ନୂଆଦିଲ୍ଲୀ: କରୋନା ଭାଇରସର ଦ୍ୱିତୀୟ ଲହର ଦେଶରେ କରାଳ ରୂପ ଦେଖାଉଛି। ଭାରତରେ ଚିହ୍ନଟ ହୋଇଥିବା B-1617 ଭାରିଆଣ୍ଟ ଦ୍ରୁତଗତିରେ ମାଡ଼ିଚାଲିଛି। ଯାହାକି ସମଗ୍ର ବିଶ୍ୱ ପାଇଁ ହୋଇଛି ଚିନ୍ତାର କାରଣ। WHO ମଧ୍ୟ ଏ ନେଇ ଚିନ୍ତା ପ୍ରକଟ କରିଛି। ତେବେ ଏହାରି ମଧ୍ୟରେ ଏକ ନୂଆ ତଥ୍ୟ ସାମ୍ନାକୁ ଆଣିଛି କାଉଁସିଲ୍ ଅଫ ସାଇନଟିଫିକ୍ ଆଣ୍ଡ ଇଣ୍ଡଷ୍ଟ୍ରିଆଲ୍ ରିସର୍ଚ୍ଚ ବା CSIR । ଯେଉଁଥିରେ କୁହାଯାଇଛି ଯେ କିଛି ନିର୍ଦ୍ଧିଷ୍ଟ ବ୍ଲଡ୍ ଗ୍ରୁପର ବ୍ୟକ୍ତିଙ୍କୁ ଏହି ଡବଲ ମ୍ୟୁଟାଣ୍ଟ ଭାଇରସ୍ ସଂକ୍ରମିତ ହେବାର ଅଧିକ ଆଶଂକା ରହିଛି। ତେବେ ଆସନ୍ତୁ ଜାଣିବା କେଉଁ ବ୍ଲଡ ଗ୍ରୁପକୁ ହେଉଛି ଅଧିକ ସଂକ୍ରମଣ ।
ସିଏସଆଇଆର ରିସର୍ଚ୍ଚରୁ ଜଣା ପଡ଼ିଛି ଯେ AB ଓ B ଲୋକମାନଙ୍କୁ କରୋନା ଅଧିକ ସଂକ୍ରମଣ ହେଉଛି । ତେଣୁ ଏମାନଙ୍କୁ ଟିକେ ସତର୍କ ରହିବା ଆବଶ୍ୟକ। ରିସର୍ଚ୍ଚ ପେପରରେ ଏହା ମଧ୍ୟ କୁହାଯାଇଛି ଯେ କରୋନାରେ ସବୁଠୁ କମ ପ୍ରଭାବିତ ହୋଇଛନ୍ତି ଓ ବ୍ଲଡ୍ ଗ୍ରୁପର ଲୋକ । ଏହି ବ୍ଲଡଗ୍ରୁପର ଲୋକ ସାଧାରଣତଃ ଆସିମ୍ପଟୋମାଟିକ ନହେଲେ ଅତି କମ୍ ଲକ୍ଷଣ ସହ ପଜିଟିଭ ହୋଇଥଆନ୍ତି। ଏହି ରିପୋର୍ଟ ସାରା ଦେଶର କରୋନା ପଜିଟିଭ ବ୍ୟକ୍ତିଙ୍କୁ ନେଇ ସର୍ଭେ ହୋଇଛି।
CSIRର ରିପର୍ଟ ଦର୍ଶାଉଛି ଯେ ଶାକାହାରୀ ଲୋକଙ୍କ ତୁଳନାରେ ଆମୀଷ ଖାଉଥିବା ବ୍ୟକ୍ତିଙ୍କ କରୋନା ସଂକ୍ରମଣ ହେବାର ଅଧିକ ଆଶଂକା ରହିଛି । ଏହା ଦେଶର ପାଖାପାଖି ୧୦ ହଜାର ଲୋକଙ୍କ ନମୁନା ଉପରେ ଆଧାରିତ । ଯାହାର ବିଶ୍ଳେଷଣ କରିଛନ୍ତି ଏକ ୧୪୦ ଜଣିଆ ଡାକ୍ତରୀ ଟିମ୍ । ଏଥିରେ ଜଣାପଡ଼ିଛି ଯେ ଆମୀଷ ଖାଉଥିବା କରୋନା ରୋଗୀଙ୍କ ସଂଖ୍ୟା ଶାକାହାରୀ ରୋଗୀଙ୍କ ଅପେକ୍ଷା ଅଧିକ। ଆଉ ଏହାର କାରଣ ହେଉଛି ଶାକାହାରୀ ଖାଦ୍ୟରେ ଆମୀଷ ଅପେକ୍ଷା ରହିଛି ଅଧିକ ଫାଇବର।
ଫାଇବର ଯୁକ୍ତ ଖାଦ୍ୟ ହେଉଛି ଏକ ଆଣ୍ଟି-ଇନ୍ଫ୍ଲାମେଟୋରୀ, ଯାହା ଶରୀରକୁ ସଂକ୍ରମଣରୁ ରକ୍ଷା କରିଥାଏ। । CSIRର ସର୍ଭେରେ କୁହାଯାଇଛି ଯେ କରୋନା ସଂକ୍ରମିତଙ୍କ ମଧ୍ୟରେ ସବୁଠୁ ଅଧିକ ମାମଲା AB ବ୍ଲଡ ଗ୍ରୁପର ଲୋକମାନେ ଅଛନ୍ତି। ଏବଂ ଏମାନେ ଅଧିକ ଗୁରୁତର ମଧ୍ୟ ହେଉଛନ୍ତି । ଏହା ତୁଳନାରେ B ବଲ୍ଡ ଗ୍ରୁପର ଲୋକମାନେ ଟିକେ କମ୍ ସଂକ୍ରମଣ ହୋଇଛନ୍ତି । ତେବେ ସବୁଠୁ କମ୍ ସଂକ୍ରମିତ ହୋଇଛନ୍ତି O ବ୍ଲଡ୍ ଗ୍ରୁପର ଲୋକମାନେ ।
ଏହି ୨ ବ୍ଲଡ୍ ଗ୍ରୁପର ଲୋକଙ୍କ ପାଇଁ କରୋନା ଅଧିକ ଘାତକ
ଆରମ୍ଭ ହେଲା ଅକ୍ସିଜେନ୍ ବ୍ୟାଙ୍କ ସେବା, ଫୋନ୍ କଲରେ ଘରେ ମିଳିବ ଅକ୍ସିଜେନ୍
ବଲାଙ୍ଗିର: ହୋମ୍ ଆଇସୋଲେସନରେ ରହୁଥିବା କୋଭିଡ୍ ସଂକ୍ରମିତଙ୍କୁ ଘରେ ମିଳିବ ଅକ୍ସିଜେନ୍ । ବଲାଙ୍ଗିରରେ ଆରମ୍ଭ ହୋଇଛି ଏଭଳି ସେବା । ବଲାଙ୍ଗିରର ବିଙ୍ଗ୍ ହ୍ୟୁମନ୍ ଫାଉଣ୍ଡେସନ ଓ ମୁମ୍ବାଇର ଜୁହାର ପରିବାର ମିଳିତ ସହଯୋଗରେ ଅକ୍ସିଜେନ୍ ବ୍ୟାଙ୍କ ସେବା ଆରମ୍ଭ ହୋଇଛି । ହୋମ୍ ଆଇସୋଲେସନରେ ଥିବା କୋଭିଡ୍ ସଂକ୍ରମିତଙ୍କୁ ଆବଶ୍ୟକ ବେଳେ ଅକ୍ସିଜେନ୍ ମିଳିବ ।
ଶ୍ରମିକ ମଙ୍ଗଳ ଭବନ ଠାରେ ବଲାଙ୍ଗିର ଜିଲ୍ଲାପାଳ ଚଞ୍ଚଳ ରାଣା ଏହାକୁ ଉଦଘାଟନ କରିଛନ୍ତି । ମହାମାରୀ କରୋନା ସଂକ୍ରମଣ ସମୟରେ ଅକ୍ସିଜେନ୍ ଏକ ପ୍ରମୁଖ ସମସ୍ୟା ଭାବେ ଉଭା ହୋଇଛି । ଏଭଳି ସମୟରେ ବିଙ୍ଗ୍ ହ୍ୟୁମାନ୍ ଫାଉଣ୍ଡେସନର ଏଭଳି ମହତ ପ୍ରୟାସକୁ ଜିଲ୍ଲାପାଳ ପ୍ରଶଂସା କରିଛନ୍ତି । ଅକ୍ସିଜେନ୍ ଲାଗି ତିନୋଟି ନମ୍ବର ଜାରି କରାଯାଇଛି । ଉକ୍ତ ନମ୍ବରରେ ଯୋଗାଯୋଗ କଲେ ତୁରନ୍ତ ଅକ୍ସିଜେନ୍ ଘରେ ପହଞ୍ଚାଇ ଦିଆଯିବ ବୋଲି ବିଙ୍ଗ୍ ହ୍ୟୁମାନ୍ ଫାଉଣ୍ଡେସନର ସଭାପତି ସୋମନାଥ ମିଶ୍ର ସୂଚନା ଦେଇଛନ୍ତି ।
ଏହାସହ ବିଙ୍ଗ୍ ହ୍ୟୁମାନ ଫାଉଣ୍ଡେସନ୍ ଭଳି ଆଉ କିଛି ସ୍ୱେଚ୍ଛାସେବୀ ସଂଗଠନ ମଧ୍ୟ ଏଭଳି ମହତ କାମରେ ଆଗେଇ ଆସିବାକୁ ଜିଲ୍ଲାପାଳ ଯୁବପିଢ଼ିଙ୍କୁ ଆହ୍ୱାନ ଦେଇଛନ୍ତି । ଉଦଘାଟନୀ ଉତ୍ସବରେ ବିଙ୍ଗ ହ୍ୟୁମାନ ଫାଉଣ୍ଡେସନର କର୍ମକର୍ତ୍ତା ସହ ସ୍ୱେଚ୍ଛାସେବୀ ମାନେ ଉପସ୍ଥିତ ଥିଲେ ।
କର୍ଣ୍ଣାଟକ ହାଇକୋର୍ଟଙ୍କ ପ୍ରଶ୍ନ, ଆପଣ ଦ୍ୱିତୀୟ ଡୋଜ୍ କେମିତି ଦେଉଛନ୍ତି ?
ବେଙ୍ଗାଲୁରୁ: ୪୫ ବର୍ଷରୁ ଅଧିକ ବ୍ୟକ୍ତିଙ୍କୁ କରୋନା ଟିକାର ଦ୍ୱିତୀୟ ଡୋଜ୍ କେମିତି ଦିଆଯାଉଛି ଓ ଏନେଇ କେନ୍ଦ୍ର ତଥା ରାଜ୍ୟ ସରକାର କ’ଣ ପଦକ୍ଷେପ ନେଇଛନ୍ତି ସେବାବଦରେ ମଙ୍ଗଳବାର ଦିନ କର୍ଣ୍ଣାଟକ ହାଇକୋର୍ଟ କେନ୍ଦ୍ର ତଥା ରାଜ୍ୟ ସରକାରଙ୍କୁ ପ୍ରଶ୍ନ କରିଛନ୍ତି।
ହାଇକୋର୍ଟ ପଚାରିଥିଲେ ଯେ, କରୋନା ଟିକାର ଦ୍ୱିତୀୟ ଡୋଜ୍ ନେଇ ସରକାରୀ ଅଧିକାରୀ କେଉଁଭଳି ପ୍ରସ୍ତାବ ଦେଉଛନ୍ତି। ଉତ୍ତରରେ ରାଜ୍ୟ ସରକାରଙ୍କ ଓକିଲ କହିଥିଲେ ଯେ, ବର୍ତ୍ତମାନ ପାଇଁ କରୋନା ଟିକାର ପ୍ରଥମ ଡୋଜକୁ ବନ୍ଦ କରି ଦିଆଯାଇଛି ଓ କେବଳ ସେମାନଙ୍କୁ ଟିକାର ଦ୍ୱିତୀୟ ଡୋଜ୍ ଦିଆଯିବ ଯେଉଁମାନେ ଆଗରୁ ପ୍ରଥମ ଡୋଜ୍ ନେଇଛନ୍ତି । ତେବେ ମୁଖ୍ୟ ବିଚାରପତି ଏଏସ ଓକା ଓ ଜଷ୍ଟିସ ଅରବିନ୍ଦ କୁମାରଙ୍କୁ ନେଇ ଗଠିତ ଖଣ୍ଡପୀଠକୁ ଟିକାର ଉପଲବ୍ଧତାକୁ ନେଇ ରାଜ୍ୟ ସରକାର କୌଣସି ଆଶ୍ୱାସନା ଦେଇନଥିଲେ।
ଅଦାଲତ କହିଥିଲେ ଯେ, ବର୍ତ୍ତମାନ କେବଳ ୯ ଲକ୍ଷ ଡୋଜ୍ ଅଛି। ୧୬ ଲକ୍ଷ ଲୋକ ଟିକାର ଦ୍ୱିତୀୟ ଡୋଜ୍ ଆବଶ୍ୟକ କରୁଛନ୍ତି। ୧୮ରୁ ୪୪ ବର୍ଗଙ୍କୁ ଭୁଲିଯାଅ। ସେମାନେ ଦ୍ୱିତୀୟ ଡୋଜ୍ ହିଁ ଦେଇ ପାରିବେ ନାହିଁ। ପ୍ରଶ୍ନ ଉଠୁଛି ୪୫ ବର୍ଷରୁ ଅଧିକଙ୍କୁ କେମିତି ଦ୍ୱିତୀୟ ଡୋଜ୍ ଟିକା ଦିଆଯିବ।
ଅଦାଲତ ରାଜ୍ୟ ସରକାରଙ୍କଠାରୁ ଜାଣିବାକୁ ଚାହିଁଥିଲେ ଯେ, କ’ଣ ରାଜ୍ୟରେ ଟିକାର ପ୍ରଥମ ଡୋଜ୍ ଦିଆଯାଉଛି ଓ ଦ୍ୱିତୀୟ ଡୋଜ୍ ଠିକ ସମୟରେ ଦିଆଯାଉ ନାହିଁ ।
୨୦୦ ମାଓବାଦୀ କରୋନାରେ ସଂକ୍ରମିତ ଆଶଙ୍କା: ୧୦ ଜଣଙ୍କ ମୃତ୍ୟୁ
ଛତିଶଗଡ଼: ଦାନ୍ତେଓ୍ବାଡ଼ା ଜିଲ୍ଲାରେ ୧୦ ଜଣ ମାଓବାଦୀଙ୍କ ମୃତ୍ୟୁ । ବିଷାକ୍ତ ଖାଦ୍ୟ ଖାଇ ଓ କରୋନା ଆକ୍ରାନ୍ତ ହୋଇ ୧୦ ଜଣ ମାଓବାଦୀ ବସ୍ତର ଜଙ୍ଗଲରେ ପ୍ରାଣ ହରାଇଥିବା ସୂଚନା ମିଳିଛି । ସୁକ୍ମା ଜିଲ୍ଲାର ଦର୍ନାପାଲି ଓ କୋଣ୍ଟା ଅଞ୍ଚଳରୁ କରୋନା ଟିକା ଓ ମେଡିସିନ ମଧ୍ୟ ଲୁଟି ନେଇଛନ୍ତି ମାଓବାଦୀ । ଏ ନେଇ ଦାନ୍ତେଓ୍ବାଡ଼ା ଏସ୍ପି ଅଭିଷେକ ବଲ୍ଲଭ ସୂଚନା ଦେଇଛନ୍ତି । ପୂର୍ବରୁ ୫୦ରୁ ଅଧିକ ମାଓବାଦୀ କରୋନା ଆକ୍ରାନ୍ତ ହୋଇଥିବା ନେଇ ସେ ସୂଚନା ଦେଇଥିଲେ । ୨୫ ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା କରାଯାଇଥିବା ଦଣ୍ଡକାରଣ୍ୟ ସ୍ପେଶାଲ ଜୋନାଲ କମିଟିର ମାଓନେତ୍ରୀ ସୁଜାତାଙ୍କ ସହ ଅନେକ ହାର୍ଡକୋର ମାଓବାଦୀଙ୍କୁ ମଧ୍ୟ କରୋନା ହୋଇଥିବା ଜଣାପଡିଛି । ତେବେ କରୋନା ସଂକ୍ରମଣ ହେବା ପରେ ମାଓବାଦୀମାନଙ୍କୁ ସମାଜର ମୁଖ୍ୟ ସ୍ରୋତକୁ ଫେରି ଆସିବା ଲାଗି ଆହ୍ବାନ ଦେଇଥିଲେ ଏସପି ଅଭିଷେକ ବଲ୍ଲଭ । ୨୦୦ ନକ୍ସଲ କରୋନାରେ ସଂକ୍ରମିତ ହୋଇଥିବା ସନ୍ଦେହ କରାଯାଉଛି । ଏମାନଙ୍କ ମଧ୍ୟରୁ ୧୦ ଜଣ ନକ୍ସଲଙ୍କ ମୃତ୍ୟୁ ହୋଇଛି ।
ଏଥିସହିତ ପଢ଼ନ୍ତୁ: କୋଭିଡ ନିୟମ ଭାଙ୍ଗି ପପୁ ଯାଦଭ ଗିରଫ
ଆସିଲା ଗୁଗଲର ନୂଆ ଫିଚର୍ : ମିଳିବ କରୋନା ଭ୍ୟାକସିନ ସହ ଜଡିତ ସମସ୍ତ ତଥ୍ୟ
ଗୁଗଲ ବାବାଙ୍କ ବିନା ଦୁନିଆ ଅଚଳ । କିଛି ବି ଜାଣିବାର ଅଛି ତ ଗୁଗଲ ଭରସା । ଗୁଗୁଲ ଡାଉନ୍ ତ ସବୁକିଛି ଡାଉନ୍ । କରୋନା କାଳରେ ଗୁଗଲ ଅନେକଙ୍କ ପାଇଁ ସୂଚନାର ସ୍ରୋତ । ଏଭଳି ପରିସ୍ଥିତିରେ ବର୍ତ୍ତମାନ ଗୁଗଲ ମଧ୍ୟ ନିଜର ନୂଆ ଫିଚର୍ ଲଂଚ କରିଛି । ଆପଣମାନେ ତ ଦେଖୁଛନ୍ତି କେଉଁଭଳି ସାରା ଦେଶରେ ରହିଛି କରୋନାର ସ୍ଥିତି । ସେଥିପାଇଁ ଟେକ୍ କଂମ୍ପାନୀ ଏହି ବିଷୟକୁ ନେଇ କିଛି ନୂଆ ନୂଆ ଫିଚର ,ଲଂଚ କରୁଛନ୍ତି । ଗୁଗଲ ମଧ୍ୟ ଏହି ନୂଆ ଫିଚରକୁ ନେଇ ଆଗକୁ ଆସିଛି । ଯେଉଁଥିରେ ଆପଣ କୋଭିଡ-୧୯ ସଂମ୍ବନ୍ଧିତ ପ୍ରଶ୍ନକୁ ସର୍ଚ କରିପାରିବେ ।

ଯେମିତିକି ଭ୍ୟାକସିନ୍ କିମ୍ବା ରେଜିଷ୍ଟ୍ରେସନ ବାବଦରେ ସହଜରେ ଜାଣିପାରିବେ । ସୋମବାର ଦିନ କଂମ୍ପାନୀ ଏହି ନୂତନ ଫିଚରର ଘୋଷଣା କରିଛି । ଏଥିରେ ଯେତେବେଳେ ଗୁଗଲ ୟୁଜରସ୍ ଭ୍ୟାକସିନ ବିଷୟରେ ସର୍ଚ କରିବେ । ସେତେବେଳେ ତାଙ୍କୁ ଭ୍ୟାକସିନର ଉପକାରିତା କଣ ? କେମିତି ଭ୍ୟାକସିନ ନେବେ ? ଏହାର ସାଇଡ୍ଇଫେକ୍ଟ କଣ ? ଏସବୁ ବିଷୟରେ ବି ସୂଚନା ମିଳିବ । ତାସହ କୋୱିନ ପୋର୍ଟାଲକୁ ଯିବା ପାଇଁ ଏହିଠାରେ ଲିଙ୍କ ମଧ୍ୟ ଦିଆଯିବ । କେବଳ ସେତିକି ନୁହେଁ ଭ୍ୟାକସିନକୁ ନେଇ ଲେଟେଷ୍ଟ ଅପଡେଟ୍ ବି ଏଥିରେ ଆପଣ ମାନେ ପାଇପାରିବେ । ଏଥିରେ ଯାହା ବି ଡାଟା ୟୁଜରର୍ସ ମାନଙ୍କୁ ମିଳିବ । ତାହା ସ୍ୱାସ୍ଥ୍ୟ ତଥା ପରିବାର କଲ୍ୟାଣ ବିଭାଗରୁ ଆସିଥିବା ସୂଚନା ଉପରେ ହିଁ ଆଧାରିତ ହୋଇଥିବ । ଏହିଭଳି ଲୋକଙ୍କୁ ଜରୁରୀ ସୂଚନା ପହଂଚାଇବା ପାଇଁ ହିଁ ଗୁଗୁଲ ଏହି ନୂଆ ଫିଚର୍ ଲଂଚ କରିଛି ।

କିଛିଦିନ ତଳେ ଭ୍ୟାକସିନେସନର ପ୍ରକ୍ରିୟାକୁ ଲୋକଙ୍କୁ ଆହୁରୀ ଭଲଭାବରେ ବୁଝାଇବା ପାଇଁ ନିଜ ପେଜ୍ ରେ ଡୁଡଲ ମଧ୍ୟ ବନାଇଥିଲା । ଆଗାମୀ ଦିନରେ ଗୁଗୁଲ ମ୍ୟାପରେ ବି କ୍ରିଟିକାଲ ରିସର୍ଚ ଭଳି ଜିନିଷକୁ ଅପଡେଟ୍ କରିବା ପାଇଁ କଂମ୍ପାନୀର ଯୋଜନା ରହିଛି । ଯେମିତିକି କେଉଁ ହସ୍ପିଟାଲରେ ବେଡ୍ ଉପଲବ୍ଧ ଅଛି କିମ୍ବା କେଉଁଠି ଅକ୍ସିଜେନର ଅଭାବ ଅଛି । ଏସବୁ ବିଷୟରେ ୟୁଜରସ୍ ନିଜ ମ୍ୟାପରେ ହସ୍ପିଟାଲର ସୂଚନା ପାଇବାକୁ ଚାହିଁଲେ କିଭଳି ସହଜରେ ପାଇପାରିବେ ତାର ଯୋଜନା କରୁଛି ଗୁଗଲ । ଏହିଭଳି ନୂଆ ନୂଆ ଫିଚର ଜରିଆରେ ସାଧାରଣ ଲୋକେ ବି କରୋନାସହ ଜଡିତ ସମସ୍ତ ତଥ୍ୟ ସହଜରେ ପାଇପାରିବେ ।
ସୋଆ ରେଡିଓରେ କାର୍ଯ୍ୟରତ ସାମ୍ବାଦିକା ସବନମ ସରିନଙ୍କ ପରଲୋକ
ଭୁବନେଶ୍ୱର: କରୋନା ନେଇଛି ପୁଣି ଜଣେ ସାମ୍ବାଦିକଙ୍କ ଜୀବନ । ସୋଆ ରେଡିଓରେ କାର୍ଯ୍ୟରତ ସବନମ ସରିନଙ୍କର କରୋନାରେ ପରଲୋକ ହୋଇଛି । ସେ ଦୀର୍ଘ ସମୟ ଧରି କରୋନାରେ ସଂକ୍ରମିତ ଥିଲେ । ମୃତ୍ୟୁ ବେଳକୁ ତାଙ୍କୁ ୩୮ ବର୍ଷ ହୋଇଥିଲା । କରୋନାରେ ସଂକ୍ରମିତ ହୋଇ ସେ ଭୁବନେଶ୍ୱର ଏମସରେ ଚିକିତ୍ସିତ ହେଉଥିଲେ । ତେବେ ତାଙ୍କ ଅବସ୍ଥାରେ କୌଣସି ସୁଧାର ହୋଇନଥିଲା । ଆଜି ତାଙ୍କର ଦେହାନ୍ତ ହୋଇଯାଇଛି । ସୋଆ ରେଡିଓ ସହ ସେ କନକ ନ୍ୟୁଜ୍, ନ୍ୟୁଜ୍ ସେଭେନ ଓ ଏସଟିଭିରେ ମଧ୍ୟ କାର୍ଯ୍ୟ କରିସାରିଛନ୍ତି । ସରିନଙ୍କ ମୃତ୍ୟୁରେ ବିଭିନ୍ନ ମହଲରୁ ଶୋକ ପ୍ରକାଶ ପାଇଛି ।
ସବନମ ସରିନ ଭାରତୀ ବିଦ୍ୟା ମନ୍ଦିରରୁ ନିଜ ସ୍କୁଲ ଶିକ୍ଷା ସମାପ୍ତ କରିବା ପରେ ରମାଦେବୀ ମହିଳା ମହାବିଦ୍ୟାଳୟରୁ +୨ ଶିକ୍ଷା ସମାପ୍ତ କରିଥିଲେ । ଏହାପରେ ସେ ବୋଟାନୀରେ ସ୍ନାତକ ପାସ କରିଥିଲେ । IGNOUରୁ ସେ ସାମ୍ବାଦିକ ଓ ଗଣ ଯୋଗାଯୋଗ ଶିକ୍ଷା ଲାଭ କରିଥିଲେ । ସେ ମାଇକ୍ରୋ ବାଇଲୋଜି ମଧ୍ୟ ଶିକ୍ଷା ଲାଭ କରିଥିଲେ । ଏଭଳି ଜଣେ ଦକ୍ଷ ସାମ୍ବାଦିକାଙ୍କୁ ହରାଇବା ସାମ୍ବାଦିକତା ପାଇଁ ଏକ ବିରାଟ କ୍ଷତି । ଏହାପୂର୍ବରୁ ମଧ୍ୟ ରାଜ୍ୟରେ ବହୁ ସାମ୍ବାଦିକଙ୍କ କରୋନାରେ ମୃତ୍ୟୁ ହୋଇସାରିଛି ।
ଘର ଘର ବୁଲି କାନ୍ଥରେ ପୋଷ୍ଟର ମାରି ସଚେତନ କରୁଛନ୍ତି ସରପଞ୍ଚ: ହାତ ଯୋଡ଼ି ମାସ୍କ ପିନ୍ଧିବାକୁ କଲେ ନିବେଦନ
ଖୋର୍ଦ୍ଧା: ମୁଣ୍ଡିଆ ମାରୁଛି, ମାସ୍କ ପିନ୍ଧ । ମାସ୍କ ପିନ୍ଧୁନଥିବା ଗାଁର ଲୋକଙ୍କୁ କିଛି ଏଭଳି କହି ମାସ୍କ ପିନ୍ଧିବାକୁ ଅନୁରୋଧ କରୁଛନ୍ତି ଜଣେ ମହିଳା ସରପଞ୍ଚ । ବର୍ତ୍ତମାନ କାରୋନା ସହର ଛାଡି ଗାଁକୁ ମୁଁହାଉଛି। ଗାଁରେ ଲୋକମାନେ ପ୍ରାୟତଃ ମାସ୍କ ପିନ୍ଧୁନଥିବା ଦେଖିବାକୁ ମିଳୁଛି । ଯଦି କିଏ କହିଲା କେତେବେଳେ କେମିତି ନିଜ ଗାମୁଛାରେ ମୁଁହ ଘୋଡେ଼ଇ ଦେଉଛନ୍ତି ।

ଏଭଳି ସ୍ଥିତିରେ ନିଜ ପଞ୍ଚାୟତକୁ କାରୋନା ମୁକ୍ତ କରିବାପାଇଁ ଅଣ୍ଟା ଭିଡ଼ିଛନ୍ତି ଖୋର୍ଦ୍ଧା ଜିଲ୍ଲା ବେଗୁନିଆ ବ୍ଲକ ସିମୋର ପଞ୍ଚାୟତ ସରପଞ୍ଚ ସରୋଜିନୀ ଖୁଣ୍ଟିଆ। କାରୋନା ସଚେତନତା ପୋଷ୍ଟେର ଧରି ଘର ଘର ବୁଲି କାନ୍ଥରେ ମାରୁଛନ୍ତି। ଯେଉଁ ଠି ଗାଁର ବୟସ୍କ ମୁରବି ଲୋକଙ୍କୁ ଦେଖୁଛନ୍ତି ତାଙ୍କୁ ମୁଣ୍ଡିଆ ମାରି ମାସ୍କ ପିନ୍ଧାଇ ସଚେତନ କରାଉଛନ୍ତି। ତେଣୁ ଏଭଳି ଉପାୟରେ ସେମାନଙ୍କ ମୁହଁରେ ସବୁବେଳେ ମାସ୍କ ରଖିବା ପାଇଁ ପ୍ରୟାସ କରୁଛି। ଆଶା କରୁଛି ଆମ ଗାଁ, ଆମ ପଞ୍ଚାୟତ ହେବ କାରୋନା ମୁକ୍ତ। ସିମୋର ସରପଞ୍ଚ ପ୍ରମୋଦିନି ଖୁଣ୍ଟିଆଙ୍କ ଏଭଳି ପ୍ରୟାସ ବର୍ତ୍ତମାନ ଚର୍ଚ୍ଚାର ବିଷୟ ପାଲଟିଛି।
ଏଥିସହିତ ପଢ଼ନ୍ତୁ: କରୋନା ଟିକା ପାଇଁ ଓଡ଼ିଶାର ଗ୍ଲୋବାଲ ଟେଣ୍ଡର ଆହ୍ୱାନକୁ କଂଗ୍ରେସ ନେତା ଅଭିଷେକ ସିଂହଭିଙ୍କ ପ୍ରଶଂସା
ନବ ବିବାହିତ ଦମ୍ପତିଙ୍କ ନିଆରା ପ୍ରୟାସ: ଭୋଜି ଅର୍ଥରେ କରୋନା ଯୋଦ୍ଧାଙ୍କୁ ବାଣ୍ଟିଲେ ମାସ୍କ ଓ ସାନିଟାଇଜର
ଯାଜପୁର: ନବ ବିବାହିତ ଦମ୍ପତିଙ୍କ ନିଆରା ପ୍ରୟାସ। ଭିନ୍ନକ୍ଷମ ଓ କରୋନା ଯୋଦ୍ଧାଙ୍କ ଉଦ୍ଦେଶ୍ୟରେ ଉତ୍ସର୍ଗ କଲେ ବିବାହ ଭୋଜି। ବିବାହ ଭୋଜି ବାତିଲ କରି ସେହି ଟଙ୍କାରେ ଭିନ୍ନକ୍ଷମ ଓ କରୋନା ଯୋଦ୍ଧା ପୋଲିସଙ୍କୁ ଯୋଗାଇ ଦେଲେ ଖାଦ୍ୟ ସାମଗ୍ରୀ ସହିତ ମାସ୍କ ଓ ସାନିଟାଇଜର୍ । ଏଥିପାଇଁ ନବ ଦମ୍ପତିଙ୍କ ନିକଟକୁ ଏବେ ସବୁ ଆଡୁ ପ୍ରଶଂସାର ସୁଅ ଛୁଟୁଛି।

ମହାମାରୀ କରୋନାର ବିଭୀଷିକା ସମୟରେ ସବୁଆଡେ ହାହାକାର ପଡ଼ିଥିବା ବେଳେ ଏକ ନବ ଦମ୍ପତିଙ୍କ ନିଆରା ପ୍ରୟାସ ଏବେ ଚର୍ଚ୍ଚାର ବିଷୟ ପାଲଟିଛି। ଏହି ନବ ଦମ୍ପତି ସେମାନଙ୍କ ବିବାହ ଭୋଜି ବାତିଲ କରି ସେହି ଟଙ୍କାରେ ଭିନ୍ନକ୍ଷମ ଓ କରୋନା ଯୋଦ୍ଧାଙ୍କୁ ଖାଦ୍ୟ ସାମଗ୍ରୀ ସହିତ ମାସ୍କ ଓ ସାନିଟାଇଜର୍ ଯୋଗାଇ ଦେଇଛନ୍ତି। ଏଭଳି ଏକ ଘଟଣା ଦେଖିବାକୁ ମିଳିଛି ଯାଜପୁର ଜିଲ୍ଲା ବ୍ୟାସନଗର ଅଞ୍ଚଳରେ ।

ଦାନଗଦି ବ୍ଲକ ମନୋହରପୁର ଗ୍ରାମର ପିତାମ୍ବର ରାଉତଙ୍କ ପୁଅ ବିଭୁତି ଭୂଷଣ ରାଉତ ମହାମାରୀ କରୋନା ଯୋଗୁଁ ବିବାହ ଭୋଜି ବାତିଲ କରିଥିଲେ । ଏହା ବଦଳରେ ଏହି ଅର୍ଥରେ ଅସହାୟ ଲୋକ ଓ କରୋନା ଯୋଦ୍ଧାମାନଙ୍କ ପାଇଁ କିଛି କରିବାକୁ ସେ ଚିନ୍ତା କରିଥିଲେ। ଏହି ଅବସରରେ ଆଜି ଏହି ନବ ଦମ୍ପତି ପ୍ରଥମେ ବ୍ୟାସନଗର ସହରର କହ୍ନେଇପୁର ସ୍ଥିତ ଶାନ୍ତି ନିବାସରେ ପହଞ୍ଚିଥିଲେ। ସେଠାରେ ରହୁଥିବା ୪୦ ରୁ ଉର୍ଦ୍ଧ୍ବ ମାନସିକ ଓ ଶାରିରୀକ ଭିନ୍ନକ୍ଷମ ବ୍ୟକ୍ତିଙ୍କୁ ଗୋଟିଏ ଦିନର ରନ୍ଧା ଖାଦ୍ୟ ଦେଇଥିଲେ। ଏଥିସହିତ ଚାଉଳ ଡାଲି ଓ ବିସ୍କୁଟ ଆଦି ଏକ ମାସର ରାସନ୍ ସାମଗ୍ରୀ ସହ ଦେହଲଗା ସାବୁନ୍, ମାସ୍କ ଓ ସାନିଟାଇଜର୍ ଆଦି ପ୍ରଦାନ କରିଥିଲେ। ଅନ୍ତେବାସୀ ଙ୍କ ସହ ନବ ଦମ୍ପତି ଏଠାରେ କିଛି ସମୟ ଅତିବାହିତ ମଧ୍ୟ କରିଥିଲେ। ତେବେ ସହଯୋଗ ପାଇ ଶାନ୍ତି ନିବାସ କର୍ତ୍ତୃପକ୍ଷ ନିଜର ଖୁସି ବ୍ୟକ୍ତ କରିବା ସହ ନବ ଦମ୍ପତିଙ୍କୁ ସାଧୁବାଦ ଜଣାଇଛନ୍ତି।

ପରେ ଏହି ନବ ଦମ୍ପତି ଯଖପୁରା ଥାନାରେ ପହଞ୍ଚି କରୋନା ଯୋଦ୍ଧା ପୋଲିସ କର୍ମଚାରୀମାନଙ୍କ ପାଇଁ ଉନ୍ନତମାନର N-95 ମାସ୍କ, ସାନିଟାଇଜର୍, ଥଣ୍ଡା ପାନୀୟ ଓ ପାଣି ବୋଟେଲ ଆଦି ପ୍ରଦାନ କରିଥିଲେ। ଯଖପୁରା ଥାନା ଅଧିକାରୀ ଲକ୍ଷଣ ଦଣ୍ଡସେନା ଏହାକୁ ଗ୍ରହଣ କରିବା ସହ ନବ ଦମ୍ପତିଙ୍କୁ ଧନ୍ୟବାଦ ଜଣାଇଥିଲେ। ଏହାପରେ ଏହି ନବ ଦମ୍ପତି ବିଭିନ୍ନ ଛକ ବଜାରକୁ ଯାଇ ସେଠାରେ ଡ୍ୟୁଟି କରୁଥିବା ପୋଲିସ କର୍ମଚାରୀମାନଙ୍କୁ N-95 ମାସ୍କ ସହିତ ସାନିଟାଇଜର୍, ଥଣ୍ଡା ପାନୀୟ ଓ ପାଣି ବୋଟେଲ ଆଦି ପ୍ରଦାନ କରିଥିଲେ। ତେବେ ଅସହାୟ ଲୋକ ଓ କରୋନା ଯୋଦ୍ଧା ମାନଙ୍କୁ ସହାୟତା ପ୍ରଦାନ କରିଥିବାରୁ ନିଜର ଖୁସି ବ୍ୟକ୍ତ କରିଛନ୍ତି ଏହି ନବ ଦମ୍ପତି। ମହାମାରୀ କରୋନାର ଏହି ଜଟିଳ ସମୟରେ ନବ ଦମ୍ପତିଙ୍କ ଏଭଳି ନିଆରା ପ୍ରୟାସକୁ ବିଭିନ୍ନ ମହଲରେ ପ୍ରଶଂସା କରାଯାଉଛି। ଏହା ସମାଜ ପାଇଁ ଉଦାହରଣ ପାଲଟିବା ସହିତ ଅନ୍ୟମାନଙ୍କୁ ପ୍ରେରଣା ଯୋଗାଇବ ନିଶ୍ଚୟ।




