କରିଥିଲେ । ୨୦୧୮ରେ ଉତ୍ତରାଖଣ୍ଡରେ ଇଣ୍ଡୋ-ତିବ୍ବତ ସୀମା ପୋଲିସଙ୍କ ସହ, ୨୦୧୯ରେ ଏଲଓସିରେ ଓ ୨୦୨୦ରେ ଜୈସଲମେରଠାରେ ଯବାନଙ୍କ ସହ ଦୀପାବଳି ପାଳନ କରିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।

 

 

 

ଜୀବନ୍ତ ବଜ୍ରକାପ୍ତା ଉଦ୍ଧାର: ଡିଲ୍ କରୁଥିବା ବେଳେ ମାଡ଼ିବସିଲା STF

0

ବରଗଡ଼: ବରଗଡ଼ ଜିଲ୍ଲା ଘେଁସ ରେଞ୍ଜ ଜାମପାଲିରୁ ଏକ ଜୀଅନ୍ତା ବଜ୍ରକାପ୍ତା ଉଦ୍ଧାରହୋଇଛି । କ୍ରାଇମବ୍ରାଞ୍ଚ ଏସଟିଏଫ ଓ ବନ ବିଭାଗ ମିଳିତ ଚଢାଉ କରି ବଜ୍ରକାପ୍ତା ଉଦ୍ଧାର କରିଛନ୍ତି । ଏହି ମାମଲାରେ ଜଣଙ୍କୁ ଅଟକ ରଖି ପଚରାଉଚରା କରାଯାଉଛି । ଅଭିଯୁକ୍ତ ଜଣକ ହେଲେ ବରଗଡ଼ ଜମାପାଲିର ମାକୁନ ଓରଫ ବାଦଲ ବରିଆ ।

ଅଭିଯୁକ୍ତ ବଜ୍ରକାପ୍ତା ବିକ୍ରି ପାଇଁ ଡିଲ୍ କରୁଥିବା ବେଳେ, ତାକୁ କାବୁ କରିଛି ଏସଟିଏଫ୍ । ଉଦ୍ଧାର ହୋଇଥିବା ବଜ୍ରକାପ୍ତାର ଓଜନ ୮ କେଜି ୨ଶହ ଗ୍ରାମ । ତେବେ ଗତ ବର୍ଷ ମଧ୍ୟରେ ୧୯ଟି କଲରାପତରିଆ ଛାଲ, ୧୦ଟି ହାତୀ ଦାନ୍ତ, ୨ଟି ହରିଲ ଛାଲ, ୬ଟି ଜୀବନ୍ତ ବଜ୍ରକାପ୍ତା, ୧୫ ବଜ୍ରକାପ୍ତା କାତି ଜବତ ହୋଇଥିବା ବେଳେ, ୪୦ ଜଣଙ୍କୁ ଗିରଫ କରାଗଲାଣି ।

 

ମୁଖ୍ୟମନ୍ତ୍ରୀଙ୍କ ଦୀପାବଳି ଶୁଭେଚ୍ଛା, ସାବଧାନତା ଓ ସତର୍କତା ସହ ଉତ୍ସବ ପାଳନ କରିବାକୁ ଦେଲେ ପରାମର୍ଶ

ଭୁବନେଶ୍ୱର: କାଳୀପୂଜା ଓ ଦୀପାବଳି ଅବସରରେ ଶୁଭେଚ୍ଛା ଓ ଅଭିନନ୍ଦନ ଜଣାଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଆଲୋକର ପର୍ବ ସମସ୍ତଙ୍କ ଜୀବନରେ ଜୀବନରେ ସୁଖ ଓ ସମୃଦ୍ଧି ଭରିଦେଉ ବୋଲି କାମନା କରିଛନ୍ତି ନବୀନ । ଏଥିସହ ସାବଧାନତା ଓ ସତର୍କତା ବଜାୟରଖି ଉତ୍ସବ ପାଳନ କରିବାକୁ ସେ ପରାମର୍ଶ ଦେଇଛନ୍ତି।

ମୁଖ୍ୟମନ୍ତ୍ରୀ ଟ୍ୱିଟ୍ କରି ଲେଖିଛନ୍ତି, ” ‘ମା’ କାଳୀଙ୍କ ପୂଜା ଓ ଦୀପାବଳିର ପବିତ୍ର ଅବସରରେ ସମସ୍ତଙ୍କୁ ମୋର ଆନ୍ତରିକ ଶୁଭେଚ୍ଛା ଓ ଅଭିନନ୍ଦନ। ସାବଧାନତା ଓ ସତର୍କତା ବଜାୟ ରଖି ଉତ୍ସବରେ ସାମିଲ ହୁଅନ୍ତୁ। ଆଲୋକର ପର୍ବ ଦୀପାବଳି ସମସ୍ତଙ୍କ ଜୀବନରେ ସୁଖ ଓ ସମୃଦ୍ଧି ଭରିଦେଉ। ଶୁଭଦୀପାବଳି । “

ବିଜେଡି ସାଂଗଠନିକ ସଂପାଦକ ତଥା ଯାଜପୁର ବିଧାୟକ ପ୍ରଣବ ପ୍ରକାଶ ଦାସ ମଧ୍ୟ ଦୀପାବଳିର ଶୁଭେଚ୍ଛା ଜଣାଇଛନ୍ତି । ଟ୍ୱିଟ୍ କରି  ସେ ରାଜ୍ୟବାସୀଙ୍କୁ କାଳୀପୂଜା ଓ ଦୀପାବଳିର ଶୁଭେଚ୍ଛା ଓ ଅଭିନନ୍ଦନ ଜଣାଇଛନ୍ତି । ଆନନ୍ଦ ଓ ଆଲୋକର ପର୍ବ ସମସ୍ତଙ୍କ ଜୀବନକୁ ଆଲୋକିତ କରିବାକୁ କାମନା କରିଛନ୍ତି ପ୍ରଣବ।

 

ଓଡ଼ିଶା ରାଜ୍ୟପାଳ ପ୍ରଫେସର ଗଣେଶୀ ଲାଲ୍ ମଧ୍ୟ ରାଜ୍ୟବାସୀଙ୍କୁ ଦୀପାବଳି ଓ କାଳୀପୂଜାର ଶୁଭେଚ୍ଛା ଜଣାଇଛନ୍ତି । ଆଲୋକର ପର୍ବ ସମସ୍ତଙ୍କ ଜୀବନକୁ ଖୁସି ଓ ସଫଳତାରେ ପରିପୂର୍ଣ୍ଣ କରୁ ବୋଲି ସେ କହିଛନ୍ତି ।

ବୈଜ୍ଞାନିକ ଦେଲେ ଚେତାବନୀ; ୭୯ ବର୍ଷ ପରେ ଆସିବ ମହାପ୍ରଳୟ

ନୂଆଦିଲ୍ଳୀ: ଏହି ଶତାବ୍ଦୀ ଅନ୍ତ ସୁଦ୍ଧା ପୃଥିବୀରେ ଭୟଙ୍କର ବିପର୍ଯ୍ୟୟ ଘଟିବ। ଏହି କଥାକୁ ନେଇ ଏବେ ସାରା ବିଶ୍ବର ବୈଜ୍ଞାନିକ ଚିନ୍ତାରେ । ବିଜ୍ଞାନ ରିପୋର୍ଟ ପ୍ରକାଶ କରୁଥିବା ବିଶ୍ବର ସବୁଠାରୁ ବଡ଼ ମାଗାଜିନ୍ NATURE ତରଫରୁ ଏକ ସର୍ଭେ କରାଯାଇଥିଲା । ତେବେ ଏହି ସର୍ଭେ ସାଧାରଣ ଲୋକ କରିନଥିଲେ । IPCCର ଜଳବାୟୁ ରିପୋର୍ଟ କରୁଥିବା ବୈଜ୍ଞାନିକମାନେ କରିଥିଲେ ଏହି ସର୍ଭେ । IPCCର ୨୩୪ ଜଣ ବୈଜ୍ଞାନିକ ଏହି ରିପୋର୍ଟ ତିଆରି କରିଥିଲେ । ଏହି ବୈଜ୍ଞାନିକମାନେ ଚେତାବନୀ ଦେଇଛନ୍ତି କି ଯେପରି ଭାବରେ ଗ୍ଲେବାଲ ଓ୍ବାର୍ମିଂ ହେଉଛି ସେଥିପାଇଁ ୨୧୦୦ ସୁଦ୍ଧା ପୃଥିବୀରେ ଭୟଙ୍କର ପରିବର୍ତ୍ତନ ହେବ ।  ଏହା କୌଣସି ବିପର୍ଯ୍ୟୟଠାରୁ ମଧ୍ୟ କମ୍ ନୁହେଁ ବୋଲି ସେହି ବୈଜ୍ଞାନିକମାନେ କହିଛନ୍ତି । କଲମ୍ବିଆର ମେଡିଲନରେ ଅବସ୍ଥିତ ଆଣ୍ଟିକେଆ ବିଶ୍ବବିଦ୍ୟାଳୟର ଗବେଷକ ପାଓଲା ଅରିୟସ କହିଛନ୍ତି କି ବିଶ୍ବ ଦ୍ରୁତ ଗତିରେ ବଦଳୁଛି । ଆବଶ୍ୟକତା ମଧ୍ୟ ବଦଳୁଛି । ପ୍ରଦୂଷଣ ଏବଂ ତାପମାତ୍ରା ମଧ୍ୟ ଦ୍ରୁତ ଗତିରେ ବୃଦ୍ଧି ପାଉଛି । ସେହି ଅନୁସାରେ ଏଠାରେ ବଞ୍ଚିବା କଷ୍ଟସାଧ୍ୟ ହେବ । ସବୁବେଳେ ବଦଳୁଥିବା ବର୍ଷାର ପରିମାଣ ପାଇଁ ଜଳର ଅଭାବ ମଧ୍ୟ ରହିଛି । ଆଗକୁ ପରିସ୍ଥିତି ଅତ୍ୟନ୍ତ ଭୟଙ୍କର ହେବ ।

ପାଓଲା ଚେତାବନୀ ଦେଇଛନ୍ତି କି ଯେପରି ଭାବରେ ବିଶ୍ବ ତାପମାତ୍ରା ବୃଦ୍ଧି ବଢ଼ୁଛି, ସମୁଦ୍ରର ଜଳସ୍ତର ମଧ୍ୟ ସେହି ଅନୁସାରେ ବଢ଼ୁଛି । ଗ୍ଲୋବାଲ ଓ୍ବାର୍ମିଂକୁ ନେଇ ବିଶ୍ବ ନେତାମାନେ ଅଧିକ ସକ୍ରିୟ ବୋଲି ମୁଁ ଭାବୁ ନାହିଁ ବୋଲି କହିଛନ୍ତି ପାଓଲା । ବିଶ୍ବନେତା ଧୀରେ ଧୀରେ ଏହା ଉପରେ କାମ କରୁଛନ୍ତି । ଏହି ଗତିରେ କାମ କଲେ ପୃଥିବୀକୁ ରକ୍ଷା କରିପାରିବେ ନାହିଁ । ପ୍ରାକୃତିକ ବିପର୍ଯ୍ୟୟ ପାଇଁ ଲୋକମାନେ ବହୁ ପରିମାଣରେ ବିସ୍ଥାପିତ ହେଉଛନ୍ତି । ଆଇପିସିର ଜଳବାୟୁ ରିପୋର୍ଟ ଅନୁଯାୟୀ ପୃଥିବୀକୁ ବଞ୍ଚାଇବା ପାଇଁ ମଣିଷ ପାଖରେ ଆଉ ଅଧିକ ସମୟ ବାକି ନାହିଁ ।

ପାଓଲା ଅରିୟସଙ୍କ ଏହି ମନ୍ତବ୍ୟ ଉପରେ ସହମତି ପ୍ରକାଶ କରିଛନ୍ତି ଆଉ ଜଣେ ବୈଜ୍ଞାନିକ । ଗତମାସରେ ଏହି ଜଳବାୟୁ ରିପୋର୍ଟ କରିଥିବା ୨୩୩ ବୈଜ୍ଞାନିକ ସାମିଲ ହୋଇଥିଲେ । ଏମାନଙ୍କ ମଧ୍ୟରୁ ୯୨ ଜଣ ବୈଜ୍ଞାନିକ ଅର୍ଥାତ ୪୦ ପ୍ରତିଶତ ବୈଜ୍ଞାନିକ କହିଛନ୍ତି କି ୨୧୦୦ ସୁଦ୍ଧା ବିଶ୍ବ ଭୟଙ୍କର ବିପର୍ଯ୍ୟୟର ସାମ୍ନା କରିବ। ଯାହା ଫଳରେ ଅନେକ ଦେଶ ଧ୍ବଂସ ହୋଇଯିବ । ବାଦଲ ଫଟା ବର୍ଷା, ସୁନାମୀ, ଉଚ୍ଚ ତାପମାତ୍ରା , ବନ୍ୟା, ମରୁଡି ଭଳି ସମସ୍ୟା ଦ୍ବାରା ମଣିଷମାନେ ଅସୁବିଧାରେ ପଡ଼ିବେ । ଯେଉଁ ବୈଜ୍ଞାନିକମାନେ ଏହି କଥା କହିଥିଲେ ସେମାନଙ୍କ ମଧ୍ୟରୁ ୬୦ ପ୍ରତିଶତ ବୈଜ୍ଞାନିକ କହିଛନ୍ତି କି ଏହି ଶତାବ୍ଦୀର ଶେଷ ସୁଦ୍ଧା ପୃଥିବୀର ତାପମାତ୍ରା ୩ ଡିଗ୍ରୀ ବୃଦ୍ଧି ପାଇବ । ତେବେ ୮୮ ପ୍ରତିଶତ ବୈଜ୍ଞାନିକ କହିଛନ୍ତି କି ଗ୍ଲୋବଲ ଓ୍ବାର୍ମିଂ ପାଇଁ ଜଳ ପ୍ରଳୟ ଭଳି ବିପର୍ଯ୍ୟୟ ଆସିବ । ଜଳବାୟୁ ପରିବର୍ତ୍ତନ ଆଗାମୀ ପୀଢ଼ିକୁ ବହୁତ ହନ୍ତସନ୍ତ କରିବ । ଜଳବାୟୁ ପରିବର୍ତ୍ତନ ଓ ବିଶ୍ବ ତାପମାତ୍ରା ବୃଦ୍ଧି ପାଇଁ ଅନେକ ବୈଜ୍ଞାନିକ ସେମାନଙ୍କ ଜୀବନଶୈଳୀରେ ପରିବର୍ତ୍ତନ କରିଛନ୍ତି । ଜୀବନଶୈଳୀ ବଦଳାଇବା ପ୍ରସଙ୍ଗରେ ସବୁଠାରୁ ବଡ଼ ପ୍ରଶ୍ନ ହେଉଛି ସନ୍ତାନ ଜନ୍ମ ଦେବେ କି ନାହିଁ । କାରଣ ଆମେ ଆମ ପିଲାଙ୍କୁ ଭଲ ଭବିଷ୍ୟତ ଦେଇ ପାରିବୁ ନାହିଁ, ତେଣୁ ସେମାନଙ୍କ ଭବିଷ୍ୟତ ନଷ୍ଟ କରିବାକୁ ଏହି ଦୁନିଆକୁ ଆଣିବାର ଆବଶ୍ୟକତା କ’ଣ? ପ୍ରତିକ୍ରିୟା ଦେଇଥିବା ବୈଜ୍ଞାନିକଙ୍କ ମଧ୍ୟରୁ ୬୦ ପ୍ରତିଶତ ବୈଜ୍ଞାନିକ କହିଛନ୍ତି କି ଜଳବାୟୁ ପରିବର୍ତ୍ତନ ବିଷୟରେ ଚିନ୍ତା କଲାବେଳେ ସେମାନେ ଅସ୍ଥିରତା, ଦୁଃଖ ଓ ଚାପ ଅନୁଭବ କରନ୍ତି ।

ପାଓଲା ଅରିୟସ ଆହୁରି କହିଛନ୍ତି କି ଭେନେଜୁଏଲା ପରି ରାଜନୈତିକ ଅସ୍ଥିର ଦେଶରେ ଅବସ୍ଥା ଆହୁରି ଖରାପ ହେବ । ଖାଦ୍ୟ ଏବଂ ସେଠାରେ ରହିବାରେ ଏକ ବଡ଼ ସମସ୍ୟା ହେବ। ସେହିଭଳି ସେହି ଦେଶଗୁଡିକ ଏହି ବିଷୟରେ ଚିନ୍ତା କରନ୍ତୁ ଯେଉଁଠାରେ ପ୍ରତିଦିନ କିଛି ନା କିଛି ରୋଗ ବ୍ୟାପିଥାଏ । ତେବେ ଏଭଳି ସ୍ଥିତିରେ ଯଦି ପ୍ରକୃତି ସହଯୋଗ ନ କରେ ତାହାଲେ ପରିସ୍ଥିତି ଅତ୍ୟନ୍ତ ଭୟଙ୍କର ହେବ । ଆମେରିକା, ଚୀନ, ୟୁରୋପିୟାନ ୟୁନିୟନ ସମେତ ଅନେକ ଦେଶ ଗ୍ରୀନ୍ ହାଉସ ଗ୍ୟାସ ନିର୍ଗମନକୁ ହ୍ରାସ କରିବାକୁ ପ୍ରତିଶୃତି ଦେଇଛନ୍ତି ।

 

 

ଖୁବ୍ ଶୀଘ୍ର ପିଲାଙ୍କ ପାଇଁ କୋଭାକ୍ସିନକୁ ମିଳିପାରେ ‘WHO’ର ଗ୍ରୀନ ସିଗନାଲ

ନୂଆଦିଲ୍ଲୀ: କୋଭାକ୍ସିନକୁ ନେଇ ପୁଣି ଆସିପାରେ ଆଉ ଏକ ବଡ଼ ନିଷ୍ପତ୍ତି। ଖୁବ୍ ଶୀଘ୍ର ପିଲାଙ୍କୁ କୋଭାକ୍ସିନ ଦେବା ଲାଗି ବିଶ୍ୱ ସ୍ୱାସ୍ଥ୍ୟ ସଙ୍ଗଠନ ଗ୍ରୀନ ସିଗନାଲ ଦେଇପାରେ । ଏନେଇ ସଙ୍ଗଠନର ମୁଖ୍ୟ ବୈଜ୍ଞାନିକ ଡାକ୍ତର ସୌମ୍ୟା ସ୍ୱାମୀନାଥନ ସୂଚନା ଦେଇଛନ୍ତି । ଗତକାଲି ବିଶ୍ୱ ସ୍ୱାସ୍ଥ୍ୟ ସଙ୍ଗଠନ ଭାରତ ବାୟୋଟେକ ପ୍ରସ୍ତୁତ କୋଭାକ୍ସିନର ଜରୁରୀକାଳୀନ ବ୍ୟବହାର ଲାଗି ଅନୁମତି ଦେଇଥିଲା। ଏହା ଦ୍ୱାରା ସାରା ବିଶ୍ୱରେ କୋଭାକ୍ସିନର ଗ୍ରହଣୀୟତା ବଢିବା ସହ ପୃଥିବୀର କୌଣସି ଦେଶକୁ ଗଲେ ବି କୋଭାକ୍ସିନ ନେଇଥିବା ଯାତ୍ରୀମାନେ ଅସୁବିଧାର ସମ୍ମୁଖୀନ ହେବେ ନାହିଁ ।

ସେ କହିଛନ୍ତି କୋଭାକ୍ସିନକୁ ଅନୁମତି ଦେବା ଲାଗି ‘ହୁ’ ଅନେକ ସମୟ ନେଇଛି। ଚୀନ ଦ୍ୱାରା ପ୍ରସ୍ତୁତ ଟିକାକୁ ‘ହୁ’ ଆଗୁଆ ଅନୁମତି ଦେଇଥିବା ପ୍ରସଙ୍ଗରେ ସେ କହିଛନ୍ତି ସାଧାରଣତଃ ଟିକାକୁ ଅନୁମତି ଦେବା ଲାଗି ୫୦ ରୁ ୬୦ ଦିନ ସମୟ ଲାଗିଥାଏ। ବେଳେ ବେଳେ ଏହା ୧୬୫ ଦିନ ହୋଇଥାଏ । ଚୀନର ସିନୋଫାର୍ମ ଓ ସିନୋଭାକ ଟିକାକୁ ୧୫୦ ଦିନ ପରେ ଅନୁମତି ଦିଆଯାଇଥିଲା। ଗର୍ଭବତୀଙ୍କ ଲାଗି କୋଭାକ୍ସିନ ନିରାପଦ କି ନାହିଁ ସେହି ପ୍ରସଙ୍ଗରେ ସ୍ୱାମୀନାଥନ କହିଛନ୍ତି, ଏବେ ବି ଏହାର ପ୍ରଭାବ ସମ୍ପର୍କରେ ଗବେଷଣା ଜାରି ରହିଛି। ଭାରତରେ ଅନେକ ଗର୍ଭବତୀ କୋଭାକ୍ସିନ ନେଇଛନ୍ତି। ଏହାର ଫଳାଫଳ ନେଇ ରିପୋର୍ଟକୁ ଅପେକ୍ଷା କରାଯାଇଛି । ସେହିପରି ଶିଶୁ ଓ ନବଜାତଙ୍କ କ୍ଷେତ୍ରରେ କୋଭାକ୍ସିନର ପ୍ରଭାବ ନେଇ ବିଭିନ୍ନ ତଥ୍ୟକୁ ସମୀକ୍ଷା କରାଯାଉଛି। ଏସଂକ୍ରାନ୍ତ ସମସ୍ତ ତଥ୍ୟ ଆସିଲେ ଖୁବ ଶୀଘ୍ର ପିଲାଙ୍କୁ ଟିକା ଦେବା ଲାଗି ପ୍ରକ୍ରିୟା ଆରମ୍ଭ ହେବ ବୋଲି ସେ କହିଛନ୍ତି।

ରାଜଧାନୀରେ ଗୁଣ୍ଡାଙ୍କ ଆତଙ୍କରାଜ, ଆପାର୍ଟମେଣ୍ଟରେ ପଶି କଲେ ପଥରମାଡ଼

ଭୁବନେଶ୍ୱର: ଭୁବନେଶ୍ୱର ଆପର୍ଟମେଣ୍ଟରେ ଯୁବକଙ୍କ ଆତଙ୍କରାଜ। ସହିଦନଗର ଥାନା ବାଙ୍କୁଆଳରେ ଥିବା ଏକ ଆପର୍ଟମେଣ୍ଟରେ ଟେକା ପଥର ମାଡ଼ କରିବା ସହ ଭଙ୍ଗାରୁଜା କରିଛନ୍ତି କିଛି ଯୁବକ। ଏନେଇ ଆପର୍ଟମେଣ୍ଟ ବାସିନ୍ଦା ଥାନାରେ ଏତଲା ଦେଇଛନ୍ତି।

ସୂଚନା ମୁତାବକ ୨ ଜଣ ଯୁବକ ଗତକାଲି ଅପରାହ୍ଣ ପ୍ରାୟ ୪ଟା ସମୟରେ ଏକ ଆପାର୍ଟମେଣ୍ଟ ଭିତରେ ପଶି ହଠାତ ଟେକା ପଥର ମାଡ଼ କରିବା ସହ ପାର୍କିଂରେ ଥିବା ସାଇକେଲ ଓ ଗାଡ଼ି ଭଙ୍ଗାରୁଜା ମଧ୍ୟ କରିଥିଲେ । କେବଳ ଏତିକି ନୁହେଁ ଆପାର୍ଟମେଣ୍ଟରେ ନିୟୋଜିତ ଥିବା ସିକ୍ୟୁରିଟି ଗାର୍ଡ଼ଙ୍କୁ ମଧ୍ୟ ମାଡ଼ ମାରିଥିବା ଅଭିଯୋଗ ହୋଇଛି । ଘଟଣା ପରେ ସେଠି ରହୁଥିବା ଲୋକମାନେ ଭୟଭୀତ ହୋଇଯାଇଛନ୍ତି ଓ ଏ ନେଇ ଥାନାରେ ଏତଲା ବି ଦେଇଛନ୍ତି ।

ସୋଶିଆଲ ମିଡିଆରେ ଏ ନେଇ ଏକ ଭିଡିଓ ବି ଭାଇରାଲ ହେଉଛି । ତେବେ ଏହି ଭିଡିଓ ଆଧାରରେ ପୋଲିସ ଏହି ଦୁଇ ଯୁବକଙ୍କୁ ଚିହ୍ନଟ କରିବା ସହ ତାଙ୍କୁ ଗିରଫ କରିବାକୁ ତଦନ୍ତ ଚଲାଇଛି। ତେବେ ଏହି ୨ ଦୁର୍ବୃତ୍ତ ଦୁଇଜଣ ସ୍ଥାନୀୟ ବାସିନ୍ଦା ହୋଇଥିବା ସନ୍ଦେହ କରାଯାଉଛି।

ଭିଜିଲାନ୍ସ ଜାଲରେ ବାଲିଗୁଡ଼ା ITDA ମୁଖ୍ୟ କିରାଣୀ, ଠିକାଦାରଙ୍କଠୁ ନେଉଥିଲେ ଲାଞ୍ଚ

କନ୍ଧମାଳ: ଭିଜିଲାନ୍ସ ଜାଲରେ କନ୍ଧମାଳ ଜିଲ୍ଲା ବାଲିଗୁଡ଼ା ITDA ମୁଖ୍ୟ କିରାଣୀ ବସନ୍ତ କୁମାର ପାଣି । ସିକ୍ୟୁରିଟି ଟଙ୍କା ଫେରାଇବା ପାଇଁ ଠିକାଦାରଙ୍କ ଠାରୁ ୬ ହଜାର ଟଙ୍କା ଲାଞ୍ଚ ନେବା ବେଳେ  ତାଙ୍କୁ ଭିଜିଲାନ୍ସ ଗିରଫ କରିଛି। ଠିକାଦାର ପଦ୍ମଚରଣ ପାଣିଗ୍ରାହୀଙ୍କ ସିକ୍ୟୁରିଟି ଟଙ୍କା ବିଭାଗରେ ଥିଲା ତେବେ ସେହି ଟଙ୍କା ଫେରସ୍ତ ପାଇଁ କିରାଣୀଙ୍କ ନିକଟକୁ ଯାଇଥିଲେ ଠିକାଦାର। ବିଲ୍ କରାଇଦେବା ପୂର୍ବରୁ ଠିକାଦାର ୨ ହଜାର ଟଙ୍କା ଦେଇଥିବା ବେଳେ ଆଉ ୬ ହଜାର ଟଙ୍କା ଦେଲେ ବିଲ୍ ହେବ ବୋଲି କିରାଣି ବସନ୍ତ ପାଣି କହିଥିଲେ।

ଗତକାଲି ବକେୟା ୬ ହଜାର ଟଙ୍କା ନେବା ବେଳେ ଫୁଲବାଣୀ ଭିଜିଲାନ୍ସ କିରାଣିଣୀ ବସନ୍ତଙ୍କୁ ଗିରଫ କରିଥିଲା । ଏହାପରେ ଫୁଲବାଣୀ ଭିଜିଲାନ୍ସ ଡିଏସପି ଅରୁଣ ନାୟକଙ୍କ ନେତୃତ୍ୱରେ ୫ ଜଣିଆ ଟିମ କିରାଣି ବସନ୍ତଙ୍କ ବାସଭବନରେ ଚଢ଼ାଉ କରିଥିଲେ। ରେଡ୍ ବେଳେ ମିଳିଛି ନଗଦ ୧୩ ଲକ୍ଷ ୨୮ ହଜାର ଟଙ୍କା ସହ ୩୦ ଗ୍ରାମରୁ ଅଧିକ ସୁନା ଗହଣା । ଆଜି ତାଙ୍କୁ କୋର୍ଟ ଚାଲାଣ କରାଯିବ ।