spot_img
Home Blog Page 5819

ସପ୍ତାହକୁ ଦୁଇ ଦିନ ବନ୍ଦ ରହିବ ରାଜ୍ୟରେ ରେଳ ଚଳାଚଳ, ଗଡିବନି ଏହି ଟ୍ରେନ..

ଭୁବନେଶ୍ୱର: ଲକଡାଉନ୍ ପାଇଁ ରାଜ୍ୟରେ ସୋମବାର ଓ ମଙ୍ଗଳବାର ବନ୍ଦ ରହିବ ମେମୁ ଓ ପାସେଞ୍ଜର ଟ୍ରେନ ଚଳାଚଳ । ଏହି ଦୁଇ ଦିନ ଛଅ ଯୋଡ଼ା ଟ୍ରେନକୁ ବାତିଲ କରାଯାଇଥିବା ସୂଚନା ଦିଆଯାଇଛି । ବାତିଲ ହୋଇଥିବା ଟ୍ରେନ୍ ଗୁଡିକ ହେଲା ହେଉଛି ଭୁବନେଶ୍ୱର-କେନ୍ଦୁଝର -ଭୁବନେଶ୍ୱର ସ୍ୱତନ୍ତ୍ର ଟ୍ରେନ । ଭୁବନେଶ୍ୱର-ଭଦ୍ରକ-ଭୁବନେଶ୍ୱର ସ୍ୱତନ୍ତ୍ର ଟ୍ରେନ ।

ସେହିପରି କଟକ-ଭଦ୍ରକ-କଟକ ସ୍ବତନ୍ତ୍ର ଟ୍ରେନ, କଟକ-ପାରାଦୀପ-କଟକ ସ୍ବତନ୍ତ୍ର ଟ୍ରେନ , କଟକ-ଭଦ୍ରକ-କଟକ ସ୍ବତନ୍ତ୍ର ଟ୍ରେନ, ବିଶାଖାପଟନମ୍-ରାୟପୁର-ବିଶାଖାପଟନମ୍ ସ୍ବତନ୍ତ୍ର ଟ୍ରେନ ବାତିଲ ହୋଇଛି ।

ସଂକ୍ରମଣ ବଢୁଥିବାରୁ ଡିଭିଜନ ପକ୍ଷରୁ ଏହି ନିଷ୍ପତ୍ତି ନିଆଯାଇଛି । ଗୋଟେପଟେ ରାଜ୍ୟରେ ୧୪ ଦିନିଆ ଲକଡାଉନ ଘୋଷଣା ହୋଇଛି ଅନ୍ୟପଟେ ସପ୍ତାହନ୍ତ ସଟଡାଉନ ମଧ୍ୟ ଲାଗୁ ହୋଇଛି । ରାଜ୍ୟରେ ଦୈନିକ ସଂକ୍ରମଣ ୧୦ ହଜାର ପରେ ବାହାରୁଥିବାରୁ ରେଳ ଚଳାଚଳ ଉପରେ ରୋକ ଲଗାଯାଇଛି ।

ଲକଡାଉନରେ ବୁଲା ଗୋରୁ ଓ କୁକୁରଙ୍କ ଖାଦ୍ୟ ପାଇଁ ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିରୁ ୬୦ ଲକ୍ଷ ଟଙ୍କା ପ୍ରଦାନ

ଭୁବନେଶ୍ୱର: କୋଭିଡ୍‌ ମହାମାରୀ ନିୟନ୍ତ୍ରଣ ପାଇଁ ବର୍ତ୍ତମାନ ରାଜ୍ୟରେ ଲକ୍‌ଡାଉନ୍ ଜାରି ରହିଛି । ଏହି ସମୟରେ ବୁଲା ଗାଈଗୋରୁ ଓ କୁକୁର ଆଦି ପ୍ରାଣୀମାନେ ଖାଦ୍ୟ ସମସ୍ୟାର ସମ୍ମୁଖୀନ ହେଉଛନ୍ତି । ଏହାକୁ ନଜରରେ ରଖି ବୁଲା ଗୋରୁ ଓ କୁକୁରଙ୍କ ଖାଦ୍ୟ ପାଇଁ ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିରୁ ୬୦ ଲକ୍ଷ ଟଙ୍କା ପ୍ରଦାନ କରାଯାଇଛି । ୫ ମହାନଗର ନିଗମ, ୪୮ଟି ମ୍ୟୁନିସିପାଲଟି ଓ ୬୧ଟି ଏନ୍ଏସି ପାଇଁ ଷାଠିଏ ଲକ୍ଷ ଟଙ୍କା ମୁଖ୍ୟମନ୍ତ୍ରୀ ମଞ୍ଜୁର କରିଛନ୍ତି । ଏହି ଅର୍ଥରେ ସେମାନେ ବିଭିନ୍ନ ସ୍ବେଚ୍ଛାସେବୀ ଅନୁଷ୍ଠାନଙ୍କ ଜରିଆରେ ବୁଲା ପ୍ରାଣୀ ଙ୍କୁ ଖାଦ୍ୟ ଯୋଗାଇ ଦେବେ । ନିର୍ଦ୍ଦେଶ ଅନୁଯାୟୀ ଭୁବନେଶ୍ୱର ମହାନଗର ନିଗମ ଏଥିପାଇଁ ଦୈନିକ କୋଡ଼ିଏ ହଜାର ଟଙ୍କା, କଟକ , ସମ୍ବଲପୁର, ରାଉରକେଲା, ଓ ଵ୍ରହ୍ମପୁର ମହାନଗର ନିଗମ ଦୈନିକ ଦଶ ହଜାର ଟଙ୍କା , ମ୍ୟୁନିସିପାଲଟିଗୁଡ଼ିକ ଦୈନିକ ପାଞ୍ଚ ହଜାର ଟଙ୍କା ଓ ଏନଏସିଗୁଡ଼ିକ ଦୈନିକ ଦୁଇ ହଜାର ଟଙ୍କା ଖର୍ଚ୍ଚ କରିପାରିବେ ।

୨୦୨୦ରେ ୟୁପିଏସସି ପରୀକ୍ଷାରୁ ବଞ୍ଚିତ ପରୀକ୍ଷାର୍ଥୀଙ୍କୁ ପୁଣି ମିଳିବ ପରୀକ୍ଷା ଦେବା ସୁଯୋଗ

ନୂଆଦିଲ୍ଲୀ: ୨୦୨୦ରେ ୟୁପିଏସସି ପରୀକ୍ଷା ଦେଇପାରିନଥିବା ପରୀକ୍ଷାର୍ଥୀଙ୍କ ପାଇଁ ଖୁସିଖବର । ପ୍ରାରମ୍ଭିକ ପରୀକ୍ଷାରେ ନିଜର ଅନ୍ତିମ ସୁଯୋଗ ହରାଇ ସାରିଥିବା ପରୀକ୍ଷାର୍ଥୀଙ୍କୁ ପୁଣି ମିଳିବ ପରୀକ୍ଷା ଦେବା ସୁଯୋଗ । ଏନେଇ ଆଜି ଘୋଷଣା କରିଛନ୍ତି କେନ୍ଦ୍ର ସରକାର । ସରକାରଙ୍କ ପକ୍ଷରୁ ସର୍ବୋଚ୍ଚ ନ୍ୟାୟାଳୟରେ ଏନେଇ ସତ୍ୟପାଠ ଦାଖଲ କରାଯାଇଛି ।

କରୋନା ମହାମାରୀ ପାଇଁ ୨୦୨୦ ଅକ୍ଟୋବରରେ ୟୁପିଏସସି ଦ୍ବାରା ଆୟୋଜିତ ହୋଇଥିବା ନାଗରିକ ସେବା ପ୍ରାରମ୍ଭିକ ପରୀକ୍ଷାରେ ଅନେକ ପରୀକ୍ଷାର୍ଥୀ ବିଭିନ୍ନ କାରଣରୁ ଅଂଶଗ୍ରହଣ କରିପାରି ନଥିଲେ । ନିର୍ଦ୍ଧାରିତ ବୟସସୀମା ଅତିକ୍ରମ କରିଯିବାରୁ ବହୁ ପରୀକ୍ଷାର୍ଥୀଙ୍କ ଲାଗି ଏହି ପରୀକ୍ଷା ଶେଷ ସୁଯୋଗ ଥିଲା । ତେଣୁ ପରିସ୍ଥିତିକୁ ଦୃଷ୍ଟିରେ ରଖି କେନ୍ଦ୍ର ସରକାର ସେହି ପରୀକ୍ଷାର୍ଥୀ ମାନଙ୍କୁ ଆଉ ଏକ ଅତିରିକ୍ତ ସୁଯୋଗ ଦେବାକୁ ଯାଉଛନ୍ତି କେନ୍ଦ୍ର ସରକାର ।

ଏହାଦ୍ୱାରା ୧୦,୩୩୬ ଜଣ ପରୀକ୍ଷାର୍ଥୀ ଉପୃକତ ହେବେ ବୋଲି ସପ୍ରିମକୋର୍ଟଙ୍କୁ ଜଣା ଯାଇଛି । ଏହି ପ୍ରସଙ୍ଗକୁ ନେଇ କେନ୍ଦ୍ର ସରକାର ଏବଂ ୟୁପିଏସସି ମଧ୍ୟରେ ଅନେକ ଥର ଆଲୋଚନା ହୋଇସାରିଛି । ନାଗରିକ ସେବା ଆଶାୟୀ ରଚନା ସିଂହଙ୍କ ପକ୍ଷରୁ ସର୍ବୋଚ୍ଚ ନ୍ୟାୟାଳୟରେ ଦାଖଲ ହୋଇଥିବା ଏକ ପିଟିଶନର ଶୁଣାଣି ସମୟରେ କେନ୍ଦ୍ର ସରକାର ଉପରୋକ୍ତ ତଥ୍ୟ ଦେଇଛନ୍ତି । ..

କରୋନା ସଂକଟ କାଳରେ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟର ଆଚରଣ ଆଶ୍ଚର୍ଯ୍ୟଜନକ : IMA

ନୂଆଦିଲ୍ଲୀ: କରୋନା ସଂକଟ କାଳରେ କେନ୍ଦ୍ର ସରକାରଙ୍କ ଭୂମିକାକୁ ସମାଲୋଚନା କରିଛି ଭାରତୀୟ ଚିକିତ୍ସା ସଂଘ(IMA) । ଶନିବାର ଦିନ ସଂଘ ପକ୍ଷରୁ ଜାରି ବୟାନରେ କରୋନା ମୁକାବିଲା ପାଇଁ କେନ୍ଦ୍ର ଉଚିତ ପଦକ୍ଷେପ ଉଠାଇ ନାହିଁ ବୋଲି କୁହାଯାଇଛି । ଏହା ସହିତ ଆଇଏମଏ ଦେଶରେ ସମ୍ପୂର୍ଣ୍ଣ ଲକଡାଉନ୍ ପକ୍ଷରେ ମତ ରଖିଛି ।
ଆଇଏମଏ ତ’ର ବୟାନରେ କହିଛି ଯେ, ‘‘ କୋଭିଡ୍-୧୯ ମହାମାରୀର ବିନାଶକାରୀ ଦ୍ୱିତୀୟ ପର୍ଯ୍ୟାୟ ଦ୍ୱାରା ଉତ୍ପନ ସଂକଟର ମୁକାବିଲା ଦିଗରେ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟର ମନ୍ଥର ଓ ଅନୁପଯୁକ୍ତ ଉପାୟ ଦେଖି ଆଇଏମଏ ଚକିତ ହୋଇଛି । ସାମୁହିକ ଚେତନା,ଆଇଏମଏ ଓ ଅନ୍ୟ ପେଶାଦାର ସହଯୋଗୀଙ୍କ ଦ୍ୱାରା ଦିଆଯାଇଥିବା ଅନୁରୋଧକୁ ଅଳିଆଗଦାକୁ ଫୋପାଡି ଦିଆଯାଏ ଓ ପ୍ରାୟତଃ ତୃଣମୂଳ ସ୍ତରର ବାସ୍ତବତାକୁ ନବୁଝି ନିର୍ଣ୍ଣୟ ନିଆଯାଉଛି’’

ସମ୍ପୂର୍ଣ୍ଣ ଲକଡାଉନ୍ ହିଁ ପ୍ରତିରକ୍ଷା

ଆଇଏମଏ ମଧ୍ୟ ବୟାନରେ ସମ୍ପୂର୍ଣ୍ଣ ଲକଡାଉନ୍ ପକ୍ଷରେ ମତ ରଖିଛି । ଆଇଏମଏ ପକ୍ଷରୁ କୁହାଯାଇଛି ଯେ, ଦେଶବ୍ୟାପୀ ସମ୍ପୂର୍ଣ୍ଣ ଲକଡାଉନ୍ ଦ୍ୱାରା ହିଁ ସଂକ୍ରମଣ ଚେନକୁ ଖଣ୍ଡିତ କରାଯାଇ ପାରିବ । କିଛି ରାଜ୍ୟରେ ୧୦ କିମ୍ବା ୧୫ ଦିନର ଲକଡାଉନ୍ ବଦଳରେ ଯୋଜନାବଦ୍ଧ ଓ ପୂର୍ବଘୋଷିତ ଲକଡାଉନ୍ ଉପରେ ସଂଘ ଗୁରୁତ୍ୱ ଦେଇଛି । ସଂଘ ଅନୁସାରେ ଲକଡାଉନ୍ ଦ୍ୱାରା ସ୍ୱାସ୍ଥ୍ୟ ସମ୍ବନ୍ଧିତ ଭିତ୍ତିଗତ ଢାଞ୍ଚାକୁ ସମ୍ଭାଳିବା ପାଇଁ ସମୟ ମିଳିବ ।

ଦେଶବ୍ୟାପୀ ଲକଡାଉନ୍ ଯୋଗୁ ସଂକ୍ରମଣ ଚେନ୍ ଭାଙ୍ଗିବ । ଫଳରେ ହସ୍ପିଟାଲକୁ ଆସୁଥିବା ରୋଗୀଙ୍କ ସଂଖ୍ୟା କମିବ । କିନ୍ତୁ ଅଲଗା ଅଲଗା ରାଜ୍ୟରେ ଛୋଟମୋଟ କର୍ଫ୍ୟୁ କିମ୍ବା ଲକଡାଉନ୍ ଯୋଗୁ କୌଣସି ଲାଭ ମିଳିବ ନାହିଁ । ରାଜ୍ୟ ଗୁଡିକରେ ଲକଡାଉନ ଥିବା ବେଳେ ସବୁକିଛି ପୂର୍ବପରି ଚାଲିଛି । ଗୋଟିଏ ରାଜ୍ୟରେ ଲକଡାଉନ୍ ଥିବା ବେଳେ ଆଉ ଗୋଟିଏ ରାଜ୍ୟ ମୁକୁଳା ପଡିଛି । ଗୋଟିଏ ରାଜ୍ୟରୁ ଆଉ ଗୋଟିଏ ରାଜ୍ୟକୁ ଲୋକଙ୍କ ଚଳାଚଳ ଜାରି ରହିଛି । ଏମିତିରେ ସଂକ୍ରମଣର ବିପଦ ରହିଛି । ଦୁଇ ତିନିଦିନର ସମୟ ନେଇ କେନ୍ଦ୍ର ଦେଶବ୍ୟାପୀ ଲକଡାଉନ୍ ଲାଗୁ କରିବା ଉଚିତ ବୋଲି ଆଇଏମଏ କହିଛି ।

ହିମନ୍ତ ବିଶ୍ୱଶର୍ମା ହେବେ ଆସାମର ନୂଆ ମୁଖ୍ୟମନ୍ତ୍ରୀ, ରାଜ୍ୟପାଳଙ୍କୁ ଭେଟି ରଖିବେ ଦାବି

ଗୌହାଟି: ହିମନ୍ତ ବିଶ୍ୱଶର୍ମା ହେବେ ଆସାମର ଆଗାମୀ ମୁଖ୍ୟମନ୍ତ୍ରୀ । ବିଜେପି ବିଧାୟକ ଦଳ ବୈଠକରେ ରବିବାର ଦିନ ହିମନ୍ତ ବିଶ୍ୱଶର୍ମାଙ୍କ ନାମ ଉପରେ ମୋହର ଲାଗିଛି । ଶନିବାରଠାରୁ ଏଥିପାଇଁ ବିଜେପିରେ ମାନସ ମନ୍ଥନ ଚାଲିଥିଲା । ହିମନ୍ତ ବିଶ୍ୱଶର୍ମା,ସର୍ବାନନ୍ଦ ସୋନେୱାଲଙ୍କ ସ୍ଥାନ ନେବେ । ସୂଚନାଯୋଗ୍ୟ ଯେ, ଶନିବାର ଦିନ ଉଭୟ ସର୍ବାନନ୍ଦ ଓ ହିମନ୍ତ ବିଜେପି ସଭାପତି ଜେ ପି ନାଡ୍ଡା ଓ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କୁ ସାକ୍ଷାତ କରିଥିଲେ ।


ବିଜେପି ୧୨୬ ଆସନ ବିଶିଷ୍ଟ ଆସାମ ବିଧାନସଭାରେ ୬୦ ଆସନ ଜିତିଛି । ଅନ୍ୟପକ୍ଷରେ ଏହାର ସହଯୋଗୀ ଆସାମ ଗଣପରିଷଦ ୯ ଓ ୟୁନାଇଟେଡ୍ ପିପୁଲ’ସ ଲିବରାଲ ୬ ଆସନ ଜିତିଛନ୍ତି । ବିଜେପି ନିର୍ବାଚନ ପୂର୍ବରୁ ମୁଖ୍ୟମନ୍ତ୍ରୀ ପଦବୀ ପାଇଁ କୌଣସି ନାମ ଘୋଷଣା କରିନଥିଲା । ଆସନ୍ତାକାଲି ଅର୍ଥାତ ସୋମବାର ଦିନ ହିମନ୍ତ ମୁଖ୍ୟମନ୍ତ୍ରୀ ପଦର ଶପଥ ନେବେ । ଆଜି ସେ ରାଜ୍ୟପାଳଙ୍କୁ ଭେଟି ସରକାର ଗଠନ ପାଇଁ ନିଜ ଦାବି ରଖିବେ । ସୂଚନାଯୋଗ୍ୟ ଯେ, ସର୍ବାନନ୍ଦ ସୋନେୱାଲ ଏହା ଭିତରେ ରାଜ୍ୟପାଳ ଜଗଦୀଶ ମୁଖିଙ୍କୁ ନିଜ ଇସ୍ତଫା ଦେଇଛନ୍ତି ।

କଂଗ୍ରେସରୁ ଆସିଛନ୍ତି ହିମନ୍ତ

ହିମନ୍ତଙ୍କ ରାଜନୈତିକ କ୍ୟାରିୟର କଂଗ୍ରେସରୁ ଆରମ୍ଭ ହୋଇଥିଲା । ୨ ହଜାର ମସିହା ଆରମ୍ଭରେ ସେ ସକ୍ରୀୟ ରାଜନୀତିକୁ ଆସିଥିଲେ । ଆସାମରେ କଂଗ୍ରେସ ସରକାର ଗଠନରେ ତାଙ୍କ ଭୂମିକା ଗୁରୁତ୍ୱପୂର୍ଣ୍ଣ ଥିଲା । ତେବେ କଂଗ୍ରେସରେ ତାଙ୍କୁ ଗୁରୁତ୍ୱ ଦିଆଯାଉନଥିବା ଅଭିଯୋଗ କରି ସେ ଦଳ ତ୍ୟାଗ କରିଥିଲେ । ତତ୍କାଳିନ ମୁଖ୍ୟମନ୍ତ୍ରୀ ତରୁଣ ଗୋଗୋଇଙ୍କ ସହ ମନାନ୍ତର ପରେ ସେ କଂଗ୍ରେସ ଛାଡିଥିଲେ ।
ରାହୁଲ ଗାନ୍ଧୀ ଓ କୁକୁର ଉପାଖ୍ୟାନ


ହିମନ୍ତ କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ଦଳର ପତନ ପାଇଁ ଦାୟୀ କରନ୍ତି । ଦିଲ୍ଲୀରେ ରାହୁଲଙ୍କୁ ସାକ୍ଷାତ କରିବାକୁ ଯାଇଥିବା ବେଳେ ରାହୁଲ ଆସାମ ନେତାଙ୍କ ସହିତ ଆଲୋଚନା କରିବା ପରିବର୍ତ୍ତେ ନିଜ କୁକୁର ସହିତ ସମୟ ବିତାଇଥିଲେ ଓ କୁକୁର ସେମାନଙ୍କ ବିସ୍କୁଟକୁ ଅଇଁଠା କରିଥିଲେ ମଧ୍ୟ ରାହୁଲ ପ୍ଲେଟ୍ ବଦଳାଇବାର ସୌଜନ୍ୟତା ଦେଖାଇ ନଥିଲେ ବୋଲି ପରେ ହିମନ୍ତ ଅଭିଯୋଗ କରିଥିଲେ । ଏହି ଘଟଣା ପରେ ସେ କଂଗ୍ରେସରୁ ଇସ୍ତଫା ଦେଇଥିଲେ ।

ବିଜେପିରେ ଯୋଗଦାନ

ବିଜେପିରେ ଯୋଗଦାନ ପରେ ହିମନ୍ତ ଗୈରିକ ଦଳକୁ ଆସାମରେ କ୍ଷମତାକୁ ଆଣିଥିଲେ । ୨୦୧୬ ନିର୍ବାଚନରେ ବିଜେପି ତାଙ୍କ ପାଇଁ ଜିତିଥିଲା ବୋଲି କୁହାଯାଏ । ହିମନ୍ତଙ୍କ ରାଜନୈତିକ ପ୍ରତିଦ୍ୱନ୍ଦ୍ୱୀ ମଧ୍ୟ ତାଙ୍କ ରଣନୀତି ଓ ବ୍ୟକ୍ତିଗତ ସମ୍ପର୍କକୁ ସମ୍ମାନ ଦେଇଥାନ୍ତି । କୁହାଯାଏ ଯେ, ହିମନ୍ତ ବନ୍ଧୁଙ୍କ ବନ୍ଧୁ ଓ ଶତ୍ରୁଙ୍କ ଶତ୍ରୁ । ସେ ନିଜ ବନ୍ଧୁମାନଙ୍କୁ ସାହାଯ୍ୟ କରନ୍ତି ଓ ଶତ୍ରୁ ମାନଙ୍କୁ କେବେ ମଧ୍ୟ ଭୁଲନ୍ତି ନାହିଁ । ଆସାମରେ ତାଙ୍କ ପାଇଁ କଂଗ୍ରେସର ରାଜନୈତିକ ପତନ ଆରମ୍ଭ ହୋଇଛି ବୋଲି ରାଜନୈତିକ ବିଶ୍ଲେଷକ କୁହନ୍ତି ।

ମାସ୍କ କାହିଁକି ପିନ୍ଧିନ ପଚାରିବାରୁ ପୋଲିସ ଉପରକୁ ଆକ୍ରମଣ କଲା ବୁଲା ବିକାଳୀ

ଭୁବନେଶ୍ୱର: ସଟଡାଉନ ସମୟରେ ବିନା ମାସ୍କରେ କାହିଁକି ବଜାରରେ ବୁଲୁଛୁ ପଚାରିବାରୁ ଆକ୍ରମଣର ଶିକାର ହେଲେ ପୋଲିସ କର୍ମଚାରୀ ।ଏହିଭଳି ଅଭାବନୀୟ ଘଟଣା ଦେଖିବାକୁ ମିଳିଛି ପୁରୀ ଜିଲ୍ଲା ବଳଙ୍ଗା ବଜାରରେ ।  ସୂଚନା ଅନୁଯାୟୀ ରବିବାର ସକାଳ ସମୟରେ ବଳଙ୍ଗା ପୋଲିସ ପକ୍ଷରୁ ବଳଙ୍ଗା ବଜାର ପ୍ରବେଶ ପଥ ଠାରେ ମାସ୍କ ଚେକିଂ ସହ ସଟଡାଉନ ପାଇଁ କଡାକଡ଼ି ଚେକିଂ ଚାଲିଥିଲା ।

ସେହି ସମୟରେ ବଳଙ୍ଗା ବଜାରର ଅଜୟ ପ୍ରଧାନ ନାମକ ଜଣେ ଯୁବକ ସାଇକେଲରେ ଏକ କଦଳୀ କାନ୍ଦି ଧରି ବିନା ମାସ୍କରେ ଆସୁଥିଲେ । ପୋଲିସ ତାଙ୍କୁ ଅଟକାଇ ସଟଡାଉନ ସମୟରେ କୁଆଡେ ଯାଉଛ ବୋଲି ପଚାରିବାରୁ ପୋଲିସ ସହ ଯୁକ୍ତିତର୍କ କରିବା ସହ ପାଖରେ ଥିବା ଏକ ଧାରୁଆ ଅସ୍ତ୍ରରେ ଯୁବକ ଜଣକ ପୋଲିସକୁ ଆକ୍ରମଣ କରିଥିଲା ।

ପରେ ଅନ୍ୟ ପୋଲିସ କର୍ମଚାରୀ ମିଶି ଯୁବକ ଜଣକୁ କାବୁ କରିଥିଲେ । ଏଥିରେ ଜଣେ ପୋଲିସ କର୍ମଚାରୀ ଆହତ ହୋଇ ଥିବା ବେଳେ ଆକ୍ରମଣ କରିଥିବା ଯୁବକକୁ ବଳଙ୍ଗା ପୋଲିସ ଗିରଫ କରିଛି । ପୂର୍ଵରୁ ମଧ୍ୟ ୨୦୧୪ ମସିହାରେ ଯୁବକ ଜଣକ ସେହି ଥାନାର ଜଣେ ASI ଙ୍କୁ ଆକ୍ରମଣ କରିଥିବା ବଳଙ୍ଗା ଥାନା ଅଧିକାରୀ ସୂଚନା ଦେଇଛନ୍ତି ।

ଦିଲ୍ଲୀରେ ୧୭ ମେ’ ଯାଏ ବଢିଲା ଲକଡାଉନ, ବାତିଲ ରହିବ ମେଟ୍ରୋ ସେବା

ନୂଆଦିଲ୍ଲୀ: ଦିଲ୍ଲୀରେ ବଢିଲା ଲକଡାଉନ ଅବଧି । ୧୭ ମେ’ ଯାଏ ବଢିଲା ଦିଲ୍ଲୀରେ ଲକଡାଉନ । ଏହି ସମୟରେ ମେଟ୍ରୋ ସେବା ବାତିଲ ରହିବ ବୋଲି ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ସୂଚନା ଦେଇଛନ୍ତି । ଦିଲ୍ଲୀରେ ୨ ରୁ ୩ଦିନ ମଧ୍ୟରେ କରୋନା ସଂକ୍ରମିତଙ୍କ ସଂଖ୍ୟା ୩୫ ପ୍ରତିଶତରୁ ୨୩ ପ୍ରତିଶତକୁ କମିଛି । ସଂକ୍ରମଣ ଆହୁରି କମାଇବାକୁ ମୁଖ୍ୟମନ୍ତ୍ରୀ ଲକଡାଉନ ଅବଧି ବୃଦ୍ଧି ନିଷ୍ପତ୍ତି ନେଇଛନ୍ତି । ପୂର୍ବରୁ ୧୪ଦିନ ଲକଡାଉନ ଘୋଷଣା କରିଥିଲା ଦିଲ୍ଲୀ ।

ଦେଶରେ ବଢୁଛି କରୋନା ସଂକ୍ରମଣ । ଦିନକରେ ୪ଲକ୍ଷ ୩ହଜାର ୭୩୮ ସଂକ୍ରମିତ ଚିହ୍ନଟ ହୋଇଥିବା ବେଳେ ୪ହଜାର ୯୨ ଆକ୍ରାନ୍ତଙ୍କ ଜୀବନ ନେଇଛି କିଲର କରୋନା । ୨୪ ଘଣ୍ଟାରେ ୩ଲକ୍ଷ ୮୬ହଜାର ୪୪୪ ଜଣ ସଂକ୍ରମିତ ସୁସ୍ଥ ହୋଇ ଘରକୁ ଫେରିଛନ୍ତି । ଦେଶରେ ମୋଟ୍ କରୋନା ସଂକ୍ରମିତଙ୍କ ସଂଖ୍ୟା ୨କୋଟି ୨୨ଲକ୍ଷ ୯୬ହଜାର ୪୧୪ ଥିବାବେଳେ ସୁସ୍ଥ ହୋଇଛନ୍ତି କୋଟିଏ ୮୩ଲକ୍ଷ ୧୭ହଜାର ୪୦୪ । ମୃତ୍ୟୁସଂଖ୍ୟା ୨ଲକ୍ଷ ୪୨ହଜାର ୩୬୨ ଥିବା ବେଲେ ଆକ୍ଟିଭ କେସ୍ ୩୭ଲକ୍ଷ ୩୬ହଜାର ୬୪୮ ରହିଛି ।

ଡରାଉଛି କରୋନା: ଶିଶୁଙ୍କ ସୁରକ୍ଷା ପାଇଁ ମୁଖ୍ୟମନ୍ତ୍ରୀ ଦେଲେ ଆଗୁଆ ନିର୍ଦ୍ଦେଶ

ଭୁବନେଶ୍ୱର: ଅନ୍ୟ ରାଜ୍ୟରେ ଶିଶୁଙ୍କଠାରେ କରୋନା ସଂକ୍ରମଣକୁ ନଜରରେ ରଖି ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଆଗୁଆ ପଦକ୍ଷେପ । ରାଜ୍ୟର ସମସ୍ତ ଶିଶୁଯତ୍ନ କେନ୍ଦ୍ରରେ କୋଭିଡ୍‌ ମୁକାବିଲା ପାଇଁ ପ୍ରସ୍ତୁତି ଆରମ୍ଭ ହୋଇଛି । ସ୍ୱତନ୍ତ୍ର ନୋଡାଲ ଅଧିକାରୀଙ୍କୁ ନିଯୁକ୍ତି ଦିଆଯାଇଛି । ସବୁ ଶିଶୁଯତ୍ନ କେନ୍ଦ୍ରରେ ରହିବ ସଂଗରୋଧ ବ୍ୟବସ୍ଥା । ସବୁଠି ରହିବ ଅକ୍ସିମିଟର ଓ ପିପିଇ କିଟ୍‌ । ସବୁ ଜିଲ୍ଲା ଶିଶୁ ସୁରକ୍ଷା ଅଧିକାରୀଙ୍କୁ ଏନେଇ ଚିଠି ଲେଖାଯାଇଛି । ଆଉ ଏକ ଆଗୁଆ ପଦକ୍ଷେପ ନେଇଥିବାରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ମହିଳା ଶିଶୁ ବିକାଶ ବିଭାଗର ଉପଦେଷ୍ଟା ସୁଲତା ଦେଓ କୃତଜ୍ଞତା ଜଣାଇଛନ୍ତି ।

ବିଜେପି ମନ୍ତ୍ରୀଙ୍କ ଅସମ୍ବେଦନଶୀଳ ବକ୍ତବ୍ୟ, ତମ କଥା ଜାଣିନି କିନ୍ତୁ ମନ୍ତ୍ରୀମାନଙ୍କୁ ବଞ୍ଚିବାକୁ ପଡ଼ିବ

ବେଙ୍ଗାଲୁରୁ: କୋଭିଡରେ ଦେଶରେ ହଜାର ହଜାର ଲୋକ ପ୍ରାଣ ହରାଉଥିବା ବେଳେ କର୍ଣ୍ଣାଟକର କ୍ଷମତାସୀନ ବିଜେପିର ଜଣେ ମନ୍ତ୍ରୀଙ୍କ ଅମାନବୀୟ ବୟାନ ପୁରା ଦେଶକୁ ଲଜ୍ଜିତ କରିଛି । ମନ୍ତ୍ରୀ ଉମେଶ କଟ୍ଟିଙ୍କ ପାଇଁ ସାଧାରଣ ଲୋକଙ୍କ ଜୀବନ କୌଣସି ମାନେ ରଖେନା । ଏହା ତାଙ୍କ ବକ୍ତବ୍ୟରୁ ଜଣା ପଡୁଛି । ଗୋଟିଏ ସରକାରୀ ବୈଠକରେ ଯୋଗ ଦେଇ ମନ୍ତ୍ରୀ କଟ୍ଟି କହିଛନ୍ତି ଯେ, ତମ ମାନଙ୍କ କଥା ଜାଣିନି କିନ୍ତୁ କୋଭିଡ୍ କାଳରେ ମନ୍ତ୍ରୀମାନଙ୍କୁ ବଂଚିବାକୁ ପଡିବ । କଟ୍ଟିଙ୍କ ଏହି ବୟାନକୁ ନେଇ କର୍ଣ୍ଣାଟକ ସହିତ ସମ୍ପୂର୍ଣ୍ଣ ଦେଶରେ ହଇଚଇ ସୃଷ୍ଟି ହୋଇଛି ।

ବାଗଲପେଟ୍ ଜିଲ୍ଲାରେ ସରକାରୀ ଅଧିକାରୀଙ୍କ ସହିତ ବୈଠକ କାଳରେ ମନ୍ତ୍ରୀ କଟ୍ଟି ଏଭଳି କହୁଥିବା ରେକର୍ଡ୍ ହୋଇଛି । ବୈଠକରେ ମନ୍ତ୍ରୀ ଅଧିକାରୀମାନଙ୍କୁ ଦେଖାଇ କହୁଛନ୍ତି ଯେ, ‘ ଆମ ସମସ୍ତଙ୍କୁ ବଂଚିବାକୁ ପଡିବ,ତେବେ ତୁମ ମାନଙ୍କ କାଥ ଜାଣିନାହିଁ କିନ୍ତୁ ମନ୍ତ୍ରୀମାନଙ୍କୁ ବଂଚିବାକୁ ପଡିବ’’ । ମନ୍ତ୍ରୀ ପରିହାସ ଛଳରେ ଏଭଳି କହୁଥିବା କୁହାଯାଉଛି । ମନ୍ତ୍ରୀଙ୍କ ବକ୍ତବ୍ୟ ପରେ ତାଙ୍କ ପାଖରେ ବସିଥିବା ବ୍ୟକ୍ତି ହସୁଥିବାର କ୍ୟାମେରାରେ ରେକର୍ଡ୍ ହୋଇଛି । ତେବେ ପରିହାସ ଛଳରେ କହିଲେ ମଧ୍ୟ ସାମ୍ବିଧାନିକ ଶପଥ ନେଇଥିବା ଜଣେ ବ୍ୟକ୍ତି କରୋନା ଭଳି ମହାମାରୀ କାଳରେ ଏଭଳି ବୟାନ ଦେବା କେତେଦୁର ଠିକ୍ ତାକୁ ନେଇ ପ୍ରଶ୍ନ ଉଠୁଛି । ମନ୍ତ୍ରୀଙ୍କ ବକ୍ତବ୍ୟ ନ୍ୟୁଜ୍ ଚ୍ୟାନେଲରେ ପ୍ରସାରିତ ହେବା ପରେ ତାଙ୍କ କ୍ଷମା ପ୍ରାର୍ଥନା ଦାବି ହେଉଛି ।

ମନ୍ତ୍ରୀଙ୍କ ଏଭଳି ବକ୍ତବ୍ୟ ତାଙ୍କ ସମ୍ବେଦନହୀନତାର ପରିଚୟ ଦେଉଛି ବୋଲି ସମାଲୋଚକ କହୁଛନ୍ତି । ଦେଶର ବାକି ରାଜ୍ୟଙ୍କ ଭଳି କର୍ଣ୍ଣାଟକରେ ମଧ୍ୟ କରୋନାର ଦ୍ୱିତୀୟ ପର୍ଯ୍ୟାୟ ଆତଙ୍କ ସୃଷ୍ଟି କରିଛି । ରୋଗୀଙ୍କୁ ବେଡ୍ ମିଳୁନଥିବା ବେଳେ ଅକ୍ସିଜେନ୍ ଅଭାବରୁ ରୋଗୀ ନାହିଁନଥିବା ହଇରାଣ ହରକତ ହେଉଛନ୍ତି ।

ଚନ୍ଦ୍ରଭାଗା ସମୁଦ୍ର କୂଳରୁ ଅଚିହ୍ନା ମହିଳାଙ୍କ ମୃତଦେହ ଠାବ

ପୁରୀ: କୋଣାର୍କ ଚନ୍ଦ୍ରଭାଗା ସମୁଦ୍ର କୂଳରୁ ଅଚିହ୍ନା ମହିଳାଙ୍କ ମୃତଦେହ ଠାବ ହୋଇଛି । ମୃତ ଦେହଟି ସମୁଦ୍ର ଜୁଆରରେ ଭାସି ଆସି କୂଳରେ ଲାଗିଛି । ଆଜି ସକାକୁ ମର୍ଣ୍ଣିଂ ୱାର୍କ କରୁଥିବା ବେଳେ ସ୍ଥାନୀୟ ଲୋକେ ମୃତ ଦେହ ଦେଖିଥିଲେ । ଏନେଇ ପୋଲିସକୁ ଖବର ଦେଇଥିଲେ । ଖବର ପାଇ ଚନ୍ଦ୍ରଭାଗା ସାମୁଦ୍ରିକ ଥାନା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।

ଚନ୍ଦ୍ରଭାଗା ସାମୁଦ୍ରିକ ପୋଲିସ ମୃତ ଦେହ ଉଦ୍ଧାର କରି ବ୍ୟବଛେଦ ପାଇଁ ପଠାଇଛି । ମୃତ୍ୟୁର କାରଣ ଜଣାପଡିନାହିଁ । ସେହିପରି ମୃତ ମହିଳାଙ୍କ ପରିଚୟ ମଧ୍ୟ ମିଳିପାରିନାହିଁ ।