ନୂଆଦିଲ୍ଲୀ: ସାଇକ୍ଲୋନ ପାଇଁ ସତର୍କତା । ଗୁଜରାଟରୁ ପାକିସ୍ତାନ ଯାଏଁ ହାଇଆଲର୍ଟ । କେରଳ, ମହାରାଷ୍ଟ୍ରରେ ବି ବିପର୍ଯ୍ୟୟର ପ୍ରଭାବ ପଡ଼ିବ। ସମୁଦ୍ରରେ ଉଚ୍ଚ ଜୁଆର ସାଙ୍ଗକୁ ବିଭିନ୍ନ ସ୍ଥାନରେ ଜାରି ରହିଛି ଲଗାଣ ବର୍ଷା । ଆସନ୍ତା ୧୫ ତାରିଖରେ ସ୍ଥଳଭାଗ ଛୁଇଁବ ବାତ୍ୟା ବିପର୍ଯ୍ୟୟ ।

ଏକ୍ସଟ୍ରିମଲି ସିଭିୟର ସାଇକ୍ଲୋନରେ ପରିଣତ ହୋଇ ଆରବ ସାଗରରେ ସ୍ଥଳଭାଗ ଆଡକୁ ବଢୁଛି ବାତ୍ୟା । ସମୁଦ୍ର ଉପକୂଳ ଛୁଇଁବା ବେଳକୁ ବାତ୍ୟା ସାମାନ୍ୟ ଦୁର୍ବଳ ହୋଇଯିବ । ଅତି ଭୀଷଣ ବାତ୍ୟାରେ ପରିଣତ ହୋଇ ଲ୍ୟାଣ୍ଡ ଫଲ କରିବ ବାତ୍ୟା ବିପର୍ଯ୍ୟୟ । ସୌରାଷ୍ଟ୍ର-କଚ୍ଛ ଉପକୂଳ ତଥା ପାକିସ୍ତାନର କରାଚି ଉପକୂଳରେ ସାଇକ୍ଲୋନ ମାଡ ହେବ ବୋଲି ଭାରତୀୟ ପାଣିପାଗ ବିଭାଗ ମହାନିର୍ଦ୍ଦେଶକ ମୃତ୍ୟୁଞ୍ଜୟ ମହାପାତ୍ର ସୂଚନା ଦେଇଛନ୍ତି ।

ଏବେ ପୋରବନ୍ଦରଠାରୁ ପ୍ରାୟ ୩ଶହ କିମି ଦୂର ଦକ୍ଷିଣ-ପଶ୍ଚିମ ଦିଗରେ ରହିଛି ବାତ୍ୟା । ଏହା ଘଣ୍ଟା ପ୍ରତି ୫କିମି ବେଗରେ ସ୍ଥଳଭାଗ ଆଡକୁ ବଢୁଛି । ଲ୍ୟାଣ୍ଡଫଲ ପରେ ବାତ୍ୟା ପ୍ରଭାବରେ ଘଣ୍ଟା ପ୍ରତି ୧୨୫ରୁ ୧୩୦ କିମି ବେଗରେ ପବନ ବହିବା ସହ ଅତି ପ୍ରବଳ ବର୍ଷା ହେବ। ୧୫ ତାରିଖରେ ସୌରାଷ୍ଟ୍ର, କଚ୍ଛ ଜିଲ୍ଲା ପାଇଁ ରେଡ ଆଲର୍ଟ ଜାରି କରାଯାଇଛି । ୨୦ ମିମିରୁ ଅଧିକ ବର୍ଷା ଯୋଗୁ ତଳିଆ ଅଞ୍ଚଳରେ ବନ୍ୟା ଆଶଙ୍କା ରହିଛି ।

ବାତ୍ୟା ଉପକୂଳ ଛୁଇଁବା ସମୟରେ ସମୁଦ୍ରରେ ୨ରୁ୩ ମିଟର ଉଚ୍ଚ ଜୁଆର ଆସିପାରେ । ୧୬ ତାରିଖରେ ବାତ୍ୟା ନର୍ଥ ଗୁଜରାଟ ଓ ସାଉଥ ରାଜସ୍ଥାନ ଆଡ଼କୁ ଗତି କରିବ । ଫଳରେ ବିଭିନ୍ନ ଜିଲ୍ଲାରେ ୪୦ରୁ ୫୦ କିମି ପର୍ଯ୍ୟନ୍ତ ପବନ ଓ ପ୍ରବଳ ବର୍ଷା ହୋଇପାରେ । ସମ୍ଭାବ୍ୟ ବାତ୍ୟା ଯୋଗୁ ଗୁଜରାଟର ତଳିଆ ଅଞ୍ଚଳଗୁଡ଼ିକରେ ସ୍ଥାନାନ୍ତରଣ ପ୍ରକ୍ରିୟା ଆରମ୍ଭ ହୋଇଛି । ଲୋକମାନଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତରଣ ଓ ଆବଶ୍ୟକ ବ୍ୟବସ୍ଥା କରିବାକୁ ପିଏମଓ ପକ୍ଷରୁ ନିର୍ଦ୍ଦେଶ ଦିଆଯାଇଛି । ସେପଟେ ମହାରାଷ୍ଟ୍ରରେ ସମୁଦ୍ର ଅଶାନ୍ତ ସାଙ୍ଗକୁ ବର୍ଷା ଜାରି ରହିଥିବା ବେଳେ ପାଗ ଅନୁକୂଳ ନଥିବାରୁ ମୁମ୍ବାଇ ବିମାନବନ୍ଦରରୁ ଅନେକ ବିମାନ ବାତିଲ କରିଦିଆଯାଇଛି । ବାତ୍ୟା ପାଇଁ ରେଳବାଇ ପକ୍ଷରୁ ବ୍ୟାପକ ପଦକ୍ଷେପ ନିଆଯାଇଛି । କିଛି ଟ୍ରେନକୁ ବାତିଲ କରାଯାଇଥିବା ବେଳେ କଣ୍ଟ୍ରୋଲ ରୁମ ଆକ୍ଟିଭେଟ କରାଯାଇଛି ବୋଲି ପଶ୍ଚିମ ରେଳବାଇ ସିପିଆରଓ ସୂଚନା ଦେଇଛନ୍ତି ।

ବଲାଙ୍ଗୀର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଭିଡିଓ କନଫରେନ୍ସିଂ ଜରିଆରେ ବଲାଙ୍ଗୀର ଜିଲ୍ଲା କଣ୍ଟାବାଞ୍ଜିରେ ଆୟୁବ ଖାଁ ମଲଟି ସ୍ପେଶିଆଲିଟି ହସ୍ପିଟାଲ୍ ଉଦଘାଟନ କରିଛନ୍ତି । ଏହାଦ୍ୱାରା ବଲାଙ୍ଗୀର ଜିଲ୍ଲା ବିଶେଷ କରି କଣ୍ଟାବାଞ୍ଜି ଓ ଟିଟିଲାଗଡ ଅଞ୍ଚଳର ଲୋକମାନେ ଉନ୍ନତମାନର ସ୍ବାସ୍ଥ୍ୟ ସେବା ପାଇ ପାରିବେ ।

ଏଥିପାଇଁ ମୁଖ୍ୟମନ୍ତ୍ରୀ ବିଶିଷ୍ଟ ଜନନେତା ତଥା ସମାଜସେବୀ ଆୟୁବ ଖାଁଙ୍କୁ ଧନ୍ୟବାଦ ଦେଇଛନ୍ତି । ଏହି ଅବସରରେ ମୁଖ୍ୟମନ୍ତ୍ରୀ କହିଛନ୍ତି ଯେ, ମୋ ସରକାରର ନୀତି ହେଉଛି ପ୍ରତ୍ୟେକ ଜୀବନ ମୂଲ୍ୟବାନ । ଏହି ଆଦର୍ଶରେ ଆମେ କାମ କରୁଛୁ ଏବଂ ସମାଜର ସବୁଠାରୁ ଗରିବ ଲୋକକୁ ଉତ୍ତମ ଚିକିତ୍ସା ଯୋଗାଇ ଦେବା ପାଇଁ କାମ କରୁଛୁ । ଗତ ଦଶ ବର୍ଷ ମଧ୍ୟରେ ରାଜ୍ୟରେ ସ୍ୱାସ୍ଥ୍ୟସେବା କ୍ଷେତ୍ରରେ ରୂପାନ୍ତର ଆସିଛି । ନୂଆ ନୂଆ ମେଡିକାଲ କଲେଜ ସ୍ଥାପନ, ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ଓ ନିରାମୟ ଆଦି ଯୋଜନାର କାର୍ଯ୍ୟକାରିତା ଯୋଗୁ ଗରିବ ଲୋକମାନେ ବିନା ମୂଲ୍ୟରେ ଉତ୍ତମ ଚିକତ୍ସା ଓ ଔଷଧ ପାଇ ପାରୁଛନ୍ତି ।

ବଲାଙ୍ଗୀରରେ ସନ୍ଥ ଭୀମଭୋଇ ମେଡିକାଲ କଲେଜ ସହିତ ରାଜ୍ୟରେ ୮ଟି ନୂଆ ମେଡିକାଲ କଲେଜ ସ୍ଥାପନ ଦ୍ୱାରା ରାଜ୍ୟରେ ସ୍ୱାସ୍ଥ୍ୟ ଭିତ୍ତିଭୂମି ଉନ୍ନତ ହୋଇଛି । ପ୍ରତି ବର୍ଷ ରାଜ୍ୟରୁ ୨ହଜାରରୁ ଅଧିକ ଡାକ୍ତର ବାହାରୁଛନ୍ତି । ଚଳିତ ବର୍ଷ ଶେଷ ସୁଦ୍ଧା ରାଜ୍ୟର ସମସ୍ତ ଡାକ୍ତର ପଦବୀ ପୂରଣ କରାଯିବ। ଉଦଘାଟନୀ କାର୍ଯ୍ୟକ୍ରମରେ ସ୍ୱାସ୍ଥ୍ୟ ମନ୍ତ୍ରୀ ନିରଞ୍ଜନ ପୂଜାରୀ, ଯୋଜନା ଓ ସଂଯୋଜନ ମନ୍ତ୍ରୀ ରାଜେନ୍ଦ୍ର ପ୍ରସାଦ ଢୋଲକିଆ, ହସ୍ତତନ୍ତ୍ର, ବୟନ ଓ ହସ୍ତଶିଳ୍ପ ମନ୍ତ୍ରୀ ରୀତା ସାହୁ, ସାଂସଦ ବସନ୍ତ ପଣ୍ଡା, ସାଂସଦ ନିରଞ୍ଜନ ବିଶି ପ୍ରମୁଖ ଯୋଗ ଦେଇଥିଲେ ।

କଟକ: ବଲିଉଡର ଜଣେ ପ୍ରତିଷ୍ଠିତ କଣ୍ଠଶିଳ୍ପୀଙ୍କ ନାଁରେ ସାଂଘାତିକ ଅଭିଯୋଗ । କଣ୍ଠଶିଳ୍ପୀ ସୌରିନ ଭଟ୍ଟଙ୍କ ବିରୋଧରେ ସାଂଘାତିକ ଅଭିଯୋଗ ହୋଇଛି । ମୁମ୍ବାଇର ଏହି କଣ୍ଠଶିଳ୍ପୀଙ୍କ ବିରୋଧରେ ଗୁରୁତର ଅଭିଯୋଗ ଆଣିଛନ୍ତି କଟକର ଜଣେ ଯୁବତୀ ।

ମିଛ ପ୍ରତିଶ୍ରୁତି ଦେଇ ପ୍ରତାରଣା, ମାନସିକ ଓ ଶାରୀରିକ ଶୋଷଣର ଅଭିଯୋଗ ହୋଇଛି। ବିବାହ କରିବାକୁ କହି ଟଙ୍କା ହଡ଼ପ କରିଛନ୍ତି କଣ୍ଠଶିଳ୍ପୀ । ଏ ନେଇ ଏତଲା ପରେ ଘଟଣାକୁ ପୋଲିସ୍ ଗୁରୁତର ସହ ନେଇଛି । ଯୌନ ନିର୍ଯାତନା, ମାନସିକ ନିର୍ଯାତନା ଦେବା ସହ ଟଙ୍କା ହଡ଼ପ ନେଇ ଅଭିଯୋଗ ହୋଇଛି । ଏତଲା ଆଧାରରେ 376 2n, 493, 341, 417, 323, 506 ଧାରାରେ ମାମଲା ରୁଜୁ ହୋଇଛି ।

ଯୁବତୀ ଜଣଙ୍କ ଏକ ଘରୋଇ ବ୍ୟାଙ୍କରେ କାର୍ଯ୍ୟରତ ଅଛନ୍ତି । କଣ୍ଠଶିଳ୍ପୀଙ୍କ ସହିତ ତାଙ୍କର ପ୍ରଥମେ କଟକରେ ଦେଖା ହୋଇଥିଲା । ପରେ ସେମାନଙ୍କ ମଧ୍ୟରେ ପ୍ରେମ ସମ୍ପର୍କ ଗଢ଼ି ଉଠିଥିଲା । ଯୁବତୀ ଜଣଙ୍କ ପରେ ମୁମ୍ବାଇରେ ଥିବା ତାଙ୍କ ବ୍ୟାଙ୍କ ଶାଖାକୁ ବଦଳି ହୋଇଯାଇଥିଲେ ।

ଦୀର୍ଘଦିନର ସମ୍ପର୍କ ମଧ୍ୟରେ ମିଛ ପ୍ରତିଶ୍ରୁତି ଦେଇ ଲକ୍ଷାଧିକ ଟଙ୍କା ନେଇଥିବା ଯୁବତୀ ଅଭିଯୋଗ କରିଛନ୍ତି । ବିବାହ କରିବାକୁ ଯୁବତୀଙ୍କୁ କଣ୍ଠଶିଳ୍ପୀ ପ୍ରତିଶ୍ରୁତି ଦେଇ ସମୟ ଗଡ଼ାଇ ଚାଲିଥିଲେ । କଣ୍ଠଶିଳ୍ପୀ ବିବାହିତ ବୋଲି ଯୁବତୀ ଜାଣିନଥିଲେ । ଜାଣିବା ପରେ ସେ କଣ୍ଠଶିଳ୍ପୀଙ୍କ ସହ ସମ୍ପର୍କ ତୁଟାଇବାକୁ କହିବା ସହ ଟଙ୍କା ଫେରାଇବାକୁ କହିଥିଲେ । ତେବେ କଣ୍ଠଶିଳ୍ପୀ ଟଙ୍କା ନ ଫେରାଇ ତାଙ୍କୁ ଧମକ ଦେଉଥିବା ଯୁବତୀ ଅଭିଯୋଗ କରିଛନ୍ତି । ନ୍ୟାୟ ଦାବିରେ ଥାନାରେ ଏତଲା ଦେଇଛନ୍ତି ।

ଏହି ମାମଲାକୁ ଗୁରୁତର ସହ ନେଇ ଯୁବତୀଙ୍କ ଡାକ୍ତରୀ ପରୀକ୍ଷା କରିବା ସହ ତଦନ୍ତ ଆରମ୍ଭ କରିଛି କଟକ ମହିଳା ଥାନା ପୋଲିସ୍ ।