spot_img
Home Blog Page 5518

ରାଜନୀତିକୁ ବାଏ ବାଏ କଲେ ବାବୁଲ, ଫେସବୁକରେ ଲେଖିଲେ ଏମିତି…

ନୂଆଦିଲ୍ଲୀ : ରାଜନୀତିରୁ ସନ୍ନ୍ୟାସ ନେଲେ ବିଜେପି ନେତା ତଥା ବଲିଉଡ୍ ଗାୟକ ବାବୁଲ ସୁପ୍ରିୟୋ । ଏନେଇ ବାବୁଲ ଶନିବାର ଦିନ ଫେସବୁକ ପୋଷ୍ଟ ଜରିଆରେ ସୂଚନା ଦେଇଛନ୍ତି । ରାଜନୀତି ଛାଡିବା ସହ ସାଂସଦ ପଦରୁ ମଧ୍ୟ ଇସ୍ତଫା ଦେଇଥିବା ନେଇ ଘୋଷଣା କରିଛନ୍ତି ବାବୁଲ ସୁପ୍ରିୟୋ  । ସୋସିଆଲ ମିଡିଆରେ ବିଜେପି ନେତା ବାବୁଲ ସୁପ୍ରିୟୋ କହିଛନ୍ତି , ରାଜନୀତି ଛାଡୁଛି କିନ୍ତୁ ଅନ୍ୟ କୌଣସି ଦଳରେ ଯୋଗ ଦେବି ନାହିଁ । ସୂଚନାଯୋଗ୍ୟ ଯେ, ଆସନସୋଲରୁ ଦୁଇଥର ଲୋକସଭାକୁ ନିର୍ବାଚିତ ହୋଇଥିବା ବାବୁଲ ସୁପ୍ରିୟୋ ନିକଟରେ ସରିଥିବା ପଶ୍ଚିମବଙ୍ଗ ବିଧାନସଭା ପାଇଁ ମଧ୍ୟ ନିର୍ବାଚନ ଲଢିଥିଲେ ।

ତେବେ ବିଧାନସଭା ନିର୍ବାଚନରେ ତାଙ୍କୁ ପରାଜୟର ମୁହଁ ଦେଖିବାକୁ ମିଳିଥିଲା । ବାବୁଲ ଶନିବାର ଦିନ ରାଜନୀତିରୁ ସନ୍ନ୍ୟାସ କଥା ଘୋଷଣା କରି ଫେସବୁକରେ ଲେଖିଛନ୍ତି ଯେ, ରାଜନୀତି ଛାଡୁଛି କିନ୍ତୁ ଟିଏମସି,କଂଗ୍ରେସ କିମ୍ବା ଅନ୍ୟ କୌଣସି ରାଜନୈତିକ ଦଳରେ ଯୋଗ ଦେଉନାହିଁ । ସମାଜ ସେବା ପାଇଁ ରାଜନୀତିରେ ରହିବା କିଛି ଜରୁରୀ ନୁହେଁ । ନିକଟରେ କେନ୍ଦ୍ର ମନ୍ତ୍ରିମଣ୍ଡଳ ସଂପ୍ରସାରଣରେ ବାବୁଲଙ୍କୁ ପଦ ମିଳିନଥିଲା ।

https://www.facebook.com/BabulSupriyoOfficial/posts/4344085975634177

ସେହିପରି ୨୦୨୧ କୋଲକତା ବିଧାନସବା ନିର୍ବାଚନ ସମୟରେ ବାବୁଲ ସୁପ୍ରିୟୋଙ୍କୁ ଦଳ ବିଧାୟକ ଭାବେ ଲଢିବା ପାଇଁ ଘୋଷଣା କରିଥିଲା  । ସୂଚନା ମୁତାବକ ବାବୁଲ ସୁପ୍ରିୟୋଙ୍କ ଅନିଛା ସ୍ୱତେ ଦଳ ତାଙ୍କୁ ବିଧାୟକ ଭାବେ ଲଢିବା ପାଇଁ ଟିକେଟ ପ୍ରଦାନ କରିଥିଲା   । ବିଧାନସଭା ନିର୍ବାଚନରେ ବିପୁଳ ପରାଜୟ ହୁଅନ୍ତି ବାବୁଲ  । ସେହିପରି ନିର୍ବାଚନ ପରବର୍ତ୍ତୀ ସମୟରେ ପଶ୍ଚିମବଙ୍ଗରେ ବିଜେପି କ୍ଷମତାସୀନ ନହେଲେ ମଧ୍ୟ ବିପକ୍ଷ ଦଳ ଭାବେ ଉଭା ହୁଅ  । କିନ୍ତୁ ଏହି ସମୟରେ କେନ୍ଦ୍ରୀୟ ନେତୃତ୍ୱ ବାବୁଲଙ୍କୁ ଅଣଦେଖା କରିଥିବା ମଧ୍ୟ ଆଭାସ ମିଳେ  । ୟେଉଁଥିରେ ଅସନ୍ତୁଷ୍ଟ ରହିଥିଲେ ବିଜେପି ନେତା ବାବୁଲ ସୁପ୍ରିୟୋ  ।

ଅନ୍ୟପଟେ ପଶ୍ଚିମବଙ୍ଗରେ ବିଜେପିର ପରାଜୟକୁ ନେଇ ମଧ୍ୟ ନିଜ ପୋଷ୍ଟରେ ଉଲ୍ଲେଖ କରିଛନ୍ତି ବାବୁଲ  । ସେ କହିଛନ୍ତି ବିଜେପି ପରାଜୟକୁ ମୁଁ ସ୍ୱୀକାର କରୁଛି, ମୋର ମଧ୍ୟ କେଉଠି ନା କେଉଁଠି ତ୍ରୁଟି ରହିଛି  । ଏହା  ସହିତ ବିଜେପିର ପରାଜୟରେ ତ୍ରୁଟି ଥିବା ନେଇ ଦଳର ଶୀର୍ଷ ନେତୃତ୍ୱ ମଧ୍ୟ ଗ୍ରହଣ କରନ୍ତୁ  । ବର୍ତ୍ତମାନ ପଶ୍ଚିମବଙ୍ଗରେ ବିଜେପିର ସ୍ଥିତି ମଜଭୁତ ରହିଛି  । ବିଜେପିରେ ନେତା କମ ନାହାଁନ୍ତି  । ତେଣୁ ମୁଁ ଯଦି ରାଜନୀତିରୁ କିମ୍ବା ଦଳରୁ ବିଦାୟ ନେଉଛି, ତାହା ଦଳ ଉପରେ କୌମସି ପ୍ରଭାବ ପକାଇବ ନାହିଂ ବୋଲି କହିଛନ୍ତି ବାବୁଲ ସୁପ୍ରିୟୋ  ।

ଏଥିସହିତ ବାବୁଲ କହିଛନ୍ତି, ଯେତେବେଳେ ବିଜେପିରେ କେହି ନଥିଲେ, ସେତେବେଳେ ମୁଁ ଦଳରେ ମିଶିବା ନେଇ ନିଷ୍ପତ୍ତି ନେଇଥିଲି  । ଅନେକ ସମସ୍ୟା, ଅନେକ ଦୁସ୍ଥିତିର ସାମ୍ନା କରିବାକୁ ମୋତେ ପଡିଛି  । ଦଳକୁ କ୍ଷମତାସୀନ କରିବା ନେଇ ଅନେକ ପ୍ରୟାସ କରିଛି  । କିନ୍ତୁ ବର୍ତ୍ତମାନ ଦଳରେ ନେତା କମ ନାହାଁନ୍ତି ବୋଲି କହିଛନ୍ତି  । ବାବୁଲଙ୍କର ସୋସିଆଲ ମିଡିଆ ପୋଷ୍ଟରୁ ଏକତା ସ୍ପଷ୍ଟ ଯେ କେଉଁଠି ନା କେଉଁଠି ଦଳରେ ତାଙ୍କୁ ଅଣଦେଖା କରାଯାଇଛି  । ଏମିତିକି ସଦ୍ୟ ସମ୍ପ୍ରସାରଣ ହୋଇଥିବା କେନ୍ଦ୍ର ମନ୍ତ୍ରୀମଣ୍ଡଳରେ ମଧ୍ୟ ବାବୁଲଙ୍କୁ ସାମିଲ କରାଯାଇନଥିଲା  । ତେଣୁ ଏବଳି ସମସ୍ତ ପରିସ୍ଥିତିକୁ ଭିତ୍ତି କରି ବଲିଉଡ ଗାୟକ ତଥା ପୂର୍ବତନ କେନ୍ଦ୍ରମନ୍ତ୍ରୀ ବାବୁଲ ସୁପ୍ରିୟୋ ରାଜନୀତିକୁ ବାଏ ବାଏ କରିଛନ୍ତି  ।

 

ସେମି ଫାଇନାଲରେ ହାରିଲେ ସିନ୍ଧୁ, ଏବେବି ରହିଛି ବ୍ରୋଞ୍ଚ ଆଶା

ଟୋକିଓ : ରିଓ ଅଲମ୍ପିକ୍ସର ରୌପ୍ୟ ପଦକ ବିଜେତା ପି ଭି ସିନ୍ଧୁ ଶନିବାର ଦିନ ମହିଳା ବ୍ୟାଡମିଣ୍ଟନ ସିଙ୍ଗଲ୍ସର ସେମିଫାଇନାଲରେ ତାଇ ଜୁ ୟିଙ୍ଗଙ୍କଠାରୁ ପରାସ୍ତ ହୋଇଛନ୍ତି । ଏହା ସହିତ ଭାରତର ରୌପ୍ୟ କିମ୍ବା ସ୍ୱର୍ଣ୍ଣ ପଦକର ଆଶା ଶେଷ ହୋଇଛି । ସିନ୍ଧୁଙ୍କୁ ପରାଜୟ ସହିତ ୧୩୦ କୋଟି ଭାରତୀୟଙ୍କ ସ୍ୱର୍ଣ୍ଣ ଆଶାକୁ ଜୋରଦାର ଝଟକା ଲାଗିଛି ।
ତାଇ ଏହି ମୁକାବିଲାକୁ ୨୧-୧୮ ଓ ୨୧-୧୨ରେ ଜିତିଥିଲେ ।

ତେବେ ସିନ୍ଧୁଙ୍କ ପାଇଁ ଏବେବି ବ୍ରୋଞ୍ଚ ଜିତିବାର ଆଶା ରହିଛି । ବ୍ରୋଞ୍ଜ ପଦକ ପାଇଁ ସେ ଚୀନର ବିଙ୍ଗ୍ ଜିଆଓଙ୍କ ମୁକାବିଲା କରିବେ । ପ୍ରି କ୍ୱାର୍ଟରରେ ଡେନମାର୍କ ଓ କ୍ୱାର୍ଟରରେ ଜାପାନର ଅକାନେ ୟମାଗୁଚିଙ୍କୁ ପରାସ୍ତ କଲା ପରେ ସେମିରେ ତାଇ ଜୁ ୟିଙ୍ଗଙ୍କୁ ଭେଟିଥିଲେ ସିନ୍ଧୁ। ରବିବାର ସନ୍ଧ୍ୟାରେ ସିନ୍ଧୁ ବ୍ରୋଞ୍ଜ ପଦକ ପାଇଁ ଖେଳିବେ।
ସେମିଫାଇନାଲର ପ୍ରଥମ ଗେମରେ ସିନ୍ଧୁ ଭଲ ଆରମ୍ଭ କରିଥିଲେ । କିନ୍ତୁ ଖେଳ ଆରମ୍ଭ ହେବାର କିଛି ସମୟ ପରେ ସେ ଲୟ ହରାଇ ବସିଥିଲେ । ଖେଳ ଆରମ୍ଭର କିଛି ସମୟ ମଧ୍ୟରେ ସେ ୭-୪ରେ ଆଗୁଆ ଥିଲେ । ନେଟ୍ ସଟ୍ ଓ ସ୍ମେଶର ସେ ଜବରଦସ୍ତ ବ୍ୟବହାର କରି ସେ ୧୧-୭ରେ ଆଗୁଆ ଥିଲେ ।

ତେବେ ତାଇ ଜୋରଦାର ପ୍ରତ୍ୟାବର୍ତ୍ତନ କରିଥିଲେ । ତାଇ ସ୍କୋରକୁ ୧୩-୧୩ରେ ଡ୍ର’ କରିଥିଲେ । କିନ୍ତୁ ପରେ ତାଇ ୨୧-୧୮ ଗେମକୁ ନିଜର କରିଥିଲେ । ଦ୍ୱିତୀୟ ଗେମରେ ସିନ୍ଧୁ ଚାପରେ ଖେଳୁଥିବା ଲକ୍ଷ୍ୟ କରାଯାଇଥିଲା । ସିନ୍ଧୁଙ୍କ ଦୀଗହୀନ ସଟର ଫାଇଦା ତାଇ ନେଇଥଇଲେ । ତାଇ ୪-୪ ସ୍କୋର ପରେ ଯେଉଁ ପଏଣ୍ଟ୍ ନେବା ଆରମ୍ଭ କରିଥିଲେ ତାହାର ଚାପ ସିନ୍ଧୁଙ୍କ ଉପରେ ପଡିଥିଲା । ତାଇ ଗେମକୁ ୨୧-୧୨ରେ ଯିତିଥିଲେ । ରବିବାର ମ୍ୟାଚରେ ଯଦି ସିନ୍ଧୁ ଜିତନ୍ତି ତେବେ ଭାରତ ଖାତାକୁ ଆଉ ଏକ ବ୍ରୋଞ୍ଚ୍ ପଦକ ଆସିବ ।

ବେଳାଭୂମିରୁ ବାର ସବୁ ଖୋଲିବ, କିନ୍ତୁ ସବୁ ଦିନ ପାଇଁ ଖୋଲା ରହିବା ନିର୍ଭର କରୁଛି ଆପଣଙ୍କ ଉପରେ

ଭୁବନେଶ୍ୱର : ଅଗଷ୍ଟ ପାଇଁ ସରକାର କୋଭିଡ ଲକଡାଉନ୍ ଗାଇଡ୍ ଲାଇନ୍ ଜାରି କରିଛନ୍ତି । ଏହା ଅନୁସାରେ ପୁରା ରାଜ୍ୟରେ ସକାଳ ୬ରୁ ରାତି ୮ ପର୍ଯ୍ୟନ୍ତ ଦୋକାନ, ବଜାର ଖୋଲା ରହିବ । ସବୁଠାରୁ ବଡ କଥା ହେଉଛି ସରକାର ସିନେମା ହଲ, ସି-ବିଚ୍ , ବାର ଓ ଯାତ୍ରା ଭଳି କାର୍ଯ୍ୟକ୍ରମକୁ ଅନୁମତି ଦେଇଛନ୍ତି । ଏହି ଅନୁମତି ସହିତ ରହିଛି ସର୍ତ୍ତ । ସର୍ତ୍ତ ଅନୁସାରେ ଲୋକ ଯଦି ସି-ବିଚକୁ ଯିବେ ତେବେ କରୋନା ଗାଇଡ୍ ଲାଇନ୍ ମାନି ସାମାଜିକ ଦୂରତା ବଜାୟ ରଖି ଭ୍ରମଣ କରିପାରିବେ । ସେହିଭଳି ସିନେମା ହଲ ଓ ଯାତ୍ରାକୁ ମଧ୍ୟ କଟକଣା ଭିତରେ ଖୋଲିବାକୁ ଅନୁମତି ମିଳିଛି ।

ସିନେମା ହଲ ନିଜ ମୋଟ୍ ସିଟ୍ କ୍ଷମତାର ୫୦ ପ୍ରତିଶତ ହିଁ ବିକ୍ରି କରିପାରିବେ । ଏହା ସହିତ ସେମାନଙ୍କୁ ସିଟ୍ ସିଟ୍ ମଧ୍ୟରେ ଅନ୍ତର ମଧ୍ୟ ରଖିବାକୁ ପଡିବ । ସାମାଜିକ ଦୂରତା ବଜାୟ ରଖିବାକୁ ଏହା ଜରୁରୀ । ପୁଣି ସରକାର ଏହା ମଧ୍ୟ କହିଛନ୍ତି ଯେ, ସିନେମା ଦେଖିବାକୁ ଯାଉଥିବା ପ୍ରାପ୍ତବୟସ୍କ ଯେମିତି କରୋନା ଟିକାର ଦୁଇ ଡୋଜ୍ ନେଇଥିବେ । ଦୁଇ ଡୋଜ୍ ଟିକା ନେଇଛନ୍ତି ବୋଲି ଦର୍ଶକଙ୍କୁ ପ୍ରମାଣପତ୍ର ଦେଖାଇବାକୁ ପଡିବ । ଆଉ ଏହି ପ୍ରମାଣ ପତ୍ର ଯାଂଚ୍ କରିବା ଦାୟିତ୍ୱ ହେଉଛି ସିନମା ହଲ କର୍ତ୍ତୁପକ୍ଷଙ୍କର । ସେହିପରି ବାର, ଯାତ୍ରା ପାଇଁ ମଧ୍ୟ ଏହି ଭଳି ସର୍ତ୍ତ ରଖାଯାଇଛି ।

ସରକାରଙ୍କ କହିବା ହେଉଛି ରାଜ୍ୟର ୩୦ ଜିଲ୍ଲା ମଧ୍ୟରୁ ୨୭ ଜିଲ୍ଲାରେ ସଂକ୍ରମଣ ହାର ନଗଣ୍ୟ ରହିଛି । କିନ୍ତୁ ତିନୋଟି ଜିଲ୍ଲାରେ ସଂକ୍ରମଣ ହାର ଉଦବେଗଜନକ ଭାବେ ବଢୁନଥିଲେ ମଧ୍ୟ ବଢୁଛି । ଯାହାର ଅର୍ଥ ହେଉଛି ଏହି ତିନି ଜିଲ୍ଲାରେ ଏବେ ମଧ୍ୟ ଲୋକ କରୋନା ପ୍ରୋଟୋକଲକୁ ମାନୁ ନାହାନ୍ତି । ଯେଉଁଥିପାଇଁ ସଂକ୍ରମଣ ହାର କମିବା ପରିବର୍ତ୍ତେ ବଢୁଛି । ଜୀବନ ଓ ଜୀବିକା ମଧ୍ୟରେ ସାମଞ୍ଜସ୍ୟ ରଖିବାକୁ ସରକାର ଅନଲକ ପ୍ରକ୍ରିୟା ଆରମ୍ଭ କରିଛନ୍ତି । ଯାହା ଜରୁରୀ ମଧ୍ୟ ଥିଲା । ତେବେ କଥା ହେଉଛି ତୃତୀୟ ପ୍ରବାହର ଭୟ । ବିଶ୍ୱର ଅନେକ ଦେଶରେ କରୋନା ସଂକ୍ରମଣର ତୃତୀୟ ପ୍ରବାହ ଆରମ୍ଭ ହେଲାଣି ବୋଲି ବିଶେଷଜ୍ଞ କହିଲେଣି । ଏମିତିରେ ଅନଲକ୍ ଭିତରେ ସତର୍କ ରହିବାର ଆବଶ୍ୟକତା ରହିଛି । କାରଣ ଆଗରୁ ମଧ୍ୟ ଆମେ ଅନଲକରୁ ପୁଣି ଲକଡାଉନ୍ ଭିତରକୁ ଆସିଛେ ।

ପ୍ରଥମ ଲକଡାଉନ୍ ପରେ ଆରମ୍ଭ ହୋଇଥିଲା ଅନଲକ୍ ପ୍ରକ୍ରିୟା । କିନ୍ତୁ ଭାରତର ପ୍ରାୟ ସବୁ ରାଜ୍ୟରେ ଲୋକ ଭାବିନେଇଥିଲେ ଯେ, କରୋନା ଚାଲିଗଲା । ଏହାପରେ ଲୋକଙ୍କ ମଧ୍ୟରେ ନା ରହିଥିଲା ସାମାଜିକ ଦୂରତା ନା କରୋନା ପ୍ରତି ଭୟ । ଯାହାର ପରିଣାମ ଥିଲା ଦ୍ୱିତୀୟ ପ୍ରବାହ । ଯାହା ଭାରତର ଅନେକ ରାଜ୍ୟରେ ଆତଙ୍କଜନକ ସ୍ଥିତି ସୃଷ୍ଟି କରିଥିଲା । ଓଡ଼ିଶା ଯଦିଓ ଅକ୍ସିଜେନ୍ ଅଭବାରୁ ବର୍ତ୍ତିଯାଇଥିଲା ତେବେ ମଧ୍ୟ ଦିଲ୍ଲୀ ଭଳି ରାଜ୍ୟରେ ଯେଉଁ ପରିସ୍ଥିତି ସୃଷ୍ଟି ହୋଇଥିଲା ତା’ର ଚିତ୍ର ଏବେ ମଧ୍ୟ ମନରେ ଥିବ । ଯଦି ସେଇ ଚିତ୍ରକୁ ଆପଣ ଭୁଲି ଯାଇଛନ୍ତି ତେବେ ଜାଣନ୍ତୁ ଆପଣ ତୃତୀୟ ପ୍ରବାହ ପାଇଁ ଦାୟୀ ରହିବ ।

ସରକାର ଜୀବିକା ପାଇଁ ଅନଲକ୍ ପ୍ରକ୍ରିୟା ଆରମ୍ଭ କରିଛନ୍ତି । ବାର, ରେସ୍ତୋଁରା, ସିନେମା ହଲ ଭଳି ଅନେକ ସଂସ୍ଥାନର କର୍ମଚାରୀ ଲକଡାଉନ୍ କାରଣରୁ ଆର୍ଥିକ ଭାବେ ପ୍ରଭାବିତ ହୋଇଥିଲେ । ସେମାନଙ୍କ ଚାକିରି ଚାଲିଯାଇଥିଲା । ସରକାରଙ୍କ ନିଷ୍ପତ୍ତି ସେମାନଙ୍କ ପାଇଁ ଆଶ୍ୱସ୍ତି ଆଣିଛି । କିନ୍ତୁ ଅନଲକରୁ ପୁଣି ଗୋଟିଏ ଲକଡାଉନ୍ ଭିତରକୁ ନଯିବା ସମ୍ପୂର୍ଣ୍ଣ ଭାବେ ନାଗରିକଙ୍କ ଦାୟିତ୍ୱବୋଧ ଉପରେ ନିର୍ଭର କରୁଛି । ଯଦି ସମସ୍ତେ କୋଭିଡ୍ ଗାଇଡ୍ ଲାଇନକୁ ମାନ ଚଳନ୍ତି ତେବେ ସଂକ୍ରମଣ ହାର କମିବ ଓ ପୁଣି ଗୋଟିଏ ଲକଡାଉନର ଆବଶ୍ୟକତା ପଡିବ ନାହିଁ ।

କଳାହାଣ୍ଡିରେ ମୁଖ୍ୟ ଶାସନ ସଚିବ ଓ 5T ସଚିବ, ସମୀକ୍ଷା କଲେ ବିଭିନ୍ନ ଉନ୍ନୟନ ମୂଳକ କାର୍ଯ୍ୟ

କଳାହାଣ୍ଡି:  କଳାହାଣ୍ଡି ମେଡିକାଲ କଲେଜ ଓ ସମ୍ଭାବ୍ୟ ତୃତୀୟ ଲହର ପ୍ରସ୍ତୁତିର ସମୀକ୍ଷା କରିଛନ୍ତି ମୁଖ୍ୟ ଶାସନ ସଚିବ ସୁରେଶ ମହାପାତ୍ର ଓ 5T ସଚିବ ଭି.କେ ପାଣ୍ଡିଆନ୍ । ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ମୁଖ୍ୟ ଶାସନ ସଚିବ ଓ 5T ସଚିବ ଅନ୍ୟ ବରିଷ୍ଠ ଅଧିକାରୀଙ୍କ ସହ କଳାହାଣ୍ଡି ଗସ୍ତ କରି କରୋନାର ସମ୍ଭାବ୍ୟ ତୃତୀୟ ଲହରର ସଂକ୍ରମଣର ମୁକାବିଲା ନେଇ ହୋଇଥିବା ପ୍ରସ୍ତୁତିର ସମୀକ୍ଷା କରିଛନ୍ତି । ଏଥିସହ ସ୍ବାସ୍ଥ୍ୟ, ଜଳସେଚନ ଓ ଶିକ୍ଷା ସମ୍ପର୍କିତ ଜିଲ୍ଲାର ବିଭିନ୍ନ ଉନ୍ନୟନମୂଳକ ଯୋଜନାର ସମୀକ୍ଷା କରିଛନ୍ତି । ଉତକେଲା ବିମାନବନ୍ଦରରେ ପହଞ୍ଚି ବିମାନ ବନ୍ଦରର ବିକାଶ ନେଇ ସମୀକ୍ଷା କରିଛନ୍ତି । ଖୁବଶୀଘ୍ର ଭବାନୀପଟଣାରୁ ଭୁବନେଶ୍ୱର ଓ ରାୟପୁରକୁ ବାଣିଜ୍ୟିକ ଉଡାଣ ଆରମ୍ଭ ହେବ ।

ପରେ ଭବାନୀପାଟଣା ୬୫୦ ଶଯ୍ୟା ବିଶିଷ୍ଟ ମେଡିକାଲ କଲେଜ ଓ ହସ୍ପିଟାଲ ନିର୍ମାଣ କାର୍ଯ୍ୟର ସମୀକ୍ଷା କରିଛନ୍ତି । ଚଳିତ ବର୍ଷ ଡିସେମ୍ବର ସୁଦ୍ଧା ମେଡିକାଲ କଲେଜ ନିର୍ମାଣ କାର୍ଯ୍ୟ ଶେଷ ହେବ ବୋଲି ଲକ୍ଷ୍ୟ ରଖାଯାଇଛି । ବଲାଙ୍ଗୀର-କେସିଙ୍ଗା ୨୨୦ କେଭି ବିଦ୍ୟୁତ ଲାଇନ କାର୍ଯ୍ୟର ଅଗ୍ରଗତି ନେଇ ଜିଲ୍ଲାପାଳଙ୍କ ସହ ଆଲୋଚନା ସମୟରେ ମୁଖ୍ୟ ଶାସନ ସଚିବ ଓପିଟିସିଏଲ ଓ ଜଙ୍ଗଲ ବିଭାଗକୁ ଏହି ପ୍ରକଳ୍ପ ପାଇଁ ଆବଶ୍ୟକ ଅନୁମତି ଶୀଘ୍ର ପ୍ରଦାନ କରିବାକୁ ନିର୍ଦ୍ଦେଶ ଦେଇଛନ୍ତି । ନିକଟରେ କାର୍ଯ୍ୟକ୍ଷମ ହୋଇଥିବା ଇନ୍ଦ୍ରାବତୀ ଜଳସେଚନ ପ୍ରକଳ୍ପ ସମ୍ପର୍କରେ ଆଲୋଚନା ସମୟରେ 5T ସଚିବ ସମସ୍ତ ହିତାଧିକାରୀ ଯେପରି ଏହାର ସୁବିଧା ପାଇବେ, ତାହା ସୁନିଶ୍ଚିତ କରିବାକୁ ନିର୍ଦ୍ଦେଶ ଦେଇଛନ୍ତି ।

ଏମ.ରାମପୁରଠାରେ ସାଣ୍ଡୁଲ ଜଳସେଚନ ପ୍ରକଳ୍ପ ଓ ଅନ୍ୟ ବୃହତ ଉଠା ଜଳସେଚନ ପ୍ରକଳ୍ପ କାର୍ଯ୍ୟ ନେଇ ମଧ୍ୟ ସମୀକ୍ଷା ହୋଇଥିଲା । ଆସନ୍ତା ୬ ମାସ ମଧ୍ୟରେ ଭବାନୀପାଟଣା ନୂଆ ବସଷ୍ଟାଣ୍ଡ କାର୍ଯ୍ୟ ଶେଷ କରିବାକୁ ଜିଲ୍ଲା ପ୍ରଶାସନକୁ ନିର୍ଦ୍ଦେଶ ଦିଆଯାଇଛି । ସେହିଭଳି ନର୍ଲା ରେଳବାଇ ଲୋକୋ ସେଡ ପ୍ରକଳ୍ପ ପାଇଁ ଜମି ଅଧିଗ୍ରହଣ ଓ ଜଙ୍ଗଲ ଅନୁମତି କାର୍ଯ୍ୟ ତ୍ବରାନ୍ବିତ କରିବାକୁ ଜିଲ୍ଲାପାଳଙ୍କୁ ନିର୍ଦ୍ଦେଶ ଦିଆଯାଇଛି । ସ୍କୁଲ ରୂପାନ୍ତରଣ କାର୍ଯ୍ୟକ୍ରମରେ ଜିଲ୍ଲାର ୨୬ଟି ହାଇସ୍କୁଲର ବିକାଶ ଦାୟିତ୍ବ ଏହାର ପୂରାତନ ଛାତ୍ର, ଶିକ୍ଷକ ଓ ଛାତ୍ରଛାତ୍ରୀମାନେ ହାତକୁ ନେଇଛନ୍ତି । ଏହିକ୍ରମରେ ମୁଖ୍ୟ ଶାସନ ସଚିବ ଓ 5T ସଚିବ ଭବାନୀପାଟଣା ବି.ଏମ. ହାଇସ୍କୁଲକୁ ଯାଇ ଶିକ୍ଷକ ଓ ଛାତ୍ରଛାତ୍ରୀଙ୍କ ସହ ଆଲୋଚନା କରିଥିଲେ ।

ଦୁଇ ଡୋଜ ଟିକା ନେଇଥିଲେ ଦେଖିପାରିବେ ସିନେମା, ନହେଲେ ଘରେ ଦେଖିବେ ଟିଭି ଓ OTT

ଭୁବନେଶ୍ୱର: ପାଖାପାଖି ଦୁଇ ମାସ ପରେ ପୁଣିଥରେ ଓଡ଼ିଶାର ଦର୍ଶକ ବଡ଼ ପରଦାର ମଜା ନେଇ ପାରିବେ । ଅନଲକ୍ ପ୍ରକ୍ରିୟା କ୍ରମରେ ରାଜ୍ୟ ସରକାର ଫିଲ୍ମହଲ  ଖୋଲିବାକୁ ଅନୁମତି ଦେଇଛନ୍ତି । ତେବେ ଏଥିପାଇଁ କିଛି ସର୍ତ୍ତ ରହିଛି । ସର୍ତ୍ତ ହେଉଛି ଫିଲ୍ମ ହଲ ଗୁଡିକ ଖୋଲିବ କିନ୍ତୁ ୫୦ ପ୍ରତିଶତ କ୍ଷମତାର ସହିତ ଖୋଲିବ । ଅର୍ଥାତ ସିନେମା ହଲ ନିଜ ମୋଟ ସିଟର ୫୦ ପ୍ରତିଶତ ଟିକେଟ୍ ହିଁ ବିକ୍ରି କରିପାରିବେ । ସିଟ୍ ସିଟ୍ ମଧ୍ୟରେ ବ୍ୟବଧାନ ରହିବ ଯେମିତି ସାମାଜିକ ଦୂରତା ବଜାୟ ରହିବ ।

ସିନେମା ହଲ ଖୋଲିବା ପାଇଁ ସରକାର ଅନୁମତି ଦେବା ସହିତ ହଲ କର୍ତ୍ତୁପକ୍ଷଙ୍କ ପାଇଁ କିଛି ଦାୟିତ୍ୱ ମଧ୍ୟ ନିର୍ଧାରିତ କରିଛନ୍ତି । ଗାଇଡ ଲାଇନ୍ ଅନୁସାରେ ଯେଉଁ ପ୍ରାପ୍ତ ବୟସ୍କ ଦର୍ଶକ ସିନେମା ହଲକୁ ଯିବେ ସେମାନଙ୍କ ପାଇଁ ଟିକାର ଦୁଇଟି ଡୋଜ୍ ନେଇଥିବା ବାଧ୍ୟତାମୂଳକ । କରୋନା ଟିକାର ଦୁଇ ଡୋଜ୍ ନେଇଥିଲେ ହିଁ ସିନେମା ହଲ ମଧ୍ୟକୁ ପ୍ରବେଶ ଅନୁମତି ମିଳିବ । ଏଥିପାଇଁ ଟିକା ପ୍ରମାଣ ପତ୍ର ଦେଖାଇବା ବାଧ୍ୟତାମୂଳକ ରହିବ ବୋଲି ସୂଚନା ଦେଇଛନ୍ତି ଏସଆରସି ପ୍ରଦୀପ ଜେନା  ।

ସେହିପରି ହଲ କର୍ତ୍ତୁପକ୍ଷ ସିନେମା ଦେଖିବାକୁ ଯାଉଥିବା ଦର୍ଶକଙ୍କ ପ୍ରମାଣପତ୍ର ଯାଂଚ୍ କରିବା ପରେ ଭିତରକୁ ପ୍ରବେଶ ଅନୁମତି ଦେବେ । ଅନ୍ୟପକ୍ଷରେ ରାଜ୍ୟ ସରକାର ମଧ୍ୟ ମୁକ୍ତାକାଶ ରଙ୍ଗମଞ୍ଚ ଓ ଯାତ୍ରା ପାଇଁ ଅନୁମତି ଦେଇଛନ୍ତି । ଯାତ୍ରା ମଧ୍ୟ ୫୦ ପ୍ରତିଶତ ସିଟ୍ କାପାସିଟିକୁ ନେଇ ଅନୁଷ୍ଠିତ ହେବ । ସିନେମା ହଲ ଓ ଯାତ୍ରା ପାଇଁ ସରକାରଙ୍କ ଅନୁମତି ଦ୍ୱାରା ଏହି କ୍ଷେତ୍ରରେ କାର୍ଯ୍ୟ କରୁଥିବା ଅନେକ ଉପକୃତ ହେବେ । ପ୍ରାୟ ଏକ ବର୍ଷରୁ ଅଧିକ ସମୟ ଧରି ଯାତ୍ରା ବନ୍ଦ ହୋଇ ପଡିଥିବାରୁ ଅନେକ କଳାକାରଙ୍କ ଆର୍ଥିକ ମେରୁଦଣ୍ଡ ଭାଙ୍ଗି ପଡିଛି । ଯାତ୍ରା ପାଇଁ ଅନୁମତି ମିଳିବା ପରେ ଯାତ୍ରା କଳାକାରଙ୍କ ମଧ୍ୟରେ ଆନନ୍ଦ ପ୍ରକାଶ ପାଇଛି । ଏଥିପାଇଁ ସେମାନେ ରାଜ୍ୟ ସରକାରଙ୍କୁ ଧନ୍ୟବାଦ ଜଣାଇଛନ୍ତି ।

ଅନଲକ ମୁହାଁ ଓଡ଼ିଶା: ଖୋଲିବ ହୋଟେଲ, ମଲ, ସି-ବିଚ୍

ଭୁବନେଶ୍ୱର: ଅଗଷ୍ଟ ଗାଇଡଲାଇନ ନେଇ ବଡ଼ ଘୋଷଣା କଲେ ଏସଆରସି ପ୍ରଦୀପ ଜେନା  । ଖୋଲିବ ପାର୍କ ଓ ବେଳାଭୂମି  । ହୋଟେଲ, ରେଷ୍ଟୁରାଣ୍ଟ ଏବଂ ରାସ୍ତାକଡ଼ ଦୋକାନ ଆଦି ଖୋଲିବା ନେଇ ଅନୁମତି ଦେଲେ ରାଜ୍ୟ ସରକାର  । କିନ୍ତୁ ରେଷ୍ଟୁରାଣ୍ଟ ଏବଂ ହୋଟେଲ ଖୋଲିବା ସହ କୋଭିଡ଼ କଟକଣା ବଳବତ୍ତର ରହିବ   । ପଚାଶ ପ୍ରତିଶତ ଗ୍ରାହକରେ ଏହି ସବୁ ଖୋଲିବାକୁ ଅନୁମତି ଦେଇଛନ୍ତି ରାଜ୍ୟ ସରକାର  ।

ଅଗଷ୍ଟ ଗାଇଡଲାଇନରେ ସପ୍ତାହିକ ହାଟ, ବଜାର ଖୋଲିବ, ସୁଇମିଂ ପୁଲ ମଧ୍ୟ ଖୋଲିବ ।  ଅଗଷ୍ଟ ୧ରୁ ସେପ୍ଟେମ୍ବର ୧ ସକାଳ ୬ ପର୍ଯ୍ୟନ୍ତ ବଳବତ୍ତର ରହିବ ଅଗଷ୍ଟ କଟକଣା  । ସେହିପରି ରାତି ୮ରୁ ସକାଳ ୬ ପର୍ଯ୍ୟନ୍ତ ସାରା ରାଜ୍ୟରେ ରାତ୍ରୀକାଳିନ କର୍ଫ୍ୟୁ ସମଗ୍ର ରାଜ୍ୟରେ ବଳବତ୍ତର ରହିବ  ।  ଭୁବନେଶ୍ୱର,କଟକ ଓ ପୁରୀରେ ଶନିବାର ରବିବାର ଦୋକାନ, ବଜାର ପୂର୍ବଭଳି  ବନ୍ଦ ରହିବ  ।

ଧାର୍ମିକ, ରାଜନୈତିକ, ସାମାଜିକ ସମାବେଶ ଉପରେ କଟକଣା ରଖିଛନ୍ତି ସରକାର  ।  ଆହାର କେନ୍ଦ୍ର ଖୋଲା ରହିବ ସମସ୍ତ ମଲ୍ ଖୋଲିବ   । ସେହିପରି ପୂର୍ବରୁ ବନ୍ଦ ରହିଥିବା  ସିନେମା ହଲ, ପ୍ରେକ୍ଷାଳୟ ଆଦି ମଧ୍ୟ ଖୋଲାଯିବ  । କିନ୍ତୁ ହଲ, ପ୍ରେକ୍ଷାଳୟ ଆଦିରେ ମଧ୍ୟ ୫୦ ପ୍ରତିଶତ କର୍ମଚାରୀରେ ଖୋଲିବ ବୋଲି ଘୋଷଣା କରିଛନ୍ତି ଏସଆରସି  ।

ସେହିପରି ରାଜନୈତିକ କାର୍ଯ୍ୟକ୍ରମ ଏବଂ ଶୋଭାଯାତ୍ରା ଉପରେ କଟକଣା ସାମାନ୍ୟ କୋହଳ ହୋଇଛି  । ଶୋଭାଯାତ୍ରା, ଶିଳାନ୍ୟାସ ଏବଂ ଅନ୍ୟାନ ରାଜନୈତିକ କାର୍ଯ୍ୟକ୍ରମ ଅଳ୍ପ ସଂଖ୍ୟକ ଲୋକଙ୍କୁ ନେଇ ଚାଲିପାରିବ  । ଏହି ସବୁ କାର୍ଯ୍ୟକ୍ରମରେ ୩୦ ଜଣରୁ ଅଧକ ଲୋକଙ୍କୁ ବାରଣ କରାଯାଇଛି  । ଯାତ୍ରା, ରଙ୍ଗମଞ୍ଚ, ପ୍ରେକ୍ଷାଳୟ ଏବଂ ସିନେମା ହଲ ଆଦି ମଧ୍ୟ କୋଭିଡ କଟକଣା ଅନୁଯାୟୀ ଖୋଲିବ ବୋଲି ଅନୁମତି ପ୍ରଦାନ କରିଛନ୍ତି ସରକାର  ।

ଇଣ୍ଡୋର, ଆମୋଦପ୍ରମୋଦ, ଓ୍ବାଟର ପାର୍କ, ମ୍ୟୁଜିୟମ, ପ୍ରତ୍ନତାତ୍ତ୍ବିକ ସ୍ଥଳୀ, ଚିଡିଆଖାନା, ଦୋଳି ଆଦି ଖୋଲାଯାଇପାରିବ । ଓଲା, ଉବେର, ଟାକ୍ସି ସେବା ଜାରି ରହିବ କିନ୍ତୁ ସିଟ ଅନୁସାରେ ଯାତ୍ରୀ ପରିବହନ ହେବ । ରାତ୍ରୀକାଳୀନ କର୍ଫ୍ୟୁ ଓ ସପ୍ତାହାନ ସଟଡାଉନରେ ପୂର୍ବ ନିର୍ଦ୍ଦେଶ ବଳବତ୍ତର ରହିବ । ସମସ୍ତ କାର୍ଯ୍ୟାଳୟ, ଦୋକାନବଜାର ଓ ପ୍ରତିଷ୍ଠାନ ବନ୍ଦ ରହିବ ।

ପୋଲିସ, ସରକାରୀ କର୍ମଚାରୀ, ସ୍ବଚ୍ଛତାରେ ନିୟୋଜିତ କର୍ମଚାରୀ, ବିମାନବନ୍ଦର, ପରିବହନ ସେବାରେ ନିୟୋଜିତ କର୍ମଚାରୀଙ୍କ ଲାଗି କଟକଣା ରହିବ ନାହିଁ । ଔଷଧ ଦୋକାନ, ଯାତ୍ରୀ ପରିବହନ ସେବା ଜାରି ରହିବ । ବସଷ୍ଟାଣ୍ଡ, ବିମାନବନ୍ଦର ଓ ରେଳଷ୍ଟେସନକୁ ଯାଉଥିବା ଗାଡି ଚଳାଚଳ କରିପାରିବ । ଏଲପିଜି, ପେଟ୍ରୋଲ ପମ୍ପ ଆଦି ଖୋଲା ରହିବ । ମାଛ, ମାଂସ, ଅଣ୍ଡା, ଗ୍ରୋସରୀର ହୋମ ଡେଲିଭରି କରାଯାଇପାରିବ । ସ୍ବିଗି, ଜମାଟୋ ଖାଦ୍ୟର ହୋମଡେଲିଭରି କରିପାରିବେ ।

ଏମିତି ମାଆ: ଆମଙ୍କୁ ଅତ୍ୟାଚାର କରୁଛି, ପରପୁରୁଷଙ୍କୁ ଘରକୁ ଆଣୁଛି

ଭୁବନେଶ୍ୱର: ନିଜର ପିଲାଙ୍କୁ ସୁରକ୍ଷା ଦିଏ ମାଆ  । ପିଲାଙ୍କ ରକ୍ଷା କବଚ ସାଜେ ଜନ୍ମଦାତ୍ରୀ  । କିନ୍ତୁ ରାଜଧାନୀ ଭୁବନେଶ୍ୱରରୁ ଏମିତି ଏକ ଅଭିଯୋଗ ଆସିଛି  । ଯାହା ସତ ହୋଇଥିଲେ ମାଆ ଭଳି ଏକ ପବିତ୍ର ନାମରେ ସୃଷ୍ଟି କରିବ କଳଙ୍କିତ ଅଧ୍ୟାୟ  । ଖୋଦ ମାଆ ନାମରେ ଏତଲା ଧରି ଚନ୍ଦ୍ରଶେଖରପୁର ଥାନାରେ ଫେରାଦ ହୋଇଛନ୍ତି ପୁଅ- ଝିଅ   । ଏତଲାରେ ଯାହା ଲେଖା ହୋଇଛି, ଅର୍ଥାତ ନିଜ ପୁଅ-ଝିଅ ଯେଉଁ ଅଭିଯୋଗ ଆଣିଛନ୍ତି ମାଆ ତାହା ସାଙ୍ଘାତିକ  ।

ନିଜ ଜନ୍ମ କଲା ପିଲାଙ୍କୁ ମାଆ ଅତ୍ୟାଚାର କରୁଛି  । ପର ପୁରୁଷଙ୍କ ସହ ସମ୍ପର୍କ ରଖିବା ସହ ନିଜ ପିଲାଙ୍କ ପ୍ରତି ବିପଦ ସୃଷ୍ଟି କରୁଛି  । ଏମିତିକି ନିଶାସକ୍ତ ଯୁବକ ମାନେ ମାଆ ସହ ସମ୍ପର୍କ ରଖି ଘରେ ଥିବା ଝିଅ ସହ ଅଶ୍ଲୀଳ ଇଙ୍ଗିତ କରିବାକୁ ବାଧ୍ୟ କରୁଥିବା ଅଭିଯୋଗ ହୋଇଛି  । ଝିଅର ଅଭିଯୋଗ ହେଉଛି, ନିଶାସକ୍ତ ଯୁବକ ଚନ୍ଦନ ନାମକ ଜଣେ ବ୍ୟକ୍ତି ମାଆଙ୍କୁ ମଦ ପିଆଇ ବେହୋସ କରିବା ପରେ, ମୋ ଦେହକୁ ଛୁଇଁବାକୁ ଚେଷ୍ଟା କରିଛି   ଏବଂ ମୋ ସମ୍ବେଦନଶୀଳ ଅଙ୍ଗକୁ ଛୁଇଁବାକୁ ଚେଷ୍ଟା କରନ୍ତି  ।

ସେହିପରି  ବିୟର ଫ୍ୟାକ୍ଟରୀରେ କାମ କରୁଥିବା ଅନ୍ୟଜଣେ ଯୁବକ ସଂଗ୍ରାମ ନାମକ ବ୍ୟକ୍ତି ମୋ ମାଆକୁ ନିଦ ବଟିକା ଖୁଆଇ, ମୋତେ ଧର୍ଷଣ କରିବାକୁ ଉଦ୍ୟମ କରିଥିବା ମଧ୍ୟ କହିଛନ୍ତି ଅଭିଯୋଗକାରୀ ଝିଅ  । ମାଆ ଅନେକ ସମୟରେ ଆମକୁ ଅତ୍ୟାଚାର କରନ୍ତି  । ନିଜେ ଖରାପ କାମ କରିବା ସହ ତାଙ୍କ ସହ ଆସୁଥିବା ବ୍ୟକ୍ତିମାନେ ମୋ ସହ ମଧ୍ୟ ଖରାପ କାମ କରିବାକୁ ଚେଷ୍ଟା କରନ୍ତି  । କିନ୍ତୁ ଏସବୁର କୌଣସି ପ୍ରତିବାଦ ମାଆ କରେ ନାହିଁ ବୋଲି କହିଛନ୍ତି ଅବିଯୋଗକାରୀ ଝିଅ  ।

ଆନ୍ଧ୍ର ଚିଙ୍ଗୁଡ଼ି ଫାର୍ମରେ ୬ ଓଡ଼ିଆ ଶ୍ରମିକଙ୍କ ମୃତ୍ୟୁ ଘଟଣା: ମାନବାଧିକାର କମିଶନଙ୍କ ନିକଟରେ ମାମଲା ରୁଜୁ

ହାଇଦ୍ରବାଦ: ଆନ୍ଧ୍ର ଚିଙ୍ଗୁଡ଼ି ଫାର୍ମରେ ୬ ଓଡ଼ିଆ ଶ୍ରମିକ ଜୀବନ୍ତ ଦଗ୍ଧ ଘଟଣା । ଜାତୀୟ ମାନବାଧିକାର କମିଶନରେ ମାମଲା ରୁଜୁ । ମାମଲା ରୁଜୁ କଲେ ମାନବାଧିକାର କର୍ମୀ ଦିଲ୍ଲୀପ ଦାସ । ମୃତକଙ୍କ ପରିବାରକୁ ୧୫ ଲକ୍ଷ କ୍ଷତିପୂରଣ ଦାବି । ଶିଶୁ ଶ୍ରମିକ ଆଇନ ଉଲ୍ଲଙ୍ଘନକାରୀ ମାଲିକଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଦାବି । ମୃତକଙ୍କ ମଧ୍ୟରେ ୪ ଜଣ ଓଡ଼ିଆ ନାବାଳକ ଥିବା ସୂଚନା ।

ସୂଚନା ଥାଉ କି, ଆନ୍ଧ୍ର ପ୍ରଦେଶର ରାମ୍ପଲିରେ ଏକ ଚିଙ୍ଗୁଡ଼ି ଫ୍ୟାକ୍ଟ୍ରିରେ ବିଦ୍ୟୁତ୍ ସର୍ଟ ସର୍କିଟ୍‌ ହୋଇ ୬ ଜଣ ଓଡ଼ିଆ ଶ୍ରମିକଙ୍କ ମୃତ୍ୟୁ ଘଟିଛି। ସେମାନେ ସମସ୍ତେ ରାୟଗଡ଼ା ଜିଲ୍ଲା ଗୁଣପୁର ଅଞ୍ଚଳର ବୋଲି ଜଣାପଡ଼ିଛି। ମୃତ ୬ ଜଣ ରାମମୂର୍ତ୍ତି, କିରଣ, ମନୋଜ, ପାଣ୍ଡାବୋ, ମହେନ୍ଦ୍ର ଏବଂ ନବୀନ । ମୃତକଙ୍କ ମଧ୍ୟରୁ ଜଣେ ଗୁଣପୁରର ହୋଇଥିବା ବେଳେ ୩ ଜଣ ତାରମାଳର ଓ ୨ ଜଣ ଫୁଲଫୁଟି ଗାଁର। ଗୁରୁବାର ରାତିରେ ଏହି ଚିଙ୍ଗୁଡ଼ି ଫ୍ୟାକ୍ଟ୍ରିରେ ୨୫ରୁ ୩୦ ଜଣ ଶ୍ରମିକ ଶୋଇଥିଲେ। ଏହି ସମୟରେ ସର୍ଟ ସର୍କିଟ୍ ହୋଇଥିଲା ଓ ଫ୍ୟାକ୍ଟ୍ରି ପରିସରରେ ଥିବା କିଛି ବର୍ଜ୍ୟବସ୍ତୁ ଜଳି ଯାଇଥିଲା। ଏହାର ପ୍ରଭାବରେ ଘଟଣାସ୍ଥଳରେ ୬ ଜଣଙ୍କର ମୃତ୍ୟୁ ଘଟିଥିବା ବେଳେ ଆଉ ୪ ଜଣ ଆହତ ହୋଇଛନ୍ତି। ଆହତମାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି।

ଏଥିସହିତ ପଢ଼ନ୍ତୁ: ରାଜଧାନୀ ଭୁବନେଶ୍ୱରରେ ଶତ ପ୍ରତିଶତ ଟିକାକରଣ: ଆଜିଠାରୁ ବନ୍ଦ ହେବ ଡ୍ରାଇଭ୍ ଇନ୍ ଭ୍ୟାକ୍ସିନ୍ ସେଣ୍ଟର

 

ରାଜ୍ୟସଭା ଅଧ୍ୟକ୍ଷଙ୍କ ବିରୋଧରେ ଆସନ୍ତା ସପ୍ତାହରେ ଅବିଶ୍ୱାସ ପ୍ରସ୍ତାବ ଆଣି ପାରନ୍ତି ବିରୋଧି ଦଳ

ନୂଆଦିଲ୍ଲୀ: ସଂସଦ ଅଧିବେଶନ ଆରମ୍ଭ ହୋଇ ଦୁଇ ସପ୍ତାହ ହୋଇ ସାରିଥିଲେ ମଧ୍ୟ ପେଗାସସ ପ୍ରସଙ୍ଗକୁ ନେଇ ସଂସଦ ଠିକ୍ ଭାବେ କାମ କରିପାରୁନାହିଁ । ଏହାରି ଭିତରେ ଖବର ଆସୁଛି ଯେ, ବିରୋଧି ଦଳ ଏକାଠି ହୋଇ ଆସନ୍ତା ସପ୍ତାହରେ ରାଜ୍ୟସଭା ଅଧ୍ୟକ୍ଷ ଭେଙ୍କିଆ ନାଇଡୁଙ୍କ ବିରୋଧରେ ଅବିଶ୍ୱାସ ପ୍ରସ୍ତାବ ଆଣିପାରନ୍ତି । ପେଗାସସ ଓ କୃଷି ଆଇନକୁ ନେଇ ବଡ଼ ବିତର୍କ ଲାଗି ବିରୋଧି ଦଳ ଲଗାତର ଭାବେ ଦାବି କରି ଆସୁଛନ୍ତି । ଅନ୍ୟପକ୍ଷରେ ସରକାରଙ୍କ କହିବା ହେଉଛି ଜନହିତ ସହିତ ଜଡ଼ିତ ଯେକୌଣସି ପ୍ରସଙ୍ଗ ଉପରେ ଆଲୋଚନା ପାଇଁ ଆମେ ପ୍ରସ୍ତୁତ ଅଛୁ ।

ସୂଚନା ଅନୁସାରେ ଅବିଶ୍ୱାସ ପ୍ରସ୍ତାବ ଆଣିବାର ଉପକ୍ରମ ତୃଣମୂଳ କଂଗ୍ରେସ,ଡିଏମକେ ଓ କଂଗ୍ରେସ ତରଫରୁ ହେବ । ଏହି ଉଦ୍ୟମରେ ଅନ୍ୟ ଦଳ ମଧ୍ୟ ସାମିଲ ହେବାର ସମ୍ଭାବନା ରହିଛି । ବିରୋଧୀଙ୍କ ଦାବି ଯେ, ପେଗାସସ ସହିତ ଟିକା ଓ ଅନ୍ୟ ପ୍ରସଙ୍ଗ ଉପରେ ସରକାରଙ୍କୁ ନୋଟିସ ଦିଆଯାଇଛି କିନ୍ତୁ ସରକାର ବିରୋଧି ଦଳଙ୍କ ଦାବି ଉପରେ କୌଣସି ପ୍ରକାରର ଧ୍ୟାନ ଦେଉ ନାହାନ୍ତି । ସୂଚନାଯୋଗ୍ୟ ଯେ, ମୌସୁମୀ ଅଧିବେଶନ ୧୯ ଜୁଲାଇରୁ ଆରମ୍ଭ ହୋଇଛି ।

ଟିଏମସି ସାଂସଦ ଡେରିକ ଓ ବ୍ରାଏନ ସଂସଦର ଅଚଳାବସ୍ଥା ପାଇଁ କେନ୍ଦ୍ର ସରକାରଙ୍କୁ ଦାୟୀ କରିଛନ୍ତି । ଏହାରି ଭିତରେ ତୃଣମୂଳ କଂଗ୍ରେସର ଜଣେ ସାଂସଦ ଶାନ୍ତନୁ ସେନଙ୍କୁ ନିଲମ୍ବିତ କରାଯାଇଛି । ଅନ୍ୟପକ୍ଷରେ ଶାସକ ଦଳର ଅଭିଯୋଗ ଯେ, ବିରୋଧି ସଂସଦକୁ ଚଳାଇ ଦେଉନାହାନ୍ତି । ଦୁଇ ପକ୍ଷ ମଧ୍ୟରେ ଏବେ ବିଭିନ୍ନ ପ୍ରସଙ୍ଗକୁ ନେଇ ଟଣାଓଟରା ଜାରି ଥିବା ବେଳେ ଯଦି ଆସନ୍ତା ସପ୍ତାହରେ ରାଜ୍ୟସଭା ଅଧ୍ୟକ୍ଷଙ୍କ ବିରୋଧରେ ଅବିଶ୍ୱାସ ପ୍ରସ୍ତାବ ଅଣାଯାଏ ତେବେ ଗୃହ ଅବସ୍ଥା ନିଶ୍ଚିତ ଭାବେ ଉତ୍ତେଜନାପୂର୍ଣ୍ଣ ରହିବ ।

ଏଥିସହିତ ପଢ଼ନ୍ତୁ: କଳାହାଣ୍ଡି ଗସ୍ତରେ ୫-ଟି ସଚିବ: ବିଭିନ୍ନ ଉନ୍ନୟନମୂଳକ ପ୍ରକଳ୍ପର କରୁଛନ୍ତି ସମୀକ୍ଷା

ରାଜଧାନୀ ଭୁବନେଶ୍ୱରରେ ଶତ ପ୍ରତିଶତ ଟିକାକରଣ: ଆଜିଠାରୁ ବନ୍ଦ ହେବ ଡ୍ରାଇଭ୍ ଇନ୍ ଭ୍ୟାକ୍ସିନ୍ ସେଣ୍ଟର

ଭୁବନେଶ୍ୱର: ରାଜଧାନୀରେ ହେଲା ଶତ ପ୍ରତିଶତ ଟିକାକରଣ । ଜୁଲାଇ ଶେଷ ସୁଦ୍ଧା ଥିବା ଟାର୍ଗେଟ ପୂରଣ ହୋଇଛି । ବିଭିନ୍ନ ବର୍ଗରେ ମୋଟ ୯ଲକ୍ଷ ୭ହଜାର ଲୋକଙ୍କୁ ଦୁଇଟି ଡୋଜ ହିସାବରେ ୧୮ଲକ୍ଷ ୧୪ହଜାର ଡୋଜ ଦେବାକୁ ରହିଥିଲା ଲକ୍ଷ୍ୟ । ଗତକାଲି ସୁଦ୍ଧା ୧୮ଲକ୍ଷ ୩୫ହଜାର ୯୦୩ ଡୋଜ ଟିକା ଦିଆଯାଇଛି । ସେଥିମଧ୍ୟରୁ ୧୦ଲକ୍ଷ ୫୯ହଜାର ୭୫୩ ଜଣ ପ୍ରଥମ ଡୋଜ ନେଇସାରିଛନ୍ତି । ୭ଲକ୍ଷ ୭୬ହଜାର ୧୫୦ଜଣ ଉଭୟ ଡୋଜ ଟିକା ନେଇ ସାରିଛନ୍ତି । ତେବେ ଭୁବନେଶ୍ୱରରେ କୋଭକ୍ସିନ ଟିକା ଦିଆଯାଉଥିବା ବେଳେ ଏଠାରେ ଟିକାର ଅଭାବ ନାହିଁ । ବର୍ତ୍ତମାନ ମଧ୍ୟ ସମସ୍ତ ଟିକା କେନ୍ଦ୍ର ଖୋଲା ରହିଛି । ଭୁବନେଶ୍ୱର ରାଜଧାନୀ ହୋଇଥିବାରୁ ଏଠାକୁ ଦୈନିକ ବାହାରୁ ଅନେକ ଲୋକ ଆସନ୍ତି । ଟିକା ପାଇଁ କାହାକୁ ମନା କରାଯାଇପାରିବ ନାହିଁ । ଭୁବନେଶ୍ୱରବାସୀଙ୍କୁ ପ୍ରାଥମିକତା ଭିତ୍ତିରେ ଟିକା ଦିଆଯାଇଛି । ବର୍ତ୍ତମାନ ବାହାରର ଲୋକଙ୍କୁ ମଧ୍ୟ ଟିକା ଦିଆଯାଉଥିବା କହିଛନ୍ତି ବିଏମସି ଅତିରିକ୍ତ କମିଶନର ଲକ୍ଷ୍ମୀକାନ୍ତ ସେଠୀ ।

ଅନ୍ୟପକ୍ଷରେ ଆଜି ଠାରୁ ବନ୍ଦ ହେବ ଭୁବନେଶ୍ୱରର ସମସ୍ତ ୧୦ଟି ଯାକ ଡ୍ରାଇଭ ଇନ ଭେକ୍ସିନ ସେଣ୍ଟର ।  ଭୁବନେଶ୍ୱରର ବିଭିନ୍ନ ମଲ ଓ ଘରୋଇ ଅନୁଷ୍ଠାନରେ ଖୋଲା ଯାଇଥିଲା ଏହି କେନ୍ଦ୍ର । ଭୁବନେଶ୍ୱରରେ ମୋଟ ୫୫ଟି ଟିକା କେନ୍ଦ୍ରରେ ଟିକାଦାନ ବ୍ୟବସ୍ଥା କରାଯାଇଛି । ୩୦ଟି ସରକାରୀ ହସ୍ପିଟାଲ ୧୫ଟି ମୋବିଲାଇଜେସନ ସେଣ୍ଟର ଓ ଡ୍ରାଇଭ ଇନ ଭେକ୍ସିନ କେନ୍ଦ୍ର ସାମିଲ । ଆସନ୍ତା କାଲି ଠାରୁ ୪୫ଟି କେନ୍ଦ୍ରରେ ଜାରି ରହିବ ଟିକାକରଣ । ତେବେ ହାଇସ୍କୁଲ ଖୋଲି ଯାଇଥିବାରୁ ଭୁବନେଶ୍ୱରର ହାଇସ୍କୁଲ ଗୁଡିକରେ ଥିବା ଟିକା କେନ୍ଦ୍ରକୁ ସେଠାରେ ଥିବା ପ୍ରାଥମିକ ବିଦ୍ୟାଳୟକୁ ସ୍ଥାନାନ୍ତର କରାଯାଇଛି । ଶତ ପ୍ରତିଶତ ଟିକାକରଣ ସହିତ ଅନଲକ ଆଡକୁ ଆମେ ଯାଉଥିବାରୁ ତଥା ଟିକା ନେଇନଥିବା ଲୋକଙ୍କ ସଂଖ୍ୟା କମ ଥିବାରୁ ଏଭଳି ବ୍ୟବସ୍ଥା କରାଯାଇଥିବା କହିଛନ୍ତି ବିଏମସି ଜୋନାଲ ଡେପୁଟୀ କମିଶନର ଅଂଶୁମାନ ରଥ।

ଏଥିସହିତ ପଢ଼ନ୍ତୁ: ଦିନ ୩ଟା ୩୦ ମିନିଟରେ ଅଗଷ୍ଟ ଗାଇଡଲାଇନ୍ ଘୋଷଣା କରିବେ ଏସ୍ଆରସି: କୋହଳ ହୋଇପାରେ ଏହି ସବୁ ନିୟମ