ବରଗଡ଼: ବୁର୍ଲା ଜଗନ୍ନାଥ ମନ୍ଦିର ନିକଟରେ ଟଙ୍କା ବାଣ୍ଟୁଛି ବିଜେପି । ବିଶ୍ଵ ନାମକ ବ୍ୟକ୍ତି ଜଣକ ବିଜେପି ପ୍ରାର୍ଥୀଙ୍କ ପାଇଁ ଟଙ୍କା ବାଣ୍ଟୁଥିବା ବେଳେ ସ୍ଥାନୀୟ ଭୋଟରଙ୍କ ଦ୍ଵାରା ହଟହଟା ହେଉଛନ୍ତି । ଯାହାର ଭିଡିଓ ଭାଇରାଲ ହେବାରେ ଲାଗିଛି । ବ୍ୟକ୍ତି ଜଣକ ବୁର୍ଲା ବିଶ୍ବବିଦ୍ୟାଳୟରେ କାର୍ଯ୍ୟରତ ଥିବା ବେଳେ, ବୁର୍ଲା ଜଗନ୍ନାଥ ମନ୍ଦିର ନିକଟରେ ବିଜେପି ପ୍ରାର୍ଥୀଙ୍କ ପାଇଁ ଟଙ୍କା ବାଣ୍ଟୁଥିବା କହିଛନ୍ତି ଭୋଟର ।
ଗ୍ରାସୀମ କମ୍ପାନୀରେ ଗ୍ୟାସ୍ ପାଇପ୍ ଫାଟି ୪ ଆହତ
ବ୍ରହ୍ମପୁର: ଗ୍ରାସୀମ କମ୍ପାନୀରେ ଅଘଟଣ । ଗ୍ୟାସ ପାଇପ ଫାଟି ୪ ଜଣ ଆହତ ହୋଇଥିବା ବେଳେ ଜଣେ ଗୁରୁତର । ବ୍ରହ୍ମପୁର ସହର ସ୍ଥିତ ଗ୍ରାସୀମ ଇଣ୍ଡଷ୍ଟ୍ରିଜରେ ଘଟିଛି ଅଘଟ ।
ଶୁକ୍ରବାର କମ୍ପାନୀ ପକ୍ଷରୁ ବିଦ୍ୟୁତ ସରବରହ ବନ୍ଦ କରାଯାଇ ଗ୍ୟାସ ପାଇପ ଗୁଡିକ ମରାମତି କାର୍ଯ୍ୟ ଚାଲିଥିଲା । ଅସାବଧାନତା ଯୋଗୁଁ ଗ୍ୟାସ ପାଇପଟି ହଟାତ ଫାଟି ଯାଇଥିଲା । ଗଞ୍ଜାମ ତହସିଲଦାର ଓ ଥାନା ଆଇଆଇସି ନମିତା ପାତ୍ର କମ୍ପାନୀ କର୍ମକର୍ତ୍ତାଙ୍କ ସହ ଆଲୋଚନା କରିଛନ୍ତି l ଆହତ ଶ୍ରମିକଙ୍କୁ କମ୍ପାନୀର ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଚିକିତ୍ସା ପରେ ତାଙ୍କୁ ଘରକୁ ପଠାଇ ଦିଆଯାଇଛି ।
ଆହତମାନଙ୍କ ମଧ୍ୟରେ ଥିଲେ ରାହୁଲ ଯାଦବ, ଶଶିକାନ୍ତ ମହାରଣା, କେଶବ ସାହୁ ଓ ଲକ୍ଷ୍ମୀଧର ନାୟକ । ୪ ଜଣଙ୍କୁ ସାମାନ୍ୟ ଆହତ ଥିବା ବେଳେ ଅନ୍ୟ ଜଣଙ୍କ ଆଖି ଓ ଶରୀରରେ ଏସିଡ ଛିଟିକ ପଡ଼ିଥିବା ଜଣାପଡିଥିଲା । ସଲ୍ଫୁରିକ୍ ପ୍ଲାଣ୍ଟର ପାଇପ ଲାଇନ ଖୋଲୁଥିବା ସମୟରେ ଏହି ଦୁର୍ଘଟଣା ଘଟିଥିବା କୁହାଯାଉଛି ।
ନକ୍ସଲ-ଯବାନଙ୍କ ମଧ୍ୟରେ ଗୁଳି ବିନିମୟ, ଜଣେ ମାଓବାଦୀ ମୃତ
ନନ୍ଦିଘୋଷ ବ୍ୟୁରୋ: ଓଡ଼ିଶା ସୀମାନ୍ତ ଝାଡ଼ଖଣ୍ଡରେ ମାଓବାଦୀ ଓ ସୁରକ୍ଷାକର୍ମୀଙ୍କ ମଧ୍ୟରେ ଗୁଳି ବିନିମୟ । ସୁରକ୍ଷାକର୍ମୀଙ୍କ ଗୁଳିରେ ଜଣେ ମାଓବାଦୀ ନିହତ ହୋଇଥିବାବେଳେ ୩ ଜଣ ଖସିଯିବାରେ ସକ୍ଷମ ହୋଇଛନ୍ତି । ମୃତ ମାଓବାଦୀ ହେଲେ ଝାଡ଼ଖଣ୍ଡ ଖୁଣ୍ଟି ଜିଲ୍ଲା ଅଡ଼କି ଥାନା ଚାରିସିଉଦ ଗାଁର ବୁଧୁରାମ ମୁଣ୍ଡା ।
ଗୁଳି ବିନିମୟ ପରେ ସୁରକ୍ଷା କର୍ମୀ ଗୋଟିଏ ୯ ଏମଏମ ପିସ୍ତଲ, ୨୦ ରାଉଣ୍ଡ ଜୀବନ୍ତ ଗୁଳି ସହ ବହୁ ମାଓବାଦୀ ସାମଗ୍ରୀ ଜବତ କରିଛନ୍ତି । ଜରେଇକେଲା ଥାନା ଅନ୍ତର୍ଗତ ବଳିଆଡ଼ିହି ଜଙ୍ଗଲରେ ଚାରି ଜଣିଆ ମାଓବାଦୀ ଦଳ ଓ ସୁରକ୍ଷାକର୍ମୀ ମୁହାଁମୁହିଁ ହୋଇଥିଲେ । ମାଓବାଦୀମାନେ ସୁରକ୍ଷାକର୍ମୀଙ୍କୁ ଦେଖି ଗୁଳି ଚଳାଇବା ପରେ ସୁରକ୍ଷାକର୍ମୀ ପାଲଟା ଆକ୍ରମଣ କରିଥିଲେ । ସୁରକ୍ଷାକର୍ମୀଙ୍କ ଗୁଳିମାଡ଼ରେ ଜଣେ ମାଓବାଦୀ ନିହତ ହୋଇଥିବା ବେଳେ ତିନି ମାଓବାଦୀ ଖସି ପଳାଇବାକୁ ସକ୍ଷମ ହୋଇଛନ୍ତି ।
ଏକାଧିକ ପ୍ରସଙ୍ଗକୁ ନେଇ ବିଜେପି ବିରୋଧରେ ସିଇଓଙ୍କ ନିକଟରେ ଫେରାଦ ହେଲା ବିଜେଡି
ଭୁବନେଶ୍ବର: ଏକାଧିକ ପ୍ରସଙ୍ଗକୁ ନେଇ ବିଜେପି ବିରୋଧରେ ସିଇଓଙ୍କ ନିକଟରେ ଫେରାଦ ହେଲା ବିଜେଡି । ରାତିପାହିଲେ ତୃତୀୟ ପର୍ଯ୍ୟାୟ ନିର୍ବାଚନ ରହିଛି । ଏହାପୂର୍ବରୁ ବିଭିନ୍ନ ସ୍ଥାନରେ ବିଜେପି ସମର୍ଥକ ହିଂସାକାଣ୍ଡ ଘଟାଉଥିବା ଅଭିଯୋଗ ହୋଇଛି ।
କିଛିଦିନ ତଳେ ବିଜେପିର ବିଧାୟକ ପ୍ରାର୍ଥୀ ଏନେଇ ଧମକ ମଧ୍ଯ ଦେଇଥିଲେ । ଆଜି ସକାଳ ଲିଙ୍ଗରାଜ ମନ୍ଦିର ପାଖରେ ପୋଲିସଙ୍କୁ ମଧ୍ଯ ଗାଳିଗୁଲଜ କରିଥିଲେ । ନିର୍ଦ୍ଦିଷ୍ଟ ଗଣମାଧ୍ଯମ ମଧ୍ଯ ବିଜେପି ପାଇଁ ଟଙ୍କା ବାଣ୍ଟୁଥିବା ଅଭିଯୋଗ ହୋଇଛି । ପରଜଙ୍ଗ ନିର୍ବାଚନ ମଣ୍ଡଳୀର ବିଧାୟକ ପ୍ରାର୍ଥୀ ବିଭୂତି ପ୍ରଧାନଙ୍କ ଲୋକମାନେ ବିଜେଡି କର୍ମୀଙ୍କ ଉପରେ ଆକ୍ରମଣ କରିଛନ୍ତି । ଭୁବନେଶ୍ବର ଉତ୍ତର ନିର୍ବାଚନମଣ୍ଡଳୀରେ ଭାରତୀୟ ଜନତା ପାର୍ଟି ଗୋଟିଏ ବୁଥର ମାତ୍ର ୭୦ ମିଟର ଦୂରରେ ଦୁଇଟି ଛୋଟ ଅଫିସ କରିଛନ୍ତି । ଯାହା ନିର୍ବାଚନ ଆଚରଣବିଧି ଉଲ୍ଲଂଘନ କରୁଛି । ନିୟମ ଅନୁସାରେ ବୁଥ ଠାରୁ ଦଳୀୟ ଅଫିସ ୩୦୦ ମିଟର ଦୂରରେ ରହିବା କଥା । ଏଣୁ ବିଜେପି ବିରୋଧରେ କଡ଼ା କାର୍ଯ୍ୟାନୁଷ୍ଠାନ ପାଇଁ ଦଳ ଦାବି କରିଛି ।
ମେ’ରେ ରେକର୍ଡ ପରିମାଣର ନିଶା ସାମଗ୍ରୀ ଜବତ, ୪୧୪୧ ମାଫିଆ ଗିରଫ
ଭୁବନେଶ୍ବର: ନିର୍ବାଚନ ସମୟରେ ଅବକାରୀ ଧରପଗଡ । ମେ’ ମାସରେ ରେକର୍ଡ ପରିମାଣର ବେଆଇନ ନିଶା ସାମଗ୍ରୀ ଜବତ । ୨୩ ଦିନରେ ୪ ହଜାର ୯୭୬ ମାମଲା, ୪ ହଜାର ୧୪୧ ନିଶା ମାଫିଆ ଗିରଫ ।
ସାଧାରଣ ନିର୍ବାଚନକୁ ଦୃଷ୍ଟିରେ ରଖି ଅବକାରୀ ବିଭାଗ ମଦ ମାଫିଆ, ବେଆଇନ ବ୍ରାଉନସୁଗାର ବେପାରୀ ଓ ଗଞ୍ଜେଇ ମାଫିଆଙ୍କ ବିରୋଧରେ କାର୍ଯ୍ୟାନୁଷ୍ଠାନକୁ ଜୋରଦାର କରିଛି । ଚଳିତ ମାସରେ ୨୩ ତାରିଖ ପର୍ଯ୍ୟନ୍ତ ୨ ଲକ୍ଷ ୪୯ ହଜାର ୫୧୦ ଲିଟର ଦେଶୀ ମଦ, ୮୭ ଲିଟର ନକଲି ବିଦେଶୀ ମଦ, ୫୩ ଲିଟର ଟିକସ ଫାଙ୍କି ବିଦେଶୀ ମଦ, ୨ ହଜାର ୬୧୩ ଲିଟର ଭାରତ ତିଆରି ବିଦେଶୀ ମଦ, ୧୫ ହଜାର ୧୧୬ ଲିଟର ବିୟର, ୫ ହଜାର ୩୦୫ ଲିଟର ମହୁଲି, ୪୧୦ କିଲୋ ଭାଙ୍ଗ, ୧ ହଜାର ୮୫୨ ଲିଟର ଆସ୍କା ଫଟି ଓ ୮୪ ହଜାର ୧୬୩ କେଜି ମହୁଆ ଫୁଲ ଏବଂ ୪୩୪ଟି ଗାଡି ଜବତ । ସେହିପରି ବେଆଇନ ଗଞ୍ଜେଇ, ହେରୋଇନ୍ ଓ କଫ୍ ସିରପ୍ ମାଫିଆଙ୍କ ବିରୋଧରେ ଚାଲିଥିବା ନିରନ୍ତର ଓ ଜୋରଦାର ଅଭିଯାନ ମଧ୍ୟ ବହୁତ ଭଲ ଫଳାଫଳ ଦେଇଛି । ଏହି ଘଟଣାରେ ୧୧୪ଟି ମାମଲା ରୁଜୁ ହୋଇଥିବା ବେଳେ ୧୩୦ ଜଣ ମାଫିଆଙ୍କୁ ଗିରଫ କରାଯାଇଛି ।
ରାତି ପାହିଲେ ୬ ଲୋକସଭା, ୪୨ ବିଧାନସଭା ଆସନରେ ଭୋଟିଂ; ନିୟୋଜିତ ହେବେ ୩୫ ହଜାର ପୋଲିସ୍
ଭୁବନେଶ୍ବର: ରାତି ପାହିଲେ ଦେଶରେ ଷଷ୍ଠ ଓ ରାଜ୍ୟରେ ତୃତୀୟ ପର୍ଯ୍ୟାୟ ନିର୍ବାଚନ । ୬ ଲୋକସଭା ଓ ଏହାର ଅଧୀନରେ ଥିବା ୪୨ ବିଧାନସଭା ଆସନରେ ହେବ ଭୋଟିଂ । ଏଥିପାଇଁ ସୁରକ୍ଷା ବ୍ୟବସ୍ଥାକୁ କଡାକଡି କରାଯାିଛି । ଏହି ପର୍ଯ୍ୟାୟରେ ନିୟୋଜିତ ହେବେ ୩୫ ହଜାର ପୋଲିସ୍ ।
ଏହି ପର୍ଯ୍ୟାୟରେ ୧୨ଟି ପୋଲିସ ଜିଲ୍ଲାରେ ଥିବା ୧୦ ହଜାର ୫୫୧ଟି ବୁଥରେ ଭୋଟ ଗ୍ରହଣ କରାଯିବ । ୨୦ ପ୍ରତିଶତ ବୁଥ ସମ୍ବେଦନଶୀଳ ରହିଛି । ଏଥିପାଇଁ ନିୟୋଜିତ ହେବେ ୩୫ ହଜାର ଫୋର୍ସ । ୧୨ଟି ଜିଲ୍ଲାରେ ୧୨୧ କମ୍ପାନୀ ଅର୍ଦ୍ଧ ସାମରିକ ବାହିନୀ , ୧୦୬ ପ୍ଲାଟୁନ ଓଡିଶା ଆର୍ମଡ଼ ପୋଲିସ ମୁତୟନ ହେବେ । ସମ୍ବଲପୁର, କେଉଁଝର, ଖୋର୍ଦ୍ଧା, କଟକ ପାଇଁ ୪ ଜଣ ଆଇପିଏସ ଦାୟିତ୍ୱରେ ରହିବେ । ବୁଥ ତଦାରଖ ପାଇଁ ୭୬୩ଟି ମୋବାଇଲ ପାଟ୍ରୋଲିଂ ପାର୍ଟି କାମ କରୁଛି । ଜିପିଏସ୍ ଜରିଆରେ କଣ୍ଟ୍ରୋଲ ରୁମକୁ କରାଯିବ ମନିଟର । ସମ୍ବେଦନଶୀଳ ସ୍ଥାନରେ କୁଇକ ଆକ୍ସନ ଟିମ୍ କାମ କରିବ । ୧୨ଟି ଜିଲ୍ଲା ସୀମାରେ ଥିବା ୧୭ଟି ବର୍ଡର ଚେକପୋଷ୍ଟରେ କଡାକଡି ଚେକିଂ ଚାଲିଛି । ନିର୍ବାଚନ କମିଶନଙ୍କ ନିର୍ଦ୍ଦେଶ ମୁତାବକ ୩୩୧ଟି ଫ୍ଲାଇଙ୍ଗ ସ୍କ୍ବାଡ୍ ତଦାରଖ କରୁଛନ୍ତି । ଏହା ବ୍ୟତୀତ ୩୪୩ଟି ଷ୍ଟାଟିକ ସର୍ଭେଲାନ୍ସ ଟିମ ପରିଭ୍ରମଣ କରୁଛି । ଏହି ୧୨ଟି ଜିଲ୍ଲାରେ ୨୫ଟି ଇଭିଏମ ଷ୍ଟ୍ରଙ୍ଗ ରୁମ ରହିଛି ।
ଆଚରଣବିଧି ଉଲ୍ଲଂଘନ ନେଇ ୧୭ଟି କେସ୍ ହୋଇଥିବା ବେଳେ ସମୁଦାୟ ୭୮ଟି କେସ ରୁଜୁ ହୋଇଛି । ୮୯ ଲୋକଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଇଛି । ଜାନୁଆରୀ ପ୍ରଥମ ସପ୍ତାହରୁ ଆଜି ଭିତରେ ୩୪ ହଜାର ୪୦୩ ୱାରେଣ୍ଟ ଇସ୍ୟୁ ହୋଇଛି । ୪ ହଜାର ପଳାତକଙ୍କ ବିରୋଧରେ ଲଟକା ଲାଗିଛି । ଦଫା ୧୦୭, ୧୦୯, ୧୧୦ ଜରିଆରେ ଅଭିଯୁକ୍ତଙ୍କୁ ଦମନ କରାଯାଇଛି । ମୋଟ ୫୦ ହଜାରରୁ ଊର୍ଦ୍ଧ୍ବ ପ୍ରୋସିଡିଂ ଜାରି ହୋଇଛି । ଭୁବନେଶ୍ୱର କଟକରେ ୩ ଜଣଙ୍କୁ ତଡ଼ିପାର ଘୋଷଣା କରାଯାଇଛି । ୧୧ ଜଣଙ୍କୁ NSAରେ ବୁକ୍ କରାଯାଇଛି । ୨୫୪ ଜଣଙ୍କଠାରୁ ବେଆଇନ ଅସ୍ତ୍ରଶସ୍ତ୍ର ଜବତ କରାଯାଇଛି । ୩ଟି ବନ୍ଧୁକ ତିଆରି ସ୍ଥାନ ଠାବ କରାଯାଇ ୧୪ ଜଣଙ୍କୁ ଗିରଫ କରାଯାଇଛି । ୬ ଲକ୍ଷ ୭୮ ହଜାର ଲିଟର ମଦ ଜବତ ସହ ୨୫ ହଜାରରୁ ଅଧିକ NDPS କେସ ହୋଇଛି । ୮ କୁଇଣ୍ଟାଲ ଗଞ୍ଜେଇ ଜବତ କରି ୯୪୧ ଲୋକଙ୍କୁ ଗିରଫ କରାଯାଇଛି । ୫ କେଜି ବ୍ରାଉନସୁଗର ମଧ୍ୟ ଜବତ କରାଯାଇଛି । ଜବତ ନିଶା ସାମଗ୍ରୀର ଆନୁମାନିକ ମୂଲ୍ୟ ୮୯ କୋଟି ହେବ । SST ପକ୍ଷରୁ ଚଢ଼ାଉ କରାଯାଇ ଗାଡି ଭିତରୁ ୬ କୋଟିରୁ ଊର୍ଦ୍ଧ୍ବ ଟଙ୍କା ଜବତ କରାଯାଇଛି ।
ସୋସିଆଲ ମିଡିଆ ମନିଟରିଂ ସେଲ୍ ଗଠନ କରାଯାଇ ଆପତ୍ତିଜନକ ପୋଷ୍ଟ ହଟାଯାଇଛି । ଅଭିଯୁକ୍ତଙ୍କ ବିରୋଧରେ କେସ ରୁଜୁ ହୋଇଛି । ଅବାଧ, ମୁକ୍ତ, ନିରପେକ୍ଷ ନିର୍ବାଚନ ପାଇଁ ଓଡିଶା ପୋଲିସ ପ୍ରତିଶ୍ରୁତିବଦ୍ଧ ବୋଲି କହିଛନ୍ତି ପୋଲିସ ଡିଜିପି ।
ମେ‘ ୨୬ରେ ମାଟ୍ରିକ ରେଜଲ୍ଟ: ପରୀକ୍ଷା ଫଳ ପ୍ରକାଶର ୬ ଘଣ୍ଟା ମଧ୍ୟରେ ମିଳିବ ଡିଜିଟାଲ ପ୍ରମାଣପତ୍ର
କଟକ: ମାଧ୍ୟମିକ ଶିକ୍ଷା ପରିଷଦ ବୋର୍ଡ ଦ୍ଵାରା ପ୍ରରିଚାଳିତ ଦଶମ ମାଟ୍ରିକ ପରୀକ୍ଷାର ଫଳ ମେ ୨୬ ତାରିଖ ଦିନ ପ୍ରକାଶ ପାଇବ । ଏନେଇ ଆଜି ବୋର୍ଡ ସଭାପତି ବିଧିବଦ୍ଧ ଭାବରେ ଘୋଷଣା କରିଛନ୍ତି । ପ୍ରଥମ ଥର ପାଇଁ ବିଦ୍ୟାର୍ଥୀ ଫଳ ପ୍ରକାଶନର ୬ ଘଣ୍ଟା ମଧ୍ୟରେ ଡିଜିଟାଲ ମାଟ୍ରିକ ପ୍ରମାଣ ପତ୍ର ପାଇପାରିବେ । ଫଳାଫଳକୁ ନେଇ ଥିବା କୌଣସି ସମସ୍ୟାର ସାମଧାନ ପାଇଁ ଆଜିଠାରୁ ବୋର୍ଡ ତାର କଣ୍ଟେଲ ରୁମରେ କାଉସିଲରମାନଙ୍କୁ ନିଯୁକ୍ତ କରିଥିବା କର୍ତ୍ତୃପକ୍ଷ ସୂଚନା ଦେଇଛନ୍ତି ।
୨୬ ତାରିଖରେ ମାଟ୍ରିକ୍ ରେଜଲ୍ଟ । ରବିବାର ଦିନ ୧୦ଟା ୩୦ରେ ଫଳାଫଳ ଘୋଷଣା । ଏକଘଣ୍ଟା ମଧ୍ଯରେ ୱେବସାଇଡିରେ ଉପଲବ୍ଧ ହେବ ଫଳ । ଏନେଇ ସୂଚନା ଦେଇଛନ୍ତି ବୋର୍ଡ ସଭାପତି । ପ୍ରଥମ ଥର ପାଇଁ ରେଜଲ୍ଟ ଘୋଷଣାର ୬ ଘଣ୍ଟା ମଧ୍ଯରେ ଅନଲାଇନ ଓ ୱାଟ୍ସଅପରେ ଡିଜିଟାଲ ମାଟ୍ରିକ ପ୍ରମାଣପାତ୍ର ପାଇପାରିବେ ଛାତ୍ରଛାତ୍ରୀ । ଫଳ ପ୍ରକାଶନର ଏକ ଘଣ୍ଟା ମଧ୍ଯରେ www.bscodisha.ac.In ସାଇଡରେ ଉପଲବ୍ଧ ହେବ ରେଜଲ୍ଟ । ଇଣ୍ଟରନେଟ୍ ସମସ୍ୟା ଥିବା ଅଞ୍ଚଳର OR-10-ରୋଲ ନାମ୍ବର ଲେଖି ୫୬୭୬୭୫୦ କୁ ଏସଏମଏସ କଲେ ରେଜଲ୍ଟ ମିଳିପାରିବ । ରି-ଚେକିଙ୍ଗ ପାଇଁ ମେ ୨୯ରୁ ଜୁନ ୧୨ ପର୍ଯ୍ୟନ୍ତ ୧୫ ଦିନ ସମୟ ଦିଆଯାଇଛି । ବିଦ୍ୟାର୍ଥୀଙ୍କ ପରୀକ୍ଷା ଫଳ ଜନିତ ସମସ୍ତ ସମସ୍ୟାର ସମାଧାନ ପାଇଁ କାଉନସିଲରଙ୍କୁ ନେଇ ଖୋଲାଯାଇଛି କଣ୍ଟ୍ରୋଲ ରୁମ ।
ରେଜଲ୍ଟ ତାରିଖ ଘୋଷଣା ପରେ ଖୁସି ପ୍ରକାଶ କରିଛନ୍ତି ଉଭୟ ଶିକ୍ଷକ ଓ ବିଦ୍ୟାର୍ଥୀ । ପ୍ରଚଣ୍ଡ ଖରା ନିର୍ବାଚନୀ ମାହୋଲ ମଧ୍ୟରେ ସମୟ ଥାଇ ଫଳ ପ୍ରକାଶ ପାଇବା ଦ୍ଵାରା ବିଦ୍ୟାର୍ଥୀଙ୍କ ପାଇଁ ଏହା ବେଶ ଲାଭ ଦାୟକ ହେବ ବୋଲି କହିଛନ୍ତି ଶିକ୍ଷକ ଓ ଶିକ୍ଷାବିତ୍ । ପ୍ରଥମ ଥର ପାଇଁ ରେଜଲ୍ଟ ସହିତ ପ୍ରମାଣପତ୍ର ପାଇବାକୁ ଯାଉଥିବାରୁ ବିଦ୍ୟାର୍ଥୀ ବୋର୍ଡ କର୍ତ୍ତୃପକ୍ଷଙ୍କ ଉଦ୍ୟମକୁ ସ୍ୱାଗତ କରିଛନ୍ତି ।
ଚଳିତବର୍ଷ ରାଜ୍ୟରେ ୫ ଲକ୍ଷ ୪୧ ହଜାର ବିଦ୍ୟାର୍ଥୀ ରେଗୁଲାର ମାଟ୍ରିକ ପରୀକ୍ଷା ଦେଇଛନ୍ତି । ଏଥିସହିତ ମାଧ୍ୟମା ଓ ପତ୍ର ବିନିମୟର ପରୀକ୍ଷା ସମ୍ପୂର୍ଣ୍ଣ ହୋଇଛି । ୨୬ରେ ସମସ୍ତ ରେଜଲ୍ଟ ଏକାଠି ପ୍ରକାଶ ପାଇବ ।
ଯୋଗୀଙ୍କୁ ବିଜେଡି ଦେଲା ରାଜ୍ୟ ବିଜେପିର ୪ ମାଫିଆ ନେତାଙ୍କ ତାଲିକା
ଭୁବନେଶ୍ବର: ମାଫିଆ ହଟାଇବା ପାଇଁ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ମନ୍ତବ୍ୟ ଉପରେ ବିଜେଡି ରଖିଛି ତୀବ୍ର ପ୍ରତିକ୍ରିୟା । କହିଲା- ଯୋଗୀଙ୍କ ବକ୍ତବ୍ୟରୁ ଲାଗୁଛି ଯେମିତି ରାଜ୍ୟ ବିଜେପି ସମ୍ପର୍କରେ ସେ ଅବଗତ ନୁହଁନ୍ତି ବା ତାଙ୍କ ପାଖରେ କିଛି ତଥ୍ୟ ନାହିଁ । ସେ ଜାଣି ନାହାନ୍ତି ଯେ ରାଜ୍ୟ ବିଜେପିରେ ମାଳମାଳ ଅପରାଧୀ । ମାଳମାଳ ମାଫିଆଙ୍କୁ ବିଜେପି ବାଛି ନେଉଥିବା ବିଜେଡି ଅଭିଯୋଗ କରିଛି । ୪ ବିଜେପି ଦାଗୀ ନେତାଙ୍କ ସମ୍ପର୍କରେ ଉଦାହରଣ ଦେଇଛି ବିଜେଡି ।
ଓଡ଼ିଶାରେ ବିଜେପି କ୍ଷମତାକୁ ଆସିଲେ ମାଫିଆଙ୍କୁ ବାନ୍ଧି ଜେଲରେ ପୂରାଯିବ ବୋଲି ଯୋଗୀ ଆଦିତ୍ୟନାଥଙ୍କ ମନ୍ତବ୍ଯ ଉପରେ ବିଜେଡି ପ୍ରତିକ୍ରିୟା ରଖିଛି । ରାଜ୍ୟ ବିଜେପିରେ ଗଣ୍ଡା ଗଣ୍ଡା ଦାଗୀ ନେତା ଥିବା ବେଳେ ଯୋଗୀଙ୍କୁ ଦେଖାଯାଉନାହିଁ ବୋଲି ବିଜେଡିର ଅଭିଯୋଗ କରିଛି । ସାମ୍ବାଦିକ ସମ୍ମିଳନୀରେ ୪ ଜଣ ବିଜେପି ନେତାଙ୍କ ଉଦାହରଣ ଦେଇଛି ବିଜେଡି । ଜାଣନ୍ତୁ, କେଉଁ ମାଫିଆ ନେତାଙ୍କ ତାଲିକା ଦେଲା ବିଜେଡି ।
ବୈଜୟନ୍ତ ପଣ୍ଡା
ଅନୁସୂଚିତ ଜାତି ଜନଜାତିଙ୍କ ଜମି ହଡ଼ପ ନେଇ ମାମଲା ଚାଲିଛି । ତାଙ୍କ ପରିବାରର ମାଲିକାନାରେ ଥିବା ଗଣମାଧ୍ୟମ ସରକାରୀ ଜମି ହଡ଼ପ କରିଛି । ସେହି ବୈଜୟନ୍ତ ପଣ୍ଡାଙ୍କ ପାଇଁ ଯୋଗୀ ଭୋଟ ମାଗିଛନ୍ତି ।
ପ୍ରଶାନ୍ତ ଜଗଦ୍ଦେବ
ପ୍ରଶାନ୍ତ ବାରମ୍ବାର କହୁଛନ୍ତି, ସେ ସବୁଠାରୁ ବଡ଼ଗୁଣ୍ଡା । ଗତକାଲି ମଧ୍ୟ ତାଙ୍କ ଧୃଷ୍ଟତା ଦେଖିବାକୁ ମିଳିଛି । ସେ ଗାଡ଼ି ଚଢ଼ାଇଲେ ବିଜେପି କର୍ମୀଙ୍କ ଉପରେ । ବିଜେଡି ତାଙ୍କୁ ବହିଷ୍କାର କଲା, ବିଜେପି ତାଙ୍କୁ ଗ୍ରହଣ କରିନେଲା । ଏପରି ସ୍ଥଳେ ଯୋଗୀ ଅଦିତ୍ୟନାଥ ଅପରାଧ ହଟାଇ ଦେବୁ କହୁଛନ୍ତି ବୋଲି କହି ବିଜେଡି କଟାକ୍ଷ କରିଛି ।
ପ୍ରଦୀପ ପାଣିଗ୍ରାହୀ
ପ୍ରଦୀପ ଜଣେ ବିଧାୟକ ହୋଇ ଚୋରି କରିଛନ୍ତି, ଠକିଛନ୍ତି ଓ ଲୁଟିଛନ୍ତି । ବିଜେଡି ବହିଷ୍କାର କରିବା ପରେ ବିଜେପି କୋଳେଇ ନେଇଛି । ଯୋଗୀ ଏସମ୍ପର୍କରେ ଅବଗତ ଅଛନ୍ତି କି ନାହିଁ ବୋଲି ପ୍ରଶ୍ନ କରିଛି ବିଜେଡି ।
ସମୀର ଦାଶ
ବର୍ଷକ ତଳେ ସମୀର ଦାଶଙ୍କ ବିରୋଧରେ ବିଜେପି ଗର୍ଜନ କରୁଥିଲା । ସମୀର ବିଭିନ୍ନ ଅପରାଧରେ ସଂଶ୍ଳିଷ୍ଟ ବୋଲି ଗର୍ଜନ କରୁଥିଲା ବିଜେପି । ପ୍ରଭାତୀ ପରିଡ଼ା ଗର୍ଜନ କରୁଥିଲେ । ହେଲେ ଏବେ ତାଙ୍କୁ କୋଳେଇ ନେଇଛନ୍ତି । ବିଜେପି ପ୍ରକୃତରେ ନାରୀଙ୍କୁ ସମ୍ମାନ ଦେଇଥିଲେ ସମୀରଙ୍କୁ କୋଳେଇ ନଥାନ୍ତା । ରାଜ୍ୟ ବିଜେପି ବୋଧହୁଏ ଏସବୁ ନେତାଙ୍କ ବାବଦରେ ଯୋଗୀଙ୍କୁ ଅବଗତ କରାଇନାହିଁ ବୋଲି ବିଜେଡି ତାତ୍ସଲ୍ୟ କରି କହିଛି ।
ଉତ୍ତର ପ୍ରଦେଶ ଭଳି ମାଫିଆଙ୍କୁ ହଟାଇବା ଆହ୍ବାନ ଯୋଗୀ ଆଦିତ୍ୟନାଥ ଓଡ଼ିଶାରେ ଦେବା ପୂର୍ବରୁ ରାଜ୍ୟ ବିଜେପିର ଅସଲ ଚେହେରା ଓ ନେତାଙ୍କ ଚରିତ୍ର ବାବଦରେ ଅବଗତ ହେବା ଜରୁରୀ ବୋଲି ବିଜେଡି କହିଛି ।
ଭୋଟ ହାତେଇବାକୁ ବିଜେପି ଡରାଉଛି, ଧମକାଉଛି ଓ ଟଙ୍କା ବାଣ୍ଟୁଛି
ଭୁବନେଶ୍ବର: ଭୋଟ ହାତେଇବାକୁ ମସୁଧା କରୁଛି ବିଜେପି । ଡରାଉଛନ୍ତି, ଧମକାଉଛନ୍ତି, ଖୋଲାଖୋଲି ଟଙ୍କା ବାଣ୍ଟୁଛି । ବିରୋଧ କଲେ ଆକ୍ରମଣ କରୁଛନ୍ତି ବିଜେପି କର୍ମୀ । ନିର୍ବାଚନରେ ପରାଜୟ ଜାଣି ହିଂସାତ୍ମକ ପନ୍ଥା ଆପଣାଉଛି ବିଜେପି । ଆସନ୍ତାକାଲି ରାଜ୍ୟରେ ତୃତୀୟ ପର୍ଯ୍ୟାୟ ନିର୍ବାଚନ ଥିବା ବେଳେ, ବିଭିନ୍ନ ସ୍ଥାନରେ ଗଣ୍ଡଗୋଳ କରୁଛନ୍ତି ବିଜେପି କର୍ମୀ ।
ଭୋଟ ଲାଗି ଖୁଲମଖୁଲ୍ଲା ଟଙ୍କା ବଣ୍ଟନ । ଗଣତନ୍ତ୍ର ଉପରେ କଳା ଟଙ୍କାର ପ୍ରହାର । ଅଧିକାର ସାବ୍ଯସ୍ତ କରିବା ଲାଗି ପରାମର୍ଶ ଦେବା ବଦଳରେ ଟଙ୍କାରେ ଖରିଦ କରାଯାଉଛି ଭୋଟ । ଗାଁ ଗାଁରେ ପଶି ଲୋକଙ୍କୁ ଟଙ୍କା ବାଣ୍ଟୁଛନ୍ତି ବିଜେପି ଏଜେଣ୍ଟ । ଗାଁ ଗହଳିରେ ବିଜେପି ମାଫିଆ କରିଛନ୍ତି ଅନ୍ଧାରୀ ବିଜେ । ପାଲଲହଡା ନିର୍ବାଚନ ମଣ୍ଡଳିର ଶିଗଡ଼ ପଞ୍ଚାୟତର କୋଳିପାଳ ଗାଁରେ ପଶି ବିଜେପି ଏଜେଣ୍ଟ ନିରୀହ ଲୋକଙ୍କୁ ପଦ୍ମ ଫୁଲ ଚିହ୍ନରେ ଭୋଟ ଦେବାକୁ ପ୍ରବର୍ତ୍ତାଉଛନ୍ତି। କୁହାଯାଉଛି ଭୋଟ ପିଛା ବିଜେପି କର୍ମୀ ଦେଉଛନ୍ତି ୫ ଶହ ଟଙ୍କା । ରାଜ୍ଯ ବିଜେପି ଗୁଣ୍ଡା, ଅପରାଧୀଙ୍କୁ ଦଳରେ ସାମିଲ କରୁଥିବା ବେଳେ, ନିର୍ବାଚନରେ କଳଙ୍କିତ ଉପାୟରେ ଭୋଟ ହାତେଇବା ଲାଗି ଗ୍ରହଣ କରୁଛନ୍ତି କୁତ୍ସିତ ମାଧ୍ଯମ ।
ବିଜେପିକୁ ଘାରିଛି ପରାଜୟ ଭୟ । ହାରିବା ଜାଣି ଗଡ଼ବଡ଼ କରିବାକୁ ଯୋଜନା । ଯେନେତେନେ ପ୍ରକାରେ ଭୋଟ ହାତେଇବାକୁ ବିଜେପି ପ୍ରାର୍ଥୀଙ୍କ ମସୁଧା । ଆସନ୍ତାକାଲି ତୃତୀୟ ପର୍ଯ୍ୟାୟ ନିର୍ବାଚନ ଥିବା ବେଳେ ବିଭିନ୍ନ ସ୍ଥାନରେ ବିଜେପି କର୍ମୀ ରଚୁଛନ୍ତି ହିଂସା । ଆଠଗଡ଼ ତରଡିଙ୍ଗ ଗାଁରେ ମୁଣ୍ଡ ଟେକିଛି ରାଜନୈତିକ ହିଂସା । ଟଙ୍କା ଓ ମାଦକ୍ୟ ଦ୍ରବ୍ୟ ବଣ୍ଟାକୁ ବିରୋଧ କରିବାରୁ ବିଜେଡି କର୍ମୀଙ୍କୁ ଆକ୍ରମଣ କରିଛନ୍ତି ବିଜେପି କର୍ମୀ । ମେଟାଲ୍, କଟୁରୀ ସହ ମାରଣାସ୍ତ୍ରରେ କରିଛନ୍ତି ଆକ୍ରମଣ । ଯେଉଁଥିରେ ଆହତ ହୋଇଛନ୍ତି ୫ରୁ ଅଧିକ ବିଜେଡି କର୍ମୀ । ଖାଲି ସେତିକି ନୁହେଁ, ଛେଣ୍ଡିପଦା ଟେଣ୍ଟରୋଇ ବାରମଞ୍ଚା ସାହିରେ ଦେଖିବାକୁ ମିଳିଛି ଅଶାନ୍ତି । ବିଜେପି କର୍ମୀଙ୍କ ଭୂଜାଲି ଆକ୍ରମଣରେ ଗୁରୁତର ହୋଇଛନ୍ତି ବିଜେଡି କର୍ମୀ ।
କଟକ ନରସିଂହପୁର ବ୍ଲକ କାନପୁରରେ ହଟହଟା ହୋଇଛନ୍ତି ପୂର୍ବତନ ଜିଲ୍ଲା ପରିଷଦ ସଭ୍ୟା । ବିଜେପି ବିଧାୟକ ପ୍ରାର୍ଥୀ ସମ୍ବିତ ତ୍ରିପାଠୀଙ୍କ ପାଇଁ ଟଙ୍କା ବାଣ୍ଟୁଥିବା ବେଳେ ଲୋକଙ୍କ ହାତରେ ଧରା ପଡ଼ିଛନ୍ତି । ୧୯ ନମ୍ବର ଜୋନରେ ବିଜେପିକୁ ଭୋଟ ଦେବାକୁ ବାଧ୍ୟ କରିବାରୁ ଉତ୍ତେଜନା ପ୍ରକାଶ ପାଇଛି । ସେହିପରି ବାଙ୍କୀ ତାଳବସ୍ତ ଗାଁରେ ରାତି ଅଧରେ ଟଙ୍କା ବାଣ୍ଟୁଥିବା ବେଳେ, ବିରୋଧ କରିଛନ୍ତି ବିଜେଡି କର୍ମୀ । ଏପଟେ ବିଜେଡିର ଲୋକପ୍ରିୟତା ଦେଖି ରକ୍ତମୁଖା ହୋଇଛି ଭାରତୀୟ ଜନତା ପାର୍ଟି । ପରଜଙ୍ଗ ନିର୍ବାଚନ ମଣ୍ଡଳୀରେ ବିଜେଡି କର୍ମୀଙ୍କୁ ସଂଘବଦ୍ଧ ଆକ୍ରମଣ ହୋଇଥିବା ଅଭିଯୋଗ ହୋଇଛି ।
ସବୁ ଭିତରେ ରେଙ୍ଗାଲି ବିଧାନସଭା ନିର୍ବାଚନ ମଣ୍ଡଳିର ଠେଲକୋଲି ଅଞ୍ଚଳରେ ଘଟିଛି ଅଭାବନୀୟ ଘଟଣା । ଏକ ନିର୍ଦ୍ଦିଷ୍ଟ ଗଣମାଧ୍ଯମର ପ୍ରତିନିଧିମାନେ କାରରେ ଯାଇ ଟଙ୍କା ବାଣ୍ଟିବାକୁ ଉଦ୍ଯମ କରୁଥିବା ବେଳେ, ଗ୍ରାମବାସୀଙ୍କ ଆକ୍ରୋଶର ଶିକାର ହୋଇଛନ୍ତି । ମିଡିଆ ଗାଡ଼ିରେ ବସିଥିଲେ ବିଜେପିର ଜଣେ ମହିଳା କର୍ମୀ । ଥାନାରେ ଅଭିଯୋଗ ପରେ ଘଟଣାସ୍ଥଳରୁ ଖସି ଯାଇଛି ମିଡିଆ ଗାଡି । ସେହିପରି ଚିରକୁଟି ବଣ୍ଟାକୁ ଟଙ୍କା ବଣ୍ଟା କହି ସଂଖ୍ଯାଲଘୁଙ୍କୁ ଅପମାନ କରିବାକୁ ହୀନ ଉଦ୍ୟମ କରିଛି ଉକ୍ତ ଗଣମାଧ୍ଯମ । ସତକୁ ଲୁଚାଇ ନିଜ ଏଜେଣ୍ଡାକୁ ଚରିତାର୍ଥ କରିବାକୁ କେବଳ ଓର ଉଣ୍ଡୁଛି ଏହି ଗଣମାଧ୍ଯମ। ଏପଟେ ଚିଲିକାରେ ବିଜେଡି ପ୍ରାର୍ଥୀଙ୍କୁ ବଦନାମ କରିବାକୁ ବିଜେପି କର୍ମୀ ମସୁଧା ଚଳାଇଥିବା ବେଳେ, ୩ ଜଣଙ୍କୁ ଅଟକ ରଖିଛି ପୋଲିସ ।
ସେହିପରି ସମ୍ବଲପୁରରେ ଭୋଟ୍ ପାଇଁ ଶୁଭଦ୍ରା ଯୋଜନାର ଲୋଭ ଦେଖାଉଛି ବିଜେପି । ଶୁଭଦ୍ରା ଯୋଜନାରେ ଟଙ୍କା ମିଳିବ କହି ବିଜେପିକୁ ଭୋଟ ଦେବାକୁ ଲୋଭ ଦେଖାଉଛନ୍ତି ବିଜେପି କର୍ମୀ । ସହରର ବିଭିନ୍ନ ସ୍ଥାନରେ ବିଜେପି ସୁଭଦ୍ରା ଯୋଜନାର ଲୋଭ ଦେଖାଉଥିବା ଅଭିଯୋଗ ହୋଇଛି ।
ସେପଟେ ପୋଲିସକୁ ଦେଖି ଚିହିଁକି ଉଠିଛନ୍ତି ଖୋର୍ଦ୍ଧା ବିଜେପି ବିଧାନସଭା ଆସନ ପ୍ରାର୍ଥୀ ପ୍ରଶାନ୍ତ ଜଗଦ୍ଦେବ । ଲିଙ୍ଗରାଜ ମନ୍ଦିର ସାମ୍ନାରେ ପୋଲିସକୁ କରିଛନ୍ତି ଦୁର୍ବ୍ୟବହାର । ପୋଲିସ ପ୍ରତି ଅପଶଦ୍ଦ ପ୍ରୟୋଗ କରି ଗାଳି ଦେଇଛନ୍ତି ପ୍ରଶାନ୍ତ । ଯେଉଁ ବ୍ୟକ୍ତି ସାଧାରଣ ଲୋକଙ୍କୁ ହାତ ଉଠାନ୍ତି, ଅପଶଦ୍ଦ ପ୍ରଯୋଗ କରନ୍ତି, କର୍ତ୍ତବ୍ଯରତ ପୋଲିସକୁ ଦୁର୍ବ୍ଯବହାର କରନ୍ତି, ସେ କି ପ୍ରକାର ଲୋକ ପ୍ରତିନିଧି ହେବେ ବୋଲି ସାଧାରଣରେ ସାଧାରଣରେ ଉଠିଛି ପ୍ରଶ୍ନ ।
ଆସନ୍ତାକାଲି ତୃତୀୟ ପର୍ଯ୍ୟାୟ ନିର୍ବାଚନ । ଏବେ ସାଇଲେଣ୍ଟ ପିରିୟଡ ଚାଲିଥିବାବେଳେ ବିଜେପିର ଏକାମ୍ର ନିର୍ବାଚନ ମଣ୍ଡଳୀ ବିଧାୟକ ପ୍ରାର୍ଥୀ ବାବୁ ସିଂ ବରମୁଣ୍ଡା ଗାଁ ଭିତରେ ଟଙ୍କା ବାଣ୍ଟିବା ଘଟଣା ସାମ୍ନାକୁ ଆସିଛି । ନିର୍ବାଚନ ଆଚରଣ ବିଧିକୁ ଖୁଲମଖୁଲା ଉଲ୍ଲଂଘନ କରିଛନ୍ତି ବାବୁ ସିଂ। ଆଜି କୌଣସି ପ୍ରାର୍ଥୀ ପ୍ରଚାର କରି ପାରିବେ ନାହିଁ । ହେଲେ ବାବୁ ସିଂ ନିଜର ସମର୍ଥକମାନଙ୍କ ସହିତ ବରମୁଣ୍ଡା ଗାଁ ଭିତରେ ଡୋର ଟୁ ଡୋର କ୍ୟାମ୍ପେନ କରିବା ସହିତ ଟଙ୍କା ବାଣ୍ଟୁଥିବା ଦେଖି ସ୍ଥାନୀୟ ଲୋକ ଏହାକୁ ବିରୋଧ କରିଥିଲେ । ବିରୋଧ ଦେଖି ତୁରନ୍ତ ଗାଁରୁ ପଳାଇ ଯାଇଥିଲେ ବାବୁ ସିଂ ।
ରାଇରଙ୍ଗପୁରରୁ ବାରିପଦା, ବାଲେଶ୍ବରରୁ କୋରେଇ ମୁଖ୍ୟମନ୍ତ୍ରୀଙ୍କ ମାରାଥନ ପ୍ରଚାର
ଭୁବନେଶ୍ବର: ରାଜ୍ୟରେ ଜୁନ ପହିଲାରେ ଚତୁର୍ଥ ପର୍ଯ୍ୟାୟ ନିର୍ବାଚନ ପାଇଁ ମୁଖ୍ଯମନ୍ତ୍ରୀ ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ମାରାଥନ ପ୍ରଚାର । ପ୍ରଥମେ ରାଇରଙ୍ଗପୁର, ତା’ପରେ ବାରିପଦା, ବାଲେଶ୍ବର ଓ କୋରେଇରେ ବିଜେଡି ପ୍ରାର୍ଥୀଙ୍କ ପାଇଁ ଭୋଟ୍ ମାଗିଲେ ମୁଖ୍ଯମନ୍ତ୍ରୀ । ତାଙ୍କୁ ଦେଖିବାକୁ, ତାଙ୍କଠାରୁ ଦୁଇ ପଦ କଥା ଶୁଣିବାକୁ ବିଜେଡି କର୍ମୀଙ୍କ ମନରେ ଥିଲା ନାହିଁ ନ ଥିବା ଉତ୍ସାହ ।
ନବୀନ ପ୍ରଥମେ ପହଞ୍ଚିଥିଲେ ମୟୂରଭଞ୍ଜ ଜିଲ୍ଲା ରାଇରଙ୍ଗପୁରରେ । ପ୍ରବଳ ଖରା ସତ୍ତ୍ବେ ତାଙ୍କୁ ସେଠାରେ ଅପେକ୍ଷା କରି ରହିଥିଲେ ହଜାର ହଜାର କର୍ମୀ ଓ ସମର୍ଥକ। । ହାତରେ ଶଙ୍ଖ ପ୍ଲାକାର୍ଡ ଓ ମୁହଁରେ ବିଜେଡି ଜିନ୍ଦାବାଦ, ନବୀନ ପଟ୍ଟନାୟକ ଜିନ୍ଦାବାଦର ନାରା । ନବୀନ ପଟ୍ଟନାୟକ ମଞ୍ଚରେ ପହଞ୍ଚିବା ମାତ୍ରେ ସମର୍ଥକମାନେ ଜୋରଦାର କରତାଳି ଦେଇ ସ୍ବାଗତ କରିଥିଲେ । ସମାବେଶରେ ନିଜ ସରକାରର ବିଭିନ୍ନ ଯୋଜନା ସମ୍ପର୍କରେ କହି ମତାମତ ମାଗିଥିଲେ ନବୀନ, ଆଉ ମଞ୍ଚ ତଳୁ ଜନତାଙ୍କ ତରଫରୁ ଆସୁଥିବା ହଁ ଶବ୍ଦରେ ପ୍ରକମ୍ପିତ ହେଉଥିଲା ଅଞ୍ଚଳ । ସଭାରୁ ନବୀନ କହିଥିଲେ, ବିରୋଧୀ ମିଛ କଥା କହୁଛନ୍ତି, କୁମ୍ଭୀର କାନ୍ଦଣା କାନ୍ଦୁଛନ୍ତି । ବିଜେଡିର ଉଭୟ ବିଧାୟକ ଓ ଏମପି ପ୍ରାର୍ଥୀଙ୍କୁ ବିପୁଳ ଭୋଟରେ ଜିତାଇବାକୁ ଆହ୍ବାନ ଦେଇଥିଲେ ମୁଖ୍ଯମନ୍ତ୍ରୀ ।
ରାଇରଙ୍ଗପୁର ପରେ ବାରିପଦାରେ ପହଞ୍ଚିଥିଲେ ମୁଖ୍ଯମନ୍ତ୍ରୀ । ନବୀନ ପହଞ୍ଚିବା ପୂର୍ବରୁ ରୁଣ୍ଡ ହୋଇ ଯାଇଥିଲେ ହଜାର ହଜାର କର୍ମୀ, ନେତା ଓ ସାଧାରଣ ଜନତା । ଏକ ପ୍ରକାର ଜନସମୁଦ୍ର ପାଲଟିଥିଲା ସମାବେଶ ସ୍ଥଳ । ମୁଖ୍ଯମନ୍ତ୍ରୀ ପହଞ୍ଚିବା ପରେ ବିରାଟ ଫୁଲମାଳ ଓ ମହିଳାଙ୍କ ହୁଳହୁଳିରେ ତାଙ୍କୁ ସ୍ବାଗତ କରାଯାଇଥିଲା । ଶଙ୍ଖ ଚିହ୍ନରେ ଭୋଟ ଦେଇ ବିଜେଡିର ଉଭୟ ସାଂସଦ ପ୍ରାର୍ଥୀ ଓ ବିଧାୟକ ପ୍ରାର୍ଥୀଙ୍କୁ ଜିତାଇବାକୁ ନବୀନ ଆହ୍ବାନ ଦେଇଥିଲେ । ସେହିପରି ବିରୋଧୀଙ୍କ ମିଛ ଅପପ୍ରଚାର ପାଇଁ ଭୋଟରେ ସେମାନଙ୍କୁ କଡ଼ା ଜବାବ ଦେବାକୁ ଅପିଲ କରିଥିଲେ କାର୍ତ୍ତିକ ପାଣ୍ଡିଆନ । ଲକ୍ଷ୍ମୀ ବସ୍, କାଳିଆ ଯୋଜନା, BSKY, ଚାନ୍ଦିପୁରର ବିକାଶ ପରି ଉନ୍ନୟନ କାମର ଉଦାହରଣ ଦେଇ ବିଜେଡିକୁ ଭୋଟ ଦେବାକୁ ଆହ୍ଵାନ ଦେଇଥିଲେ ପାଣ୍ଡିଆନ । ଜୁନ ୯ରେ ନବୀନ ପଟ୍ଟନାୟକ ଷଷ୍ଠ ଥର ମୁଖ୍ଯମନ୍ତ୍ରୀ ଭାବେ ଶପଥ ନେବେ ବୋଲି ପାଣ୍ଡିଆନ ଦୃଢ଼ୋକ୍ତି ପ୍ରକାଶ କରିଥିଲେ ।
ବାଲେଶ୍ବରରେ ଥିଲା ତୃତୀୟ ସମାବେଶ । ଏଠାକାର ସଭାସ୍ଥଳର ପରିବେଶ ମଧ୍ଯ ଦେଖିବା ଭଳିଆ ଥିଲା । ଏଠାରେ ବାଲେଶ୍ବରର ବିଜେପି ସାଂସଦ ପ୍ରତାପ ଷଡ଼ଙ୍ଗୀ କିଛି କାମ କରି ନାହାନ୍ତି ବୋଲି ସମାଲୋଚନା କରି କହିଥିଲେ ନବୀନ । ତେଣୁ ଏଥର ଶଙ୍ଖ ଚିହ୍ନରେ ଭୋଟ ଦେଇ ବାଲେଶ୍ବରରୁ ବିଜେଡି ସାଂସଦ ଓ ବିଧାୟକ ପ୍ରାର୍ଥୀଙ୍କୁ ଜିତାଇବାକୁ ଅପିଲ୍ କରିଥିଲେ ମୁଖ୍ଯମନ୍ତ୍ରୀ ।